¹

И҆ прїидо́ша ко мнѣ̀ мꙋ́жїе ѿ ста́рєцъ і҆и҃левыхъ и҆ сѣдо́ша предо мно́ю.

¹

И пріидо́ша ко мнѣ́ му́жіє от ста́рецъ Ізра́илевыхъ и сѣдо́ша предо мно́ю.

²

И҆ бы́сть сло́во гдⷭ҇не ко мнѣ̀ гл҃ѧ:

²

И бы́сть сло́во Госпо́дне ко мнѣ́ глаго́ля:

³

сы́не человѣ́чь, мꙋ́жїе сі́и положи́ша помышлє́нїѧ своѧ̑ на сердца́хъ свои́хъ и҆ мꙋче́нїе непра́вдъ свои́хъ поста́виша пред̾ лице́мъ свои́мъ: а҆́ще ѿвѣща́ѧй ѿвѣща́ю и҆̀мъ;

³

сы́не человѣ́чь, му́жіє сі́и положи́ша помышле́нія своя́ на сердца́хъ свои́хъ и муче́ніє непра́вдъ свои́хъ поста́виша предъ лице́мъ свои́мъ: а́ще отвѣща́яй отвѣща́ю и́мъ?

⁴

Сегѡ̀ ра́ди глаго́ли къ ни̑мъ и҆ рече́ши и҆̀мъ: сїѧ̑ гл҃етъ а҆дѡнаі̀ гдⷭ҇ь: человѣ́къ человѣ́къ ѿ до́мꙋ і҆и҃лева, и҆́же а҆́ще положи́тъ мы̑сли своѧ̑ въ се́рдцы свое́мъ и҆ мꙋче́нїе непра́вды своеѧ̀ оу҆чини́тъ пред̾ лице́мъ свои́мъ и҆ прїи́детъ ко проро́кꙋ, а҆́зъ гдⷭ҇ь ѿвѣща́ю є҆мꙋ̀ ѡ҆ си́хъ, и҆́миже держи́тсѧ мы́сль є҆гѡ̀:

⁴

Сего́ ра́ди глаго́ли къ ни́мъ и рече́ши и́мъ: сія́ глаго́летъ Адонаі́ Госпо́дь: человѣ́къ человѣ́къ от до́му Ізра́илева, и́же а́ще положи́тъ мы́сли своя́ въ се́рдцы своє́мъ и муче́ніє непра́вды своєя́ учини́тъ предъ лице́мъ свои́мъ и пріи́детъ ко проро́ку, а́зъ Госпо́дь отвѣща́ю єму́ о си́хъ, и́миже держи́тся мы́сль єго́:

⁵

ꙗ҆́кѡ да оу҆клонѧ́тъ до́мъ і҆и҃левъ сердца́мъ и҆́хъ оу҆далє́нымъ ѿ менє̀ помышле́ньми и҆́хъ.

⁵

я́ко да уклоня́тъ до́мъ Ізра́илевъ сердца́мъ и́хъ удале́нымъ от мене́ помышле́ньми и́хъ.

⁶

Сегѡ̀ ра́ди рцы̀ до́мꙋ і҆и҃левꙋ: сїѧ̑ гл҃етъ гдⷭ҇ь бг҃ъ: ѡ҆брати́тесѧ и҆ ѿврати́тесѧ ѿ начина́нїй ва́шихъ и҆ ѿ всѣ́хъ нече́стїй ва́шихъ, и҆ ѡ҆брати́те ли́ца ва̑ша ко мнѣ̀:

⁶

Сего́ ра́ди рцы́ до́му Ізра́илеву: сія́ глаго́летъ Госпо́дь Бо́гъ: обрати́теся и отврати́теся от начина́ній ва́шихъ и от всѣ́хъ нече́стій ва́шихъ, и обрати́те ли́ца ва́ша ко мнѣ́:

⁷

занѐ человѣ́къ человѣ́къ ѿ до́мꙋ і҆и҃лева и҆ ѿ прише́лцєвъ прише́дшихъ ко і҆и҃леви, и҆́же а҆́ще оу҆дали́тсѧ ѿ менє̀ и҆ положи́тъ мы̑сли своѧ̑ на се́рдцы свое́мъ и҆ мꙋче́нїе непра́вды своеѧ̀ оу҆чини́тъ пред̾ лице́мъ свои́мъ и҆ прїи́детъ ко проро́кꙋ є҆́же вопроси́ти є҆мꙋ̀ менѐ, а҆́зъ гдⷭ҇ь ѿвѣща́ю є҆мꙋ̀, въ не́мже держи́тсѧ ѻ҆́нъ,

⁷

зане́ человѣ́къ человѣ́къ от до́му Ізра́илева и от прише́лцевъ прише́дшихъ ко Ізра́илеви, и́же а́ще удали́тся от мене́ и положи́тъ мы́сли своя́ на се́рдцы своє́мъ и муче́ніє непра́вды своєя́ учини́тъ предъ лице́мъ свои́мъ и пріи́детъ ко проро́ку є́же вопроси́ти єму́ мене́, а́зъ Госпо́дь отвѣща́ю єму́, въ не́мже держи́тся о́нъ,

⁸

и҆ оу҆твержꙋ̀ лицѐ моѐ на человѣ́ка того̀ и҆ положꙋ̀ є҆го̀ въ поги́бель и҆ въ потребле́нїе и҆ и҆зве́ргꙋ є҆го̀ ѿ среды̀ люді́й мои́хъ, и҆ оу҆вѣ́сте, ꙗ҆́кѡ а҆́зъ гдⷭ҇ь.

⁸

и утвержу́ лице́ моє́ на человѣ́ка того́ и положу́ єго́ въ поги́бель и въ потребле́ніє и изве́ргу єго́ от среды́ люді́й мои́хъ, и увѣ́сте, я́ко а́зъ Госпо́дь.

⁹

И҆ проро́къ а҆́ще прельсти́тсѧ и҆ рече́тъ сло́во, а҆́зъ гдⷭ҇ь прельсти́хъ проро́ка того̀, и҆ прострꙋ̀ рꙋ́кꙋ мою̀ на́нь и҆ потреблю̀ є҆го̀ ѿ среды̀ люді́й і҆и҃левыхъ.

⁹

И проро́къ а́ще прельсти́тся и рече́тъ сло́во, а́зъ Госпо́дь прельсти́хъ проро́ка того́, и простру́ ру́ку мою́ на́нь и потреблю́ єго́ от среды́ люді́й Ізра́илевыхъ.

¹⁰

И҆ прїи́мꙋтъ непра́вдꙋ свою̀ по непра́вдѣ вопроша́ющагѡ, и҆ по непра́вдѣ та́кожде проро́кꙋ бꙋ́детъ,

¹⁰

И пріи́мутъ непра́вду свою́ по непра́вдѣ вопроша́ющаго, и по непра́вдѣ та́кожде проро́ку бу́детъ,

¹¹

ꙗ҆́кѡ да не прельща́етсѧ ктомꙋ̀ до́мъ і҆и҃левъ ѿ менє̀, и҆ да не ѡ҆сквернѧ́ютсѧ ктомꙋ̀ во всѣ́хъ грѣсѣ́хъ свои́хъ, и҆ бꙋ́дꙋтъ мѝ въ лю́ди, а҆́зъ же бꙋ́дꙋ и҆̀мъ въ бг҃а, гл҃етъ а҆дѡнаі̀ гдⷭ҇ь.

¹¹

я́ко да не прельща́єтся ктому́ до́мъ Ізра́илевъ от мене́, и да не оскверня́ются ктому́ во всѣ́хъ грѣсѣ́хъ свои́хъ, и бу́дутъ ми́ въ лю́ди, а́зъ же бу́ду и́мъ въ Бо́га, глаго́летъ Адонаі́ Госпо́дь.

¹²

И҆ бы́сть сло́во гдⷭ҇не ко мнѣ̀ гл҃ѧ:

¹²

И бы́сть сло́во Госпо́дне ко мнѣ́ глаго́ля:

¹³

сы́не человѣ́чь, землѧ̀ а҆́ще согрѣши́тъ мѝ, є҆́же па́стисѧ грѣхо́мъ, прострꙋ̀ рꙋ́кꙋ мою̀ на ню̀ и҆ сотрꙋ̀ оу҆твержде́нїе хлѣ́бное и҆ пꙋщꙋ̀ на ню̀ гла́дъ и҆ возмꙋ̀ съ неѧ̀ человѣ́ки и҆ скоты̀,

¹³

сы́не человѣ́чь, земля́ а́ще согрѣши́тъ ми́, є́же па́стися грѣхо́мъ, простру́ ру́ку мою́ на ню́ и сотру́ утвержде́ніє хлѣ́бноє и пущу́ на ню́ гла́дъ и возму́ съ нея́ человѣ́ки и скоты́,

¹⁴

и҆ а҆́ще бꙋ́дꙋтъ сі́и трїѐ мꙋ́жїе средѣ̀ є҆ѧ̀, нѡ́е и҆ данїи́лъ и҆ і҆́ѡвъ, ті́и во пра́вдѣ свое́й спасꙋ́тсѧ, гл҃етъ а҆дѡнаі̀ гдⷭ҇ь:

¹⁴

и а́ще бу́дутъ сі́и тріє́ му́жіє средѣ́ єя́, Но́є и даніи́лъ и і́овъ, ті́и во пра́вдѣ своє́й спасу́тся, глаго́летъ Адонаі́ Госпо́дь:

¹⁵

а҆́ще и҆ ѕвѣ̑ри ѕлы̑ѧ напꙋщꙋ̀ на зе́млю и҆ оу҆мꙋ́чꙋ ю҆̀, и҆ бꙋ́детъ въ па́гꙋбꙋ, и҆ не бꙋ́детъ проходѧ́щагѡ сквозѣ̀ ю҆̀ ѿ лица̀ ѕвѣре́й,

¹⁵

а́ще и звѣ́ри злы́я напущу́ на зе́млю и уму́чу ю́, и бу́детъ въ па́губу, и не бу́детъ проходя́щаго сквозѣ́ ю́ от лица́ звѣре́й,

¹⁶

и҆ а҆́ще бꙋ́дꙋтъ трїѐ сі́и мꙋ́жїе средѣ̀ є҆ѧ̀, живꙋ̀ а҆́зъ, гл҃етъ а҆дѡнаі̀ гдⷭ҇ь, ни сы́нове, ни дщє́ри и҆́хъ спасꙋ́тсѧ, но то́кмѡ сі́и є҆ди́ни спасꙋ́тсѧ, а҆ землѧ̀ въ потребле́нїе бꙋ́детъ:

¹⁶

и а́ще бу́дутъ тріє́ сі́и му́жіє средѣ́ єя́, живу́ а́зъ, глаго́летъ Адонаі́ Госпо́дь, ни сы́нове, ни дще́ри и́хъ спасу́тся, но то́кмо сі́и єди́ни спасу́тся, а земля́ въ потребле́ніє бу́детъ:

¹⁷

а҆́ще же наведꙋ̀ на тꙋ̀ зе́млю ме́чь и҆ рекꙋ̀: ме́чь да про́йдетъ зе́млю, и҆ возмꙋ̀ ѿ неѧ̀ человѣ́ка и҆ скота̀,

¹⁷

а́ще же наведу́ на ту́ зе́млю ме́чь и реку́: ме́чь да про́йдетъ зе́млю, и возму́ от нея́ человѣ́ка и скота́,

¹⁸

и҆ трїѐ мꙋ́жїе сі́и бꙋ́дꙋтъ средѣ̀ є҆ѧ̀, живꙋ̀ а҆́зъ, гл҃етъ а҆дѡнаі̀ гдⷭ҇ь, не и҆зба́вѧтъ ни сынѡ́въ, ни дще́рей свои́хъ, но ті́и є҆ди́ни спасꙋ́тсѧ:

¹⁸

и тріє́ му́жіє сі́и бу́дутъ средѣ́ єя́, живу́ а́зъ, глаго́летъ Адонаі́ Госпо́дь, не изба́вятъ ни сыно́въ, ни дще́рей свои́хъ, но ті́и єди́ни спасу́тся:

¹⁹

а҆́ще же и҆ сме́рть пꙋщꙋ̀ на зе́млю ѻ҆́нꙋ и҆ и҆злїю̀ ꙗ҆́рость мою̀ на ню̀ въ кро́ви, є҆́же потреби́ти ѿ неѧ̀ человѣ́ки и҆ скоты̀,

¹⁹

а́ще же и сме́рть пущу́ на зе́млю о́ну и излію́ я́рость мою́ на ню́ въ кро́ви, є́же потреби́ти от нея́ человѣ́ки и скоты́,

²⁰

нѡ́е же и҆ данїи́лъ и҆ і҆́ѡвъ бꙋ́дꙋтъ посредѣ̀ є҆ѧ̀, живꙋ̀ а҆́зъ, гл҃етъ а҆дѡнаі̀ гдⷭ҇ь, ни сы́нове, ни дщє́ри не ѡ҆ста́нꙋтъ и҆̀мъ, ті́и же во пра́вдѣ свое́й спасꙋ́тсѧ и҆ и҆зба́вѧтъ дꙋ́шы своѧ̑.

²⁰

Но́є же и даніи́лъ и і́овъ бу́дутъ посредѣ́ єя́, живу́ а́зъ, глаго́летъ Адонаі́ Госпо́дь, ни сы́нове, ни дще́ри не оста́нутъ и́мъ, ті́и же во пра́вдѣ своє́й спасу́тся и изба́вятъ ду́шы своя́.

²¹

Сїѧ̑ гл҃етъ а҆дѡнаі̀ гдⷭ҇ь: а҆́ще же и҆ четы́ри мє́сти моѧ̑ лю̑тыѧ пꙋщꙋ̀ на і҆ерⷭ҇ли́ма, ме́чь и҆ гла́дъ, и҆ ѕвѣ̑ри лю̑ты и҆ сме́рть, є҆́же потреби́ти ѿ негѡ̀ человѣ́ки и҆ скоты̀,

²¹

Сія́ глаго́летъ Адонаі́ Госпо́дь: а́ще же и четы́ри ме́сти моя́ лю́тыя пущу́ на Ієрусали́ма, ме́чь и гла́дъ, и звѣ́ри лю́ты и сме́рть, є́же потреби́ти от него́ человѣ́ки и скоты́,

²²

и҆ сѐ, ѡ҆ста́влени въ не́мъ спасе́ннїи ѿ негѡ̀, сі́и и҆зведꙋ́тъ сы̑ны и҆ дщє́ри: сѐ, ті́и и҆зы́дꙋтъ къ ва́мъ, и҆ оу҆́зрите пꙋти̑ и҆́хъ и҆ помышлє́нїѧ и҆́хъ, и҆ раска́етесѧ ѿ ѕлы́хъ, ꙗ҆̀же наведо́хъ на і҆ерⷭ҇ли́мъ, всѧ̑ ѕла̑ѧ, ꙗ҆̀же наведо́хъ на́нь,

²²

и се́, оста́влени въ не́мъ спасе́нніи от него́, сі́и изведу́тъ сы́ны и дще́ри: се́, ті́и изы́дутъ къ ва́мъ, и у́зрите пути́ и́хъ и помышле́нія и́хъ, и раска́єтеся от злы́хъ, я́же наведо́хъ на Ієрусали́мъ, вся́ зла́я, я́же наведо́хъ на́нь,

²³

и҆ оу҆тѣ́шатъ ва́съ: поне́же оу҆́зрите пꙋти̑ и҆́хъ и҆ оу҆мышлє́нїѧ и҆́хъ, и҆ оу҆разꙋмѣ́ете, ꙗ҆́кѡ не всꙋ́е сотвори́лъ є҆́смь всѧ̑, є҆ли̑ка сотвори́хъ въ не́мъ, гл҃етъ а҆дѡнаі̀ гдⷭ҇ь.

²³

и утѣ́шатъ ва́съ: поне́же у́зрите пути́ и́хъ и умышле́нія и́хъ, и уразумѣ́єте, я́ко не всу́є сотвори́лъ є́смь вся́, єли́ка сотвори́хъ въ не́мъ, глаго́летъ Адонаі́ Госпо́дь.