К Богоро́диці притеце́м, су́щії в біда́х, і святі́й іко́ні Єя́ ни́ні припаде́м, с ві́рою зову́ще із глубини́ душі́: ско́ро на́ше усли́ши моле́ніє, Ді́во, я́ко Скоропослу́шниця наре́кшаяся. Тебе́ бо раби́ Твої́ в ну́ждах гото́вую Помо́щницю і́мами.

Ірмо́с: Во́ду проше́д, я́ко су́шу, і єги́петськаго зла ізбіжа́в, ізра́їльтянин вопія́ше: Ізба́вителю і Бо́гу на́шему пої́м.

Приспів: Пресвята́я Богоро́дице, спаси́ нас.

Чуде́с Твої́х Боже́ственних мно́жество благохвали́ти предпринима́я, Тя молю́, Ді́во, от се́рдця, Скоропослу́шнице, благода́ть пода́ждь мі.

Кто не ізуми́ться Твоєго́ о́браза чудесе́м, Ді́во, от него́ бо служи́телю трапе́зи возгласи́ла єси́ тричі, Скоропослу́шниця наре́кшися.

Сла́ва: Ка́ко чудодія́ніє Твоє́ ізрещи́ возмогу́, Отрокови́це, Ти бо пре́жде непоко́рнаго і́нока безо́чна соді́лала єси́ і па́ки cего́ устро́їла єси́ ви́дяща.

І ни́ні: Ра́дуйся, свяще́нная оби́тель Дохіа́рськая: ти бо і́маши всіх Госпожу́ Предста́тельницю і покро́в, я́коже Сама́ Она́ я́сно возвісти́.

Ірмос: Небе́снаго кру́га Верхотво́рче, Го́споди, і Це́ркве Зижди́телю, Ти мене́ утверди́ в любві́ Твоє́й, жела́ній кра́ю, ві́рних утвержде́ніє, єди́не Человіколю́бче.

Приспів: Пресвята́я Богоро́дице, спаси́ нас.

Безча́дних благоча́дних Ти, Марі́є, показа́ла єси́ і непло́дних жен соді́лала єси́, Скоропослу́шнице, веселя́щихся о ча́діх. Кто у́бо не ізуми́ться, Ді́во, вели́чію Твоєму́?

Булга́рія пропові́дуєть Твоєго́ о́браза чудеса́, о Скоропослу́шнице, восто́к же і за́пад. істо́чник бо соді́лалася єси́, точа́щий благода́ті всім призива́ющим і́м'я Твоє́.

Сла́ва: Ра́ка болі́знь от руки́ ісчеза́єть честни́я жени́, Ді́во, посіще́нієм Твої́м, ті́мже стра́ждущая, от неду́га свободи́вшися, ра́дующися, пропові́да благода́рственная.

І ни́ні: Чу́дно украси́ся іко́на Твоя́, Скоропослу́шнице, і па́че луче́й со́лнечних освіща́єть всіх благода́тію Твоє́ю, Пречи́стая. Кто у́бо восхва́лить Тя, на Небесі́ і на землі́ сла́вимую!

Го́споди, поми́луй. [Тричі.]

Влади́чицю Тя ми́ра ві́ми, Марі́є Всепі́тая, я́ко родила́ єси́ нам всіх Творця́, спаси́теля ми́ра, І́же і просла́ви Тебе́, Пречи́стую Ма́тер Свою́, подая́ Тобо́ю благода́ть і ми́лость чту́щим Тя і моля́щимся Тебі́, Богоро́дице.

Ірмос: Усли́шах, Го́споди, смотре́нія Твоєго́ та́їнство, разумі́х діла́ Твоя́ і просла́вих Твоє́ Бо́жество́.

Приспів: Пресвята́я Богоро́дице, спаси́ нас.

Во всіх конці́х чудотво́рний Твой о́браз просла́вися, і ни́ні всі уста́ми скоропослу́шницю проізно́сять.

І во сні, Всецари́це, і я́ві, Скоропослу́шнице, явля́яся, чудеса́ соверша́єши в ми́рі пресла́вная.

