¹

Въ лѣ́то два́десѧть седмо́е і҆еровоа́ма царѧ̀ і҆и҃лева воцари́сѧ а҆зарі́а сы́нъ а҆мессі́и царѧ̀ і҆ꙋ́дина:

¹

Въ лѣ́то два́десять седмо́є ієровоа́ма царя́ Ізра́илева воцари́ся Азарі́а сы́нъ Амессі́и царя́ Іу́дина:

²

сы́нъ шести́надесѧти лѣ́тъ бѣ̀, є҆гда̀ нача̀ ца́рствовати, и҆ пѧтьдесѧ́тъ два̀ лѣ́та ца́рствова во і҆ерⷭ҇ли́мѣ. И҆́мѧ же ма́тере є҆гѡ̀ і҆ехелі́а ѿ і҆ерⷭ҇ли́ма.

²

сы́нъ шести́надесяти лѣ́тъ бѣ́, єгда́ нача́ ца́рствовати, и пятьдеся́тъ два́ лѣ́та ца́рствова во Ієрусали́мѣ. И́мя же ма́тере єго́ Ієхелі́а от Ієрусали́ма.

³

И҆ сотворѝ пра́вое пред̾ ѻ҆чи́ма гдⷭ҇нима по всемꙋ̀, є҆ли̑ка сотворѝ ѻ҆те́цъ є҆гѡ̀ а҆мессі́а,

³

И сотвори́ пра́воє предъ очи́ма Госпо́днима по всему́, єли́ка сотвори́ оте́цъ єго́ Амессі́а,

⁴

ѻ҆ба́че высо́кихъ не разорѝ: є҆щѐ лю́дїе жрѧ́хꙋ и҆ кадѧ́хꙋ на высо́кихъ.

⁴

оба́че высо́кихъ не разори́: єще́ лю́діє жря́ху и кадя́ху на высо́кихъ.

⁵

И҆ коснꙋ́сѧ гдⷭ҇ь царѧ̀, и҆ бы́сть прокаже́нъ до днѐ сме́рти своеѧ̀: и҆ ца́рствова въ домꙋ̀ а҆пфꙋсѡ́ѳъ. И҆ і҆ѡаѳа́мъ сы́нъ царе́въ бѣ̀ над̾ до́момъ сꙋдѧ̀ лю́демъ землѝ тоѧ̀.

⁵

И косну́ся Госпо́дь царя́, и бы́сть прокаже́нъ до дне́ сме́рти своєя́: и ца́рствова въ дому́ апфусо́ѳъ. И Іоаѳа́мъ сы́нъ царе́въ бѣ́ надъ до́момъ судя́ лю́демъ земли́ тоя́.

⁶

И҆ прѡ́чаѧ слове́съ а҆зарі́и, и҆ всѧ̑ є҆ли̑ка сотворѝ, нѐ сїѧ̑ ли напи̑сана въ кни́зѣ слове́съ дні́й царе́й і҆ꙋ́диныхъ;

⁶

И про́чая слове́съ азарі́и, и вся́ єли́ка сотвори́, не́ сія́ ли напи́сана въ кни́зѣ слове́съ дні́й царе́й Іу́диныхъ?

⁷

И҆ оу҆́спе а҆зарі́а со ѻ҆тцы̑ свои́ми, и҆ погребо́ша є҆го̀ со ѻ҆тцы̑ є҆гѡ̀ во гра́дѣ даві́довѣ. И҆ воцари́сѧ і҆ѡаѳа́мъ сы́нъ є҆гѡ̀ вмѣ́стѡ є҆гѡ̀.

⁷

И у́спе Азарі́а со отцы́ свои́ми, и погребо́ша єго́ со отцы́ єго́ во гра́дѣ даві́довѣ. И воцари́ся Іоаѳа́мъ сы́нъ єго́ вмѣ́сто єго́.

⁸

Въ лѣ́то три́десѧть ѻ҆смо́е а҆зарі́и царѧ̀ і҆ꙋ́дина ца́рствова заха́рїа сы́нъ і҆еровоа́мль над̾ і҆и҃лемъ въ самарі́и ше́сть мцⷭ҇ъ.

⁸

Въ лѣ́то три́десять осмо́є азарі́и царя́ Іу́дина ца́рствова Заха́ріа сы́нъ ієровоа́мль надъ Ізра́илемъ въ самарі́и ше́сть ме́сяцъ.

⁹

и҆ сотворѝ лꙋка́вое пред̾ ѻ҆чи́ма гдⷭ҇нима, ꙗ҆́коже сотвори́ша ѻ҆тцы̀ є҆гѡ̀, не ѿстꙋпѝ ѿ всѣ́хъ грѣхѡ́въ і҆еровоа́ма сы́на нава́това, и҆́же въ грѣ́хъ введѐ і҆и҃лѧ.

