¹

В коне́ць, о сині́х Коре́йових, псало́м, 46.

¹

Въ коне́цъ, о сынѣ́хъ Коре́овыхъ, псало́мъ.

²

Всі язи́ци, восплещі́те рука́ми, воскли́кніте Бо́гу гла́сом ра́дованія;

²

Вси́ язы́цы, восплещи́те рука́ми, воскли́кните Бо́гу гла́сомъ ра́дованія:

³

я́ко Госпо́дь Ви́шній стра́шен, Цар ве́лій по всей землі́;

³

я́ко Госпо́дь Вы́шній стра́шенъ, Ца́рь ве́лій по все́й земли́:

⁴

покори́ лю́ди нам і язи́ки под но́ги на́ша;

⁴

покори́ лю́ди на́мъ и язы́ки подъ но́ги на́ша:

⁵

ізбра́ нам достоя́нія своє́, добро́ту Іа́ковлю, ю́же возлюби́.

⁵

избра́ на́мъ достоя́нія своє́, добро́ту Іа́ковлю, ю́же возлюби́.

⁶

Взи́де Бог в воскликнове́нії, Госпо́дь во гла́сі тру́бні.

⁶

Взы́де Бо́гъ въ воскликнове́ніи, Госпо́дь во гла́сѣ тру́бнѣ.

⁷

По́йте Бо́гу на́шему, по́йте; по́йте Царе́ві на́шему, по́йте;

⁷

По́йте Бо́гу на́шему, по́йте: по́йте Царе́ви на́шему, по́йте.

⁸

я́ко Цар всея́ землі́ Бог, по́йте разу́мно.

⁸

Я́ко Ца́рь всея́ земли́ Бо́гъ, по́йте разу́мно.

⁹

Воцари́ся Бог над язи́ки; Бог сіди́ть на престо́лі святі́м Своє́м.

⁹

Воцари́ся Бо́гъ надъ язы́ки: Бо́гъ сѣди́тъ на престо́лѣ святѣ́мъ Своє́мъ.

¹⁰

Кня́зі лю́дстії собра́шася с Бо́гом Авраа́млим; я́ко Бо́жії держа́внії землі́ зіло́ вознесо́шася.

¹⁰

Кня́зи лю́дстіи собра́шася съ Бо́гомъ Авраа́млимъ: я́ко Бо́жіи держа́вніи земли́ зѣло́ вознесо́шася.