Друк брошурою Виконується верстка сторінок…
Папір A4, альбомна орієнтація, поля «Немає», без колонтитулів. Друкуйте двосторонньо, з переворотом по короткому краю, у масштабі 100%; якщо принтер обрізає край — 98%. Не вмикайте режим «Буклет» у драйвері принтера.
1
И҆ бы́сть є҆гда̀ оу҆́мре саꙋ́лъ, и҆ даві́дъ возврати́сѧ побѣди́въ а҆мали́ка, и҆ пребы́сть даві́дъ въ секела́зѣ дни̑ два̀.
1
И бы́сть єгда́ у́мре Сау́лъ, и даві́дъ возврати́ся побѣди́въ Амали́ка, и пребы́сть даві́дъ въ секела́зѣ дни́ два́.
2
И҆ бы́сть въ тре́тїй де́нь, и҆ сѐ, мꙋ́жъ прїи́де ѿ полка̀ люді́й саꙋ́ловыхъ, ри̑зы же є҆гѡ̀ (бѧ́хꙋ) раздра̑ны, и҆ пе́рсть на главѣ̀ є҆гѡ̀: и҆ бы́сть є҆гда̀ вни́де къ даві́дꙋ (ѻ҆́трокъ), и҆ па́дъ на землѝ поклони́сѧ є҆мꙋ̀.
2
И бы́сть въ тре́тій де́нь, и се́, му́жъ пріи́де от полка́ люді́й Сау́ловыхъ, ри́зы же єго́ [бя́ху] раздра́ны, и пе́рсть на главѣ́ єго́: и бы́сть єгда́ вни́де къ даві́ду [о́трокъ], и па́дъ на земли́ поклони́ся єму́.
3
И҆ речѐ є҆мꙋ̀ даві́дъ: ѿкꙋ́дꙋ ты̀ прише́лъ є҆сѝ; И҆ речѐ є҆мꙋ̀: ѿ полка̀ і҆и҃лева а҆́зъ и҆збѣго́хъ.
3
И рече́ єму́ даві́дъ: отку́ду ты́ прише́лъ єси́? И рече́ єму́: от полка́ Ізра́илева а́зъ избѣго́хъ.
4
И҆ речѐ є҆мꙋ̀ даві́дъ: что̀ сло́во сїѐ; возвѣсти́ ми. И҆ речѐ: ꙗ҆́кѡ побѣго́ша лю́дїе ѿ бра́ни, и҆ падо́ша мно́зи ѿ люді́й, и҆ и҆змро́ша, и҆ саꙋ́лъ и҆ і҆ѡнаѳа́нъ сы́нъ є҆гѡ̀ оу҆́мре.
4
И рече́ єму́ даві́дъ: что́ сло́во сіє́? возвѣсти́ ми. И рече́: я́ко побѣго́ша лю́діє от бра́ни, и падо́ша мно́зи от люді́й, и измро́ша, и Сау́лъ и Іонаѳа́нъ сы́нъ єго́ у́мре.
5
И҆ речѐ даві́дъ ѻ҆́трокꙋ возвѣсти́вшемꙋ є҆мꙋ̀: ка́кѡ зна́еши, ꙗ҆́кѡ оу҆́мре саꙋ́лъ и҆ і҆ѡнаѳа́нъ сы́нъ є҆гѡ̀;
5
И рече́ даві́дъ о́троку возвѣсти́вшему єму́: ка́ко зна́єши, я́ко у́мре Сау́лъ и Іонаѳа́нъ сы́нъ єго́?
