Друк брошурою Виконується верстка сторінок…
Папір A4, альбомна орієнтація, поля «Немає», без колонтитулів. Друкуйте двосторонньо, з переворотом по короткому краю, у масштабі 100%; якщо принтер обрізає край — 98%. Не вмикайте режим «Буклет» у драйвері принтера.
1
є҆лїссе́й прⷪ҇ро́къ призва̀ є҆ди́наго ѿ сынѡ́въ проро́чихъ и҆ речѐ є҆мꙋ̀: препоѧ́ши чре́сла своѧ̑, и҆ возмѝ сосꙋ́дъ є҆ле́а сегѡ̀ въ рꙋ́кꙋ твою̀, и҆ и҆дѝ въ рамѡ́ѳъ галаа́дскїй:
1
Єліссе́й проро́къ призва́ єди́наго от сыно́въ проро́чихъ и рече́ єму́: препоя́ши чре́сла своя́, и возми́ сосу́дъ єле́а сего́ въ ру́ку твою́, и иди́ въ рамо́ѳъ Галаа́дскій:
2
и҆ вни́деши та́мѡ, и҆ оу҆́зриши та́мѡ і҆иꙋ́а сы́на і҆ѡсафа́та сы́на намессі́ева, и҆ вни́деши, и҆ и҆зведе́ши є҆го̀ ѿ среды̀ бра́тїи є҆гѡ̀, и҆ введе́ши є҆го̀ во внꙋ́треннюю клѣ́ть:
2
и вни́деши та́мо, и у́зриши та́мо іиу́а сы́на Іосафа́та сы́на намессі́єва, и вни́деши, и изведе́ши єго́ от среды́ бра́тіи єго́, и введе́ши єго́ во вну́треннюю клѣ́ть:
3
и҆ во́змеши сосꙋ́дъ є҆ле́а, и҆ возлїе́ши на главꙋ̀ є҆гѡ̀, и҆ рцы̀: си́це гл҃етъ гдⷭ҇ь: пома́захъ тѧ̀ въ царѧ̀ над̾ і҆и҃лемъ: и҆ ѿве́рзеши двє́ри, и҆ да бѣжи́ши, и҆ да не пребꙋ́деши та́мѡ.
3
и во́змеши сосу́дъ єле́а, и возліє́ши на главу́ єго́, и рцы́: си́це глаго́летъ Госпо́дь: пома́захъ тя́ въ царя́ надъ Ізра́илемъ: и отве́рзеши две́ри, и да бѣжи́ши, и да не пребу́деши та́мо.
4
И҆ и҆́де ѻ҆́трочищь проро́къ въ рамѡ́ѳъ галаа́дскїй:
4
И и́де о́трочищь проро́къ въ рамо́ѳъ Галаа́дскій:
5
и҆ вни́де, и҆ сѐ, кнѧ̑зи си́лы сѣдѧ́хꙋ, и҆ речѐ: сло́во мѝ є҆́сть къ тебѣ̀, ѽ, кнѧ́же. И҆ речѐ і҆иꙋ́й: къ комꙋ̀ ѿ всѣ́хъ на́съ; И҆ речѐ: къ тебѣ̀, кнѧ́же.
5
и вни́де, и се́, кня́зи си́лы сѣдя́ху, и рече́: сло́во ми́ є́сть къ тебѣ́, о, кня́же. И рече́ іиу́й: къ кому́ от всѣ́хъ на́съ? И рече́: къ тебѣ́, кня́же.
6
И҆ воста̀ и҆ вни́де въ до́мъ: и҆ возлїѧ̀ є҆ле́й на главꙋ̀ є҆гѡ̀ и҆ речѐ є҆мꙋ̀: си́це гл҃етъ гдⷭ҇ь бг҃ъ і҆и҃левъ: пома́захъ тѧ̀ въ царѧ̀ над̾ людьмѝ гдⷭ҇ними, над̾ і҆и҃лемъ.
6
И воста́ и вни́де въ до́мъ: и возлія́ єле́й на главу́ єго́ и рече́ єму́: си́це глаго́летъ Госпо́дь Бо́гъ Ізра́илевъ: пома́захъ тя́ въ царя́ надъ людьми́ Госпо́дними, надъ Ізра́илемъ.
