Звичайний друк Виконується верстка сторінок…
Папір A4, книжкова орієнтація, поля «Немає», без колонтитулів, масштаб 100%. Сторінки йдуть підряд. Для двостороннього друку виберіть переворот по довгому краю.
1
Бѣ́гаетъ нечести́вый ни є҆ди́номꙋ же гонѧ́щꙋ, првⷣный же ꙗ҆́кѡ ле́въ оу҆пова́ѧ.
1
Бѣ́гаєтъ нечести́вый ни єди́ному же гоня́щу, пра́ведный же я́ко ле́въ упова́я.
2
За грѣхѝ нечести́выхъ сꙋ́дове востаю́тъ: мꙋ́жъ же хи́трый оу҆гаси́тъ ѧ҆̀.
2
За грѣхи́ нечести́выхъ су́дове востаю́тъ: му́жъ же хи́трый угаси́тъ я́.
3
Проде́рзый въ нече́стїихъ ѡ҆клевета́етъ ни́щыѧ, ꙗ҆́коже до́ждь си́льный не поле́зенъ:
3
Проде́рзый въ нече́стіихъ оклевета́єтъ ни́щыя, я́коже до́ждь си́льный не поле́зенъ:
4
та́кѡ ѡ҆ста́вившїи зако́нъ хва́лѧтъ нече́стїе, лю́бѧщїи же зако́нъ ѡ҆гражда́ютъ себѣ̀ стѣ́нꙋ.
4
та́ко оста́вившіи зако́нъ хва́лятъ нече́стіє, лю́бящіи же зако́нъ огражда́ютъ себѣ́ стѣ́ну.
5
Мꙋ́жїе ѕлі́и не оу҆разꙋмѣ́ютъ сꙋда̀, и҆́щꙋщїи же гдⷭ҇а оу҆разꙋмѣ́ютъ ѡ҆ все́мъ.
5
Му́жіє злі́и не уразумѣ́ютъ суда́, и́щущіи же Го́спода уразумѣ́ютъ о все́мъ.
6
Лꙋ́чше ни́щь ходѧ́й во и҆́стинѣ, не́жели бога́тъ ло́жь.
6
Лу́чше ни́щь ходя́й во и́стинѣ, не́жели бога́тъ ло́жь.
7
Храни́тъ зако́нъ сы́нъ разꙋ́мный: а҆ и҆́же пасе́тъ несы́тость, безче́ститъ ѻ҆тца̀ своего̀.
7
Храни́тъ зако́нъ сы́нъ разу́мный: а и́же пасе́тъ несы́тость, безче́ститъ отца́ своєго́.
8
Оу҆множа́ѧй бога́тство своѐ съ ли́хвами и҆ прибы̑тки ми́лꙋющемꙋ ни́щыѧ собира́етъ є҆̀.
8
Умножа́яй бога́тство своє́ съ ли́хвами и прибы́тки ми́лующему ни́щыя собира́єтъ є́.
9
Оу҆кланѧ́ѧй оу҆́хо своѐ не послꙋ́шати зако́на и҆ са́мъ моли́твꙋ свою̀ ѡ҆мерзи́лъ.
9
Укланя́яй у́хо своє́ не послу́шати зако́на и са́мъ моли́тву свою́ омерзи́лъ.
10
И҆́же льсти́тъ пра̑выѧ на пꙋтѝ ѕлѣ́мъ, во и҆стлѣ́нїе са́мъ впаде́тъ: беззако́ннїи же минꙋ́ютъ блага̑ѧ и҆ не вни́дꙋтъ въ нѧ̀.
10
И́же льсти́тъ пра́выя на пути́ злѣ́мъ, во истлѣ́ніє са́мъ впаде́тъ: беззако́нніи же мину́ютъ блага́я и не вни́дутъ въ ня́.
11
Премꙋ́дръ оу҆ себє̀ мꙋ́жъ бога́тый, оу҆бо́гїй же разꙋми́въ пре́зритъ є҆го̀.
11
Прему́дръ у себе́ му́жъ бога́тый, убо́гій же разуми́въ пре́зритъ єго́.
12
По́мощїю првⷣныхъ мно́га быва́етъ сла́ва, на мѣ́стѣхъ же нечести́выхъ погиба́ютъ человѣ́цы.
12
По́мощію пра́ведныхъ мно́га быва́єтъ сла́ва, на мѣ́стѣхъ же нечести́выхъ погиба́ютъ человѣ́цы.
13
Покрыва́ѧй нече́стїе своѐ не оу҆спѣ́етъ во блага̑ѧ, повѣ́даѧ же ѡ҆бличє́нїѧ возлю́бленъ бꙋ́детъ.
13
Покрыва́яй нече́стіє своє́ не успѣ́єтъ во блага́я, повѣ́дая же обличе́нія возлю́бленъ бу́детъ.
14
Блаже́нъ мꙋ́жъ, и҆́же бои́тсѧ всѣ́хъ за благоговѣ́нїе, а҆ жестосе́рдый впа́даетъ во ѕла̑ѧ.
14
Блаже́нъ му́жъ, и́же бои́тся всѣ́хъ за благоговѣ́ніє, а жестосе́рдый впа́даєтъ во зла́я.
15
Ле́въ а҆́лченъ и҆ во́лкъ жа́жденъ, и҆́же тѷра́нствꙋетъ [мꙋчи́тельски ѡ҆блада́етъ], ни́щь сы́й, над̾ ꙗ҆зы́комъ оу҆бо́гимъ.
