¹

И҆ бы́сть сло́во гдⷭ҇не рꙋко́ю і҆ꙋ́а сы́на а҆нані́ева ко ваа́сѣ, гл҃ѧ:

¹

И бы́сть сло́во Госпо́дне руко́ю іу́а сы́на Анані́єва ко Ваа́сѣ, глаго́ля:

²

поне́же вознесо́хъ тѧ̀ ѿ землѝ и҆ да́хъ тѧ̀ вла́стелѧ над̾ людьмѝ мои́ми і҆и҃лемъ, и҆ поше́лъ є҆сѝ пꙋте́мъ і҆еровоа́млимъ и҆ вве́лъ є҆сѝ въ грѣ́хъ лю́ди моѧ̑ і҆и҃лѧ, є҆́же прогнѣ́вати мѧ̀ сꙋ́етными и҆́хъ:

²

поне́же вознесо́хъ тя́ от земли́ и да́хъ тя́ вла́стеля надъ людьми́ мои́ми Ізра́илемъ, и поше́лъ єси́ путе́мъ ієровоа́млимъ и вве́лъ єси́ въ грѣ́хъ лю́ди моя́ Ізра́иля, є́же прогнѣ́вати мя́ су́єтными и́хъ:

³

сѐ, а҆́зъ ѿве́ргꙋ наслѣ́дїе ваа́сы и҆ наслѣ́дїе до́мꙋ є҆гѡ̀, и҆ сотворю̀ до́мъ тво́й ꙗ҆́кѡ до́мъ і҆еровоа́ма сы́на нава́това:

³

се́, а́зъ отве́ргу наслѣ́діє Ваа́сы и наслѣ́діє до́му єго́, и сотворю́ до́мъ тво́й я́ко до́мъ ієровоа́ма сы́на нава́това:

⁴

оу҆ме́ршаго ваа́сова во гра́дѣ снѣдѧ́тъ є҆го̀ псѝ, и҆ оу҆ме́ршаго на по́ли снѣдѧ́тъ є҆го̀ пти̑цы небє́сныѧ.

⁴

уме́ршаго Ваа́сова во гра́дѣ снѣдя́тъ єго́ пси́, и уме́ршаго на по́ли снѣдя́тъ єго́ пти́цы небе́сныя.

⁵

И҆ прѡ́чаѧ слове́съ ваа́совыхъ, и҆ всѧ̑ ꙗ҆̀же сотворѝ, и҆ си̑льнаѧ є҆гѡ̀, не се́ ли, сꙋ́ть пи̑сана въ кни́зѣ слове́съ дні́й царе́й і҆и҃левыхъ;

⁵

И про́чая слове́съ Ваа́совыхъ, и вся́ я́же сотвори́, и си́льная єго́, не се́ ли, су́ть пи́сана въ кни́зѣ слове́съ дні́й царе́й Ізра́илевыхъ?

⁶

И҆ оу҆́спе ваа́са со ѻ҆тцы̑ свои́ми, и҆ погребе́нъ бы́сть во ѳе́рсѣ, и҆ воцари́сѧ и҆ла̀ сы́нъ є҆гѡ̀ вмѣ́стѡ є҆гѡ̀.

⁶

И у́спе Ваа́са со отцы́ свои́ми, и погребе́нъ бы́сть во Ѳе́рсѣ, и воцари́ся Ила́ сы́нъ єго́ вмѣ́сто єго́.

⁷

И҆ рꙋко́ю і҆ꙋ́а сы́на а҆нані́и прⷪ҇ро́ка гл҃а гдⷭ҇ь на ваа́сꙋ и҆ на до́мъ є҆гѡ̀ всю̀ ѕло́бꙋ, ю҆́же сотворѝ пред̾ гдⷭ҇емъ, є҆́же прогнѣ́вати є҆го̀ дѣла́ми рꙋ́къ свои́хъ, бы́ти є҆мꙋ̀ ꙗ҆́коже и҆ до́мꙋ і҆еровоа́млю, и҆ ѡ҆ є҆́же є҆мꙋ̀ пораже́нꙋ бы́ти.

⁷

И руко́ю іу́а сы́на Анані́и проро́ка глаго́ла Госпо́дь на Ваа́су и на до́мъ єго́ всю́ зло́бу, ю́же сотвори́ предъ Го́сподемъ, є́же прогнѣ́вати єго́ дѣла́ми ру́къ свои́хъ, бы́ти єму́ я́коже и до́му ієровоа́млю, и о є́же єму́ пораже́ну бы́ти.

