¹

І҆ѡ́сифъ же приведе́нъ бы́сть во є҆гѵ́петъ. И҆ кꙋпѝ є҆го̀ пентефрі́й є҆ѵнꙋ́хъ фараѡ́новъ а҆рхїмагі́ръ, мꙋ́жъ є҆гѵ́птѧнинъ, ѿ рꙋ́къ і҆сма́илтѧнъ, и҆̀же приведо́ша є҆го̀ та́мѡ.

¹

Іо́сифъ же приведе́нъ бы́сть во Єги́петъ. И купи́ єго́ Пентефрі́й євну́хъ фарао́новъ архімагі́ръ, му́жъ Єги́птянинъ, от ру́къ Ісма́илтянъ, и́же приведо́ша єго́ та́мо.

²

И҆ бѧ́ше гдⷭ҇ь со і҆ѡ́сифомъ: и҆ бѧ́ше мꙋ́жъ благополꙋ́ченъ, и҆ бы́сть въ домꙋ̀ господи́на своегѡ̀ є҆гѵ́птѧнина.

²

И бя́ше Госпо́дь со Іо́сифомъ: и бя́ше му́жъ благополу́ченъ, и бы́сть въ дому́ господи́на своєго́ Єги́птянина.

³

Вѣ́дѧше же господи́нъ є҆гѡ̀, ꙗ҆́кѡ гдⷭ҇ь бѣ̀ съ ни́мъ, и҆ є҆ли̑ка твори́тъ, гдⷭ҇ь благоꙋстроѧ́етъ въ рꙋкꙋ̀ є҆гѡ̀.

³

Вѣ́дяше же господи́нъ єго́, я́ко Госпо́дь бѣ́ съ ни́мъ, и єли́ка твори́тъ, Госпо́дь благоустроя́єтъ въ руку́ єго́.

⁴

И҆ ѡ҆брѣ́те і҆ѡ́сифъ благода́ть пред̾ господи́номъ свои́мъ и҆ благоꙋгодѝ є҆мꙋ̀: и҆ поста́ви є҆го̀ над̾ до́момъ свои́мъ, и҆ всѧ̑, є҆ли̑ка бы́ша є҆мꙋ̀, дадѐ въ рꙋ́ки і҆ѡ́сифѡвы.

⁴

И обрѣ́те Іо́сифъ благода́ть предъ господи́номъ свои́мъ и благоугоди́ єму́: и поста́ви єго́ надъ до́момъ свои́мъ, и вся́, єли́ка бы́ша єму́, даде́ въ ру́ки Іо́сифовы.

⁵

Бы́сть же є҆гда̀ поста́ви є҆го̀ над̾ до́момъ свои́мъ и҆ над̾ всѣ́ми, є҆ли̑ка и҆мѣ́ѧше, и҆ блгⷭ҇вѝ гдⷭ҇ь до́мъ є҆гѵ́птѧнина і҆ѡ́сифа ра́ди: и҆ бы́сть блгⷭ҇ве́нїе гдⷭ҇не на все́мъ и҆мѣ́нїи є҆гѡ̀ въ домꙋ̀ и҆ въ се́лѣхъ є҆гѡ̀.

⁵

Бы́сть же єгда́ поста́ви єго́ надъ до́момъ свои́мъ и надъ всѣ́ми, єли́ка имѣ́яше, и благослови́ Госпо́дь до́мъ Єги́птянина Іо́сифа ра́ди: и бы́сть благослове́ніє Госпо́дне на все́мъ имѣ́ніи єго́ въ дому́ и въ се́лѣхъ єго́.

⁶

И҆ предадѐ всѧ̑, є҆ли̑ка бы́ша є҆мꙋ̀, въ рꙋ́ки і҆ѡ́сифѡвы: и҆ не вѣ́дѧше ѿ сꙋ́щихъ оу҆ себє̀ ничто́же, кромѣ̀ хлѣ́ба, є҆го́же ꙗ҆дѧ́ше са́мъ: и҆ бѧ́ше і҆ѡ́сифъ до́бръ ѡ҆́бразомъ и҆ красе́нъ взо́ромъ ѕѣлѡ̀.

⁶

И предаде́ вся́, єли́ка бы́ша єму́, въ ру́ки Іо́сифовы: и не вѣ́дяше от су́щихъ у себе́ ничто́же, кромѣ́ хлѣ́ба, єго́же ядя́ше са́мъ: и бя́ше Іо́сифъ до́бръ о́бразомъ и красе́нъ взо́ромъ зѣло́.

⁷

И҆ бы́сть по словесѣ́хъ си́хъ, и҆ возложѝ жена̀ господи́на є҆гѡ̀ ѻ҆́чи своѧ̑ на і҆ѡ́сифа и҆ речѐ: пребꙋ́ди со мно́ю.

⁷

И бы́сть по словесѣ́хъ си́хъ, и возложи́ жена́ господи́на єго́ о́чи своя́ на Іо́сифа и рече́: пребу́ди со мно́ю.

