(Зач. 64) Сі́монъ Пе́тръ, ра́бъ и посла́нникъ Іису́съ Христо́въ, равноче́стную съ на́ми получи́вшимъ вѣ́ру въ пра́вдѣ Бо́га на́шего и Спа́са Іису́са Христа́:

благода́ть ва́мъ и ми́ръ да умно́жится въ позна́ніи Бо́га, и Христа́ Іису́са Го́спода на́шего.

Я́ко вся́ на́мъ боже́ственныя си́лы Єго́, я́же къ животу́ и благоче́стію, по́дана ра́зумомъ [позна́ніємъ] призва́вшаго на́съ сла́вою и добродѣ́телію,

и́миже честна́я на́мъ и вели́кая обѣтова́нія дарова́шася, да си́хъ ра́ди бу́дете боже́ственнаго прича́стницы єстества́, отбѣ́гше, я́же въ мі́рѣ, по́хотныя тли́:

и въ са́моє же сіє́, тща́ніє все́ привне́сше, подади́те въ вѣ́рѣ ва́шей добродѣ́тель, въ добродѣ́тели же ра́зумъ,

въ ра́зумѣ же воздержа́ніє, въ воздержа́ніи же терпѣ́ніє, въ терпѣ́ніи же благоче́стіє,

во благоче́стіи же братолю́біє, въ братолю́біи же любо́вь.

Сія́ бо су́щая въ ва́съ и мно́жащаяся, не пра́здныхъ ниже́ безпло́дныхъ сотворя́тъ вы́ въ Го́спода на́шего Іису́са Христа́ позна́ніє:

єму́же бо нѣ́сть си́хъ, слѣ́пъ є́сть, мжа́й, забве́ніє пріє́мъ очище́нія дре́внихъ свои́хъ грѣхо́въ.

(Зач. 65) Тѣ́мже па́че, бра́тіє, потщи́теся извѣ́стно ва́ше зва́ніє и избра́ніє твори́ти: сія́ бо творя́ще, не и́мате согрѣши́ти никогда́же,

си́це бо оби́лно припода́стся ва́мъ вхо́дъ въ вѣ́чноє Ца́рство Го́спода на́шего и Спа́са Іису́са Христа́.

Сего́ ра́ди не облѣню́ся воспомина́ти при́сно ва́мъ о си́хъ, а́ще и вѣ́дите, и утвержде́ни єсте́ въ настоя́щей и́стинѣ.

Пра́ведно бо мню́, доне́лѣже є́смь въ се́мъ тѣлеси́, возставля́ти ва́съ воспомина́ніємъ,

вѣ́дый, я́ко ско́ро є́сть отложе́ніє тѣлесе́ моєго́, я́коже и Госпо́дь на́шъ Іису́съ Христо́съ сказа́ мнѣ́.

Потщу́ся же и всегда́ имѣ́ти ва́съ по моє́мъ исхо́дѣ па́мять о си́хъ твори́ти.

Не ухищре́ннымъ бо ба́снемъ послѣ́довавше сказа́хомъ ва́мъ си́лу и прише́ствіє Го́спода на́шего Іису́са Христа́, но самови́дцы бы́вше вели́чествія О́наго.

Пріє́мъ бо от Бо́га Отца́ че́сть и сла́ву, гла́су прише́дшу къ Нему́ такову́ от велелѣ́пныя сла́вы: Се́й є́сть Сы́нъ Мо́й возлю́бленный, о Не́мже А́зъ благоизво́лихъ.

И се́й гла́съ мы́ слы́шахомъ съ небесе́ сше́дшь, съ Ни́мъ су́ще на горѣ́ святѣ́й.

И и́мамы извѣ́стнѣйшеє проро́ческоє сло́во: єму́же внима́юще я́коже свѣти́лу сія́ющу въ те́мнѣмъ мѣ́стѣ, до́брѣ творите́, до́ндеже де́нь озари́тъ, и денни́ца возсія́єтъ въ сердца́хъ ва́шихъ,

(Зач. 66) сіє́ пре́жде вѣ́дуще, я́ко вся́ко проро́чество кни́жноє по своєму́ ска́занію не быва́єтъ.

Ни бо́ во́лею бы́сть когда́ человѣ́комъ проро́чество, но от Свята́го Ду́ха просвѣща́єми глаго́лаша святі́и Бо́жіи человѣ́цы.

