¹

И҆ бы́сть въ четыредесѧ́тное и҆ въ четвертосо́тное лѣ́то и҆схо́да сынѡ́въ і҆и҃левыхъ и҆з̾ є҆гѵ́пта, въ лѣ́то четве́ртое, въ мцⷭ҇ъ вторы́й, ца́рствꙋющꙋ царю̀ соломѡ́нꙋ над̾ і҆и҃лемъ, и҆ созда̀ хра́мъ гдⷭ҇еви.

¹

И бы́сть въ четыредеся́тноє и въ четвертосо́тноє лѣ́то исхо́да сыно́въ Ізра́илевыхъ изъ Єги́пта, въ лѣ́то четве́ртоє, въ ме́сяцъ вторы́й, ца́рствующу царю́ Соломо́ну надъ Ізра́илемъ, и созда́ хра́мъ Го́сподеви.

²

И҆ хра́мъ, є҆го́же созда̀ соломѡ́нъ ца́рь гдⷭ҇еви, (бѧ́ше) шестьдесѧ́тъ лакѡ́тъ долгота̀ є҆гѡ̀, и҆ два́десѧти лакѡ́тъ широта̀ є҆гѡ̀, и҆ три́десѧти лакѡ́тъ высота̀ є҆гѡ̀:

²

И хра́мъ, єго́же созда́ Соломо́нъ ца́рь Го́сподеви, [бя́ше] шестьдеся́тъ лако́тъ долгота́ єго́, и два́десяти лако́тъ широта́ єго́, и три́десяти лако́тъ высота́ єго́:

³

и҆ притво́ръ, и҆́же пред̾ лице́мъ хра́ма, два́десѧти лакѡ́тъ долгота̀ є҆гѡ̀ въ широтꙋ̀ до́мꙋ, и҆ десѧтѝ лакѡ́тъ широта̀ є҆гѡ̀ пред̾ лице́мъ до́мꙋ: и҆ созда̀ хра́мъ, и҆ совершѝ є҆го̀.

³

и притво́ръ, и́же предъ лице́мъ хра́ма, два́десяти лако́тъ долгота́ єго́ въ широту́ до́му, и десяти́ лако́тъ широта́ єго́ предъ лице́мъ до́му: и созда́ хра́мъ, и соверши́ єго́.

⁴

И҆ сотворѝ хра́мꙋ ѻ҆́кна преклонє́ны сокровє́ны.

⁴

И сотвори́ хра́му о́кна преклоне́ны сокрове́ны.

⁵

И҆ созда̀ на стѣнѣ̀ до́мꙋ притво́ры ѡ҆́колѡ хра́ма и҆ даві́ра.

⁵

И созда́ на стѣнѣ́ до́му притво́ры о́коло хра́ма и даві́ра.

⁶

И҆ сотворѝ бока̀ ѡ҆́колѡ, бо́къ и҆́же съ ни́зꙋ, пѧтѝ лакѡ́тъ широта̀ є҆гѡ̀, и҆ сре́днїй шестѝ лакѡ́тъ широта̀, и҆ тре́тїй седмѝ лакѡ́тъ широта̀ є҆гѡ̀: поне́же разстоѧ́нїе до́мꙋ сотворѝ ѡ҆́крестъ внѣꙋ́дꙋ хра́ма, ꙗ҆́кѡ да не досѧза́ютъ стѣ́нъ хра́ма.

⁶

И сотвори́ бока́ о́коло, бо́къ и́же съ ни́зу, пяти́ лако́тъ широта́ єго́, и сре́дній шести́ лако́тъ широта́, и тре́тій седми́ лако́тъ широта́ єго́: поне́же разстоя́ніє до́му сотвори́ о́крестъ внѣу́ду хра́ма, я́ко да не досяза́ютъ стѣ́нъ хра́ма.

⁷

И҆ хра́мꙋ зи́ждемꙋ сꙋ́щꙋ, ка́менїемъ краесѣко́мымъ нете́санымъ созда́сѧ: мла́тъ же, и҆ тесли́ца, и҆ всѧ́кое ѻ҆рꙋ́дїе желѣ́зно не слы́шасѧ въ хра́мѣ, є҆гда̀ созида́тисѧ є҆мꙋ̀.