7
и҆ да потреби́ши до́мъ а҆хаа́ва господи́на твоегѡ̀ ѿ лица̀ моегѡ̀, и҆ ѿмсти́ши кро́вь рабѡ́въ мои́хъ проро́кѡвъ и҆ кро́вь всѣ́хъ рабѡ́въ гдⷭ҇нихъ ѿ рꙋкѝ і҆езаве́лины.
7
и да потреби́ши до́мъ Ахаа́ва господи́на твоєго́ от лица́ моєго́, и отмсти́ши кро́вь рабо́въ мои́хъ проро́ковъ и кро́вь всѣ́хъ рабо́въ Госпо́днихъ от руки́ Ієзаве́лины.
8
и҆ ѿ рꙋкѝ всегѡ̀ до́мꙋ а҆хаа́влѧ, и҆ потреби́ши ѿ до́мꙋ а҆хаа́влѧ моча́щагосѧ къ стѣнѣ̀, и҆ содержа́щагосѧ, и҆ ѡ҆ста́вльшагосѧ во і҆и҃ли:
8
и от руки́ всего́ до́му Ахаа́вля, и потреби́ши от до́му Ахаа́вля моча́щагося къ стѣнѣ́, и содержа́щагося, и оста́вльшагося во Ізра́или:
9
и҆ преда́мъ до́мъ а҆хаа́вль, ꙗ҆́коже до́мъ і҆еровоа́ма сы́на нава́това и҆ ꙗ҆́коже до́мъ ваа́сы сы́на а҆хі́ина:
9
и преда́мъ до́мъ Ахаа́вль, я́коже до́мъ ієровоа́ма сы́на нава́това и я́коже до́мъ Ваа́сы сы́на Ахі́ина:
10
и҆ і҆езаве́ль снѣдѧ́тъ псѝ въ ча́сти і҆езрае́лѧ, и҆ не бꙋ́детъ погреба́ющагѡ ю҆̀. И҆ ѿве́рзе двє́ри и҆ оу҆бѣжа̀.
10
и Ієзаве́ль снѣдя́тъ пси́ въ ча́сти Ієзрає́ля, и не бу́детъ погреба́ющаго ю́. И отве́рзе две́ри и убѣжа́.
11
І҆иꙋ́й же и҆зы́де ко ѻ҆трокѡ́мъ господи́на своегѡ̀. И҆ рѣ́ша є҆мꙋ̀: ми́ръ ли; что̀ ꙗ҆́кѡ вни́де неи́стовый се́й къ тебѣ̀; И҆ речѐ и҆̀мъ: вы̀ вѣ́сте мꙋ́жа и҆ сꙋесло́вїе є҆гѡ̀.
11
Іиу́й же изы́де ко отроко́мъ господи́на своєго́. И рѣ́ша єму́: ми́ръ ли? что́ я́ко вни́де неи́стовый се́й къ тебѣ́? И рече́ и́мъ: вы́ вѣ́сте му́жа и суєсло́віє єго́.
12
И҆ рѣ́ша: не пра́вда, (а҆́ще не возвѣсти́ши;) возвѣстѝ оу҆̀бо на́мъ. И҆ речѐ і҆иꙋ́й къ ни̑мъ: та́кѡ и҆ та́кѡ речѐ ко мнѣ̀, глаго́лѧ: си́це гл҃етъ гдⷭ҇ь: пома́захъ тѧ̀ въ царѧ̀ над̾ і҆и҃лемъ.
12
И рѣ́ша: не пра́вда, [а́ще не возвѣсти́ши?] возвѣсти́ у́бо на́мъ. И рече́ іиу́й къ ни́мъ: та́ко и та́ко рече́ ко мнѣ́, глаго́ля: си́це глаго́летъ Госпо́дь: пома́захъ тя́ въ царя́ надъ Ізра́илемъ.
13
И҆ слы́шавше теко́ша спѣ́шнѡ, и҆ взѧ̀ кі́йждо ри̑зы своѧ̑, и҆ положи́ша под̾ ни́мъ, поне́же на є҆ди́нѣмъ ѿ степе́нїй сѣдѧ́ше, и҆ вострꙋби́ша въ ро́гъ и҆ рѣ́ша: воцари́сѧ і҆иꙋ́й.
13
И слы́шавше теко́ша спѣ́шно, и взя́ кі́йждо ри́зы своя́, и положи́ша подъ ни́мъ, поне́же на єди́нѣмъ от степе́ній сѣдя́ше, и воструби́ша въ ро́гъ и рѣ́ша: воцари́ся іиу́й.
