Влады́ко Го́споди Иису́се Христе́, Бо́же на́ш, Исто́чниче жи́зни и безсме́ртия, всея́ тва́ри ви́димыя и неви́димыя Соде́телю, безнача́льнаго Отца́ соприсносу́щный Сы́не и собезнача́льный, премно́гия ра́ди бла́гости в после́дния дни́ в пло́ть оболки́йся, и распны́йся, и погребы́йся за ны́ неблагода́рныя и злонра́вныя, и Твое́ю Кро́вию обнови́вый растле́вшее грехо́м естество́ на́ше, Са́м, Безсме́ртный Царю́, приими́ и мое́ гре́шнаго покая́ние, и приклони́ у́хо Твое́ мне́, и услы́ши глаго́лы моя́. Согреши́х бо, Го́споди, согреши́х на не́бо и пред Тобо́ю, и не́смь досто́ин воззре́ти на высоту́ сла́вы Твоея́: прогне́вах бо Твою́ бла́гость, Твоя́ за́поведи преступи́в, и не послу́шав Твои́х повеле́ний. Но Ты́, Го́споди, незло́бив сы́й, долготерпели́в же и многоми́лостив, не пре́дал еси́ мя́ поги́бнути со беззако́ньми мои́ми, моего́ вся́чески ожида́я обраще́ния. Ты́ бо ре́кл еси́, Человеколю́бче, проро́ком Твои́м: я́ко хоте́нием не хощу́ сме́рти гре́шника, но е́же обрати́тися и жи́ву бы́ти ему́. Не хо́щеши бо, Влады́ко, созда́ния Твое́ю руку́ погуби́ти, ниже́ благоволи́ши о поги́бели челове́честей, но хо́щеши все́м спасти́ся, и в ра́зум и́стины приити́. Те́мже и а́з, а́ще и недосто́ин е́смь небесе́ и земли́, и сея́ привре́менныя жи́зни, всего́ себе́ повину́в греху́, и сласте́м порабо́тив, и Тво́й оскверни́в о́браз; но творе́ние и созда́ние Твое́ бы́в, не отчаява́ю своего́ спасе́ния окая́нный, на Твое́ же безме́рное благоутро́бие дерза́я, прихожду́. Приими́ у́бо и мене́, Человеколю́бче Го́споди, я́коже блудни́цу, я́ко разбо́йника, я́ко мытаря́ и я́ко блу́днаго, и возми́ мое́ тя́жкое бре́мя грехо́в, гре́х взе́мляй ми́ра, и не́мощи челове́ческия исцеля́яй, тружда́ющияся и обремене́нныя к Себе́ призыва́яй и упокоева́яй, не прише́дый призва́ти пра́ведныя, но гре́шныя на покая́ние. И очи́сти мя́ от вся́кия скве́рны пло́ти и ду́ха, и научи́ мя́ соверша́ти святы́ню во стра́се Твое́м: я́ко да чи́стым све́дением со́вести моея́, святы́нь Твои́х ча́сть прие́мля, соединю́ся свято́му Те́лу Твоему́ и Кро́ви, и име́ю Тебе́ во мне́ живу́ща и пребыва́юща, со Отце́м, и Святы́м Твои́м Ду́хом. Е́й, Го́споди Иису́се Христе́, Бо́же мо́й, и да не в су́д ми́ бу́дет прича́стие пречи́стых и животворя́щих Та́ин Твои́х, ниже́ да не́мощен бу́ду душе́ю же и те́лом, от е́же недосто́йне те́м причаща́тися, но да́ждь ми́, да́же до коне́чнаго моего́ издыха́ния, неосужде́нно восприима́ти ча́сть святы́нь Твои́х, в Ду́ха Свята́го обще́ние, в напу́тие живота́ ве́чнаго, и во благоприя́тен отве́т на Стра́шнем суди́щи Твое́м: я́ко да и а́з со все́ми избра́нными Твои́ми о́бщник бу́ду нетле́нных Твои́х бла́г, я́же угото́вал еси́ лю́бящим Тя́, Го́споди, в ни́хже препросла́влен еси́ во ве́ки. Ами́нь.

Влади́ко Го́споди Ісу́се Христе́, Бо́же наш, Істо́чниче жи́зні і безсме́ртія, всея́ тва́рі ви́димия і неви́димия Соді́телю, Безнача́льнаго Отця́ Соприсносу́щний Си́не і Собезнача́льний, премно́гия ра́ди бла́гости в послі́днія дні в плоть оболки́йся, і распни́йся, і погреби́йся за ни неблагода́рния і злонра́вния, і Твоє́ю Кро́вію обнови́вий растлі́вшеє гріхо́м єстество́ на́ше. Сам, Безсме́ртний Царю́, прийми́ і моє́, грі́шнаго, покая́ніє, і приклони́ у́хо Твоє́ мні, і усли́ши глаго́ли моя́. Согріши́х бо, Го́споди, согріши́х на не́бо і пред Тобо́ю, і нісьм досто́їн воззрі́ти на висоту́ сла́ви Твоєя́: прогні́вах бо Твою́ бла́гость, Твоя́ за́повіді преступи́в, і не послу́шав Твої́х повелі́ній. Но Ти, Го́споди, незло́бив сий, долготерпіли́в же і многоми́лостив, не пре́дал єси́ м'я поги́бнути со беззако́ньми мої́ми, моєго́ вся́чеськи ожида́я обраще́нія. Ти бо рекл єси́, Человіколю́бче, проро́ком Твої́м: я́ко хоті́нієм не хощу́ сме́рти грі́шника, но є́же обрати́тися і жи́ву би́ти єму́. Не хо́щеши бо, Влади́ко, созда́нія Твоє́ю руку́ погуби́ти, ніже́ благоволи́ши о поги́белі челові́честій, но хо́щеши всім спасти́ся і в ра́зум і́стини прийти́. Ті́мже і аз, а́ще і недосто́їн єсьм небесе́ і землі́, і сея́ привре́менния жи́зні, всего́ себе́ повину́в гріху́, і сласте́м порабо́тив, і Твой оскверни́в о́браз; но творе́ніє і созда́ніє Твоє́ бив, не отчаява́ю своєго́ спасе́нія, окая́нний, на Твоє́ же безмі́рноє благоутро́біє дерза́я прихожду́. Прийми́ у́бо і мене́, Человіколю́бче Го́споди, я́коже блудни́цю, я́ко разбо́йника, я́ко митаря́ і я́ко блу́днаго, і возьми́ моє́ тя́жкоє бре́м'я гріхо́в, гріх взе́мляй ми́ра, і не́мощі челові́чеськія ісціля́яй, тружда́ющияся і обремене́нния к Себі́ призива́яй і упокоєва́яй, не прише́дий призва́ти пра́ведния, но грі́шния на покая́ніє. І очи́сти м'я от вся́кия скве́рни пло́ті і ду́ха, і научи́ м'я соверша́ти святи́ню во стра́сі Твоє́м, я́ко да чи́стим сві́дінієм со́вісти моєя́, святи́нь Твої́х часть приє́мля, соєдиню́ся Свято́му Ті́лу Твоєму́ і Кро́ві, і імі́ю Тебе́ во мні живу́ща і пребива́юща, со Отце́м і Святи́м Твої́м Ду́хом. Єй, Го́споди Ісу́се Христе́, Бо́же мой, і да не в суд мі бу́деть прича́стіє Пречи́стих і Животворя́щих Та́їн Твої́х, ніже́ да не́мощен бу́ду душе́ю же і ті́лом, от є́же недосто́йні тім причаща́тися. Но даждь мі да́же до коне́чнаго моєго́ іздиха́нія неосужде́нно восприйма́ти часть святи́нь Твої́х, в Ду́ха Свята́го обще́ніє, в напу́тіє живота́ ві́чнаго і во благоприя́тен отві́т на Стра́шнім Суди́щі Твоє́м; я́ко да і аз со всі́ми ізбра́нними Твої́ми о́бщник бу́ду нетлі́нних Твої́х благ, я́же угото́вал єси́ лю́б'ящим Тя, Го́споди; в ни́хже препросла́влен єси́ во ві́ки. Амі́нь.

