По Рцем всі: у відповідному місці додай:
Єще́ мо́лимся Тебі́, Го́споду Бо́гу на́шему, є́же усли́шатися гла́су моле́нія на́шего і моли́тві, і поми́ловати рабо́в Твої́х [імена]: благода́тію і щедро́тами Твої́ми, і іспо́лнити вся проше́нія їх, і прости́ти їм вся согріше́нія во́льная і нево́льная, благоприя́тним же би́ти мольба́м і ми́лостиням їх пред престо́лом влади́чествія Твоєго́, і покри́ти їх от всіх враг ви́димих і неви́димих, от вся́кия напа́сти, біди́ і ско́рби, і неду́гов ізба́вити, і пода́ти здра́віє с долгоде́нствієм: рцем всі: Го́споди, усли́ши і поми́луй.
При́зри, Влади́ко Человіколю́бче, ми́лостивним Твої́м о́ком на раби́ Твоя́ [імена]: і усли́ши моле́нія на́ша, с ві́рою приноси́мая, я́ко Сам рекл єси́: вся єли́ка моля́щеся про́сите, ві́руйте я́ко при́ймете, і бу́деть вам, і па́ки: просі́те і да́сться вам. Сего́ же ра́ди і ми, а́ще і недосто́йнії, упова́юще на ми́лость Твою́, про́сим: пода́ждь благо́сть Твою́ рабо́м Твої́м [імена]: і іспо́лни блага́я жела́нія їх, ми́рно же і ти́хо в здра́вії і долгоде́нствії вся дні їх соблюди́: рцем всі: ско́ро усли́ши і ми́лостивно поми́луй.
Єще́ мо́лимся о плодонося́щих: та ін.
На проскомидії:
Го́споди Ісу́се Христе́, Бо́же наш, прийми́ же́ртву сію́, во оставле́ніє гріхо́в рабо́в Твої́х [імена]: і я́ко милосе́рд всеси́льною Твоє́ю десни́цею угаси́ одержа́щий їх огнь, утоли́ неду́г, і ми́лостивно воздви́гни їх от одра́ болі́зні, во сла́ву і́мене Твоєго́.
По Рцем всі: у відповідному місці додай:
Врачу́ душ і тіле́с, со умиле́нієм в се́рдці сокруше́нном к Тебі́ припа́даєм, і стеня́ще вопіє́м Ті: ісціли́ болі́зні, уврачу́й стра́сті душ і тіле́с рабо́в Твої́х [імена]: і прости́ їм, я́ко благосе́рд, вся прегріше́нія, во́льная і нево́льная, і ско́ро воздви́гни от одра́ болі́зні, мо́лим Ті ся, усли́ши і поми́луй.
Не хотя́й сме́рти грі́шних, но є́же обрати́тися, і живи́м їм би́ти, пощади́ і поми́луй рабо́в Твої́х [імена], ми́лостиве: запрети́ болі́зні, отста́ви всю страсть, і весь неду́г, і простри́ крі́пкую Твою́ ру́ку, і я́коже Іаї́рову дщер, от одра́ болі́зні воздви́гни, і здра́вих сотвори́, мо́лим Ті ся, усли́ши і поми́луй.
О́гненную болі́знь Петро́вой те́щі прикоснове́нієм Твої́м ісціли́вий, і ни́ні лю́ті стра́ждущих рабо́в Твої́х [імена], болі́знь благосе́рдієм Твої́м ісціли́, здра́віє їм ско́ро подава́я, прилі́жно мо́лим Ті ся, Істо́чниче цільба́м, усли́ши і поми́луй.
Єще́ мо́лимся о плодонося́щих: та ін.
На проскомидії:
Го́споди Ісу́се Христе́, Бо́же наш, прийми́ же́ртву сію́, во оставле́ніє гріхо́в рабо́в Твої́х [імена]: і благослови́ путеше́ствіє їх і посли́ їм, я́коже рабу́ Своєму́ Тові́ї іногда́, А́нгела ми́рна, спу́тника і наста́вника, сохраня́юща, заступа́юща і невреди́ми соблюда́юща їх от вся́каго зла́го обстоя́нія, ми́рно же, здра́во і благополу́чно возвраща́юща, да і о сем просла́виться в них великолі́поє і́м'я Твоє́.