14
И҆ возврати́сѧ і҆иꙋ́й сы́нъ і҆ѡсафа́та сы́на намессі́ева ко і҆ѡра́мꙋ. І҆ора́мъ же са́мъ стрежа́ше въ рамѡ́ѳѣ галаа́дстѣмъ и҆ ве́сь і҆и҃ль ѿ лица̀ а҆заи́ла царѧ̀ сѷрі́йска.
14
И возврати́ся іиу́й сы́нъ Іосафа́та сы́на намессі́єва ко Іора́му. Іора́мъ же са́мъ стрежа́ше въ рамо́ѳѣ Галаа́дстѣмъ и ве́сь Ізра́иль от лица́ азаи́ла царя́ сирі́йска.
15
И҆ возврати́сѧ і҆ѡра́мъ ца́рь цѣли́тисѧ во і҆езрае́ли ѿ ꙗ҆́звъ, и҆́миже оу҆ѧзви́ша є҆го̀ сѵ́рѧне, є҆гда̀ бра́шесѧ со а҆заи́ломъ царе́мъ сѷрі́йскимъ. И҆ речѐ і҆иꙋ́й: а҆́ще є҆́сть дꙋша̀ ва́ша со мно́ю, да не и҆зы́детъ и҆з̾ гра́да бѣгле́цъ, и҆тѝ и҆ возвѣсти́ти во і҆езрае́ли.
15
И возврати́ся Іора́мъ ца́рь цѣли́тися во Ієзрає́ли от я́звъ, и́миже уязви́ша єго́ Си́ряне, єгда́ бра́шеся со азаи́ломъ царе́мъ сирі́йскимъ. И рече́ іиу́й: а́ще є́сть душа́ ва́ша со мно́ю, да не изы́детъ изъ гра́да бѣгле́цъ, ити́ и возвѣсти́ти во Ієзрає́ли.
16
И҆ всѣ́де на конѧ̀, и҆ по́йде і҆иꙋ́й, и҆ сни́де во і҆езрае́ль, ꙗ҆́кѡ і҆ѡра́мъ ца́рь і҆и҃левъ цѣлѧ́шесѧ во і҆езрае́ли ѿ стрѣлѧ́нїй, и҆́миже оу҆стрѣли́ша є҆го̀ а҆рамі́ны въ рамѡ́ѳѣ на бра́ни со а҆заи́ломъ царе́мъ сѵ́рскимъ, ꙗ҆́кѡ то́й бѣ̀ си́ленъ и҆ мꙋ́жъ си́лы, и҆ лежа́ше та́мѡ. И҆ ѻ҆хозі́а ца́рь і҆ꙋ́динъ прїи́де ви́дѣти і҆ѡра́ма.
16
И всѣ́де на коня́, и по́йде іиу́й, и сни́де во Ієзрає́ль, я́ко Іора́мъ ца́рь Ізра́илевъ цѣля́шеся во Ієзрає́ли от стрѣля́ній, и́миже устрѣли́ша єго́ Арамі́ны въ рамо́ѳѣ на бра́ни со азаи́ломъ царе́мъ Си́рскимъ, я́ко то́й бѣ́ си́ленъ и му́жъ си́лы, и лежа́ше та́мо. И Охозі́а ца́рь Іу́динъ пріи́де ви́дѣти Іора́ма.
17
И҆ стра́жъ взы́де на сто́лпъ во і҆езрае́ли, и҆ ви́дѣ пра́хъ і҆иꙋ́евъ, є҆гда̀ и҆тѝ є҆мꙋ̀ и҆ речѐ: пра́хъ а҆́зъ ви́жꙋ. И҆ речѐ і҆ѡра́мъ: всадѝ мꙋ́жа на ко́нь и҆ послѝ проти́вꙋ и҆̀мъ, и҆ да рече́тъ: ми́ръ ли;
17
И стра́жъ взы́де на сто́лпъ во Ієзрає́ли, и ви́дѣ пра́хъ іиу́євъ, єгда́ ити́ єму́ и рече́: пра́хъ а́зъ ви́жу. И рече́ Іора́мъ: всади́ му́жа на ко́нь и посли́ проти́ву и́мъ, и да рече́тъ: ми́ръ ли?
