|
Глава 38
|
Глава́ л҃и
|
|
1
|
1
|
|
Бы́сть же въ то́ вре́мя, разболѣ́ся єзекі́а до сме́рти. И пріи́де къ нему́ Иса́іа проро́къ сы́нъ Амо́совъ и рече́ къ нему́: сія́ глаго́летъ Госпо́дь: устро́й о до́мѣ твоє́мъ, умира́єши бо ты́ и не бу́деши жи́въ.
|
Бы́сть же въ то̀ вре́мѧ, разболѣ́сѧ є҆зекі́а до сме́рти. И҆ прїи́де къ немꙋ̀ и҆са́їа прⷪ҇ро́къ сы́нъ а҆мѡ́совъ и҆ речѐ къ немꙋ̀: сїѧ̑ гл҃етъ гдⷭ҇ь: оу҆стро́й ѡ҆ до́мѣ твое́мъ, оу҆мира́еши бо ты̀ и҆ не бꙋ́деши жи́въ.
|
|
2
|
2
|
|
И обрати́ єзекі́а лице́ своє́ ко стѣнѣ́ и помоли́ся ко Го́сподеви глаго́ля:
|
И҆ ѡ҆братѝ є҆зекі́а лицѐ своѐ ко стѣнѣ̀ и҆ помоли́сѧ ко гдⷭ҇еви глаго́лѧ:
|
|
3
|
3
|
|
помяни́, Госпо́дь, ка́ко ходи́хъ предъ тобо́ю со и́стиною и се́рдцемъ и́стиннымъ, и уго́дная предъ тобо́ю сотвори́хъ. И пла́кася єзекі́а пла́чемъ вели́кимъ.
|
помѧнѝ, гдⷭ҇ь, ка́кѡ ходи́хъ пред̾ тобо́ю со и҆́стиною и҆ се́рдцемъ и҆́стиннымъ, и҆ оу҆гѡ́днаѧ пред̾ тобо́ю сотвори́хъ. И҆ пла́касѧ є҆зекі́а пла́чемъ вели́кимъ.
|
|
4
|
4
|
|
И бы́сть сло́во Госпо́дне ко Иса́іи глаго́ля:
|
И҆ бы́сть сло́во гдⷭ҇не ко и҆са́їи гл҃ѧ:
|
|
5
|
5
|
|
иди́ и рцы́ єзекі́и: та́ко глаго́летъ Госпо́дь Бо́гъ даві́да отца́ твоєго́: услы́шахъ моли́тву твою́ и ви́дѣхъ сле́зы твоя́, се́, прилага́ю къ лѣ́томъ твои́мъ лѣ́тъ пятьна́десять,
|
и҆дѝ и҆ рцы̀ є҆зекі́и: та́кѡ гл҃етъ гдⷭ҇ь бг҃ъ даві́да ѻ҆тца̀ твоегѡ̀: оу҆слы́шахъ моли́твꙋ твою̀ и҆ ви́дѣхъ сле́зы твоѧ̑, сѐ, прилага́ю къ лѣ́тѡмъ твои̑мъ лѣ́тъ пѧтьна́десѧть,
|
|
6
|
6
|
|
и от руки́ царя́ Ассирі́йска изба́влю тя́ и гра́дъ се́й, и защищу́ о гра́дѣ се́мъ:
|
и҆ ѿ рꙋкѝ царѧ̀ а҆ссѷрі́йска и҆зба́влю тѧ̀ и҆ гра́дъ се́й, и҆ защищꙋ̀ ѡ҆ гра́дѣ се́мъ:
|
|
7
|
7
|
|
сіє́ же тебѣ́ зна́меніє от Го́спода, я́ко Бо́гъ сотвори́тъ глаго́лъ се́й, я́коже глаго́ла:
|
сїе́ же тебѣ̀ зна́менїе ѿ гдⷭ҇а, ꙗ҆́кѡ бг҃ъ сотвори́тъ гл҃го́лъ се́й, ꙗ҆́коже гл҃а:
|
|
8
|
8
|
|
се́, а́зъ возвращу́ сѣ́нь степе́ней, и́миже сни́де со́лнце де́сять степе́ней до́му отца́ твоєго́, возвращу́ со́лнце де́сять степе́ней, и́миже сни́де сѣ́нь. И взы́де со́лнце де́сять степе́ней, и́миже сни́де сѣ́нь.
