Друк брошурою Виконується верстка сторінок…
Папір A4, альбомна орієнтація, поля «Немає», без колонтитулів. Друкуйте двосторонньо, з переворотом по короткому краю, у масштабі 100%; якщо принтер обрізає край — 98%. Не вмикайте режим «Буклет» у драйвері принтера.
1
И҆ оу҆слы́шаша сы́нове і҆и҃лєвы живꙋ́щїи во і҆ꙋде́и всѧ̑, є҆ли̑ка сотворѝ ѻ҆лофе́рнъ ꙗ҆зы́кѡмъ, вождонача́лникъ навꙋходоно́сора царѧ̀ а҆ссѷрі́йскагѡ, и҆ и҆́мже ѡ҆́бразомъ расхи́ти всѧ̑ свѧщє́ннаѧ и҆́хъ и҆ дадѐ сїѧ̑ во и҆стребле́нїе:
1
И услы́шаша сы́нове Ізра́илевы живу́щіи во Іуде́и вся́, єли́ка сотвори́ Олофе́рнъ язы́комъ, вождонача́лникъ Навуходоно́сора царя́ Ассирі́йскаго, и и́мже о́бразомъ расхи́ти вся́ свяще́нная и́хъ и даде́ сія́ во истребле́ніє:
2
и҆ оу҆боѧ́шасѧ ѕѣлѡ̀ ѿ лица̀ є҆гѡ̀, и҆ ѡ҆ і҆ерли́мѣ и҆ ѡ҆ хра́мѣ гдⷭ҇а бг҃а своегѡ̀ смѧто́шасѧ,
2
и убоя́шася зѣло́ от лица́ єго́, и о ієрусали́мѣ и о хра́мѣ Го́спода Бо́га своєго́ смято́шася,
3
поне́же неда́внѡ и҆зыдо́ша ѿ плѣне́нїѧ и҆ неда́внѡ всѝ лю́дїе совра́шасѧ і҆ꙋде́йстїи, и҆ сосꙋ́ди и҆ ѻ҆лта́рь и҆ до́мъ ѿ ѡ҆скверне́нїѧ ѡ҆свѧщє́на бы́ша.
3
поне́же неда́вно изыдо́ша от плѣне́нія и неда́вно вси́ лю́діє собра́шася Іуде́йстіи, и сосу́ди и олта́рь и до́мъ от оскверне́нія освяще́на бы́ша.
4
И҆ посла́ша во всѧ́кїй предѣ́лъ самарі́и и҆ кѡні́и, и҆ веѳѡрѡ́на и҆ велме́на и҆ і҆ерїхѡ́на, и҆ въ хѡвꙋ̀ и҆ є҆сѡ́рꙋ и҆ во ю҆до́ль сали́мскꙋю,
4
И посла́ша во вся́кій предѣ́лъ самарі́и и коні́и, и веѳоро́на и велме́на и ієріхо́на, и въ хову́ и єсо́ру и во юдо́ль Сали́мскую,
5
и҆ предпрїѧ́ша всѧ̑ верхѝ го́ръ высо́кихъ, и҆ ѡ҆гради́ша стѣна́ми сꙋ́щыѧ въ ни́хъ се́ла, и҆ ѿложи́ша на пи́щꙋ ко приꙋготовле́нїю бра́ни, ꙗ҆́кѡ неда́внѡ бы́ша полѧ̀ и҆́хъ пожа̑та.
5
и предпрія́ша вся́ верхи́ го́ръ высо́кихъ, и огради́ша стѣна́ми су́щыя въ ни́хъ се́ла, и отложи́ша на пи́щу ко приуготовле́нію бра́ни, я́ко неда́вно бы́ша поля́ и́хъ пожа́та.
6
И҆ писа̀ і҆ѡакі́мъ і҆ере́й вели́кїй, и҆́же бѣ̀ во дне́хъ ѻ҆́нѣхъ во і҆ерⷭ҇ли́мѣ, живꙋ́щымъ во ветѷлꙋ́и и҆ ветомесѳе́мѣ, и҆́же є҆́сть проти́вꙋ є҆сдрилѡ́иа, на лицы̀ по́лѧ сꙋ́щагѡ бли́з̾ дѡѳаі́ма,
6
И писа́ Іоакі́мъ ієре́й вели́кій, и́же бѣ́ во дне́хъ о́нѣхъ во Ієрусали́мѣ, живу́щымъ во ветилу́и и ветомесѳе́мѣ, и́же є́сть проти́ву єсдрило́на, на лицы́ по́ля су́щаго бли́зъ Доѳаі́ма,
7
глаго́лѧ ѡ҆держа́ти восхо́ды го́рнїѧ, и҆́бо и҆́ми бѣ̀ вхо́дъ во і҆ꙋде́ю, и҆ бѣ̀ оу҆до́бно возбранѧ́ти и҆̀хъ приходѧ́щихъ, тѣ́снꙋ прохо́дꙋ сꙋ́шꙋ, ꙗ҆́кѡ всѣ̑мъ мꙋжє́мъ по два̀ (проитѝ).
7
глаго́ля одержа́ти восхо́ды го́рнія, и́бо и́ми бѣ́ вхо́дъ во Іуде́ю, и бѣ́ удо́бно возбраня́ти и́хъ приходя́щихъ, тѣ́сну прохо́ду су́щу, я́ко всѣ́мъ муже́мъ по два́ [проити́].
8
И҆ сотвори́ша сы́нове і҆и҃лєвы, ꙗ҆́коже повелѣ̀ и҆̀мъ і҆ѡакі́мъ і҆ере́й вели́кїй и҆ старѣ́йшинство всегѡ̀ со́нма і҆и҃лева, и҆̀же сѣдѧ́хꙋ во і҆ерⷭ҇ли́мѣ.
