Лѣ́та вторагона́десять ца́рства Навуходоно́сора, и́же ца́рствова надъ Ассирі́аны въ Ніневі́і гра́дѣ вели́цѣмъ, во дни́ Арфакса́да, и́же ца́рствова надъ ми́дяны во єквата́нѣхъ

и созда́ во єквата́нѣхъ о́крестъ стѣ́ны от ка́меней те́саныхъ въ широту́ ла́ктей тріє́хъ, а въ долготу́ ла́ктей шести́, и сотвори́ высоту́ стѣны́ ла́ктей седми́десяти, а широту́ єя́ ла́ктей пяти́десяти:

и столпы́ єя́ поста́ви на вратѣ́хъ єго́ ла́ктей сто́, и широту́ и́хъ основа́ на ла́ктей шестьдеся́тъ:

и сотвори́ врата́ єго́ врата́ воздви́жена въ высоту́ ла́ктей седмьдесятъ, а широту́ и́хъ ла́ктей четы́редесять ко исхо́ду си́лъ си́льныхъ єго́ и устроє́ніємъ пѣшце́въ єго́:

и сотвори́ бра́нь во дни́ о́ны ца́рь Навуходоно́соръ на царя́ Арфакса́да на по́ли вели́цѣмъ, є́же є́сть въ предѣ́лѣхъ Рага́влихъ.

И собра́шася къ нему́ вси́ живу́щіи въ го́рней и вси́ обита́ющіи при Євфра́тѣ и Ті́грѣ и ида́спи и на по́ли Аріо́ха царя́ Єлимео́нска, и собра́шася язы́цы мно́зи зѣло́ на ополче́ніє сыно́въ хелеу́дихъ.

И посла́ Навуходоно́соръ ца́рь Ассирі́йскій ко всѣ́мъ обита́ющымъ въ персі́дѣ и ко всѣ́мъ живу́щымъ къ за́падомъ, обита́ющымъ въ кілікі́и и дама́сцѣ, и Ліва́нѣ и антіліва́нѣ, и ко всѣ́мъ живу́щымъ на лицы́ примо́рія,

и къ су́щымъ во язы́цѣхъ карми́ла и въ Галаа́дѣ, и въ вы́шней Галіле́и и на вели́цѣмъ по́ли єсдрило́на,

и ко всѣ́мъ су́щымъ въ самарі́и и градѣ́хъ єя́, и объ о́нъ по́лъ Іорда́на да́же до Ієрусали́ма и вета́ни, и хе́лла и Ка́диса, и рѣки́ Єги́петскія и тафны́, и Рамесси́ и всея́ земли́ Гесе́мскія,

до́ндеже пріити́ вы́ше та́ниса и ме́мфиса, и ко всѣ́мъ обита́ющымъ во Єги́птѣ, до́ндеже пріити́ на предѣ́лы єѳіо́піи.

И ни во что́ вмѣни́ша вси́ обита́ющіи по все́й земли́ сло́во Навуходоно́сора царя́ Ассирі́йска, и не снидо́шася къ нему́ на бра́нь, поне́же не боя́шася єго́, но бы́сть предъ ни́ми а́ки му́жъ єди́нъ: и возврати́ша посла́нниковъ єго́ тщи́хъ со безче́стіємъ от лица́ своєго́.

И разъяри́ся Навуходоно́соръ на вся́ку зе́млю сію́ зѣло́, и кля́тся престо́ломъ и ца́рствомъ свои́мъ вся́чески отмсти́ти всѣ́мъ предѣ́ломъ кілікі́и и Дама́ска и сирі́и, погуби́ти мече́мъ свои́мъ и вся́ живу́щыя въ земли́ Моа́вли и сы́ны Аммони, и всю́ Іуде́ю и всѣ́хъ су́щихъ во Єги́птѣ, до́ндеже пріити́ на предѣ́лы дву́хъ мо́рь.

И ополчи́ся въ си́лѣ своє́й на Арфакса́да царя́ въ лѣ́то седмоєна́десять, и одолѣ́ на бра́ни своє́й, и побѣди́ всю́ си́лу Арфакса́дову и всю́ ко́нницу єго́ и вся́ колесни́цы єго́,

и возоблада́ гра́дами єго́: и пріи́де да́же до єквата́нъ, и одержа́ столпы́, и плѣни́ сто́гны єго́, и красоту́ єго́ положи́ во уничиже́ніє єго́:

и взя́ Арфакса́да на гора́хъ Рага́влихъ, и избоде́ єго́ су́лицами свои́ми, и истреби́ єго́ да́же въ де́нь о́ный:

и возврати́ся съ ни́ми въ Ніневі́ю са́мъ и все́ присовокупле́ніє єго́, мно́жество муже́й ра́тныхъ мно́гоє зѣло́, и бѣ́ та́мо почива́я и пи́ршествуя са́мъ и си́ла єго́ дні́й сто́ два́десять.

И въ лѣ́то осмоєна́десять, и въ два́десять вторы́й [де́нь] пе́рваго ме́сяца, бы́сть сло́во въ дому́ Навуходоно́сора царя́ Ассирі́йска, отмсти́ти вся́цѣй земли́, я́коже глаго́лаше.

И созва́ вся́ служи́тели своя́ и вся́ вельмо́жы своя́, и сообщи́ съ ни́ми та́йну совѣ́та своєго́, и соверши́ всю́ зло́бу земли́ от устъ свои́хъ:

и ті́и суди́ша истреби́ти вся́ку пло́ть, и́же не послѣ́доваша словеси́ у́стъ єго́.

И бы́сть, єгда́ соверши́ совѣ́тъ сво́й, призва́ Навуходоно́соръ ца́рь Ассирі́йскій Олофе́рна вождонача́лника си́лы своєя́, втора́го су́ща по не́мъ, и рече́ къ нему́:

сія́ глаго́летъ ца́рь вели́кій, господи́нъ всея́ земли́: се́, ты́ изы́деши от лица́ моєго́ и во́змеши съ собо́ю муже́й упова́ющихъ въ крѣ́пости своє́й, пѣшце́въ до ты́сящей сто́ два́десять, и мно́жество ко́ней со вса́дниками ты́сящей двана́десять,

и изы́деши бо срѣ́теніє все́й земли́ на за́пады, я́ко не повину́шася глаго́лу у́стъ мои́хъ:

и возвѣсти́ши и́мъ уготовля́ти зе́млю и во́ду, я́ко изы́ду въ я́рости моє́й на ни́хъ, и покры́ю все́ лице́ земли́ нога́ми си́лы моєя́, и да́мъ и́хъ въ расхище́ніє и́мъ:

и я́звенніи и́хъ испо́лнятъ де́бри и пото́ки и́хъ, и рѣка́ наводня́ющаяся ме́ртвыми и́хъ напо́лнится:

и приведу́ плѣ́нъ и́хъ до коне́цъ всея́ земли́:

ты́ же изше́дъ приодержи́ши мнѣ́ вся́къ предѣ́лъ и́хъ, и отдаду́тъ тебѣ́ сами́хъ себе́, и соблюде́ши ми́ и́хъ на де́нь обличе́нія и́хъ:

непокаря́ющихся же не пощади́тъ о́ко твоє́, є́же да́ти и́хъ на убіє́ніє и расхище́ніє во все́й земли́ твоє́й:

я́ко жи́въ а́зъ, и держа́ва ца́рства моєго́: глаго́лахъ и сотворю́ сія́ руко́ю моє́ю:

ты́ же да не преступи́ши єди́наго ко́єго от глаго́лъ господи́на твоєго́, но соверша́я да соверши́ши, я́коже заповѣ́дахъ тебѣ́, и да не укосни́ши сотвори́ти сія́.

И изы́де Олофе́рнъ от лица́ господи́на своєго́, и созва́ вся́ вельмо́жы и воєво́ды и нача́лники си́лы Ассу́рскія,

и изчи́сли избра́нныхъ муже́й на ополче́ніє, я́коже заповѣ́да єму́ господи́нъ єго́, до двана́десять те́мъ, и ко́нниковъ стрѣлце́въ двана́десять ты́сящей,

и устро́и и́хъ, и́мже о́бразомъ бра́ни мно́жество устроєва́єтся:

и взя́ велблю́ды и ослы́ и мски́ припа́совъ ра́ди свои́хъ мно́жество мно́го зѣло́, и о́вцы и волы́ и козлы́ на угото́ваніє и́хъ, и́мже не бѣ́ числа́,

и пи́щи вся́кому му́жу во мно́жествѣ, и зла́та и сребра́ изъ до́му царе́ва мно́го зѣло́:

и изы́де са́мъ и вся́ си́ла єго́ въ пу́ть, є́же предъити́ царю́ Навуходоно́сору и покры́ти все́ лице́ земли́ къ за́падомъ колесни́цами и ко́нницами и пѣшца́ми избра́нными свои́ми:

и мно́гоє примѣше́ніє я́ко пру́зи изыдо́ша съ ни́ми и я́ко песо́къ земли́, не бо́ бѣ́ числа́ от мно́жества и́хъ.