⁷

И хра́му зи́ждему су́щу, ка́меніємъ краєсѣко́мымъ нете́санымъ созда́ся: мла́тъ же, и тесли́ца, и вся́коє ору́діє желѣ́зно не слы́шася въ хра́мѣ, єгда́ созида́тися єму́.

⁸

И҆ двє́ри бо́ка ни́жнѧгѡ под̾ стѣно́ю хра́ма десно́ю, и҆ и҆звїе́нный восхо́дъ до среди́ны, а҆ ѿ среди́ны до трекро́вныхъ.

⁸

И две́ри бо́ка ни́жняго подъ стѣно́ю хра́ма десно́ю, и извіє́нный восхо́дъ до среди́ны, а от среди́ны до трекро́вныхъ.

⁹

И҆ созда̀ хра́мъ, и҆ совершѝ є҆го̀: и҆ ѡ҆бста́ви хра́мъ дска́ми ке́дровыми.

⁹

И созда́ хра́мъ, и соверши́ єго́: и обста́ви хра́мъ дска́ми ке́дровыми.

¹⁰

И҆ сотворѝ вѧза̑нїѧ ѡ҆́крестъ всегѡ̀ хра́ма, пѧ́ть лакѡ́тъ въ высотꙋ̀ є҆гѡ̀, и҆ свѧза̀ вѧза́нїе дре́вомъ ке́дровымъ.

¹⁰

И сотвори́ вяза́нія о́крестъ всего́ хра́ма, пя́ть лако́тъ въ высоту́ єго́, и связа́ вяза́ніє дре́вомъ ке́дровымъ.

¹¹

И҆ бы́сть сло́во гдⷭ҇не къ соломѡ́нꙋ, гл҃ющее:

¹¹

И бы́сть сло́во Госпо́дне къ Соломо́ну, глаго́лющеє:

¹²

хра́мъ се́й є҆го́же ты̀ созида́еши, а҆́ще по́йдеши по за́повѣдемъ мои̑мъ, и҆ сꙋдбы̑ моѧ̑ сотвори́ши, и҆ сохрани́ши всѧ̑ повелѣ̑нїѧ моѧ̑, є҆́же пребыва́ти въ ни́хъ, оу҆твержꙋ̀ сло́во моѐ съ тобо́ю, є҆́же гл҃ахъ даві́дꙋ ѻ҆тцꙋ̀ твоемꙋ̀,

¹²

хра́мъ се́й єго́же ты́ созида́єши, а́ще по́йдеши по за́повѣдемъ мои́мъ, и судьбы́ моя́ сотвори́ши, и сохрани́ши вся́ повелѣ́нія моя́, є́же пребыва́ти въ ни́хъ, утвержу́ сло́во моє́ съ тобо́ю, є́же глаго́лахъ даві́ду отцу́ твоєму́,

¹³

и҆ вселю́сѧ посредѣ̀ сынѡ́въ і҆и҃левыхъ, и҆ не ѡ҆ста́влю люді́й мои́хъ і҆и҃лѧ.

¹³

и вселю́ся посредѣ́ сыно́въ Ізра́илевыхъ, и не оста́влю люді́й мои́хъ Ізра́иля.

¹⁴

И҆ созда̀ соломѡ́нъ хра́мъ, и҆ сконча̀ є҆го̀.

¹⁴

И созда́ Соломо́нъ хра́мъ, и сконча́ єго́.

¹⁵

И҆ созда̀ стѣ́ны хра́мꙋ внꙋ́трь дре́вомъ ке́дровымъ, ѿ землѝ хра́ма и҆ да́же до стѣ́нъ и҆ да́же до верха̀: ѡ҆́колѡ ѡ҆бста́ви содержа̑щаѧ древа́ми внꙋтрьꙋ́дꙋ и҆ оу҆крѣпѝ внꙋ́трь хра́ма бока́ми пе́ѵговыми.

