¹

И҆ до́мъ сво́й созда̀ соломѡ́нъ тремина́десѧть лѣ́ты, и҆ совершѝ соломѡ́нъ ве́сь до́мъ сво́й.

¹

И до́мъ сво́й созда́ Соломо́нъ тремина́десять лѣ́ты, и соверши́ Соломо́нъ ве́сь до́мъ сво́й.

²

И҆ созда̀ до́мъ дре́вомъ лїва́нскимъ, сто̀ лакѡ́тъ долгота̀ є҆гѡ̀, и҆ три́десѧть лакѡ́тъ высота̀ є҆гѡ̀, и҆ пѧтьдесѧ́тъ лакѡ́тъ широта̀ є҆гѡ̀, и҆ трѝ рѧ́ды столпѡ́въ ке́дровыхъ, и҆ ра́мена ке́дрѡва столпѡ́мъ.

²

И созда́ до́мъ дре́вомъ Ліва́нскимъ, сто́ лако́тъ долгота́ єго́, и три́десять лако́тъ высота́ єго́, и пятьдеся́тъ лако́тъ широта́ єго́, и три́ ря́ды столпо́въ ке́дровыхъ, и ра́мена ке́дрова столпо́мъ.

³

И҆ покры̀ дска́ми ке́дровыми до́мъ свы́ше над̾ страна́ми столпѡ́въ: и҆ число̀ столпѡ́въ четы́редесѧть и҆ пѧ́ть,

³

И покры́ дска́ми ке́дровыми до́мъ свы́ше надъ страна́ми столпо́въ: и число́ столпо́въ четы́редесять и пя́ть,

⁴

по пѧтина́десѧти рѧ́дъ: и҆ ѻ҆́конъ трѝ рѧда̀, и҆ кама́ра над̾ кама́рою трегꙋ́бѡ.

⁴

по пятина́десяти ря́дъ: и о́конъ три́ ряда́, и кама́ра надъ кама́рою трегу́бо.

⁵

И҆ всѧ̑ двє́ри и҆ кама̑ры четвероꙋгѡ́лны притворе́ни: ѿ две́рїй над̾ две́рми трегꙋ́бѡ.

⁵

И вся́ две́ри и кама́ры четвероуго́лны притворе́ни: от две́рій надъ две́рми трегу́бо.

⁶

И҆ є҆ла́мъ столпѡ́въ, пѧтьдесѧ́тъ лакѡ́тъ въ долготꙋ̀, и҆ три́десѧть лакѡ́тъ въ широтꙋ̀ привѧ́зани ко є҆ла́мꙋ пред̾ лице́мъ и҆́хъ: и҆ столпѝ и҆ толстота̀ пред̾ лице́мъ тогѡ̀ є҆ла́ма.

⁶

И Єла́мъ столпо́въ, пятьдеся́тъ лако́тъ въ долготу́, и три́десять лако́тъ въ широту́ привя́зани ко Єла́му предъ лице́мъ и́хъ: и столпи́ и толстота́ предъ лице́мъ того́ Єла́ма.

⁷

И҆ є҆ла́мъ престо́лѡвъ и҆дѣ́же сꙋди́ти, є҆ла́мъ сꙋди́лища, и҆ покры̀ и҆̀ ѿ землѝ да́же до верха̀ дщи́цами ке́дровыми.

⁷

И Єла́мъ престо́ловъ идѣ́же суди́ти, Єла́мъ суди́лища, и покры́ и́ от земли́ да́же до верха́ дщи́цами ке́дровыми.

⁸

И҆ до́мъ въ не́мже живѧ́ше, дво́ръ є҆ди́нъ распросте́ртъ си̑мъ по дѣ́лꙋ семꙋ̀: и҆ до́мъ созда̀ дще́ри фараѡ́ни, ю҆́же взѧ̀ соломѡ́нъ, по є҆ла́мꙋ семꙋ̀.