По Рцем всі: у відповідному місці додай:
Стопи́ челові́чеськія ісправля́яй, Го́споди, при́зри ми́лостивно на раби́ Твоя́ [імена], і прости́в їм вся́коє прегріше́ніє, во́льноє же і нево́льноє, благослови́ благо́є намі́реніє сові́та їх, і ісхо́ди і вхо́ди со путеше́ствієм іспра́ви, прилі́жно мо́лим Ті ся, усли́ши і поми́луй.
Ісаа́ку і Тові́ї А́нгела спу́тника посла́вий і тім путеше́ствіє і возвраще́ніє їх ми́рноє і благополу́чноє сотвори́вий, і ни́ні, Пребла́же, А́нгела ми́рна рабо́м Твої́м, на́ми Тебі́ моля́щимся, посли́, во є́же наста́вити їх на вся́коє ді́ло благо́є, і ізба́вити от враг ви́димих і неви́димих і от вся́каго зла́го обстоя́нія, здра́во же, ми́рно і благополу́чно в сла́ві Твоє́й возврати́ти, усе́рдно мо́лим Ті ся, усли́ши і поми́луй.
Луці́ і Клео́пі во Еммау́с спутеше́ствовавий, і ве́село во Ієрусали́м возврати́тися Твої́м пресла́вним позна́нієм сотвори́вий, спутеше́ствуй Твоє́ю благода́тію і Боже́ственним благослове́нієм і ни́ні рабо́м Твої́м сим, на́ми Тебі́ прилі́жно моля́щимся, і во вся́ком ді́лі бла́зі, к сла́ві Пресвята́го Твоєго́ і́мені благопоспіши́, во здра́вії і благополу́чії соблюда́я і возвраща́я во вре́м'я благоподо́бно, я́ко всеще́дрому Благоді́телю мо́лим Ті ся, ско́ро усли́ши і ми́лостивно поми́луй.
Єще́ мо́лимся о плодонося́щих: та ін.
На проскомидії:
Го́споди Ісу́се Христе́, Бо́же наш, прийми́ же́ртву сію́ во оставле́ніє гріхо́в рабо́в Твої́х [імена]: і благослови́ благо́є намі́реніє і ді́ло їх, є́же благополу́чно нача́ти і без преп'я́тія вся́каго, к сла́ві Твоє́й соверши́ти, ді́лателем же благопоспі́ши, і діла́ рук іспра́ви, і в соверше́ніє си́лою Пресвята́го Твоєго́ Ду́ха спі́шно произвести́ сотвори́.
По Рцем всі: у відповідному місці додай:
При́зри, Человіколю́бче, ми́лостивим Твої́м о́ком на раби́ Твоя́ [імена], к Твоєму́ благоутро́бію ві́рою припа́дающия, і усли́шав моле́нія їх, благо́є намі́реніє і ді́ло їх благослови́, і благополу́чно нача́ти і спі́шно кромі́ вся́каго преп'я́тія во сла́ву Твою́ соверши́ти, я́ко всеси́льному Царю́ мо́лим Ті ся, усли́ши і поми́луй.
Во всем поспі́шествуяй всім во благо́є, Го́споди, ми́лостивно і рабо́м Твої́м [імена], поспі́шествуй, Спа́се, і во благополу́чноє соверше́ніє ді́лу їх спі́шно произвести́ся, благослови́, мо́лим Ті ся, всемоги́й Влади́ко, усли́ши і поми́луй.
А́нгела Твоєго́ храни́теля приста́ви ді́лу сему́, благоуві́тливе Го́споди, і є́же воспяти́ти вся преп'я́тія ви́димих і неви́димих враго́в, поспі́шство же во всем ко благополу́чному соверше́нію ді́лающим сотвори́ти, мо́лим Ті ся, преблаги́й Спа́се, усли́ши і поми́луй.
Во сла́ву Твою́ вся твори́ти повеліва́я, Го́споди, рабо́м Твої́м [імена], ко Твоє́й сла́ві ді́ло своє́ начина́ющим, благослове́нієм Твої́м поспі́шство благополу́чноє с дово́льством к соверше́нію пода́ждь, здра́віє їм со благоде́нствієм да́руя, мо́лим Ті ся, вседарови́тий Тво́рче, усли́ши і поми́луй.
Єще́ мо́лимся о плодонося́щих: та ін.