¹⁵

И созда́ стѣ́ны хра́му вну́трь дре́вомъ ке́дровымъ, от земли́ хра́ма и да́же до стѣ́нъ и да́же до верха́: о́коло обста́ви содержа́щая древа́ми внутрьу́ду и укрѣпи́ вну́трь хра́ма бока́ми пе́вговыми.

¹⁶

И҆ созда̀ два́десѧти лакѡ́тъ ѿ кра́ѧ стѣны̀ бо́къ є҆ди́нъ ѿ землѝ да́же до верха̀: и҆ сотворѝ є҆мꙋ̀ внꙋ́трь ѿ даві́ра стѣ́нꙋ до ст҃а̑ѧ ст҃ы́хъ.

¹⁶

И созда́ два́десяти лако́тъ от кра́я стѣны́ бо́къ єди́нъ от земли́ да́же до верха́: и сотвори́ єму́ вну́трь от даві́ра стѣ́ну до свята́я святы́хъ.

¹⁷

И҆ четы́редесѧти лакѡ́тъ бѧ́ше хра́мъ: се́й (є҆́сть) хра́мъ внꙋ́треннѣйшїй.

¹⁷

И четы́редесяти лако́тъ бя́ше хра́мъ: се́й [є́сть] хра́мъ вну́треннѣйшій.

¹⁸

И҆ ѿ ке́дра во хра́мѣ внꙋ́трь поста́ви плете́нїе и҆ дщи̑цы и҆ ваѧ̑нїѧ всѧ̑ ке́дрѡва: ка́мень не ꙗ҆влѧ́шесѧ.

¹⁸

И от ке́дра во хра́мѣ вну́трь поста́ви плете́ніє и дщи́цы и вая́нія вся́ ке́дрова: ка́мень не явля́шеся.

¹⁹

Пред̾ лице́мъ даві́ра, посредѣ̀ хра́ма внꙋ́трь оу҆гото́ва поста́вити та́мѡ кївѡ́тъ завѣ́та гдⷭ҇нѧ.

¹⁹

Предъ лице́мъ даві́ра, посредѣ́ хра́ма вну́трь угото́ва поста́вити та́мо ківо́тъ завѣ́та Госпо́дня.

²⁰

И҆ пред̾ лице́мъ даві́ра два́десѧти лакѡ́тъ долгота̀, и҆ два́десѧти лакѡ́тъ широта̀, и҆ два́десѧти лакѡ́тъ высота̀ є҆гѡ̀, и҆ ѡ҆б̾ѧ́тъ є҆го̀ зла́томъ чи́стымъ: и҆ сотворѝ ѻ҆лта́рь ке́дровый: и҆ повлечѐ соломѡ́нъ хра́мъ внꙋ́трь зла́томъ чи́стымъ, и҆ пригвоздѝ гвоздмѝ златы́ми пред̾ лице́мъ даві́ра, и҆ ѡ҆б̾ѧ́тъ и҆̀ зла́томъ.

²⁰

И предъ лице́мъ даві́ра два́десяти лако́тъ долгота́, и два́десяти лако́тъ широта́, и два́десяти лако́тъ высота́ єго́, и объя́тъ єго́ зла́томъ чи́стымъ: и сотвори́ олта́рь ке́дровый: и повлече́ Соломо́нъ хра́мъ вну́трь зла́томъ чи́стымъ, и пригвозди́ гвоздми́ златы́ми предъ лице́мъ даві́ра, и объя́тъ и́ зла́томъ.

²¹

И҆ ве́сь хра́мъ ѡ҆б̾ѧ́тъ зла́томъ до сконча́нїѧ всегѡ̀ хра́ма.

²¹

И ве́сь хра́мъ объя́тъ зла́томъ до сконча́нія всего́ хра́ма.

²²

И҆ всѐ внꙋ́трь даві́ра покры̀ зла́томъ.

²²

И все́ вну́трь даві́ра покры́ зла́томъ.