⁸

И до́мъ въ не́мже живя́ше, дво́ръ єди́нъ распросте́ртъ си́мъ по дѣ́лу сему́: и до́мъ созда́ дще́ри фарао́ни, ю́же взя́ Соломо́нъ, по Єла́му сему́.

⁹

Всѧ̑ сїѧ̑ бѧ́хꙋ ѿ ка́меней драгоцѣ́нныхъ и҆зва̑ѧна ѿ разстоѧ́нїѧ внꙋтрьꙋ́дꙋ, и҆ ѿ ѡ҆снова́нїѧ до кро́ва.

⁹

Вся́ сія́ бя́ху от ка́меней драгоцѣ́нныхъ изва́яна от разстоя́нія внутрьу́ду, и от основа́нія до кро́ва.

¹⁰

И҆ внѣꙋ́дꙋ ко дворꙋ̀ вели́комꙋ ѡ҆снова́номꙋ ка́менїемъ драги́мъ вели́кимъ, ка́менїемъ десѧтѝ лакѡ́тъ и҆ ѻ҆смѝ лакѡ́тъ,

¹⁰

И внѣу́ду ко двору́ вели́кому основа́ному ка́меніємъ драги́мъ вели́кимъ, ка́меніємъ десяти́ лако́тъ и осми́ лако́тъ,

¹¹

и҆ съ верхꙋ̀ честны́мъ ка́менїемъ, по то́йже мѣ́рѣ несѣ́ченыхъ, и҆ ке́драми.

¹¹

и съ верху́ честны́мъ ка́меніємъ, по то́йже мѣ́рѣ несѣ́ченыхъ, и ке́драми.

¹²

Ѡ҆́крестъ двора̀ вели́кагѡ трѝ рѧда̀ нете́саныхъ, и҆ рѧ́дъ те́санагѡ ке́дра: и҆ созда̀ дво́ръ хра́ма внꙋ́треннѣйшїй притво́ра до́мꙋ сꙋ́щагѡ пред̾ лице́мъ хра́ма.

¹²

О́крестъ двора́ вели́каго три́ ряда́ нете́саныхъ, и ря́дъ те́санаго ке́дра: и созда́ дво́ръ хра́ма вну́треннѣйшій притво́ра до́му су́щаго предъ лице́мъ хра́ма.

¹³

И҆ посла̀ ца́рь соломѡ́нъ въ тѵ́ръ, и҆ взѧ̀ хїра́ма ѿ тѵ́ра,

¹³

И посла́ ца́рь Соломо́нъ въ ти́ръ, и взя́ хіра́ма от ти́ра,

¹⁴

сы́на жены̀ вдови́цы, и҆ то́й бѣ̀ ѿ колѣ́на нефѳалі́млѧ: и҆ ѻ҆те́цъ є҆гѡ̀ бѣ̀ мꙋ́жъ тѵ́рїнъ, дѣ́латель мѣ́ди, и҆ и҆спо́лненъ хꙋдо́жества и҆ ра́зꙋма и҆ вѣ́дѣнїѧ, є҆́же дѣ́лати всѧ́ко дѣ́ло мѣ́дѧное. И҆ приведо́ша є҆го̀ ко царю̀ соломѡ́нꙋ: и҆ сотворѝ всѧ̑ дѣла̀:

¹⁴

сы́на жены́ вдови́цы, и то́й бѣ́ от колѣ́на Нефѳалі́мля: и оте́цъ єго́ бѣ́ му́жъ ти́рінъ, дѣ́латель мѣ́ди, и испо́лненъ худо́жества и ра́зума и вѣ́дѣнія, є́же дѣ́лати вся́ко дѣ́ло мѣ́дяноє. И приведо́ша єго́ ко царю́ Соломо́ну: и сотвори́ вся́ дѣла́:

¹⁵

и҆ слїѧ̀ два̀ столпа̑ є҆ла́мꙋ хра́ма, ѻ҆смина́десѧти лакѡ́тъ высота̀ столпа̀, и҆ ѡ҆́крестъ мѣ́ра є҆гѡ̀ четырена́десѧтихъ лакѡ́тъ ѡ҆крꙋжа́ше є҆го̀ толстота̀ столпа̀: четы́рехъ пе́рстѡвъ вглꙋблє́нїѧ: та́кожде бѣ̀ и҆ вторы́й сто́лпъ:

¹⁵

и слія́ два́ столпа́ Єла́му хра́ма, осмина́десяти лако́тъ высота́ столпа́, и о́крестъ мѣ́ра єго́ четырена́десятихъ лако́тъ окружа́ше єго́ толстота́ столпа́: четы́рехъ пе́рстовъ вглубле́нія: та́кожде бѣ́ и вторы́й сто́лпъ:

¹⁶

и҆ два̀ возложє́нїѧ сотворѝ, лежа́ти на глава́хъ столпѡ́въ и҆злїѧ̑ннаѧ ѿ мѣ́ди: пѧтѝ лакѡ́тъ высота̀ возложе́нїѧ є҆ди́нагѡ, и҆ пѧтѝ лакѡ́тъ высота̀ возложе́нїѧ втора́гѡ:

¹⁶

и два́ возложе́нія сотвори́, лежа́ти на глава́хъ столпо́въ излія́нная от мѣ́ди: пяти́ лако́тъ высота́ возложе́нія єди́наго, и пяти́ лако́тъ высота́ возложе́нія втора́го:

¹⁷

и҆ сотворѝ двѣ̀ мрє́жи є҆́же покры́ти возложє́нїѧ столпѡ́въ: и҆ мре́жꙋ возложе́нїю є҆ди́номꙋ, и҆ мре́жꙋ возложе́нїю второ́мꙋ:

¹⁷

и сотвори́ двѣ́ мре́жи є́же покры́ти возложе́нія столпо́въ: и мре́жу возложе́нію єди́ному, и мре́жу возложе́нію второ́му:

¹⁸

и҆ дѣ́ло ви́симо, два̀ рѧда̀ ꙗ҆́блѡкъ мѣ́дѧныхъ сомре́жєны, дѣ́ло ви́симо, рѧ́дъ над̾ рѧ́домъ: та́кожде сотворѝ возложе́нїю второ́мꙋ:

¹⁸

и дѣ́ло ви́симо, два́ ряда́ я́блокъ мѣ́дяныхъ сомре́жены, дѣ́ло ви́симо, ря́дъ надъ ря́домъ: та́кожде сотвори́ возложе́нію второ́му:

¹⁹

и҆ возложє́нїѧ на глава́хъ столпѡ́въ, подѡ́бна крі́нꙋ, ꙗ҆́коже во є҆ла́мѣ, четы́рехъ лакѡ́тъ:

¹⁹

и возложе́нія на глава́хъ столпо́въ, подо́бна крі́ну, я́коже во Єла́мѣ, четы́рехъ лако́тъ:

²⁰

и҆ строе́нїе над̾ ѻ҆бои́ми столпа́ми, и҆ свы́ше стра́нъ возложе́нїе строе́нїѧ, и҆ ꙗ҆́блокѡвъ двѣ́сти рѧдѡ́въ ѡ҆́колѡ на вторѣ́й главѣ̀.

²⁰

и строє́ніє надъ обои́ми столпа́ми, и свы́ше стра́нъ возложе́ніє строє́нія, и я́блоковъ двѣ́сти рядо́въ о́коло на вторѣ́й главѣ́.

²¹

И҆ поста́ви столпы̀ во є҆ла́мѣ хра́ма: и҆ поста́ви сто́лпъ є҆ди́нъ и҆ наречѐ и҆́мѧ є҆мꙋ̀ і҆ахꙋ́нъ, и҆ поста́ви сто́лпъ вторы́й и҆ наречѐ и҆́мѧ є҆мꙋ̀ воѡ́съ.