|
сѐ, а҆́зъ возвращꙋ̀ сѣ́нь степе́ней, и҆́миже сни́де со́лнце де́сѧть степе́ней до́мꙋ ѻ҆тца̀ твоегѡ̀, возвращꙋ̀ со́лнце де́сѧть степе́ней, и҆́миже сни́де сѣ́нь. И҆ взы́де со́лнце де́сѧть степе́ней, и҆́миже сни́де сѣ́нь.
|
|
9
|
9
|
|
Моли́тва єзекі́и царя́ Іуде́йска, єгда́ болѣ́ и воста́ от неду́га своєго́.
|
Моли́тва є҆зекі́и царѧ̀ і҆ꙋде́йска, є҆гда̀ болѣ̀ и҆ воста̀ ѿ недꙋ́га своегѡ̀.
|
|
10
|
10
|
|
А́зъ реко́хъ въ высотѣ́ дні́й мои́хъ: пойду́ во врата́ а́дова, оста́влю лѣ́та про́чая.
|
А҆́зъ реко́хъ въ высотѣ̀ дні́й мои́хъ: пойдꙋ̀ во врата̀ а҆́дѡва, ѡ҆ста́влю лѣ̑та прѡ́чаѧ.
|
|
11
|
11
|
|
Реко́хъ: ктому́ не узрю́ спасе́нія Бо́жія на земли́ живы́хъ, ктому́ не узрю́ спасе́нія Ізра́илева на земли́, ктому́ не узрю́ человѣ́ка со живу́щими:
|
Реко́хъ: ктомꙋ̀ не оу҆зрю̀ спⷭ҇нїѧ бж҃їѧ на землѝ живы́хъ, ктомꙋ̀ не оу҆зрю̀ спⷭ҇нїѧ і҆и҃лева на землѝ, ктомꙋ̀ не оу҆зрю̀ человѣ́ка со живꙋ́щими:
|
|
12
|
12
|
|
оста́хъ от сродства́ моєго́, оста́вихъ про́чеє живота́ моєго́, изы́де и отъи́де от мене́ а́ки разруша́яй ку́щу поткну́вый: а́ки платно́ ду́хъ мо́й во мнѣ́ бы́сть, тка́телницѣ приближа́ющейся отрѣ́зати.
|
ѡ҆ста́хъ ѿ сродства̀ моегѡ̀, ѡ҆ста́вихъ про́чее живота̀ моегѡ̀, и҆зы́де и҆ ѿи́де ѿ менє̀ а҆́ки разрꙋша́ѧй кꙋ́щꙋ поткнꙋ́вый: а҆́ки платно̀ дꙋ́хъ мо́й во мнѣ̀ бы́сть, тка́телницѣ приближа́ющейсѧ ѿрѣ́зати.
|
|
13
|
13
|
|
Въ то́й де́нь пре́данъ бы́хъ до зау́тра а́ки льву́, та́ко сокруши́ вся́ ко́сти моя́: от дне́ бо до но́щи пре́данъ бы́хъ.
|
Въ то́й де́нь пре́данъ бы́хъ до заꙋ́тра а҆́ки львꙋ̀, та́кѡ сокрꙋшѝ всѧ̑ кѡ́сти моѧ̑: ѿ дне́ бо до но́щи пре́данъ бы́хъ.