Сла́ва: Кто Твоє́, Ді́во, і́м'я в ну́жді вся́кой призива́ше, і ско́ро того́ не усли́шала єси́, я́ко Скоропослу́шниця су́щая?

І ни́ні: Блаже́нна єси́ Дохіа́рськая оби́тель сла́вная, іко́ною бо обогати́лася єси́ Скоропослу́шниці всечестно́ю.

Ірмос: Просвіти́ нас повелі́нії Твої́ми, Го́споди, і ми́шцею Твоє́ю висо́кою Твой мир пода́ждь нам, Человіколю́бче.

Приспів: Пресвята́я Богоро́дице, спаси́ нас.

Ка́ко на Твой пречи́стий о́браз аз, недосто́йний, воззрю́, Скоропослу́шнице, нечи́стими очеси́ мої́ми.

Мо́ре і земля́, Всецари́це, Твоєя́ іко́ни чудеса́ пропові́дують: Твої́х бо благода́тей сія́ обоя́ наслади́шася.

Сла́ва: Та́тя явля́єши, пі́нязі похи́тивша бли́жняго^*, Матероді́во, і возвраща́єши пра́відно сія́ іму́щему.

І ни́ні: Что воздади́м Тебі́, Всеблага́я, за благода́ть мно́гую, ю́же яви́ла єси́ нам, дарова́в іко́ну Твою́, бога́тство свяще́нноє.

Ірмос: Моли́тву пролію́ ко Го́споду і Тому́ возвіщу́ печа́лі моя́, я́ко зол душа́ моя́ іспо́лнися, і живо́т мой а́ду прибли́жися, і молю́ся, я́ко Іо́на: от тлі, Бо́же, возведи́ м'я.

Приспів: Пресвята́я Богоро́дице, спаси́ нас.

Я́ко любвеоби́льная Ма́тер я́вльшися, призива́ла єси́ о́трока к Себі́, до́ндеже ізба́вила єси́ от руки́ разбо́йников, Матероді́во. Но да обріте́м Тя і ми, Ма́тер любвеоби́льную.

Не і́мами раби́ Твої́ іно́го, ра́зві Тебе́, предста́тельства і покро́ва. ті́мже, Чи́стая, от се́рдця вопіє́м: вся́кия біди́ свободи́ ста́до Твоє́ і ві́рних, к Тебі́ прибіга́ющих.

Сла́ва: Я́коже спасла́ єси́ от морськи́я бу́рі призва́вших Боже́ственноє і́м'я Твоє́, та́ко і нас от чу́вственнаго круше́нія і ми́сленнаго, Ді́во, спаси́ і в ти́хія приста́нища спасе́нія упра́ви.

І ни́ні: Мир Тя прибі́жище стяжа́ і спасе́ніє: тім, Чи́стая, к честні́й Твоє́й іко́ні отвсю́ду притека́ють лю́діє, і всі ско́ро їх слу́шающую обріта́ють Тя.

Го́споди, поми́луй. [Тричі.] Сла́ва, і ни́ні:

В мо́рі жите́йстім обурева́ємії, треволне́нію подпа́даєм страсте́й і іскуше́ній. Пода́ждь у́бо нам, Госпоже́, ру́ку по́мощі, я́коже Петро́ві Син Твой, і ускори́ от бід ізба́вити ни, да зове́м Ті: ра́дуйся, Всеблага́я Скоропослу́шнице.

Ікос: Іді́же осіни́ть благода́ть Твоя́, Влади́чице, та́мо неду́жнії здра́ві бива́ють, бі́дствующії во благополу́чіє прихо́дять, і всяк скорб'я́щий ра́дости ісполня́ється. Ті́мже благода́тію Твоє́ю осіни́ і нас, сицева́я ра́достная Тебі́ глаго́лющих:

ра́дуйся, Богоблагода́тная, Непристу́пнаго Божества́ селе́ніє;

ра́дуйся, свята́я трапе́зо, Хлі́бом жи́зні нас снабдіва́ющая;

ра́дуйся, ми́ро многоце́нноє, облагоуха́ющеє ві́рних;