И изыдо́ша изъ Ніневі́і путе́мъ тріє́хъ дні́й на лице́ по́ля вектіле́ѳъ, и ополчи́шися от вектіле́ѳа бли́зъ горы́ су́щія ошу́юю вы́шнія кілікі́и.

И поя́ всю́ си́лу свою́, пѣшцы́ и ко́нники и колесни́цы своя́, и отъи́де отту́ду въ го́рнюю,

и изсѣче́ Фу́да и Лу́да, и поплѣни́ всѣ́хъ сыно́въ рассі́са и сыно́въ Ісма́илевыхъ су́щихъ по лицу́ пусты́ни хеллео́нскія къ ю́гу.

И пре́йде Євфра́тъ, и про́йде Месопота́мію, и раскопа́ вся́ гра́ды высо́кія су́щыя при пото́цѣ Авро́нѣ, до́ндеже пріити́ къ мо́рю:

и объя́тъ предѣ́лы кілікі́йскія, и посѣче́ всѣ́хъ противостоя́щихъ себѣ́: и пріи́де да́же до предѣ́лъ Іа́феѳовыхъ, су́щихъ къ ю́гу на лицы́ Араві́и,

и обы́де всѣ́хъ сыно́въ Мадіа́млихъ, и пожже́ селе́нія и́хъ и плѣни́ стада́ и́хъ:

и сни́де на по́ле Дама́сково во дне́хъ жа́твы пшени́цъ, и пожже́ вся́ ни́вы и́хъ, а о́вчія и воло́выя стада́ даде́ въ погубле́ніє, и гра́ды и́хъ поплѣни́, и поля́ и́хъ опустоши́, и порази́ вся́ ю́ношы и́хъ о́стріємъ меча́.

И нападе́ стра́хъ и тре́петъ єго́ на всѣ́хъ живу́щихъ въ примо́ріи, су́щихъ въ Сідо́нѣ и ти́рѣ и обита́ющихъ въ Су́рѣ и окі́нѣ и на всѣ́хъ живу́щихъ во Іємнаа́нѣ. И живу́щіи во азо́тѣ и Аскало́нѣ убоя́шася єго́ зѣло́.

И посла́ша къ нему́ посла́нниковъ словесы́ ми́рными, глаго́люще:

се́, мы́ о́троцы Навуходоно́сора царя́ вели́каго поверга́ємся предъ тобо́ю, употреби́ на́съ, я́коже уго́дно є́сть лицу́ твоєму́:

се́, се́ла на́ша, и вся́коє мѣ́сто на́ше, и все́ по́ле пшени́цъ, и о́вчія и воло́выя стада́, и вся́ огра́ды селе́ній на́шихъ, су́ть предъ лице́мъ твои́мъ, употреби́, я́коже уго́дно тебѣ́:

се́, и гра́ди на́ши, и живу́щіи въ ни́хъ раби́ твои́ су́ть: ше́дъ срѣ́ти и́хъ, я́коже є́сть бла́го предъ очи́ма твои́ма.

И пріидо́ша му́жіє ко Олофе́рну и возвѣсти́ша єму́ по словесе́мъ си́мъ.

И сни́де на помо́ріє са́мъ и си́ла єго́, и утверди́ стра́жею гра́ды высо́кія и взя́ изъ ни́хъ на споборе́ніє муже́й избра́нныхъ.

И прія́ша єго́ ті́и и вся́ окре́стная и́хъ съ вѣнца́ми и ли́ки и тимпа́ны.

И разори́ вся́ предѣ́лы и́хъ, и дубра́вы и́хъ изсѣче́. И бѣ́ заповѣ́дано єму́ истреби́ти всѣ́хъ бого́въ земли́, я́ко да самому́ єди́ному Навуходоно́сору послу́жатъ вси́ ро́ди и вси́ язы́цы, и вся́ племена́ и́хъ да призыва́ютъ єго́ въ бо́га.

И пріи́де на лице́ єсдрило́на бли́зъ доте́и, я́же є́сть проти́ву вели́кія пилы́ Іуде́и,

и ополчи́ся между́ гава́ємъ и ски́ѳскимъ гра́домъ, и бѣ́ та́мо ме́сяцъ дні́й, ко є́же собра́ти вся́кій припа́съ си́лы своєя́.

И услы́шаша сы́нове Ізра́илевы живу́щіи во Іуде́и вся́, єли́ка сотвори́ Олофе́рнъ язы́комъ, вождонача́лникъ Навуходоно́сора царя́ Ассирі́йскаго, и и́мже о́бразомъ расхи́ти вся́ свяще́нная и́хъ и даде́ сія́ во истребле́ніє:

и убоя́шася зѣло́ от лица́ єго́, и о ієрусали́мѣ и о хра́мѣ Го́спода Бо́га своєго́ смято́шася,

поне́же неда́вно изыдо́ша от плѣне́нія и неда́вно вси́ лю́діє собра́шася Іуде́йстіи, и сосу́ди и олта́рь и до́мъ от оскверне́нія освяще́на бы́ша.

И посла́ша во вся́кій предѣ́лъ самарі́и и коні́и, и веѳоро́на и велме́на и ієріхо́на, и въ хову́ и єсо́ру и во юдо́ль Сали́мскую,

и предпрія́ша вся́ верхи́ го́ръ высо́кихъ, и огради́ша стѣна́ми су́щыя въ ни́хъ се́ла, и отложи́ша на пи́щу ко приуготовле́нію бра́ни, я́ко неда́вно бы́ша поля́ и́хъ пожа́та.

И писа́ Іоакі́мъ ієре́й вели́кій, и́же бѣ́ во дне́хъ о́нѣхъ во Ієрусали́мѣ, живу́щымъ во ветилу́и и ветомесѳе́мѣ, и́же є́сть проти́ву єсдрило́на, на лицы́ по́ля су́щаго бли́зъ Доѳаі́ма,

глаго́ля одержа́ти восхо́ды го́рнія, и́бо и́ми бѣ́ вхо́дъ во Іуде́ю, и бѣ́ удо́бно возбраня́ти и́хъ приходя́щихъ, тѣ́сну прохо́ду су́щу, я́ко всѣ́мъ муже́мъ по два́ [проити́].

И сотвори́ша сы́нове Ізра́илевы, я́коже повелѣ́ и́мъ Іоакі́мъ ієре́й вели́кій и старѣ́йшинство всего́ со́нма Ізра́илева, и́же сѣдя́ху во Ієрусали́мѣ.

И возопи́ша вся́кій му́жъ Ізра́илевъ къ Бо́гу съ прилѣжа́ніємъ вели́кимъ и смири́ша ду́шы своя́ въ прилѣжа́ніи вели́цѣмъ:

са́ми и жены́ и́хъ и младе́нцы и́хъ, и ско́ти и́хъ, и вся́кій пришле́цъ и нає́мникъ, и сребро́мъ ку́пленый и́хъ, возложи́ша вре́тища на чре́сла своя́.

И вся́кій му́жъ Ізра́илевъ и жена́, и дѣ́ти, и живу́щіи во і́єрусали́мѣ падо́ша предъ лице́мъ хра́ма, и посы́паша пе́рстію главы́ своя́, и простро́ша вре́тища своя́ предъ лице́мъ Госпо́днимъ,

и олта́рь вре́тищемъ одѣ́яша, и возопи́ша къ Бо́гу Ізра́илеву єдиноду́шно прилѣ́жно, є́же не да́ти въ расхище́ніє младе́нцевъ и́хъ, и же́нъ въ плѣне́ніє, и градо́въ наслѣ́дія и́хъ въ разоре́ніє, и свята́я во оскверне́ніє и поноше́ніє, обра́дованіє язы́комъ.

И услы́ша Госпо́дь гла́съ и́хъ и призрѣ́ на ско́рбь и́хъ. И бя́ху лю́діє постя́щеся дни́ мно́ги во все́й Іуде́и и Ієрусали́мѣ, предъ лице́мъ святы́хъ Го́спода Вседержи́теля.

И Іоакі́мъ ієре́й вели́кій, и вси́ предстоя́щіи предъ Го́сподемъ, ієре́є и служа́щіи Го́сподеви, вре́тищами препоя́сани о чре́слѣхъ свои́хъ, приноша́ху всесожже́ніє непреста́нноє и обѣ́ты и произво́льная дая́нія люді́й:

и бѣ́ пе́пелъ на кіда́рѣхъ и́хъ, и вопія́ху ко Го́споду от всея́ си́лы, да посѣти́тъ во благо ве́сь до́мъ Ізра́илевъ.

И возвѣще́но бы́сть Олофе́рну вождонача́лнику си́лы Ассу́рскія, я́ко сы́нове Ізра́илевы угото́вашася на бра́нь, и прохо́ды го́рнія заключи́ша, и огради́ша стѣна́ми вся́кій ве́рхъ горы́ высо́кія, и положи́ша на поля́хъ преткнове́нія.