⁸

Въ лѣ́то два́десѧть шесто́е а҆́сы царѧ̀ і҆ꙋ́дина, ца́рствова и҆ла̀ сы́нъ ваа́синъ над̾ і҆и҃лемъ во ѳе́рсѣ два̀ лѣ̑та.

⁸

Въ лѣ́то два́десять шесто́є а́сы царя́ Іу́дина, ца́рствова Ила́ сы́нъ Ваа́синъ надъ Ізра́илемъ во Ѳе́рсѣ два́ лѣ́та.

⁹

И҆ воздви́же (гдⷭ҇ь) на него̀ ѻ҆́троки є҆гѡ̀, и҆ замврі́а воево́дꙋ полови́ны ко́нникѡвъ: и҆ и҆ла̀ бѣ̀ во ѳе́рсѣ оу҆пива́ѧсѧ, и҆ пїѧ́нъ сы́й въ домꙋ̀ а҆́рсы домострои́телѧ во ѳе́рсѣ:

⁹

И воздви́же [Госпо́дь] на него́ о́троки єго́, и замврі́а воєво́ду полови́ны ко́нниковъ: и Ила́ бѣ́ во Ѳе́рсѣ упива́яся, и пія́нъ сы́й въ дому́ а́рсы домострои́теля во Ѳе́рсѣ:

¹⁰

и҆ вни́де замврі́й, и҆ поразѝ є҆го̀, и҆ оу҆мертвѝ є҆го̀, въ лѣ́то два́десѧть седмо́е а҆́сы царѧ̀ і҆ꙋ́дина, и҆ воцари́сѧ вмѣ́стѡ є҆гѡ̀.

¹⁰

и вни́де замврі́й, и порази́ єго́, и умертви́ єго́, въ лѣ́то два́десять седмо́є а́сы царя́ Іу́дина, и воцари́ся вмѣ́сто єго́.

¹¹

И҆ бы́сть ца́рствꙋющꙋ є҆мꙋ̀, внегда̀ сѣ́сти є҆мꙋ̀ на престо́лѣ є҆гѡ̀, и҆ и҆збѝ ве́сь до́мъ ваа́совъ: не ѡ҆ста́ви є҆мꙋ̀ моча́щагѡ къ стѣнѣ̀, и҆ оу҆́жикѡвъ є҆гѡ̀, и҆ дрꙋ́га є҆гѡ̀.

¹¹

И бы́сть ца́рствующу єму́, внегда́ сѣ́сти єму́ на престо́лѣ єго́, и изби́ ве́сь до́мъ Ваа́совъ: не оста́ви єму́ моча́щаго къ стѣнѣ́, и у́жиковъ єго́, и дру́га єго́.

¹²

И҆ и҆збѝ замврі́й ве́сь до́мъ ваа́совъ по гл҃ꙋ гдⷭ҇ню, є҆го́же гл҃а на до́мъ ваа́совъ и҆ ко і҆ꙋ́ю прⷪ҇ро́кꙋ,

¹²

И изби́ замврі́й ве́сь до́мъ Ваа́совъ по глаго́лу Госпо́дню, єго́же глаго́ла на до́мъ Ваа́совъ и ко іу́ю проро́ку,

¹³

ѡ҆ всѣ́хъ грѣсѣ́хъ ваа́совыхъ и҆ и҆лы̀ сы́на є҆гѡ̀, ꙗ҆́кѡ сотворѝ согрѣши́ти і҆и҃лю, є҆́же разгнѣ́вати гдⷭ҇а бг҃а і҆и҃лева сꙋ́етными и҆́хъ.

¹³

о всѣ́хъ грѣсѣ́хъ Ваа́совыхъ и илы́ сы́на єго́, я́ко сотвори́ согрѣши́ти Ізра́илю, є́же разгнѣ́вати Го́спода Бо́га Ізра́илева су́єтными и́хъ.

¹⁴

Прѡ́чаѧ же слове́съ и҆лы̀, ꙗ҆̀же сотворѝ, не се́ ли, сїѧ̑ пи̑сана въ кни́зѣ слове́съ дні́й царе́й і҆и҃левыхъ;

¹⁴

Про́чая же слове́съ илы́, я́же сотвори́, не се́ ли, сія́ пи́сана въ кни́зѣ слове́съ дні́й царе́й Ізра́илевыхъ?