ра́дуйся, ма́слино, єле́ем милосе́рдія нас умаща́ющая;

ра́дуйся, неістощи́моє сокро́вище даро́в;

ра́дуйся, приснотеку́щий істо́чниче чуде́с;

ра́дуйся, оби́димих заступле́ніє; ра́дуйся, обурева́ємих благоути́шноє приста́нище;

ра́дуйся, глухи́х сли́шаніє і сві́те сліпи́х;

ра́дуйся, разсла́бленних укріпле́ніє;

ра́дуйся, свобожде́ніє пліне́нних;

ра́дуйся, ми́ра всего́ упова́ніє;

ра́дуйся, Всеблага́я Скоропослу́шнице.

Ірмос: От Іуде́ї доше́дше о́троци, в Вавило́ні іногда́ ві́рою Тро́їчеською пла́мень пе́щний попра́ша, пою́ще: отце́в Бо́же, благослове́н єси́.

Приспів: Пресвята́я Богоро́дице, спаси́ нас.

Сліпи́м дарова́ла єси́ ді́йствіє очесе́м, Ді́во, є́же ви́діти, но і на́ша зі́ниці душі́ і тілесе́ просвіти́, да поє́м при́сно вели́чія Твоя́.

Глухи́м сли́шаніє дарова́ла єси́, Марі́є Скоропослу́шнице, но і нас всіх отве́рзи ушеса́ душі́ і тілесе́, я́ко да поє́м при́сно вели́чія Твоя́.

Сла́ва: Я́коже дре́вле от пруго́в ізба́вила єси́ прибі́гших к Тебі́, Пречи́стая, та́ко і нас от сих і вся́каго вре́да ізба́ви, да поє́м при́сно вели́чія Твоя́.

І ни́ні: Я́ко іспра́вила єси́ пре́жде разсла́бленнаго, та́ко і нас, по обою́ разсла́бленних, те́плим Твої́м предста́тельством іспра́ви, да поє́м при́сно вели́чія Твоя́.

Ірмос: Царя́ Небе́снаго, Єго́же пою́ть во́ї а́нгельстії, хвалі́те і превозносі́те во вся ві́ки.

Приспів: Пресвята́я Богоро́дице, спаси́ нас.

От вся́ких болі́зней, Скоропослу́шнице, нас ізба́ви, я́коже от сих мно́гих ізба́вила єси́.

Іко́на Твоя́, Ді́во, показа́ся істо́чник чуде́с, от него́же жа́ждущії снабдіва́ються ізоби́льно.

Сла́ва: Поги́бшаго Ти явля́єши, Госпоже́, і подає́ши ра́дость обрі́тшим. Коль мно́гая єсть о́браза Твоєго́ благода́ть.

І ни́ні: Повелі́нію Твоєму́, Влади́чице, повину́ються вся стіхі́ї, от ни́хже вре́да да ізбавля́єши Тя призива́ющих.

Ірмос: Воі́стину Богоро́дицю Тя іспові́дуєм, спасе́ннії Тобо́ю, Ді́во Чи́стая, с безпло́тними ли́ки Тя велича́юще.

Приспів: Пресвята́я Богоро́дице, спаси́ нас.

Собері́теся усе́рдно в оби́тель Боже́ственную арха́нгелов, боля́щії: врач бо в ней пребива́єть безме́здний.

Свяще́нная іко́на Твоя́ друга́я показа́ся Силоа́мськая купе́ль^*, Ді́во, очища́ющая і ціля́щая болі́зні душі́ і тілесе́.

Сла́ва: Воспламеня́єть м'я раче́ніє зрі́ти Твоєго́ о́браза благода́тную лі́поту, і насище́нія не і́мам велича́ти Тя!

І ни́ні: Да уви́жду Тя, Всеблага́я Скоропослу́шнице, во вре́м'я сме́рти утіша́ющую м'я і зра́ки де́монов отгоня́ющую.