²¹

И поста́ви столпы́ во Єла́мѣ хра́ма: и поста́ви сто́лпъ єди́нъ и нарече́ и́мя єму́ Іаху́нъ, и поста́ви сто́лпъ вторы́й и нарече́ и́мя єму́ воо́съ.

²²

И҆ на глава́хъ столпѡ́въ дѣ́ло крі́ново, и҆ сконча̀ дѣ́ло столпѡ́въ.

²²

И на глава́хъ столпо́въ дѣ́ло крі́ново, и сконча́ дѣ́ло столпо́въ.

²³

И҆ сотворѝ мо́ре лїѧ́но де́сѧть лакѡ́тъ ѿ кра́ѧ до кра́ѧ є҆гѡ̀, крꙋгло̀ ѡ҆́крестъ є҆гѡ̀: пѧ́ть лакѡ́тъ высота̀ є҆гѡ̀, и҆ ѡ҆б̾ѧ́тїе є҆гѡ̀ три́десѧть ла́ктей ѡ҆крꙋжа́ше є҆̀ ѡ҆́крестъ:

²³

И сотвори́ мо́ре лія́но де́сять лако́тъ от кра́я до кра́я єго́, кругло́ о́крестъ єго́: пя́ть лако́тъ высота́ єго́, и объя́тіє єго́ три́десять ла́ктей окружа́ше є́ о́крестъ:

²⁴

и҆ подкрѣплє́нїѧ под̾ кра́емъ є҆гѡ̀ ѡ҆́крестъ, ѡ҆крꙋжа́хꙋ є҆̀ де́сѧть лакѡ́тъ ѡ҆́колѡ: два̀ рѧда̀ подкрѣпле́нїй сли̑ты во слїѧ́нїи є҆гѡ̀ стѡѧ́ща.

²⁴

и подкрѣпле́нія подъ кра́ємъ єго́ о́крестъ, окружа́ху є́ де́сять лако́тъ о́коло: два́ ряда́ подкрѣпле́ній сли́ты во слія́ніи єго́ стоя́ща.

²⁵

И҆ двана́десѧть волѡ́въ под̾ мо́ремъ, трѝ зрѧ́щїи на сѣ́веръ, и҆ трѝ зрѧ́щїи на ю҆́гъ, и҆ трѝ на за́падъ, и҆ трѝ на восто́къ, и҆ всѧ̑ за̑днѧѧ и҆́хъ внꙋтрьꙋ́дꙋ, и҆ мо́ре верхꙋ̀ и҆́хъ.

²⁵

И двана́десять воло́въ подъ мо́ремъ, три́ зря́щіи на сѣ́веръ, и три́ зря́щіи на ю́гъ, и три́ на за́падъ, и три́ на восто́къ, и вся́ за́дняя и́хъ внутрьу́ду, и мо́ре верху́ и́хъ.

²⁶

И҆ оу҆́стїе є҆гѡ̀ бѧ́ше ꙗ҆́кѡ оу҆́стїе потирѧ̀ прозѧба́ющагѡ крі́на, и҆ толстота̀ є҆гѡ̀ на дла́нь.

²⁶

И у́стіє єго́ бя́ше я́ко у́стіє потиря́ прозяба́ющаго крі́на, и толстота́ єго́ на дла́нь.