И разгнѣ́вася я́ростію зѣло́, и созва́ всѣ́хъ нача́лниковъ Моа́влихъ и воєво́дъ сыно́въ Аммо́нихъ и всѣ́хъ вла́стелей помо́рія,

и рече́ и́мъ: возвѣсти́те у́бо ми́, сы́нове ханаа́ни, кто́ лю́діє сі́и живу́щіи въ го́рней, и каковы́, въ ни́хже живу́тъ, гра́ди, и мно́жество си́лы и́хъ, и въ че́мъ держа́ва и́хъ и крѣ́пость и́хъ, и кто́ поста́вленъ надъ ни́ми ца́рь во́ждь во́инства и́хъ?

и чесо́ ра́ди сопроти́вишася, є́же не изы́ти во срѣ́теніє мнѣ́, па́че всѣ́хъ живу́щихъ на за́падѣхъ?

И рече́ къ нему́ Ахіо́ръ во́ждь всѣ́хъ сыно́въ Аммо́нихъ: послу́шай убо, господи́не мо́й, сло́ва от у́стъ раба́ твоєго́, и возвѣщу́ тебѣ́ и́стину о лю́дехъ си́хъ, и́же обита́ютъ въ го́рней се́й, бли́зъ тебе́ живу́ще, и не изы́детъ ло́жь изъ у́стъ раба́ твоєго́:

лю́діє сі́и су́ть исча́дія халде́овъ

и всели́шася пе́рвѣє въ Месопота́міи, поне́же не восхотѣ́ша послѣ́довати бого́мъ отце́въ свои́хъ, и́же бѣ́ша въ земли́ Халде́йстѣй:

и отврати́шася от пути́ оте́цъ свои́хъ и поклони́шася Бо́гу небесе́, Бо́гу, єго́же позна́ша: и изгна́ша и́хъ от лица́ бого́въ свои́хъ, и побѣго́ша въ Месопота́мію и обита́ша та́мо дни́ мно́ги:

и рече́ Бо́гъ и́хъ, да изы́дутъ от прише́лствія своєго́ и да и́дутъ въ зе́млю ханаа́ню: и всели́шася та́мо, и умно́жишася зла́томъ и сребро́мъ и скоты́ мно́гими зѣло́:

и снидо́ша во Єги́петъ, покры́ бо лице́ земли́ Ханаа́ни гла́дъ, и прише́лствоваша та́мо, до́ндеже прекорми́шася, и бы́ша та́мо во мно́жество мно́го, и не бѣ́ числа́ ро́ду и́хъ:

и воста́ на ни́хъ ца́рь Єги́петскій и прехи́три и́хъ, и въ трудѣ́ и плі́нѳѣ смири́ и́хъ, и положи́ и́хъ въ рабы́:

и возопи́ша къ Бо́гу своєму́, и порази́ всю́ землю Єги́петскую я́звами, въ ни́хже не бѣ́ изцѣле́ніє, и изгна́ша и́хъ Єги́птяне от лица́ своєго́:

и изсуши́ Бо́гъ чермно́є мо́ре предъ ни́ми,

и веде́ и́хъ на пу́ть Сіны́ и Ка́дисъ-варни́, и изгна́ша всѣ́хъ живу́щихъ въ пусты́ни,

и всели́шася въ земли́ Аморре́овъ, и всѣ́хъ єсевоні́товъ истреби́ша крѣ́постію своє́ю, и преше́дше Іорда́нъ наслѣ́диша всю́ го́рнюю:

и изгна́ша от лица́ своєго́ Ханане́а и Ферезе́а, и Ієвусе́а и Сихе́ма и всѣ́хъ Гергесе́овъ, и обита́ша въ не́й дни́ мно́ги:

и до́ндеже не согрѣши́ша предъ Бо́гомъ свои́мъ, бѣ́ша блага́я съ ни́ми, поне́же Бо́гъ ненави́дяй непра́вды съ ни́ми є́сть:

єгда́ же отступи́ша от пути́, єго́же завѣща́ и́мъ, истреби́шася во мно́зѣхъ бра́нехъ на мно́го зѣло́, и плѣне́ни бы́ша въ зе́млю не свою́, и хра́мъ Бо́га и́хъ бы́сть въ попра́ніє, и гра́ди и́хъ одержа́ни бы́ша от супоста́тъ:

и ны́нѣ обрати́вшеся къ Бо́гу своєму́, взыдо́ша от разсѣ́янія, идѣ́же разсѣ́яни бы́ша та́мо, и одержа́ша Ієрусали́мъ, идѣ́же святи́лище и́хъ, и всели́шася въ го́рней, поне́же бѣ́ пуста́:

и ны́нѣ, влады́ко господи́не, а́ще убо є́сть безу́міє въ лю́дехъ си́хъ, и согрѣша́ютъ къ Бо́гу своєму́, и разсмо́тримъ сіє́, я́ко є́сть въ ни́хъ собла́знъ се́й, и взы́демъ и повою́ємъ и́хъ:

а́ще же нѣ́сть беззако́нія въ язы́цѣ и́хъ, да пре́йдетъ господи́нъ мо́й, да не когда́ защи́титъ Госпо́дь и́хъ и Бо́гъ и́хъ по ни́хъ, и бу́демъ въ поноше́ніє предъ все́ю земле́ю.

И бы́стѣ я́ко преста́ Ахіо́ръ глаго́ля словеса́ сія́, и возропта́ша вси́ лю́діє обстоя́щіи шате́ръ и предстоя́щіи, и рѣ́ша вельмо́жи Олофе́рновы и вси живу́щіи въ примо́ріи и въ Моа́вѣ посѣщи́ єго́:

не бо́ убои́мся от сыно́въ Ізра́илевыхъ: се́ бо, лю́діє, въ ни́хже нѣ́сть си́лы, ниже́ могу́тства ко ополче́нію крѣ́пкому:

тѣ́мже у́бо взы́димъ, и бу́дутъ во снѣ́дь всему́ во́инству твоєму́, влады́ко Олофе́рне.

И єгда́ утиши́ся мяте́жъ муже́й су́щихъ о́крестъ засѣда́нія и рече́ Олофе́рнъ вождонача́лникъ си́лы Ассу́рскія ко Ахіо́ру предъ всѣ́мъ наро́домъ иноплеме́нниковъ и ко всѣ́мъ сыно́мъ Моа́влимъ:

и кто́ єси ты́, Ахіо́ре, и нає́мницы Єфре́мли, я́ко проро́чествовалъ єси́ въ на́съ, я́коже дне́сь, и ре́клъ єси́ ро́дъ Ізра́илевъ не воєва́ти, я́ко Бо́гъ и́хъ защища́єтъ и́хъ? и кто́ Бо́гъ, а́ще не Навуходоно́соръ? се́й по́слетъ держа́ву свою́ и истреби́тъ и́хъ от лица́ земли́, и не изба́витъ и́хъ Бо́гъ и́хъ:

но мы́ раби́ єго́ порази́мъ и́хъ я́ки человѣ́ка єди́наго, и не претерпя́тъ крѣ́пости ко́ней на́шихъ,

попере́мъ бо и́хъ и́ми, и го́ры и́хъ упію́тся въ кро́ви и́хъ, и поля́ и́хъ испо́лнятся ме́ртвыми и́хъ, и не постои́тъ стопа́ но́гъ и́хъ проти́ву лица́ на́шего, но погубле́ніємъ поги́бнутъ, глаго́летъ ца́рь Навуходоно́соръ, господи́нъ всея́ земли́, рече́ бо: не вотще́ бу́дутъ глаго́лы слове́съ єго́:

ты́ же, Ахіо́ре, нає́мниче Аммо́нь, и́же глаго́лалъ єси́ словеса́ сія́ въ де́нь непра́вды твоєя́, не у́зриши ктому́ лица́ моєго́ от дне́ сего́, до́ндеже не отомщу́ ро́ду су́щихъ изъ Єги́пта,

и тогда́ про́йдетъ ме́чь во́инства моєго́ и наро́да рабо́въ мои́хъ ре́бра твоя́, и паде́ши въ я́звенныхъ и́хъ, єгда́ возвращу́ся:

и отведу́тъ тя́ раби́ мои́ въ го́рнюю, и оста́вятъ тя́ во єди́нѣмъ от градо́въ восхо́довъ,

и не поги́бнеши до́ндеже истребле́нъ бу́деши съ ни́ми:

и а́ще упова́єши се́рдцемъ твои́мъ, я́ко не во́змутся да не испада́єтъ твоє́ лице́: рѣ́хъ, и ничто́же отпаде́тъ от глаго́ловъ мои́хъ.

И повелѣ́ Олофе́рнъ рабо́мъ свои́мъ, и́же предстоя́ху въ шатрѣ́ єго́, я́ти Ахіо́ра и отвести́ єго́ къ Ветилу́и и преда́ти въ ру́ки сыно́въ Ізра́илевых.

И я́ша єго́ раби́ єго́ и изведо́ша єго́ внѣ́ полка́ на по́ле, и воздвиго́шася от среды́ напо́льныя въ го́рнюю и пріидо́ша на исто́чники, и́же бы́ша подъ вети́лу́єю.

