¹

А҆враа́мъ же бѧ́ше ста́ръ, заматерѣ́вшїй во дне́хъ: и҆ гдⷭ҇ь блгⷭ҇вѝ а҆враа́ма во всѣ́хъ.

¹

Авраа́мъ же бя́ше ста́ръ, заматерѣ́вшій во дне́хъ: и Госпо́дь благослови́ Авраа́ма во всѣ́хъ.

²

И҆ речѐ а҆враа́мъ рабꙋ̀ своемꙋ̀ старѣ́йшемꙋ до́мꙋ своегѡ̀, ѡ҆блада́ющемꙋ всѣ́ми є҆гѡ̀: положѝ рꙋ́кꙋ твою̀ под̾ стегно̀ моѐ,

²

И рече́ Авраа́мъ рабу́ своєму́ старѣ́йшему до́му своєго́, облада́ющему всѣ́ми єго́: положи́ ру́ку твою́ подъ стегно́ моє́,

³

и҆ закленꙋ́ тѧ гдⷭ҇емъ бг҃омъ нб҃сѐ и҆ бг҃омъ землѝ, да не по́ймеши сы́нꙋ моемꙋ̀ і҆саа́кꙋ жены̀ ѿ дще́рей ханане́йскихъ, съ ни́миже а҆́зъ живꙋ̀ въ ни́хъ:

³

и заклену́ тя Го́сподемъ Бо́гомъ небесе́ и Бо́гомъ земли́, да не по́ймеши сы́ну моєму́ Ісаа́ку жены́ от дще́рей Ханане́йскихъ, съ ни́миже а́зъ живу́ въ ни́хъ:

⁴

но то́кмѡ на зе́млю мою̀, и҆дѣ́же роди́хсѧ, по́йдеши, и҆ ко пле́мени моемꙋ̀, и҆ по́ймеши женꙋ̀ сы́нꙋ моемꙋ̀ і҆саа́кꙋ ѿтꙋ́дꙋ.

⁴

но то́кмо на зе́млю мою́, идѣ́же роди́хся, по́йдеши, и ко пле́мени моєму́, и по́ймеши жену́ сы́ну моєму́ Ісаа́ку отту́ду.

⁵

Рече́ же къ немꙋ̀ ра́бъ: є҆да̀ оу҆́бѡ не восхо́щетъ и҆тѝ жена̀ в̾слѣ́дъ со мно́ю на зе́млю сїю̀, возвращꙋ́ ли сы́на твоего̀ въ зе́млю, ѿ неѧ́же и҆зше́лъ є҆сѝ;

⁵

Рече́ же къ нему́ ра́бъ: єда́ у́бо не восхо́щетъ ити́ жена́ вслѣ́дъ со мно́ю на зе́млю сію́, возвращу́ ли сы́на твоєго́ въ зе́млю, от нея́же изше́лъ єси́?

⁶

Рече́ же къ немꙋ̀ а҆враа́мъ: внемлѝ себѣ̀, да не возврати́ши сы́на моегѡ̀ ѻ҆на́мѡ.

⁶

Рече́ же къ нему́ Авраа́мъ: внемли́ себѣ́, да не возврати́ши сы́на моєго́ она́мо.

⁷

Гдⷭ҇ь бг҃ъ нб҃сѐ и҆ бг҃ъ землѝ, и҆́же поѧ́ мѧ и҆з̾ до́мꙋ ѻ҆тца̀ моегѡ̀ и҆ ѿ землѝ, въ не́йже роди́хсѧ, и҆́же гл҃а мнѣ̀ и҆ и҆́же клѧ́сѧ мнѣ̀, гл҃ѧ: тебѣ̀ да́мъ зе́млю сїю̀ и҆ сѣ́мени твоемꙋ̀, то́й по́слетъ а҆́гг҃ла своего̀ пред̾ тобо́ю, и҆ по́ймеши женꙋ̀ сы́нꙋ моемꙋ̀ і҆саа́кꙋ ѿтꙋ́дꙋ:

⁷

Госпо́дь Бо́гъ небесе́ и Бо́гъ земли́, И́же поя́ мя изъ до́му отца́ моєго́ и от земли́, въ не́йже роди́хся, И́же глаго́ла мнѣ́ и И́же кля́ся мнѣ́, глаго́ля: тебѣ́ да́мъ зе́млю сію́ и сѣ́мени твоєму́, То́й по́слетъ А́нгела Своєго́ предъ тобо́ю, и по́ймеши жену́ сы́ну моєму́ Ісаа́ку отту́ду:

⁸

а҆́ще же не восхо́щетъ жена̀ поитѝ съ тобо́ю въ зе́млю сїю̀, чи́стъ бꙋ́деши ѿ заклѧ́тїѧ моегѡ̀: то́чїю сы́на моегѡ̀ не возвратѝ та́мѡ.

