¹

Фи́стъ же оу҆̀бо прїи́мь вла́сть, по трїе́хъ дне́хъ взы́де во і҆ерⷭ҇ли́мъ ѿ кесарі́и.

¹

Фи́стъ же у́бо пріи́мь вла́сть, по тріє́хъ дне́хъ взы́де во Ієрусали́мъ от Кесарі́и.

²

Сказа́ша же є҆мꙋ̀ а҆рхїере́є и҆ пе́рвїи ѿ і҆ꙋдє́й на па́ѵла и҆ молѧ́хꙋ є҆го̀,

²

Сказа́ша же єму́ архієре́є и пе́рвіи от Іуде́й на Па́вла и моля́ху єго́,

³

просѧ́ще благода́ти на́нь, ꙗ҆́кѡ да по́слетъ є҆го̀ во і҆ерⷭ҇ли́мъ, ко́въ творѧ́ще, ꙗ҆́кѡ да оу҆бїю́тъ є҆го̀ на пꙋтѝ.

³

прося́ще благода́ти на́нь, я́ко да по́слетъ єго́ во Ієрусали́мъ, ко́въ творя́ще, я́ко да убію́тъ єго́ на пути́.

⁴

Фи́стъ же повелѣ̀ па́ѵла стрещѝ въ кесарі́и, са́мъ та́мѡ хотѧ̀ вско́рѣ и҆зы́ти:

⁴

Фи́стъ же повелѣ́ Па́вла стрещи́ въ Кесарі́и, са́мъ та́мо хотя́ вско́рѣ изы́ти:

⁵

и҆̀же оу҆̀бо си́льнїи въ ва́съ, речѐ, со мно́ю ше́дше, а҆́ще є҆́сть ка́ѧ непра́вда въ мꙋ́жи се́мъ, да глаго́лютъ на́нь.

⁵

и́же у́бо си́льніи въ ва́съ, рече́, со мно́ю ше́дше, а́ще є́сть ка́я непра́вда въ му́жи се́мъ, да глаго́лютъ на́нь.

⁶

Пребы́въ же оу҆ ни́хъ не мно́жае десѧтѝ дні́й, сни́де въ кесарі́ю: на оу҆́трїе сѣ́дъ на сꙋди́щи, повелѣ̀ па́ѵла привестѝ.

⁶

Пребы́въ же у ни́хъ не мно́жає десяти́ дні́й, сни́де въ Кесарі́ю: на у́тріє сѣ́дъ на суди́щи, повелѣ́ Па́вла привести́.

⁷

Приведе́нꙋ же бы́вшꙋ є҆мꙋ̀, ѡ҆́крестъ ста́ша и҆̀же ѿ і҆ерⷭ҇ли́ма сше́дшїи і҆ꙋде́є, мнѡ́ги и҆ тѧ̑жки вины̑ приносѧ́ще на па́ѵла, и҆́хже не можа́хꙋ и҆з̾ѧви́ти:

⁷

Приведе́ну же бы́вшу єму́, о́крестъ ста́ша и́же от Ієрусали́ма сше́дшіи Іуде́є, мно́ги и тя́жки вины́ принося́ще на Па́вла, и́хже не можа́ху изъяви́ти:

⁸

ѿвѣщава́ющꙋ є҆мꙋ̀, ꙗ҆́кѡ ни на зако́нъ і҆ꙋде́йскїй, ни на це́рковь, ни на ке́сарѧ что̀ согрѣши́хъ.

⁸

отвѣщава́ющу єму́, я́ко ни на зако́нъ Іуде́йскій, ни на це́рковь, ни на ке́саря что́ согрѣши́хъ.

⁹

Фи́стъ же хотѧ̀ оу҆го́дное і҆ꙋде́ємъ сотвори́ти, ѿвѣща́въ па́ѵлови речѐ: хо́щеши ли, во і҆ерⷭ҇ли́мъ возше́дъ, та́мѡ ѡ҆ си́хъ сꙋ́дъ прїѧ́ти ѿ менє̀;

⁹

Фи́стъ же хотя́ уго́дноє Іуде́ємъ сотвори́ти, отвѣща́въ Па́влови рече́: хо́щеши ли, во Ієрусали́мъ возше́дъ, та́мо о си́хъ су́дъ прія́ти от мене́?

¹⁰

Рече́ же па́ѵелъ: на сꙋди́щи ке́саревѣ стоѧ̀ є҆́смь, и҆дѣ́же мѝ досто́итъ сꙋ́дъ прїѧ́ти: і҆ꙋдє́й ни чи́мже ѡ҆би́дѣхъ, ꙗ҆́коже и҆ ты̀ до́брѣ вѣ́си:

¹⁰

Рече́ же Па́велъ: на суди́щи ке́саревѣ стоя́ є́смь, идѣ́же ми́ досто́итъ су́дъ прія́ти: Іуде́й ни чи́мже оби́дѣхъ, я́коже и ты́ до́брѣ вѣ́си:

¹¹

а҆́ще бо непра́вдꙋю и҆лѝ досто́йно сме́рти сотвори́хъ что̀, не ѿме́щꙋсѧ оу҆мре́ти: а҆́ще ли же ничто́же є҆́сть во мнѣ̀, є҆́же сі́и на мѧ̀ клеве́щꙋтъ, никто́же мѧ̀ мо́жетъ тѣ̑мъ вы́дати: ке́сарѧ нарица́ю.

