¹

И҆ бѣ̀ ца́рь соломѡ́нъ ца́рствꙋѧй над̾ і҆и҃лемъ.

¹

И бѣ́ ца́рь Соломо́нъ ца́рствуяй надъ Ізра́илемъ.

²

И҆ сі́и старѣ̑йшины и҆̀же бѣ́ша съ ни́мъ:

²

И сі́и старѣ́йшины и́же бѣ́ша съ ни́мъ:

³

а҆за́рїа сы́нъ садѡ́ковъ, жре́цъ: є҆лїа́фъ и҆ а҆хі́а сы́нове си̑вины, книгѡ́чїи: и҆ і҆ѡсафа́тъ сы́нъ а҆хїлꙋ́довъ, напомина́тель:

³

аза́ріа сы́нъ садо́ковъ, жре́цъ: Єліа́фъ и Ахі́а сы́нове си́вины, книго́чіи: и Іосафа́тъ сы́нъ Ахілу́довъ, напомина́тель:

⁴

и҆ ване́а сы́нъ і҆ѡда́евъ над̾ си́лою: и҆ садѡ́къ и҆ а҆вїа́ѳаръ, і҆ере́є:

⁴

и ване́а сы́нъ Іода́євъ надъ си́лою: и садо́къ и Авіа́ѳаръ, ієре́є:

⁵

и҆ а҆за́рїа сы́нъ наѳа́нь над̾ настоѧ́телми: и҆ завꙋ́ѳъ сы́нъ наѳа́нь дрꙋ́гъ царе́въ:

⁵

и аза́ріа сы́нъ наѳа́нь надъ настоя́телми: и Заву́ѳъ сы́нъ наѳа́нь дру́гъ царе́въ:

⁶

и҆ а҆хїса́ръ бѣ̀ строи́тель, и҆ є҆лїа́въ сы́нъ сафа́товъ над̾ ѻ҆те́чествомъ: и҆ а҆дѡнїра́мъ сы́нъ а҆вдѡ́новъ над̾ да́ньми.

⁶

и Ахіса́ръ бѣ́ строи́тель, и Єліа́въ сы́нъ Сафа́товъ надъ оте́чествомъ: и Адоніра́мъ сы́нъ Авдо́новъ надъ да́ньми.

⁷

И҆ оу҆ соломѡ́на бѧ́хꙋ двана́десѧть приста̑вникъ над̾ всѣ́мъ і҆и҃лемъ, є҆́же подаѧ́ти царю̀ и҆ до́мꙋ є҆гѡ̀: по мцⷭ҇ꙋ въ лѣ́тѣ быва́ше є҆ди́нъ, є҆́же подаѧ́ти,

⁷

И у Соломо́на бя́ху двана́десять приста́вникъ надъ всѣ́мъ Ізра́илемъ, є́же подая́ти царю́ и до́му єго́: по ме́сяцу въ лѣ́тѣ быва́ше єди́нъ, є́же подая́ти,

⁸

и҆ сїѧ̑ и҆мена̀ и҆́хъ: ве́нъ сы́нъ ѡ҆́ровъ на горѣ̀ є҆фре́мли, є҆ди́нъ:

⁸

и сія́ имена́ и́хъ: ве́нъ сы́нъ о́ровъ на горѣ́ Єфре́мли, єди́нъ:

⁹

сы́нъ дака́рь во махема́тѣ и҆ во висаламі́нѣ и҆ веѳсамѵ́сѣ и҆ є҆лѡ́нѣ, да́же до веѳана́на, є҆ди́нъ:

⁹

сы́нъ дака́рь во Махема́тѣ и во висаламі́нѣ и веѳсами́сѣ и Єло́нѣ, да́же до веѳана́на, єди́нъ:

¹⁰

сы́нъ се́довъ во а҆равѡ́ѳѣ, сегѡ̀ сѡхѡ̀ и҆ всѧ̀ землѧ̀ ѻ҆фе́рова:

¹⁰

сы́нъ се́довъ во Араво́ѳѣ, сего́ сохо́ и вся́ земля́ Офе́рова:

¹¹

сы́на а҆мїнада́влѧ всѧ̀ нефѳадѡ́ръ: тефа́ѳъ дщѝ соломѡ́нѧ бѣ̀ є҆мꙋ̀ въ женꙋ̀, є҆ди́нъ:

¹¹

сы́на Амінада́вля вся́ нефѳадо́ръ: тефа́ѳъ дщи́ Соломо́ня бѣ́ єму́ въ жену́, єди́нъ:

¹²

вана̀ сы́нъ а҆хїлꙋ́ѳовъ во і҆ѳаана́хѣ и҆ магеддѡ̀ и҆ ве́сь до́мъ саны́и, и҆́же при сесаѳа́нѣ под̾ є҆зрае́лемъ, и҆ ѿ виѳса́на да́же до савелмаꙋ́ла, да́же до маеве́ръ лꙋка́мъ, є҆ди́нъ:

¹²

вана́ сы́нъ Ахілу́ѳовъ во Іѳаана́хѣ и Магеддо́ и ве́сь до́мъ саны́и, и́же при сесаѳа́нѣ подъ єзрає́лемъ, и от Виѳса́на да́же до Савелмау́ла, да́же до Маєве́ръ лука́мъ, єди́нъ:

¹³

сы́нъ наве́ровъ въ равѡ́ѳѣ галаа́дстѣмъ: семꙋ̀ ѻ҆́бласть є҆рга́въ въ васа́нѣ, шестьдесѧ́тъ градѡ́въ вели́кихъ ѡ҆гражде́нныхъ стѣна́ми, и҆ верєѝ мѣ̑дѧны, є҆ди́нъ:

¹³

сы́нъ наве́ровъ въ раво́ѳѣ Галаа́дстѣмъ: сему́ о́бласть єрга́въ въ Васа́нѣ, шестьдеся́тъ градо́въ вели́кихъ огражде́нныхъ стѣна́ми, и вереи́ мѣ́дяны, єди́нъ:

¹⁴

а҆хїнада́въ сы́нъ са́ддовъ во маанаі́мѣ:

¹⁴

Ахінада́въ сы́нъ са́ддовъ во маанаі́мѣ:

¹⁵

а҆хїмаа́съ въ нефѳалі́мѣ: и҆ се́й поѧ́тъ васема́ѳꙋ дще́рь соломѡ́ню въ женꙋ̀, є҆ди́нъ:

¹⁵

Ахімаа́съ въ Нефѳалі́мѣ: и се́й поя́тъ Васема́ѳу дще́рь Соломо́ню въ жену́, єди́нъ:

¹⁶

ваана̀ сы́нъ хꙋсі́инъ во а҆си́рѣ и҆ во ваалѡ́ѳѣ, є҆ди́нъ:

¹⁶

Ваана́ сы́нъ хусі́инъ во Аси́рѣ и во Ваало́ѳѣ, єди́нъ:

¹⁷

і҆ѡсафа́тъ сы́нъ фарꙋ́евъ во і҆ссаха́рѣ,

¹⁷

Іосафа́тъ сы́нъ фару́євъ во Іссаха́рѣ,

¹⁸

семе́й сы́нъ и҆лы̀ во венїамі́нѣ,

¹⁸

Семе́й сы́нъ илы́ во Веніамі́нѣ,

¹⁹

гаве́ръ сы́нъ а҆да́евъ въ землѝ галаа́дѣ, въ землѝ сиѡ́на царѧ̀ є҆севѡ́нска и҆ ѡ҆́га царѧ̀ васа́нска, и҆ наси́фъ є҆ди́нъ въ землѝ і҆ꙋ́довѣ.

¹⁹

гаве́ръ сы́нъ Ада́євъ въ земли́ Галаа́дѣ, въ земли́ сио́на царя́ єсево́нска и о́га царя́ Васа́нска, и наси́фъ єди́нъ въ земли́ Іу́довѣ.

²⁰

І҆ꙋ́да и҆ і҆и҃ль мно́зи а҆́ки песо́къ и҆́же при мо́ри во мно́жествѣ, ꙗ҆дꙋ́ще и҆ пїю́ще и҆ веселѧ́щесѧ.

²⁰

Іу́да и Ізра́иль мно́зи а́ки песо́къ и́же при мо́ри во мно́жествѣ, яду́ще и пію́ще и веселя́щеся.

