Ірмос: Усли́шах, Го́споди, смотре́нія Твоєго́ та́їнство, разумі́х діла́ Твоя́ і просла́вих Твоє́ Божество́.

Пресвята́я Богоро́дице, спаси́ нас.

Страсте́й мої́х смуще́ніє, Ко́рмчию ро́ждшая Го́спода, і бу́рю утиши́ мої́х прегріше́ній, Богоневі́стная.

Пресвята́я Богоро́дице, спаси́ нас.

Милосе́рдія Твоєго́ бе́здну призива́ющу пода́ждь мі, Я́же Благосе́рдаго ро́ждшая і Спа́са всіх пою́щих Тя.

Пресвята́я Богоро́дице, спаси́ нас.

Наслажда́ющеся, Пречи́стая, Твої́х дарова́ній, благода́рственноє воспіва́єм пі́ніє, ві́дуще Тя, Богома́тер.

Сла́ва: На одрі́ болі́зні моєя́ і не́мощі низлежа́щу мі, я́ко Боголюби́ва, помози́, Богоро́дице, єди́на Присноді́во.

І ни́ні: Наде́жду, і утвержде́ніє, і спасе́нія сті́ну недви́жиму іму́ще Тя, Всепі́тая, неудо́бства вся́каго ізбавля́ємся.