⁸

а́ще же не восхо́щетъ жена́ поити́ съ тобо́ю въ зе́млю сію́, чи́стъ бу́деши от закля́тія моєго́: то́чію сы́на моєго́ не возврати́ та́мо.

⁹

И҆ положѝ ра́бъ рꙋ́кꙋ свою̀ под̾ стегно̀ а҆враа́ма господи́на своегѡ̀, и҆ клѧ́сѧ є҆мꙋ̀ ѡ҆ словесѝ се́мъ.

⁹

И положи́ ра́бъ ру́ку свою́ подъ стегно́ Авраа́ма господи́на своєго́, и кля́ся єму́ о словеси́ се́мъ.

¹⁰

И҆ взѧ̀ ра́бъ де́сѧть велблю̑дъ ѿ велблю̑дъ господи́на своегѡ̀, и҆ ѿ всѣ́хъ бла̑гъ господи́на своегѡ̀ съ собо́ю, и҆ воста́въ и҆́де въ месопота́мїю во гра́дъ нахѡ́ровъ:

¹⁰

И взя́ ра́бъ де́сять велблю́дъ от велблю́дъ господи́на своєго́, и от всѣ́хъ бла́гъ господи́на своєго́ съ собо́ю, и воста́въ и́де въ Месопота́мію во гра́дъ Нахо́ровъ:

¹¹

и҆ поста́ви велблю́ды внѣ̀ гра́да оу҆ кла́дѧзѧ во́днагѡ под̾ ве́черъ, є҆гда̀ и҆схо́дѧтъ (жєны̀) почерпа́ти воды̀,

¹¹

и поста́ви велблю́ды внѣ́ гра́да у кла́дязя во́днаго подъ ве́черъ, єгда́ исхо́дятъ [жены́] почерпа́ти воды́,

¹²

и҆ речѐ: гдⷭ҇и, бж҃е господи́на моегѡ̀ а҆враа́ма, бл҃гоꙋстро́й предо мно́ю дне́сь, и҆ сотворѝ млⷭ҇ть съ господи́номъ мои́мъ а҆враа́момъ:

¹²

и рече́: Го́споди, Бо́же господи́на моєго́ Авраа́ма, благоустро́й предо мно́ю дне́сь, и сотвори́ ми́лость съ господи́номъ мои́мъ Авраа́момъ:

¹³

сѐ, а҆́зъ ста́хъ оу҆ кла́дѧзѧ во́днагѡ, дщє́ри же живꙋ́щихъ во гра́дѣ и҆схо́дѧтъ почерпа́ти воды̀:

¹³

се́, а́зъ ста́хъ у кла́дязя во́днаго, дще́ри же живу́щихъ во гра́дѣ исхо́дятъ почерпа́ти воды́:

¹⁴

и҆ бꙋ́детъ дѣви́ца, є҆́йже а҆́зъ рекꙋ̀: преклонѝ водоно́съ тво́й, да пїю̀, и҆ рече́тъ мѝ: пі́й ты̀, и҆ велблю́ды твоѧ̑ напою̀, до́ндеже напїю́тсѧ: сїю̀ оу҆гото́валъ є҆сѝ рабꙋ̀ твоемꙋ̀ і҆саа́кꙋ: и҆ по семꙋ̀ оу҆вѣ́мъ, ꙗ҆́кѡ сотвори́лъ є҆сѝ млⷭ҇ть съ господи́номъ мои́мъ а҆враа́момъ.

¹⁴

и бу́детъ дѣви́ца, є́йже а́зъ реку́: преклони́ водоно́съ тво́й, да пію́, и рече́тъ ми́: пі́й ты́, и велблю́ды твоя́ напою́, до́ндеже напію́тся: сію́ угото́валъ єси́ рабу́ Твоєму́ Ісаа́ку: и по сему́ увѣ́мъ, я́ко сотвори́лъ єси́ ми́лость съ господи́номъ мои́мъ Авраа́момъ.

¹⁵

И҆ бы́сть пре́жде не́же сконча́ти є҆мꙋ̀ глаго́лющꙋ во оу҆мѣ̀ свое́мъ, и҆ сѐ, реве́кка и҆схожда́ше, ꙗ҆́же роди́сѧ ваѳꙋи́лꙋ, сы́нꙋ ме́лхи жены̀ нахѡ́ра, бра́та же а҆враа́млѧ, держа́щи водоно́съ на ра́мѣхъ свои́хъ:

¹⁵

И бы́сть пре́жде не́же сконча́ти єму́ глаго́лющу во умѣ́ своє́мъ, и се́, Реве́кка исхожда́ше, я́же роди́ся Ваѳуи́лу, сы́ну Ме́лхи жены́ Нахо́ра, бра́та же Авраа́мля, держа́щи водоно́съ на ра́мѣхъ свои́хъ:

¹⁶

дѣви́ца же бѧ́ше доброзра́чна ѕѣлѡ̀: дѣ́ва бѣ̀, мꙋ́жъ не позна̀ є҆ѧ̀. Соше́дши же на кла́дѧзь, напо́лни водоно́съ сво́й и҆ взы́де.