И я́ко уви́дѣша и́хъ му́жіє гра́да на верху́ горы́, взя́ша ору́жія своя́ и отидо́ша внѣ́ гра́да на ве́рхъ горы́: и бся́кій му́жъ пра́щникъ одержа́ша восхо́дъ сво́й и мета́ху ка́меніємъ на ни́хъ.

И подше́дше подъ го́ру, связа́ша Ахіо́ра и оста́виша пове́рженна подъ ко́ренемъ горы́, и отидо́ша ко господи́ну своєму́.

Снизоше́дше же сы́нове Ізра́илевы от гра́да своєго́ ста́ша надъ ни́мъ, и разрѣши́вше єго́ введо́ша въ ветилу́ю и поста́виша єго́ предъ нача́лниками гра́да своєго́,

и́же бы́ша во дне́хъ ты́хъ, Озі́а сы́нъ мі́хинъ от пле́мене Симео́ня, и хаврі́й сы́нъ Гоѳоніи́левъ, и Хармі́й сы́нъ Мелхіи́левъ.

И созва́ша всѣ́хъ старѣ́йшинъ гра́да: и стеко́шася вся́кій ю́ноша и́хъ и жены́ въ собра́ніє, и поста́виша Ахіо́ра посредѣ́ всего́ наро́да своєго́. И вопроси́ єго́ Озі́а о случи́вшемся.

И отвѣща́въ возвѣсти́ и́мъ глаго́лы засѣда́нія Олофе́рнова и вся́ глаго́лы, єли́ка глаго́ла посредѣ́ князе́й сыно́въ Ассу́рскихъ, и єли́ка велерѣ́чева Олофе́рнъ на до́мъ Ізра́илевъ.

И па́дше лю́діє поклони́шася Бо́гу и возопи́ша, глаго́люще:

Го́споди Бо́же небесе́, при́зри на горды́ни и́хъ, и поми́луй смире́ніє ро́да на́шего, и при́зри на лице́ освяще́нныхъ тебѣ́ въ де́нь се́й.

И утѣ́шиша Ахіо́ра и похвали́ша єго́ зѣло́.

И взя́ єго́ Озі́а изъ собра́нія въ до́мъ сво́й и сотвори́ пи́ръ старѣ́йшинамъ, и призыва́ху Бо́га Ізра́илева на по́мощь всю́ но́щь о́ну.

Во у́тріє же объяви́ Олофе́рнъ всему́ во́инству своєму́ и всѣ́мъ лю́демъ свои́мъ, и́же пріидо́ша на споборе́ніє єму́, воздви́гнутися къ ветилу́и и восхо́ды го́рнія предвоспрія́ти и твори́ти бра́нь проти́ву сыно́въ Ізра́илевыхъ.

И воздви́жеся въ де́нь то́й вся́къ му́жъ си́льный и́хъ: а си́ла и́хъ муже́й ра́тныхъ, муже́й пѣ́шихъ сто́ се́дмьдесять ты́сящъ, и ко́нниковъ ты́сящей двана́десять, кромѣ́ приуготовле́нія и муже́й, и́же бы́ша пѣшцы́ въ ни́хъ, мно́жество мно́го зѣло́.

И ополчи́шася бо юдо́ли бли́зъ ветилу́и при исто́чницѣ, и протяго́шася въ широту́ от Доѳаі́ма да́же до велѳе́ма, и въ долготу́ от ветилу́и да́же до киамо́на, и́же є́сть проти́ву єсдрило́на.

Сы́нове же Ізра́илевы, я́ко уви́дѣша и́хъ мно́жество, смути́шася зѣло́, и рече́ кі́йждо ко бли́жнему своєму́: ны́нѣ поли́жутъ сі́и лице́ земли́ всея́, и ниже́ го́ры высо́кія, ниже́ де́бри, ниже́ хо́лми снесу́тъ тя́жесть и́хъ.

И взе́мше кі́йждо ору́дія ра́тная своя́ и возже́гше огни́ на ба́шнехъ свои́хъ, пребыва́ша стрегу́ще всю́ но́щь о́ну.

Во вторы́й же де́нь изведе́ Олофе́рнъ всю́ ко́нницу свою́ проти́ву лица́ сыно́въ Ізра́илевыхъ, и́же бы́ша въ ветилу́и,

и усма́триваше восхо́довъ гра́да и́хъ, и на исто́чники гра́да и́хъ на́йде, и предвоспрія́ и́хъ, и приста́ви къ ни́мъ ополче́нія муже́й ра́тныхъ, а са́мъ возврати́ся къ лю́демъ свои́мъ.

И прише́дше къ нему́ вси́ нача́лницы сыно́въ Иса́влихъ и вси́ вожде́ве люді́й Моа́влихъ и воєво́ды примо́рія рѣ́ша:

да послу́шаєтъ у́бо словесе́ влады́ка на́шъ, да не бу́детъ сокруше́нія въ си́лѣ твоє́й:

наро́дъ бо се́й сыно́въ Ізра́илевыхъ не упова́ютъ на ко́пія своя́, но на высоты́ го́ръ свои́хъ, въ ни́хже они́ живу́тъ, не бо́ є́сть удо́бно пріити́ верха́ми го́ръ и́хъ:

и ны́нѣ, влады́ко, не ра́туй на ни́хъ, я́коже быва́єтъ ра́ть ополче́нія, и не паде́тъ от люді́й твои́хъ му́жъ єди́нъ:

пребу́ди въ полцѣ́ твоє́мъ, соблюда́яй вся́каго му́жа от си́лы твоєя́, и да обдержа́тъ о́троцы твои́ исто́чникъ водны́й, и́же исхо́дитъ изъ ко́рене горы́,

зане́ отту́ду напая́ются вси́ живу́щіи въ ветилу́и: и погуби́тъ и́хъ жа́жда, и отдадя́тъ гра́дъ сво́й, а мы́ и лю́діє на́ши взы́демъ на бли́зкія верхи́ го́ръ и ополчи́мся на ни́хъ въ предохране́ніє, є́же не изы́ти изъ гра́да му́жу єди́ному:

и иста́ютъ гла́домъ са́ми и жены́ и́хъ и ча́да и́хъ и пре́жде не́же пріити́ мечу́ на ни́хъ, паду́тъ на сто́гнахъ обита́нія своєго́:

и возда́си и́мъ воздая́ніє лука́воє, поне́же возкрамо́лствоваша и не срѣто́ша лица́ твоєго́ въ ми́рѣ.

И уго́дна бы́ша словеса́ и́хъ предъ Олофе́рномъ и предъ всѣ́ми слуги́ єго́, и уста́виша сотвори́ти, я́коже глаго́лаша.

И воздви́жеся по́лкъ сыно́въ Аммо́нихъ, и съ ни́ми пя́ть ты́сящей сыно́въ Ассу́рскихъ, и ополчи́шася во юдо́ли и предвоспрія́ша во́ды и исто́чники во́дъ сыно́въ Ізра́илевыхъ.

И взыдо́ша сы́нове Иса́вли и сы́нове Аммо́ни и ополчи́шася въ го́рнѣй проти́ву Доѳаі́ма, и посла́ша от себе́ къ ю́гу и восто́ку проти́ву єкреви́ла, и́же є́сть бли́зъ Ху́са, и́же є́сть при пото́цѣ мохму́ръ: а про́чеє во́инство Ассирі́овъ ополчи́шася на по́ли и покры́ша все́ лице́ земли́: и шатры́ и припа́сы и́хъ разста́вишася въ наро́дѣ мно́зѣ, и бы́ша во мно́жество мно́го зѣло́.

Сы́нове же Ізра́илевы возопи́ша ко Го́споду Бо́гу своєму́, зане́ возмалоду́шествова ду́хъ и́хъ, я́ко обыдо́ша всѣ́хъ врази́ и́хъ, и не бѣ́ возмо́жно избѣжа́ти изъ среды́ и́хъ.

И пребы́сть о́крестъ и́хъ все́ ополче́ніє Ассу́рскоє, пѣшцы́ и колесни́цы и ко́нницы и́хъ, дні́й три́десять четы́ре: и оскудѣ́ша всѣ́мъ живу́щымъ во ветилу́и вся́ прія́телища и́хъ водна́я,

и рвы́ оскудѣва́ша, и не имѣ́яху пи́ти въ сы́тость воды́ дне́ єди́наго, зане́ мѣ́рою дава́ху и́мъ пи́ти.

И смято́шася младе́нцы и́хъ и жены́ и́хъ и ю́ноши, изнемога́ху от жа́жды и па́даху на сто́гнахъ гра́да и въ прохо́дѣхъ вра́тъ, и не бѣ́ крѣ́пости ктому́ въ ни́хъ.