¹⁵

Въ лѣ́то два́десѧть седмо́е а҆́сы царѧ̀ і҆ꙋ́дина ца́рствова замврі́й се́дмь дні́й во ѳе́рсѣ: и҆ бѣ̀ по́лкъ і҆и҃левъ на гаваѳѡ́нъ и҆ноплеме́нническїй.

¹⁵

Въ лѣ́то два́десять седмо́є а́сы царя́ Іу́дина ца́рствова замврі́й се́дмь дні́й во Ѳе́рсѣ: и бѣ́ по́лкъ Ізра́илевъ на гаваѳо́нъ иноплеме́нническій.

¹⁶

И҆ слы́шаша лю́дїе сꙋ́щїи въ полцѣ̀, глаго́лющихъ: преврати́сѧ замврі́й и҆ поразѝ царѧ̀. И҆ поста́виша царе́мъ во і҆и҃ли а҆мврі́а воево́дꙋ, и҆́же над̾ во́ѧми во і҆и҃ли въ де́нь ѻ҆́нъ въ полцѣ̀.

¹⁶

И слы́шаша лю́діє су́щіи въ полцѣ́, глаго́лющихъ: преврати́ся замврі́й и порази́ царя́. И поста́виша царе́мъ во Ізра́или Амврі́а воєво́ду, и́же надъ во́ями во Ізра́или въ де́нь о́нъ въ полцѣ́.

¹⁷

И҆ взы́де а҆мврі́й и҆ ве́сь і҆и҃ль съ ни́мъ ѿ гаваѳѡ́на и҆ ѡ҆бсѣ́де ѳе́рсꙋ.

¹⁷

И взы́де Амврі́й и ве́сь Ізра́иль съ ни́мъ от гаваѳо́на и обсѣ́де Ѳе́рсу.

¹⁸

И҆ бы́сть є҆гда̀ оу҆ви́дѣ замврі́й, ꙗ҆́кѡ предвзѧ́тъ бы́сть гра́дъ є҆гѡ̀, и҆ вни́де во внꙋ́треннїй до́мъ ца́рскїй, и҆ зажжѐ над̾ собо́ю до́мъ царе́въ ѻ҆гне́мъ, и҆ оу҆́мре

¹⁸

И бы́сть єгда́ уви́дѣ замврі́й, я́ко предвзя́тъ бы́сть гра́дъ єго́, и вни́де во вну́тренній до́мъ ца́рскій, и зажже́ надъ собо́ю до́мъ царе́въ огне́мъ, и у́мре

¹⁹

за грѣхѝ своѧ̑, ꙗ҆̀же сотворѝ, сотворе́нїѧ ра́ди лꙋка́вагѡ пред̾ гдⷭ҇емъ, є҆́же ходи́ти пꙋте́мъ і҆еровоа́ма сы́на нава́това, и҆ во грѣсѣ́хъ є҆гѡ̀, ꙗ҆́же сотворѝ, ꙗ҆́кѡ введѐ во грѣ́хъ і҆и҃лѧ.

¹⁹

за грѣхи́ своя́, я́же сотвори́, сотворе́нія ра́ди лука́ваго предъ Го́сподемъ, є́же ходи́ти путе́мъ ієровоа́ма сы́на нава́това, и во грѣсѣ́хъ єго́, я́же сотвори́, я́ко введе́ во грѣ́хъ Ізра́иля.

²⁰

И҆ прѡ́чаѧ слове́съ замврі́иныхъ, и҆ навѣ́ты є҆гѡ̀, ꙗ҆̀же совѣща̀, не се́ ли, сїѧ̑ сꙋ́ть пи̑сана въ кни́гахъ слове́съ дні́й царе́й і҆и҃левыхъ;

²⁰

И про́чая слове́съ замврі́иныхъ, и навѣ́ты єго́, я́же совѣща́, не се́ ли, сія́ су́ть пи́сана въ кни́гахъ слове́съ дні́й царе́й Ізра́илевыхъ?

²¹

Тогда̀ раздѣли́шасѧ лю́дїе і҆и҃лстїи, по́лъ люді́й бы́сть за ѳамні́емъ сы́номъ гѡна́ѳовымъ, ꙗ҆́кѡ да ца́рствꙋетъ ѻ҆́нъ, и҆ по́лъ люді́й бы́сть со а҆мврі́емъ.

²¹

Тогда́ раздѣли́шася лю́діє Ізра́илстіи, по́лъ люді́й бы́сть за Ѳамні́ємъ сы́номъ Гона́ѳовымъ, я́ко да ца́рствуєтъ о́нъ, и по́лъ люді́й бы́сть со Амврі́ємъ.