Го́споди Бо́же мо́й, ве́м, я́ко не́смь досто́ин, ниже́ дово́лен, да под кро́в вни́деши хра́ма души́ моея́, зане́же ве́сь пу́ст и па́лся е́сть, и не и́маши во мне́ ме́ста досто́йна е́же главу́ подклони́ти: но я́коже с высоты́ на́с ра́ди смири́л еси́ Себе́, смири́ся и ны́не смире́нию моему́; и я́коже восприя́л еси́ в верте́пе и в я́слех безслове́сных возлещи́, си́це восприими́ и в я́слех безслове́сныя моея́ души́, и во оскверне́нное мое́ те́ло вни́ти. И я́коже не неудосто́ил еси́ вни́ти, и свечеря́ти со гре́шники в дому́ Си́мона прокаже́ннаго, та́ко изво́ли вни́ти и в до́м смире́нныя моея́ души́, прокаже́нныя и гре́шныя; и я́коже не отри́нул еси́ подо́бную мне́ блудни́цу и гре́шную, прише́дшую и прикосну́вшуюся Тебе́, си́це умилосе́рдися и о мне́ гре́шнем, приходя́щем и прикаса́ющем Ти́ ся́; и я́коже не возгнуша́лся еси́ скве́рных ея́ у́ст и нечи́стых, целу́ющих Тя́, ниже́ мои́х возгнуша́йся скве́рнших о́ныя у́ст и нечи́стших, ниже́ ме́рзких мои́х и нечи́стых усте́н, и скве́рнаго и нечи́стейшаго моего́ язы́ка. Но да бу́дет ми́ у́гль пресвята́го Твоего́ Те́ла, и честны́я Твоея́ Кро́ве, во освяще́ние и просвеще́ние и здра́вие смире́нней мое́й души́ и те́лу, во облегче́ние тя́жестей мно́гих мои́х согреше́ний, в соблюде́ние от вся́каго диа́вольскаго де́йства, во отгна́ние и возбране́ние зла́го моего́ и лука́ваго обы́чая, во умерщвле́ние страсте́й, в снабде́ние за́поведей Твои́х, в приложе́ние Боже́ственныя Твоея́ благода́ти, и Твоего́ Ца́рствия присвое́ние. Не бо я́ко презира́яй прихожду́ к Тебе́, Христе́ Бо́же, но я́ко дерза́я на неизрече́нную Твою́ бла́гость, и да не на мно́зе удаля́яйся обще́ния Твоего́, от мы́сленнаго во́лка звероуловле́н бу́ду. Те́мже молю́ся Тебе́: я́ко еди́н сы́й Свя́т, Влады́ко, освяти́ мою́ ду́шу и те́ло, у́м и се́рдце, чревеса́ и утро́бы, и всего́ мя́ обнови́, и вкорени́ стра́х Тво́й во удесе́х мои́х, и освяще́ние Твое́ неотъе́млемо от мене́ сотвори́; и бу́ди ми́ помо́щник и засту́пник, окормля́я в ми́ре живо́т мо́й, сподобля́я мя́ и одесну́ю Тебе́ предстоя́ния со святы́ми Твои́ми, моли́твами и моле́ньми Пречи́стыя Твоея́ Ма́тере, невеще́ственных Твои́х служи́телей и пречи́стых си́л, и все́х святы́х, от ве́ка Тебе́ благоугоди́вших. Ами́нь