И собра́шася вси́ лю́діє ко Озі́и и князе́мъ гра́да, ю́ноши и жены́ и о́троцы и возопи́ша гла́сомъ вели́кимъ и рѣ́ша предъ всѣ́ми старѣ́йшинами:

да су́дитъ Бо́гъ между́ на́ми и ва́ми, я́ко сотвори́сте въ на́съ непра́вду ве́лію, не глаго́люще ми́рная съ сынми́ Ассу́рскими:

и ны́нѣ нѣ́сть помо́щника на́мъ, но продаде́ на́съ Бо́гъ въ ру́цѣ и́хъ, є́же низве́рженымъ бы́ти предъ ни́ми жа́ждею и погубле́ніємъ вели́кимъ:

и ны́нѣ призови́те и́хъ и отдади́те гра́дъ ве́сь въ расхище́ніє лю́демъ Олофе́рновымъ и все́й си́лѣ єго́:

лу́чше бо на́мъ бы́ти и́мъ въ расхище́ніє, бу́демъ бо въ рабы́, и жива́ бу́детъ душа́ на́ша, и не у́зримъ сме́рти младе́нцевъ на́шихъ во очесѣ́хъ на́шихъ, и же́нъ и ча́дъ на́шихъ изчеза́щихъ душа́ми свои́ми:

свидѣ́телствуємъ ва́мъ не́бомъ и земле́ю и Бо́гомъ на́шимъ и Го́сподемъ оте́цъ на́шихъ, и́же отмща́єтъ на́мъ по грѣхо́мъ на́шымъ и по грѣхо́мъ оте́цъ на́шихъ, да не сотвори́тъ по глаго́ломъ си́мъ во дне́шній де́нь.

И бы́сть пла́чь ве́лій посредѣ́ собра́нія всѣ́хъ єдиноду́шно, и возопи́ша ко Го́споду Бо́гу гла́сомъ вели́кимъ.

И рече́ къ ни́мъ Озі́а: дерза́йте, бра́тія, претерпи́мъ єще́ пя́ть дні́й, въ ни́хже обрати́тъ Госпо́дь Бо́гъ на́шъ ми́лость свою́ на на́съ, не бо́ оста́витъ на́съ въ коне́цъ:

а́ще же пре́йдутъ сі́и, и не пріи́детъ на на́съ по́мощь, сотворю́ по словесе́мъ ва́шымъ.

И распусти́ люді́й ко своєму́ ополче́нію: и на стѣ́ны и ба́шни гра́да своєго́ отидо́ша, а жены́ и ча́да въ до́мы и́хъ отсла́. И бы́ша во смире́ніи мно́зѣмъ во гра́дѣ.

И услы́ша во дне́хъ о́нѣхъ Іуді́ѳъ дще́рь Мерарі́и, сы́на о́ксова, сы́на Іо́сифова, сы́на Озіи́лева, сы́на Єлкі́єва, сы́на Анані́єва, сы́на гедео́нова, сы́на Рафаі́нова, сы́на акіѳо́нова, сы́на илі́єва, сы́на Єліа́вова, сы́на наѳанаи́лева, сы́на Саламіи́лева, сы́на Саласадаі́єва, сы́на Ієи́лева.

И му́жъ єя́ Манассі́а, от пле́мене єя́ и оте́чества єя́, и у́мре во дне́хъ жа́твы ячме́ня:

настоя́ше бо надъ вя́жущими снопы́ на по́ли, и зно́й пріи́де на главу́ єго́, и паде́ на о́дръ и сконча́ся во ветилу́и гра́дѣ своє́мъ: и погребо́ша єго́ со отцы́ єго́ на селѣ́ су́щемъ посредѣ́ Доѳаі́ма и Валамо́на.

И бѣ́ Іуді́ѳъ въ дому́ своє́мъ вдо́вствующи лѣ́та три́ и ме́сяцы четы́ри.

И сотвори́ себѣ́ жили́ще на кро́вѣ до́му своєго́ и возложи́ на чре́сло своє́ вре́тище, и бя́ху на не́й ри́зы вдовства́ єя́:

и постя́шеся вся́ дни́ вдовства́ своєго́ кромѣ́ предсуббо́тій и суббо́тъ, и предновоме́сячій и новоме́сячій, и пра́здниковъ и ра́дованій до́му Ізра́илева:

и бѣ́ добра́ ви́домъ и красна́ взо́ромъ зѣло́: и оста́ви є́й Манассі́а му́жъ єя́ сребро́ и зла́то, и о́троки и отрокови́цы, и скоты́ и се́ла, и пребыва́ше надъ ни́ми:

и не бѣ́, и́же бы нане́слъ є́й глаго́лъ злы́й поне́же боя́шеся Бо́га зѣло́.

И услы́ша глаго́лы люді́й злы́я на нача́лника, я́ко возмалоду́шествоваша о ску́дости во́дъ: и слы́ша вся́ словеса́ Іуді́ѳъ, я́же глаго́лаше къ ни́мъ Озі́а, я́ко кля́тся и́мъ преда́ти гра́дъ по пяти́ дне́хъ Ассирі́омъ:

и посла́вши рабы́ню свою́, приста́вницу всему́ имѣ́нію єя́, призва́ Озі́ю и хаврі́на и Хармі́на, старѣ́йшинъ гра́да своєго́.

И пріидо́ша къ не́й, и рече́ къ ни́мъ: послу́шайте у́бо мене́, нача́лницы живу́щихъ во ветилу́и, я́ко непра́во сло́во ва́ше, є́же глаго́ласте предъ людьми́ въ де́нь се́й, и уста́висте кля́тву, ю́же глаго́ласте между́ Бо́гомъ и ва́ми, и рѣ́сте преда́ти гра́дъ враго́мъ на́шымъ, а́ще не въ ты́я обрати́тся Госпо́дь помощи́ на́мъ:

и ны́нѣ кто́ єсте́ вы́, и́же искуси́сте Бо́га во дне́шній де́нь, и уста́висте кромѣ́ Бо́га посредѣ́ сыно́въ человѣ́ческихъ?

и ны́нѣ Го́спода Вседержи́теля испыту́єте, и ничто́же позна́єте да́же до вѣ́ка,

поне́же глубины́ се́рдца человѣ́ческаго не изслѣ́дите и слове́съ мы́сли єго́ не пости́гнете: и ка́ко Бо́га, и́же сотвори́ вся́ сія́, испыта́єте, и у́мъ єго́ увѣ́даєте, и мы́сль єго́ позна́єте? ника́коже, бра́тія, не прогнѣвля́йте Го́спода Бо́га на́шего:

Зане́ а́ще не восхо́щетъ въ пяти́ днѣ́хъ помощи́ на́мъ, то́й и́мать вла́сть въ кі́ихъ хо́щетъ покры́ти дне́хъ, или́ и истреби́ти на́съ предъ лице́мъ враго́въ на́шихъ:

вы́ же не одолжа́йте совѣ́тами Го́спода Бо́га на́шего, зане́ не я́ко человѣ́ку Бо́гу прети́ти, ниже́ я́ко сы́на человѣ́ча суди́ти:

сего́ ра́ди ожида́юще от него́ спасе́нія, призове́мъ єго́ на по́мощь на́шу, и послу́шаєтъ гла́са на́шего, а́ще бу́детъ єму́ уго́дно:

и́бо не воста́ въ ро́дѣхъ на́шихъ, ниже́ є́сть во дне́шній де́нь, ниже́ пле́мя, ниже́ оте́чество, ниже́ со́нмъ, ниже́ гра́дъ от на́съ, и́же покланя́ются бого́мъ рукотворе́ннымъ, я́коже бы́сть въ пе́рвыхъ дне́хъ,

и́хже ра́ди преда́ни бы́ша подъ ме́чь и на расхище́ніє отцы́ на́ши и падо́ша паде́ніємъ вели́кимъ предъ врага́ми на́шими:

мы́ же ина́го Бо́га не позна́хомъ ра́звѣ єго́, тѣ́мже упова́ємъ, я́ко не пре́зритъ на́съ, ниже́ от ро́да на́шего:

поне́же, внегда́ взя́тымъ бы́ти на́мъ, та́ко ся́детъ вся́ Іуде́а, и расхище́на бу́дутъ свята́я на́ша, и взы́щетъ оскверне́нія и́хъ от у́стъ на́шихъ,

и убіє́нія бра́тіи на́шея и плѣне́ніє земли́ и опустѣ́ніє наслѣ́дія на́шего обрати́тъ на главу́ на́шу во язы́цѣхъ, идѣ́же а́ще порабо́таємъ та́мо, и бу́демъ въ собла́знъ и въ поноше́ніє предъ стяжа́вшими на́съ,

и́бо не испра́вится слу́жба на́ша въ благода́ть, но въ безче́стіє положи́тъ ю́ Госпо́дь Бо́гъ на́шъ:

и ны́нѣ, бра́тія, пока́жемъ бра́тіи на́шей, я́ко от на́съ зави́ситъ душа́ и́хъ, и свята́я и до́мъ и олта́рь утвержда́єтся на на́съ:

кромѣ́ си́хъ всѣ́хъ возблагодари́мъ Го́сподеви Бо́гу на́шему, и́же искуша́єтъ на́съ, я́коже и отце́въ на́шихъ:

помяни́те, єли́ка сотвори́ со Авраа́момъ, и єли́кими искуша́ше Ісаа́ка, и єли́ка бы́ша Іа́кову въ Месопота́міи Си́рстѣй, пасу́щу о́вцы Лава́на бра́та ма́тере своєя́,

Зане не я́коже о́ныхъ искуси́ во истяза́ніи се́рдца и́хъ, и на́съ не оби́дѣ, но въ науче́ніє наказу́єтъ Госпо́дь приближа́ющихся єму́.