На проскомидії:
Го́споди Ісу́се Христе́, Бо́же наш, же́ртву сію́, ю́же Ті с благодаре́нієм о Твої́х благодія́ніїх прино́сим, в во́ню благоуха́нія духо́внаго, в пренебе́сний Твой же́ртвенник прийми́, і ї́хже усли́шати і поми́ловати благоізво́лил єси́, от вся́каго зла́го обстоя́нія ви́димих і неви́димих враго́в, благоутро́бно сохрани́, і всегда́ в любві́ я́же к Тебі́, і і́скренняго, і во вся́кой доброді́телі преуспіва́ти сотвори́, і небе́сних Твої́х благ сподо́би.
По Рцем всі: у відповідному місці додай:
Благодаря́ще со стра́хом і тре́петом я́ко раби́ непотре́бнії, Твоєму́ благоутро́бію, Спа́се і Влади́ко наш Го́споди, о Твої́х благодія́ніїх, я́же ізлія́л єси́ ізоби́льно на рабі́х Твої́х, і припа́даєм, і славосло́віє Тебі́ я́ко Бо́гу прино́сим, і уми́ленно вопіє́м: ізба́ви от всіх бід раби́ Твоя́, і всегда́ я́ко ми́лостив іспо́лни во благи́х жела́ніє всіх нас, прилі́жно мо́лимся Ті, усли́ши і поми́луй.
Я́коже ни́ні ми́лостивно усли́шал єси́ моли́тви рабо́в Твої́х, Го́споди, і яви́л єси́ на них благоутро́біє человіколю́бія Твоєго́, си́це і в пре́дняя не презира́я, іспо́лни во сла́ву Твою́ вся блага́я хоті́нія ві́рних Твої́х, і яви́ всім нам бога́тую ми́лость Твою́, вся нам согріше́нія презира́я: мо́лимся Ті, усли́ши, і поми́луй.
Благоприя́тно, я́ко кади́ло благово́нноє і я́ко ту́чная всесожже́нія, да бу́деть, всеблаги́й Влади́ко, благодаре́ніє сіє́ на́ше пред вели́чеством сла́ви Твоєя́ і низпосли́ всегда́ я́ко щедр рабо́м Твої́м бога́тия ми́лості, і щедро́ти Твоя́, і от всіх сопротивле́ній ви́димих і неви́димих враго́в, Це́рков Твою́ святу́ю ізба́ви, лю́дем же Твої́м всім безгрі́шноє со здра́вієм долгоде́нствіє, і во всіх доброді́телех преспі́яніє да́руй, мо́лим Ті ся всеще́дрий Царю́, ми́лостивно усли́ши, і ско́ро поми́луй.
Єще́ мо́лимся о плодонося́щих: та ін.
На проскомидії:
Го́споди Ісу́се Христе́ Бо́же наш, свята́го апо́стола Твоєго́ Петра́ от уз і темни́ці без вся́каго вре́да свободи́вий, прийми́, смире́нно мо́лим Ті ся, же́ртву сію́ ми́лостивно во оставле́ніє гріхо́в рабо́в Твої́х [імена]: в темни́цю всажде́нних, і моли́твами того́, я́ко Человіколю́бець всеси́льною Твоє́ю десни́цею от вся́каго зла́го обстоя́нія ізба́ви і на свобо́ду ізведи́.
По Рцем всі: у відповідному місці додай:
Петра́ от уз і темни́ці ізведи́й, і невре́дна Це́ркві Твоє́й предста́вивий, Христе́, і рабо́в Твої́х, на́ми Тебі́ ни́ні моля́щихся, я́ко милосе́рд поми́луй, і от уз свободи́, мо́лим Ті ся, всеми́лостивий Спа́се, усли́ши і поми́луй.
Ізбавля́яй ни́ща от си́льна, і убо́га, єму́же ність помо́щника, в біді́ і заточе́нії і у́зах су́щия, я́ко щедр ми́лостивно свободи́, приле́жно мо́лим Ті ся, ско́ро усли́ши, і я́ко щедр поми́луй.
Іо́сифа в темни́ці іногда́ в Єги́пті заключе́ннаго пресла́вно свободи́вий, і ни́ні на́ми Тебе́ призива́ющия от уз і го́ркия біди́ ізба́ви, мо́лим Ті ся, Ізба́вителю ми́лостивий, усли́ши і ско́ро поми́луй.
