Архієре́ю і́стинний Ісу́се Христе́, принеси́й Себе́ Бо́гу Отцю́ на олтарі́ кре́стном же́ртву чи́сту, непоро́чну, о нас грі́шних, і да́вий нам ті́ло Твоє́ я́сти і кров Твою́ пи́ти, положи́вий Та́їнство в си́лі Ду́ха Свята́го, глаго́ля сіє́: "єли́жди а́ще творите́, в Моє́ воспомина́ніє творі́те", — молю́ чрез кров Твою́ дража́йшую, ве́лію спасе́нія на́шего ці́ну, молю́ чрез сію́ ди́вную і неіспові́димую любо́в, є́юже нас недосто́йних та́ко возлюби́л єси́, я́ко оми́л єси́ нас от гріхо́в на́ших кро́вію Твоє́ю: научи́ м'я, недосто́йнаго раба́ Твоєго́, єго́же при іни́х Твої́х дарова́ніях, в чин свяще́нства, не по діло́м мої́м, но по єди́ній Твоє́й благоізво́лил єси́ призва́ти ми́лості; научи́ м'я Ду́хом Твої́м толи́кую та́йну соверша́ти, сицево́ю че́стію і благогові́нієм, сицеви́м благоче́стієм і стра́хом, ї́миже досто́їть твори́ти. Сотвори́ м'я, Го́споди Ісу́се Христе́, благода́тію Твоє́ю всегда́ о вели́честві та́йни сея́ ві́ровати і разумі́ти, чу́вствовати, і тве́рдо держа́ти, глаго́лати і ми́слити Тебі́ подоба́ющая, і душі́ моє́й поле́зная. Да вни́деть в се́рдце моє́ Дух Твой благи́й, глася́й безгла́сні, глаго́ляй вся́ку і́стину толи́ких та́їнств, я́же углуби́шася зіло́, і боже́ственним прикрове́на кро́вом. Мно́гаго ра́ди милосе́рдія Твоєго́ благоволи́ мні, ни́ні і всегда́ чи́стим се́рдцем і ми́слію, слу́жби соверша́ти священноді́йствіє. Очи́сти се́рдце от нечи́стих, ме́рзских, пра́здних, і вре́дних помишле́ній; огради́, святи́х А́нгел ві́рним хране́нієм і крі́пким ополче́нієм; да вразі́ всіх благ посра́млені отбіжа́ть си́лою толи́каго Та́їнства: і руко́ю свята́го А́нгела Твоєго́ отста́ви от мене́, Христе́ мой, і от всіх рабо́в Твої́х ду́ха горди́ні, тщесла́вія, за́висти, я́рости, блуда́, нечистоти́, неві́рія і хули́; да постидя́ться гоня́щії нас, і да поги́бнуть погуби́ти нас тща́щіїся.

Царю́ сил, чистоти́ і цілому́дрія люби́телю, Бо́же, росо́ю сви́ше благослове́нія Твоєго́, погаси́ в пло́ті моє́й весь пла́мень стра́стний, я́ко да живе́ть во мні всеці́лая душі́ і ті́ла чистота́, с про́чіїми дарова́нії Твої́ми, Тебі́ в пра́вді прия́тними; да ті́лом нескве́рним, і се́рдцем чи́стим возмогу́ Тебі́ принести́ же́ртву хвале́нія, с коли́ким се́рдця сокруше́нієм, слез ізлія́нієм, с каково́ю по́честію і стра́хом, в коли́кой пло́ті і ду́ха чистоті́, сіє́ пренебе́сноє Боже́ственноє до́лжно єсть соверша́тися приноше́ніє, іді́же ті́ло Твоє́ суще́ственні я́сться, і кров Твоя́ суще́ственні піє́ться, іді́же го́рняя до́льним совокупля́ються, іді́же самоли́чні предстоя́ть А́нгели, іді́же ієре́й і же́ртва чуде́сні і неізрече́нні, Ти Сам предложе́нний. І кто досто́йні сіє́ соверша́ти возмо́жеть, а́ще не Ти Сам, всемоги́й Го́споди, принося́щаго досто́йна сотвори́ши? Вім, і і́стинно ізві́стен єсьм, і сіє́ милосе́рдію Твоєму́ іспові́дую; я́ко нісьм досто́їн, мно́жества ра́ди гріхо́в і безчи́сленних прегріше́ній мої́х, к толи́ким та́йнам приступи́ти; но вім воі́стину, і ві́рую от всего́ се́рдця, і усти́ іспові́дую, я́ко си́лен м'я єси́ удосто́їти; Сам єди́н, в беззако́ніїх зача́таго і рожде́ннаго, моги́й очи́стити. Ра́ди сего́ всемогу́щества Твоєго́ Тебе́ молю́: благоволи́ мні грі́шному небе́сную сію́ же́ртву со стра́хом і тре́петом, чи́стою со́вістію, слез ізлія́нієм, в ра́дості духо́вній і весе́лії боже́ственном, приноси́ти; да ощути́ть ум мой блаже́нную прише́ствія Твоєго́ сла́дость і ополче́ніє святи́х А́нгел Твої́х о́крест мене́.