И рече́ къ не́й Озі́а: вся́, єли́ка рекла́ єси́, благи́мъ сре́дцемъ глагола́ла єси́, и нѣ́сть, и́же бы противоста́лъ словесе́мъ твои́мъ,

поне́же не ны́нѣ му́дрость твоя́ я́вна є́сть, но от нача́ла дні́й твои́хъ вѣ́даютъ вси́ лю́діє ра́зумъ тво́й, ка́ко бла́го є́сть смышле́ніє се́рдца твоєго́:

но лю́діє жажда́ху зѣло́ и прину́диша сотвори́ти на́съ, я́коже глаго́лахомъ и́мъ, и навести́ кля́тву на на́съ, єя́же не престу́пимъ:

и ны́нѣ моли́ся о на́съ, и́бо жена́ благочести́ва єси́, и по́слетъ Госпо́дь до́ждь во исполне́ніє рво́въ на́шихъ, и оскудѣва́ти не бу́демъ ктому́.

И рече́ къ ни́мъ Іуді́ѳъ: послу́шайте мене́, и сотворю́ дѣ́ло, є́же простре́тся въ ро́ды родо́въ сыно́мъ ро́да на́шего:

вы́ ста́нете при вратѣ́хъ въ но́щь сію́, и изы́ду а́зъ съ рабы́нею моє́ю, и во дне́хъ, по ни́хже рѣ́сте преда́ти гра́дъ враго́мъ на́шымъ, посѣти́тъ Госпо́дь Ізра́иля руко́ю моє́ю:

вы́ же не испыту́йте дѣ́ла моєго́, не бо́ реку́ ва́мъ, до́ндеже соверша́тся, я́же а́зъ творю́.

И рече́ Озі́а и нача́лницы къ не́й: иди́ съ ми́ромъ, и Госпо́дь Бо́гъ предъ тобо́ю на отмще́ніє враго́въ на́шихъ.

И возвра́щьшеся от жили́ща, идо́ща ко ополче́ніємъ свои́мъ.

Іуді́ѳъ же паде́ на лице́, и возложи́ пе́рсть на главу́ свою́, и сложи́, и́мже одѣвашеся, вре́тище. И бя́ше неда́вно приноси́мо во Ієрусали́мѣ въ дому́ Госпо́дни кади́ло въ ве́черъ то́й, и возопи́ глсомъ вели́кимъ Іуді́ѳъ ко Го́споду и рече́:

Го́споди, Бо́же отца́ моєго́ Симео́на, єму́же да́лъ єси́ въ ру́ку ме́чь во отмще́ніє иноро́дныхъ, и́же растли́ша ложесна́ дѣви́ча во оскверне́ніє и обнажи́ша нѣ́дро въ срамоту́ и оскверни́ша ложесна́ въ поноше́ніє,

ре́клъ бо єси́: да не бу́детъ та́ко: и сотвори́ша, за я́же да́лъ єси́ кня́зи и́хъ на убіє́ніє, и посте́лю и́хъ, я́же вѣ́дяше прельще́ніє и́хъ, въ кро́вь, и порази́лъ єси́ рабо́въ о влады́цѣхъ и влады́ки на престо́лѣхъ и́хъ,

и да́лъ єси́ жены́ и́хъ въ расхище́ніє и дще́ри и́хъ въ плѣне́ніє и вся́ коры́сти и́хъ въ раздѣле́ніє сыно́мъ возлю́бленнымъ от тебе́, и́же и возревнова́ша ре́вностію твоє́ю и мерзи́шася оскверне́ніємъ кро́ве своєя́ и призва́ша тя́ въ помо́щника: Бо́же, Бо́же мо́й, и мене́ услы́ши вдову́:

ты́ бо сотвори́лъ єси́, я́же пре́жде о́ныхъ и о́ная, и я́же по си́хъ и я́же ны́нѣ, и гряду́щая проразумѣ́лъ єси́, и собы́шася, я́же мы́слилъ єси́,

и предста́ша, я́же уста́вилъ єси́, и рѣ́ша: се́, єсмы́: вси́ бо путіє́ твои́ гото́ви, и су́дъ тво́й во проразумѣ́ніи:

се́ бо, Ассирі́ане умно́жишася въ си́лѣ своєй, вознесо́шася о кони́ и о вса́дницѣ, возвелича́шася въ мы́шцѣ пѣше́въ, упова́ша на щи́тъ и копіє́ и лу́къ и пра́щу, и не позна́ша, я́ко ты́ єси́ Госпо́дь сокруша́яй бра́ни:

Госпо́дь и́мя тебѣ́, ты́ сокруши́ и́хъ крѣ́пость си́лою твоє́ю и низложи́ держа́ву и́хъ я́ростію твоє́ю: усовѣ́товаша бо омерзи́ти свята́я твоя́, оскверни́ти селе́ніє упокоє́нія и́мене сла́вы твоєя́ и опрове́ргнути желѣ́зомъ ро́гъ олтаря́ твоєго́:

воззри́ на го́рдость и́хъ, посли́ гнѣ́въ тво́й на главы́ и́хъ, да́ждь въ ру́ку мою́ вдо́вію, ю́же умы́слихъ, крѣ́пость,

порази́ раба́ от усте́нъ хи́трости моєя́ о кня́зи и кня́зя о рабѣ́ єго́, сокруши́ горды́ню и́хъ руко́ю же́нскою:

не бо́ во мно́жествѣ крѣ́пость твоя́, ниже́ могу́тство твоє́ въ си́льныхъ, но смире́нныхъ єси́ Бо́гъ, малѣ́йшихъ єси́ помо́щникъ, засту́пникъ немощны́хъ, отча́янныхъ покрови́тель, ненаде́жныхъ Спаси́тель:

є́й, є́й, Бо́же отца́ моєго́ и Бо́же насле́дія Ізра́илева, Влады́ко небе́съ и земли́, созда́телю во́дъ, Царю́ всея́ тва́ри твоєя́, ты́ услы́ши моле́ніє моє́

и да́ждь сло́во моє́ и хи́трость въ я́зву и ра́ну и́хъ и́же проти́ву завѣ́та твоєго́ и до́му освяще́ннаго твоєго́, и въ верха́ Сіо́ня и до́му одержа́нія сыно́въ твои́хъ усовѣтова́ша же́стокая,

и сотвори́ во все́мъ язы́цѣ твоє́мъ и во все́мъ пле́мени позна́ніє, є́же вѣ́дати, я́ко ты єси, Бо́же Бо́гъ всея́ си́лы и держа́вы, и нѣ́сть ина́го защи́тника ро́да Ізра́илева кромѣ́ тебе́.

И бы́сть я́ко преста́ вопію́щи ко Бо́гу Ізра́илеву и сконча́ вся́ глаго́лы сія́,

и воста́ от поверже́нія и призва́ рабы́ню свою́ и сни́де въ до́мъ, въ не́мже пребыва́ше во дни́ суббо́тнія и въ пра́здники своя́,

и сложи́ вре́тище, и́мже одѣва́шеся, и совлече́ ри́зы вдовства́ своєго́, и обмы́ тѣ́ло водо́ю и пома́зася ми́ромъ бога́тымъ, и разчеса́ власы́ главы́ своєя́ и возложи́ увя́сло на ню́ и облече́ся въ ри́зы весе́лія своєго́, и́миже одѣва́шеся во дни́ живота́ му́жа своєго́ Манассі́и:

и взя́ санда́лія на но́ги своя́, и обложи́ мони́ста и цѣ́пки, и пе́рстни и усеря́зи и все́ украше́ніє своє́, и украси́ся зѣло́ на прельще́ніє оче́съ му́жескихъ, єли́цы а́ще уви́дятъ ю́:

и даде́ рабы́ни своє́й оплете́нъ сосу́дъ віна́ и чва́нецъ єле́а, и мѣше́цъ напо́лни муко́ю и плетени́цы смо́квами и хлѣ́бы чи́стыми, и обви́ вся́ сосу́ды своя́, и возложи́ на ню́.

И изыдо́стѣ ко врато́мъ гра́да ветилу́и и обрѣто́стѣ стоя́щихъ при ни́хъ Озі́ю и ста́рцевъ гра́да хаврі́на и Хармі́на.