6
И҆ речѐ ѻ҆́трокъ возвѣща́ѧй є҆мꙋ̀: по слꙋ́чаю прїидо́хъ въ го́рꙋ гелвꙋ́йскꙋю, и҆ сѐ, саꙋ́лъ напада́ше на копїѐ своѐ, и҆ сѐ, колєсни́цы и҆ вельмѡ́жи собра́шасѧ на́нь:
6
И рече́ о́трокъ возвѣща́яй єму́: по слу́чаю пріидо́хъ въ го́ру гелву́йскую, и се́, Сау́лъ напада́ше на копіє́ своє́, и се́, колесни́цы и вельмо́жи собра́шася на́нь:
7
и҆ ѡ҆бозрѣ́сѧ вспѧ́ть (саꙋ́лъ) и҆ ви́дѣ мѧ̀, и҆ призва́ мѧ, и҆ рѣ́хъ: сѐ, а҆́зъ:
7
и обозрѣ́ся вспя́ть [сау́лъ] и ви́дѣ мя́, и призва́ мя, и рѣ́хъ: се́, а́зъ:
8
и҆ рече́ ми: кто̀ ты̀ є҆сѝ; и҆ рѣ́хъ: а҆маликі́тинъ є҆́смь а҆́зъ:
8
и рече́ ми: кто́ ты́ єси́? и рѣ́хъ: Амаликі́тинъ є́смь а́зъ:
9
и҆ рече́ ми: прїидѝ оу҆̀бо на мѧ̀ и҆ оу҆бі́й мѧ̀, ꙗ҆́кѡ ѡ҆б̾ѧ́тъ мѧ̀ тма̀ лю́таѧ, ꙗ҆́кѡ є҆щѐ дꙋша̀ моѧ̀ во мнѣ̀:
9
и рече́ ми: пріиди́ у́бо на мя́ и убі́й мя́, я́ко объя́тъ мя́ тма́ лю́тая, я́ко єще́ душа́ моя́ во мнѣ́:
10
и҆ ста́хъ над̾ ни́мъ, и҆ оу҆би́хъ є҆го̀: вѣ́дѣхъ бо, ꙗ҆́кѡ не бꙋ́детъ жи́въ по паде́нїи свое́мъ: и҆ взѧ́въ вѣне́цъ ца́рскїй, и҆́же бѣ̀ на главѣ̀ є҆гѡ̀, и҆ нара́мницꙋ, ꙗ҆́же бѣ̀ на плєщꙋ̀ є҆гѡ̀, и҆ принесо́хъ сїѧ̑ къ господи́нꙋ моемꙋ̀ сѣ́мѡ.
10
и ста́хъ надъ ни́мъ, и уби́хъ єго́: вѣ́дѣхъ бо, я́ко не бу́детъ жи́въ по паде́ніи своє́мъ: и взя́въ вѣне́цъ ца́рскій, и́же бѣ́ на главѣ́ єго́, и нара́мницу, я́же бѣ́ на плещу́ єго́, и принесо́хъ сія́ къ господи́ну моєму́ сѣ́мо.
11
И҆ є҆́мьсѧ даві́дъ за ри̑зы своѧ̑, и҆ раздра̀ ѧ҆̀, и҆ всѝ мꙋ́жїе и҆́же съ ни́мъ раздра́ша ри̑зы своѧ̑,
11
И є́мься даві́дъ за ри́зы своя́, и раздра́ я́, и вси́ му́жіє и́же съ ни́мъ раздра́ша ри́зы своя́,
12
и҆ рыда́ша и҆ пла́кашасѧ, и҆ пости́шасѧ до ве́чера ѡ҆ саꙋ́лѣ, и҆ ѡ҆ і҆ѡнаѳа́нѣ сы́нѣ є҆гѡ̀, и҆ ѡ҆ лю́дехъ і҆ꙋ́диныхъ и҆ ѡ҆ до́мѣ і҆и҃левѣ, ꙗ҆́кѡ и҆збїе́ни бы́ша мече́мъ.
12
и рыда́ша и пла́кашася, и пости́шася до ве́чера о Сау́лѣ, и о Іонаѳа́нѣ сы́нѣ єго́, и о лю́дехъ Іу́диныхъ и о до́мѣ Ізра́илевѣ, я́ко избіє́ни бы́ша мече́мъ.