²⁷

И҆ сотворѝ де́сѧть мехѡнѡ́ѳѡвъ мѣ́дѧныхъ, пѧ́ть лакѡ́тъ долгота̀ мехѡнѡ́ѳа є҆ди́нагѡ, и҆ четы́ри ла̑кти широта̀ є҆гѡ̀, и҆ ше́сть лакѡ́тъ высота̀ є҆гѡ̀:

²⁷

И сотвори́ де́сять мехоно́ѳовъ мѣ́дяныхъ, пя́ть лако́тъ долгота́ мехоно́ѳа єди́наго, и четы́ри ла́кти широта́ єго́, и ше́сть лако́тъ высота́ єго́:

²⁸

и҆ сїѐ дѣ́ло мехѡнѡ́ѳѡвъ, спое́ное ѡ҆ себѣ̀ и҆ спое́ное посредѣ̀ произница́ющихъ:

²⁸

и сіє́ дѣ́ло мехоно́ѳовъ, споє́ноє о себѣ́ и споє́ноє посредѣ́ произница́ющихъ:

²⁹

и҆ на спое́нїихъ и҆́хъ посредѣ̀ произница́ющихъ львы̀ и҆ волы̀ и҆ херꙋві́мы, и҆ над̾ произница́ющими, та́кожде и҆ свы́ше и҆ сни́зꙋ львѡ́въ и҆ волѡ́въ мѣста̀, дѣ́ло низхожде́нїѧ:

²⁹

и на споє́ніихъ и́хъ посредѣ́ произница́ющихъ львы́ и волы́ и херуві́мы, и надъ произница́ющими, та́кожде и свы́ше и сни́зу льво́въ и воло́въ мѣста́, дѣ́ло низхожде́нія:

³⁰

и҆ четы́ри коле́са мѣ̑дна и҆ мехѡнѡ́ѳꙋ коемꙋ́ждо, и҆ придержа̑нїѧ мѣ̑дѧна, и҆ четы́ри ча̑сти и҆́хъ, и҆ ра́мена и҆́хъ под̾ оу҆мыва́лницами, и҆ ра́мена слїѧ̑наѧ ѡ҆б̾ ѻ҆нꙋ̀ странꙋ̀ коегѡ́ждо прилежа́ще.

³⁰

и четы́ри коле́са мѣ́дна и мехоно́ѳу коєму́ждо, и придержа́нія мѣ́дяна, и четы́ри ча́сти и́хъ, и ра́мена и́хъ подъ умыва́лницами, и ра́мена слія́ная объ ону́ страну́ коєго́ждо прилежа́ще.

³¹

И҆ оу҆ста̀ є҆гѡ̀ внꙋ́трь главы̀, и҆ вы́ше є҆ди́нагѡ ла́ктѧ, и҆ оу҆ста̀ є҆гѡ̀ крꙋ̑гла: дѣ́ло та́кожде ла́ктѧ є҆ди́нагѡ и҆ по́лъ ла́ктѧ: и҆ на оу҆ста́хъ є҆гѡ̀ и҆зва̑ѧнїѧ, и҆ междꙋстѡ́лпїѧ и҆́хъ четвероꙋгѡ́лна, а҆ не крꙋ̑гла.

³¹

И уста́ єго́ вну́трь главы́, и вы́ше єди́наго ла́ктя, и уста́ єго́ кру́гла: дѣ́ло та́кожде ла́ктя єди́наго и по́лъ ла́ктя: и на уста́хъ єго́ изва́янія, и междусто́лпія и́хъ четвероуго́лна, а не кру́гла.

³²

И҆ четы́ри коле́са под̾ междꙋсто́лпїѧми, и҆ рꙋ́цѣ въ колесѣ́хъ въ мехѡнѡ́ѳѣ: и҆ высота̀ є҆ди́нагѡ колеса̀ ла́коть и҆ по́лъ.

³²

И четы́ри коле́са подъ междусто́лпіями, и ру́цѣ въ колесѣ́хъ въ мехоно́ѳѣ: и высота́ єди́наго колеса́ ла́коть и по́лъ.

³³

И҆ дѣ́ло коле́съ, ꙗ҆́кѡ дѣ́ло коле́съ колесни́цы: рꙋ́цѣ и҆́хъ и҆ вы̑и и҆́хъ, и҆ хребты̀ и҆́хъ и҆ дѣ̑ланїѧ и҆́хъ всѧ̑ лїѧ̑на.