⁹

и сотвори́ лука́воє предъ очи́ма Госпо́днима, я́коже сотвори́ша отцы́ єго́, не отступи́ от всѣ́хъ грѣхо́въ ієровоа́ма сы́на нава́това, и́же въ грѣ́хъ введе́ Ізра́иля.

¹⁰

И҆ воста́ста на́нь селлꙋ́мъ сы́нъ і҆аві́совъ и҆ кевлаа́мъ, и҆ порази́ста є҆го̀, и҆ оу҆мертви́ста є҆го̀: и҆ воцари́сѧ селлꙋ́мъ вмѣ́стѡ є҆гѡ̀.

¹⁰

И воста́ста на́нь Селлу́мъ сы́нъ Іаві́совъ и кевлаа́мъ, и порази́ста єго́, и умертви́ста єго́: и воцари́ся Селлу́мъ вмѣ́сто єго́.

¹¹

И҆ прѡ́чаѧ слове́съ заха́рїевыхъ, сѐ, сꙋ́ть напи̑сана въ кни́зѣ слове́съ дні́й царе́й і҆и҃левыхъ.

¹¹

И про́чая слове́съ Заха́рієвыхъ, се́, су́ть напи́сана въ кни́зѣ слове́съ дні́й царе́й Ізра́илевыхъ.

¹²

сїѐ сло́во гдⷭ҇не, є҆́же гл҃а ко і҆иꙋ́ю, рекі́й: сы́нове четве́ртїи сѧ́дꙋтъ тебѣ̀ и҆ на престо́лѣ і҆и҃левѣ. И҆ бы́сть та́кѡ.

¹²

сіє́ сло́во Госпо́дне, є́же глаго́ла ко іиу́ю, рекі́й: сы́нове четве́ртіи ся́дутъ тебѣ́ на престо́лѣ Ізра́илевѣ. И бы́сть та́ко.

¹³

И҆ селлꙋ́мъ сы́нъ і҆аві́совъ воцари́сѧ во і҆и҃ли: и҆ въ лѣ́то три́десѧть девѧ́тое а҆зарі́и царѧ̀ і҆ꙋ́дина, ца́рствова селлꙋ́мъ мцⷭ҇ъ дні́й въ самарі́и.

¹³

И Селлу́мъ сы́нъ Іаві́совъ воцари́ся во Ізра́или: и въ лѣ́то три́десять девя́тоє азарі́и царя́ Іу́дина, ца́рствова Селлу́мъ ме́сяцъ дні́й въ самарі́и.

¹⁴

И҆ взы́де манаи́мъ сы́нъ гадді́инъ ѿ ѳерсі́лы, и҆ прїи́де въ самарі́ю, и҆ оу҆бѝ селлꙋ́ма сы́на і҆аві́сова въ самарі́и, и҆ оу҆мертвѝ є҆го̀, и҆ воцари́сѧ вмѣ́стѡ є҆гѡ̀.

¹⁴

И взы́де Манаи́мъ сы́нъ гадді́инъ от Ѳерсі́лы, и пріи́де въ самарі́ю, и уби́ Селлу́ма сы́на Іаві́сова въ самарі́и, и умертви́ єго́, и воцари́ся вмѣ́сто єго́.

¹⁵

И҆ прѡ́чаѧ слове́съ селлꙋ́мовыхъ, и҆ совѣща́нїе є҆гѡ̀, и҆́мже совѣща́сѧ, сѐ, сꙋ́ть пи̑сана въ кни́зѣ слове́съ дні́й царе́й і҆и҃левыхъ.

¹⁵

И про́чая слове́съ Селлу́мовыхъ, и совѣща́ніє єго́, и́мже совѣща́ся, се́, су́ть пи́сана въ кни́зѣ слове́съ дні́й царе́й Ізра́илевыхъ.

¹⁶

Тогда̀ поразѝ манаи́мъ и҆ ѳе́рсꙋ, и҆ всѧ̑, ꙗ҆̀же въ не́й, и҆ предѣ́лы є҆ѧ̀ ѿ ѳе́рсы, поне́же не ѿверзо́ша є҆мꙋ̀, и҆ разбѝ ю҆̀ и҆ всѣ́хъ, и҆̀же въ не́й, и҆ и҆мꙋ́щихъ во чре́вѣ разсѣчѐ.