Зря́щії Тя ни́ні на іко́ні с Предві́чним Младе́нцем, про́сим Тебе́, Богоневі́сто: не лиши́ нас і в бу́дущем ві́ці всеблаже́ннаго лицезрі́нія Твоєго́ і воплоти́вшагося от Тебе́ Си́на Бо́жия да со благоугоди́вшими Єму́ і́м'я Єго́ і Твоє́ велича́єм.

Преблагослове́нная Влади́чице, Присноді́во Богоро́дице, Бо́га Сло́ва па́че вся́каго сло́ва на спасе́ніє на́ше ро́ждшая, і благода́ть Єго́ преізоби́льно па́че всіх при́ймшая, мо́ре неісчерпа́ємоє Боже́ственних дарова́ній я́вльшаяся і чуде́с приснотеку́щая ріка́, ізлива́ющая бла́гость всім с ві́рою к Тебі́ прибіга́ющим! Твоєму́ чудотво́рному о́бразу припа́дающе, мо́лимся Тебі́, всеще́дрій Человіколюби́ваго Влади́ки Ма́тері: удиви́ на нас пребога́тия ми́лості Твоя́, і проше́нія на́ша, приноси́мая Тебі́, Скоропослу́шнице, іспо́лнити ускори́, вся я́же на по́льзу, во утіше́ніє і спасе́ніє коєму́ждо устроя́ющи. Посіти́, Преблага́я, раби́ Твоя́ благода́тію Твоє́ю, і пода́ждь неду́гующим цільбу́ і соверше́нноє здра́віє, обурева́ємим тишину́, пліне́нним свобо́ду, і разли́чними о́брази стра́ждущия уті́ши. Ізба́ви, всеми́лостивая Госпоже́, всяк град і страну́ от гла́да, я́зви, тру́са, пото́па, огня́, меча́ і іни́я ка́зні вре́менния і ві́чния, Ма́терним Твої́м дерзнове́нієм гнів Бо́жий от нас отвраща́ющи; тако́жде і от душе́внаго разслабле́нія, обурева́нія страсте́й і гріхопаде́ній свободи́ раби́ Твоя́, я́ко да непреткнове́нно во вся́ком благоче́стії пожи́вше в сем ві́ці, і в бу́дущем ві́чних благ сподо́бимся, благода́тію і человіколю́бієм Си́на Твоєго́ і Бо́га, Єму́же подоба́єть вся́кая сла́ва, честь і поклоне́ніє, со Безнача́льним Єго́ Отце́м і Пресвяти́м Ду́хом, ни́ні, і при́сно, і во ві́ки віко́в. Амі́нь.

О Пресвята́я Ді́во, Ма́ти Го́спода Ви́шняго, Скоропослу́шная Засту́пнице всіх, к Тебі́ с ві́рою прибіга́ющих! При́зри с висоти́ Небе́снаго вели́чія Твоєго́ на м'я, непотре́бнаго, ко святі́й іко́ні Твоє́й припа́дающа: усли́ши ско́ро смире́нную моли́тву мене́, грі́шнаго, і принеси́ ю к Си́ну Твоєму́; умоли́ Єго́, да озари́ть мра́чную ду́шу мою́ сві́том Бо́же́ственния благода́ті Своєя́ і очи́стить ум мой от по́мислов су́єтних, да умири́ть стра́ждущеє моє́ се́рдце і ісціли́ть ра́ни Єго́, да вразуми́ть м'я на до́брая діла́ і укріпи́ть рабо́тати Єму́ со стра́хом, да прости́ть вся соді́янная мно́ю зла́я, да ізба́вить от ві́чния му́ки і не лиши́ть Небе́снаго Своєго́ Ца́рствія. О Преблагослове́нная Богоро́дице! Ти благоізво́лила єси́ нарещи́ся во о́бразі Твоє́м Скоропослу́шниця, повеліва́ющи всім притека́ти к Тебі́ с ві́рою; не пре́зри у́бо мене́, ско́рбнаго, і не попусти́ поги́бнути мні в бе́здні гріхо́в мої́х. На Тя по Бо́зі все моє́ упова́ніє і наде́жда спасе́нія, і Твоєму́ покро́ву і предста́тельству вруча́ю себе́ во ві́ки віко́в. Амі́нь.