Го́споди Бо́же мой, вім, я́ко нісьм досто́їн, ніже́ дово́лен, да под кров вни́деши хра́ма душі́ моєя́, зане́же весь пуст і па́лся єсть, і не і́маши во мні мі́ста досто́йна, є́же главу́ подклони́ти. Но я́коже с висоти́ нас ра́ди смири́л єси́ Себе́, смири́ся і ни́ні смире́нію моєму́; і я́коже восприя́л єси́ в верте́пі і в я́слех безслове́сних возлещи́, си́це восприйми́ і в я́слех безслове́сния моєя́ душі́, і во оскверне́нноє моє́ ті́ло вни́ти. І я́коже не неудосто́їл єси́ вни́ти і свечеря́ти со грі́шники в дому́ Си́мона прокаже́ннаго, та́ко ізво́ли вни́ти і в дом смире́нния моєя́ душі́, прокаже́нния і грі́шния. І я́коже не отри́нул єси́ подо́бную мні блудни́цю і грі́шную, прише́дшую і прикосну́вшуюся Тебі́, си́це умилосе́рдися і о мні, грі́шнім, приходя́щем і прикаса́ющем Ті ся. І я́коже не возгнуша́лся єси́ скве́рних єя́ уст і нечи́стих, цілу́ющих Тя, ніже́ мої́х возгнуша́йся скве́рнших о́ния уст і нечи́стших, ніже́ ме́рзьких мої́х і нечи́стих усте́н, і скве́рнаго і нечи́стійшаго моєго́ язи́ка. Но да бу́деть мі угль Пресвята́го Твоєго́ Ті́ла і Честни́я Твоєя́ Кро́ве во освяще́ніє, і просвіще́ніє, і здра́віє смире́нній моє́й душі́ і ті́лу, во облегче́ніє тя́жестей мно́гих мої́х согріше́ній, в соблюде́ніє от вся́каго дия́вольськаго ді́йства, во отгна́ніє і возбране́ніє зла́го моєго́ і лука́ваго оби́чая, во умерщвле́ніє страсте́й, в снабді́ніє за́повідей Твої́х, в приложе́ніє Боже́ственния Твоєя́ благода́ті і Твоєго́ Ца́рствія присвоє́ніє. Не бо я́ко презира́яй прихожду́ к Тебі́, Христе́ Бо́же, но я́ко дерза́я на неізрече́нную Твою́ бла́гость; і да не на мно́зі удаля́яйся обще́нія Твоєго́, от ми́сленнаго во́лка звіроуловле́н бу́ду. Ті́мже молю́ся Тебі́: я́ко єди́н сий Свят, Влади́ко, освяти́ мою́ ду́шу і ті́ло, ум і се́рдце, чревеса́ і утро́би, і всего́ м'я обнови́, і вкорени́ страх Твой во удесі́х мої́х, і освяще́ніє Твоє́ неот'є́млемо от мене́ сотвори́; і бу́ди мі помо́щник і засту́пник, окормля́я в ми́рі живо́т мой, сподобля́я м'я і одесну́ю Тебе́ предстоя́нія со святи́ми Твої́ми, моли́твами і моле́ньми Пречи́стия Твоєя́ Ма́тере, невеще́ственних Твої́х служи́телей і пречи́стих сил, і всіх святи́х, от ві́ка Тебі́ благоугоди́вших. Амі́нь.

Еди́не чи́стый и нетле́нный Го́споди, за неизрече́нную ми́лость человеколю́бия на́ше все́ восприе́мый смеше́ние, от чи́стых и де́вственных крове́й па́че естества́ ро́ждшия Тя́, Ду́ха Боже́ственнаго наше́ствием, и благоволе́нием Отца́ присносу́щнаго, Христе́ Иису́се, прему́дросте Бо́жия, и ми́ре, и си́ло; Твои́м восприя́тием животворя́щая и спаси́тельная страда́ния восприе́мый, кре́ст, гво́здия, копие́, сме́рть, умертви́ моя́ душетле́нныя стра́сти теле́сныя.

Погребе́нием Твои́м а́дова плени́вый ца́рствия, погреби́ моя́ благи́ми по́мыслы лука́вая сове́тования, и лука́вствия ду́хи разори́.

Тридне́вным Твои́м и живоно́сным воскресе́нием па́дшаго пра́отца возста́вивый, возста́ви мя́ грехо́м попо́лзшагося, о́бразы мне́ покая́ния предлага́я.

Пресла́вным Твои́м вознесе́нием плотско́е обожи́вый восприя́тие, и сие́ десны́м Отца́ седе́нием почты́й, сподо́би мя́ прича́стием святы́х Твои́х Та́ин десну́ю ча́сть спаса́емых получи́ти.

Сни́тием Уте́шителя Твоего́ Ду́ха сосу́ды че́стны свяще́нныя Твоя́ ученики́ соде́лавый, прия́телище и мене́ покажи́ Того́ прише́ствия.

Хотя́й па́ки приити́ суди́ти вселе́нней пра́вдою, благоволи́ и мне́ усре́сти Тя́ на о́блацех, Судию́ и Созда́теля моего́, со все́ми святы́ми Твои́ми: да безконе́чно славосло́влю и воспева́ю Тя́, со Безнача́льным Твои́м Отце́м, и Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в. Ами́нь.

Єди́не чи́стий і нетлі́нний Го́споди, за неізрече́нную ми́лость человіколю́бія на́ше все восприє́мий сміше́ніє от чи́стих і ді́вственних крове́й, па́че єстества́ Ро́ждшия Тя, Ду́ха Боже́ственнаго наше́ствієм і благоволе́нієм Отця́ присносу́щнаго, Христе́ Ісу́се, Прему́дросте Бо́жия, і Ми́ре, і Си́ло. Твої́м восприя́тієм животворя́щая і спаси́тельная страда́нія восприє́мий: Крест, гво́здія, копіє́, смерть, — умертви́ моя́ душетлі́нния стра́сті тіле́сния. Погребе́нієм Твої́м а́дова пліни́вий ца́рствія, погреби́ моя́ благи́ми по́мисли лука́вая сові́тованія і лука́вствія ду́хи разори́. Тридне́вним Твої́м і живоно́сним воскресе́нієм па́дшаго пра́отця возста́вивий, возста́ви м'я гріхо́м попо́лзшагося, о́брази мні покая́нія предлага́я. Пресла́вним Твої́м вознесе́нієм плотсько́є обожи́вий восприя́тіє і сіє́ десни́м Отця́ сіді́нієм почти́й, сподо́би м'я прича́стієм Святи́х Твої́х Та́їн десну́ю часть спаса́ємих получи́ти. Сни́тієм Уті́шителя Твоєго́ Ду́ха сосу́ди че́стни свяще́нния Твоя́ ученики́ соді́лавий, прия́телище і мене́ покажи́ Того́ прише́ствія. Хотя́й па́ки прийти́ суди́ти вселе́нній пра́вдою, благоволи́ і мні усрі́сти Тя на о́блаціх, Судію́ і Созда́теля моєго́, со всі́ми святи́ми Твої́ми: да безконе́чно славосло́влю і воспіва́ю Тя, со Безнача́льним Твої́м Отце́м, і Пресвяти́м, і Благи́м, і Животворя́щим Твої́м Ду́хом, ни́ні, і при́сно, і во ві́ки віко́в. Амі́нь.