18
И҆ и҆́де вса́дникъ ко́нный на срѣ́тенїе є҆мꙋ̀ и҆ речѐ: та́кѡ глаго́летъ ца́рь: ми́ръ ли; И҆ речѐ і҆иꙋ́й: что̀ тебѣ̀ и҆ ми́рꙋ; ѡ҆брати́сѧ вслѣ́дъ менє̀. И҆ возвѣстѝ стра́жъ, глаго́лѧ: прїи́де по́сланный до ни́хъ и҆ не возврати́сѧ.
18
И и́де вса́дникъ ко́нный на срѣ́теніє єму́ и рече́: та́ко глаго́летъ ца́рь: ми́ръ ли? И рече́ іиу́й: что́ тебѣ́ и ми́ру? обрати́ся вслѣ́дъ мене́. И возвѣсти́ стра́жъ, глаго́ля: пріи́де по́сланный до ни́хъ и не возврати́ся.
19
И҆ посла̀ вса́дника ко́ннаго втора́го, и҆ прїи́де къ немꙋ̀ и҆ речѐ: та́кѡ речѐ ца́рь: ми́ръ ли; И҆ речѐ і҆иꙋ́й: что̀ тебѣ̀ и҆ ми́рꙋ; возврати́сѧ вслѣ́дъ менє̀.
19
И посла́ вса́дника ко́ннаго втора́го, и пріи́де къ нему́ и рече́: та́ко рече́ ца́рь: ми́ръ ли? И рече́ іиу́й: что́ тебѣ́ и ми́ру? возврати́ся вслѣ́дъ мене́.
20
И҆ возвѣстѝ стра́жъ, глаго́лѧ: прїи́де до ни́хъ и҆ не возврати́сѧ: и҆ во́ждь ведѧ́ше і҆иꙋ́а сы́на намессі́ина, ꙗ҆́кѡ въ премѣ́нѣ бы́сть.
20
И возвѣсти́ стра́жъ, глаго́ля: пріи́де до ни́хъ и не возврати́ся: и во́ждь ведя́ше іиу́а сы́на намессі́ина, я́ко въ премѣ́нѣ бы́сть.
21
И҆ речѐ і҆ѡра́мъ: впрѧзи́те. И҆ впрѧго́ша колесни́цꙋ: и҆ и҆зы́де і҆ѡра́мъ ца́рь і҆и҃левъ и҆ ѻ҆хозі́а ца́рь і҆ꙋ́динъ, кі́йждо на колесни́цѣ свое́й, и҆ и҆зыдо́ста на срѣ́тенїе і҆иꙋ́а, и҆ ѡ҆брѣто́ста є҆го̀ и҆ ча́сти навꙋѳе́а і҆езраилі́тина.
21
И рече́ Іора́мъ: впрязи́те. И впряго́ша колесни́цу: и изы́де Іора́мъ ца́рь Ізра́илевъ и Охозі́а ца́рь Іу́динъ, кі́йждо на колесни́цѣ своє́й, и изыдо́ста на срѣ́теніє іиу́а, и обрѣто́ста єго́ на ча́сти навуѳе́а Ієзраилі́тина.
22
И҆ бы́сть ꙗ҆́кѡ оу҆ви́дѣ і҆ѡра́мъ і҆иꙋ́а, и҆ речѐ ми́ръ ли, і҆иꙋ́е; И҆ речѐ і҆иꙋ́й что̀ тебѣ̀ и҆ ми́рꙋ; є҆щѐ блꙋды̀ і҆езаве́ли ма́тери твоеѧ̀, и҆ ча́рове є҆ѧ̀ мнѡ́гїѧ.
22
И бы́сть я́ко уви́дѣ Іора́мъ іиу́а, и рече́ ми́ръ ли, іиу́є? И рече́ іиу́й что́ тебѣ́ и ми́ру? єще́ блуды́ Ієзаве́ли ма́тери твоєя́, и ча́рове єя́ мно́гія.
23
И҆ ѡ҆братѝ і҆ѡра́мъ рꙋ́ки своѧ̑ и҆ бѣжа̀, и҆ речѐ ко ѻ҆хозі́и: ле́сть, ѻ҆хозі́е.
23
И обрати́ Іора́мъ ру́ки своя́ и бѣжа́, и рече́ ко Охозі́и: ле́сть, Охозі́є.
