¹

Видѣ́нїе на є҆гѵ́пта. Сѐ, гдⷭ҇ь сѣди́тъ на ѡ҆́блацѣ ле́гцѣ и҆ прїи́детъ во є҆гѵ́петъ, и҆ потрѧсꙋ́тсѧ рꙋкотворє́ннаѧ є҆гѵ́пєтскаѧ ѿ лица̀ є҆гѡ̀, и҆ сердца̀ и҆́хъ разсла́бнꙋтъ въ ни́хъ.

¹

Се́, Госпо́дь сѣди́тъ на о́блацѣ ле́гцѣ и пріи́детъ во Єги́петъ, и потрясу́тся рукотворе́нная Єги́петская от лица́ єго́, и сердца́ и́хъ разсла́бнутъ въ ни́хъ.

²

И҆ воста́нꙋтъ є҆гѵ́птѧне на є҆гѵ́птѧны, и҆ воѻрꙋжи́тсѧ человѣ́къ на бра́та своего̀, и҆ всѧ́къ на бли́жнѧго своего̀, воста́нетъ гра́дъ на гра́дъ и҆ зако́нъ на зако́нъ.

²

И воста́нутъ Єги́птяне на Єги́птяны, и вооружи́тся человѣ́къ на бра́та своєго́, и вся́къ на бли́жняго своєго́, воста́нетъ гра́дъ на гра́дъ и зако́нъ на зако́нъ.

³

И҆ возмѧте́тсѧ дꙋ́хъ є҆гѵ́птѧнъ въ ни́хъ, и҆ совѣ́тъ и҆́хъ разсы́плю, и҆ вопро́сѧтъ богѡ́въ свои́хъ и҆ кꙋмі́рѡвъ свои́хъ, и҆ гласѧ́щихъ ѿ землѝ и҆ чревоволше́бникѡвъ.

³

И возмяте́тся ду́хъ Єги́птянъ въ ни́хъ, и совѣ́тъ и́хъ разсы́плю, и вопро́сятъ бого́въ свои́хъ и кумі́ровъ свои́хъ, и глася́щихъ от земли́ и чревоволше́бниковъ.

⁴

И҆ преда́мъ є҆гѵ́петъ въ рꙋ́цѣ человѣ́кѡвъ вла́стелей же́стокихъ, и҆ ца́рїе же́стоцы ѡ҆блада́ти бꙋ́дꙋтъ и҆́ми: сїѧ̑ гл҃етъ гдⷭ҇ь саваѡ́ѳъ.

⁴

И преда́мъ Єги́петъ въ ру́цѣ человѣ́ковъ вла́стелей же́стокихъ, и ца́ріє же́стоцы облада́ти бу́дутъ и́ми: сія́ глаго́летъ Госпо́дь Савао́ѳъ.

⁵

И҆ и҆спїю́тъ є҆гѵ́птѧне во́дꙋ, ꙗ҆́же при мо́ри, а҆ рѣка̀ ѡ҆скꙋдѣ́етъ и҆ и҆́зсхнетъ.

⁵

И испію́тъ Єги́птяне во́ду, я́же при мо́ри, а рѣка́ оскудѣ́єтъ и и́зсхнетъ.

⁶

И҆ ѡ҆скꙋдѣ́ютъ рѣ́ки и҆ ровє́нницы рѣ́чнїи: и҆ и҆́зсхнетъ ве́сь со́нмъ водны́й, и҆ во всѧ́цѣмъ лꙋ́зѣ тро́стнѣмъ и҆ си́тнѣмъ,

⁶

И оскудѣ́ютъ рѣ́ки и рове́нницы рѣ́чніи: и и́зсхнетъ ве́сь со́нмъ водны́й, и во вся́цѣмъ лу́зѣ тро́стнѣмъ и си́тнѣмъ,

⁷

и҆ ѕла́къ зеле́ный ве́сь и҆́же ѡ҆́крестъ рѣкѝ, и҆ всѐ сѣ́емое при рѣцѣ̀ по́схнетъ вѣ́тромъ растлѣ́нно.

⁷

и зла́къ зеле́ный ве́сь и́же о́крестъ рѣки́, и все́ сѣ́ємоє при рѣцѣ́ по́схнетъ вѣ́тромъ растлѣ́нно.

⁸

И҆ возстенѧ́тъ ры́барїе, и҆ возстенѧ́тъ всѝ ме́щꙋщїи оу҆́дицꙋ въ рѣкꙋ̀, и҆ ме́щꙋщїи не́воды и҆ ме́щꙋщїи сѣ̑ти возрыда́ютъ.

⁸

И возстеня́тъ ры́баріє, и возстеня́тъ вси́ ме́щущіи у́дицу въ рѣку́, и ме́щущіи не́воды и ме́щущіи сѣ́ти возрыда́ютъ.