Влады́ко Го́споди Иису́се Христе́, Бо́же на́ш, еди́не име́яй вла́сть челове́ком оставля́ти грехи́, я́ко бла́г и Человеколю́бец пре́зри моя́ вся́ в ве́дении и не в ве́дении прегреше́ния, и сподо́би мя́ неосужде́нно причасти́тися Боже́ственных, и пресла́вных, и пречи́стых, и животворя́щих Твои́х Та́ин, не в тя́жесть, ни в му́ку, ни в приложе́ние грехо́в, но во очище́ние, и освяще́ние, и обруче́ние бу́дущаго Живота́ и ца́рствия, в сте́ну и по́мощь, и в возраже́ние сопроти́вных, во истребле́ние мно́гих мои́х согреше́ний.

Ты́ бо еси́ Бо́г ми́лости, и щедро́т, и человеколю́бия, и Тебе́ сла́ву возсыла́ем, со Отце́м, и Святы́м Ду́хом, ны́не и при́сно, и во ве́ки веко́в. Ами́нь.

Влади́ко Го́споди Ісу́се Христе́, Бо́же наш, єди́не імі́яй власть челові́ком оставля́ти гріхи́, я́ко Благ і Человіколю́бець, пре́зри моя́ вся в ві́дінії і не в ві́дінії прегріше́нія; і сподо́би м'я неосужде́нно причасти́тися Боже́ственних, і Пресла́вних, і Пречи́стих, і Животворя́щих Твої́х Та́їн, не в тя́жесть, ні в му́ку, ні в приложе́ніє гріхо́в, но во очище́ніє, і освяще́ніє, і обруче́ніє бу́дущаго живота́ і Ца́рствія, в сті́ну і по́мощ, і в возраже́ніє сопроти́вних, во істребле́ніє мно́гих мої́х согріше́ній. Ти бо єси́ Бог ми́лости, і щедро́т, і человіколю́бія, і Тебі́ сла́ву возсила́єм со Отце́м, і Святи́м Ду́хом, ни́ні, і при́сно, і во ві́ки віко́в. Амі́нь.

Ве́м, Го́споди, я́ко недосто́йне причаща́юся пречи́стаго Твоего́ Те́ла и честны́я Твоея́ Кро́ве, и пови́нен е́смь, и су́д себе́ я́м и пию́, не разсужда́я Те́ла и Кро́ве Тебе́ Христа́ и Бо́га моего́, но на щедро́ты Твоя́ дерза́я прихожду́ к Тебе́ ре́кшему: яды́й Мою́ пло́ть, и пия́й Мою́ кро́вь, во Мне́ пребыва́ет, и А́з в не́м.

Умилосе́рдися у́бо, Го́споди, и не обличи́ мя́ гре́шнаго, но сотвори́ со мно́ю по ми́лости Твое́й; и да бу́дут ми́ свята́я сия́ во исцеле́ние, и очище́ние, и просвеще́ние, и сохране́ние, и спасе́ние, и во освяще́ние души́ и те́ла; во отгна́ние вся́каго мечта́ния, и лука́ваго дея́ния, и де́йства диа́вольскаго, мысленнe во удесе́х мои́х де́йствуемаго, в дерзнове́ние и любо́вь, я́же к Тебе́; во исправле́ние жития́ и утвержде́ние, в возраще́ние доброде́тели и соверше́нства; во исполне́ние за́поведей, в Ду́ха Свята́го обще́ние, в напу́тие живота́ ве́чнаго, во отве́т благоприя́тен на Стра́шнем суди́щи Твое́м: не в су́д или́ во осужде́ние.

Вім, Го́споди, я́ко недосто́йні причаща́юся Пречи́стаго Твоєго́ Ті́ла і Честни́я Твоєя́ Кро́ве, і пови́нен єсьм, і суд себі́ ям і пію́, не разсужда́я Ті́ла і Кро́ве Тебе́, Христа́ і Бо́га моєго́, но на щедро́ти Твоя́ дерза́я прихожду́ к Тебі́ ре́кшему: яди́й Мою́ Плоть і пія́й Мою́ Кров во Мні пребива́єть і Аз в нем. Умилосе́рдися у́бо, Го́споди, і не обличи́ м'я, грі́шнаго, но сотвори́ со мно́ю по ми́лості Твоє́й; і да бу́дуть мі свята́я сія́ во ісціле́ніє, і очище́ніє, і просвіще́ніє, і сохране́ніє, і спасе́ніє, і во освяще́ніє душі́ і ті́ла; во отгна́ніє вся́каго мечта́нія, і лука́ваго дія́нія, і ді́йства дия́вольськаго, ми́сленні во удесі́х мої́х ді́йствуємаго, в дерзнове́ніє і любо́в, я́же к Тебі́; во ісправле́ніє житія́ і утвержде́ніє, в возраще́ніє доброді́телі і соверше́нства; во ісполне́ніє за́повідей, в Ду́ха Свята́го обще́ніє, в напу́тіє живота́ ві́чнаго, во отві́т благоприя́тен на Стра́шнім Суди́щі Твоє́м; не в суд іли́ во осужде́ніє.

От скве́рных усте́н, от ме́рзкаго се́рдца, от нечи́стаго язы́ка, от души́ оскверне́ны, приими́ моле́ние, Христе́ мо́й, и не пре́зри мои́х ни слове́с, ниже́ образо́в, ниже́ безсту́дия. Да́ждь ми́ дерзнове́нно глаго́лати, я́же хощу́, Христе́ мо́й, па́че же и научи́ мя́, что́ ми́ подоба́ет твори́ти и глаго́лати.

Согреши́х па́че блудни́цы, я́же уве́де, где́ обита́еши, ми́ро купи́вши, прии́де де́рзостне пома́зати Твои́ но́зе, Бо́га моего́, Влады́ки и Христа́ моего́. Я́коже ону́ не отри́нул еси́ прише́дшую от се́рдца, ниже́ мене́ возгнуша́йся, Сло́ве: Твои́ же ми́ пода́ждь но́зе, и держа́ти и целова́ти, и струя́ми сле́зными, я́ко многоце́нным ми́ром, сия́ де́рзостно пома́зати. Омы́й мя́ слеза́ми мои́ми, очи́сти мя́ и́ми, Сло́ве. Оста́ви и прегреше́ния моя́, и проще́ние ми́ пода́ждь.

