Тропарі й Кондаки дванадесятих свят і свята Пасхи (Київський ізвод)

8 вересня (21 вересня)

Рождество́ Твоє́, Богоро́дице Ді́во, / ра́дость возвісти́ всей вселе́нній, / із Тебе́ бо возсія́ Со́лнце пра́вди, Христо́с Бог наш, / і, разруши́в кля́тву, даде́ благослове́ніє // і, упраздни́в смерть, дарова́ нам живо́т ві́чний.

Іоаки́м і А́нна поноше́нія безча́дства, / і Ада́м і Є́ва от тлі́ сме́ртния свободи́стася, Пречи́стая, / во святі́м рождестві Твоє́м. / То пра́зднують і лю́діє Твої́, / вини́ прегріше́ній ізба́вльшеся, / внегда́ зва́ти Ті: // непло́ди ражда́єть Богоро́дицю і пита́тельницю Жи́зні на́шея.

14 вересня (27 вересня)

Спаси́, Го́споди, лю́ди Твоя́ / і благослови́ достоя́ніє Твоє́, / побі́ди на сопроти́вния да́руя // і Твоє́ сохраня́я Кресто́м Твої́м жи́тельство.

Вознеси́йся на Крест во́лею, / тезоімени́тому Твоєму́ но́вому жи́тельству / щедро́ти Твоя́ да́руй, Христе́ Бо́же. / Возвесели́ нас си́лою Твоє́ю, / побі́ди дая́ нам на сопоста́ти, / посо́біє іму́щим Твоє́ ору́жіє ми́ра, // непобіди́мую побі́ду.

21 листопада (4 грудня)

Днесь благоволе́нія Бо́жия предображе́ніє / і челові́ков спасе́нія пропові́даніє, / в хра́мі Бо́жиї я́сно Ді́ва явля́ється / і Христа́ всім предвозвіща́єть. / Той і ми велегла́сно возопії́м: // ра́дуйся, смотре́нія Зижди́телева ісполне́ніє.

Пречи́стий храм Спасов, / многоці́нний черто́г і Ді́ва, / свяще́нноє сокро́вище сла́ви Бо́жия, / днесь вво́диться в дом Госпо́день, благода́ть совводя́щи, / Я́же в Дусі Боже́ственном, / Ю́же воспіва́ють А́нгели Бо́жії: // Сія́ єсть селе́ніє Небе́сноє.

25 грудня (7 січня)

Рождеcтво́ Твоє́, Христе́ Бо́же наш, / возсія́ ми́рові світ ра́зума, / в нем бо звізда́м служа́щії / звіздо́ю уча́хуся / Тебі́ кла́нятися, Солнцю пра́вди, / і Тебе́ ві́діти с висоти́ восто́ка; // Го́споди, сла́ва Тебі́.

Ді́ва днесь Пресу́щественнаго ражда́єть, / і земля́ верте́п Непристу́пному прино́сить. / А́нгели с па́стирми славосло́в'ять, / волсви́ же со звіздо́ю путеше́ствують; / нас бо ра́ди роди́ся // Отроча́ мла́до, Преві́чний Бог.

6 січня (19 січня)

Во Іорда́ні креща́ющуся Тебі́, Го́споди, / Тро́їчеськоє яви́ся поклоне́ніє, / Роди́телев бо глас свиді́тельствоваше Тебі́, / возлю́бленнаго Тя Си́на імену́я, / і Дух в ви́ді голуби́ні / ізві́ствоваше словесе́ утвержде́ніє. / Явле́йся, Христе́ Бо́же, // і мир просвіще́й, сла́ва Тебі́.

Яви́лся єси́ днесь вселе́нній, / і Світ Твой, Го́споди, зна́менася на нас, / в ра́зумі пою́щих Тя; / прише́л єси́ і яви́лся єси́, // Світ Непристу́пний.

2 лютого (15 лютого)

Ра́дуйся, Благода́тная Богоро́дице Ді́во, / із Тебе́ бо возсія́ Со́лнце Пра́вди — Христо́с Бог наш, / просвіща́яй су́щия во тьмі; / весели́ся і ти, ста́рче пра́ведний, / приє́мий во об'я́тія Свободи́теля душ на́ших, // да́рующаго нам Воскресе́ніє.

Утро́бу Діви́чу освяти́вий Рождеcтво́м Твої́м / і ру́ці Симео́ні благослови́вий, / я́коже подоба́ше, предвари́в, / і ни́ні спасл єси́ нас, Христе́ Бо́же, / но умири́ во бра́нех жи́тельство // і укріпи́ лю́ди, ї́хже возлюби́л єси́, єди́не Человіколю́бче.

