Після благословення священника промовляємо: Амі́нь.
Сла́ва Тебі́, Бо́же наш, сла́ва Тебі́.
Царю́ Небе́сний, Уті́шителю, Ду́ше і́стини, І́же везді́ сий і вся ісполня́яй, Сокро́вище благи́х і жи́зні Пода́телю, прийди́ і всели́ся в ни, і очи́сти ни от вся́кия скве́рни, і спаси́, Бла́же, ду́ші на́ша.
Святи́й Бо́же, Святи́й Крі́пкий, Святи́й Безсме́ртний, поми́луй нас. [Тричі]
Cла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.
Пресвята́я Тро́йце, поми́луй нас: Го́споди, очи́сти гріхи́ на́ша; Влади́ко, прости́ беззако́нія на́ша; Святи́й, посіти́ і ісціли́ не́мощі на́ша і́мене Твоєго́ ра́ди.
Го́споди, поми́луй, тричі. Сла́ва, і ни́ні:
О́тче наш, і́же єси́ на Небесі́х, да святи́ться і́м'я Твоє́, да при́йдеть Ца́рствіє Твоє́, да бу́деть во́ля Твоя́, я́ко на Небесі́ і на землі́. Хліб наш насу́щний даждь нам днесь, і оста́ви нам до́лги на́ша, я́коже і ми оставля́єм должнико́м на́шим; і не введи́ нас во іскуше́ніє, но ізба́ви нас от лука́ваго.
Священник: Я́ко Твоє́ єсть Ца́рство:
І ми: Амі́нь. Потім, Го́споди, поми́луй, 12 разів. Сла́ва, і ни́ні:
Прийді́те, поклоні́мся Царе́ві на́шему Бо́гу.
Прийді́те, поклоні́мся і припаде́м Христу́, Царе́ві на́шему Бо́гу.
Прийді́те, поклоні́мся і припаде́м Самому́ Христу́, Царе́ві і Бо́гу на́шему.
Потім псалми:
Усли́ши Го́споди, пра́вду мою́, воньми́ моле́нію моєму́, внуши́ моли́тву мою́ не во устна́х льсти́вих. От лиця́ Твоєго́ судьба́ моя́ ізи́деть, о́чі мої́ да ви́дита правоти́. Іскуси́л єси́ се́рдце моє́, посіти́л єси́ но́щію, іскуси́л м'я єси́, і не обрі́теся во мні непра́вда. Я́ко да не возглаго́лють уста́ моя́ діл челові́чеських, за словеса́ усте́н Твої́х, аз сохрани́х путі́ же́стокі. Соверши́ стопи́ моя́ во стезя́х Твої́х, да не подви́жуться стопи́ моя́. Аз воззва́х, я́ко усли́шал м'я єси́, Бо́же, приклони́ у́хо Твоє́ мні, і усли́ши глаго́ли моя́. Удиви́ ми́лості Твоя́, спаса́яй упова́ющия на Тя от проти́в'ящихся десни́ці Твоє́й; сохрани́ м'я, Го́споди, я́ко зі́ницю о́ка; в кро́ві крилу́ Твоє́ю покри́єши м'я, от лиця́ нечести́вих остра́стших м'я. Вразі́ мої́ ду́шу мою́ одержа́ша, тук свой затвори́ша; уста́ їх глаго́лаша горди́ню. Ізгоня́щії м'я ни́ні обидо́ша м'я, о́чі свої́ возложи́ша уклони́ти на зе́млю. Об'я́ша м'я, я́ко лев гото́в на лов, і я́ко ски́мен обита́яй в та́йних. Воскресни́, Го́споди, предвари́ я і запни́ їм; ізба́ви ду́шу мою́ от нечести́ваго, ору́жіє Твоє́ от враг руки́ Твоєя́. Го́споди, от ма́лих от землі́, разділи́ я в животі́ їх, і сокрове́нних Твої́х іспо́лнися чре́во їх. Наси́тишася сино́в, і оста́виша оста́нки младе́нцем свої́м. Аз же пра́вдою явлю́ся лицю́ Твоєму́, наси́щуся, внегда́ яви́ти мі ся сла́ві Твоє́й.