Я́коже уви́дѣша ю́, и бѣ́ измѣне́но лице́ єя́, и ри́зу премѣне́нну єя́, и удиви́шася о красотѣ́ єя́ попремно́гу зѣло́ и рѣ́ша є́й:

Бо́гъ, Бо́гъ оте́цъ на́шихъ да да́стъ тя́ въ благода́ть и соверши́тъ начина́нія твоя́ въ вели́чіє сыно́въ Ізра́илевыхъ и возвыше́ніє Ієрусали́ма. И поклони́ся Бо́гу

и рече́ къ ни́мъ: повели́те отве́рсти ми́ врата́ гра́да, и изы́ду ко соверше́нію слове́съ, и́хже глаго́ласте со мно́ю. И повелѣ́ша ю́ношамъ отве́рсти єй, я́коже глаго́лаше.

И сотвори́ша та́ко. И изы́де Іуді́ѳъ сама́ и рабы́ня єя́ съ не́ю: назира́ху же ю́ му́жіє гра́да, до́ндеже сни́де съ горы́, до́ндеже пре́йде юдо́ль, и ктому́ не уви́дѣша єя́.

И идя́стѣ юдо́лію пря́мо. И срѣ́те ю́ пе́рвая стра́жа Ассирі́йская,

и взя́ша ю́ и вопроси́ша: от ко́ихъ єси́? и отку́ду гряде́ши? и ка́мо и́деши? И рече́: дщи́ є́смь Євре́овъ и убѣга́ю от лица́ и́хъ, я́ко и́мутъ пре́дани бы́ти ва́мъ на поглоще́ніє:

и а́зъ гряду́ предъ лице́ Олофе́рна вождонача́лника си́лы ва́шея, є́же возвѣсти́ти глаго́лы и́стины, и покажу́ предъ лице́мъ єго́ пу́ть, по нему́же по́йдетъ и возоблада́єтъ все́ю го́рнею, и не поги́бнетъ от муже́й єго́ пло́ть єди́на, ниже́ ду́хъ жи́зни.

Я́коже услы́шаша му́жіє глаго́лы єя́ и усмотри́ша лице́ єя́, и бя́ше предъ ни́ми чудна́ красото́ю зѣло́, и рѣ́ша къ не́й:

спасла́ єси́ ду́шу твою́, потща́вшися сни́ти предъ лице́ господи́на на́шего: и ны́нѣ приступи́ ко шатру́ єго́, и от на́съ прово́дятъ тя́, до́ндеже предаду́тъ тя́ въ ру́цѣ єго́:

а́ще же ста́неши предъ ни́мъ, да не убои́шися се́рдцемъ твои́мъ, но возвѣсти́ по глаго́ломъ твои́мъ, и бла́го тебѣ́ сотвори́тъ.

И избра́ша от себе́ муже́й сто́ и присовокупи́ша є́й и рабы́ни єя́, и ведо́ша я́ ко шатру́ Олофе́рнову.

И бы́сть стече́ніє во все́мъ ополче́ніи, разгласи́ся бо по шатро́мъ прише́ствіє єя́: и прише́дше окружа́ху ю́, я́ко стоя́ше внѣ́ шатра́ Олофе́рнова, до́ндеже возвѣсти́ша єму́ о ней.

И чудя́хуся о красотѣ́ єя́ и удивля́хуся сыно́мъ Ізра́илевымъ о не́й, и рѣ́ша кі́йждо ко бли́жнему своєму́: кто́ пре́зритъ люді́й си́хъ, и́же и́мутъ у себе́ же́нъ таковы́хъ? я́ко не добро́ є́сть оста́вити изъ ни́хъ му́жа єди́наго, и́же оста́влени бы́вше возмо́гутъ прехи́трити всю́ зе́млю.

И изыдо́ша спя́щіи при Олофе́рнѣ и вси́ служи́теліє єго́ и введо́ша ю́ въ шате́ръ.

И бѣ́ Олофе́рнъ опочива́я на одрѣ́ своє́мъ подъ завѣ́сою, я́же бѣ́ от порфи́ры и зла́та и смара́гда и ка́меній многоцѣ́нныхъ втка́нныхъ.

И возвѣсти́ша єму́ о не́й, и изы́де въ предсѣ́ніє, и лампа́ды сре́бряныя предъидя́ху єму́.

Єгда́ же пріи́де предъ лице́ єго́ Іуді́ѳъ и слу́гъ єго́, диви́шася вси́ о красотѣ́ лица́ єя́. И па́дши на лице́ поклони́ся єму́: и воздвиго́ша ю́ раби́ єго́.

И рече́ къ не́й Олофе́рнъ: дерза́й, же́но, да не устраша́єшися се́рдцемъ твои́мъ, зане́ а́зъ не озло́бихъ человѣ́ка, и́же изво́ли служи́ти царю́ Навуходоно́сору всея́ земли́:

и ны́нѣ лю́діє твои́ живу́щіи въ го́рней, а́ще бы не уничто́жили мя́, не воздви́глъ бы́хъ копія́ моєго́ на ни́хъ, но они́ са́ми себѣ́ сотвори́ша сія́:

и ны́нѣ глаго́ли ми́, чесо́ ра́ди отшла́ єси́ от ни́хъ и пришла́ єси́ къ на́мъ? прихо́диши бо ко спасе́нію: дерза́й, въ но́щь сію́ жива́ бу́деши, и въ про́чеє:

нѣ́сть бо, и́же оби́дитъ тя́, но бла́го тебѣ́ сотвори́тъ, я́коже быва́єтъ рабо́мъ господи́на моєго́ царя́ Навуходоно́сора.

И рече́ къ нему́ Іуді́ѳъ: пріими́ глаго́лы рабы́ твоєя́, и да проглаго́летъ рабы́ня твоя́ предъ лице́мъ твои́мъ, и не возвѣщу́ лжи́ госиоди́ну моєму́ въ но́щь сію́:

и а́ще и́маши послѣ́довати словесе́мъ рабы́ни твоєя́, соверше́нно дѣ́ло сотвори́тъ съ тобо́ю Бо́гъ, и не отпаде́тъ господи́нъ мо́й от начина́ній свои́хъ:

жіве́тъ бо ца́рь Навуходоно́соръ всея́ земли́, и живе́тъ держа́ва єго́, и́же посла́ тя во исправле́ніє вся́кія души́, я́ко не то́кмо человѣ́цы тебе́ ра́ди послу́жатъ єму́, но и звѣ́ріє по́льніи и ско́ти и пти́цы небе́сныя крѣ́постію твоє́ю жи́ви бу́дутъ о Навуходоно́сорѣ и все́мъ до́мѣ єго́:

слы́шахомъ бо прему́дрость твою́ и хи́трости души́ твоєя́, и возвѣсти́ся все́й земли́, я́ко ты́ єди́нъ бла́гъ во все́мъ ца́рствѣ и си́ленъ въ ра́зумѣ и чу́денъ во ополче́ніихъ бра́ни:

и ны́нѣ́ сло́во, є́же изрече́ Ахіо́ръ въ засѣда́ніи твоє́мъ, слышахомъ глаго́лы єго́, я́ко снабдѣ́ша єго́ му́жіє гра́да ветилу́и, и возвѣсти́ и́мъ вся́, єли́ка изглаго́ла о́нъ у тебе́:

сего́ ра́ди, влады́ко господи́не, да не преступа́єши словесе́ єго́, но положи́ єго́ въ твоє́мъ се́рдцы, я́ко и́стинно є́сть: не бо́ отмща́єтся ро́дъ на́шъ, не превозмога́єтъ ме́чь на ни́хъ, а́ще не согрѣша́тъ къ Бо́гу своєму́:

и ны́нѣ да не бу́детъ господи́нъ мо́й отве́рженъ и недѣйстви́теленъ, и нападе́тъ сме́рть на лице́ и́хъ, и пости́гнетъ и́хъ согрѣше́ніє, и́мже раздража́тъ Бо́га своєго́, когда́ либо а́ще сотворя́тъ безмѣ́стіє:

поне́же бо оскудѣ́ша и́мъ бра́шна, и ума́лися вся́ вода́, восхотѣ́ша устреми́тися на скоты́ своя́, и вся́, єли́ка опредѣли́ и́мъ Бо́гъ въ зако́нѣхъ свои́хъ не я́сти, умысли́ша употребля́ти:

и нача́тки пшени́цы, и десяти́ны віна́ и єле́а, я́же соблюда́ху освяти́вше ієрео́мъ предстоя́щымъ во Ієрусали́мѣ предъ лице́мъ Бо́га на́шего, суди́ша иждива́ти, и́мже ниже́ рука́ми подоба́ше прикаса́тися кому́ от люді́й:

и посла́ша во Ієрусали́мъ, я́ко и та́мо живу́щіи сотвори́ша сія́, да принесу́тъ и́мъ разрѣше́ніє от старѣ́йшинъ:

и бу́детъ, єгда́ возвѣсти́тся и́мъ, и сотворя́тъ, даду́тся тебѣ́ въ погубле́ніє въ де́нь то́й:

тѣ́мже а́зъ раба́ твоя́, позна́вши сія́ вся́, отбѣго́хъ от лица́ и́хъ: и посла́ мя́ Бо́гъ твори́ти съ тобо́ю дѣла́, о ни́хже ужа́снется вся́ земля́, єли́цы а́ще услы́шатъ сія́,

зане́ раба́ твоя́ благочести́ва є́сть и служа́щи но́щію и дне́мъ Бо́гу небесе́: и ны́нѣ пребу́ду у тебе́, господи́не мо́й, и да исхо́дитъ раба́ твоя́ въ нощи́ въ де́брь и мо́лится къ Бо́гу: и возвѣсти́тъ ми́, єгда́ сотворя́тъ согрѣше́нія своя́:

и прише́дши возвѣщу́ тебѣ́, и изы́деши со все́ю си́лою твоє́ю, и нѣ́сть, и́же воспроти́вится тебѣ́ от ни́хъ:

и поведу́ тя сквозѣ́ Іудею, до́ндеже пріити́ пря́мо Ієрусали́ма, и положу́ сѣда́лище твоє́ посредѣ́ єго́, и пожене́ши и́хъ а́ки о́вцы, и́мже нѣ́сть па́стыря, и не возско́млетъ пе́съ язы́комъ свои́мъ проти́ву тебе́: зане́ мнѣ́ сія́ рече́на су́ть по предвѣ́дѣнію моєму́ и возвѣще́на ми́, и послана́ є́смь возвѣсти́ти тебѣ́.