¹⁶

Тогда́ порази́ Манаи́мъ и Ѳе́рсу, и вся́, я́же въ не́й, и предѣ́лы єя́ от Ѳе́рсы, поне́же не отверзо́ша єму́, и разби́ ю́ и всѣ́хъ, и́же въ не́й, и иму́щихъ во чре́вѣ разсѣче́.

¹⁷

Въ лѣ́то три́десѧть девѧ́тое а҆зарі́и царѧ̀ і҆ꙋ́дина, ца́рствова манаи́мъ сы́нъ гадді́инъ над̾ і҆и҃лемъ де́сѧть лѣ́тъ въ самарі́и,

¹⁷

Въ лѣ́то три́десять девя́тоє азарі́и царя́ Іу́дина, ца́рствова Манаи́мъ сы́нъ гадді́инъ надъ Ізра́илемъ де́сять лѣ́тъ въ самарі́и,

¹⁸

и҆ сотворѝ лꙋка́вое пред̾ ѻ҆чи́ма гдⷭ҇нима, (во всѧ̑ дни̑ своѧ̑) не ѿстꙋпѝ ѿ всѣ́хъ грѣхѡ́въ і҆еровоа́ма сы́на нава́това, и҆́же въ грѣ́хъ введѐ і҆и҃лѧ.

¹⁸

и сотвори́ лука́воє предъ очи́ма Госпо́днима, [во вся́ дни́ своя́] не отступи́ от всѣ́хъ грѣхо́въ ієровоа́ма сы́на нава́това, и́же въ грѣ́хъ введе́ Ізра́иля.

¹⁹

Во дни̑ є҆гѡ̀ взы́де фꙋ́ла ца́рь а҆ссѷрі́йскїй на зе́млю (і҆и҃левꙋ), и҆ манаи́мъ дадѐ фꙋ́лѣ ты́сѧщꙋ тала̑нтъ сребра̀, да бꙋ́детъ рꙋка̀ є҆гѡ̀ съ ни́мъ, (є҆́же оу҆крѣпи́ти ца́рство въ рꙋкꙋ̀ є҆гѡ̀).

¹⁹

Во дни́ єго́ взы́де Фу́ла ца́рь Ассирі́йскій на зе́млю [Ізра́илеву], и Манаи́мъ даде́ Фу́лѣ ты́сящу тала́нтъ сребра́, да бу́детъ рука́ єго́ съ ни́мъ, [є́же укрѣпи́ти ца́рство въ руку́ єго́].

²⁰

И҆ возложѝ манаи́мъ да́нь на і҆и҃лѧ, на всѣ́хъ си́льныхъ, да́ти царю̀ а҆ссѷрі́йскꙋ пѧтьдесѧ́тъ сі̑кль сребра̀ мꙋ́жꙋ коемꙋ́ждо: и҆ возврати́сѧ ца́рь а҆ссѷрі́йскъ, и҆ не ста̀ та́мѡ въ землѝ.

²⁰

И возложи́ Манаи́мъ да́нь на Ізра́иля, на всѣ́хъ си́льныхъ, да́ти царю́ Ассирі́йску пятьдеся́тъ Сі́кль сребра́ му́жу коєму́ждо: и возврати́ся ца́рь Ассирі́йскъ, и не ста́ та́мо въ земли́.

²¹

И҆ прѡ́чаѧ слове́съ манаи́мовыхъ, и҆ всѧ̑ є҆ли̑ка сотворѝ, не сѐ ли, сїѧ̑ напи̑сана въ кни́зѣ слове́съ дні́й царе́й і҆и҃левыхъ;

²¹

И про́чая слове́съ Манаи́мовыхъ, и вся́ єли́ка сотвори́, не се́ ли, сія́ напи́сана въ кни́зѣ слове́съ дні́й царе́й Ізра́илевыхъ?

²²

И҆ оу҆́спе манаи́мъ со ѻ҆тцы̑ свои́ми, и҆ воцари́сѧ факі́а сы́нъ є҆гѡ̀ вмѣ́стѡ є҆гѡ̀.

²²

И у́спе Манаи́мъ со отцы́ свои́ми, и воцари́ся факі́а сы́нъ єго́ вмѣ́сто єго́.

²³

Въ лѣ́то пѧтьдесѧ́тое а҆зарі́и царѧ̀ і҆ꙋ́дина, ца́рствова факі́а сы́нъ манаи́мль над̾ і҆и҃лемъ въ самарі́и лѣ̑та два̀,

²³

Въ лѣ́то пятьдеся́тоє азарі́и царя́ Іу́дина, ца́рствова факі́а сы́нъ Манаи́мль надъ Ізра́илемъ въ самарі́и лѣ́та два́,

²⁴

и҆ сотворѝ лꙋка́вое пред̾ ѻ҆чи́ма гдⷭ҇нима, и҆ ѿстꙋпѝ ѿ грѣхѡ́въ і҆еровоа́ма сы́на нава́това, и҆́же въ грѣ́хъ введѐ і҆и҃лѧ.

