Друк брошурою Виконується верстка сторінок…
Папір A4, альбомна орієнтація, поля «Немає», без колонтитулів. Друкуйте двосторонньо, з переворотом по короткому краю, у масштабі 100%; якщо принтер обрізає край — 98%. Не вмикайте режим «Буклет» у драйвері принтера.
1
И҆ бы́сть во четвертоена́десѧть лѣ́то ца́рствꙋющꙋ є҆зекі́и, взы́де сеннахирі́мъ ца́рь а҆ссѷрі́йскъ на гра́ды твє́рды і҆ꙋдє́йски и҆ взѧ̀ ѡ҆́ныѧ.
1
И бы́сть во четвертоєна́десять лѣ́то ца́рствующу єзекі́и, взы́де сеннахирі́мъ ца́рь Ассирі́йскъ на гра́ды тве́рды іуде́йски и взя́ о́ныя.
2
И҆ посла̀ ца́рь а҆ссѷрі́йскъ раѱа́ка ѿ лахі́са во і҆ерⷭ҇ли́мъ ко царю̀ є҆зекі́и съ си́лою вели́кою, и҆ ста̀ оу҆ водова́жды кꙋпѣ́ли вы́шнїѧ на пꙋтѝ села̀ кнафе́ова [бѣли́лнича].
2
И посла́ ца́рь Ассирі́йскъ рапса́ка от лахі́са во Ієрусали́мъ ко царю́ єзекі́и съ си́лою вели́кою, и ста́ у водова́жды купѣ́ли вы́шнія на пути́ села́ кнафе́ова {бѣли́лнича}.
3
И҆ и҆зы́де къ немꙋ̀ є҆лїакі́мъ сы́нъ хелкі́евъ домострои́тель, и҆ сомна́съ книго́чїй, и҆ і҆ѡа́хъ сы́нъ а҆са́фовъ памѧтопи́сецъ.
3
И изы́де къ нему́ Єліакі́мъ сы́нъ хелкі́євъ домострои́тель, и сомна́съ книго́чій, и Іоа́хъ сы́нъ Аса́фовъ памятопи́сецъ.
4
И҆ речѐ и҆̀мъ раѱа́къ: рцы́те є҆зекі́и: сїѧ̑ глаго́летъ ца́рь вели́кїй, ца́рь а҆ссѷрі́йскъ: на что̀ оу҆пова́еши;
4
И рече́ и́мъ рапса́къ: рцы́те єзекі́и: сія́ глаго́летъ ца́рь вели́кій, ца́рь Ассирі́йскъ: на что́ упова́єши?
5
є҆да̀ совѣ́томъ и҆ словесы̀ оу҆́стными би́тва быва́етъ; и҆ нн҃ѣ на кого̀ оу҆пова́еши, ꙗ҆́кѡ не покарѧ́ешисѧ мнѣ̀;
5
єда́ совѣ́томъ и словесы́ у́стными би́тва быва́єтъ? и ны́нѣ на кого́ упова́єши, я́ко не покаря́єшися мнѣ́?
6
сѐ, оу҆пова́еши на же́злъ тро́стѧнъ сокрꙋше́нный се́й, на є҆гѵ́петъ, на него́же а҆́ще ѡ҆пре́тсѧ мꙋ́жъ, вни́детъ въ рꙋ́кꙋ є҆гѡ̀ и҆ прободе́тъ ю҆̀: та́кѡ є҆́сть фараѡ́нъ ца́рь є҆гѵ́петскїй, и҆ всѝ оу҆пова́ющїи на него̀:
6
се́, упова́єши на же́злъ тро́стянъ сокруше́нный се́й, на Єги́петъ, на него́же а́ще опре́тся му́жъ, вни́детъ въ ру́ку єго́ и прободе́тъ ю́: та́ко є́сть фарао́нъ ца́рь Єги́петскій, и вси́ упова́ющіи на него́:
7
а҆́ще же глаго́лете, на гдⷭ҇а бг҃а на́шего оу҆пова́емъ: не се́й ли є҆́сть, є҆гѡ́же разорѝ є҆зекі́а высѡ́каѧ и҆ трє́бища є҆гѡ̀, и҆ заповѣ́да і҆ꙋ́дѣ и҆ і҆ерⷭ҇ли́мꙋ: пред̾ ѻ҆лтаре́мъ си́мъ поклони́тесѧ;
7
а́ще же глаго́лете, на Го́спода Бо́га на́шего упова́ємъ: не се́й ли є́сть, єго́же разори́ єзекі́а высо́кая и тре́бища єго́, и заповѣ́да Іу́дѣ и Ієрусали́му: предъ олтаре́мъ си́мъ поклони́теся?