¹¹

а́ще бо непра́вдую или́ досто́йно сме́рти сотвори́хъ что́, не отме́щуся умре́ти: а́ще ли же ничто́же є́сть во мнѣ́, є́же сі́и на мя́ клеве́щутъ, никто́же мя́ мо́жетъ тѣ́мъ вы́дати: ке́саря нарица́ю.

¹²

Тогда̀ фи́стъ состѧза́всѧ съ совѣ̑тники, ѿвѣща̀: ке́сарѧ ли наре́клъ є҆сѝ; къ ке́сарю по́йдеши.

¹²

Тогда́ Фи́стъ состяза́вся съ совѣ́тники, отвѣща́: ке́саря ли наре́клъ єси́? Къ ке́сарю по́йдеши.

¹³

Днє́мъ же минꙋ́вшымъ нѣ̑кимъ, а҆грі́ппа ца́рь и҆ вернїкі́а снидо́ста въ кесарі́ю цѣлова́ти фи́ста.

¹³

Дне́мъ же мину́вшымъ нѣ́кимъ, Агрі́ппа ца́рь и Вернікі́а снидо́ста въ Кесарі́ю цѣлова́ти Фи́ста.

¹⁴

(Заⷱ҇ м҃и҃.) И҆ ꙗ҆́коже мнѡ́ги дни̑ пребы́ста тꙋ̀, фи́стъ сказа̀ царю̀ ꙗ҆̀же ѡ҆ па́ѵлѣ, глаго́лѧ: мꙋ́жъ нѣ́кїй є҆́сть ѡ҆ста́вленъ ѿ фи́лїѯа оу҆́зникъ,

¹⁴

И я́коже мно́ги дни́ пребы́ста ту́, Фи́стъ сказа́ царю́ я́же о Па́влѣ, глаго́ля: му́жъ нѣ́кій є́сть оста́вленъ от Фи́лікса у́зникъ,

¹⁵

ѡ҆ не́мже, бы́вшꙋ мѝ во і҆ерⷭ҇ли́мѣ, ꙗ҆ви́ша а҆рхїере́є и҆ ста́рцы і҆ꙋде́йстїи, просѧ́ще на́нь сꙋда̀.

¹⁵

о не́мже, бы́вшу ми́ во Ієрусали́мѣ, яви́ша архієре́є и ста́рцы Іуде́йстіи, прося́ще на́нь суда́.

¹⁶

Къ ни̑мже ѿвѣща́хъ, ꙗ҆́кѡ нѣ́сть ѡ҆бы́чай ри́млѧнѡмъ вы́дати человѣ́ка ко́его на поги́бель, пре́жде да́же ѡ҆клевета́емый не и҆́мать пред̾ лице́мъ клеве́щꙋщихъ є҆го̀ и҆ мѣ́сто ѿвѣ́та прїи́метъ ѡ҆ свое́мъ согрѣше́нїи.

¹⁶

Къ ни́мже отвѣща́хъ, я́ко нѣ́сть обы́чай Ри́мляномъ вы́дати человѣ́ка ко́єго на поги́бель, пре́жде да́же оклевета́ємый не и́мать предъ лице́мъ клеве́щущихъ єго́ и мѣ́сто отвѣ́та пріи́метъ о своє́мъ согрѣше́ніи.

¹⁷

Сше́дшымсѧ же и҆̀мъ здѣ̀, закоснѣ́нїе ни є҆ди́но сотво́рь, на оу҆́трїе сѣ́дъ на сꙋди́щи, повелѣ́хъ привестѝ мꙋ́жа.

¹⁷

Сше́дшымся же и́мъ здѣ́, закоснѣ́ніє ни єди́но сотво́рь, на у́тріє сѣ́дъ на суди́щи, повелѣ́хъ привести́ му́жа.

¹⁸

Ѡ҆́крестъ же є҆гѡ̀ ста́вше клеветницы̀, ни є҆ди́нꙋ винꙋ̀, ꙗ҆̀же а҆́зъ непщева́хъ, нанесо́ша:

¹⁸

О́крестъ же єго́ ста́вше клеветницы́, ни єди́ну вину́, я́же а́зъ непщева́хъ, нанесо́ша:

¹⁹

стѧза̑нїѧ же нѣ̑каѧ ѡ҆ свое́й разли́чнѣй вѣ́рѣ и҆мѧ́хꙋ къ немꙋ̀ и҆ ѡ҆ нѣ́коемъ і҆и҃сѣ оу҆ме́ршемъ, є҆го́же глаго́лаше па́ѵелъ жи́ва бы́ти.