²⁴

и сотвори́ лука́воє предъ очи́ма Госпо́днима, не отступи́ от грѣхо́въ ієровоа́ма сы́на нава́това, и́же въ грѣ́хъ введе́ Ізра́иля.

²⁵

И҆ воста̀ на него̀ факе́й сы́нъ ромелі́инъ, трїста́тъ є҆гѡ̀, и҆ оу҆бѝ є҆го̀ въ самарі́и бли́з̾ до́мꙋ царе́ва, со а҆рго́вомъ и҆ со а҆рі́емъ, и҆ съ ни́мъ (бѧ́хꙋ) пѧтьдесѧ́тъ мꙋже́й ѿ галааді́тѡвъ, и҆ оу҆мертвѝ є҆го̀, и҆ воцари́сѧ вмѣ́стѡ є҆гѡ̀.

²⁵

И воста́ на него́ факе́й сы́нъ ромелі́инъ, тріста́тъ єго́, и уби́ єго́ въ самарі́и бли́зъ до́му царе́ва, со Арго́вомъ и со Арі́ємъ, и съ ни́мъ [бя́ху] пятьдеся́тъ муже́й от Галааді́товъ, и умертви́ єго́, и воцари́ся вмѣ́сто єго́.

²⁶

И҆ прѡ́чаѧ слове́съ факі́евыхъ, и҆ всѧ̑ є҆ли̑ка сотворѝ сѐ, сꙋ́ть, пи̑сана въ кни́зѣ слове́съ дні́й царе́й і҆и҃левыхъ.

²⁶

И про́чая слове́съ факі́євыхъ, и вся́ єли́ка сотвори́ се́, су́ть, пи́сана въ кни́зѣ слове́съ дні́й царе́й Ізра́илевыхъ.

²⁷

Въ лѣ́то пѧтьдесѧ́тъ второ́е а҆зарі́и царѧ̀ і҆ꙋ́дина, ца́рствова факе́й сы́нъ ромелі́инъ над̾ і҆и҃лемъ въ самарі́и два́десѧть лѣ́тъ,

²⁷

Въ лѣ́то пятьдеся́тъ второ́є азарі́и царя́ Іу́дина, ца́рствова факе́й сы́нъ ромелі́инъ надъ Ізра́илемъ въ самарі́и два́десять лѣ́тъ,

²⁸

и҆ сотворѝ лꙋка́вое пред̾ ѻ҆чи́ма гдⷭ҇нима, не ѿстꙋпѝ ѿ всѣ́хъ грѣхѡ́въ і҆еровоа́ма сы́на нава́това, и҆́же въ грѣ́хъ введѐ і҆и҃лѧ.

²⁸

и сотвори́ лука́воє предъ очи́ма Госпо́днима, не отступи́ от всѣ́хъ грѣхо́въ ієровоа́ма сы́на нава́това, и́же въ грѣ́хъ введе́ Ізра́иля.

²⁹

Во дни̑ факе́а царѧ̀ і҆и҃лева прїи́де ѳелгаѳфелласа́ръ ца́рь а҆ссѷрі́йскїй, и҆ взѧ̀ а҆і́нъ и҆ а҆велвеѳмааха̀, и҆ а҆ѡ́ха и҆ кене́зꙋ, и҆ а҆сѡ́ра и҆ галаа́дъ и҆ галїле́ю, всю̀ зе́млю нефѳалі́млю, и҆ приведѐ ѧ҆̀ ко а҆ссѷрі́анѡмъ.

²⁹

Во дни́ факе́а царя́ Ізра́илева пріи́де Ѳелгаѳфелласа́ръ ца́рь Ассирі́йскій, и взя́ Аі́нъ и Авелвеѳмааха́, и Ао́ха и Кене́зу, и Асо́ра и Галаа́дъ и Галіле́ю, всю́ зе́млю Нефѳалі́млю, и приведе́ я́ ко Ассирі́аномъ.

³⁰

И҆ воста̀ ѡ҆сі́а сы́нъ и҆лы̀ на факе́а сы́на ромелі́ина, и҆ поразѝ є҆го̀, и҆ оу҆мертвѝ є҆го̀, и҆ воцари́сѧ вмѣ́стѡ є҆гѡ̀ въ два́десѧтое лѣ́то і҆ѡаѳа́ма сы́на а҆зарі́ина.