К Тебі́ Го́споди, воздвиго́х ду́шу мою́. Бо́же мой, на Тя упова́х, да не постижу́ся во вік, ніже́ да посмію́ть мі ся вразі́ мої́; і́бо всі терп'я́щії Тя не постидя́ться. Да постидя́ться беззако́ннующії вотще́. Путі́ Твоя́, Го́споди, скажи́ мі і стезя́м Твої́м научи́ м'я. Наста́ви м'я на і́стину Твою́ і научи́ м'я; я́ко Ти єси́ Бог Спас мой, і Тебе́ терпі́х весь день. Пом'яни́ щедро́ти Твоя́, Го́споди, і ми́лості Твоя́, я́ко от ві́ка суть. Гріх ю́ности моєя́ і неві́дінія моєго́ не пом'яни́; по ми́лості Твоє́й пом'яни́ м'я Ти, ра́ди бла́гости Твоєя́, Го́споди. Благ і прав Госпо́дь, сего́ ра́ди законоположи́ть согріша́ющим на путі́. Наста́вить кро́ткія на суд, научи́ть кро́ткія путе́м Свої́м. Всі путіє́ Госпо́дні ми́лость і і́стина, взиска́ющим заві́та Єго́ і свиді́нія Єго́. Ра́ди і́мене Твоєго́ Го́споди, і очи́сти гріх мой; мног бо єсть. Кто єсть челові́к боя́йся Го́спода? Законоположи́ть єму́ на путі́, єго́же ізво́ли. Душа́ єго́ во благи́х водвори́ться, і сі́м'я єго́ наслі́дить зе́млю. Держа́ва Госпо́дь боя́щихся Єго́, і заві́т Єго́ яви́ть їм. О́чі мої́ ви́ну ко Го́споду, я́ко Той істо́ргнеть от сі́ті но́зі мої́. При́зри на м'я і поми́луй м'я, я́ко єдиноро́д і нищ єсьм аз. Ско́рбі се́рдця моєго́ умно́жишася, от нужд мої́х ізведи́ м'я. Виждь смире́ніє моє́ і труд мой, і оста́ви вся гріхи́ моя́. Виждь враги́ моя́, я́ко умно́жишася, і ненавиді́нієм непра́ведним возненави́діша м'я. Сохрани́ ду́шу мою́ і ізба́ви м'я, да не постижу́ся, я́ко упова́х на Тя. Незло́бивії і пра́вії приліпля́хуся мні, я́ко потерпі́х Тя, Го́споди. Ізба́ви, Бо́же, Ізра́їля от всіх скорбе́й єго́.
Поми́луй м'я, Бо́же, по вели́цій ми́лості Твоє́й і по мно́жеству щедро́т Твої́х очи́сти беззако́ніє моє́. Найпа́че оми́й м'я от беззако́нія моєго́ і от гріха́ моєго́ очи́сти м'я. Я́ко беззако́ніє моє́ аз зна́ю, і гріх мой предо мно́ю єсть ви́ну. Тебі́ єди́ному согріши́х і лука́воє пред Тобо́ю сотвори́х; я́ко да оправди́шися во словесі́х Твої́х і побіди́ши, внегда́ суди́ти Ті. Се бо в беззако́ніїх зача́т єсьм, і во грісі́х роди́ м'я ма́ти моя́. Се бо і́стину возлюби́л єси́, безві́стная і та́йная прему́дрости Твоєя́ яви́л мі єси́. Окропи́ши м'я іссо́пом, і очи́щуся; оми́єши м'я, і па́че сні́га убілю́ся. Слу́ху моєму́ да́си ра́дость і весе́ліє; возра́дуються ко́сті смире́нния. Отврати́ лице́ Твоє́ от гріх мої́х і вся беззако́нія моя́ очи́сти. Се́рдце чи́сто сози́жди во мні, Бо́же, і дух прав обнови́ во утро́бі моє́й. Не отве́ржи мене́ от лиця́ Твоєго́ і Ду́ха Твоєго́ Свята́го не отими́ от мене́. Возда́ждь мі ра́дость спасе́нія Твоєго́ і Ду́хом влади́чним утверди́ м'я. Научу́ беззако́нния путе́м Твої́м, і нечести́вії к Тебі́ обратя́ться. Ізба́ви м'я от крове́й, Бо́же, Бо́же спасе́нія моєго́; возра́дується язи́к мой пра́вді Твоє́й. Го́споди, устні́ мої́ отве́рзеши, і уста́ моя́ возвістя́ть хвалу́ Твою́. Я́ко а́ще би восхоті́л єси́ же́ртви, дал бих у́бо: всесожже́нія не благоволи́ши. Же́ртва Бо́гу дух сокруше́н; се́рдце сокруше́нно і смире́нно Бог не унічижи́ть. Ублажи́, Го́споди, благоволе́нієм Твої́м Сіо́на, і да сози́ждуться сті́ни Ієрусали́мськія. Тогда́ благоволи́ши же́ртву пра́вди, возноше́ніє і всесожега́ємая; тогда́ возложа́ть на олта́р Твой тельці́.