¹⁹

стяза́нія же нѣ́кая о своє́й разли́чнѣй вѣ́рѣ имя́ху къ нему́ и о нѣ́коємъ Іису́сѣ уме́ршемъ, Єго́же глаго́лаше Па́велъ жи́ва бы́ти.

²⁰

Недоꙋмѣ́ѧсѧ же а҆́зъ ѡ҆ взыска́нїи си́хъ, глаго́лахъ, а҆́ще хо́щетъ и҆тѝ во і҆ерⷭ҇ли́мъ и҆ та́мѡ сꙋ́дъ прїѧ́ти ѡ҆ си́хъ.

²⁰

Недоумѣ́яся же а́зъ о взыска́ніи си́хъ, глаго́лахъ, а́ще хо́щетъ ити́ во Ієрусали́мъ и та́мо су́дъ прія́ти о си́хъ.

²¹

Па́ѵлꙋ же наре́кшꙋ блюде́нꙋ бы́ти є҆мꙋ̀ до разсꙋжде́нїѧ а҆́ѵгꙋста, повелѣ́хъ блюстѝ є҆го̀, до́ндеже послю̀ є҆го̀ къ ке́сарю.

²¹

Па́влу же наре́кшу блюде́ну бы́ти єму́ до разсужде́нія А́вгуста, повелѣ́хъ блюсти́ єго́, до́ндеже послю́ єго́ къ ке́сарю.

²²

А҆грі́ппа же къ фи́стꙋ речѐ: хотѣ́лъ бы́хъ и҆ са́мъ человѣ́ка сего̀ слы́шати. Ѻ҆́нъ же речѐ: оу҆́трѣ оу҆слы́шиши є҆го̀.

²²

Агрі́ппа же къ Фи́сту рече́: хотѣ́лъ бы́хъ и са́мъ человѣ́ка сего́ слы́шати. О́нъ же рече́: у́трѣ услы́шиши єго́.

²³

На оу҆́трїе же прише́дшꙋ а҆грі́ппѣ и҆ вернїкі́и со мно́гою го́рдостїю и҆ вше́дшымъ въ сꙋде́бнꙋю пала́тꙋ съ ты̑сѧщники и҆ съ наро́читыми мꙋ̑жи гра́да, и҆ повелѣ́вшꙋ фи́стꙋ, приведе́нъ бы́сть па́ѵелъ.

²³

На у́тріє же прише́дшу Агрі́ппѣ и Вернікі́и со мно́гою го́рдостію и вше́дшымъ въ суде́бную пала́ту съ ты́сящники и съ наро́читыми му́жи гра́да, и повелѣ́вшу Фи́сту, приведе́нъ бы́сть Па́велъ.

²⁴

И҆ речѐ фи́стъ: а҆грі́ппо царю̀ и҆ всѝ сꙋ́щїи съ на́ми мꙋ́жїе, ви́дите сего̀, ѡ҆ не́мже всѐ мно́жество і҆ꙋдє́й стꙋжа́хꙋ мѝ во і҆ерⷭ҇ли́мѣ же и҆ здѣ̀, вопїю́ще, ꙗ҆́кѡ не подоба́етъ жи́ти є҆мꙋ̀ ктомꙋ̀:

²⁴

И рече́ Фи́стъ: Агрі́ппо царю́ и вси́ су́щіи съ на́ми му́жіє, ви́дите сего́, о не́мже все́ мно́жество Іуде́й стужа́ху ми́ во Ієрусали́мѣ же и здѣ́, вопію́ще, я́ко не подоба́єтъ жи́ти єму́ ктому́:

²⁵

а҆́зъ же разꙋмѣ́въ ничто́же досто́йно сме́рти сотво́рша є҆го̀, и҆ самомꙋ́ же семꙋ̀ наре́кшꙋ сева́ста, сꙋди́хъ посла́ти є҆го̀:

²⁵

а́зъ же разумѣ́въ ничто́же досто́йно сме́рти сотво́рша єго́, и самому́ же сему́ наре́кшу Сева́ста, суди́хъ посла́ти єго́:

²⁶

ѡ҆ не́мже и҆звѣ́стное что̀ писа́ти господи́нꙋ не и҆́мамъ: тѣ́мже и҆ приведо́хъ є҆го̀ пред̾ ва́съ, наипа́че же пред̾ тѧ̀, а҆грі́ппо царю̀, ꙗ҆́кѡ да разсꙋжде́нїю бы́вшꙋ и҆́мамъ что̀ писа́ти:

²⁶

о не́мже извѣ́стноє что́ писа́ти господи́ну не и́мамъ: тѣ́мже и приведо́хъ єго́ предъ ва́съ, наипа́че же предъ тя́, Агрі́ппо царю́, я́ко да разсужде́нію бы́вшу и́мамъ что́ писа́ти:

²⁷

безслове́сно бо мни́тсѧ мѝ, посыла́ющꙋ ю҆́зника, а҆ вины̀, ꙗ҆́же на́нь, не сказа́ти.

²⁷

безслове́сно бо мни́тся ми́, посыла́ющу ю́зника, а вины́, я́же на́нь, не сказа́ти.