³³

И дѣ́ло коле́съ, я́ко дѣ́ло коле́съ колесни́цы: ру́цѣ и́хъ и вы́и и́хъ, и хребты́ и́хъ и дѣ́ланія и́хъ вся́ лія́на.

³⁴

Четы́ри ра́мена на четы́рехъ оу҆глѣ́хъ мехѡнѡ́ѳа є҆ди́нагѡ, и҆ ѿ мехѡнѡ́ѳа ра́мена є҆гѡ̀.

³⁴

Четы́ри ра́мена на четы́рехъ углѣ́хъ мехоно́ѳа єди́наго, и от мехоно́ѳа ра́мена єго́.

³⁵

И҆ на главѣ̀ мехѡнѡ́ѳа по́лъ ла́ктѧ вели́чество є҆гѡ̀, крꙋгло̀ ѡ҆́крестъ над̾ главо́ю мехѡнѡ́ѳовою: и҆ нача́ло рꙋ́къ є҆гѡ̀ и҆ спаѧ̑нїѧ є҆гѡ̀ ѿ негѡ̀: и҆ ѿверза́шесѧ въ нача́лѣхъ рꙋ́къ свои́хъ.

³⁵

И на главѣ́ мехоно́ѳа по́лъ ла́ктя вели́чество єго́, кругло́ о́крестъ надъ главо́ю мехоно́ѳовою: и нача́ло ру́къ єго́ и спая́нія єго́ от него́: и отверза́шеся въ нача́лѣхъ ру́къ свои́хъ.

³⁶

И҆ спаѧ̑нїѧ є҆гѡ̀ подѡ́бїѧ херꙋві́мѡвъ и҆ львѡ́въ и҆ фі́нїкѡвъ стѡѧ́щаѧ, держа́щеесѧ ко́еждо проти́вꙋ лица̀ є҆гѡ̀ внꙋ́трь и҆ ѡ҆́крестъ.

³⁶

И спая́нія єго́ подо́бія херуві́мовъ и льво́въ и фі́ніковъ стоя́щая, держа́щеєся ко́єждо проти́ву лица́ єго́ вну́трь и о́крестъ.

³⁷

По томꙋ́жде сотворѝ всѧ̑ де́сѧть мехѡнѡ́ѳы, по чи́нꙋ є҆ди́номꙋ и҆ по мѣ́рѣ є҆ди́нѣй, мѣ́ра є҆ди́на всѣ̑мъ.

³⁷

По тому́жде сотвори́ вся́ де́сять мехоно́ѳы, по чи́ну єди́ному и по мѣ́рѣ єди́нѣй, мѣ́ра єди́на всѣ́мъ.

³⁸

И҆ сотворѝ де́сѧть коно́бѡвъ мѣ́дѧныхъ вмѣща́ющихъ по четы́редесѧти мѣ́ръ во є҆ди́нъ коно́бъ, мѣ́рою четы́рехъ ла́ктей: коно́бъ є҆ди́нъ на ко́емждо мехѡнѡ́ѳѣ, ѿ десѧтѝ мехѡнѡ́ѳѡвъ.

³⁸

И сотвори́ де́сять коно́бовъ мѣ́дяныхъ вмѣща́ющихъ по четы́редесяти мѣ́ръ во єди́нъ коно́бъ, мѣ́рою четы́рехъ ла́ктей: коно́бъ єди́нъ на ко́ємждо мехоно́ѳѣ, от десяти́ мехоно́ѳовъ.

³⁹

И҆ поста́ви пѧ́ть мехѡнѡ́ѳѡвъ по деснѣ́й странѣ̀ хра́ма на восто́къ, и҆ пѧ́ть по лѣ́вѣй странѣ̀ хра́ма: и҆ мо́ре ѿ страны̀ хра́ма ѡ҆деснꙋ́ю на восто́ки въ оу҆́глѣ полꙋ́деннѣмъ.