¹⁶

дѣви́ца же бя́ше доброзра́чна зѣло́: дѣ́ва бѣ́, му́жъ не позна́ єя́. Соше́дши же на кла́дязь, напо́лни водоно́съ сво́й и взы́де.

¹⁷

Тече́ же ра́бъ во срѣ́тенїе є҆́й и҆ речѐ: напо́й мѧ̀ ма́лѡ водо́ю ѿ водоно́са твоегѡ̀.

¹⁷

Тече́ же ра́бъ во срѣ́теніє є́й и рече́: напо́й мя́ ма́ло водо́ю от водоно́са твоєго́.

¹⁸

Сїѧ́ же речѐ: пі́й, господи́не. И҆ потща́сѧ, и҆ снѧ̀ водоно́съ на мы̑шца своѧ̑, и҆ напоѝ є҆го̀, до́ндеже напи́сѧ.

¹⁸

Сія́ же рече́: пі́й, господи́не. И потща́ся, и сня́ водоно́съ на мы́шца своя́, и напои́ єго́, до́ндеже напи́ся.

¹⁹

И҆ речѐ: и҆ велблю́дѡмъ твои̑мъ налїю̀, до́ндеже всѝ напїю́тсѧ.

¹⁹

И рече́: и велблю́домъ твои́мъ налію́, до́ндеже вси́ напію́тся.

²⁰

И҆ потща́сѧ, и҆ и҆спразднѝ водоно́съ въ пои́ло: и҆ течѐ па́ки на кла́дѧзь почерпнꙋ́ти воды̀, и҆ влїѧ̀ велблю́дѡмъ всѣ̑мъ.

²⁰

И потща́ся, и испраздни́ водоно́съ въ пои́ло: и тече́ па́ки на кла́дязь почерпну́ти воды́, и влія́ велблю́домъ всѣ́мъ.

²¹

Человѣ́къ же выразꙋмѣва́ше ю҆̀ и҆ помолчева́ше, да оу҆разꙋмѣ́етъ, а҆́ще бл҃гоꙋстро́и бг҃ъ пꙋ́ть є҆мꙋ̀, и҆лѝ нѝ.

²¹

Человѣ́къ же выразумѣва́ше ю́ и помолчева́ше, да уразумѣ́єтъ, а́ще благоустро́и Бо́гъ пу́ть єму́, или́ ни́.

²²

Бы́сть же є҆гда̀ преста́ша всѝ велблю́ды пїю́ще, взѧ̀ человѣ́къ оу҆серѧ̑зи зла̑ты вѣ́сомъ по дра́хмѣ и҆ два̀ запѧ̑стїѧ на рꙋ́ки є҆ѧ̀: де́сѧть златни́цъ вѣ́съ и҆́хъ.

²²

Бы́сть же єгда́ преста́ша вси́ велблю́ды пію́ще, взя́ человѣ́къ усеря́зи зла́ты вѣ́сомъ по дра́хмѣ и два́ запя́стія на ру́ки єя́: де́сять златни́цъ вѣ́съ и́хъ.

²³

И҆ вопросѝ ю҆̀ и҆ речѐ: чїѧ̀ є҆сѝ дще́рь; повѣ́ждь мѝ, а҆́ще є҆́сть оу҆ ѻ҆тца̀ твоегѡ̀ мѣ́сто на́мъ вита́ти;

²³

И вопроси́ ю́ и рече́: чія́ єси́ дще́рь? Повѣ́ждь ми́, а́ще є́сть у отца́ твоєго́ мѣ́сто на́мъ вита́ти?

²⁴

Ѻ҆на́ же речѐ є҆мꙋ̀: дще́рь ваѳꙋи́лева є҆́смь (сы́на) ме́лхина, є҆го́же родѝ нахѡ́рꙋ.

²⁴

Она́ же рече́ єму́: дще́рь Ваѳуи́лева є́смь [сы́на] Ме́лхина, єго́же роди́ Нахо́ру.

²⁵

И҆ речѐ є҆мꙋ̀: и҆ плевы̀ и҆ сѣ́на мно́гѡ оу҆ на́съ, и҆ мѣ́сто вита́ти.

²⁵

И рече́ єму́: и плевы́ и сѣ́на мно́го у на́съ, и мѣ́сто вита́ти.