Бы́ша же и лжи́віи проро́цы въ лю́дѣхъ, я́коже и въ ва́съ бу́дутъ лжи́віи учи́теліє, и́же внесу́тъ є́реси поги́бели, и иску́пльшаго и́хъ Влады́ки отмета́ющеся, приводя́ще себѣ́ ско́ру поги́бель.

И мно́зи послѣ́дствуютъ и́хъ нечистота́мъ, и́хже ра́ди пу́ть и́стинный поху́лится.

И въ преумноже́ніи льсти́выхъ слове́съ [въ лихои́мствѣ льсти́выми словесы́] ва́съ уловя́тъ: и́хже су́дъ искони́ не косни́тъ, и поги́бель и́хъ не дре́млетъ.

А́ще бо Бо́гъ а́нгеловъ согрѣши́вшихъ не пощадѣ́, но плени́цами мра́ка связа́въ, предаде́ на су́дъ му́чимыхъ блюсти́:

и пе́рваго мі́ра не пощадѣ́, но осма́го Но́а пра́вды проповѣ́дника сохрани́, пото́пъ мі́ру нече́ствовавшихъ наведе́:

и гра́ды содо́мскія и гомо́ррскія сже́гъ, разоре́ніємъ осуди́, о́бразъ хотя́щымъ нече́ствовати положи́въ:

и пра́веднаго Ло́та, оби́дима от беззако́нныхъ въ нечистотѣ́ сожи́тія, изба́ви:

видѣ́ніємъ бо и слу́хомъ пра́ведный, живы́й въ ни́хъ, де́нь от дне́ ду́шу пра́ведну беззако́нными дѣ́лы му́чаше:

(Зач. 67) вѣ́сть Госпо́дь благочести́выя от напа́сти избавля́ти, непра́ведники же на де́нь су́дный му́чимы блюсти́,

наипа́че же въслѣ́дъ плотскі́я по́хоти скверне́нія ходя́щыя и о госпо́дствѣ нерадя́щыя: продерза́теле, себѣ́ уго́дницы, сла́вы не трепе́щутъ ху́ляще:

идѣ́же а́нгели крѣ́постію и си́лою бо́лши су́ще, не терпя́тъ на ся́ от Го́спода укори́зненъ су́дъ.

Сі́и же, я́ко ско́ти живо́тни єстество́мъ бы́вше въ поги́бель и тлю́, въ ни́хже не разумѣ́ютъ ху́ляще, во истлѣ́ніи своє́мъ истлѣ́ютъ,

пріє́млюще мзду́ непра́ведну, сла́сть мня́ще вседне́вноє насыще́ніє, скверни́тели и поро́чницы, пита́ющеся лестьми́ свои́ми, яду́ще съ ва́ми,

о́чи иму́ще испо́лнь блудодѣя́нія и непреста́ємаго грѣха́, прельща́юще ду́шы неутвержде́ны, се́рдце науче́но лихои́мству иму́ще, кля́твы ча́да:

оста́вльше пра́вый пу́ть заблуди́ша, послѣ́довавше пути́ Валаа́ма Восо́рова, и́же мзду́ непра́ведну возлюби́,

обличе́ніє же имѣ́ своєго́ беззако́нія: подъяре́мникъ безгла́сенъ, человѣ́ческимъ гла́сомъ провѣща́вшь, возбрани́ проро́ка безу́міє.

Сі́и су́ть исто́чницы безво́дни, о́блацы и мглы́ от вѣ́тръ преноси́ми, и́мже мра́къ те́мный во вѣ́ки блюде́тся.

Прего́рдая бо суєты́ вѣща́юще, прельща́ютъ въ скве́рны плотскі́я по́хоти, отбѣга́ющихъ вся́чески от ни́хъ живу́щихъ во льсти́,

свобо́ду и́мъ обѣщава́юще, са́ми раби́ су́ще тле́нія: и́мже бо кто́ побѣжде́нъ быва́єтъ, сему́ и рабо́тенъ є́сть.

А́ще бо отбѣ́гше скве́рнъ мі́ра въ ра́зумъ [позна́ніємъ] Го́спода и Спа́са на́шего Іису́са Христа́, си́ми же па́ки спле́тшеся побѣжда́єми быва́ютъ, бы́ша и́мъ послѣ́дняя го́рша пе́рвыхъ.

