Спаси́, Го́споди, лю́ди Твоя́ / і благослови́ достоя́ніє Твоє́, / побі́ди правосла́вним христия́ном на сопроти́вния да́руя // і Твоє́ сохраня́я Кресто́м Твої́м жи́тельство.

Вознеси́йся на Крест во́лею, / тезоімени́тому Твоєму́ но́вому жи́тельству / щедро́ти Твоя́ да́руй, Христе́ Бо́же: / Возвесели́ нас си́лою Твоє́ю, / побі́ди дая́ нам на сопоста́ти, / посо́біє іму́щу Твоє́, ору́жіє ми́ра, // непобіди́мую побі́ду.

Небе́сних во́їнств Архістрати́же, мо́лим тя при́сно ми недосто́йнії, да твої́ми моли́твами огради́ши нас кро́вом крил невеще́ственния твоєя́ сла́ви, сохраня́я нас припа́дающих прилі́жно, і вопію́щих: от бід ізба́ви нас, я́ко чинонача́льник ви́шніх Сил.

Архістрати́же Бо́жий, служи́телю Боже́ственния сла́ви, А́нгелов нача́льниче, і челові́ков наста́вниче, поле́зноє нам проси́, і ве́лію ми́лость, я́ко безпло́тних Архістрати́г.

Небе́сних во́їнств архістрати́зі, / мо́лим вас при́сно ми, недосто́йнії: / да ва́шими моли́твами оградите́ нас / кро́вом крил невеще́ственния ва́шея сла́ви, / сохраня́юще ни припа́дающия прилі́жно і вопію́щия: / от бід ізба́віте ни, // я́ко чинонача́льници ви́шніх сил.

Архістрати́зі Бо́жії, / служи́теліє Боже́ственния сла́ви, / а́нгелов нача́льници і челові́ков наста́вници, / поле́зноє нам просі́те і ве́лію ми́лость, // я́ко безпло́тних архістрати́зі.

Велича́єм вас, / Арха́нгели і А́нгели / і вся во́їнства, / Херуви́ми і Серафи́ми, // сла́в'ящия Го́спода.

Пречи́стая Богома́ти, Богоро́дице, / собо́р Твой честни́й укра́шен многоразли́чними добро́тами; / да́ри Ті прино́сять, Госпоже́, мно́зі мирсті́ї лю́діє, / у́зи на́ша грі́шния раздери́ Своє́ю ми́лостію // і спаси́ ду́ші на́ша.

І́же пре́жде денни́ці от Отця́ без ма́тере роди́вийся, / на землі́ без отця́ воплоти́ся днесь із Тебе́. / Ті́мже звізда́ благовіству́єть волхво́м, / а́нгели же с па́стирми пою́ть // несказа́нноє Рождество́ Твоє́, Благода́тная.

Я́коже плод кра́сний Твоєго́ спаси́тельнаго сі́янія, / земля́ Ру́ськая прино́сить Ті, Го́споди, / вся святи́я в той просія́вшия. / Тіх моли́твами в ми́рі глубо́ці // Це́рков і страну́ Украї́ну на́шу Богоро́дицею соблюди́, Многоми́лостиве.

Днесь лик святи́х, в землі́ на́шей Бо́гу угоди́вших, предстої́ть в Це́ркві / і неви́димо за ни мо́литься Бо́гу. / А́нгели с ним славосло́в'ять, / і всі святі́ї Це́ркве Христо́ви єму́ спра́зднують, / о нас бо мо́лять всі ку́пно // Преві́чнаго Бо́га.

С Ви́шніх призира́я, убо́гія приє́мля, / посіти́ нас, озло́бленния гріхи́, Влади́ко Всеми́лостиве, // моли́твами Богоро́диці да́руй душа́м на́шим ве́лію ми́лость.

Світи́льниче со́лнечний, Всеми́лостивий Спа́се, / просвіще́нієм сія́нія Твоєго́ пода́й і нам сло́во, / да восхва́лим чи́стою со́вістію / Твоє́ пребожественноє пра́зднество, / Тебі́ же, Єдиноро́днаго Си́на, / єдиносу́щна с Ду́хом, сла́в’яще, // да́руєши бо нам мир і ве́лію ми́лость.

Богоро́дице Присноді́во, челові́ков покро́ве, / ри́зу і по́яс пречи́стаго Твоєго́ тілесе́, / держа́вноє гра́ду Твоєму́ обложе́ніє дарова́ла єси́, / безсі́менним рождество́м Твої́м нетлі́нна пребива́ющи, / о Тебі́ бо і єстество́ обновля́ється і вре́м'я. / Ті́мже мо́лим Тя мир гра́ду Твоєму́ дарова́ти // і душа́м на́шим ве́лію ми́лость.