²⁶

И҆ благослови́въ человѣ́къ, поклони́сѧ гдⷭ҇ꙋ

²⁶

И благослови́въ человѣ́къ, поклони́ся Го́споду

²⁷

и҆ речѐ: блгⷭ҇ве́нъ гдⷭ҇ь бг҃ъ господи́на моегѡ̀ а҆враа́ма, и҆́же не ѡ҆ста́ви пра́вды своеѧ̀ и҆ и҆́стины ѿ господи́на моегѡ̀: и҆ менѐ бл҃гоꙋстро́и гдⷭ҇ь въ до́мъ бра́та господи́на моегѡ̀.

²⁷

и рече́: благослове́нъ Госпо́дь Бо́гъ господи́на моєго́ Авраа́ма, И́же не оста́ви пра́вды Своєя́ и и́стины от господи́на моєго́: и мене́ благоустро́и Госпо́дь въ до́мъ бра́та господи́на моєго́.

²⁸

И҆ те́кши дѣви́ца въ до́мъ ма́тере своеѧ̀, повѣ́да по глаго́лѡмъ си̑мъ.

²⁸

И те́кши дѣви́ца въ до́мъ ма́тере своєя́, повѣ́да по глаго́ломъ си́мъ.

²⁹

Реве́кцѣ же бѧ́ше бра́тъ, є҆мꙋ́же и҆́мѧ лава́нъ: и҆ течѐ лава́нъ къ человѣ́кꙋ во́нъ на кла́дѧзь.

²⁹

Реве́кцѣ же бя́ше бра́тъ, єму́же и́мя Лава́нъ: и тече́ Лава́нъ къ человѣ́ку во́нъ на кла́дязь.

³⁰

И҆ бы́сть є҆гда̀ ви́дѣ оу҆серѧ̑зи, и҆ запѧ̑стїѧ на рꙋкꙋ̀ сестры̀ своеѧ̀, и҆ є҆гда̀ слы́ша словеса̀ реве́кки сестры̀ своеѧ̀, глаго́лющїѧ: си́це глаго́ла мнѣ̀ человѣ́къ: и҆ прїи́де къ человѣ́кꙋ, стоѧ́щꙋ є҆мꙋ̀ оу҆ велблю̑дъ оу҆ кла́дѧзѧ,

³⁰

И бы́сть єгда́ ви́дѣ усеря́зи, и запя́стія на руку́ сестры́ своєя́, и єгда́ слы́ша словеса́ Реве́кки сестры́ своєя́, глаго́лющія: си́це глаго́ла мнѣ́ человѣ́къ: и пріи́де къ человѣ́ку, стоя́щу єму́ у велблю́дъ у кла́дязя,

³¹

и҆ речѐ є҆мꙋ̀: грѧдѝ, вни́ди бл҃гослове́нный ѿ гдⷭ҇а, почто̀ стои́ши внѣ̀; а҆́зъ же оу҆гото́вахъ хра́минꙋ и҆ мѣ́сто велблю́дѡмъ.

³¹

и рече́ єму́: гряди́, вни́ди благослове́нный от Го́спода, почто́ стои́ши внѣ́? А́зъ же угото́вахъ хра́мину и мѣ́сто велблю́домъ.

³²

И҆ вни́де человѣ́къ въ до́мъ, и҆ разсѣдла̀ велблю́ды, и҆ дадѐ плє́вы и҆ сѣ́но велблю́дѡмъ, и҆ во́дꙋ оу҆мы́ти но́зѣ є҆гѡ̀, и҆ но́ги мꙋжє́мъ, и҆̀же бѧ́хꙋ съ ни́мъ:

³²

И вни́де человѣ́къ въ до́мъ, и разсѣдла́ велблю́ды, и даде́ пле́вы и сѣ́но велблю́домъ, и во́ду умы́ти но́зѣ єго́, и но́ги муже́мъ, и́же бя́ху съ ни́мъ:

³³

и҆ предложѝ и҆̀мъ хлѣ́бы ꙗ҆́сти, и҆ речѐ: не ꙗ҆́мъ, до́ндеже возглаго́лю словеса̀ моѧ̑. И҆ речѐ: глаго́ли.

³³

и предложи́ и́мъ хлѣ́бы я́сти, и рече́: не я́мъ, до́ндеже возглаго́лю словеса́ моя́. И рече́: глаго́ли.