²³

И҆ сотворѝ въ даві́рѣ два̀ херꙋві̑ма ѿ дре́въ кѷпарі́сныхъ, де́сѧть лакѡ́тъ мѣ́рою вели́чество:

²³

И сотвори́ въ даві́рѣ два́ херуві́ма от дре́въ кипарі́сныхъ, де́сять лако́тъ мѣ́рою вели́чество:

²⁴

и҆ пѧтѝ лакѡ́тъ крило̀ херꙋві́ма є҆ди́нагѡ, и҆ пѧтѝ лакѡ́тъ крило̀ є҆гѡ̀ второ́е, десѧтѝ лакѡ́тъ ѿ кра́ѧ крила̀ є҆гѡ̀ до кра́ѧ крила̀ є҆гѡ̀:

²⁴

и пяти́ лако́тъ крило́ херуві́ма єди́наго, и пяти́ лако́тъ крило́ єго́ второ́є, десяти́ лако́тъ от кра́я крила́ єго́ до кра́я крила́ єго́:

²⁵

и҆ десѧтѝ лакѡ́тъ та́кожде (мѣ́ра) херꙋві́мꙋ второ́мꙋ, мѣ́ра є҆ди́на соверше́нїе є҆ди́но ѻ҆бои́мъ херꙋві́мѡмъ:

²⁵

и десяти́ лако́тъ та́кожде [мѣ́ра] херуві́му второ́му, мѣ́ра єди́на соверше́ніє єди́но обои́мъ херуві́момъ:

²⁶

и҆ высота̀ херꙋві́ма є҆ди́нагѡ де́сѧть лакѡ́тъ, та́кожде и҆ второ́мꙋ херꙋві́мꙋ.

²⁶

и высота́ херуві́ма єди́наго де́сять лако́тъ, та́кожде и второ́му херуві́му.

²⁷

И҆ поста́ви ѻ҆́ба херꙋві̑ма посредѣ̀ хра́ма внꙋ́треннѧгѡ: и҆ простира́хꙋ кри́ла своѧ̑, и҆ досѧза́ше крило̀ є҆ди́но до стѣны̀ хра́ма, и҆ крило̀ дрꙋга́гѡ херꙋві́ма досѧза́ше до стѣны̀ вторы́ѧ: и҆ кри́ла и҆́хъ ꙗ҆̀же бѧ́хꙋ посредѣ̀ хра́ма, каса́шесѧ крило̀ съ крило́мъ:

²⁷

И поста́ви о́ба херуві́ма посредѣ́ хра́ма вну́тренняго: и простира́ху кри́ла своя́, и досяза́ше крило́ єди́но до стѣны́ хра́ма, и крило́ друга́го херуві́ма досяза́ше до стѣны́ вторы́я: и кри́ла и́хъ я́же бя́ху посредѣ́ хра́ма, каса́шеся крило́ съ крило́мъ:

²⁸

и҆ ѡ҆б̾ѧ̑ты бы́ша херꙋві́мы зла́томъ.

²⁸

и объя́ты бы́ша херуві́мы зла́томъ.

²⁹

И҆ на всѣ́хъ стѣна́хъ хра́ма ѡ҆́колѡ ваѧ̑нїѧ написа̀ подо́бїемъ херꙋві́мѡвъ, и҆ фі́нїки, и҆ и҆зва̑ѧнна произница̑ющаѧ внꙋтрьꙋ́дꙋ и҆ внѣꙋ́дꙋ.

²⁹

И на всѣ́хъ стѣна́хъ хра́ма о́коло вая́нія написа́ подо́біємъ херуві́мовъ, и фі́ніки, и изва́янна произница́ющая внутрьу́ду и внѣу́ду.

³⁰

И҆ помо́стъ хра́ма и҆з̾ внꙋтрьꙋ́дꙋ и҆ внѣꙋ́дꙋ ѡ҆б̾ѧ́тъ зла́томъ.

³⁰

И помо́стъ хра́ма изъ внутрьу́ду и внѣу́ду объя́тъ зла́томъ.