⁸

Ѻ҆́нъ же не хотѧ́ше и҆ речѐ женѣ̀ господи́на своегѡ̀: а҆́ще господи́нъ мо́й не вѣ́сть менє̀ ра́ди ничто́же въ домꙋ̀ свое́мъ, и҆ всѧ̑, є҆ли̑ка сꙋ́ть є҆мꙋ̀, вдадѐ въ рꙋ́цѣ моѝ,

⁸

О́нъ же не хотя́ше и рече́ женѣ́ господи́на своєго́: а́ще господи́нъ мо́й не вѣ́сть мене́ ра́ди ничто́же въ дому́ своє́мъ, и вся́, єли́ка су́ть єму́, вдаде́ въ ру́цѣ мои́,

⁹

и҆ ничто̀ є҆́сть вы́ше менє̀ въ домꙋ̀ се́мъ, нижѐ и҆з̾ѧ́то бы́сть ѿ менє̀ что́-либо, кромѣ̀ тебє̀, поне́же ты̀ жена̀ є҆мꙋ̀ є҆сѝ: и҆ ка́кѡ сотворю̀ глаго́лъ ѕлы́й се́й и҆ согрѣшꙋ̀ пред̾ бг҃омъ;

⁹

и ничто́ є́сть вы́ше мене́ въ дому́ се́мъ, ниже́ изъя́то бы́сть от мене́ что́-либо, кромѣ́ тебе́, поне́же ты́ жена́ єму́ єси́: и ка́ко сотворю́ глаго́лъ злы́й се́й и согрѣшу́ предъ Бо́гомъ?

¹⁰

Є҆гда́ же і҆ѡ́сифꙋ глаго́лаше де́нь ѿ днѐ, и҆ не послꙋ́шаше є҆ѧ̀ є҆́же спа́ти и҆ бы́ти съ не́ю.

¹⁰

Єгда́ же Іо́сифу глаго́лаше де́нь от дне́, и не послу́шаше єя́ є́же спа́ти и бы́ти съ не́ю.

¹¹

Бы́сть же сицевы́й нѣ́кїй де́нь, и҆ вни́де і҆ѡ́сифъ въ до́мъ дѣ́лати дѣла̀ своѧ̑, и҆ никто́же бѧ́ше ѿ сꙋ́щихъ въ домꙋ̀ внꙋ́трь:

¹¹

Бы́сть же сицевы́й нѣ́кій де́нь, и вни́де Іо́сифъ въ до́мъ дѣ́лати дѣла́ своя́, и никто́же бя́ше от су́щихъ въ дому́ вну́трь:

¹²

и҆ оу҆хватѝ є҆го̀ за ри̑зы, глаго́лющи: лѧ́зи со мно́ю. И҆ ѡ҆ста́вивъ ри̑зы своѧ̑ въ рꙋкꙋ̀ є҆ѧ̀, оу҆бѣжѐ и҆ и҆зы́де во́нъ.

¹²

и ухвати́ єго́ за ри́зы, глаго́лющи: ля́зи со мно́ю. И оста́вивъ ри́зы своя́ въ руку́ єя́, убѣже́ и изы́де во́нъ.

¹³

И҆ бы́сть є҆гда̀ ви́дѣ, ꙗ҆́кѡ ѡ҆ста́вль ри̑зы своѧ̑ въ рꙋка́хъ є҆ѧ̀, бѣжа̀ и҆ и҆зы́де во́нъ:

¹³

И бы́сть єгда́ ви́дѣ, я́ко оста́вль ри́зы своя́ въ рука́хъ єя́, бѣжа́ и изы́де во́нъ:

¹⁴

и҆ воззва̀ сꙋ́щихъ въ домꙋ̀ и҆ речѐ и҆̀мъ глаго́лющи: ви́дите, введѐ на́мъ ѻ҆́трока є҆вре́ина нарꙋга́тисѧ на́мъ: вни́де ко мнѣ̀, глаго́лѧ: преспѝ со мно́ю: и҆ возопи́хъ гла́сомъ вели́кимъ:

¹⁴

и воззва́ су́щихъ въ дому́ и рече́ и́мъ глаго́лющи: ви́дите, введе́ на́мъ о́трока Євре́ина наруга́тися на́мъ: вни́де ко мнѣ́, глаго́ля: преспи́ со мно́ю: и возопи́хъ гла́сомъ вели́кимъ:

¹⁵

и҆ є҆гда̀ оу҆слы́ша ѻ҆́нъ, ꙗ҆́кѡ возвы́сихъ гла́съ мо́й и҆ возопи́хъ, ѡ҆ста́вль ри̑зы своѧ̑ оу҆ менє̀, ѿбѣжѐ и҆ и҆зы́де во́нъ.

