¹

И҆ бы́сть сло́во гдⷭ҇не ко мнѣ̀ гл҃ѧ:

¹

И бы́сть сло́во Госпо́дне ко мнѣ́ глаго́ля:

²

и҆ ты̀, сы́не человѣ́чь, рцы̀ кнѧ́зю тѵ́рскꙋ: сїѧ̑ гл҃етъ а҆дѡнаі̀ гдⷭ҇ь: поне́же вознесе́сѧ се́рдце твоѐ, и҆ ре́клъ є҆сѝ: а҆́зъ є҆́смь бг҃ъ, въ селе́нїе бж҃їе всели́хсѧ въ се́рдцы морстѣ́мъ: ты́ же человѣ́къ є҆сѝ, а҆ не бг҃ъ, и҆ положи́лъ є҆сѝ се́рдце твоѐ ꙗ҆́кѡ се́рдце бж҃їе.

²

и ты́, сы́не человѣ́чь, рцы́ кня́зю ти́рску: сія́ глаго́летъ Адонаі́ Госпо́дь: поне́же вознесе́ся се́рдце твоє́, и ре́клъ єси́: а́зъ є́смь Бо́гъ, въ селе́ніє Бо́жіє всели́хся въ се́рдцы морстѣ́мъ: ты́ же человѣ́къ єси́, а не Бо́гъ, и положи́лъ єси́ се́рдце твоє́ я́ко се́рдце Бо́жіє.

³

Є҆да̀ премꙋ́дрѣе ты̀ є҆сѝ данїи́ла; премꙋ́дрїи не наказа́ша тебѐ хи́тростїю свое́ю.

³

Єда́ прему́дрѣє ты́ єси́ даніи́ла? прему́дріи не наказа́ша тебе́ хи́тростію своє́ю.

⁴

Є҆да̀ хи́тростїю твое́ю и҆лѝ смы́сломъ твои́мъ сотвори́лъ є҆сѝ себѣ̀ си́лꙋ и҆ притѧжа́лъ є҆сѝ сребро̀ и҆ зла́то въ сокро́вищихъ твои́хъ;

⁴

Єда́ хи́тростію твоє́ю или́ смы́сломъ твои́мъ сотвори́лъ єси́ себѣ́ си́лу и притяжа́лъ єси́ сребро́ и зла́то въ сокро́вищихъ твои́хъ?

⁵

и҆лѝ во мно́зѣй хи́трости твое́й и҆ въ кꙋ̑пли твое́й оу҆мно́жилъ є҆сѝ си́лꙋ твою̀; вознесе́сѧ се́рдце твоѐ въ си́лѣ твое́й.

⁵

или́ во мно́зѣй хи́трости твоє́й и въ ку́пли твоє́й умно́жилъ єси́ си́лу твою́? вознесе́ся се́рдце твоє́ въ си́лѣ твоє́й.

⁶

Тогѡ̀ ра́ди сїѧ̑ гл҃етъ а҆дѡнаі̀ гдⷭ҇ь: поне́же да́лъ є҆сѝ се́рдце своѐ ꙗ҆́кѡ се́рдце бж҃їе,

⁶

Того́ ра́ди сія́ глаго́летъ Адонаі́ Госпо́дь: поне́же да́лъ єси́ се́рдце своє́ я́ко се́рдце Бо́жіє,

⁷

вмѣ́стѡ сегѡ̀, сѐ, а҆́зъ наведꙋ̀ на тѧ̀ чꙋжды̑ѧ гꙋби́тєли ѿ ꙗ҆зы̑къ, и҆ и҆звлекꙋ́тъ мечы̀ своѧ̑ на тѧ̀ и҆ на добро́тꙋ хи́трости твоеѧ̀, и҆ посте́лютъ добро́тꙋ твою̀ въ погꙋбле́нїе,

⁷

вмѣ́сто сего́, се́, а́зъ наведу́ на тя́ чужды́я губи́тели от язы́къ, и извлеку́тъ мечы́ своя́ на тя́ и на добро́ту хи́трости твоєя́, и посте́лютъ добро́ту твою́ въ погубле́ніє,

⁸

и҆ сведꙋ́тъ тѧ̀, и҆ оу҆́мреши сме́ртїю ꙗ҆́звеныхъ въ се́рдцы морстѣ́мъ.

⁸

и сведу́тъ тя́, и у́мреши сме́ртію я́звеныхъ въ се́рдцы морстѣ́мъ.