²²

Лю́дїе же сꙋ́щїи по а҆мврі́и превозмого́ша люді́й бы́вшихъ со ѳамні́емъ сы́номъ гѡна́ѳовымъ И҆ оу҆́мре ѳамні́й и҆ і҆ѡра́мъ бра́тъ є҆гѡ̀ во вре́мѧ ѻ҆́но, и҆ воцари́сѧ а҆мврі́й по ѳамні́и.

²²

Лю́діє же су́щіи по Амврі́и превозмого́ша люді́й бы́вшихъ со Ѳамні́ємъ сы́номъ Гона́ѳовымъ И у́мре Ѳамні́й и Іора́мъ бра́тъ єго́ во вре́мя о́но, и воцари́ся Амврі́й по Ѳамні́и.

²³

Въ лѣ́то три́десѧть пе́рвое а҆́сы царѧ̀ і҆ꙋ́дина ца́рствова а҆мврі́й во і҆и҃ли двана́десѧть лѣ́тъ, во ѳе́рсѣ же ше́сть лѣ́тъ ца́рствова.

²³

Въ лѣ́то три́десять пе́рвоє а́сы царя́ Іу́дина ца́рствова Амврі́й во Ізра́или двана́десять лѣ́тъ, во Ѳе́рсѣ же ше́сть лѣ́тъ ца́рствова.

²⁴

И҆ кꙋпѝ а҆мврі́й го́рꙋ семерѡ́нъ оу҆ семи́ра господи́на горы̀ двѣма̀ тала̑нты сребра̀, и҆ созда̀ го́рꙋ, и҆ наречѐ и҆́мѧ горѣ̀, ю҆́же созда̀, во и҆́мѧ семи́ра господи́на горы̀ ѻ҆́ныѧ, гора̀ семирѡ́нъ.

²⁴

И купи́ Амврі́й го́ру семеро́нъ у семи́ра господи́на горы́ двѣма́ тала́нты сребра́, и созда́ го́ру, и нарече́ и́мя горѣ́, ю́же созда́, во и́мя семи́ра господи́на горы́ о́ныя, гора́ семиро́нъ.

²⁵

И҆ сотворѝ а҆мврі́й лꙋка́вое пред̾ гдⷭ҇емъ, и҆ прелꙋка́внова па́че всѣ́хъ бы́вшихъ пред̾ ни́мъ:

²⁵

И сотвори́ Амврі́й лука́воє предъ Го́сподемъ, и прелука́внова па́че всѣ́хъ бы́вшихъ предъ ни́мъ:

²⁶

и҆ хожда́ше по всѣ̑мъ пꙋтє́мъ і҆еровоа́ма сы́на нава́това и҆ во грѣсѣ́хъ є҆гѡ̀, и҆́миже введѐ во грѣ́хъ і҆и҃лѧ, є҆́же разгнѣ́вати гдⷭ҇а бг҃а і҆и҃лева въ сꙋ́етныхъ и҆́хъ.

²⁶

и хожда́ше по всѣ́мъ путе́мъ ієровоа́ма сы́на нава́това и во грѣсѣ́хъ єго́, и́миже введе́ во грѣ́хъ Ізра́иля, є́же разгнѣ́вати Го́спода Бо́га Ізра́илева въ су́єтныхъ и́хъ.

²⁷

И҆ прѡ́чаѧ слове́съ а҆мврі́евыхъ, и҆ всѧ̑ ꙗ҆́же сотворѝ, и҆ всѧ̑ си́ла є҆гѡ̀, не се́ ли, сїѧ̑ пи̑сана въ кни́зѣ слове́съ дні́й царе́й і҆и҃левыхъ;

²⁷

И про́чая слове́съ Амврі́євыхъ, и вся́ я́же сотвори́, и вся́ си́ла єго́, не се́ ли, сія́ пи́сана въ кни́зѣ слове́съ дні́й царе́й Ізра́илевыхъ?

²⁸

И҆ оу҆́спе а҆мврі́й со ѻ҆тцы̑ свои́ми, и҆ погребе́нъ бы́сть въ самарі́и. И҆ воцари́сѧ а҆хаа́въ сы́нъ є҆гѡ̀ вмѣ́стѡ є҆гѡ̀.

