Канон Воскресінню Христовому (Святої Пасхи)

Христо́с Воскре́се із ме́ртвих, сме́ртію смерть попра́в, і су́щим во гробі́х живо́т дарова́в.

Перший стих: Да воскре́снеть Бог і расточа́ться вразі́ Єго́, і да біжа́ть от лиця́ Єго́ ненави́дящії Єго́. Христо́с Воскре́се: [один раз].

Другий стих: Я́ко ісчеза́єть дим, да ісче́знуть, я́ко та́єть воск от лиця́ огня́. Христо́с Воскре́се: [один раз].

Третій стих: Та́ко да поги́бнуть грі́шници от лиця́ Бо́жия, а пра́ведници да возвеселя́ться. Христо́с Воскре́се: [один раз].

Четвертий стих: Сей день, єго́же сотвори́ Госпо́дь, возра́дуємся і возвесели́мся вонь. Христо́с Воскре́се: [один раз].

Сла́ва: Христо́с Воскре́се: [один раз].

І ни́ні: Христо́с Воскре́се: [один раз].

Ірмос: Воскресе́нія день, просвіті́мся, лю́діє: Па́сха, Госпо́дня Па́сха! От сме́рти бо к жи́зні, і от землі́ к небесі́ Христо́с Бог нас преведе́, побі́дную пою́щия.

Приспів: Христо́с Воскре́се із ме́ртвих.

Очи́стим чу́вствія і у́зрим непристу́пним сві́том Воскресе́нія Христа́ блиста́ющася, і "Ра́дуйтеся!" реку́ща, я́сно да усли́шим, побі́дную пою́ще.

Приспів: Христо́с Воскре́се із ме́ртвих.

Небеса́ у́бо досто́йно да веселя́ться, земля́ же да ра́дується, да пра́зднуєть же мир, ви́димий же весь і неви́димий: Христо́с бо воста́, весе́ліє ві́чноє.

Сла́ва: Умерщвле́нія преді́л сломи́ла єси́, ві́чную жизнь ро́ждшая Христа́, із гро́ба возсія́вшаго днесь, Ді́во Всенепоро́чная, і мир просвіти́вшаго.

І ни́ні: Воскре́сшаго ви́дівши Си́на Твоєго́ і Бо́га, ра́дуйся со Апо́столи, Богоблагода́тная Чи́стая, і є́же "Ра́дуйся!" пе́рвіє, я́ко всіх ра́дости вина́, восприя́ла єси́, Богома́ти Всенепоро́чная.

Ірмос: Прийді́те пи́во піє́м но́воє, не от ка́мене непло́дна чудоді́ємоє, но нетлі́нія істо́чник, із гро́ба одожди́вша Христа́, в Не́мже утвержда́ємся.

Приспів: Христо́с Воскре́се із ме́ртвих.

Ни́ні вся іспо́лнишася сві́та, не́бо же і земля́, і преіспо́дняя; да пра́зднуєть у́бо вся твар воста́ніє Христо́во, в Не́мже утвержда́ється.

Приспів: Христо́с Воскре́се із ме́ртвих.

Вчера́ спогребо́хся Тебі́, Христе́, совостаю́ днесь воскре́сшу Тебі́, сраспина́хся Тебі́ вчера́, Сам м'я спросла́ви, Спа́се, во Ца́рствії Твоє́м.

Сла́ва: На нетлі́нную жизнь прихожду́ днесь бла́гостію Ро́ждшагося із Тебе́, Чи́стая, і всім конце́м світ облиста́вшаго.

І ни́ні: Бо́га, Єго́же родила́ єси́ пло́тію, із ме́ртвих, я́коже рече́, воста́вша ви́дівши, Чи́стая, лику́й, і Сего́ я́ко Бо́га, Пречи́стая, возвелича́й.

Предвари́вшия у́тро, я́же о Марі́ї, і обрі́тшия ка́мень отвале́н от гро́ба, сли́шаху от А́нгела: во сві́ті присносу́щнім Су́щаго с ме́ртвими что і́щете я́ко челові́ка? Ви́діте гро́бния пелени́, теці́те і ми́ру пропові́дите, я́ко воста́ Госпо́дь, умертви́вий смерть, я́ко єсть Син Бо́га, спаса́ющаго род челові́чеський.

Ірмос: На Боже́ственній стра́жі Богоглаго́ливий Авваку́м да ста́неть с на́ми і пока́жеть світоно́сна А́нгела, я́сно глаго́люща: днесь спасе́ніє ми́ру, я́ко Воскре́се Христо́с, я́ко Всеси́лен.