⁹

Є҆да̀ рече́ши глаго́лѧ пред̾ оу҆бива́ющими тѧ̀: бг҃ъ є҆́смь а҆́зъ; ты́ же человѣ́къ є҆сѝ, а҆ не бг҃ъ, въ рꙋцѣ̀ оу҆бива́ющихъ тѧ̀.

⁹

Єда́ рече́ши глаго́ля предъ убива́ющими тя́: Бо́гъ є́смь а́зъ? ты́ же человѣ́къ єси́, а не Бо́гъ, въ руцѣ́ убива́ющихъ тя́.

¹⁰

Смертьмѝ неѡбрѣ́заныхъ оу҆́мреши въ рꙋка́хъ чꙋжди́хъ: ꙗ҆́кѡ а҆́зъ реко́хъ, гл҃етъ а҆дѡнаі̀ гдⷭ҇ь.

¹⁰

Смертьми́ необрѣ́заныхъ у́мреши въ рука́хъ чужди́хъ: я́ко а́зъ реко́хъ, глаго́летъ Адонаі́ Госпо́дь.

¹¹

И҆ бы́сть сло́во гдⷭ҇не ко мнѣ̀ гл҃ѧ:

¹¹

И бы́сть сло́во Госпо́дне ко мнѣ́ глаго́ля:

¹²

сы́не человѣ́чь, возмѝ пла́чь на кнѧ́зѧ тѵ́рска и҆ рцы̀ є҆мꙋ̀: сїѧ̑ гл҃етъ а҆дѡнаі̀ гдⷭ҇ь: ты̀ є҆сѝ печа́ть оу҆подобле́нїѧ, и҆спо́лненъ премꙋ́дрости и҆ вѣне́цъ добро́ты,

¹²

сы́не человѣ́чь, возми́ пла́чь на кня́зя ти́рска и рцы́ єму́: сія́ глаго́летъ Адонаі́ Госпо́дь: ты́ єси́ печа́ть уподобле́нія, испо́лненъ прему́дрости и вѣне́цъ добро́ты,

¹³

въ сла́дости раѧ̀ бж҃їѧ бы́лъ є҆сѝ, всѧ́кимъ ка́менїемъ драги́мъ оу҆краси́лсѧ є҆сѝ, са́рдїемъ и҆ топа́зїемъ, и҆ смара́гдомъ и҆ ѵ҆акі́нѳомъ, и҆ а҆нѳра́ѯомъ и҆ сапфі́ромъ, и҆ і҆а́спїсомъ и҆ сребро́мъ и҆ зла́томъ, и҆ лїгѵ́рїемъ и҆ а҆ха́томъ, и҆ а҆меѳѵ́стомъ и҆ хрѷсолі́ѳомъ, и҆ вирѵ́ллїемъ и҆ ѻ҆́нѷхомъ и҆ злато́мъ напо́лнилъ є҆сѝ сокрѡ́вища твоѧ̑ и҆ жи̑тницы твоѧ̑, ѿ негѡ́же днѐ со́зданъ є҆сѝ.

¹³

въ сла́дости рая́ Бо́жія бы́лъ єси́, вся́кимъ ка́меніємъ драги́мъ украси́лся єси́, Са́рдіємъ и топа́зіємъ, и смара́гдомъ и иакі́нѳомъ, и Анѳра́ксомъ и сапфі́ромъ, и Іа́спісомъ и сребро́мъ и зла́томъ, и Ліги́ріємъ и Аха́томъ, и амеѳи́стомъ и хрисолі́ѳомъ, и вири́лліємъ и о́нихомъ и злато́мъ напо́лнилъ єси́ сокро́вища твоя́ и жи́тницы твоя́, от него́же дне́ со́зданъ єси́.

¹⁴

Ты̀, съ херꙋві́момъ вчини́хъ тѧ̀ въ горѣ̀ ст҃ѣ́й бж҃їи, бы́лъ є҆сѝ средѣ̀ ка́меней ѻ҆́гненныхъ.

¹⁴

Ты́, съ херуві́момъ вчини́хъ тя́ въ горѣ́ святѣ́й Бо́жіи, бы́лъ єси́ средѣ́ ка́меней о́гненныхъ.

¹⁵

Бы́лъ є҆сѝ ты̀ непоро́ченъ во дне́хъ твои́хъ, ѿ негѡ́же днѐ со́зданъ є҆сѝ, до́ндеже ѡ҆брѣто́шасѧ непра̑вды въ тебѣ̀.

¹⁵

Бы́лъ єси́ ты́ непоро́ченъ во дне́хъ твои́хъ, от него́же дне́ со́зданъ єси́, до́ндеже обрѣто́шася непра́вды въ тебѣ́.

¹⁶

Ѿ мно́жества кꙋ́пли твоеѧ̀ напо́лнилъ є҆сѝ сокрѡ́вища твоѧ̑ беззако́нїѧ, и҆ согрѣши́лъ є҆сѝ, и҆ оу҆ѧ́звленъ є҆сѝ ѿ горы̀ бж҃їѧ: и҆ сведе́ тѧ херꙋві́мъ ѡ҆сѣнѧѧ́й ѿ среды̀ камы́кѡвъ ѻ҆́гненныхъ.

¹⁶

От мно́жества ку́пли твоєя́ напо́лнилъ єси́ сокро́вища твоя́ беззако́нія, и согрѣши́лъ єси́, и уя́звленъ єси́ от горы́ Бо́жія: и сведе́ тя херуві́мъ осѣняя́й от среды́ камы́ковъ о́гненныхъ.

¹⁷

Вознесе́сѧ се́рдце твоѐ въ добро́тѣ твое́й, и҆стлѣ̀ хи́трость твоѧ̀ съ добро́тою твое́ю: мно́жества ра́ди грѣхѡ́въ твои́хъ на зе́млю поверго́хъ тѧ̀, пред̾ цари̑ да́хъ тѧ̀ во ѡ҆бличе́нїе.

¹⁷

Вознесе́ся се́рдце твоє́ въ добро́тѣ твоє́й, истлѣ́ хи́трость твоя́ съ добро́тою твоє́ю: мно́жества ра́ди грѣхо́въ твои́хъ на зе́млю поверго́хъ тя́, предъ цари́ да́хъ тя́ во обличе́ніє.

¹⁸

Мно́жества ра́ди грѣхѡ́въ твои́хъ и҆ непра́вдъ кꙋ́пли твоеѧ̀, ѡ҆скверни́лъ є҆сѝ ст҃а̑ѧ твоѧ̑, и҆ и҆зведꙋ̀ ѻ҆́гнь ѿ среды̀ твоеѧ̀, се́й снѣ́сть тѧ̀: и҆ да́мъ тѧ̀ во пра́хъ на землѝ пред̾ всѣ́ми ви́дѧщими тѧ̀.

¹⁸

Мно́жества ра́ди грѣхо́въ твои́хъ и непра́вдъ ку́пли твоєя́, оскверни́лъ єси́ свята́я твоя́, и изведу́ о́гнь от среды́ твоєя́, се́й снѣ́сть тя́: и да́мъ тя́ во пра́хъ на земли́ предъ всѣ́ми ви́дящими тя́.

¹⁹

И҆ всѝ вѣ́дѧщїи тебѐ во ꙗ҆зы́цѣхъ возстенꙋ́тъ по тебѣ̀: па́гꙋба оу҆чине́нъ є҆сѝ, и҆ не бꙋ́деши ктомꙋ̀ во вѣ́къ.

¹⁹

И вси́ вѣ́дящіи тебе́ во язы́цѣхъ возстену́тъ по тебѣ́: па́губа учине́нъ єси́, и не бу́деши ктому́ во вѣ́къ.

²⁰

И҆ бы́сть сло́во гдⷭ҇не ко мнѣ̀ гл҃ѧ:

²⁰

И бы́сть сло́во Госпо́дне ко мнѣ́ глаго́ля:

²¹

сы́не человѣ́чь, оу҆твердѝ лицѐ твоѐ на сїдѡ́на и҆ прорцы̀ ѡ҆ не́мъ и҆ рцы̀:

²¹

сы́не человѣ́чь, утверди́ лице́ твоє́ на Сідо́на и прорцы́ о не́мъ и рцы́:

²²

сїѧ̑ гл҃етъ а҆дѡнаі̀ гдⷭ҇ь: сѐ, а҆́зъ на тѧ̀, сїдѡ́не, и҆ просла́влюсѧ въ тебѣ̀, и҆ оу҆разꙋмѣ́еши, ꙗ҆́кѡ а҆́зъ є҆́смь гдⷭ҇ь, є҆гда̀ сотворю̀ въ тебѣ̀ сꙋ́дъ и҆ ѡ҆сщ҃ꙋ́сѧ въ тебѣ̀:

²²

сія́ глаго́летъ Адонаі́ Госпо́дь: се́, а́зъ на тя́, Сідо́не, и просла́влюся въ тебѣ́, и уразумѣ́єши, я́ко а́зъ є́смь Госпо́дь, єгда́ сотворю́ въ тебѣ́ су́дъ и освящу́ся въ тебѣ́:

²³

и҆ послю̀ на тѧ̀ сме́рть, и҆ кро́вь въ сто́гнахъ твои́хъ бꙋ́детъ, и҆ падꙋ́тъ ꙗ҆́звенїи средѣ̀ тебє̀ мече́мъ, въ тебѣ̀ и҆ ѡ҆́крестъ тебє̀, и҆ оу҆вѣ́дѧтъ, ꙗ҆́кѡ а҆́зъ гдⷭ҇ь:

²³

и послю́ на тя́ сме́рть, и кро́вь въ сто́гнахъ твои́хъ бу́детъ, и паду́тъ я́звеніи средѣ́ тебе́ мече́мъ, въ тебѣ́ и о́крестъ тебе́, и увѣ́дятъ, я́ко а́зъ Госпо́дь:

²⁴

и҆ не бꙋ́детъ ктомꙋ̀ до́мꙋ і҆и҃левꙋ ѻ҆сте́нъ го́рести и҆ те́рнъ болѣ́зни ѿ всѣ́хъ ѡ҆кре́стныхъ є҆гѡ̀ ѡ҆безче́стившихъ и҆̀хъ, и҆ оу҆разꙋмѣ́ютъ, ꙗ҆́кѡ а҆́зъ є҆́смь а҆дѡнаі̀ гдⷭ҇ь.

²⁴

и не бу́детъ ктому́ до́му Ізра́илеву осте́нъ го́рести и те́рнъ болѣ́зни от всѣ́хъ окре́стныхъ єго́ обезче́стившихъ и́хъ, и уразумѣ́ютъ, я́ко а́зъ є́смь Адонаі́ Госпо́дь.

²⁵

Та́кѡ гл҃етъ а҆дѡнаі̀ гдⷭ҇ь: и҆ соберꙋ̀ до́мъ і҆и҃левъ ѿ ꙗ҆зы̑къ, и҆дѣ́же разсы́пашасѧ та́мѡ, и҆ ѡ҆сщ҃ꙋ́сѧ въ ни́хъ пред̾ людьмѝ и҆ ꙗ҆зы̑ки: и҆ вселѧ́тсѧ на землѝ свое́й, ю҆́же да́хъ рабꙋ̀ моемꙋ̀ і҆а́кѡвꙋ,

²⁵

Та́ко глаго́летъ Адонаі́ Госпо́дь: и соберу́ до́мъ Ізра́илевъ от язы́къ, идѣ́же разсы́пашася та́мо, и освящу́ся въ ни́хъ предъ людьми́ и язы́ки: и вселя́тся на земли́ своє́й, ю́же да́хъ рабу́ моєму́ Іа́кову,

²⁶

и҆ населѧ́тсѧ на не́й съ наде́ждею, и҆ сози́ждꙋтъ до́мы, и҆ насадѧ́тъ вїногра́ды, и҆ вселѧ́тсѧ на не́й съ наде́ждею, є҆гда̀ сотворю̀ сꙋ́дъ во всѣ́хъ, и҆̀же оу҆кори́ша ѧ҆̀ во ѡ҆кре́стныхъ и҆́хъ: и҆ оу҆разꙋмѣ́ютъ, ꙗ҆́кѡ а҆́зъ гдⷭ҇ь бг҃ъ и҆́хъ и҆ бг҃ъ ѻ҆тцє́въ и҆́хъ.

²⁶

и населя́тся на не́й съ наде́ждею, и сози́ждутъ до́мы, и насадя́тъ віногра́ды, и вселя́тся на не́й съ наде́ждею, єгда́ сотворю́ су́дъ во всѣ́хъ, и́же укори́ша я́ во окре́стныхъ и́хъ: и уразумѣ́ютъ, я́ко а́зъ Госпо́дь Бо́гъ и́хъ и Бо́гъ отце́въ и́хъ.