Аз бо, Го́споди, помина́я спаси́тельния Твоя́ стра́сті, ко олтарю́ Твоєму́ приступа́ю, а́ще і недосто́йний, да принесу́ Тебі́ же́ртву, от Тебе́ пре́данную, і приноси́тися в воспомина́ніє Твоє́ о спасе́нії на́шем уста́вленную. Прийми́ у́бо сію́, молю́ Тя, Бо́же мой, о Це́ркві святі́й Твоє́й, і о всіх лю́дех, ї́хже Честно́ю Твоє́ю снабді́л єси́ кро́вію; і зане́же м'я, грі́шника, между́ Тобо́ю і о́німи сре́дственна хода́тая би́ти восхоті́л єси́, а́ще благи́х діл во мні свиді́тельства не обріта́єши, служе́нія примире́нія вві́реннаго мні да не отрече́шися: я́ко да не моєго́ ра́ди недосто́їнства, ціни́ спасе́нія своєго́ отщетя́ться, ї́хже ра́ди Сам спаси́тельная же́ртва і іскупле́ніє ізво́лил єси́ би́ти.

Приношу́ у́бо, Го́споди, а́ще благоволи́ши ми́лостивно призрі́ти, ско́рбі люде́й, пліне́нних воздиха́нія, страда́нія убо́гих, ну́жди путеше́ствующих, немощни́х ско́рбі, ста́рих не́мощі, рида́нія младе́нець, обі́ти дів, моли́тви вдов, і сиро́т умиле́ніє. Ти бо ми́луєши вся, і нічто́же от Тебе́ созда́нних презира́єши. Пом'яни́, кий єсть соста́в наш, я́ко Ти Оте́ць наш єси́; не прогні́вайся на ни зіло́, ні утро́би щедро́т Твої́х затвори́ от нас, Го́споди; не бо в пра́вдах на́ших ізлива́єм моли́тви на́ша пред лице́м Твої́м, но в щедро́тах Твої́х мно́гих. Отими́ от нас, Го́споди, беззако́нія на́ша, і огне́м Свята́го Твоєго́ Ду́ха в нас ми́лостивні іспепели́; отими́ се́рдце ка́менноє от пло́ті на́шея, і даждь се́рдце пло́тяноє, боя́щеєся Тебе́, лю́б'ящеє, почита́ющеє, Тебі́ послі́дующеє, і Тобо́ю пита́ющеєся. Про́сим, Влади́ко, щедро́ти Твоя́, да лице́м сві́тлим на достоя́ніє Твоє́, і́мені Твоєму́ свято́му служе́нія ожида́ющеє, воззрі́ти благоволи́ши; і да ні єди́наго же моли́тва, ні єди́наго проше́ніє отринове́но бу́деть; Ти нас научи́ моли́тися, є́же і Сам гото́в сли́шиши, і проси́мая ми́лостивні ісполня́єши.