³⁹

И поста́ви пя́ть мехоно́ѳовъ по деснѣ́й странѣ́ хра́ма на восто́къ, и пя́ть по лѣ́вѣй странѣ́ хра́ма: и мо́ре от страны́ хра́ма одесну́ю на восто́ки въ у́глѣ полу́деннѣмъ.

⁴⁰

И҆ сотворѝ хїра́мъ коно́бы и҆ тепли̑цы и҆ фїа́лы: и҆ сконча̀ хїра́мъ всѧ̑ дѣла̀ творѧ̀, ꙗ҆̀же творѧ́ше царе́ви соломѡ́нꙋ во хра́мѣ гдⷭ҇ни:

⁴⁰

И сотвори́ хіра́мъ коно́бы и тепли́цы и фіа́лы: и сконча́ хіра́мъ вся́ дѣла́ творя́, я́же творя́ше царе́ви Соломо́ну во хра́мѣ Госпо́дни:

⁴¹

стѡлпа̀ два̀, и҆ ѡ҆бви̑тїѧ столпѡ́въ над̾ глава́ми столпѡ́въ два̀: и҆ мрє́жи двѣ̀, є҆́же покрыва́ти ѻ҆́ба ѡ҆бви̑тїѧ и҆зва́ѧныхъ, ꙗ҆̀же на столпѣ́хъ сꙋ́ть:

⁴¹

столпа́ два́, и обви́тія столпо́въ надъ глава́ми столпо́въ два́: и мре́жи двѣ́, є́же покрыва́ти о́ба обви́тія изва́яныхъ, я́же на столпѣ́хъ су́ть:

⁴²

ꙗ҆́блокѡвъ мѣ́дѧныхъ четы́реста ѻ҆бѣ́ма мре́жема, два̀ рѧда̀ ꙗ҆́блокѡвъ мре́жи є҆ди́нѣй, покрыва́ти ѻ҆́ба ѡ҆бви̑тїѧ мехѡнѡ́ѳа, ꙗ҆̀же на ѻ҆бои́хъ столпѣ́хъ:

⁴²

я́блоковъ мѣ́дяныхъ четы́реста обѣ́ма мре́жема, два́ ряда́ я́блоковъ мре́жи єди́нѣй, покрыва́ти о́ба обви́тія мехоно́ѳа, я́же на обои́хъ столпѣ́хъ:

⁴³

и҆ мехѡнѡ́ѳѡвъ де́сѧть и҆ коно́бѡвъ де́сѧть на мехѡнѡ́ѳѣ:

⁴³

и мехоно́ѳовъ де́сять и коно́бовъ де́сять на мехоно́ѳѣ:

⁴⁴

и҆ мо́ре є҆ди́но, и҆ волѡ́въ двана́десѧть под̾ мо́ремъ:

⁴⁴

и мо́ре єди́но, и воло́въ двана́десять подъ мо́ремъ:

⁴⁵

и҆ коно́бы и҆ тепли̑цы и҆ фїа́лы, и҆ всѧ̑ сосꙋ́ды, ꙗ҆̀же сотворѝ хїра́мъ царю̀ соломѡ́нꙋ во хра́мѣ гдⷭ҇ни: и҆ столпѡ́въ четы́редесѧть и҆ ѻ҆́смь до́мꙋ царе́ва и҆ до́мꙋ гдⷭ҇нѧ: всѧ̑ дѣла̀ царє́ва, ꙗ҆̀же сотворѝ хїра́мъ, бы́ша мѣ̑дѧна всѧ̑.

⁴⁵

и коно́бы и тепли́цы и фіа́лы, и вся́ сосу́ды, я́же сотвори́ хіра́мъ царю́ Соломо́ну во хра́мѣ Госпо́дни: и столпо́въ четы́редесять и о́смь до́му царе́ва и до́му Госпо́дня: вся́ дѣла́ царе́ва, я́же сотвори́ хіра́мъ, бы́ша мѣ́дяна вся́.