13
И҆ речѐ даві́дъ ѻ҆́трокꙋ возвѣсти́вшемꙋ є҆мꙋ̀: ѿкꙋ́дꙋ ты̀ є҆сѝ; И҆ речѐ: сы́нъ мꙋ́жа прише́лца а҆маликі́тина є҆́смь а҆́зъ.
13
И рече́ даві́дъ о́троку возвѣсти́вшему єму́: отку́ду ты́ єси́? И рече́: сы́нъ му́жа прише́лца Амаликі́тина є́смь а́зъ.
14
И҆ речѐ є҆мꙋ̀ даві́дъ: ка́кѡ не оу҆боѧ́лсѧ є҆сѝ воздви́гнꙋти рꙋ́кꙋ твою̀ погꙋби́ти хрїста̀ гдⷭ҇нѧ;
14
И рече́ єму́ даві́дъ: ка́ко не убоя́лся єси́ воздви́гнути ру́ку твою́ погуби́ти хріста́ Госпо́дня?
15
И҆ призва̀ даві́дъ є҆ди́наго ѿ ѻ҆́трѡкъ свои́хъ и҆ речѐ: и҆дѝ, оу҆бі́й є҆го̀. И҆ оу҆бѝ є҆го̀, и҆ оу҆́мре.
15
И призва́ даві́дъ єди́наго от о́трокъ свои́хъ и рече́: иди́, убі́й єго́. И уби́ єго́, и у́мре.
16
И҆ речѐ є҆мꙋ̀ даві́дъ: кро́вь твоѧ̀ на главѣ̀ твое́й, ꙗ҆́кѡ оу҆ста̀ твоѧ̑ на тѧ̀ возвѣща́ша, глаго́люще: ꙗ҆́кѡ а҆́зъ оу҆би́хъ хрїста̀ гдⷭ҇нѧ.
16
И рече́ єму́ даві́дъ: кро́вь твоя́ на главѣ́ твоє́й, я́ко уста́ твоя́ на тя́ возвѣща́ша, глаго́люще: я́ко а́зъ уби́хъ хріста́ Госпо́дня.
17
И҆ пла́касѧ даві́дъ пла́чемъ си́мъ ѡ҆ саꙋ́лѣ и҆ ѡ҆ і҆ѡнаѳа́нѣ сы́нѣ є҆гѡ̀,
17
И пла́кася даві́дъ пла́чемъ си́мъ о Сау́лѣ и о Іонаѳа́нѣ сы́нѣ єго́,
18
и҆ речѐ є҆́же наꙋчи́ти сы́ны і҆ꙋ̑дины стрѣлѧ́нїю. Сѐ напи́сано въ кни́зѣ првⷣнагѡ.
18
и рече́ є́же научи́ти сы́ны Іу́дины стрѣля́нію. Се́ напи́сано въ кни́зѣ пра́веднаго.
19
И҆ речѐ: воздви́гни сто́лпъ, і҆и҃лю, над̾ оу҆ме́ршими на высо́кихъ твои́хъ ꙗ҆́звеными: ка́кѡ падо́ша си́льнїи;
19
И рече́: воздви́гни сто́лпъ, Ізра́илю, надъ уме́ршими на высо́кихъ твои́хъ я́звеными: ка́ко падо́ша си́льніи?
20
не возвѣща́йте въ ге́ѳѣ, нижѐ повѣ́дайте на и҆схо́дищихъ а҆скалѡ́нихъ, да не возвеселѧ́тсѧ дщє́ри и҆ноплемє́нничи, ни да возра́дꙋютсѧ дщє́ри неѡбрѣ́занныхъ.
20
не возвѣща́йте въ ге́ѳѣ, ниже́ повѣ́дайте на исхо́дищихъ Аскало́нихъ, да не возвеселя́тся дще́ри иноплеме́нничи, ни да возра́дуются дще́ри необрѣ́занныхъ.