³⁴

И҆ речѐ: ра́бъ а҆враа́мль є҆́смь а҆́зъ:

³⁴

И рече́: ра́бъ Авраа́мль є́смь а́зъ:

³⁵

гдⷭ҇ь же блгⷭ҇вѝ господи́на моего̀ ѕѣлѡ̀, и҆ возвы́сисѧ: и҆ дадѐ є҆мꙋ̀ ѻ҆́вцы и҆ телцы̀, сребро̀ и҆ зла́то, рабы̑ и҆ рабы̑ни, и҆ велблю́ды и҆ ѻ҆слы̀:

³⁵

Госпо́дь же благослови́ господи́на моєго́ зѣло́, и возвы́сися: и даде́ єму́ о́вцы и телцы́, сребро́ и зла́то, рабы́ и рабы́ни, и велблю́ды и ослы́:

³⁶

и҆ родѝ са́рра, жена̀ господи́на моегѡ̀, сы́на є҆ди́наго господи́нꙋ моемꙋ̀, состарѣ́вшемꙋсѧ є҆мꙋ̀, и҆ дадѐ є҆мꙋ̀, є҆ли̑ка и҆мѧ́ше:

³⁶

и роди́ Са́рра, жена́ господи́на моєго́, сы́на єди́наго господи́ну моєму́, состарѣ́вшемуся єму́, и даде́ єму́, єли́ка имя́ше:

³⁷

и҆ заклѧ́ мѧ господи́нъ мо́й, глаго́лѧ: не по́ймеши жены̀ сы́нꙋ моемꙋ̀ ѿ дще́рей ханане́йскихъ, въ ни́хже а҆́зъ ѡ҆бита́ю въ землѝ и҆́хъ:

³⁷

и закля́ мя господи́нъ мо́й, глаго́ля: не по́ймеши жены́ сы́ну моєму́ от дще́рей Ханане́йскихъ, въ ни́хже а́зъ обита́ю въ земли́ и́хъ:

³⁸

но въ до́мъ ѻ҆тца̀ моегѡ̀ по́йдеши, и҆ въ пле́мѧ моѐ, и҆ по́ймеши женꙋ̀ сы́нꙋ моемꙋ̀ ѿтꙋ́дꙋ:

³⁸

но въ до́мъ отца́ моєго́ по́йдеши, и въ пле́мя моє́, и по́ймеши жену́ сы́ну моєму́ отту́ду:

³⁹

рѣ́хъ же (а҆́зъ) господи́нꙋ моемꙋ̀: а҆ є҆гда̀ не восхо́щетъ жена̀ со мно́ю и҆тѝ;

³⁹

рѣ́хъ же [а́зъ] господи́ну моєму́: а єгда́ не восхо́щетъ жена́ со мно́ю ити́?

⁴⁰

и҆ рече́ ми: гдⷭ҇ь бг҃ъ, є҆мꙋ́же благоꙋгоди́хъ пред̾ ни́мъ, ѻ҆́нъ по́слетъ а҆́гг҃ла своего̀ съ тобо́ю и҆ бл҃гоꙋстро́итъ пꙋ́ть тво́й, и҆ по́ймеши женꙋ̀ сы́нꙋ моемꙋ̀ ѿ пле́мене моегѡ̀ и҆ ѿ до́мꙋ ѻ҆тца̀ моегѡ̀:

⁴⁰

И рече́ ми: Госпо́дь Бо́гъ, Єму́же благоугоди́хъ предъ ни́мъ, о́нъ по́слетъ А́нгела Своєго́ съ тобо́ю и благоустро́итъ пу́ть тво́й, и по́ймеши жену́ сы́ну моєму́ от пле́мене моєго́ и от до́му отца́ моєго́:

⁴¹

тогда̀ бꙋ́деши чи́стъ ѿ заклина́нїѧ моегѡ̀: є҆гда́ бо до́йдеши въ пле́мѧ моѐ, и҆ не дадѧ́тъ тѝ, и҆ бꙋ́деши чи́стъ ѿ заклина́нїѧ моегѡ̀:

⁴¹

тогда́ бу́деши чи́стъ от заклина́нія моєго́: єгда́ бо до́йдеши въ пле́мя моє́, и не дадя́тъ ти́, и бу́деши чи́стъ от заклина́нія моєго́:

⁴²

и҆ прише́дъ дне́сь на кла́дѧзь, реко́хъ: гдⷭ҇и, бж҃е господи́на моегѡ̀ а҆враа́ма, а҆́ще ты̀ бл҃гоꙋстроѧ́еши пꙋ́ть мо́й, въ ѻ҆́ньже нн҃ѣ а҆́зъ и҆дꙋ̀:

⁴²

и прише́дъ дне́сь на кла́дязь, реко́хъ: Го́споди, Бо́же господи́на моєго́ Авраа́ма, а́ще ты́ благоустроя́єши пу́ть мо́й, въ о́ньже ны́нѣ а́зъ иду́:

⁴³

сѐ, а҆́зъ ста́хъ оу҆ кла́дѧзѧ во́днагѡ, и҆ дщє́ри гра́жданъ и҆схо́дѧтъ почерпа́ти воды̀: и҆ бꙋ́детъ дѣви́ца, є҆́йже а҆́ще а҆́зъ рекꙋ̀: напо́й мѧ̀ ѿ водоно́са твоегѡ̀ ма́лѡ водо́ю:

⁴³

се́, а́зъ ста́хъ у кла́дязя во́днаго, и дще́ри гра́жданъ исхо́дятъ почерпа́ти воды́: и бу́детъ дѣви́ца, є́йже а́ще а́зъ реку́: напо́й мя́ от водоно́са твоєго́ ма́ло водо́ю:

⁴⁴

и҆ рече́тъ мѝ: и҆ ты̀ пі́й, и҆ велблю́дѡмъ твои̑мъ влїю̀: сїѧ̀ (бꙋ́детъ) жена̀, ю҆́же оу҆гото́ва гдⷭ҇ь рабꙋ̀ своемꙋ̀ і҆саа́кꙋ: и҆ по семꙋ̀ оу҆разꙋмѣ́ю, ꙗ҆́кѡ сотвори́лъ є҆сѝ млⷭ҇ть господи́нꙋ моемꙋ̀ а҆враа́мꙋ.

⁴⁴

и рече́тъ ми́: и ты́ пі́й, и велблю́домъ твои́мъ влію́: сія́ [бу́детъ] жена́, ю́же угото́ва Госпо́дь рабу́ Своєму́ Ісаа́ку: и по сему́ уразумѣ́ю, я́ко сотвори́лъ єси́ ми́лость господи́ну моєму́ Авраа́му.

⁴⁵

И҆ бы́сть пре́жде не́же сконча́ти мнѣ̀ глаго́лющꙋ во оу҆мѣ̀ свое́мъ, а҆́бїе реве́кка и҆схожда́ше держа́щи водоно́съ на ра̑мꙋ, и҆ сни́де на кла́дѧзь, и҆ почерпѐ воды̀: и҆ реко́хъ є҆́й: напо́й мѧ̀.

⁴⁵

И бы́сть пре́жде не́же сконча́ти мнѣ́ глаго́лющу во умѣ́ своє́мъ, а́біє Реве́кка исхожда́ше держа́щи водоно́съ на ра́му, и сни́де на кла́дязь, и почерпе́ воды́: и реко́хъ є́й: напо́й мя́.

⁴⁶

И҆ потща́вшисѧ снѧ̀ водоно́съ съ себє̀ на мы́шцꙋ свою̀ и҆ речѐ: пі́й ты̀, и҆ велблю́ды твоѧ̑ напою̀. И҆ напи́хсѧ, и҆ велблю́ды моѧ̑ напоѝ.

⁴⁶

И потща́вшися сня́ водоно́съ съ себе́ на мы́шцу свою́ и рече́: пі́й ты́, и велблю́ды твоя́ напою́. И напи́хся, и велблю́ды моя́ напои́.

⁴⁷

И҆ вопроси́хъ ю҆̀ и҆ реко́хъ: чїѧ̀ є҆сѝ дще́рь; повѣ́ждь мѝ. Ѻ҆на́ же речѐ: дще́рь ваѳꙋи́лева є҆́смь сы́на нахѡ́рова, є҆го́же родѝ є҆мꙋ̀ ме́лха. И҆ да́хъ є҆́й оу҆серѧ̑зи, и҆ запѧ̑стїѧ на рꙋ́цѣ є҆ѧ̀,

⁴⁷

И вопроси́хъ ю́ и реко́хъ: чія́ єси́ дще́рь? Повѣ́ждь ми́. Она́ же рече́: дще́рь Ваѳуи́лева є́смь сы́на Нахо́рова, єго́же роди́ єму́ Ме́лха. И да́хъ є́й усеря́зи, и запя́стія на ру́цѣ єя́,

⁴⁸

и҆ благоволи́въ поклони́хсѧ гдⷭ҇ꙋ: и҆ благослови́хъ гдⷭ҇а бг҃а господи́на моегѡ̀ а҆враа́ма, и҆́же бл҃гоꙋстро́и мѧ̀ на пꙋтѝ и҆́стины поѧ́ти дще́рь бра́та господи́на моегѡ̀ сы́нꙋ є҆гѡ̀:

⁴⁸

и благоволи́въ поклони́хся Го́споду: и благослови́хъ Го́спода Бо́га господи́на моєго́ Авраа́ма, И́же благоустро́и мя́ на пути́ и́стины поя́ти дще́рь бра́та господи́на моєго́ сы́ну єго́:

⁴⁹

а҆́ще оу҆́бѡ сотворитѐ вы̀ ми́лость и҆ пра́вдꙋ къ господи́нꙋ моемꙋ̀: а҆́ще же нѝ, повѣ́дите мѝ: да ѡ҆бращꙋ́сѧ и҆лѝ на де́сно, и҆лѝ на лѣ́во.