Богоприя́тноє Твоє́ чре́во, Богоро́дице, / об'е́мшій по́яс Твой честни́й, / держа́ва гра́ду Твоєму́ необори́ма / і сокро́вище єсть благи́х неоску́дно, // єди́на ро́ждшая, Присноді́во.

Всея́ тва́ри Соді́телю, / времена́ і лі́та во Своє́й вла́сті положи́вий, / благослови́ віне́ць лі́та бла́гости Твоєя́, Го́споди, / сохраня́я в ми́рі лю́ди і град Твой, // моли́твами Богоро́диці і спаси́ ни.

В Ви́шніх живи́й, Христе́ Царю́, / всіх ви́димих і неви́димих Тво́рче і Зижди́телю, / І́же дні і но́щі, времена́ і лі́та сотвори́вий, / благослови́ ни́ні віне́ць лі́та, / соблюди́ і сохрани́ в ми́рі град і лю́ди Твоя́, // Многоми́лостиве.

Я́ко апо́столов єдинонра́внії / і вселе́нния учи́теліє, / Влади́ку всіх молі́те / мир вселе́нній дарова́ти // і душа́м на́шим ве́лію ми́лость.

Свяще́нния і Боговіща́нния пропові́дники, / верх учи́телей, Го́споди, прия́л єси́ в наслажде́ніє благи́х твої́х і упокоє́ніє: / труди́ бо о́ніх і смерть прия́л єси́ па́че вся́каго всепло́дія, // Єди́не прославля́яй святи́я Твоя́.

Сонм во́їнов непобіди́мих, / світоно́сен полк Царя́ Небе́снаго / воспої́м ві́рнії. / Приє́м бо вся ору́жія Бо́жия / і обо́лкшеся во броню́ пра́вди, / святі́ї во́їни побіди́ша сла́вно полки́ враг неви́димих, / Це́рков же Христо́ву просвіти́ша заря́ми тмочисле́нними. / Ті́мже мо́лим Христа́ Бо́га // тіх моли́твами спасти́ душі́ на́ша.

До́блії во́їни Ісу́с Христо́ви, / ві́рнії дру́ги Бо́жії! / Не об'яза́стеся ку́плями жите́йськими, / Воєво́ді же Взбра́нному пресла́вно угоди́ли єсте́, / ду́шу свою́ положи́в за дру́ги своя́. / Ті́мже пред престо́лом Го́спода сла́ви // молі́те о є́же спасти́ся нам.

Благослове́н єси́, Христе́ Бо́же наш, зе́млю на́шу креще́нієм просвіти́вий, лю́дем єя́ низпосла́в Ду́ха Свята́го, ї́хже і ко спасе́нію приведи́й, Человіколю́бче, сла́ва Тебі́.

Днесь земля́ Ру́ськая предстої́ть Бо́гу, і плод свята́го креще́нія Єму́ прино́сить. А́нгели ра́дующеся славосло́в'ять, і всі святі́ї с Богоро́дицею лику́юще пою́ть: Христо́с воцари́ся, Христо́с просла́вися. Ве́лій єси́, Го́споди, і чу́дна діла́ Твоя́, Бо́же наш, сла́ва Тебі́.

Пред свято́ю Твоє́ю іко́ною, Влади́чице, моля́щіїся ісціле́ній сподобля́ються, ві́ри і́стинния позна́ніє приє́млють і ага́рянськая наше́ствія отража́ють. Ті́мже і нам, к Тебі́ припа́дающим, гріхо́в оставле́ніє іспроси́, по́мисли благоче́стія сердця́ на́ша просвіти́ і к Си́ну Твоєму́ моли́тву вознеси́ о спасе́нії душ на́ших.

Істо́чник ісціле́ній і ві́ри Правосла́вния утвержде́ніє Поча́євськая Твоя́ іко́на, Богоро́дице, яви́ся; ті́мже і нас, к ней притека́ющих, от бід і іскуше́ній свободи́, Ла́вру Твою́ невріди́му сохрани́, Правосла́віє во о́крест стоя́щих страна́х утверди́ і гріхи́ разріши́ моли́твенник Твої́х; єли́ка бо хо́щеши, мо́жеши.

Пречи́стому Твоєму́ о́бразу покланя́ємся, Благи́й, / прося́ще проще́нія прегріше́ній на́ших, Христе́ Бо́же; / во́лею бо благоволи́л єси́ пло́тію взи́ти на Крест, / да ізба́виши, я́же созда́л єси́, от рабо́ти вра́жия. / Ті́мже благода́рственно вопіє́м Ті: / ра́дости іспо́лнил єси́ вся, Спа́се наш, // прише́дий спасти́ мир.

Неізрече́ннаго і Боже́ственнаго Твоєго́ к челові́ком смотре́нія, / неопи́санноє Сло́во О́тчеє, / і о́браз непи́санний, і богопи́санний побіди́телен, / ві́дуще нело́жнаго Твоєго́ воплоще́нія, // почита́єм Того́ лобиза́юще.