Приспів: Христо́с Воскре́се із ме́ртвих.

Му́жеський у́бо пол, я́ко разве́рзий ді́вcтвенную утро́бу, яви́ся Христо́с, я́ко челові́к же, А́гнець нарече́ся; непоро́чен же, я́ко невку́сен скве́рни, на́ша Па́сха, і я́ко Бог і́стинен, соверше́н рече́ся.

Приспів: Христо́с Воскре́се із ме́ртвих.

Я́ко єдинолі́тний а́гнець, благослове́нний нам віне́ць Христо́с, во́лею за всіх закла́н бисть, Па́сха чи́сти́тельная, і па́ки із гро́ба кра́сноє пра́вди нам возсія́ Со́лнце.

Приспів: Христо́с Воскре́се із ме́ртвих.

Богооте́ць у́бо Дави́д пред сі́нним ковче́гом скака́ше ігра́я, лю́діє же Бо́жії святі́ї, образо́в сбитіє́ зря́ще, веселі́мся Боже́ственні, я́ко Воскре́се Христо́с, я́ко Всеси́лен.

Сла́ва: Созда́вий Ада́ма, Твоєго́ праотця́, Чи́стая, зи́ждеться от Тебе́, і сме́ртноє жили́ще разори́ Своє́ю сме́ртію днесь, і озари́ вся Боже́ственними блиста́ньми Воскресе́нія.

І ни́ні: Єго́же родила́ єси́ Христа́, прекра́сно із ме́ртвих возсія́вша, Чи́стая, зря́щи, до́брая і непоро́чная в жена́х і кра́сная, днесь во спасе́ніє всіх, со Апо́столи ра́дующися, Того́ прославля́й.

Ірмос: У́тренюєм у́треннюю глубоку́ і, вмі́сто ми́ра, піснь принесе́м Влади́ці, і Христа́ у́зрим, пра́вди Со́лнце, всім жизнь возсія́юща.

Приспів: Христо́с Воскре́се із ме́ртвих.

Безмі́рноє Твоє́ благоутро́біє а́довими у́зами содержи́мії зря́ще, к сві́ту ідя́ху, Христе́, весе́лими нога́ми, Па́сху хва́ляще ві́чную.

Приспів: Христо́с Воскре́се із ме́ртвих.

Присту́пим, свіщено́снії, ісходя́щу Христу́ із гро́ба, я́ко жениху́, і спра́зднуїм любопра́зднственними чи́ньми Па́сху Бо́жию спаси́тельную.

Сла́ва: Просвіща́ється Боже́ственними луча́ми і живоно́сними Воскресе́нія Си́на Твоєго́, Богома́ти Пречи́стая, і ра́дости ісполня́ється благочести́вих собра́ніє.

І ни́ні: Не разве́рзл єси́ врата́ ді́вства в воплоще́нії, гро́ба не разруши́л єси́ печа́тей, Царю́ созда́нія; отону́дуже, воскре́сшаго Тя зря́щи, Ма́ти ра́довашеся.

Ірмос: Снизше́л єси́ в преіспо́дняя землі́ і сокруши́л єси́ вереї́ ві́чния, содержа́щия св'я́занния, Христе́, і тридне́вен, я́ко от ки́та Іо́на, воскре́сл єси́ от гро́ба.

Приспів: Христо́с Воскре́се із ме́ртвих.

Сохрани́в ці́ла зна́менія, Христе́, воскре́сл єси́ от гро́ба, ключі́ Ді́ви не вреди́вий в рождестві Твоє́м, і отве́рзл єси́ нам ра́йськія две́рі.

Приспів: Христо́с Воскре́се із ме́ртвих.

Спа́се мой, живо́є же і неже́ртвенноє заколе́ніє, я́ко Бог Сам Себе́ во́лею приве́д Отцю́, совоскреси́л єси́ всеро́днаго Ада́ма, воскре́с от гро́ба.

Сла́ва: Возведе́ся дре́вле держи́моє сме́ртію і тлі́нієм, воплоти́вшимся от Твоєго́ пречи́стаго чре́ва, к нетлі́нній і присносу́щній жи́зні, Богоро́дице Ді́во.

І ни́ні: Сни́де в преіспо́дняя землі́, в ложесна́ Твоя́, Чи́стая, сше́дий, і всели́вийся, і воплоти́вийся па́че ума́, і воздви́же с Собо́ю Ада́ма, воскре́с от гро́ба.

А́ще і во гроб снизше́л єси́, Безсме́ртне, но а́дову разруши́л єси́ си́лу, і воскре́сл єси́, я́ко побіди́тель, Христе́ Бо́же, жена́м мироно́сицям віща́вий: ра́дуйтеся! і Твої́м апо́столом мир да́руяй, па́дшим подая́й воскресе́ніє.