8
И сотвори́ша сы́нове Ізра́илевы, я́коже повелѣ́ и́мъ Іоакі́мъ ієре́й вели́кій и старѣ́йшинство всего́ со́нма Ізра́илева, и́же сѣдя́ху во Ієрусали́мѣ.
9
И҆ возопи́ша всѧ́кїй мꙋ́жъ і҆и҃левъ къ бг҃ꙋ съ прилѣжа́нїемъ вели́кимъ и҆ смири́ша дꙋ́шы своѧ̑ въ прилѣжа́нїи вели́цѣмъ:
9
И возопи́ша вся́кій му́жъ Ізра́илевъ къ Бо́гу съ прилѣжа́ніємъ вели́кимъ и смири́ша ду́шы своя́ въ прилѣжа́ніи вели́цѣмъ:
10
са́ми и҆ жєны̀ и҆́хъ и҆ младе́нецы и҆́хъ, и҆ ско́ти и҆́хъ, и҆ всѧ́кїй пришле́цъ и҆ нае́мникъ, и҆ сребро́мъ кꙋ́пленый и҆́хъ, возложи́ша вре́тища на чрє́сла своѧ̑.
10
са́ми и жены́ и́хъ и младе́нцы и́хъ, и ско́ти и́хъ, и вся́кій пришле́цъ и нає́мникъ, и сребро́мъ ку́пленый и́хъ, возложи́ша вре́тища на чре́сла своя́.
11
И҆ всѧ́кїй мꙋ́жъ і҆и҃левъ и҆ жена̀, и҆ дѣ́ти, и҆ жнвꙋ́щїи во і̑ерⷭ҇ли́мѣ падо́ша пред̾ лице́мъ хра́ма, и҆ посы́паша пе́рстїю главы̑ своѧ̑, и҆ простро́ша врє́тища своѧ̑ пред̾ лице́мъ гдⷭ҇нимъ,
11
И вся́кій му́жъ Ізра́илевъ и жена́, и дѣ́ти, и живу́щіи во і́єрусали́мѣ падо́ша предъ лице́мъ хра́ма, и посы́паша пе́рстію главы́ своя́, и простро́ша вре́тища своя́ предъ лице́мъ Госпо́днимъ,
12
и҆ ѻ҆лта́рь вре́тищемъ ѡ҆дѣ́ѧша, и҆ возопи́ша къ бг҃ꙋ і҆и҃левꙋ є҆динодꙋ́шнѡ прилѣ́жнѡ, є҆́же не да́ти въ расхище́нїе младе́нцєвъ и҆́хъ, и҆ же́нъ въ плѣне́нїе, и҆ градѡ́въ наслѣ́дїѧ и҆́хъ въ разоре́нїе, и҆ ст҃а̑ѧ во ѡ҆скверне́нїе и҆ поноше́нїе, ѡ҆бра́дованїе ꙗ҆зы́кѡмъ.
12
и олта́рь вре́тищемъ одѣ́яша, и возопи́ша къ Бо́гу Ізра́илеву єдиноду́шно прилѣ́жно, є́же не да́ти въ расхище́ніє младе́нцевъ и́хъ, и же́нъ въ плѣне́ніє, и градо́въ наслѣ́дія и́хъ въ разоре́ніє, и свята́я во оскверне́ніє и поноше́ніє, обра́дованіє язы́комъ.
13
И҆ оу҆слы́ша гдⷭ҇ь гла́съ и҆́хъ и҆ призрѣ̀ на ско́рбь и҆́хъ. И҆ бѧ́хꙋ лю́дїе постѧ́щесѧ дни̑ мнѡ́ги во все́й і҆ꙋде́и и҆ і҆ерⷭ҇ли́мѣ, пред̾ лице́мъ ст҃ы́хъ гдⷭ҇а вседержи́телѧ.
13
И услы́ша Госпо́дь гла́съ и́хъ и призрѣ́ на ско́рбь и́хъ. И бя́ху лю́діє постя́щеся дни́ мно́ги во все́й Іуде́и и Ієрусали́мѣ, предъ лице́мъ святы́хъ Го́спода Вседержи́теля.
14
И҆ і҆ѡакі́мъ і҆ере́й вели́кїй, и҆ всѝ предстоѧ́щїи пред̾ гдⷭ҇емъ, і҆ере́є и҆ слꙋжа́щїи гдⷭ҇еви, вре́тищами преиоѧ́сани ѡ҆ чре́слѣхъ свои́хъ, приноша́хꙋ всесожже́нїе непреста́нное и҆ ѡ҆бѣ́ты и҆ произвѡ́льнаѧ даѧ̑нїѧ люді́й:
14
И Іоакі́мъ ієре́й вели́кій, и вси́ предстоя́щіи предъ Го́сподемъ, ієре́є и служа́щіи Го́сподеви, вре́тищами препоя́сани о чре́слѣхъ свои́хъ, приноша́ху всесожже́ніє непреста́нноє и обѣ́ты и произво́льная дая́нія люді́й:
15
и҆ бѣ̀ пе́пелъ на кїда́рѣхъ и҆́хъ, и҆ вопїѧ́хꙋ ко гдⷭ҇ꙋ ѿ всеѧ̀ си́лы, да посѣти́тъ во бл҃го ве́сь до́мъ і҆и҃левъ.
15
и бѣ́ пе́пелъ на кіда́рѣхъ и́хъ, и вопія́ху ко Го́споду от всея́ си́лы, да посѣти́тъ во благо ве́сь до́мъ Ізра́илевъ.