Ве́си зо́л мно́жество, ве́си и стру́пы моя́, и я́звы зри́ши моя́, но и ве́ру ве́си, и произволе́ние зри́ши, и воздыха́ние слы́шиши. Не таи́тся Тебе́, Бо́же мо́й, Тво́рче мо́й, Изба́вителю мо́й, ниже́ ка́пля сле́зная, ниже́ ка́пли ча́сть не́кая. Несоде́ланное мое́ ви́десте о́чи Твои́, в кни́зе же Твое́й и еще́ несоде́янная напи́сана Тебе́ су́ть.

Ви́ждь смире́ние мое́, ви́ждь тру́д мо́й ели́к, и грехи́ вся́ оста́ви ми́, Бо́же вся́ческих: да чи́стым се́рдцем, притре́петною мы́слию, и душе́ю сокруше́нною, нескве́рных Твои́х причащу́ся и пресвяты́х Та́ин, и́миже оживля́ется и обожа́ется вся́к яды́й же и пия́й чи́стым се́рдцем; Ты́ бо ре́кл еси́, Влады́ко мо́й: вся́к яды́й Мою́ Пло́ть, и пия́й Мою́ Кро́вь, во Мне́ у́бо се́й пребыва́ет, в не́мже и А́з е́смь. И́стинно сло́во вся́ко Влады́ки и Бо́га моего́: боже́ственных бо причаща́яйся и боготворя́щих благода́тей, не у́бо е́смь еди́н, но с Тобо́ю, Христе́ мо́й, Све́том трисо́лнечным, просвеща́ющим ми́р. Да у́бо не еди́н пребу́ду кроме́ Тебе́ Живода́вца, дыха́ния моего́, живота́ моего́, ра́дования моего́, спасе́ния ми́ру.

Сего́ ра́ди к Тебе́ приступи́х, я́коже зри́ши, со слеза́ми, и душе́ю сокруше́нною избавле́ния мои́х прегреше́ний прошу́ прия́ти ми́, и Твои́х живода́тельных и непоро́чных Та́инств причасти́тися неосужде́нно, да пребу́деши, я́коже ре́кл еси́, со мно́ю треокая́нным: да не кроме́ обре́т мя́ Твоея́ благода́ти, преле́стник восхи́тит мя́ льсти́вне, и прельсти́в отведе́т боготворя́щих Твои́х слове́с. Сего́ ра́ди к Тебе́ припа́даю, и те́пле вопию́ Ти́: я́коже блу́днаго прия́л еси́, и блудни́цу прише́дшую, та́ко приими́ мя́ блу́днаго и скве́рнаго, Ще́дре.

Душе́ю сокруше́нною, ны́не бо к Тебе́ приходя́, ве́м, Спа́се, я́ко ины́й, я́коже а́з, не прегреши́ Тебе́, ниже́ соде́я дея́ния, я́же а́з соде́ях. Но сие́ па́ки ве́м, я́ко не вели́чество прегреше́ний, ни грехо́в мно́жество превосхо́дит Бо́га моего́ мно́гое долготерпе́ние, и человеколю́бие кра́йнее; но ми́лостию состра́стия те́пле ка́ющияся, и чи́стиши, и све́тлиши, и све́та твори́ши прича́стники, о́бщники Божества́ Твоего́ соде́ловаяй незави́стно, и стра́нное и А́нгелом, и челове́ческим мы́слем, бесе́дуеши и́м мно́гажды, я́коже друго́м Твои́м и́стинным. Сия́ де́рзостна творя́т мя́, сия́ вперя́ют мя́, Христе́ мо́й.

И дерза́я Твои́м бога́тым к на́м благодея́нием, ра́дуяся вку́пе и трепе́ща, огне́ви причаща́юся трава́ сы́й, и стра́нно чу́до, ороша́ем неопа́льно, я́коже у́бо купина́ дре́вле неопа́льне горя́щи.

Ны́не благода́рною мы́слию, благода́рным же се́рдцем, благода́рными удесы́ мои́ми, души́ и те́ла моего́, покланя́юся и велича́ю, и славосло́влю Тя́, Бо́же мо́й, я́ко благослове́нна су́ща, ны́не же и во ве́ки.

От скве́рних усте́н, от ме́рзькаго се́рдця, от нечи́стаго язи́ка, от душі́ оскверне́ни, прийми́ моле́ніє, Христе́ мой, і не пре́зри мої́х ні слове́с, ніже́ образо́в, ніже́ безсту́дія^*. Даждь мі дерзнове́нно глаго́лати, я́же хощу́, Христе́ мой, па́че же і научи́ м'я, что мі подоба́єть твори́ти і глаго́лати.

Согріши́х па́че блудни́ці, я́же уві́ді, гді обита́єши, ми́ро купи́вши, при́йде де́рзостні пома́зати Твої́ но́зі, Бо́га моєго́, Влади́ки і Христа́ моєго́. Я́коже о́ну не отри́нул єси́ прише́дшую от се́рдця, ніже́ мене́ возгнуша́йся, Сло́ве; Твої́ же мі пода́ждь но́зі і держа́ти, і цілова́ти, і струя́ми сле́зними, я́ко многоці́нним ми́ром, сія́ де́рзостно пома́зати. Оми́й м'я слеза́ми мої́ми, очи́сти м'я ї́ми, Сло́ве. Оста́ви і прегріше́нія моя́ і проще́ніє мі пода́ждь.

Ві́си зол мно́жество, ві́си і стру́пи моя́, і я́зви зри́ши моя́, но і ві́ру ві́си, і проізволе́ніє зри́ши, і воздиха́ніє сли́шиши. Не таї́ться Тебе́, Бо́же мой, Тво́рче мой, Ізба́вителю мой, ніже́ ка́пля сле́зная, ніже́ ка́плі часть ні́кая. Несоді́ланноє моє́ ви́дісті о́чі Твої́, в кни́зі же Твоє́й і єще́ несоді́янная напи́сана Тебі́ суть.

Виждь смире́ніє моє́, виждь труд мой єли́к, і гріхи́ вся оста́ви мі, Бо́же вся́чеських, да чи́стим се́рдцем, притре́петною ми́слію і душе́ю сокруше́нною нескве́рних Твої́х причащу́ся і Пресвяти́х Та́їн, ї́миже оживля́ється і обожа́ється всяк яди́й же і пія́й чи́стим се́рдцем; Ти бо рекл єси́, Влади́ко мой: всяк яди́й Мою́ Плоть, і пія́й Мою́ Кров во Мні у́бо сей пребива́єть в не́мже і Аз єсьм. І́стинно сло́во вся́ко Влади́ки і Бо́га моєго́, боже́ственних бо причаща́яйся і боготворя́щих благода́тей, не у́бо єсьм єди́н, но с Тобо́ю, Христе́ мой, Сві́том трисо́лнечним, просвіща́ющим мир. Да у́бо не єди́н пребу́ду кромі́ Тебе́ Живода́вця, диха́нія моєго́, живота́ моєго́, ра́дованія моєго́, спасе́нія ми́ру.