Мо́лим Тя, О́тче Святи́й, о душа́х ві́рних преста́вльшихся, я́ко да бу́деть їм во ізбавле́ніє, спасе́ніє, отра́ду, і ві́чноє весе́ліє, сіє́ вели́коє благоче́стія Та́їнство; Го́споди Бо́же мой, бу́ди їм днесь всеці́лоє і соверше́нноє утіше́ніє, от Тебе́, Хлі́ба І́стиннаго, Жива́го, с Небесе́ сше́дшаго, і даю́щаго живо́т ми́рові, от пло́ті Твоєя́ святи́я, а́гнця нескве́рна, взе́млющаго гріхи́ ми́ра. Напо́й їх пото́ком бла́гости Твоєя́, от прободе́ннаго Твоєго́ ребра́ на Кресті́ істе́кшим, да тім возвеселе́ни, ра́дуються во хвалі́ і сла́ві Твоє́й святі́й.

Молю́ Го́споди, бла́гость Твою́: да при́йдеть на хліб сей і ча́шу сію́ ісполне́ніє Божества́ Твоєго́, да сни́деть та́кожде, Го́споди, Свята́го Твоєго́ Ду́ха о́браз неви́димий, і непостижи́мая сла́ва, я́коже пре́жде на же́ртви отце́в схожда́ше, і́же і приноше́нія сія́ на́ша, да сотвори́ть ті́ло і кров Твою́, і мене́ недосто́йнаго служи́теля Твоєго́ толи́коє соверша́ти научи́ть Та́їнство; я́ко да благоприя́тні і ми́лостивні при́ймеши от рук мої́х же́ртву во спасе́ніє всіх живи́х і ме́ртвих.

Молю́ Тя, Го́споди, сама́го ра́ди святи́х ті́ла і кро́ве Твоєя́ Та́їнства, ї́миже всегда́ в хра́мі Твоє́м пита́ємі і напая́ємі, очища́ємі, освяща́ємі і обожа́ємі бива́єм; да си́лою Твоє́ю укріпле́н, благо́ю со́вістію ко олтарю́ Твоєму́ приходя́, сія́ Небе́сная Та́їнства імі́ю в себі́ в живо́т і спасе́ніє, по словесі́ свято́му Твоєму́: хліб, єго́же Аз дам, плоть Моя́ єсть, ю́же Аз дам за живо́т ми́ра; яди́й М'я, і той жив бу́деть Мене́ ра́ди. Хлі́бе Сладча́йший, уврачу́й устні́ се́рдця моєго́, да чу́вствую во мні любве́ Твоєя́ сла́дость; ісціли́ всяк неду́г, да кромі́ Тебе́, ніко́єяже пожела́ю красоти́. Хлі́бе Чисті́йший, вся́кия сла́дости і благово́нія преіспо́лнене, вни́ди в се́рдце моє́ і сла́достію благово́нія Твоєго́ напо́лни вну́тренняя душі́ моєя́. Тобо́ю пита́ються А́нгели на Небесі́ преізоби́льно; да наси́титься по си́лі своє́й Тобо́ю і пришле́ць челові́к на землі́. Хлі́бе Святи́й, Хлі́бе Живи́й, Хлі́бе Возжделі́нне, сходя́й с Небесе́, і дая́й живо́т ми́рові, вни́ди в се́рдце моє́, і очи́сти м'я от вся́кия скве́рни пло́ті і ду́ха; вни́ди в ду́шу мою́, вніу́ду і внутру́ду освяща́я і просвіща́я; бу́ди моє́й хране́ніє всегда́шнєє душі́, і ті́ла здра́віє. Отжени́ от мене́ находя́щих на м'я, да біжа́ть от лиця́ Твоєго́ ненави́дящії м'я; да Тобо́ю огражде́н, с Тобо́ю прейду́ в ві́чноє Твоє́ Ца́рствіє, іді́же не покрове́нні, но лице́м к лицю́ Тебе́ у́зрим, єгда́ преда́си Ца́рство Бо́гу і Отцю́, да бу́деть Бог вся́чеськая во всіх. До ни́ні а́лчу і жа́жду, но тогда́ наси́щуся, внегда́ яви́ть мі ся сла́ва Твоя́, в не́йже ца́рствуєши со Отце́м і святи́м Ду́хом, во ві́ки. Амі́нь.