Лу́чше бо бѣ́ и́мъ не позна́ти пути́ пра́вды, не́жели позна́вшымъ возврати́тися вспя́ть от пре́данныя и́мъ святы́я за́повѣди.

Случи́ся бо и́мъ и́стинная при́тча: пе́съ возвра́щься на свою́ блево́тину, и: свинія́, омы́вшися, въ ка́лъ ти́нный.

(Зач. 68) Сіє́ уже́, возлю́бленніи, второ́є ва́мъ пишу́ посла́ніє, въ ни́хже возбужда́ю воспомина́ніємъ ва́шъ чи́стый смы́слъ,

помяну́ти пре́жде рече́нныя глаго́лы от святы́хъ проро́къ, и апо́столъ ва́шихъ за́повѣдь Го́спода и Спа́са:

сіє́ пре́жде вѣ́дяще, я́ко пріиду́тъ въ послѣ́днія дни́ руга́теле, по свои́хъ по́хотѣхъ ходя́ще

и глаго́люще: гдѣ́ є́сть обѣтова́ніє прише́ствія Єго́, отне́лѣже бо отцы́ успо́ша, вся́ та́ко пребыва́ютъ от нача́ла созда́нія.

Таи́тся бо и́мъ сіє́ хотя́щымъ, я́ко небеса́ бѣ́ша испе́рва, и земля́ от воды́ и водо́ю [и посредѣ́ воды́] соста́влена, Бо́жіимъ сло́вомъ:

тѣ́мже тогда́шніи мі́ръ, водо́ю потопле́нъ бы́въ, поги́бе.

А ны́нѣшняя небеса́ и земля́ тѣ́мже сло́вомъ сокрове́на су́ть, огню́ блюдо́ма на де́нь суда́ и поги́бели нечести́выхъ человѣ́къ.

Єди́но же сіє́ да не утаи́тся ва́съ, возлю́бленніи, я́ко єди́нъ де́нь предъ Го́сподемъ я́ко ты́сяща лѣ́тъ, и ты́сяща лѣ́тъ я́ко де́нь єди́нъ.

Не косни́тъ Госпо́дь обѣтова́нія, я́коже нѣ́цыи коснѣ́ніє мня́тъ: но долготе́рпитъ на на́съ, не хотя́ да кто́ поги́бнетъ, но да вси́ въ покая́ніє пріи́дутъ.

Пріи́детъ же де́нь Госпо́день я́ко та́ть въ нощи́, въ о́ньже небеса́ у́бо съ шу́момъ ми́мо и́дутъ [по́йдутъ], стіхі́и же сжига́ємы разоря́тся, земля́ же и я́же на не́й дѣла́ сгоря́тъ.

Си́мъ у́бо всѣ́мъ разоря́ємымъ, ка́цѣмъ подоба́єтъ бы́ти ва́мъ во святы́хъ пребыва́ніихъ и благоче́стіихъ,

ча́ющымъ и скорѣ́є бы́ти жела́ющымъ прише́ствія Бо́жіяго дне́, єго́же ра́ди небеса́ жего́ма разоря́тся, и стіхі́и опаля́ємы раста́ются?

Но́ва же небесе́ и но́вы земли́ по обѣтова́нію Єго́ ча́ємъ, въ ни́хже пра́вда живе́тъ.

Тѣ́мже, возлю́бленніи, си́хъ ча́юще, потщи́теся нескве́рни и непоро́чни Тому́ обрѣсти́ся въ ми́рѣ,

и Го́спода на́шего долготерпѣ́ніє спасе́ніє непщу́йте, я́коже и возлю́бленный на́шъ бра́тъ Па́велъ по да́ннѣй єму́ прему́дрости написа́ ва́мъ,

я́коже и во всѣ́хъ свои́хъ посла́ніихъ, глаго́ля въ ни́хъ о си́хъ: въ ни́хже су́ть неудо́бь разу́мна нѣ́кая, я́же ненауче́ни и неутвержде́ни развраща́ютъ, я́коже и про́чая Писа́нія, къ своє́й поги́бели и́мъ.

Вы́ же у́бо, возлю́бленніи, предвѣ́дяще храни́теся, да не ле́стію беззако́нныхъ сведе́ни бы́вше, отпаде́те своєго́ утвержде́нія,

но да расте́те во благода́ти и ра́зумѣ Го́спода на́шего и Спа́са Іису́са Христа́. Тому́ сла́ва и ны́нѣ и въ де́нь вѣ́ка. Ами́нь.