¹

И҆ бы́сть сло́во гдⷭ҇не ко мнѣ̀ гл҃ѧ:

¹

И бы́сть сло́во Госпо́дне ко мнѣ́ глаго́ля:

²

сы́не человѣ́чь, что̀ бы́ло бы дре́во ло́зное ѿ всѣ́хъ древе́съ гро́здныхъ, сꙋ́щихъ во древесѣ́хъ дꙋбра́вныхъ;

²

сы́не человѣ́чь, что́ бы́ло бы дре́во ло́зноє от всѣ́хъ древе́съ гро́здныхъ, су́щихъ во древесѣ́хъ дубра́вныхъ?

³

А҆́ще во́змꙋтъ ѿ негѡ̀ дре́во, є҆́же сотвори́ти дѣ́ло; и҆ а҆́ще во́змꙋтъ ко́лъ ѿ негѡ̀, є҆́же ѡ҆бѣ́сити на не́мъ кі́й либо сосꙋ́дъ;

³

А́ще во́змутъ от него́ дре́во, є́же сотвори́ти дѣ́ло? и а́ще во́змутъ ко́лъ от него́, є́же обѣ́сити на не́мъ кі́й либо сосу́дъ?

⁴

Ра́звѣ є҆́же ѻ҆гне́ви преда́стсѧ на потребле́нїе, лѣ́тнее ѡ҆чище́нїе є҆гѡ̀ потреблѧ́етъ ѻ҆́гнь, и҆ и҆счеза́етъ до конца̀: є҆да̀ потре́бно бꙋ́детъ на дѣ́ло;

⁴

Ра́звѣ є́же огне́ви преда́стся на потребле́ніє, лѣ́тнеє очище́ніє єго́ потребля́єтъ о́гнь, и исчеза́єтъ до конца́: єда́ потре́бно бу́детъ на дѣ́ло?

⁵

И҆ є҆щѐ цѣ́лꙋ є҆мꙋ̀ сꙋ́щꙋ не бꙋ́детъ на дѣ́ло, кольмѝ па́че а҆́ще ѻ҆́гнь є҆̀ попали́тъ до конца̀, бꙋ́детъ ли на дѣ́ло пото́мъ;

⁵

И єще́ цѣ́лу єму́ су́щу не бу́детъ на дѣ́ло, кольми́ па́че а́ще о́гнь є́ попали́тъ до конца́, бу́детъ ли на дѣ́ло пото́мъ?

⁶

Сегѡ̀ ра́ди рцы̀: си́це гл҃етъ гдⷭ҇ь бг҃ъ: ꙗ҆́коже лоза̀ вїногра́днаѧ во дре́вѣхъ дꙋбра́вныхъ, ю҆́же да́хъ на потребле́нїе ѻ҆гне́ви, та́кѡ да́мъ живꙋ́щыѧ во і҆ерⷭ҇ли́мѣ:

⁶

Сего́ ра́ди рцы́: си́це глаго́летъ Госпо́дь Бо́гъ: я́коже лоза́ віногра́дная во дре́вѣхъ дубра́вныхъ, ю́же да́хъ на потребле́ніє огне́ви, та́ко да́мъ живу́щыя во Ієрусали́мѣ:

⁷

и҆ да́мъ лицѐ моѐ на нѧ̀, ѿ ѻ҆гнѧ̀ и҆зы́дꙋтъ, и҆ ѻ҆́гнь поѧ́стъ ѧ҆̀: и҆ оу҆вѣ́дѧтъ, ꙗ҆́кѡ а҆́зъ гдⷭ҇ь, є҆гда̀ оу҆тверждꙋ̀ лицѐ моѐ на ни́хъ:

⁷

и да́мъ лице́ моє́ на ня́, от огня́ изы́дутъ, и о́гнь поя́стъ я́: и увѣ́дятъ, я́ко а́зъ Госпо́дь, єгда́ утвержду́ лице́ моє́ на ни́хъ:

⁸

и҆ да́мъ зе́млю въ па́гꙋбꙋ, занѐ впадо́ша въ грѣ́хъ, гл҃етъ а҆дѡнаі̀ гдⷭ҇ь.

⁸

и да́мъ зе́млю въ па́губу, зане́ впадо́ша въ грѣ́хъ, глаго́летъ Адонаі́ Госпо́дь.