¹⁵

и єгда́ услы́ша о́нъ, я́ко возвы́сихъ гла́съ мо́й и возопи́хъ, оста́вль ри́зы своя́ у мене́, отбѣже́ и изы́де во́нъ.

¹⁶

И҆ оу҆держа̀ ри̑зы оу҆ себє̀, до́ндеже прїи́де господи́нъ въ до́мъ сво́й.

¹⁶

И удержа́ ри́зы у себе́, до́ндеже пріи́де господи́нъ въ до́мъ сво́й.

¹⁷

И҆ повѣ́да є҆мꙋ̀ по словесѣ́хъ си́хъ, глаго́лющи: вни́де ко мнѣ̀ ѻ҆́трокъ є҆вре́инъ, є҆го́же вве́лъ є҆сѝ къ на́мъ, порꙋга́тисѧ мнѣ̀, и҆ рече́ ми: да бꙋ́дꙋ съ тобо́ю:

¹⁷

И повѣ́да єму́ по словесѣ́хъ си́хъ, глаго́лющи: вни́де ко мнѣ́ о́трокъ Євре́инъ, єго́же вве́лъ єси́ къ на́мъ, поруга́тися мнѣ́, и рече́ ми: да бу́ду съ тобо́ю:

¹⁸

є҆гда́ же оу҆слы́ша, ꙗ҆́кѡ воздвиго́хъ гла́съ мо́й и҆ возопи́хъ, ѡ҆ста́вль ри̑зы своѧ̑ оу҆ менє̀, ѿбѣжѐ и҆ и҆зы́де во́нъ.

¹⁸

єгда́ же услы́ша, я́ко воздвиго́хъ гла́съ мо́й и возопи́хъ, оста́вль ри́зы своя́ у мене́, отбѣже́ и изы́де во́нъ.

¹⁹

И҆ бы́сть є҆гда̀ оу҆слы́ша господи́нъ є҆гѡ̀ глаго́лы жены̀ своеѧ̀, є҆ли̑ка речѐ къ немꙋ̀, глаго́лющи: си́це сотвори́ ми ѻ҆́трокъ тво́й: и҆ разгнѣ́васѧ ꙗ҆́ростїю,

¹⁹

И бы́сть єгда́ услы́ша господи́нъ єго́ глаго́лы жены́ своєя́, єли́ка рече́ къ нему́, глаго́лющи: си́це сотвори́ ми о́трокъ тво́й: и разгнѣ́вася я́ростію,

²⁰

и҆ взе́мъ господи́нъ і҆ѡ́сифа, вве́рже є҆го̀ въ темни́цꙋ, въ мѣ́сто, и҆дѣ́же оу҆́зники царє́вы держа́тсѧ та́мѡ въ тверды́ни.

²⁰

и взе́мъ господи́нъ Іо́сифа, вве́рже єго́ въ темни́цу, въ мѣ́сто, идѣ́же у́зники царе́вы держа́тся та́мо въ тверды́ни.

²¹

И҆ бѧ́ше гдⷭ҇ь со і҆ѡ́сифомъ, и҆ возлїѧ̀ на него̀ млⷭ҇ть, и҆ дадѐ є҆мꙋ̀ блгⷣть пред̾ нача́лнымъ стра́жемъ темни́чнымъ:

²¹

И бя́ше Госпо́дь со Іо́сифомъ, и возлія́ на него́ ми́лость, и даде́ єму́ благода́ть предъ нача́лнымъ стра́жемъ темни́чнымъ:

²²

и҆ вдадѐ старѣ́йшина страже́й темни́цꙋ въ рꙋ́цѣ і҆ѡ́сифꙋ и҆ всѣ́хъ вве́рженыхъ въ темни́цꙋ: и҆ всѧ̑, є҆ли̑ка творѧ́хꙋ та́мѡ, то́й бѣ̀ творѧ́й.

²²

и вдаде́ старѣ́йшина страже́й темни́цу въ ру́цѣ Іо́сифу и всѣ́хъ вве́рженыхъ въ темни́цу: и вся́, єли́ка творя́ху та́мо, то́й бѣ́ творя́й.

²³

Старѣ́йшина же страже́й темни́чныхъ ничто́же бѣ̀ вѣ́дый є҆гѡ̀ ра́ди: всѧ̑ бо бы́ша въ рꙋка́хъ і҆ѡ́сифовыхъ, зане́же гдⷭ҇ь бѧ́ше съ ни́мъ: и҆ є҆ли̑ка то́й творѧ́ше, гдⷭ҇ь бл҃гопоспѣша́ше въ рꙋкꙋ̀ є҆гѡ̀.

²³

Старѣ́йшина же страже́й темни́чныхъ ничто́же бѣ́ вѣ́дый єго́ ра́ди: вся́ бо бы́ша въ рука́хъ Іо́сифовыхъ, зане́же Госпо́дь бя́ше съ ни́мъ: и єли́ка то́й творя́ше, Госпо́дь благопоспѣша́ше въ руку́ єго́.