Сего́ ра́ди к Тебі́ приступи́х, я́коже зри́ши, со слеза́ми і душе́ю сокруше́нною ізбавле́нія мої́х прегріше́ній прошу́ прия́ти мі, і Твої́х Живода́тельних і Непоро́чних Та́їнств причасти́тися неосужде́нно, да пребу́деши, я́коже рекл єси́, со мно́ю треокая́нним; да не кромі́ обрі́т м'я Твоєя́ благода́ті, преле́стник восхи́тить м'я льсти́вні, і прельсти́в отведе́ть боготворя́щих Твої́х слове́с. Сего́ ра́ди к Тебі́ припа́даю і те́плі вопію́ Ті: я́коже блу́днаго прия́л єси́ і блудни́цю прише́дшую, та́ко прийми́ м'я блу́днаго і скве́рнаго, Ще́дре.

Душе́ю сокруше́нною ни́ні бо к Тебі́ приходя́, вім, Спа́се, я́ко іни́й, я́коже аз, не прегріши́ Тебі́, ніже́ соді́я дія́нія, я́же аз соді́ях. Но сіє́ па́ки вім, я́ко ні вели́чество прегріше́ній, ні гріхо́в мно́жество превосхо́дить Бо́га моєго́ мно́гоє долготерпі́ніє і человіколю́біє кра́йнєє; но ми́лостію состра́стія те́плі ка́ющияся, і чи́стиши, і сві́тлиши, і сві́та твори́ши прича́стники, о́бщники Божества́ Твоєго́ соді́ловаяй незави́стно, і стра́нноє і А́нгелом, і челові́чеським ми́слем, бесі́дуєши їм мно́гажди, я́коже друго́м Твої́м і́стинним. Сія́ де́рзостна творя́ть м'я, сія́ вперя́ють^* м'я, Христе́ мой.

І дерза́я Твої́м бога́тим к нам благодія́нієм, ра́дуяся вку́пі і трепе́ща, огне́ві причаща́юся трава́ сий, і стра́нно чу́до, ороша́єм неопа́льно, я́коже у́бо купина́ дре́вле неопа́льні горя́щи. Ни́ні благода́рною ми́слію, благода́рним же се́рдцем, благода́рними удеси́ мої́ми, душі́ і ті́ла моєго́, покланя́юся, і велича́ю, і славосло́влю Тя, Бо́же мой, я́ко благослове́нна су́ща, ни́ні же і во ві́ки.

Бо́же, осла́би, оста́ви, прости́ ми́ согреше́ния моя́, ели́ка Ти́ согреши́х, а́ще сло́вом, а́ще де́лом, а́ще помышле́нием, во́лею или́ нево́лею, ра́зумом или́ неразу́мием, вся́ ми́ прости́ я́ко бла́г и Человеколю́бец, и моли́твами Пречи́стыя Твоея́ Ма́тере, у́мных Твои́х служи́телей и святы́х си́л, и все́х святы́х от ве́ка Тебе́ благоугоди́вших, неосужде́нно благоволи́ прия́ти ми́ свято́е и пречи́стое Твое́ Те́ло и честну́ю Кро́вь, во исцеле́ние души́ же и те́ла, и во очище́ние лука́вых мои́х помышле́ний.

Я́ко Твое́ е́сть ца́рство и си́ла и сла́ва, со Отце́м и Святы́м Ду́хом, ны́не и при́сно, и во ве́ки веко́в. Ами́нь.

Бо́же, осла́би, оста́ви, прости́ мі согріше́нія моя́, єли́ка Ті согріши́х, а́ще сло́вом, а́ще ді́лом, а́ще помишле́нієм, во́лею іли́ нево́лею, ра́зумом іли́ неразу́мієм, вся мі прости́ я́ко Благ і Человіколю́бець, і моли́твами Пречи́стия Твоєя́ Ма́тере, у́мних Твої́х служи́телей і святи́х сил, і всіх святи́х от ві́ка Тебі́ благоугоди́вших, неосужде́нно благоволи́ прия́ти мі Свято́є і Пречи́стоє Твоє́ Ті́ло і Честну́ю Кров во ісціле́ніє душі́ же і ті́ла і во очище́ніє лука́вих мої́х помишле́ній. Я́ко Твоє́ єсть Ца́рство, і си́ла, і сла́ва, со Отце́м і Святи́м Ду́хом, ни́ні, і при́сно, і во ві́ки віко́в. Амі́нь.

Не́смь дово́лен, Влады́ко Го́споди, да вни́деши под кро́в души́ моея́; но поне́же хо́щеши Ты́, я́ко Человеколю́бец, жи́ти во мне́, дерза́я приступа́ю; повелева́еши, да отве́рзу две́ри, я́же Ты́ еди́н созда́л еси́, и вни́деши со человеколю́бием я́коже еси́, вни́деши и просвеща́еши помраче́нный мо́й по́мысл.

Ве́рую, я́ко сие́ сотвори́ши: не бо блудни́цу, со слеза́ми прише́дшую к Тебе́, отгна́л еси́; ниже́ мытаря́ отве́ргл еси́ пока́явшася; ниже́ разбо́йника, позна́вша Ца́рство Твое́, отгна́л еси́; ниже́ гони́теля пока́явшася оста́вил еси́, е́же бе́: но от покая́ния Тебе́ прише́дшия вся́, в ли́це Твои́х друго́в вчини́л еси́, Еди́н сы́й благослове́нный всегда́, ны́не и в безконе́чныя ве́ки. Ами́нь.