|
|
14
|
14
|
|
Я́ко ла́стовица, та́ко возопію́, и я́ко го́лубь, та́ко поучу́ся: исчезо́стѣ бо о́чи мои́, є́же взира́ти на высоту́ небе́сную ко Го́споду, и́же изба́ви мя́ и отъя́ болѣ́знь души́ моєя́:
|
Ꙗ҆́кѡ ла́стовица, та́кѡ возопїю̀, и҆ ꙗ҆́кѡ го́лꙋбь, та́кѡ поꙋчꙋ́сѧ: и҆счезо́стѣ бо ѻ҆́чи моѝ, є҆́же взира́ти на высотꙋ̀ небе́снꙋю ко гдⷭ҇ꙋ, и҆́же и҆зба́ви мѧ̀ и҆ ѿѧ̀ болѣ́знь дꙋшѝ моеѧ̀:
|
|
15
|
15
|
|
и то́й сотвори́ путево́дство во вся́ лѣ́та моя́.
|
и҆ то́й сотворѝ пꙋтево́дство во всѧ̑ лѣ̑та моѧ̑.
|
|
16
|
16
|
|
Го́споди, о то́й бо возвѣсти́ся тебѣ́, и воздви́глъ єси́ дыха́ніє моє́, и утѣ́шився ожи́хъ.
|
Гдⷭ҇и, ѡ҆ то́й бо возвѣсти́сѧ тебѣ̀, и҆ воздви́глъ є҆сѝ дыха́нїе моѐ, и҆ оу҆тѣ́шивсѧ ѡ҆жи́хъ.
|
|
17
|
17
|
|
Изба́вилъ бо єси́ ду́шу мою́, да не поги́бнетъ, и заве́рглъ єси́ за мя́ вся́ грѣхи́ моя́.
|
И҆зба́вилъ бо є҆сѝ дꙋ́шꙋ мою̀, да не поги́бнетъ, и҆ заве́рглъ є҆сѝ за мѧ̀ всѧ̑ грѣхѝ моѧ̑.
|
|
18
|
18
|
|
Не похва́лятъ бо тебе́, и́же во а́дѣ, ни уме́ршіи возблагословя́тъ тя́, и не надѣ́ются, и́же во а́дѣ, ми́лости твоєя́.
|
Не похва́лѧтъ бо тебѐ, и҆̀же во а҆́дѣ, ни оу҆ме́ршїи возблагословѧ́тъ тѧ̀, и҆ не надѣ́ютсѧ, и҆̀же во а҆́дѣ, млⷭ҇ти твоеѧ̀.
|
|
19
|
19
|
|
Живі́и же возблагословя́тъ тя́, я́коже и а́зъ: отдне́сь бо дѣ́ти сотворю́, я́же возвѣстя́тъ пра́вду твою́,
|
Живі́и же возблагословѧ́тъ тѧ̀, ꙗ҆́коже и҆ а҆́зъ: ѿдне́сь бо дѣ́ти сотворю̀, ꙗ҆̀же возвѣстѧ́тъ пра́вдꙋ твою̀,
|
|
20
|
20
|
|
Го́споди спасе́нія моєго́: и не преста́ну благословя́ тя съ пѣ́снію вся́ дни́ живота́ моєго́ пря́мо до́му Бо́жію.
|
гдⷭ҇и спⷭ҇нїѧ моегѡ̀: и҆ не преста́нꙋ благословѧ́ тѧ съ пѣ́снїю всѧ̑ дни̑ живота̀ моегѡ̀ прѧ́мѡ до́мꙋ бж҃їю.
|
|
21
|
21
|
|
И рече́ Иса́іа ко єзекі́и: возми́ от смо́квій и сотри́, и приложи́ пла́стырь на я́зву и здра́въ бу́деши.
|
И҆ речѐ и҆са́їа ко є҆зекі́и: возмѝ ѿ смо́квїй и҆ сотрѝ, и҆ приложѝ пла́стырь на ꙗ҆́звꙋ и҆ здра́въ бꙋ́деши.
|
|
22
|
22
|
|
И рече́ єзекі́а: сіє́ зна́меніє, я́ко взы́ду въ до́мъ Бо́жій.
|
И҆ речѐ є҆зекі́а: сїѐ зна́менїе, ꙗ҆́кѡ взы́дꙋ въ до́мъ бж҃їй.
|