²⁸

И у́спе Амврі́й со отцы́ свои́ми, и погребе́нъ бы́сть въ самарі́и. И воцари́ся Ахаа́въ сы́нъ єго́ вмѣ́сто єго́.

²⁹

А҆хаа́въ же сы́нъ а҆мврі́евъ воцари́сѧ над̾ і҆и҃лемъ въ лѣ́то три́десѧть ѻ҆смо́е а҆́сы царѧ̀ і҆ꙋ́дина: ца́рствова же а҆хаа́въ сы́нъ а҆мврі́евъ над̾ і҆и҃лемъ въ самарі́и два́десѧть два̀ лѣ̑та:

²⁹

Ахаа́въ же сы́нъ Амврі́євъ воцари́ся надъ Ізра́илемъ въ лѣ́то три́десять осмо́є а́сы царя́ Іу́дина: ца́рствова же Ахаа́въ сы́нъ Амврі́євъ надъ Ізра́илемъ въ самарі́и два́десять два́ лѣ́та:

³⁰

и҆ сотворѝ а҆хаа́въ лꙋка́вое пред̾ гдⷭ҇емъ, и҆ прелꙋка́внова па́че всѣ́хъ бы́вшихъ пре́жде є҆гѡ̀:

³⁰

и сотвори́ Ахаа́въ лука́воє предъ Го́сподемъ, и прелука́внова па́че всѣ́хъ бы́вшихъ пре́жде єго́:

³¹

и҆ не бѣ̀ є҆мꙋ̀ дово́лно, є҆́же ходи́ти во грѣсѣ́хъ і҆еровоа́ма сы́на нава́това, и҆ взѧ̀ женꙋ̀ і҆езаве́ль дще́рь і҆еѳеваа́ла царѧ̀ сїдѡ́нскагѡ: и҆ и҆́де, и҆ нача̀ слꙋжи́ти ваа́лꙋ, и҆ поклони́сѧ є҆мꙋ̀,

³¹

и не бѣ́ єму́ дово́лно, є́же ходи́ти во грѣсѣ́хъ ієровоа́ма сы́на нава́това, и взя́ жену́ Ієзаве́ль дще́рь Ієѳеваа́ла царя́ Сідо́нскаго: и и́де, и нача́ служи́ти Ваа́лу, и поклони́ся єму́,

³²

и҆ поста́ви тре́бище ваа́лꙋ въ домꙋ̀ ме́рзостей є҆гѡ̀, є҆го́же созда̀ въ самарі́и:

³²

и поста́ви тре́бище Ваа́лу въ дому́ ме́рзостей єго́, єго́же созда́ въ самарі́и:

³³

и҆ сотворѝ а҆хаа́въ дꙋбра́вꙋ: и҆ приложѝ а҆хаа́въ твори́ти прогнѣ̑ванїѧ, є҆́же разгнѣ́вати гдⷭ҇а бг҃а і҆и҃лева и҆ дꙋ́шꙋ свою̀ погꙋби́ти: ѕлодѣ́йствова па́че всѣ́хъ царе́й і҆и҃левыхъ бы́вшихъ пре́жде є҆гѡ̀.

³³

и сотвори́ Ахаа́въ дубра́ву: и приложи́ Ахаа́въ твори́ти прогнѣ́ванія, є́же разгнѣ́вати Го́спода Бо́га Ізра́илева и ду́шу свою́ погуби́ти: злодѣ́йствова па́че всѣ́хъ царе́й Ізра́илевыхъ бы́вшихъ пре́жде єго́.

³⁴

Во дни̑ же є҆гѡ̀ созда̀ а҆хїи́лъ веѳи́лѧнинъ і҆ерїхѡ́нъ: на а҆вїрѡ́нѣ перворо́днѣмъ свое́мъ ѡ҆снова̀ є҆го̀, и҆ на сегꙋ́вѣ ю҆нѣ́йшемъ свое́мъ поста́ви двє́ри є҆гѡ̀, по гл҃ꙋ гдⷭ҇ню, є҆го́же гл҃а рꙋко́ю і҆исꙋ́са сы́на наѵи́на.

³⁴

Во дни́ же єго́ созда́ Ахіи́лъ Веѳи́лянинъ ієріхо́нъ: на Авіро́нѣ перворо́днѣмъ своє́мъ основа́ єго́, и на сегу́вѣ юнѣ́йшемъ своє́мъ поста́ви две́ри єго́, по глаго́лу Госпо́дню, єго́же глаго́ла руко́ю Іису́са сы́на нави́на.