³¹

И҆ вхо́дꙋ даві́ра сотворѝ двє́ри ѿ дре́въ сме́рчїихъ, и҆ пра́ги пѧтери̑чны,

³¹

И вхо́ду даві́ра сотвори́ две́ри от дре́въ сме́рчіихъ, и пра́ги пятери́чны,

³²

и҆ дво́и двє́ри ѿ дре́въ пе́ѵговыхъ, и҆ и҆зваѧ̑нїѧ на ни́хъ и҆зва̑ѧна, херꙋві́мы, и҆ фі́нїки, и҆ дщи̑цы простє́ртыѧ, и҆ ѡ҆б̾ѧ́тъ ѧ҆̀ зла́томъ, и҆ бѧ́ше зла́томъ оу҆стро́ено до херꙋві́мѡвъ и҆ до фі́нїкѡвъ.

³²

и дво́и две́ри от дре́въ пе́вговыхъ, и извая́нія на ни́хъ изва́яна, херуві́мы, и фі́ніки, и дщи́цы просте́ртыя, и объя́тъ я́ зла́томъ, и бя́ше зла́томъ устро́єно до херуві́мовъ и до фі́ніковъ.

³³

И҆ та́кѡ сотворѝ вратѡ́мъ хра́ма: и҆ пра́ги ѿ дре́въ сме́рчїихъ, притво́ры четверогꙋ́бѡ.

³³

И та́ко сотвори́ врато́мъ хра́ма: и пра́ги от дре́въ сме́рчіихъ, притво́ры четверогу́бо.

³⁴

И҆ на ѻ҆бои́хъ дверѧ́хъ древа̀ пе́ѵгѡва: два̀ затвѡ́ра две́рь є҆ди́на и҆ верєѝ и҆́хъ, и҆ два̀ затвѡ́ра две́рь втора́ѧ враща́ющаѧсѧ въ себѣ̀,

³⁴

И на обои́хъ дверя́хъ древа́ пе́вгова: два́ затво́ра две́рь єди́на и вереи́ и́хъ, и два́ затво́ра две́рь втора́я враща́ющаяся въ себѣ́,

³⁵

(на ни́хже сотворѝ) и҆зва̑ѧнныѧ херꙋві́мы и҆ фі́нїки, и҆ дщи̑цы простє́ртыѧ, и҆ ѡ҆б̾ѧ̑тыѧ зла́томъ свѣ́шенымъ на и҆з̾ѡбраже́нїе.

³⁵

[на ни́хже сотвори́] изва́янныя херуві́мы и фі́ніки, и дщи́цы просте́ртыя, и объя́тыя зла́томъ свѣ́шенымъ на изображе́ніє.

³⁶

И҆ созда̀ дво́ръ внꙋ́треннїй: въ трѝ рѧда̀ нете́саныхъ, и҆ рѧ́дъ те́санагѡ ке́дра ѡ҆́колѡ.

³⁶

И созда́ дво́ръ вну́тренній: въ три́ ряда́ нете́саныхъ, и ря́дъ те́санаго ке́дра о́коло.

³⁷

Въ лѣ́то четве́ртое ѡ҆снова̀ хра́мъ гдⷭ҇ень въ мцⷭ҇ѣ зі́и, во вторы́й мцⷭ҇ъ.

³⁷

Въ лѣ́то четве́ртоє основа́ хра́мъ Госпо́день въ ме́сяцѣ зі́и, во вторы́й ме́сяцъ.

³⁸

Во є҆динонадесѧ́тое лѣ́то въ мцⷭ҇ѣ вꙋ́лъ, се́й мцⷭ҇ъ ѻ҆смы́й, соверши́сѧ хра́мъ по всемꙋ̀ словесѝ своемꙋ̀ и҆ по всемꙋ̀ оу҆строе́нїю своемꙋ̀: и҆ созда̀ є҆го̀ въ се́дмь лѣ́тъ.

³⁸

Во єдинонадеся́тоє лѣ́то въ ме́сяцѣ ву́лъ, се́й ме́сяцъ осмы́й, соверши́ся хра́мъ по всему́ словеси́ своєму́ и по всему́ устроє́нію своєму́: и созда́ єго́ въ се́дмь лѣ́тъ.