⁴⁶

Бли́з̾ і҆ѻрда́на слїѧ̀ и҆̀хъ ца́рь въ толстотѣ̀ землѝ, междꙋ̀ сокхѡ́ѳомъ и҆ междꙋ̀ сїра́момъ.

⁴⁶

Бли́зъ Іорда́на слія́ и́хъ ца́рь въ толстотѣ́ земли́, между́ сокхо́ѳомъ и между́ Сіра́момъ.

⁴⁷

Не бѣ̀ вѣ́са мѣ́ди, ѿ неѧ́же творѧ́ше всѧ̑ дѣла̀ сїѧ̑, ѿ мно́жества ѕѣлѡ̀, не бѣ̀ предѣ́ла вѣ́сꙋ мѣ́ди.

⁴⁷

Не бѣ́ вѣ́са мѣ́ди, от нея́же творя́ше вся́ дѣла́ сія́, от мно́жества зѣло́, не бѣ́ предѣ́ла вѣ́су мѣ́ди.

⁴⁸

И҆ дадѐ ца́рь соломѡ́нъ всѧ̑ сосꙋ́ды, ꙗ҆̀же сотворѝ во хра́мъ гдⷭ҇ень: ѻ҆лта́рь златы́й и҆ трапе́зꙋ, на не́йже хлѣ́бы приноше́нїѧ, златꙋ́ю,

⁴⁸

И даде́ ца́рь Соломо́нъ вся́ сосу́ды, я́же сотвори́ во хра́мъ Госпо́день: олта́рь златы́й и трапе́зу, на не́йже хлѣ́бы приноше́нія, злату́ю,

⁴⁹

и҆ свѣ́щники пѧ́ть ѡ҆деснꙋ́ю и҆ пѧ́ть ѡ҆шꙋ́юю пред̾ лице́мъ даві́ра (ст҃а̑ѧ ст҃ы́хъ) златы̑ѧ спа̑ѧны, и҆ лампа̑ды, и҆ свѣти́лники, и҆ щипцы̀ златы̑ѧ,

⁴⁹

и свѣ́щники пя́ть одесну́ю и пя́ть ошу́юю предъ лице́мъ даві́ра [свята́я святы́хъ] златы́я спа́яны, и лампа́ды, и свѣти́лники, и щипцы́ златы́я,

⁵⁰

и҆ преддве́рїе, и҆ гво́здїе, и҆ фїа́лы и҆ блю̑да и҆ кади̑лницы зла̑ты спа̑ѧны: и҆ верєѝ вра́тъ до́мꙋ внꙋ́треннѧгѡ ст҃а́гѡ ст҃ы́хъ, и҆ двє́ри хра́ма златы̑ѧ.

⁵⁰

и преддве́ріє, и гво́здіє, и фіа́лы и блю́да и кади́лницы зла́ты спа́яны: и вереи́ вра́тъ до́му вну́тренняго свята́го святы́хъ, и две́ри хра́ма златы́я.

⁵¹

И҆ соверши́сѧ дѣ́ло, є҆́же сотворѝ соломѡ́нъ во хра́мѣ гдⷭ҇ни: и҆ внесѐ соломѡ́нъ ст҃а̑ѧ даві́да ѻ҆тца̀ своегѡ̀ и҆ всѧ̑ ст҃а̑ѧ соломѡ́нѡва, сребро̀ и҆ зла́то, и҆ сосꙋ́ды дадѐ въ сокро́вище хра́ма гдⷭ҇нѧ.

⁵¹

И соверши́ся дѣ́ло, є́же сотвори́ Соломо́нъ во хра́мѣ Госпо́дни: и внесе́ Соломо́нъ свята́я даві́да отца́ своєго́ и вся́ свята́я Соломо́нова, сребро́ и зла́то, и сосу́ды даде́ въ сокро́вище хра́ма Госпо́дня.