³⁰

И воста́ осі́а сы́нъ илы́ на факе́а сы́на ромелі́ина, и порази́ єго́, и умертви́ єго́, и воцари́ся вмѣ́сто єго́ въ два́десятоє лѣ́то Іоаѳа́ма сы́на азарі́ина.

³¹

И҆ прѡ́чаѧ слове́съ факе́евыхъ, и҆ всѧ̑ є҆ли̑ка сотворѝ, сѐ, сїѧ̑ напи̑сана въ кни́зѣ слове́съ дні́й царе́й і҆и҃левыхъ.

³¹

И про́чая слове́съ факе́євыхъ, и вся́ єли́ка сотвори́, се́, сія́ напи́сана въ кни́зѣ слове́съ дні́й царе́й Ізра́илевыхъ.

³²

Въ лѣ́то второ́е факе́а сы́на ромелі́ина царѧ̀ і҆и҃лева воцари́сѧ і҆ѡаѳа́мъ, сы́нъ а҆зарі́и царѧ̀ і҆ꙋ́дина:

³²

Въ лѣ́то второ́є факе́а сы́на ромелі́ина царя́ Ізра́илева воцари́ся Іоаѳа́мъ, сы́нъ азарі́и царя́ Іу́дина:

³³

сы́нъ два́десѧти пѧтѝ лѣ́тъ бѣ̀, є҆гда̀ нача̀ ца́рствовати, и҆ шестьна́десѧть лѣ́тъ ца́рствова во і҆ерⷭ҇ли́мѣ. И҆́мѧ же ма́тере є҆гѡ̀ і҆ерꙋса̀ дщѝ садѡ́кова.

³³

сы́нъ два́десяти пяти́ лѣ́тъ бѣ́, єгда́ нача́ ца́рствовати, и шестьна́десять лѣ́тъ ца́рствова во Ієрусали́мѣ. И́мя же ма́тере єго́ ієруса́ дщи́ садо́кова.

³⁴

И҆ сотворѝ пра́вое пред̾ ѻ҆чи́ма гдⷭ҇нима, по всемꙋ̀ є҆ли̑ка сотворѝ ѻ҆те́цъ є҆гѡ̀ а҆зарі́а,

³⁴

И сотвори́ пра́воє предъ очи́ма Госпо́днима, по всему́ єли́ка сотвори́ оте́цъ єго́ Азарі́а,

³⁵

ѻ҆ба́че высо́кихъ не разорѝ: є҆щѐ лю́дїе жрѧ́хꙋ и҆ кадѧ́хꙋ на высо́кихъ. То́й созда̀ двє́ри хра́мꙋ гдⷭ҇ню вы̑шнїѧ.

³⁵

оба́че высо́кихъ не разори́: єще́ лю́діє жря́ху и кадя́ху на высо́кихъ. То́й созда́ две́ри хра́му Госпо́дню вы́шнія.

³⁶

И҆ прѡ́чаѧ слове́съ і҆ѡаѳа́мовыхъ, и҆ всѧ̑ є҆ли̑ка сотворѝ, не сїѧ̑ ли напи̑сана въ кни́зѣ слове́съ дні́й царе́й і҆ꙋ́диныхъ;

³⁶

И про́чая слове́съ Іоаѳа́мовыхъ, и вся́ єли́ка сотвори́, не сія́ ли напи́сана въ кни́зѣ слове́съ дні́й царе́й Іу́диныхъ?

³⁷

Во дни̑ ѡ҆́ны нача́тъ гдⷭ҇ь посыла́ти на і҆ꙋ́дꙋ раассѡ́на царѧ̀ сѵ́рска и҆ факе́а сы́на ромелі́ина.

³⁷

Во дни́ о́ны нача́тъ Госпо́дь посыла́ти на Іу́ду раассо́на царя́ Си́рска и факе́а сы́на ромелі́ина.

³⁸

И҆ оу҆́спе і҆ѡаѳа́мъ со ѻ҆тцы̑ свои́ми, и҆ погребе́нъ бы́сть со ѻ҆тцы̑ свои́ми во гра́дѣ даві́да ѻ҆тца̀ своегѡ̀. И҆ воцари́сѧ а҆ха́зъ сы́нъ є҆гѡ̀ вмѣ́стѡ є҆гѡ̀.

³⁸

И у́спе Іоаѳа́мъ со отцы́ свои́ми, и погребе́нъ бы́сть со отцы́ свои́ми во гра́дѣ даві́да отца́ своєго́. И воцари́ся Аха́зъ сы́нъ єго́ вмѣ́сто єго́.