Нісьм дово́лен^*, Влади́ко Го́споди, да вни́деши под кров душі́ моєя́, но поне́же хо́щеши Ти, я́ко Человіколю́бець, жи́ти во мні, дерза́я приступа́ю; повеліва́єши, да отве́рзу две́рі, я́же Ти єди́н созда́л єси́, і вни́деши со человіколю́бієм я́коже єси́, вни́деши і просвіща́єши помраче́нний мой по́мисл. Ві́рую, я́ко сіє́ сотвори́ши, не бо блудни́цю, со слеза́ми прише́дшую к Тебі́, отгна́л єси́; ніже́ митаря́ отве́ргл єси́ пока́явшася; ніже́ разбо́йника, позна́вша Ца́рство Твоє́, отгна́л єси́; ніже́ гони́теля пока́явшася оста́вил єси́, є́же бі; но от покая́нія Тебі́ прише́дшия вся, в ли́ці Твої́х друго́в вчини́л єси́, єди́н сий благослове́нний всегда́, ни́ні і в безконе́чния ві́ки. Амі́нь.

Го́споди Иису́се Христе́ Бо́же мо́й, осла́би, оста́ви, очи́сти и прости́ ми́ гре́шному, и непотре́бному, и недосто́йному рабу́ Твоему́, прегреше́ния, и согреше́ния, и грехопаде́ния моя́, ели́ка Ти́ от ю́ности моея́, да́же до настоящего дне́ и часа́ согреши́х: а́ще в ра́зуме и в неразу́мии, а́ще в словесе́х или́ де́лех, или́ помышле́ниих и мы́слех, и начина́ниих, и все́х мои́х чу́вствах.

И моли́твами безсе́менно ро́ждшия Тя́, Пречи́стыя и Присноде́вы Мари́и, Ма́тере Твоея́, еди́ныя непосты́дныя наде́жды и предста́тельства и спасе́ния моего́, сподо́би мя́ неосужде́нно причасти́тися пречи́стых, безсме́ртных, животворя́щих и стра́шных Твои́х Та́инств, во оставле́ние грехо́в и в жи́знь ве́чную: во освяще́ние, и просвеще́ние, кре́пость, исцеле́ние, и здра́вие души́ же и те́ла, и в потребле́ние и всесоверше́нное погубле́ние лука́вых мои́х помысло́в, и помышле́ний, и предприя́тий, и нощны́х мечта́ний, те́мных и лука́вых духо́в; я́ко Твое́ е́сть ца́рство, и си́ла, и сла́ва, и че́сть, и поклоне́ние, со Отце́м и Святы́м Твои́м Ду́хом, ны́не и при́сно, и во ве́ки веко́в. Ами́нь.

Го́споди Ісу́се Христе́, Бо́же мой, осла́би, оста́ви, очи́сти і прости́ мі, грі́шному і непотре́бному і недосто́йному рабу́ Твоєму́, прегріше́нія, і согріше́нія, і гріхопаде́нія моя́, єли́ка Ті от ю́ности моєя́ да́же до настоя́щаго дне і часа́ согріши́х: а́ще в ра́зумі і в неразу́мії, а́ще в словесі́х іли́ ді́ліх, іли́ помишле́ніїх і ми́слех, і начина́ніїх, і всіх мої́х чу́вствах. І моли́твами безсі́менно Ро́ждшия Тя, Пречи́стия і Присноді́ви Марі́ї, Ма́тере Твоєя́, єди́ния непости́дния наде́жди і предста́тельства і спасе́нія моєго́, сподо́би м'я неосужде́нно причасти́тися Пречи́стих, Безсме́ртних, Животворя́щих і Стра́шних Твої́х Та́їнств во оставле́ніє гріхо́в і в жизнь ві́чную; во освяще́ніє, і просвіще́ніє, крі́пость, ісціле́ніє, і здра́віє душі́ же і ті́ла, і в потребле́ніє і всесоверше́нноє погубле́ніє лука́вих мої́х помисло́в, і помишле́ній, і предприя́тій, і нощни́х мечта́ній, те́мних і лука́вих духо́в; я́ко Твоє́ єсть Ца́рство, і си́ла, і сла́ва, і честь, і поклоне́ніє, со Отце́м і Святи́м Твої́м Ду́хом, ни́ні, і при́сно, і во ві́ки віко́в. Амі́нь.

Пред две́рьми хра́ма Твоего́ предстою́, и лю́тых помышле́ний не отступа́ю; но Ты́, Христе́ Бо́же, мытаря́ оправди́вый, и ханане́ю поми́ловавый, и разбо́йнику рая́ две́ри отве́рзый, отве́рзи ми́ утро́бы человеколю́бия Твоего́ и приими́ мя́ приходя́ща и прикаса́ющася Тебе́, я́ко блудни́цу, и кровоточи́вую: о́ва у́бо кра́я ри́зы Твоея́ косну́вшися, удо́бь исцеле́ние прия́т, о́ва же пречи́стеи Твои́ но́зе удержа́вши, разреше́ние грехо́в понесе́.

А́з же, окая́нный, все́ Твое́ Те́ло дерза́я восприя́ти, да не опале́н бу́ду; но приими́ мя́, я́коже о́ныя, и просвети́ моя́ душе́вныя чу́вства, попаля́я моя́ грехо́вныя вины́, моли́твами безсе́менно Ро́ждшия Тя́, и Небе́сных си́л; я́ко благослове́н еси́ во ве́ки веко́в. Ами́нь.

Пред две́рми хра́ма Твоєго́ предстою́ і лю́тих помишле́ній не отступа́ю; но Ти, Христе́ Бо́же, митаря́ оправди́вий, і ханане́ю поми́ловавий, і разбо́йнику рая́ две́рі отве́рзий, отве́рзи мі утро́би человіколю́бія Твоєго́ і прийми́ м'я приходя́ща і прикаса́ющася Тебі́, я́ко блудни́цю і кровоточи́вую; о́ва у́бо кра́я ри́зи Твоєя́ косну́вшися, удо́б ісціле́ніє прия́т, о́ва же пречи́стії Твої́ но́зі удержа́вши, разріше́ніє гріхо́в понесе́. Аз же, окая́нний, все Твоє́ Ті́ло дерза́я восприя́ти, да не опале́н бу́ду; но прийми́ м'я, я́коже о́ния, і просвіти́ моя́ душе́вния чу́вства, попаля́я моя́ гріхо́вния вини́, моли́твами безсі́менно Ро́ждшия Тя, і Небе́сних сил; я́ко благослове́н єси́ во ві́ки віко́в. Амі́нь.