⁴⁹

а́ще у́бо сотворите́ вы́ ми́лость и пра́вду къ господи́ну моєму́: а́ще же ни́, повѣ́дите ми́: да обращу́ся или́ на де́сно, или́ на лѣ́во.

⁵⁰

Ѿвѣща̑вша же лава́нъ и҆ ваѳꙋи́лъ, реко́ста: ѿ гдⷭ҇а прїи́де дѣ́ло сїѐ: не возмо́жемъ тѝ проти́вꙋ рещѝ ѕло̀ и҆лѝ бла́го:

⁵⁰

Отвѣща́вша же Лава́нъ и Ваѳуи́лъ, реко́ста: от Го́спода пріи́де дѣ́ло сіє́: не возмо́жемъ ти́ проти́ву рещи́ зло́ или́ бла́го:

⁵¹

сѐ, реве́кка пред̾ тобо́ю: пое́мь ю҆̀, и҆дѝ: и҆ да бꙋ́детъ жена̀ сы́нꙋ господи́на твоегѡ̀, ꙗ҆́коже гл҃а гдⷭ҇ь.

⁵¹

се́, Реве́кка предъ тобо́ю: поє́мь ю́, иди́: и да бу́детъ жена́ сы́ну господи́на твоєго́, я́коже глаго́ла Госпо́дь.

⁵²

Бы́сть же є҆гда̀ оу҆слы́ша ра́бъ а҆враа́мль словеса̀ сїѧ̑, поклони́сѧ до землѝ гдⷭ҇ꙋ.

⁵²

Бы́сть же єгда́ услы́ша ра́бъ Авраа́мль словеса́ сія́, поклони́ся до земли́ Го́споду.

⁵³

И҆ и҆зне́съ ра́бъ сосꙋ́ды зла̑ты и҆ срє́брѧны и҆ ри̑зы, дадѐ реве́кцѣ: и҆ да́ры дадѐ бра́тꙋ є҆ѧ̀ и҆ ма́тери є҆ѧ̀.

⁵³

И изне́съ ра́бъ сосу́ды зла́ты и сре́бряны и ри́зы, даде́ Реве́кцѣ: и да́ры даде́ бра́ту єя́ и ма́тери єя́.

⁵⁴

И҆ ꙗ҆до́ша и҆ пи́ша и҆ то́й и҆ мꙋ́жїе, и҆̀же бѧ́хꙋ съ ни́мъ, и҆ почи́ша. И҆ воста́въ заꙋ́тра, речѐ: ѿпꙋсти́те мѧ̀, да ѿидꙋ̀ къ господи́нꙋ моемꙋ̀.

⁵⁴

И ядо́ша и пи́ша и то́й и му́жіє, и́же бя́ху съ ни́мъ, и почи́ша. И воста́въ зау́тра, рече́: отпусти́те мя́, да отиду́ къ господи́ну моєму́.

⁵⁵

Рѣ́ша же бра́тїѧ є҆ѧ̀ и҆ ма́ти: да пребꙋ́детъ дѣви́ца съ на́ми ꙗ҆́кѡ де́сѧть дні́й, и҆ посе́мъ по́йдетъ.

⁵⁵

Рѣ́ша же бра́тія єя́ и ма́ти: да пребу́детъ дѣви́ца съ на́ми я́ко де́сять дні́й, и посе́мъ по́йдетъ.

⁵⁶

Ѻ҆́нъ же речѐ къ ни̑мъ: не держи́те мѧ̀, гдⷭ҇ь бо бл҃гоꙋстро́и пꙋ́ть мо́й во мнѣ̀: ѿпꙋсти́те мѧ̀, да и҆дꙋ̀ къ господи́нꙋ моемꙋ̀.

⁵⁶

О́нъ же рече́ къ ни́мъ: не держи́те мя́, Госпо́дь бо благоустро́и пу́ть мо́й во мнѣ́: отпусти́те мя́, да иду́ къ господи́ну моєму́.

⁵⁷

Ѻ҆ни́ же рѣ́ша: призове́мъ дѣви́цꙋ и҆ вопро́симъ є҆ѧ̀ и҆зоꙋ́стъ.

⁵⁷

Они́ же рѣ́ша: призове́мъ дѣви́цу и вопро́симъ єя́ изоу́стъ.

⁵⁸

И҆ призва́ша реве́ккꙋ и҆ рѣ́ша є҆́й: по́йдеши ли съ человѣ́комъ си́мъ; Ѻ҆на́ же речѐ: пойдꙋ̀.