8
нн҃ѣ соедини́тесѧ господи́нꙋ моемꙋ̀ царю̀ а҆ссѷрі́йскꙋ, и҆ да́мъ ва́мъ двѣ̀ ты́сѧщы ко́ней, а҆́ще мо́жете да́ти всѣда́ющыѧ на ни́хъ:
8
ны́нѣ соєдини́теся господи́ну моєму́ царю́ Ассирі́йску, и да́мъ ва́мъ двѣ́ ты́сящы ко́ней, а́ще мо́жете да́ти всѣда́ющыя на ни́хъ:
9
и҆ ка́кѡ мо́жете ѿврати́ти лицѐ воево́ды є҆ди́нагѡ; рабѝ сꙋ́ть, и҆̀же оу҆пова́ютъ на є҆гѵ́птѧнъ, на ко́ней и҆ вса́дникѡвъ:
9
и ка́ко мо́жете отврати́ти лице́ воєво́ды єди́наго? раби́ су́ть, и́же упова́ютъ на Єги́птянъ, на ко́ней и вса́дниковъ:
10
и҆ нн҃ѣ є҆да̀ без̾ гдⷭ҇а прїидо́хомъ на странꙋ̀ сїю̀, воева́ти на ню̀; гдⷭ҇ь речѐ ко мнѣ̀: взы́ди на зе́млю сїю̀ и҆ погꙋбѝ ю҆̀.
10
и ны́нѣ єда́ безъ Го́спода пріидо́хомъ на страну́ сію́, воєва́ти на ню́? Госпо́дь рече́ ко мнѣ́: взы́ди на зе́млю сію́ и погуби́ ю́.
11
И҆ речѐ къ немꙋ̀ є҆лїакі́мъ и҆ сомна́съ книго́чїй и҆ і҆ѡа́хъ: глаго́ли къ рабѡ́мъ твои̑мъ сѵ́рски, разꙋмѣ́емъ бо мы̀, а҆ не глаго́ли къ на́мъ і҆ꙋде́йски: и҆ вскꙋ́ю глаго́леши во оу҆́шы человѣ́кѡмъ сѣдѧ́щымъ на стѣнѣ̀;
11
И рече́ къ нему́ Єліакі́мъ и сомна́съ книго́чій и Іоа́хъ: глаго́ли къ рабо́мъ твои́мъ Си́рски, разумѣ́ємъ бо мы́, а не глаго́ли къ на́мъ Іуде́йски: и вску́ю глаго́леши во у́шы человѣ́комъ сѣдя́щымъ на стѣнѣ́?
12
И҆ речѐ къ ни̑мъ раѱа́къ: є҆да̀ ко господи́нꙋ ва́шемꙋ, и҆лѝ къ ва́мъ посла́ мѧ господи́нъ мо́й глаго́лати словеса̀ сїѧ̑; не къ человѣ́кѡмъ ли сѣдѧ́щымъ на ѡ҆гра́дѣ, да ꙗ҆дѧ́тъ моты̑ла и҆ пїю́тъ мо́чь съ ва́ми вкꙋ́пѣ;
12
И рече́ къ ни́мъ рапса́къ: єда́ ко господи́ну ва́шему, или́ къ ва́мъ посла́ мя господи́нъ мо́й глаго́лати словеса́ сія́? не къ человѣ́комъ ли сѣдя́щымъ на огра́дѣ, да ядя́тъ моты́ла и пію́тъ мо́чь съ ва́ми вку́пѣ?