Ве́рую, Го́споди, и испове́дую, я́ко Ты́ еси́ вои́стинну Христо́с, Сы́н Бо́га жива́го, прише́дый в ми́р гре́шныя спасти́, от ни́хже пе́рвый е́смь а́з. Еще́ ве́рую, я́ко сие́ е́сть са́мое пречи́стое Те́ло Твое́, и сия́ е́сть са́мая честна́я Кро́вь Твоя́. Молю́ся у́бо Тебе́: поми́луй мя́, и прости́ ми́ прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя́ неосужде́нно причасти́тися пречи́стых Твои́х Та́инств, во оставле́ние грехо́в, и в жи́знь ве́чную. Ами́нь.

Ві́рую, Го́споди, і іспові́дую, я́ко Ти єси́ воі́стину Христо́с, Син Бо́га жива́го, прише́дий в мир грі́шния спасти́, от ни́хже пе́рвий єсьм аз. Єще́ ві́рую, я́ко сіє́ єсть са́моє Пречи́стоє Ті́ло Твоє́ і сія́ єсть са́мая Честна́я Кров Твоя́. Молю́ся у́бо Тебі́: поми́луй м'я і прости́ мі прегріше́нія моя́, во́льная і нево́льная, я́же сло́вом, я́же ді́лом, я́же ві́дінієм і неві́дінієм, і сподо́би м'я неосужде́нно причасти́тися Пречи́стих Твої́х Та́їнств во оставле́ніє гріхо́в і в жизнь ві́чную. Амі́нь.

Се́ приступа́ю к Боже́ственному Причаще́нию. Соде́телю, да не опали́ши мя́ приобще́нием: О́гнь бо еси́, недосто́йныя попаля́яй. Но у́бо очи́сти мя́ от вся́кия скве́рны.

Се приступа́ю к Боже́ственному Причаще́нію. Соді́телю, да не опали́ши м'я приобще́нієм, Огнь бо єси́, недосто́йния попаля́яй. Но у́бо очи́сти м'я от вся́кия скве́рни.

Ве́чери Твоея́ та́йныя дне́сь, Сы́не Бо́жий, прича́стника мя́ приими́; не бо враго́м Твои́м та́йну пове́м, ни лобза́ния Ти́ да́м, я́ко Иу́да, но я́ко разбо́йник испове́даю Тя́: помяни́ мя́, Го́споди, во Ца́рствии Твое́м.

Ве́чері Твоєя́ та́йния днесь, Си́не Бо́жий, прича́стника м'я прийми́; не бо враго́м Твої́м та́йну пові́м, ні лобза́нія Ті дам, я́ко Іу́да, но я́ко разбо́йник іспові́даю Тя: пом'яни́ м'я, Го́споди, во Ца́рствії Твоє́м.

Боготворя́щую Кро́вь ужасни́ся, челове́че, зря́: О́гнь бо е́сть, недосто́йныя попаля́яй. Боже́ственное Те́ло и обожа́ет мя́ и пита́ет: Обожа́ет ду́х, у́м же пита́ет стра́нно.

Боготворя́щую Кров ужасни́ся, челові́че, зря, Огнь бо єсть, недосто́йния попаля́яй. Боже́ственноє Ті́ло і обожа́єть м'я і пита́єть: Обожа́єть дух, ум же пита́єть стра́нно.

Услади́л мя́ еси́ любо́вию, Христе́, и измени́л мя́ еси́ Боже́ственным Твои́м раче́нием; но попали́ огне́м невеще́ственным грехи́ моя́, и насы́титися е́же в Тебе́ наслажде́ния сподо́би: да лику́я возвелича́ю, Бла́же, два́ прише́ствия Твоя́.

Во све́тлостех Святы́х Твои́х ка́ко вни́ду недосто́йный? А́ще бо дерзну́ совни́ти в черто́г, оде́жда мя́ облича́ет, я́ко не́сть бра́чна, и свя́зан изве́ржен бу́ду от А́нгелов. Очи́сти, Го́споди, скве́рну души́ моея́, и спаси́ мя́, я́ко Человеколю́бец.

Услади́л м'я єси́ любо́вію, Христе́, і ізміни́л м'я єси́ Боже́ственним Твої́м раче́нієм; но попали́ огне́м невеще́ственним гріхи́ моя́ і наси́титися є́же в Тебі́ наслажде́нія сподо́би, да лику́я возвелича́ю, Бла́же, два прише́ствія Твоя́.

Во сві́тлостех Святи́х Твої́х ка́ко вни́ду, недосто́йний? А́ще бо дерзну́ совни́ти в черто́г, оде́жда м'я облича́єть, я́ко ність бра́чна, і св'я́зан ізве́ржен бу́ду от а́нгелов. Очи́сти, Го́споди, скве́рну душі́ моєя́ і спаси́ м'я, я́ко Человіколю́бець

Влады́ко Человеколю́бче, Го́споди Иису́се Христе́ Бо́же мо́й, да не в су́д ми́ бу́дут Свята́я сия́, за е́же недосто́йну ми́ бы́ти: но во очище́ние и освяще́ние души́ же и те́ла, и во обруче́ние бу́дущия жи́зни и ца́рствия. Мне́ же, е́же прилепля́тися Бо́гу, бла́го е́сть, полага́ти во Го́споде упова́ние спасе́ния моего́.

Влади́ко Человіколю́бче, Го́споди Ісу́се Христе́, Бо́же мой, да не в суд мі бу́дуть Свята́я сія́, за є́же недосто́йну мі би́ти, но во очище́ніє і освяще́ніє душі́ же і ті́ла, і во обруче́ніє бу́дущия жи́зні і Ца́рствія. Мні же, є́же приліпля́тися Бо́гу, бла́го єсть полага́ти во Го́споді упова́ніє спасе́нія моєго́.

Ве́чери Твоея́ та́йныя дне́сь, Сы́не Бо́жий, прича́стника мя́ приими́; не бо враго́м Твои́м та́йну пове́м, ни лобза́ния Ти́ да́м, я́ко Иу́да, но я́ко разбо́йник испове́даю Тя́: помяни́ мя́, Го́споди, во Ца́рствии Твое́м.

Ве́чері Твоєя́ та́йния днесь, Си́не Бо́жий, прича́стника м'я прийми́; не бо враго́м Твої́м та́йну пові́м, ні лобза́нія Ті дам, я́ко Іу́да, но я́ко разбо́йник іспові́даю Тя: пом'яни́ м'я, Го́споди, во Ца́рствії Твоє́м.