24
И҆ налѧчѐ і҆иꙋ́й рꙋко́ю свое́ю лꙋ́къ и҆ оу҆стрѣлѝ і҆ѡра́ма посредѣ̀ плєщꙋ̀ є҆гѡ̀, и҆ и҆зы́де стрѣла̀ сквозѣ̀ се́рдце є҆гѡ̀: и҆ преклони́сѧ на кѡлѣ́на своѧ̑.
24
И наляче́ іиу́й руко́ю своє́ю лу́къ и устрѣли́ Іора́ма посредѣ́ плещу́ єго́, и изы́де стрѣла́ сквозѣ́ се́рдце єго́: и преклони́ся на колѣ́на своя́.
25
И҆ речѐ і҆иꙋ́й къ вадека́рꙋ трїста́тꙋ своемꙋ̀: возмѝ и҆ ве́рзи є҆го̀ на ча́сти села̀ навꙋѳе́а і҆езраилі́тина, ꙗ҆́кѡ по́мню, а҆́зъ и҆ ты̀ всѣ́дшїи на колєсни́цы и҆до́хомъ вслѣ́дъ а҆хаа́ва ѻ҆тца̀ є҆гѡ̀, и҆ гдⷭ҇ь речѐ ѡ҆ не́мъ прро́чество сїѐ, гл҃ѧ:
25
И рече́ іиу́й къ вадека́ру тріста́ту своєму́: возми́ и ве́рзи єго́ на ча́сти села́ навуѳе́а Ієзраилі́тина, я́ко по́мню, а́зъ и ты́ всѣ́дшіи на колесни́цы идо́хомъ вслѣ́дъ Ахаа́ва отца́ єго́, и Госпо́дь рече́ о не́мъ прро́чество сіє́, глаго́ля:
26
не ви́дѣхъ ли кро́ве навꙋѳе́евы и҆ кро́ве сынѡ́въ є҆гѡ̀ вчера̀, речѐ гдⷭ҇ь; и҆ возда́мъ є҆мꙋ̀ на ча́сти се́й, речѐ гдⷭ҇ь: и҆ нн҃ѣ оу҆̀бо взе́мъ пове́рзи є҆го̀ на ча́сти се́й по гл҃ꙋ гдⷭ҇ню.
26
не ви́дѣхъ ли кро́ве навуѳе́євы и кро́ве сыно́въ єго́ вчера́, рече́ Госпо́дь? и возда́мъ єму́ на ча́сти се́й, рече́ Госпо́дь: и ны́нѣ у́бо взе́мъ пове́рзи єго́ на ча́сти се́й по глаго́лу Госпо́дню.
27
И҆ ѻ҆хозі́а ца́рь і҆ꙋ́динъ ви́дѣ, и҆ побѣжѐ пꙋте́мъ веѳга́нъ и҆ гна̀ по не́мъ і҆иꙋ́й и҆ речѐ: и҆ сегѡ̀ (не и҆́мамъ ѡ҆ста́вити). И҆ поразѝ є҆го̀ на колесни́цѣ є҆гда̀ и҆дѧ́ше въ га́й, и҆́же є҆́сть і҆евлаа́мъ и҆ оу҆бѣжа̀ въ магеддѡ́нъ, и҆ оу҆́мре та́мѡ.
27
И Охозі́а ца́рь Іу́динъ ви́дѣ, и побѣже́ путе́мъ веѳга́нъ и гна́ по не́мъ іиу́й и рече́: и сего́ [не и́мамъ оста́вити]. И порази́ єго́ на колесни́цѣ єгда́ идя́ше въ га́й, и́же є́сть Ієвлаа́мъ и убѣжа́ въ Магеддо́нъ, и у́мре та́мо.
28
И҆ возложи́ша є҆го̀ ѻ҆́троцы є҆гѡ̀ на колесни́цꙋ и҆ везо́ша є҆го̀ во і҆ерⷭ҇ли́мъ, и҆ погребо́ша є҆го̀ во гро́бѣ є҆гѡ̀ во гра́дѣ даві́довѣ.
28
И возложи́ша єго́ о́троцы єго́ на колесни́цу и везо́ша єго́ во Ієрусали́мъ, и погребо́ша єго́ во гро́бѣ єго́ во гра́дѣ даві́довѣ.
29
И҆ въ первоена́десѧть лѣ́то і҆ѡра́ма царѧ̀ і҆и҃лева воцари́сѧ ѻ҆хозі́а над̾ і҆ꙋ́дою.