²¹

И҆ соломѡ́нъ бѣ̀ нача́лствꙋѧй во всѣ́хъ ца́рствахъ, ѿ рѣкѝ землѝ фѷлїсті́мскїѧ и҆ да́же до предѣ̑лъ є҆гѵ́петскихъ, (и҆ бѧ́хꙋ) приносѧ́ще да́ры и҆ рабо́тающе соломѡ́нꙋ во всѧ̑ дни̑ живота̀ є҆гѡ̀.

²¹

И Соломо́нъ бѣ́ нача́лствуяй во всѣ́хъ ца́рствахъ, от рѣки́ земли́ Филісті́мскія и да́же до предѣ́лъ Єги́петскихъ, [и бя́ху] принося́ще да́ры и рабо́тающе Соломо́ну во вся́ дни́ живота́ єго́.

²²

И҆ сїѧ̑ потрє́бнаѧ соломѡ́нꙋ въ де́нь є҆ди́нъ: три́десѧть мѣ́ръ мꙋкѝ семїда́лныѧ и҆ шестьдесѧ́тъ мѣ́ръ мꙋкѝ смѣ́шаныѧ,

²²

И сія́ потре́бная Соломо́ну въ де́нь єди́нъ: три́десять мѣ́ръ муки́ семіда́лныя и шестьдеся́тъ мѣ́ръ муки́ смѣ́шаныя,

²³

де́сѧть телцє́въ и҆збра́нныхъ и҆ два́десѧть волѡ́въ тꙋ́чныхъ и҆ сто̀ ѻ҆ве́цъ, кромѣ̀ є҆ле́ней и҆ се́рнъ и҆ пти́цъ, и҆збра̑нна ѿ и҆збра́нныхъ тꙋ̑чна.

²³

де́сять телце́въ избра́нныхъ и два́десять воло́въ ту́чныхъ и сто́ ове́цъ, кромѣ́ єле́ней и се́рнъ и пти́цъ, избра́нна от избра́нныхъ ту́чна.

²⁴

Поне́же бѣ̀ нача́лствꙋѧй во всѣ́хъ ѡ҆б̾ ѡ҆́нъ по́лъ рѣкѝ ѿ ѳа́ѱы и҆ да́же до га́зы, над̾ всѣ́ми цармѝ ѡ҆б̾ ѡ҆́нъ по́лъ рѣкѝ, и҆ ми́ръ бѣ̀ є҆мꙋ̀ ѿ всѣ́хъ стра́нъ ѡ҆́крестъ.

²⁴

Поне́же бѣ́ нача́лствуяй во всѣ́хъ объ о́нъ по́лъ рѣки́ от Ѳа́псы и да́же до Га́зы, надъ всѣ́ми царми́ объ о́нъ по́лъ рѣки́, и ми́ръ бѣ́ єму́ от всѣ́хъ стра́нъ о́крестъ.

²⁵

И҆ живѧ́хꙋ і҆ꙋ́да и҆ і҆и҃ль безпеча́льнѡ, кі́йждо под̾ вїногра́домъ свои́мъ и҆ под̾ смоко́вницею свое́ю, ꙗ҆дꙋ́ще и҆ пїю́ще, ѿ да́на и҆ да́же до вирсаві́и, во всѧ̑ дни̑ соломѡ́на.

²⁵

И живя́ху Іу́да и Ізра́иль безпеча́льно, кі́йждо подъ віногра́домъ свои́мъ и подъ смоко́вницею своє́ю, яду́ще и пію́ще, от Да́на и да́же до вирсаві́и, во вся́ дни́ Соломо́на.

²⁶

И҆ бѧ́ше оу҆ соломѡ́на четы́редесѧть ты́сѧщъ кобыли́цъ въ колєсни́цы и҆ два́десѧть ты́сѧщъ кѡ́нникъ.

²⁶

И бя́ше у Соломо́на четы́редесять ты́сящъ кобыли́цъ въ колесни́цы и два́десять ты́сящъ ко́нникъ.

