¹

Въ то̀ вре́мѧ посла̀ мерода́хъ валада́нъ сы́нъ валада́новъ, ца́рь вавѷлѡ́нскїй, писа̑нїѧ и҆ послы̀ и҆ да́ры є҆зекі́и: слы́ша бо, ꙗ҆́кѡ болѣ́лъ є҆́сть до сме́рти и҆ воста̀.

¹

Въ то́ вре́мя посла́ мерода́хъ Валада́нъ сы́нъ Валада́новъ, ца́рь Вавило́нскій, писа́нія и послы́ и да́ры єзекі́и: слы́ша бо, я́ко болѣ́лъ є́сть до сме́рти и воста́.

²

И҆ ѡ҆бра́довасѧ ѡ҆ ни́хъ є҆зекі́а ра́достїю вели́кою, и҆ показа̀ и҆̀мъ до́мъ а҆рѡма́тѡвъ и҆ мѵ́ра, и҆ ста́кти и҆ ѳѷмїа́ма, и҆ сребра̀ и҆ зла́та, и҆ всѧ̑ до́мы сосꙋ́дѡвъ сокро́вищныхъ, и҆ всѧ̑ є҆ли̑ка бѧ́хꙋ во сокро́вищихъ є҆гѡ̀: и҆ не ѡ҆ста̀ ничто́же, є҆гѡ́же не показа̀ и҆̀мъ є҆зекі́а въ домꙋ̀ свое́мъ и҆ во все́й ѡ҆́бласти свое́й.

²

И обра́довася о ни́хъ єзекі́а ра́достію вели́кою, и показа́ и́мъ до́мъ арома́товъ и ми́ра, и ста́кти и ѳиміа́ма, и сребра́ и зла́та, и вся́ до́мы сосу́довъ сокро́вищныхъ, и вся́ єли́ка бя́ху во сокро́вищихъ єго́: и не оста́ ничто́же, єго́же не показа́ и́мъ єзекі́а въ дому́ своє́мъ и во все́й о́бласти своє́й.

³

И҆ прїи́де и҆са́їа прⷪ҇ро́къ ко є҆зекі́и царю̀ и҆ речѐ къ немꙋ̀: что̀ глаго́лютъ сі́и мꙋ́жїе, и҆ ѿкꙋ́дꙋ прїидо́ша къ тебѣ̀; И҆ речѐ є҆зекі́а: ѿ землѝ дале́кїѧ прїидо́ша ко мнѣ̀, ѿ вавѷлѡ́на.

³

И пріи́де Иса́іа проро́къ ко єзекі́и царю́ и рече́ къ нему́: что́ глаго́лютъ сі́и му́жіє, и отку́ду пріидо́ша къ тебѣ́? И рече́ єзекі́а: от земли́ дале́кія пріидо́ша ко мнѣ́, от Вавило́на.

⁴

И҆ речѐ и҆са́їа: что̀ ви́дѣша въ домꙋ̀ твое́мъ; И҆ речѐ є҆зекі́а: всѧ̑, є҆ли̑ка въ домꙋ̀ мое́мъ, ви́дѣша, и҆ нѣ́сть въ домꙋ̀ мое́мъ, є҆гѡ́же бы не ви́дѣли, но и҆ ꙗ҆̀же въ сокро́вищихъ мои́хъ.

⁴

И рече́ Иса́іа: что́ ви́дѣша въ дому́ твоє́мъ? И рече́ єзекі́а: вся́, єли́ка въ дому́ моє́мъ, ви́дѣша, и нѣ́сть въ дому́ моє́мъ, єго́же бы не ви́дѣли, но и я́же въ сокро́вищихъ мои́хъ.

⁵

И҆ речѐ є҆мꙋ̀ и҆са́їа: послꙋ́шай словесѐ гдⷭ҇а саваѡ́ѳа:

⁵

И рече́ єму́ Иса́іа: послу́шай словесе́ Го́спода Савао́ѳа:

⁶

сѐ, дні́е грѧдꙋ́тъ, гл҃етъ гдⷭ҇ь, и҆ во́змꙋтъ всѧ̑, ꙗ҆̀же въ домꙋ̀ твое́мъ, и҆ є҆ли̑ка собра́ша ѻ҆тцы̀ твоѝ да́же до днѐ сегѡ̀, въ вавѷлѡ́нъ пре́йдꙋтъ, и҆ ничесо́же ѡ҆ста́вѧтъ:

⁶

се́, дні́є гряду́тъ, глаго́летъ Госпо́дь, и во́змутъ вся́, я́же въ дому́ твоє́мъ, и єли́ка собра́ша отцы́ твои́ да́же до дне́ сего́, въ Вавило́нъ пре́йдутъ, и ничесо́же оста́вятъ:

⁷

речѐ гдⷭ҇ь, ꙗ҆́кѡ и҆ ѿ ча̑дъ твои́хъ, и҆̀хже роди́лъ є҆сѝ, по́ймꙋтъ и҆ сотворѧ́тъ ка́женики въ домꙋ̀ царѧ̀ вавѷлѡ́нска.

⁷

рече́ Госпо́дь, я́ко и от ча́дъ твои́хъ, и́хже роди́лъ єси́, по́ймутъ и сотворя́тъ ка́женики въ дому́ царя́ Вавило́нска.

⁸

И҆ речѐ є҆зекі́а ко и҆са́їи: бл҃го сло́во гдⷭ҇не, є҆́же гл҃а: да бꙋ́детъ нн҃ѣ ми́ръ и҆ пра́вда во дни̑ моѧ̑.

⁸

И рече́ єзекі́а ко Иса́іи: благо сло́во Госпо́дне, є́же глаго́ла: да бу́детъ ны́нѣ ми́ръ и пра́вда во дни́ моя́.