25 березня (7 квітня)

Днесь спасе́нія на́шего глави́зна / і є́же от ві́ка Та́їнства явле́ніє: / Син Бо́жий Син Ді́ви бива́єть, / і Гавриї́л благода́ть благовіству́єть. / Ті́мже і ми с ним Богоро́диці возопії́м: // ра́дуйся, Благода́тная, / Госпо́дь с Тобо́ю.

Взбра́нной воєво́ді побіди́тельная, / я́ко ізба́вльшеся от злих, / благода́рственная воспису́єм Ті, раби́ Твої́, Богоро́дице. / Но я́ко іму́щая держа́ву непобіди́мую, / от вся́ких нас бід свободи́, да зове́м Ті: // ра́дуйся, Неві́сто Неневі́стная.

в неділю перед Пасхою

О́бщеє воскресе́ніє / пре́жде Твоєя́ стра́сти увіря́я, / із ме́ртвих воздви́гл єси́ Ла́заря, Христе́ Бо́же. / Ті́мже і ми, я́ко о́троци, побі́ди зна́менія нося́ще, / Тебі́, Побіди́телю смéрти, вопіє́м: / оса́нна в ви́шніх, // Благослове́н Гряди́й во і́м'я Госпо́днє.

Спогре́бшеся Тебі́ креще́нієм, Христе́ Бо́же наш, / безсме́ртния жи́зні сподо́бихомся воскресе́нієм Твої́м, / і, воспіва́юще, зове́м: / оса́нна в ви́шніх, // Благослове́н Гряди́й во і́м'я Госпо́днє.

На престо́лі на Небесі́, / на жреб'я́ті на землі́ носи́мий, Христе́ Бо́же, / А́нгелов хвале́ніє і діте́й воспіва́ніє / прия́л єси́ зову́щих Ті: / Благослове́н єси́ Гряди́й // Ада́ма воззва́ти.

Христо́с воскре́се із ме́ртвих, / сме́ртію смерть попра́в / і су́щим во гробі́х живо́т дарова́в.

А́ще і во гроб снизше́л єси́, Безсме́ртне, / но а́дову разруши́л єси́ си́лу / і воскресл єси́, я́ко побіди́тель, Христе́ Бо́же, / жена́м мироно́сицям віща́вий: ра́дуйтеся! / і Твої́м Апо́столом мир да́руяй, / па́дшим подая́й воскресе́ніє.

40‑й день після Пасхи

Возне́слся єси́ во сла́ві, Христе́ Бо́же наш, / ра́дость сотвори́вий ученико́м / обітова́нієм Свята́го Ду́ха, / ізвіще́нним їм би́вшим благослове́нієм, // я́ко Ти єси́ Син Бо́жий, Ізба́витель ми́ра.

Є́же о нас іспо́лнив смотре́ніє / і я́же на землі́ соєдини́в Небе́сним, / возне́слся єси́ во сла́ві, Христе́ Бо́же наш, / ніка́коже отлуча́яся, но пребива́я неотсту́пний / і вопія́ лю́б'ящим Тя: // Аз єсьм с ва́ми, і нікто́же на ви.

50‑й день після Пасхи

Благослове́н єси́, Христе́ Бо́же наш, / І́же прему́дри ловці́ явле́й, / низпосла́в їм Ду́ха Свята́го, / і ті́ми уловле́й вселе́нную, // Человіколю́бче, сла́ва Тебі́.

Єгда́ снизше́д, язи́ки слія́, разділя́ше язи́ки, Ви́шній; / єгда́ же о́гненния язи́ки раздая́ше, в соєдине́ніє вся призва́, // і согла́сно сла́вим Всесвята́го Ду́ха.

6 серпня (19 серпня)

Преобрази́лся єси́ на горі́, Христе́ Бо́же, / показа́вий ученико́м Твої́м сла́ву Твою́, я́коже можа́ху; / да возсія́єть і нам, грі́шним, світ Твой присносу́щний // моли́твами Богоро́диці, Світода́вче, сла́ва Тебі́.

На горі́ преобрази́лся єси́, / і я́коже вміща́ху ученици́ Твої́, сла́ву Твою́, Христе́ Бо́же, ви́діша, / да єгда́ Тя у́зрять распина́єма, / страда́ніє у́бо уразумі́ють во́льноє, / ми́рові же пропові́дять, // я́ко Ти єси́ воі́стину О́тчеє сія́ніє.

15 серпня (28 серпня)

В рождестві́ ді́вcтво сохрани́ла єси́, / во успе́нії ми́ра не оста́вила єси́, Богоро́дице, / преста́вилася єси́ к животу́, Ма́ти су́щи Живота́, // і моли́твами Твої́ми ізбавля́єши от смéрти ду́ші на́ша.

В моли́твах Неусипа́ющую Богоро́дицю / і в предста́тельствах непрело́жноє Упова́ніє / гроб і умерщвле́ніє не удержа́ста, / я́коже бо Живота́ Ма́тер / к животу́ преста́ви, // во утро́бу Всели́вийся присноді́вственную.