Єще́ мо́лимся о плодонося́щих: та ін.
На проскомидії:
Го́споди Ісу́се Христе́ Бо́же наш, за́повідь но́вую да́вий ученико́м Твої́м, є́же люби́ти друг дру́га, прийми́ же́ртву сію́ во оставле́ніє гріхо́в всіх нас правові́рних рабо́в Твої́х, і ізся́кшую в нас к Твоє́й бла́гості, і к і́скреннему любо́в, Ду́хом Твої́м Святи́м обнови́, і крі́пко сію́ водрузи́ в сердця́ на́ша, да то́ю за́повіді Твоя́ ісполня́юще, не своя́ сі на землі́ взиску́єм, но я́же к сла́ві Твоє́й, і і́скренняго созида́нію і спасе́нію.
По Рцем всі: у відповідному місці додай:
Го́споди Бо́же наш, ми́лостивно я́ко Благ при́зри на ізсо́хшую в любві́ зе́млю се́рдця на́шего, і те́рнієм не́нависти, самолю́бія же, і неісче́тних беззако́ній лю́ті олядені́вшую: і ка́плю благода́ті Пресвята́го Твоєго́ Ду́ха іспусти́в, бога́тно ороси́ ю, во є́же плодоноси́ти, і возрасти́ти от горя́щия к Тебі́ любве́, всіх доброді́телей ко́рень страх Твой, і о і́скренняго спасе́нії нелі́ностноє попече́ніє, всіх же страсте́й, і многообра́зних лука́вств, і лицемі́рія іскорене́ніє, приле́жно я́ко всіх Благода́теля мо́лим, ско́ро усли́ши і человіколю́бно поми́луй.
За́повідь но́вую Твої́м ученико́м, є́же люби́ти друг дру́га, да́вий, Влади́ко, обнови́ сію́ благода́тію Пресвята́го Твоєго́ Ду́ха дійстви́тельно в душа́х, і в сердця́х на́ших, да ніколи́же о свої́х сі, но всегда́ о Твоє́м благоуго́дії, і і́скренняго спасе́нії і по́льзі попече́ніє твори́ти потщи́мся, мо́лим Ті ся, Благода́телю ми́лостивий, усли́ши, і ми́лостивно поми́луй.
Пе́рвую і бо́льшую за́повідь да́вий, є́же люби́ти Тебе́ Бо́га і Творця́ на́шего от всея́ душі́, от всея́ ми́слі і крі́пости на́шея, і втору́ю, подо́бную єй, є́же люби́ти і́скренняго я́ко самі́х себе́, і в сію́ двою́ всему́ зако́ну і проро́ком ви́сіти научи́вий, ді́лом ісполня́ти сія́, всіх нас благода́тію Пресвята́го Твоєго́ Ду́ха убіди́: да Тебі́, Спа́су на́шему, і і́скренняго спасе́нію угожда́юще, обітова́нная Твоя́ полу́чим блага́я, я́ко Влади́ці і Спа́су на́шему приле́жно припа́дающе мо́лимся, ско́ро усли́ши, і ми́лостивно поми́луй.
Да соверше́нні в любві́ Твоє́й, Бо́же наш, бу́дем, ко і́скреннему нелицемі́рную імі́ти любо́в прину́ди нас Твоєго́ Ду́ха благода́тію, Влади́ко: к Тебі́ бо любо́в імі́ти мня́йся, бра́та же своєго́ ненави́дяй лож єсть, і во тьмі хо́дить. Ті́мже, ми́лостиве, в любві́ Твоє́й і бра́тній распали́ ду́ші і сердця́ на́ша, мо́лим Ті ся, я́ко ми́лостив ско́ро усли́ши, і я́ко щедр поми́луй.
Си́це в нас Твою́ любо́в, си́лою благода́ті Пресвята́го Твоєго́ Ду́ха, всели́, всеще́дрий Го́споди, є́же не то́чію бра́тію і дру́ги, но і враго́в на́ших по Твоєму́ боже́ственному повелі́нію, і́стинно люби́ти, і ненави́дящим нас благотвори́ти, і о спасе́нії їх і́скренно тща́тися, мо́лим Ті ся, бла́гости Істо́чниче, і человіколю́бія Пучи́но, ско́ро усли́ши і я́ко благосе́рд поми́луй.