Сла́ва, і ни́ні: Аллилу́я, аллилу́я, аллилу́я, сла́ва Тебі́, Бо́же. [Тричі]
Го́споди, поми́луй. [Тричі]
І якщо Бог Госпо́дь: співається, промовляй: Сла́ва, тропар дня. І ни́ні: Богоро́дице, Ти єси́ лоза́ і́стинная:
Якщо ж Аллилу́я, промовляй цей тропар, глас 6:
Го́споди, і́же Пресвята́го Твоєго́ Ду́ха, / в тре́тій час апо́столом Твої́м низпосла́вий: / Того́, Благи́й, не отими́ от нас, / но обнови́ нас, моля́щих Ті ся.
Стих 1: Се́рдце чи́сто сози́жди во мні, Бо́же, і Дух прав обнови́ во утро́бі моє́й.
Стих 2: Не отве́ржи мене́ от лиця́ Твоєго́, і Ду́ха Твоєго́ Свята́го не отими́ от мене́.
К сим же стіхо́м припіва́єм: Го́споди, і́же Пресвята́го Твоєго́ Ду́ха: весь до кінця, і поклоняємся по одному разу.
Богоро́дице, Ти єси́ Лоза́ І́стинная, / возрасти́вшая нам Плод живота́, / Тебі́ мо́лимся, / моли́ся Влади́чице со святи́ми апо́столи, / поми́ловати ду́ші на́ша.
Госпо́дь Бог благослове́н, / благослове́н Госпо́дь день дне, / поспіши́ть нам Бог спасе́ній на́ших: / Бог наш, Бог спаса́ти.
Потім, Святи́й Бо́же, Святи́й Крі́пкий, Святи́й Безсме́ртний, поми́луй нас. [Тричі]
Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.
Пресвята́я Тро́йце, поми́луй нас: Го́споди, очи́сти гріхи́ на́ша; Влади́ко, прости́ беззако́нія на́ша; Святи́й, посіти́ і ісціли́ не́мощі на́ша і́мене Твоєго́ ра́ди.
Го́споди, поми́луй, тричі. Сла́ва, і ни́ні:
О́тче наш, І́же єси́ на Небесі́х, да святи́ться і́м'я Твоє́, да при́йдеть Ца́рствіє Твоє́, да бу́деть во́ля Твоя́, я́ко на Небесі́, і на землі́. Хліб наш насу́щний даждь нам днесь, і оста́ви нам до́лги на́ша, я́коже і ми оставля́єм должнико́м на́шим; і не введи́ нас во іскуше́ніє, но ізба́ви нас от лука́ваго.
Священник: Я́ко Твоє́ єсть Ца́рство: І ми: Амі́нь.
Кондак дня святого або свята.
Благослове́н єси́, Христе́ Бо́же наш, / і́же прему́дри ловці́ явле́й, / низпосла́в їм Ду́ха Свята́го, / і ті́ми уловле́й вселе́нную, / Человіколю́бче, сла́ва Тебі́.
