Всеще́дрий Го́споди і Влади́ко Человіколюби́ве, Ти у́бо мир сотвори́л єси́ до́брим, лю́ди по нему́ насажда́я, я́ко да всім жи́тельствовати на да́нній Тобо́ю землі́. Сего́ ра́ди взива́єм ни́ні в моли́тві ко Твоєму́ милосе́рдію, прося́ще ізба́вити ни от наше́ствія іноплеме́нних, і́же не по зако́ну Єва́нгельському творя́ть, но по го́рдості вели́цій і по не́нависті сатани́нськой. Согріши́хом, у́бо, Бо́же, согріши́хом: оба́че по ми́лості Твоє́й сохрани́ наро́д Твой, я́коже сохрани́л єси́ Ніневі́ю, і укріпи́ во́їни на́ша, я́коже укріпи́л єси́ ру́ці Ісу́са Нави́на на Амали́ка. Яви́, Го́споди, вразі́ на́ша постижде́ні, я́ко да ні єди́ною сла́вою їм украси́тися, прише́дших к нам, я́коже тать посреди́ нощі́, во є́же свобо́ду і жизнь жи́тельствующих во Украї́ні от’я́ти. Благослови́, Бо́же, защи́тителей на́ших храбо́рством і дерзнове́нієм, лі́карей си́лою неутоми́мою і милосе́рдієм, власть предержа́щих же благоми́слієм і му́дростію, да ки́йждо ді́лом би свої́м досто́йно наро́ду украї́нському послужи́л, а Ти, Миропода́телю Бо́же, зе́млю на́шу, я́коже а́гнця, от наше́ствія волко́в сохрани́л, да я́коже ни́ні, тако́жде би і в гряду́щая времена́ ми хвалу́ Тебі́ возноси́ли: Отцю́, і Си́ну, і Ду́хові Свято́му. Амі́нь!

Воскресни́, Го́споди, помози́ нам і ізба́ви нас і́мене ради Твоєго́. Бо́же, уще́дри ни і благослови́ ни, просвіти́ лице́ Твоє́ на ни і поми́луй ни! Благоволи́л єси́, Го́споди, землю́ Твою́, возврати́л єси́ плін Іа́ковль. Оста́вил єси́ беззако́нія люде́й Твої́х, покри́л єси́ вся гріхи́ їх. Укроти́л єси́ весь гнів Твой, возврати́лся єси́ от гні́ва я́рости Твоєя́. Возврати́ нас, Бо́же спасе́ній на́ших, і отврати́ я́рость Твою́ от нас. Єда́ во ві́ки прогні́ваєшися на ни? Іли́ простре́ши гнів Твой от ро́да в род? Бо́же, Ты обра́щся оживи́ши ни, і лю́діє Твої́ возвеселя́ться о Тебі́. Яви́ нам, Го́споди, ми́лость Твою́, і спасе́ніє Твоє́ даждь нам!

О Премилосе́рдий Го́споди, Бо́же щедро́т, і О́тче вся́каго утіше́нія! Не отврати́ лице́ Твоє́ от наро́да Твоєго́, і не посрами́ ча́янія на́шего; упова́юще на Тя, мо́лимся Тебі́, і моля́щеся на щедро́ти Твоя́ упова́єм. Сохрани́ под кро́вом Твоєя́ бла́гости Отчи́зну на́шу Украї́ну, посіти́ ю бла́гостію Твоє́ю, Го́споди; яви́ся наро́ду на́шему, ю населя́ющему, бога́тими щедро́тами Твої́ми; благорастворе́ни і полі́зни во́здухи всім да́руй, дожді́ ми́рни землі́ ко плодоно́сію да́руй; благослови́ віне́ць лі́та бла́гости Твоєя́; утоли́ раздо́ри Церкве́й, угаси́ шата́нія, і єрети́чеськая возста́нія ско́ро разори́ си́лою Свята́го Твоєго́ Ду́ха; всіх нас прийми́ в Ца́рство Твоє́, си́ни сві́та і си́ни дне показа́вий, Твой мир і Твою́ любо́в да́руй нам, Го́споди Бо́же наш, вся бо возда́л єси́ нам. Ти бо єди́н ві́си, є́же тре́буєм, і пре́жде проше́нія подає́ши, і дарова́нія утвержда́єши, і вся́ко дая́ніє бла́го, і всяк дар соверше́н сви́ше єсть, сходя́й от Тебе́, Отця́ сві́тов; Тебі́ сла́ва і держа́ва со Єдиноро́дним Твої́м Си́ном, і Всесвяти́м, і Благи́м, і Животворя́щим Твої́м Ду́хом, ни́ні, і при́сно, і во ві́ки віко́в. Амі́нь.

Го́споди Ісу́се Христе́, Бо́же наш! Прийми́ моли́тви і рук на́ших воздія́нія о оставле́нії всіх гріхо́в і беззако́ній на́ших, ї́миже раздражи́хом Твоє́ человіколю́біє і прогні́вахом Твою́ бла́гость; і отврати́ от нас весь гнів Свой, пра́ведно дви́жимий на ни, і утоли́ вся крамо́ли і нестроє́ніє, і раздо́ри, ни́ні су́щия, і кровопроли́тія, і междоусо́бную брань, і пода́ждь мир і тишину́, любо́в же і утвержде́ніє, і ско́роє примире́ніє лю́дем Твої́м, ї́хже Честно́ю Твоє́ю іскупи́л єси́ Кро́вію, сла́ви ра́ди і́мене Твоєго́, утвержде́нія же і укрепле́нія Це́ркве Твоєя́ Святи́я, я́ко благослове́н єси́ во ві́ки віко́в. Амі́нь.