21
Го́ры гелвꙋ̑йскїѧ, да не сни́детъ роса̀ нижѐ до́ждь на ва́съ: и҆ се́ла нача́ткѡвъ (жи́тныхъ), ꙗ҆́кѡ та́мѡ пове́рженъ бы́сть щи́тъ си́льныхъ: щи́тъ саꙋ́ловъ не бы́ти пома́занъ є҆ле́емъ:
21
Го́ры гелву́йскія, да не сни́детъ роса́ ниже́ до́ждь на ва́съ: и се́ла нача́тковъ [жи́тныхъ], я́ко та́мо пове́рженъ бы́сть щи́тъ си́льныхъ: щи́тъ Сау́ловъ не бы́ти пома́занъ єле́ємъ:
22
ѿ кро́ве ꙗ҆́звеныхъ и҆ ѿ тꙋ́ка си́льныхъ лꙋ́къ і҆ѡнаѳа́новъ не возврати́сѧ то́щь вспѧ́ть, и҆ ме́чь саꙋ́ловъ не возврати́сѧ то́щь:
22
от кро́ве я́звеныхъ и от ту́ка си́льныхъ лу́къ Іонаѳа́новъ не возврати́ся то́щь вспя́ть, и ме́чь Сау́ловъ не возврати́ся то́щь:
23
саꙋ́лъ и҆ і҆ѡнаѳа́нъ возлю́бленнїи и҆ прекра́снїи неразлꙋ́чни, благолѣ́пни въ животѣ̀ свое́мъ, и҆ въ сме́рти свое́й не разлꙋчи́шасѧ: па́че ѻ҆рлѡ́въ ле́гцы и҆ па́че львѡ́въ крѣ́пцы:
23
Сау́лъ и Іонаѳа́нъ возлю́бленніи и прекра́сніи неразлу́чни, благолѣ́пни въ животѣ́ своє́мъ, и въ сме́рти своє́й не разлучи́шася: па́че орло́въ ле́гцы и па́че льво́въ крѣ́пцы:
24
пла́чите по саꙋ́лѣ, дщє́ри і҆и҃лєвы, и҆́же ва́съ ѡ҆блача́ше въ червлєни́цы со оу҆краше́нїемъ ва́шимъ, и҆ возлага́ше оу҆краше́нїе зла́то на ри̑зы ва́шѧ:
24
пла́чите по Сау́лѣ, дще́ри Ізра́илевы, и́же ва́съ облача́ше въ червлени́цы со украше́ніємъ ва́шимъ, и возлага́ше украше́ніє зла́то на ри́зы ва́шя:
25
ка́кѡ падо́ша си́льнїи посредѣ̀ бра́ни; і҆ѡнаѳа́не, до сме́рти на высо́кихъ твои́хъ ꙗ҆́звенъ є҆сѝ:
25
ка́ко падо́ша си́льніи посредѣ́ бра́ни? Іонаѳа́не, до сме́рти на высо́кихъ твои́хъ я́звенъ єси́:
26
болѣ́знꙋю ѡ҆ тебѣ̀, бра́те мо́й і҆ѡнаѳа́не, кра́сный мѝ ѕѣлѡ̀, оу҆диви́сѧ любо́вь твоѧ̀ ѿ менє̀ па́че любвѐ же́нскїѧ:
26
болѣ́зную о тебѣ́, бра́те мо́й Іонаѳа́не, кра́сный ми́ зѣло́, удиви́ся любо́вь твоя́ от мене́ па́че любве́ же́нскія:
27
ка́кѡ падо́ша си́льнїи, и҆ погибо́ша ѻ҆рꙋ̑жїѧ бра̑ннаѧ;
27
ка́ко падо́ша си́льніи, и погибо́ша ору́жія бра́нная?