¹

В коне́ць, о́троку Госпо́дню Дави́ду, я́же глаго́ла Го́сподеві словеса́ пі́сні сея́, в день, в о́ньже ізба́ви єго́ Госпо́дь от руки́ всіх враг єго́ і із руки́ Сау́ли; і рече́: 17.

²

Возлюблю́ Тя, Го́споди, крі́посте моя́;

³

Госпо́дь — Утвержде́ніє моє́, і Прибі́жище моє́, і Ізба́витель мой, Бог мой, Помо́щник мой, і упова́ю на Него́; Защи́титель мой, і рог спасе́нія моєго́, і Засту́пник мой.

⁴

Хваля́ призову́ Го́спода і от враг мої́х спасу́ся.

⁵

Одержа́ша м'я болі́зні сме́ртния, і пото́ци беззако́нія см'ято́ша м'я;

⁶

болі́зні а́дови обидо́ша м'я, предвари́ша м'я сі́ті сме́ртния.

⁷

І внегда́ скорбі́ти мі, призва́х Го́спода і к Бо́гу моєму́ воззва́х; усли́ша от хра́ма свята́го Своєго́ глас мой, і вопль мой пред Ним вни́деть во у́ші Єго́.

⁸

І подви́жеся і тре́петна бисть земля́, і основа́нія гор см'ято́шася і подвиго́шася, я́ко прогні́вася на ня Бог.

⁹

Взи́де дим гні́вом Єго́, і огнь от лиця́ Єго́ воспла́мениться; у́гліє возгорі́ся от Него́.

¹⁰

І приклони́ небеса́ і сни́де, і мрак под нога́ма Єго́.

¹¹

І взи́де на херуви́ми і леті́, леті́ на крилу́ ві́треню.

¹²

І положи́ тьму закро́в Свой; о́крест Єго́ селе́ніє Єго́; темна́ вода́ во о́блаціх возду́шних.

¹³

От облиста́нія пред Ним о́блаци пройдо́ша, град і у́гліє о́гненноє.

¹⁴

І возгремі́ с небесе́ Госпо́дь, і Ви́шній даде́ глас Свой.

¹⁵

Низпосла́ стрі́ли і разгна́ я, і мо́лнії умно́жи і см'яте́ я.

¹⁶

І яви́шася істо́чници водні́ї, і откри́шася основа́нія вселе́нния от запреще́нія Твоєго́, Го́споди, от дохнове́нія ду́ха гні́ва Твоєго́.

¹⁷

Низпосла́ с висоти́ і прия́т м'я, восприя́т м'я от вод мно́гих.

¹⁸

Ізба́вить м'я от враго́в мої́х си́льних і от ненави́дящих м'я; я́ко утверди́шася па́че мене́.

¹⁹

Предвари́ша м'я в день озлобле́нія моєго́; і бисть Госпо́дь Утвержде́ніє моє́.

²⁰

І ізведе́ м'я на широту́; ізба́вить м'я, я́ко восхоті́ м'я.

²¹

І возда́сть мі Госпо́дь по пра́вді моє́й, і по чистоті́ руку́ моє́ю возда́сть мі,

²²

я́ко сохрани́х путі́ Госпо́дні і не нече́ствовах от Бо́га моєго́.

²³

Я́ко вся судьби́ Єго́ предо мно́ю, і оправда́нія Єго́ не отступи́ша от мене́.

²⁴

І бу́ду непоро́чен с Ним і сохраню́ся от беззако́нія моєго́.

²⁵

І возда́сть мі Госпо́дь по пра́вді моє́й і по чистоті́ руку́ моє́ю пред очи́ма Єго́.

²⁶

С преподо́бним преподо́бен бу́деши, і с му́жем непови́нним непови́нен бу́деши,

²⁷

і со ізбра́нним ізбра́н бу́деши, і со стропти́вим разврати́шися.

²⁸

Я́ко Ти лю́ди смире́нния спасе́ши і о́чі го́рдих смири́ши.

²⁹

Я́ко Ти просвіти́ши світи́льник мой, Го́споди; Бо́же мой, просвіти́ши тьму мою́.

³⁰

Я́ко Тобо́ю ізба́влюся от іскуше́нія, і Бо́гом мої́м прейду́ сті́ну.

³¹

Бог мой, непоро́чен путь Єго́: словеса́ Госпо́дня разжже́на. Защи́титель єсть всіх упова́ющих на Него́.

³²

Я́ко кто Бог, ра́зві Го́спода? Іли́ кто Бог, ра́зві Бо́га на́шего?

³³

Бог препоясу́яй м'я си́лою, і положи́ непоро́чен путь мой;

³⁴

соверша́яй но́зі мої́ я́ко єле́ні, і на висо́ких поставля́яй м'я;

³⁵

науча́яй ру́ці мої́ на брань, і положи́л єси́ лук мі́дян ми́шця моя́;

³⁶

і дал мі єси́ защище́ніє спасе́нія, і десни́ця Твоя́ восприя́т м'я; і наказа́ніє Твоє́ іспра́вить м'я в коне́ць, і наказа́ніє Твоє́ то м'я научи́ть.

³⁷

Ушири́л єси́ стопи́ моя́ подо мно́ю, і не ізнемого́сті плесні́ мої́.

³⁸

Пожену́ враги́ моя́, і пости́гну я, і не возвращу́ся, до́ндеже сконча́ються;

³⁹

оскорблю́ їх, і не возмо́гуть ста́ти, паду́ть под нога́ма мої́ма.

⁴⁰

І препоя́сал м'я єси́ си́лою на брань, сп'ял єси́ вся востаю́щия на м'я под м'я.

⁴¹

І враго́в мої́х дал мі єси́ хребе́т і ненави́дящия м'я потреби́л єси́.

⁴²

Воззва́ша, і не бі спаса́яй; ко Го́споду, і не усли́ша їх.

⁴³

І істню́ я я́ко прах пред лице́м ві́тра, я́ко бре́ніє путі́й погла́жду я.

⁴⁴

Ізба́виши м'я от преріка́нія люді́й; поста́виши м'я во главу́ язи́ков; лю́діє, ї́хже не ві́діх, рабо́таша мі,

⁴⁵

в слух у́ха послу́шаша м'я. Си́нове чужді́ї солга́ша мі,

⁴⁶

си́нове чужді́ї обетша́ша і охромо́ша от стезь свої́х.

⁴⁷

Жив Госпо́дь, і благослове́н Бог, і да вознесе́ться Бог спасе́нія моєго́,

⁴⁸

Бог дая́й отмще́ніє мні і покори́вий лю́ди под м'я.

⁴⁹

Ізба́витель мой от враг мої́х гнівли́вих; от возстаю́щих на м'я вознесе́ши м'я, от му́жа непра́ведна ізба́виши м'я.

⁵⁰

Сего́ ра́ди іспові́мся Тебі́ во язи́ціх, Го́споди, і і́мені Твоєму́ пою́;

⁵¹

велича́яй спасе́нія царе́ва і творя́й ми́лость христу́ Своєму́ Дави́ду і сі́мені єго́ до ві́ка.

1001

Сла́ва: