Звичайний друк Виконується верстка сторінок…
Папір A4, книжкова орієнтація, поля «Немає», без колонтитулів, масштаб 100%. Сторінки йдуть підряд. Для двостороннього друку виберіть переворот по довгому краю.
1
Сїѧ̑ же (сꙋ́ть) бытїѧ̑ сынѡ́въ нѡ́евыхъ, си́ма, ха́ма, і҆а́феѳа. И҆ роди́шасѧ и҆̀мъ сы́нове по пото́пѣ.
1
Сія́ же [су́ть] бытія́ сыно́въ Но́євыхъ, Си́ма, Ха́ма, Іа́феѳа. И роди́шася и́мъ сы́нове по пото́пѣ.
2
Сы́нове і҆а́феѳѡвы: гаме́ръ и҆ магѡ́гъ, и҆ мада́й и҆ і҆ѡѵа́нъ, и҆ є҆лїса̀ и҆ ѳове́лъ, и҆ мосо́хъ и҆ ѳі́расъ.
2
Сы́нове Іа́феѳовы: Гаме́ръ и Маго́гъ, и Мада́й и Іова́нъ, и Єліса́ и Ѳове́лъ, и Мосо́хъ и Ѳі́расъ.
3
Сы́нове же гаме́рѡвы: а҆схана́съ и҆ рїфа́ѳъ и҆ ѳоргама̀.
3
Сы́нове же Гаме́ровы: Асхана́съ и Ріфа́ѳъ и Ѳоргама́.
4
Сы́нове же і҆ѡѵа̑ни: є҆лїса̀ и҆ ѳарсі́съ, киті́йстїи и҆ роді́йстїи.
4
Сы́нове же Іова́ни: Єліса́ и Ѳарсі́съ, Киті́йстіи и Роді́йстіи.
5
Ѿ си́хъ раздѣли́шасѧ ѻ҆́строви ꙗ҆зы́кѡвъ (всѣ́хъ) въ землѝ и҆́хъ: кі́йждо по ꙗ҆зы́кꙋ въ племенѣ́хъ свои́хъ и҆ въ наро́дѣхъ свои́хъ.
5
От си́хъ раздѣли́шася о́строви язы́ковъ [всѣ́хъ] въ земли́ и́хъ: кі́йждо по язы́ку въ племенѣ́хъ свои́хъ и въ наро́дѣхъ свои́хъ.
6
Сы́нове же ха́мѡвы: хꙋ́съ и҆ месраі́нъ, фꙋ́дъ и҆ ханаа́нъ.
6
Сы́нове же Ха́мовы: Ху́съ и Месраі́нъ, Фу́дъ и Ханаа́нъ.
7
Сы́нове хꙋ́сѡвы: сава̀ и҆ є҆ѵїла̀, и҆ саваѳа̀ и҆ регма̀, и҆ саваѳака̀. Сы́нове же регма́нѡвы: сава̀ и҆ дада́нъ.
7
Сы́нове Ху́совы: Сава́ и Євіла́, и Саваѳа́ и Регма́, и Саваѳака́. Сы́нове же Регма́новы: Сава́ и Дада́нъ.
8
Хꙋ́съ же родѝ неврѡ́да: се́й нача́тъ бы́ти и҆споли́нъ на землѝ:
8
Ху́съ же роди́ Невро́да: се́й нача́тъ бы́ти исполи́нъ на земли́:
9
се́й бѣ̀ и҆споли́нъ лове́цъ пред̾ гдⷭ҇емъ бг҃омъ: сегѡ̀ ра́ди рекꙋ́тъ: ꙗ҆́кѡ неврѡ́дъ и҆споли́нъ лове́цъ пред̾ гдⷭ҇емъ.
9
се́й бѣ́ исполи́нъ лове́цъ предъ Го́сподемъ Бо́гомъ: сего́ ра́ди реку́тъ: я́ко Невро́дъ исполи́нъ лове́цъ предъ Го́сподемъ.
10
И҆ бы́сть нача́ло ца́рства є҆гѡ̀ вавѷлѡ́нъ и҆ ѻ҆ре́хъ, и҆ а҆рха́дъ и҆ хала́нни на землѝ сеннаа́ръ.
10
И бы́сть нача́ло ца́рства єго́ Вавило́нъ и Оре́хъ, и Арха́дъ и Хала́нни на земли́ Сеннаа́ръ.
11
Ѿ землѝ тоѧ̀ и҆зы́де а҆ссꙋ́ръ: и҆ созда̀ нїнеѵі́ю, и҆ роѡвѡ́ѳъ гра́дъ, и҆ хала́хъ.
11
От земли́ тоя́ изы́де Ассу́ръ: и созда́ Ніневі́ю, и Роово́ѳъ гра́дъ, и Хала́хъ.
12
И҆ дасе́мъ междꙋ̀ нїнеѵі́ею и҆ междꙋ̀ хала́хомъ: се́й є҆́сть гра́дъ вели́кїй.
12
И Дасе́мъ между́ Ніневі́єю и между́ Хала́хомъ: се́й є́сть гра́дъ вели́кій.
13
Месраі́нъ же родѝ лꙋдїи́ма и҆ нефѳалі́ма, и҆ є҆неметїи́ма и҆ лавїи́ма,
13
Месраі́нъ же роди́ Лудіи́ма и Нефѳалі́ма, и Єнеметіи́ма и Лавіи́ма,
14
и҆ патросѡнїи́ма и҆ хасмѡнїи́ма, ѿню́дꙋже и҆зы́де фѷлїстїи́мъ, и҆ гафѳорїи́ма.
14
и Патросоніи́ма и Хасмоніи́ма, отню́дуже изы́де Филістіи́мъ, и Гафѳоріи́ма.
15
Ханаа́нъ же родѝ сїдѡ́на пе́рвенца (своего̀) и҆ хетте́а,
15
Ханаа́нъ же роди́ Сідо́на пе́рвенца [своєго́] и Хетте́а,
16
и҆ і҆евꙋсе́а и҆ а҆морре́а, и҆ гергесе́а
16
и Ієвусе́а и Аморре́а, и Гергесе́а
17
и҆ є҆ѵе́а, и҆ а҆рꙋке́а и҆ а҆сенне́а,
17
и Єве́а, и Аруке́а и Асенне́а,
18
и҆ а҆ра́дїа и҆ самаре́а, и҆ а҆маѳі́ю. И҆ посе́мъ разсѣ́ѧшасѧ племена̀ хананє́йскаѧ:
18
и Ара́діа и Самаре́а, и Амаѳі́ю. И посе́мъ разсѣ́яшася племена́ Ханане́йская:
19
и҆ бы́ша предѣ́лы ханане́йстїи ѿ сїдѡ́на да́же прїитѝ до гера́ра и҆ га́зы, и҆дꙋ́ще да́же до содо́ма и҆ гомо́рры, до а҆дамы̀ и҆ севѡі́ма, да́же до да́са.
19
и бы́ша предѣ́лы Ханане́йстіи от Сідо́на да́же пріити́ до Гера́ра и Га́зы, иду́ще да́же до Содо́ма и Гомо́рры, до Адамы́ и Севоі́ма, да́же до Да́са.
20
Сі́и сы́нове ха́мѡвы въ племенѣ́хъ свои́хъ, по ꙗ҆зы́кѡмъ свои̑мъ, въ страна́хъ свои́хъ и҆ въ наро́дѣхъ свои́хъ.
20
Сі́и сы́нове Ха́мовы въ племенѣ́хъ свои́хъ, по язы́комъ свои́мъ, въ страна́хъ свои́хъ и въ наро́дѣхъ свои́хъ.
21
И҆ си́мꙋ роди́сѧ и҆ томꙋ̀, ѻ҆тцꙋ̀ всѣ́хъ сынѡ́въ є҆ве́ровыхъ, бра́тꙋ і҆а́феѳа старѣ́йшагѡ [въ гре́ческомъ перево́дѣ і҆а́феѳъ пока́занъ бра́тъ си́мꙋ старѣ́йшїй.].
21
И Си́му роди́ся и тому́, отцу́ всѣ́хъ сыно́въ Єве́ровыхъ, бра́ту Іа́феѳа старѣ́йшаго {въ гре́ческомъ перево́дѣ Іа́феѳъ пока́занъ бра́тъ Си́му старѣ́йшій.}.
22
Сы́нове си́мѡвы: є҆ла́мъ и҆ а҆ссꙋ́ръ, и҆ а҆рфаѯа́дъ и҆ лꙋ́дъ, и҆ а҆ра́мъ и҆ каїна́нъ.
22
Сы́нове Си́мовы: Єла́мъ и Ассу́ръ, и Арфакса́дъ и Лу́дъ, и Ара́мъ и Каіна́нъ.
23
И҆ сы́нове а҆ра̑мли: ѡ҆́съ и҆ оу҆́лъ, и҆ гате́ръ и҆ мосо́хъ.
23
И сы́нове Ара́мли: О́съ и У́лъ, и Гате́ръ и Мосо́хъ.
24
И҆ а҆рфаѯа́дъ родѝ каїна́на, каїна́нъ же родѝ салꙋ̀, сала́ же родѝ є҆ве́ра.
24
И Арфакса́дъ роди́ Каіна́на, Каіна́нъ же роди́ Салу́, Сала́ же роди́ Єве́ра.
25
И҆ роди́стасѧ є҆ве́рꙋ два̀ сы̑на: и҆́мѧ є҆ди́номꙋ фале́къ: во дни̑ бо є҆гѡ̀ раздѣли́сѧ землѧ̀: и҆ и҆́мѧ бра́тꙋ є҆гѡ̀ і҆екта́нъ.
25
И роди́стася Єве́ру два́ сы́на: и́мя єди́ному Фале́къ: во дни́ бо єго́ раздѣли́ся земля́: и и́мя бра́ту єго́ Ієкта́нъ.
26
І҆екта́нъ же родѝ є҆лмѡда́да и҆ сале́фа, и҆ сармѡ́ѳа и҆ і҆ара́ха,
26
Ієкта́нъ же роди́ Єлмода́да и Сале́фа, и Сармо́ѳа и Іара́ха,
27
и҆ ѻ҆до́рра и҆ є҆ви́ла и҆ декла̀,
27
и Одо́рра и Єви́ла и Декла́,
28
и҆ є҆ѵа́ла и҆ а҆вїмаи́ла и҆ сове́ва,
28
и Єва́ла и Авімаи́ла и Сове́ва,
29
и҆ оу҆фі́ра и҆ є҆ѵі́ла и҆ і҆ѡва́ва: всѝ сі́и сы́нове і҆екта́нѡвы.
29
и Уфі́ра и Єві́ла и Іова́ва: вси́ сі́и сы́нове Ієкта́новы.
30
И҆ бы́сть селе́нїе и҆́хъ ѿ ма́си да́же прїитѝ до сафи́ра, горы̀ восто́чныѧ.
30
И бы́сть селе́ніє и́хъ от Ма́си да́же пріити́ до Сафи́ра, горы́ восто́чныя.
31
Сі́и сы́нове си́мѡвы, въ племенѣ́хъ свои́хъ, по ꙗ҆зы́кѡмъ и҆́хъ, въ страна́хъ и҆́хъ и҆ въ наро́дѣхъ и҆́хъ.
31
Сі́и сы́нове Си́мовы, въ племенѣ́хъ свои́хъ, по язы́комъ и́хъ, въ страна́хъ и́хъ и въ наро́дѣхъ и́хъ.
32
Сїѧ̑ племена̀ сынѡ́въ нѡ́евыхъ по родѡ́мъ и҆́хъ, по ꙗ҆зы́кѡмъ и҆́хъ: ѿ си́хъ разсѣ́ѧшасѧ ѻ҆́строви ꙗ҆зы́кѡвъ на землѝ по пото́пѣ.
32
Сія́ племена́ сыно́въ Но́євыхъ по родо́мъ и́хъ, по язы́комъ и́хъ: от си́хъ разсѣ́яшася о́строви язы́ковъ на земли́ по пото́пѣ.