Ікос: Є́же пре́жде со́лнця Со́лнце заше́дшеє іногда́ во гроб, предвари́ша ко у́тру, і́щущия я́ко дне мироно́сиці ді́ви, і друга́ ко друзі́й вопія́ху: о други́ні! Прийді́те, воня́ми пома́жем Ті́ло живоно́сноє і погребе́нноє, плоть воскреси́вшаго па́дшаго Ада́ма, лежа́щую во гро́бі. І́дем, потщі́мся, я́коже волсви́, і поклоні́мся, і принесе́м ми́ра я́ко да́ри, не в пелена́х, но в плащани́ці обви́тому, і пла́чим, і возопії́м: о Влади́ко, воста́ни, па́дшим подая́й воскресе́ніє.

Воскресе́ніє Христо́во ви́дівше, поклоні́мся Свято́му Го́споду Ісу́су, єди́ному безгрі́шному. Кресту́ Твоєму́ покланя́ємся, Христе́, і свято́є Воскресе́ніє Твоє́ поє́м і сла́вим, Ти бо єси́ Бог наш, ра́зві Тебе́ іно́го не зна́єм, і́м'я Твоє́ імену́єм. Прийді́те всі ві́рнії, поклоні́мся свято́му Христо́ву Воскресе́нію; се бо при́йде Кресто́м ра́дость всему́ ми́ру. Всегда́ благослов'я́ще Го́спода, поє́м Воскресе́ніє Єго́, расп'я́тіє бо претерпі́в, сме́ртію смерть разруши́. [Тричі]

Воскре́с Ісу́с от гро́ба, я́коже прорече́, даде́ нам живо́т ві́чний і ве́лію ми́лость. [Тричі]

Ірмос: О́троки от пе́щі ізба́вивий, бив Челові́к, стра́ждеть, я́ко сме́ртен, і стра́стію сме́ртноє в нетлі́нія облачи́ть благолі́піє, єди́н благослове́н отце́в Бог і препросла́влен.

Приспів: Христо́с Воскре́се із ме́ртвих.

Жени́ с ми́ри богому́дрия в слід Тебе́ теча́ху: Єго́же я́ко ме́ртва со слеза́ми іска́ху, поклони́шася ра́дующияся живо́му Бо́гу, і Па́сху та́йную Твої́м, Христе́, ученико́м благовісти́ша.

Приспів: Христо́с Воскре́се із ме́ртвих.

Сме́рти пра́зднуєм умерщвле́ніє, а́дово разруше́ніє, іно́го житія́ ві́чнаго нача́ло, і ігра́юще поє́м Вино́внаго, єди́наго благослове́ннаго отце́в Бо́га і препросла́вленнаго.

Приспів: Христо́с Воскре́се із ме́ртвих.

Я́ко воі́стину свяще́нная, і всепра́зднственная сія́ спаси́тельная нощ, і світоза́рная, світоно́снаго дне воста́нія су́щи провозві́стниця, в не́йже безлі́тний Світ із гро́ба пло́тськи всім возсія́.

Сла́ва: Умертви́в Син Твой смерть, Всенепоро́чная, днесь, всім сме́ртним пребива́ющий живо́т во ві́ки віко́в дарова́, єди́н благослове́нний отце́в Бог і препросла́вленний.

І ни́ні: Всім Ца́рствуяй созда́нієм, бив челові́к, всели́ся во Твою́ Богоблагода́тная утро́бу, і расп'я́тіє претерпі́в і смерть, воскре́се боголі́пно, совозста́вив нас я́ко Всеси́лен.

Ірмос: Сей нарече́нний і святи́й день, єди́н суббо́т цар і госпо́дь^*, пра́здников пра́здник і торжество́ єсть торже́ств: во́ньже благослові́м^* Христа́ во ві́ки.

Приспів: Христо́с Воскре́се із ме́ртвих.

Прийді́те но́ваго виногра́да рожде́нія, Боже́ственнаго весе́лія, в наро́читом дні Воскресе́нія, Ца́рствія Христо́ва приобщі́мся, пою́ще Єго́ я́ко Бо́га во ві́ки.

Приспів: Христо́с Воскре́се із ме́ртвих.

Возведи́ о́крест о́чі твої́, Сіо́не, і виждь: се бо прийдо́ша к тебі́, я́ко богосві́тлая світи́ла, от за́пада, і сі́вера, і мо́ря, і восто́ка ча́да твоя́, в тебі́ благослов'я́щая Христа́ во ві́ки.