²⁷

И҆ та́кѡ подаѧ́хꙋ приста́вники царю̀ соломѡ́нꙋ, и҆ всѧ̑ повелѣ̑ннаѧ на трапе́зꙋ царе́вꙋ, кі́йждо въ мцⷭ҇ъ сво́й, не премѣнѧ́юще словесѐ:

²⁷

И та́ко подая́ху приста́вники царю́ Соломо́ну, и вся́ повелѣ́нная на трапе́зу царе́ву, кі́йждо въ ме́сяцъ сво́й, не премѣня́юще словесе́:

²⁸

и҆ ꙗ҆чме́нь и҆ плє́вы ко́нємъ, и҆ колесни́цами привозѧ́хꙋ на мѣ́сто, и҆дѣ́же бѣ̀ ца́рь, кі́йждо по чи́нꙋ своемꙋ̀.

²⁸

и ячме́нь и пле́вы ко́немъ, и колесни́цами привозя́ху на мѣ́сто, идѣ́же бѣ́ ца́рь, кі́йждо по чи́ну своєму́.

²⁹

И҆ дадѐ гдⷭ҇ь смы́слъ и҆ мꙋ́дрость соломѡ́нꙋ мно́гꙋ ѕѣлѡ̀, и҆ широтꙋ̀ се́рдца, ꙗ҆́кѡ песо́къ и҆́же при мо́ри:

²⁹

И даде́ Госпо́дь смы́слъ и му́дрость Соломо́ну мно́гу зѣло́, и широту́ се́рдца, я́ко песо́къ и́же при мо́ри:

³⁰

и҆ оу҆мно́жисѧ мꙋ́дрость соломѡ́нова ѕѣлѡ̀, па́че смы́сла всѣ́хъ дре́внихъ человѣ̑къ и҆ па́че всѣ́хъ смы́сленныхъ є҆гѵ́петскихъ:

³⁰

и умно́жися му́дрость Соломо́нова зѣло́, па́че смы́сла всѣ́хъ дре́внихъ человѣ́къ и па́че всѣ́хъ смы́сленныхъ Єги́петскихъ:

³¹

и҆ оу҆мꙋдри́сѧ па́че всѣ́хъ человѣ̑къ, и҆ оу҆мꙋдри́сѧ па́че геѳа́на є҆зраилі́тнна и҆ є҆ма́на, и҆ халка́да и҆ да́рды, сы́на сама́дова, и҆ просла́висѧ и҆́мѧ є҆гѡ̀ во всѣ́хъ страна́хъ ѡ҆́крестъ.

³¹

и умудри́ся па́че всѣ́хъ человѣ́къ, и умудри́ся па́че геѳа́на єзраилі́тина и Єма́на, и халка́да и да́рды, сы́на сама́дова, и просла́вися и́мя єго́ во всѣ́хъ страна́хъ о́крестъ.

³²

И҆ и҆зглаго́ла соломѡ́нъ трѝ ты́сѧщы при́тчей, и҆ бы́ша пѣ̑сни є҆гѡ̀ пѧ́ть ты́сѧщъ:

³²

И изглаго́ла Соломо́нъ три́ ты́сящы при́тчей, и бы́ша пѣ́сни єго́ пя́ть ты́сящъ:

³³

и҆ глаго́ла ѡ҆ дре́вѣхъ, ѿ ке́дра и҆́же въ лїва́нѣ и҆ да́же до ѵ҆ссѡ́па и҆сходѧ́щагѡ и҆з̾ стѣны̀: и҆ глаго́ла ѡ҆ скотѣ́хъ и҆ ѡ҆ пти́цахъ и҆ ѡ҆ га́дѣхъ и҆ ѡ҆ ры́бахъ.

³³

и глаго́ла о дре́вѣхъ, от ке́дра и́же въ Ліва́нѣ и да́же до иссо́па исходя́щаго изъ стѣны́: и глаго́ла о скотѣ́хъ и о пти́цахъ и о га́дѣхъ и о ры́бахъ.

³⁴

И҆ прихожда́хꙋ всѝ лю́дїе слы́шати премꙋ́дрость соломѡ́ню: и҆ прїима́ше да́ры ѿ всѣ́хъ царе́й земны́хъ, є҆ли́цы слы́шахꙋ премꙋ́дрость є҆гѡ̀.

³⁴

И прихожда́ху вси́ лю́діє слы́шати прему́дрость Соломо́ню: и пріима́ше да́ры от всѣ́хъ царе́й земны́хъ, єли́цы слы́шаху прему́дрость єго́.