13
И҆ ста̀ раѱа́къ, и҆ возопѝ гла́сомъ ве́лїимъ і҆ꙋде́йски и҆ речѐ: слы́шите словеса̀ царѧ̀ вели́кагѡ, царѧ̀ а҆ссѷрі́йска:
13
И ста́ рапса́къ, и возопи́ гла́сомъ ве́ліимъ Іуде́йски и рече́: слы́шите словеса́ царя́ вели́каго, царя́ Ассирі́йска:
14
сїѧ̑ глаго́летъ ца́рь: да не прельща́етъ ва́съ є҆зекі́а словесы̀, не мо́жетъ и҆зба́вити ва́съ:
14
сія́ глаго́летъ ца́рь: да не прельща́єтъ ва́съ єзекі́а словесы́, не мо́жетъ изба́вити ва́съ:
15
и҆ да не глаго́летъ ва́мъ є҆зекі́а, ꙗ҆́кѡ и҆зба́витъ вы̀ бг҃ъ, и҆ не преда́стсѧ гра́дъ се́й въ рꙋ́цѣ царѧ̀ а҆ссѷрі́йска:
15
и да не глаго́летъ ва́мъ єзекі́а, я́ко изба́витъ вы́ Бо́гъ, и не преда́стся гра́дъ се́й въ ру́цѣ царя́ Ассирі́йска:
16
не слꙋ́шайте є҆зекі́и: сїѧ̑ глаго́летъ ца́рь а҆ссѷрі́йскїй: а҆́ще хо́щете благослове́ни бы́ти, и҆зыди́те ко мнѣ̀ и҆ ꙗ҆ди́те кі́йждо вїногра́дъ сво́й и҆ смѡ́кви, и҆ пі́йте ѿ пото́ка ва́шегѡ,
16
не слу́шайте єзекі́и: сія́ глаго́летъ ца́рь Ассирі́йскій: а́ще хо́щете благослове́ни бы́ти, изыди́те ко мнѣ́ и яди́те кі́йждо віногра́дъ сво́й и смо́кви, и пі́йте от пото́ка ва́шего,
17
до́ндеже прїидꙋ̀ и҆ поимꙋ̀ вы̀ въ зе́млю, ꙗ҆́же а҆́ки ва́ша землѧ̀, землѧ̀ пшени́цы и҆ вїна̀ и҆ хлѣ́бѡвъ и҆ вїногра́дѡвъ:
17
до́ндеже пріиду́ и поиму́ вы́ въ зе́млю, я́же а́ки ва́ша земля́, земля́ пшени́цы и віна́ и хлѣ́бовъ и віногра́довъ:
18
да не прельща́етъ ва́съ є҆зекі́а, глаго́лѧ: бг҃ъ ва́шъ и҆зба́витъ вы̀: є҆да̀ и҆зба́виша бо́зи ꙗ҆зы́честїи, кі́йждо странꙋ̀ свою̀ ѿ рꙋкѝ царѧ̀ а҆ссѷрі́йска;
18
да не прельща́єтъ ва́съ єзекі́а, глаго́ля: Бо́гъ ва́шъ изба́витъ вы́: єда́ изба́виша бо́зи язы́честіи, кі́йждо страну́ свою́ от руки́ царя́ Ассирі́йска?
19
гдѣ̀ є҆́сть бо́гъ є҆ма́ѳовъ и҆ а҆рфа́ѳовъ; и҆ гдѣ̀ бо́гъ гра́да сепфарі́ма; є҆да̀ возмого́ша и҆зба́вити самарі́ю ѿ рꙋкѝ моеѧ̀;
19
гдѣ́ є́сть бо́гъ Єма́ѳовъ и Арфа́ѳовъ? и гдѣ́ бо́гъ гра́да Сепфарі́ма? єда́ возмого́ша изба́вити самарі́ю от руки́ моєя́?
20
кто̀ ѿ богѡ́въ всѣ́хъ ꙗ҆зы́кѡвъ си́хъ, и҆́же и҆зба́ви зе́млю свою̀ ѿ рꙋкѝ моеѧ̀, ꙗ҆́кѡ и҆зба́витъ бг҃ъ і҆ерⷭ҇ли́ма ѿ рꙋкѝ моеѧ̀;
20
кто́ от бого́въ всѣ́хъ язы́ковъ си́хъ, и́же изба́ви зе́млю свою́ от руки́ моєя́, я́ко изба́витъ Бо́гъ Ієрусали́ма от руки́ моєя́?
21
И҆ оу҆молко́ша, и҆ никто́же ѿвѣща̀ є҆мꙋ̀ словесѐ, повелѣ́нїѧ ра́ди царе́ва, да никто́же ѿвѣща́етъ.
21
И умолко́ша, и никто́же отвѣща́ єму́ словесе́, повелѣ́нія ра́ди царе́ва, да никто́же отвѣща́єтъ.
22
И҆ вни́де є҆лїакі́мъ сы́нъ хелкі́евъ домострои́тель, и҆ сомна́съ книго́чїй си́лы, и҆ і҆ѡа́хъ сы́нъ а҆са́фовъ памѧтопи́сецъ ко є҆зекі́и въ расте́рзаныхъ ри́захъ и҆ повѣ́даша є҆мꙋ̀ словеса̀ раѱа́кѡва.
22
И вни́де Єліакі́мъ сы́нъ хелкі́євъ домострои́тель, и сомна́съ книго́чій си́лы, и Іоа́хъ сы́нъ Аса́фовъ памятопи́сецъ ко єзекі́и въ расте́рзаныхъ ри́захъ и повѣ́даша єму́ словеса́ рапса́кова.