⁵⁸

И призва́ша Реве́кку и рѣ́ша є́й: по́йдеши ли съ человѣ́комъ си́мъ? Она́ же рече́: пойду́.

⁵⁹

И҆ ѿпꙋсти́ша реве́ккꙋ сестрꙋ̀ свою̀, и҆ и҆мѣ̑нїѧ є҆ѧ̀, и҆ раба̀ а҆враа́млѧ, и҆ и҆̀же съ ни́мъ бы́ша.

⁵⁹

И отпусти́ша Реве́кку сестру́ свою́, и имѣ́нія єя́, и раба́ Авраа́мля, и и́же съ ни́мъ бы́ша.

⁶⁰

И҆ благослови́ша реве́ккꙋ и҆ рѣ́ша є҆́й: сестра̀ на́ша є҆сѝ, бꙋ́ди въ ты́сѧщы тє́мъ, и҆ да наслѣ́дитъ сѣ́мѧ твоѐ гра́ды сꙋпоста̑тъ.

⁶⁰

И благослови́ша Реве́кку и рѣ́ша є́й: сестра́ на́ша єси́, бу́ди въ ты́сящы те́мъ, и да наслѣ́дитъ сѣ́мя твоє́ гра́ды супоста́тъ.

⁶¹

Воста́вши же реве́кка и҆ рабы̑ни є҆ѧ̀, всѣдо́ша на велблю́ды и҆ поидо́ша съ человѣ́комъ. И҆ пои́мъ ра́бъ реве́ккꙋ, ѿи́де.

⁶¹

Воста́вши же Реве́кка и рабы́ни єя́, всѣдо́ша на велблю́ды и поидо́ша съ человѣ́комъ. И пои́мъ ра́бъ Реве́кку, отъи́де.

⁶²

І҆саа́къ же прехожда́ше сквозѣ̀ пꙋсты́ню оу҆ кла́дѧзѧ видѣ́нїѧ: са́мъ же живѧ́ше на землѝ на полꙋ́дне.

⁶²

Ісаа́къ же прехожда́ше сквозѣ́ пусты́ню у кла́дязя Видѣ́нія: са́мъ же живя́ше на земли́ на полу́дне.

⁶³

И҆ и҆зы́де і҆саа́къ поглꙋми́тисѧ на по́ле къ ве́черꙋ, и҆ воззрѣ́въ ѻ҆чи́ма свои́ма, ви́дѣ велблю́ды и҆дꙋ́щыѧ.

⁶³

И изы́де Ісаа́къ поглуми́тися на по́ле къ ве́черу, и воззрѣ́въ очи́ма свои́ма, ви́дѣ велблю́ды иду́щыя.

⁶⁴

И҆ воззрѣ́вши реве́кка ѻ҆чи́ма свои́ма, ви́дѣ і҆саа́ка: и҆ и҆зскочѝ съ велблю́да.

⁶⁴

И воззрѣ́вши Реве́кка очи́ма свои́ма, ви́дѣ Ісаа́ка: и изскочи́ съ велблю́да.

⁶⁵

И҆ речѐ рабꙋ̀: кто́ є҆сть человѣ́къ ѻ҆́ный, и҆́же и҆́детъ по по́лю во срѣ́тенїе на́мъ; Рече́ же ра́бъ: се́й є҆́сть господи́нъ мо́й. Ѻ҆на́ же взе́мши ри́зꙋ лѣ́тнюю, ѡ҆блече́сѧ.

⁶⁵

И рече́ рабу́: кто́ єсть человѣ́къ о́ный, и́же и́детъ по по́лю во срѣ́теніє на́мъ? Рече́ же ра́бъ: се́й є́сть господи́нъ мо́й. Она́ же взе́мши ри́зу лѣ́тнюю, облече́ся.

⁶⁶

И҆ повѣ́да ра́бъ і҆саа́кꙋ всѧ̑ словеса̀, ꙗ҆̀же сотворѝ.

⁶⁶

И повѣ́да ра́бъ Ісаа́ку вся́ словеса́, я́же сотвори́.

⁶⁷

Вни́де же і҆саа́къ въ до́мъ ма́тере своеѧ̀, и҆ поѧ̀ реве́ккꙋ, и҆ бы́сть є҆мꙋ̀ жена̀: и҆ возлюбѝ ю҆̀, и҆ оу҆тѣ́шисѧ і҆саа́къ по са́ррѣ ма́тери свое́й.

⁶⁷

Вни́де же Ісаа́къ въ до́мъ ма́тере своєя́, и поя́ Реве́кку, и бы́сть єму́ жена́: и возлюби́ ю́, и утѣ́шися Ісаа́къ по Са́ррѣ ма́тери своє́й.