15
Ле́въ а́лченъ и во́лкъ жа́жденъ, и́же тира́нствуєтъ {мучи́тельски облада́єтъ}, ни́щь сы́й, надъ язы́комъ убо́гимъ.
16
Ца́рь скꙋ́денъ оу҆ро́комъ вели́къ клеветни́къ (быва́етъ), а҆ ненави́дѧй непра̑вды до́лгѡ лѣ́тъ поживе́тъ.
16
Ца́рь ску́денъ уро́комъ вели́къ клеветни́къ [быва́єтъ], а ненави́дяй непра́вды до́лго лѣ́тъ поживе́тъ.
17
Мꙋ́жа, и҆́же въ винѣ̀ сме́ртнѣ, вырꙋча́ѧй бѣгле́цъ бꙋ́детъ, а҆ не оу҆твержде́нъ. Наказꙋ́й сы́на, и҆ возлю́битъ тѧ̀ и҆ да́стъ лѣ́потꙋ твое́й дꙋшѝ, не послꙋ́шаетъ ꙗ҆зы́ка законопрестꙋ́пна.
17
Му́жа, и́же въ винѣ́ сме́ртнѣ, выруча́яй бѣгле́цъ бу́детъ, а не утвержде́нъ. Наказу́й сы́на, и возлю́битъ тя́ и да́стъ лѣ́поту твоє́й души́, не послу́шаєтъ язы́ка законопресту́пна.
18
Ходѧ́й пра́веднѡ по́мощь прїи́метъ, ходѧ́й же въ стро́пѡтны пꙋти̑ оу҆вѧ́знетъ.
18
Ходя́й пра́ведно по́мощь пріи́метъ, ходя́й же въ стро́потны пути́ увя́знетъ.
19
Дѣ́лаѧй свою̀ зе́млю насы́титсѧ хлѣ́бѡвъ, гонѧ́й же пра́здность насы́титсѧ нищеты̀.
19
Дѣ́лаяй свою́ зе́млю насы́тится хлѣ́бовъ, гоня́й же пра́здность насы́тится нищеты́.
20
Мꙋ́жъ вѣ́ры досто́йный мно́гѡ благослови́тсѧ, ѕлы́й же не без̾ мꙋче́нїѧ бꙋ́детъ.
20
Му́жъ вѣ́ры досто́йный мно́го благослови́тся, злы́й же не безъ муче́нія бу́детъ.
21
И҆́же не срамлѧ́етсѧ лица̀ првⷣныхъ, не бла́гъ: таковы́й за оу҆крꙋ́хъ хлѣ́ба прода́стъ мꙋ́жа.
21
И́же не срамля́єтся лица́ пра́ведныхъ, не бла́гъ: таковы́й за укру́хъ хлѣ́ба прода́стъ му́жа.
22
Тщи́тсѧ ѡ҆богати́тисѧ мꙋ́жъ зави́дливъ, и҆ не вѣ́сть, ꙗ҆́кѡ ми́лостивый воз̾ѡблада́етъ и҆́мъ.
22
Тщи́тся обогати́тися му́жъ зави́дливъ, и не вѣ́сть, я́ко ми́лостивый возоблада́єтъ и́мъ.
23
Ѡ҆блича́ѧй человѣ́чы пꙋти̑ благода́ть и҆́мать па́че ѧ҆зы́комъ ласка́ющагѡ.
23
Облича́яй человѣ́чы пути́ благода́ть и́мать па́че язы́комъ ласка́ющаго.
24
И҆́же ѿверга́етъ ѻ҆тца̀ и҆лѝ ма́терь и҆ мни́тсѧ не согрѣша́ти, се́й соприча́стникъ є҆́сть мꙋ́жꙋ нечести́вꙋ.
24
И́же отверга́єтъ отца́ или́ ма́терь и мни́тся не согрѣша́ти, се́й соприча́стникъ є́сть му́жу нечести́ву.
25
Невѣ́рный мꙋ́жъ сꙋ́дитъ тꙋ́не, а҆ и҆́же надѣ́етсѧ на гдⷭ҇а, въ прилѣжа́нїи бꙋ́детъ.
25
Невѣ́рный му́жъ су́дитъ ту́не, а и́же надѣ́єтся на Го́спода, въ прилѣжа́ніи бу́детъ.
26
И҆́же надѣ́етсѧ на де́рзо се́рдце, таковы́й безꙋ́менъ: а҆ и҆́же хо́дитъ въ премꙋ́дрости, спасе́тсѧ.
26
И́же надѣ́єтся на де́рзо се́рдце, таковы́й безу́менъ: а и́же хо́дитъ въ прему́дрости, спасе́тся.
27
И҆́же дае́тъ оу҆бѡ́гимъ, не ѡ҆скꙋдѣ́етъ: а҆ и҆́же ѿвраща́етъ ѻ҆́ко своѐ, въ скꙋ́дости бꙋ́детъ мно́зѣ.
27
И́же дає́тъ убо́гимъ, не оскудѣ́єтъ: а и́же отвраща́єтъ о́ко своє́, въ ску́дости бу́детъ мно́зѣ.
28
На мѣ́стѣхъ нечести́выхъ стенѧ́тъ првⷣнїи, въ поги́бели же и҆́хъ оу҆мно́жатсѧ првⷣнїи.
28
На мѣ́стѣхъ нечести́выхъ стеня́тъ пра́ведніи, въ поги́бели же и́хъ умно́жатся пра́ведніи.