Сла́ва: Ско́роє і ізві́стноє даждь утіше́ніє рабо́м Твої́м, Ісу́се, / внегда́ унива́ти духо́м на́шим, / не разлуча́йся от душ на́ших в ско́рбіх, / не удаля́йся от ми́слей на́ших во обстоя́ніїх; но при́сно нас предвари́. / Прибли́жися нам, прибли́жися везді́ сий, / я́коже со апо́столи Твої́ми всегда́ єси́; / си́це і Тебе́ жела́ющим соєдини́ Себе́, Ще́дре, да совоку́плені Тебе́ поє́м / і славосло́вим Всесвята́го Ду́ха Твоєго́.
І ни́ні: Наде́жда і Предста́тельство і Прибі́жище христия́н, необори́мая Стіна́, / ізнемога́ющим Приста́нище небу́рноє, Ти єси́, Богоро́дице Пречи́стая; / но я́ко мир спаса́ющая непреста́нною Твоє́ю моли́твою, / пом'яни́ і нас, Ді́во Всепі́тая.
Го́споди, поми́луй, 40 разів.
І́же на вся́коє вре́м'я, і на вся́кий час, на Небесі́ і на землі́ покланя́ємий і сла́вимий, Христе́ Бо́же, долготерпіли́ве, Многоми́лостиве, Многоблагоутро́бне: і́же пра́ведния люб'я́й і грі́шния ми́луяй, і́же вся зови́й ко спасе́нію, обіща́нія ра́ди бу́дущих благ. Сам, Го́споди, прийми́ і на́ша в час сей моли́тви, і іспра́ви живо́т наш к за́повідем Твої́м. Ду́ші на́ша освяти́, тілеса́ очи́сти, помишле́нія іспра́ви, ми́слі очи́сти, і ізба́ви нас от вся́кия ско́рби, зол і болі́зней, огради́ нас святи́ми Твої́ми а́нгели, да ополче́нієм їх соблюда́ємі і наставля́ємі, дости́гнем в соєдине́ніє ві́ри і в ра́зум непристу́пния Твоєя́ сла́ви; я́ко Благослове́н єси́ во ві́ки віко́в, амі́нь.
Го́споди, поми́луй, тричі. Сла́ва, і ни́ні:
Честні́йшую Херуви́м, / і сла́внійшую без сравне́нія Серафи́м, / без істлі́нія Бо́га Сло́ва ро́ждшую, / су́щую Богоро́дицю Тя велича́єм.
Іменем Госпо́днім благослови́, о́тче.
Священник: Моли́твами святи́х оте́ць на́ших, Го́споди Ісу́се Христе́, Бо́же наш, поми́луй нас.
І ми: Амі́нь.
Якщо піст і на утрені замість «Бог – Господь» співається «Аллилу́я», священик промовляє молитву св. Єфрема Сиріна з поклонами, поділяючи її на три частини:
Го́споди і Влади́ко живота́ моєго́, дух пра́здности, уни́нія, любонача́лія і праздносло́вія не даждь мі. [Поклін]
Дух же цілому́дрія, смиренному́дрія, терпі́нія і любве́ да́руй мі, рабу́ Твоєму́. [Поклін]
Єй, Го́споди, Царю́, да́руй мі зрі́ти моя́ прегріше́нія і не осужда́ти бра́та моєго́, я́ко благослове́н єси́ во ві́ки віко́в. [Поклін]
Також 12 малих поклонів із молитвою: Бо́же, очи́сти м'я, грі́шнаго.
І знову всю молитву: Го́споди і Влади́ко живота́ моєго́: і поклін один великий. Після завершення поклонів, промовляємо:
Влади́ко Бо́же О́тче Вседержи́телю, Го́споди Си́не Єдиноро́дний Ісу́се Христе́, і Святи́й Ду́ше, Єди́но Бо́жество́, Єди́на си́ла, поми́луй м'я, грі́шнаго, і ї́миже ві́си судьба́ми, спаси́ м'я, недосто́йнаго раба́ Твоєго́; я́ко Благослове́н єси́ во ві́ки віко́в, амі́нь.
Кінець третього часу.