Приспів: Пресвята́я Тро́йце, Бо́же наш, сла́ва Тебі́.

О́тче Вседержи́телю, і Сло́ве, і Ду́ше, треми́ соєдиня́ємоє во Іпоста́сіх Єстество́, Пресу́щественне і Пребоже́cтвенне, в Тя крести́хомся і Тя благослови́м во вся ві́ки.

Сла́ва: При́йде Тобо́ю в мир Госпо́дь, Ді́во Богоро́дице, і чре́во а́дово расто́рг, сме́ртним нам воскресе́ніє дарова́: ті́мже благослови́м Єго́ во ві́ки.

І ни́ні: Всю низложи́в сме́рти держа́ву Син Твой, Ді́во, Свої́м Воскресе́нієм, я́ко Бог крі́пкий совознесе́ нас і обожи́: ті́мже воспіва́єм Єго́ во ві́ки.

Приспіви на 9-й пісні: Вели́чить душа́ моя́ воскре́сшаго тридне́вно от гро́ба, Христа́ Жизнода́вця.

Ірмос: Світи́ся, світи́ся, но́вий Ієрусали́ме, сла́ва бо Госпо́дня на тебі́ возсія́. Лику́й ни́ні і весели́ся, Сіо́не. Ти же, Чи́стая, красу́йся, Богоро́дице, о воста́нії Рождеcтва́ Твоєго́.

Приспіви: Вели́чить душа́ моя́ во́лею страда́вша, і погребе́нна, і воскре́сшаго тридне́вно от гро́ба.

Христо́с — но́вая Па́сха, же́ртва жива́я, А́гнець Бо́жий взе́мляй гріхи́ ми́ра.

А́нгел вопія́ше Благода́тній: чи́стая Ді́во, ра́дуйся, і па́ки реку́, ра́дуйся! Твой Син Воскре́се тридне́вен от гро́ба і ме́ртвия воздви́гнувий, лю́діє веселі́теся.

Приспіви: Возбуди́л єси́, усну́в, ме́ртвия от ві́ка, ца́рськи рика́вий я́ко от Іу́ди лев.

Магдали́на Марі́я притече́ ко гро́бу і Христа́ ви́дівши, я́ко вертогра́даря вопроша́ше.

А́нгел облиста́яй жена́м вопія́ше: преста́ните от слез, я́ко Христо́с Воскре́се.

Приспіви: Христо́с Воскре́се, смерть попра́вий, і ме́ртвия воздви́гнувий, лю́діє веселі́теся.

Днесь вся́ка твар весели́ться і ра́дується: я́ко Христо́с Воскре́се, і ад пліни́ся.

Днесь Влади́ка пліни́ а́да, воздви́гнувий ю́зники, я́же от ві́ка ім'я́ше лю́ті одержи́мия.

Приспіви: Вели́чить душа́ моя́ Триіпоста́снаго і Неразді́льнаго Божества́ держа́ву.

Ра́дуйся Ді́во, ра́дуйся, ра́дуйся Благослове́нная, ра́дуйся Препросла́вленная: Твой бо Син Воскре́се тридне́вен от гро́ба.

О боже́ственнаго, о любе́знаго, о сладча́йшаго Твоєго́ гла́са! С на́ми бо нело́жно обіща́лся єси́ би́ти до сконча́нія ві́ка, Христе́, Єго́же, ві́рнії, утвержде́ніє наде́жді іму́ще, ра́дуємся.

О Па́сха ве́лія і свяще́ннійшая, Христе́! О му́дросте, і Сло́ве Бо́жий, і Си́ло! подава́й нам і́стіє Тебе́ причаща́тися в невече́рнім дні Ца́рствія Твоєго́.

Богородичні:

Сла́ва: Согла́сно Ді́во, Тебе́ блажи́м ві́рнії; ра́дуйся, две́ре Госпо́дня; ра́дуйся, гра́де одушевле́нний; ра́дуйся, Єя́же ра́ди нам ни́ні возсія́ світ, із Тебе́ Рожде́ннаго із ме́ртвих воскресе́нія.

І ни́ні: Весели́ся і ра́дуйся, Боже́ственная две́ре Сві́та, заше́дий бо Ісу́с во гроб возсія́, просія́в Со́лнця світлі́є, і ві́рния вся озари́в, Богора́дованная Влади́чице.

Пло́тію усну́в, я́ко мертв, Царю́ і Го́споди, тридне́вен воскре́сл єси́, Ада́ма воздви́г от тлі, і упраздни́в смерть; Па́сха нетлі́нія, ми́ра спасе́ніє. [Тричі]