⁹

И҆ стꙋ́дъ прїи́метъ дѣ́лающихъ ле́нъ расче́саный и҆ дѣ́лающихъ вѷссо́нъ, и҆ бꙋ́дꙋтъ дѣ́лающїи ѧ҆̀ въ болѣ́зни,

⁹

И сту́дъ пріи́метъ дѣ́лающихъ ле́нъ расче́саный и дѣ́лающихъ виссо́нъ, и бу́дутъ дѣ́лающіи я́ въ болѣ́зни,

¹⁰

и҆ всѝ творѧ́щїи сїке́рꙋ ѡ҆печа́лѧтсѧ и҆ поболѧ́тъ дꙋша́ми.

¹⁰

и вси́ творя́щіи Сіке́ру опеча́лятся и поболя́тъ душа́ми.

¹¹

И҆ ю҆ро́диви бꙋ́дꙋтъ кнѧ̑зи тане́сѡвы: мꙋ́дрїи царє́вы совѣ̑тницы, совѣ́тъ и҆́хъ ѡ҆б̾юро́дѣетъ. Ка́кѡ рече́те царю̀: сы́нове смы́сленыхъ мы̀, сы́нове царе́й дре́внихъ;

¹¹

И юро́диви бу́дутъ кня́зи тане́совы: му́дріи царе́вы совѣ́тницы, совѣ́тъ и́хъ обюро́дѣєтъ. Ка́ко рече́те царю́: сы́нове смы́сленыхъ мы́, сы́нове царе́й дре́внихъ?

¹²

Гдѣ̀ сꙋ́ть нн҃ѣ мꙋ́дрїи твоѝ, и҆ да возвѣстѧ́тъ тебѣ̀ и҆ рекꙋ́тъ: что̀ совѣща̀ гдⷭ҇ь саваѡ́ѳъ на є҆гѵ́петъ;

¹²

Гдѣ́ су́ть ны́нѣ му́дріи твои́, и да возвѣстя́тъ тебѣ́ и реку́тъ: что́ совѣща́ Госпо́дь Савао́ѳъ на Єги́петъ?

¹³

Ѡ҆скꙋдѣ́ша кнѧ̑зи тане́сѡвы, и҆ вознесо́шасѧ кнѧ̑зи мемфі́тстїи, и҆ прельстѧ́тъ є҆гѵ́пта по племенѡ́мъ.

¹³

Оскудѣ́ша кня́зи тане́совы, и вознесо́шася кня́зи мемфі́тстіи, и прельстя́тъ Єги́пта по племено́мъ.

¹⁴

Гдⷭ҇ь бо растворѝ и҆̀мъ дꙋ́хъ прельще́нїѧ, и҆ прельсти́ша є҆гѵ́пта всѣ́ми дѣлесы̀ свои́ми, ꙗ҆́коже прельща́етсѧ пїѧ́ный и҆ кꙋ́пнѡ блю́ющь.

¹⁴

Госпо́дь бо раствори́ и́мъ ду́хъ прельще́нія, и прельсти́ша Єги́пта всѣ́ми дѣлесы́ свои́ми, я́коже прельща́єтся пія́ный и ку́пно блю́ющь.

¹⁵

И҆ не бꙋ́детъ є҆гѵ́птѧнѡмъ дѣ́ла, є҆́же бы сотвори́ло главꙋ̀ и҆ ѡ҆́шибъ, и҆ нача́ло и҆ коне́цъ.

¹⁵

И не бу́детъ Єги́птяномъ дѣ́ла, є́же бы сотвори́ло главу́ и о́шибъ, и нача́ло и коне́цъ.

¹⁶

Въ то́й де́нь бꙋ́дꙋтъ є҆гѵ́птѧне а҆́ки жєны̀ во стра́сѣ и҆ тре́пете ѿ лица̀ рꙋкѝ гдⷭ҇а саваѡ́ѳа, ю҆́же то́й возложи́тъ на нѧ̀.

¹⁶

Въ то́й де́нь бу́дутъ Єги́птяне а́ки жены́ во стра́сѣ и тре́пете от лица́ руки́ Го́спода Савао́ѳа, ю́же то́й возложи́тъ на ня́.

¹⁷

И҆ бꙋ́детъ страна̀ і҆ꙋде́йска во стра́хъ є҆гѵ́птѧнѡмъ: всѧ́къ, и҆́же а҆́ще воспомѧне́тъ ю҆̀ и҆̀мъ, оу҆боѧ́тсѧ совѣ́та ра́ди, є҆го́же совѣща̀ гдⷭ҇ь саваѡ́ѳъ на́нь.

¹⁷

И бу́детъ страна́ Іуде́йска во стра́хъ Єги́птяномъ: вся́къ, и́же а́ще воспомяне́тъ ю́ и́мъ, убоя́тся совѣ́та ра́ди, єго́же совѣща́ Госпо́дь Савао́ѳъ на́нь.

¹⁸

Въ то́й де́нь бꙋ́детъ пѧ́ть градѡ́въ во є҆гѵ́птѣ, глаго́лющихъ ѧ҆зы́комъ ханаані́тскимъ и҆ кленꙋ́щихсѧ и҆́менемъ гдⷭ҇а саваѡ́ѳа: гра́дъ а҆седе́къ прозове́тсѧ є҆ди́нъ гра́дъ.