29
И въ первоєна́десять лѣ́то Іора́ма царя́ Ізра́илева воцари́ся Охозі́а надъ Іу́дою.
30
И҆ прїи́де і҆иꙋ́й во і҆езрае́ль (гра́дъ). І҆езаве́ль же оу҆слы́ша, и҆ нама́за лицѐ своѐ и҆ оу҆красѝ главꙋ̀ свою̀, и҆ прини́че ѻ҆кно́мъ.
30
И пріи́де іиу́й во Ієзрає́ль [гра́дъ]. Ієзаве́ль же услы́ша, и нама́за лице́ своє́ и украси́ главу́ свою́, и прини́че окно́мъ.
31
И҆ і҆иꙋ́й вхожда́ше во гра́дъ и҆ речѐ: ми́ръ ли замврі́ю, оу҆бі́йцѣ господи́на своегѡ̀;
31
И іиу́й вхожда́ше во гра́дъ и рече́: ми́ръ ли замврі́ю, убі́йцѣ господи́на своєго́?
32
И҆ воззрѣ̀ лице́мъ свои́мъ на ѻ҆кно̀ и҆ ви́дѣ ю҆̀ и҆ речѐ: кто̀ ты̀ є҆сѝ; сни́ди ко мнѣ̀. И҆ преклони́стасѧ къ немꙋ̀ два̀ скѡпца̀.
32
И воззрѣ́ лице́мъ свои́мъ на окно́ и ви́дѣ ю́ и рече́: кто́ ты́ єси́? сни́ди ко мнѣ́. И преклони́стася къ нему́ два́ скопца́.
33
И҆ речѐ і҆иꙋ́й: све́рзита ю҆̀. И҆ сверго́ста ю҆̀, и҆ ѡ҆кропи́шасѧ кро́вїю є҆ѧ̀ стѣ́ны и҆ ко́ни, и҆ попра́ша ю҆̀.
33
И рече́ іиу́й: све́рзита ю́. И сверго́ста ю́, и окропи́шася кро́вію єя́ стѣ́ны и ко́ни, и попра́ша ю́.
34
И҆ вни́де і҆иꙋ́й, и҆ ꙗ҆дѐ и҆ пѝ, и҆ речѐ: ѡ҆смотри́те нн҃ѣ проклѧ́тꙋю сїю̀, и҆ погреби́те ю҆̀, ꙗ҆́кѡ дще́рь царе́ва є҆́сть.
34
И вни́де іиу́й, и яде́ и пи́, и рече́: осмотри́те ны́нѣ прокля́тую сію́, и погреби́те ю́, я́ко дще́рь царе́ва є́сть.
35
И҆ и҆до́ша погребстѝ ю҆̀, и҆ не ѡ҆брѣто́ша ѿ неѧ̀ ничто̀ и҆́но, то́кмѡ ло́бъ и҆ но́ги и҆ дла̑ни рꙋ́къ.
35
И идо́ша погребсти́ ю́, и не обрѣто́ша от нея́ ничто́ и́но, то́кмо ло́бъ и но́ги и дла́ни ру́къ.
36
И҆ возврати́шасѧ и҆ возвѣсти́ша є҆мꙋ̀. И҆ речѐ: сло́во гдⷭ҇не, є҆́же гл҃а рꙋко́ю раба̀ своегѡ̀ и҆лїѝ ѳесві́тѧнина, гл҃ѧ: въ ча́сти і҆езрае́лѧ снѣдѧ́тъ псѝ пло́ть і҆езаве́линꙋ:
36
И возврати́шася и возвѣсти́ша єму́. И рече́: сло́во Госпо́дне, є́же глаго́ла руко́ю раба́ своєго́ иліи́ Ѳесві́тянина, глаго́ля: въ ча́сти Ієзрає́ля снѣдя́тъ пси́ пло́ть Ієзаве́лину:
37
и҆ бꙋ́детъ трꙋ́пъ і҆езаве́линъ а҆́ки гно́й на лицы̀ села̀ въ ча́сти і҆езрае́лѧ, ꙗ҆́кѡ не рещѝ и҆̀мъ: сїѧ̀ є҆́сть і҆езаве́ль.
37
и бу́детъ тру́пъ Ієзаве́линъ а́ки гно́й на лицы́ села́ въ ча́сти Ієзрає́ля, я́ко не рещи́ и́мъ: сія́ є́сть Ієзаве́ль.