¹⁸

Въ то́й де́нь бу́детъ пя́ть градо́въ во Єги́птѣ, глаго́лющихъ язы́комъ ханаані́тскимъ и клену́щихся и́менемъ Го́спода Савао́ѳа: гра́дъ аседе́къ прозове́тся єди́нъ гра́дъ.

¹⁹

Въ то́й де́нь бꙋ́детъ же́ртвенникъ гдⷭ҇еви въ землѝ є҆гѵ́петстѣй и҆ сто́лпъ въ предѣ́лѣхъ є҆гѡ̀ гдⷭ҇еви.

¹⁹

Въ то́й де́нь бу́детъ же́ртвенникъ Го́сподеви въ земли́ Єги́петстѣй и сто́лпъ въ предѣ́лѣхъ єго́ Го́сподеви.

²⁰

И҆ бꙋ́детъ въ зна́менїе во вѣ́къ гдⷭ҇еви въ землѝ є҆гѵ́петстѣй: ꙗ҆́кѡ возопїю́тъ ко гдⷭ҇ꙋ на ѡ҆скорблѧ́ющыѧ и҆̀хъ, и҆ по́слетъ и҆̀мъ гдⷭ҇ь человѣ́ка, и҆́же спасе́тъ ѧ҆̀, сꙋдѧ́й спасе́тъ ѧ҆̀.

²⁰

И бу́детъ въ зна́меніє во вѣ́къ Го́сподеви въ земли́ Єги́петстѣй: я́ко возопію́тъ ко Го́споду на оскорбля́ющыя и́хъ, и по́слетъ и́мъ Госпо́дь человѣ́ка, и́же спасе́тъ я́, судя́й спасе́тъ я́.

²¹

И҆ позна́нъ бꙋ́детъ гдⷭ҇ь є҆гѵ́птѧнѡмъ: и҆ оу҆вѣ́дѧтъ є҆гѵ́птѧне гдⷭ҇а въ то́й де́нь и҆ сотворѧ́тъ жє́ртвы и҆ да́ры, и҆ ѡ҆бѣща́ютъ ѡ҆бѣ́ты гдⷭ҇еви и҆ воздадѧ́тъ.

²¹

И позна́нъ бу́детъ Госпо́дь Єги́птяномъ: и увѣ́дятъ Єги́птяне Го́спода въ то́й де́нь и сотворя́тъ же́ртвы и да́ры, и обѣща́ютъ обѣ́ты Го́сподеви и воздадя́тъ.

²²

И҆ порази́тъ гдⷭ҇ь є҆гѵ́птѧнъ ꙗ҆́звою вели́кою и҆ и҆сцѣли́тъ и҆̀хъ цѣльбо́ю, и҆ ѡ҆братѧ́тсѧ ко гдⷭ҇еви, и҆ оу҆слы́шитъ и҆̀хъ и҆ и҆сцѣли́тъ и҆̀хъ цѣльбо́ю.

²²

И порази́тъ Госпо́дь Єги́птянъ я́звою вели́кою и исцѣли́тъ и́хъ цѣльбо́ю, и обратя́тся ко Го́сподеви, и услы́шитъ и́хъ и исцѣли́тъ и́хъ цѣльбо́ю.

²³

Въ то́й де́нь бꙋ́детъ пꙋ́ть ѿ є҆гѵ́пта ко а҆ссѷрі́анѡмъ, и҆ вни́дꙋтъ а҆ссѷрі́ане во є҆гѵ́петъ, и҆ є҆гѵ́птѧне по́йдꙋтъ ко а҆ссѷрі́анѡмъ, и҆ порабо́таютъ є҆гѵ́птѧне а҆ссѷрі́анѡмъ.

²³

Въ то́й де́нь бу́детъ пу́ть от Єги́пта ко Ассирі́аномъ, и вни́дутъ Ассирі́ане во Єги́петъ, и Єги́птяне по́йдутъ ко Ассирі́аномъ, и порабо́таютъ Єги́птяне Ассирі́аномъ.

²⁴

Въ то́й де́нь бꙋ́детъ і҆и҃ль тре́тїй во є҆гѵ́птѧнѣхъ и҆ во а҆ссѷрі́анѣхъ, благослове́нъ на землѝ,

²⁴

Въ то́й де́нь бу́детъ Ізра́иль тре́тій во Єги́птянѣхъ и во Ассирі́анѣхъ, благослове́нъ на земли́,

²⁵

ю҆́же блгⷭ҇вѝ гдⷭ҇ь саваѡ́ѳъ, гл҃ѧ: блгⷭ҇ве́ни лю́дїе моѝ, и҆̀же во є҆гѵ́птѣ и҆ и҆̀же во а҆ссѷрі́ахъ, и҆ наслѣ́дїе моѐ і҆и҃ль.

²⁵

ю́же благослови́ Госпо́дь Савао́ѳъ, глаго́ля: благослове́ни лю́діє мои́, и́же во Єги́птѣ и и́же во Ассирі́ахъ, и наслѣ́діє моє́ Ізра́иль.