И уго́дна бы́ша словеса́ єя́ предъ Олофе́рномъ и предъ всѣ́ми слуги́ єго́, и диви́шася о прему́дрости єя́ и рѣ́ша:

нѣ́сть таковы́я жены́ от конца́ да́же до конца́ земли́ въ красотѣ́ лица́ и въ ра́зумѣ слове́съ.

И рече́ къ не́й Олофе́рнъ: бла́го сотвори́ Бо́гъ посла́вый тя́ предъ людьми́, є́же бы́ти въ рука́хъ на́шихъ держа́вѣ, на уничижи́вшихъ же господи́на моєго́ поги́бели:

и ны́нѣ́ красна́ єси́ ты́ взо́ромъ твои́мъ и блага́ во словесѣ́хъ твои́хъ: зане́ а́ще сотвори́ши, я́коже глаго́лала єси́, Бо́гъ тво́й бу́детъ мо́й Бо́гъ, и ты́ въ дому́ царя́ Навуходоно́сора ся́деши и бу́деши имени́та по все́й земли́.

И повелѣ́ ввести́ ю́, идѣ́же положе́ни бы́ша сосу́ди сре́бряніи єго́, и повелѣ́ угото́вити є́й от пи́щей устроєва́ємыхъ себѣ́ и от віна́ своєго́ пи́ти.

И рече́ Іуді́ѳъ: не снѣ́мъ от ни́хъ, да не бу́детъ собла́знъ, но от принесе́нныхъ со мно́ю мнѣ́ подава́ємо да бу́детъ.

И рече́ къ ней Олофе́рнъ: а́ще же оскудѣ́ютъ су́щая съ тобо́ю, отку́ду принесе́мъ тебѣ́ дава́ти подо́бная си́мъ? нѣ́сть бо съ на́ми от ро́да твоєго́.

И рече́ Іуді́ѳъ къ нему́: жива́ є́сть душа́ твоя́, господи́не мо́й, я́ко не иждиве́тъ раба́ твоя́ су́щихъ со мно́ю, до́ндеже сотвори́тъ Госпо́дь руко́ю моє́ю, я́же уста́ви.

И ведо́ша ю́ о́троцы Олофе́рновы въ шате́ръ, и спа́ да́же до полу́нощи: и воста́ о у́тренней стра́жи

и посла́ ко Олофе́рну, глаго́лющи: да повели́тъ у́бо господи́нъ мо́й пуща́ти рабу́ твою́ на моли́тву исходи́ти.

И повелѣ́ Олофе́рнъ тѣлохрани́телемъ не возбраня́ти є́й. И пребы́сть въ полку́ дни́ три́: и исхожда́ше въ нощи́ въ де́брь ветилу́и и умыва́шеся во ополче́ніи во исто́чницѣ воды́,

и я́ко взы́де, моля́шеся Господу Бо́гу Ізра́илеву, да упра́витъ пу́ть єя́ ко возставле́нію сыно́въ люді́й свои́хъ:

и входя́щи чиста́ пребыва́ше въ шатрѣ́, доне́лиже приноша́ше пи́щу свою́ ко ве́черу.

И бы́сть въ де́нь четве́ртый, сотвори́ Олофе́рнъ пи́ръ рабо́мъ свои́мъ єди́нымъ, и не призва́ въ послуже́ніє ни єди́наго от су́щихъ при слу́жбахъ,

и рече́ ваго́ю євну́ху, и́же бя́ше приста́вникъ надъ всѣ́ми су́щими єго́: ше́дъ у́бо увѣща́й жену́ Євре́иню, я́же є́сть у тебе́, є́же пріити́ къ на́мъ и я́сти и пи́ти съ на́ми:

се́ бо, сту́дно лицу́ на́шему, а́ще жену́ сицеву́ю оста́вимъ не бесѣ́довавше съ не́ю, зане́ а́ще сея́ не призове́мъ, посмѣє́тся на́мъ.

И изы́де ваго́а от лица́ Олофе́рнова и вни́де къ не́й и рече́: да не облѣни́тся у́бо отрокови́ца до́брая сія́, прише́дши ко господи́ну моєму́, просла́витися предъ лице́мъ єго́ и пи́ти съ на́ми въ весе́ліє віно́ и бы́ти въ де́нь сей, я́ко дщи́ єди́на от сыно́въ Ассу́ровыхъ, я́же предстоя́тъ въ дому́ Навуходоно́соровѣ.

И рече́ къ нему́ Іуді́ѳъ: и кто́ є́смь а́зъ противоглаго́лющи господи́ну моєму́? зане́ все́, є́же бу́детъ предъ очесы́ єго́ уго́дно, потща́вшися сотворю́, и бу́детъ сіє́ ми́ ра́дованіє да́же до дне́ сме́рти моєя́.

И воста́вши украси́ся одѣя́ніємъ и вся́кимъ украше́ніємъ же́нскимъ: и пріи́де раба́ єя́ и постла́ є́й предъ Олофе́рномъ до́лу ковры́, и́хже взя́ от ваго́и ко повседне́вному употребле́нію своєму́, во є́же я́сти возле́гшей на ни́хъ:

и вше́дши возлеже́ Іуді́ѳъ. И изступи́ се́рдце Олофе́рново о ней, и подви́жеся душа́ єго́: и бя́ше жела́теленъ зѣло́, є́же сни́тися съ не́ю, и усмотрева́ше вре́мене, є́же обольсти́ти ю́, от него́же дне́ ви́дѣ ю́:

и рече́ къ не́й Олофе́рнъ: пі́й у́бо и бу́ди съ на́ми въ весе́ліи.

И рече́ Іуді́ѳъ: бу́ду у́бо пи́ти, господи́не, я́ко возвели́чися живо́тъ мо́й во мнѣ́ дне́сь па́че всѣ́хъ дні́й рожде́нія моєго́.

И взе́мши яде́ и пи́ предъ ни́мъ, я́же угото́ва раба́ єя́.

И возвесели́ся Олофе́рнъ о не́й и пи́ віна́ мно́го зѣло́, єли́ко не пи́ никогда́же въ де́нь єди́нъ, отне́лиже роди́ся.

Єгда́ же по́здѣ бы́сть, потща́шася раби́ єго́ отити́, и ваго́а заключи́ шате́ръ отвнѣ́ и отпусти́ предстоя́щихъ от лица́ господи́на своєго́, и отидо́ша къ ло́жамъ свои́мъ, бя́ху бо вси́ утружде́ни, зане́ на мно́зѣ пребы́сть пи́ръ.

Єгда́ же по́зді бисть, потща́шася раби́ єго́ отити́, і Ваго́я заключи́ шате́р отвні́ і отпусти́ предстоя́щих от лиця́ господи́на своєго́, і отидо́ша к ло́жам свої́м, бя́ху бо всі утружде́ні, зане́ на мно́зі преби́сть пир.

Оста́ся же Іуді́ѳъ єди́на въ шатрѣ́, и Олофе́рнъ пове́рженъ на ло́жи своє́мъ: бя́ше бо преиспо́лненъ віно́мъ.

Оста́ся же Іуди́ф єди́на в шатрі́, і Олофе́рн пове́ржен на ло́жі своє́м; бя́ше бо преіспо́лнен вино́м.

И рече́ Іуді́ѳъ рабѣ́ своє́й, да стои́тъ внѣ́ ло́жницы єя́ и да смо́тритъ исхо́да єя́ я́коже по вся́къ де́нь: рече́ бо, я́ко изы́ти и́мать на моли́тву свою́: и ваго́ю глаго́ла по словесе́мъ си́мъ.

І рече́ Іуди́ф рабі́ своє́й, да стої́ть вні ло́жниці єя́ і да смо́трить ісхо́да єя́ я́коже по всяк день; рече́ бо, я́ко ізи́ти і́мать на моли́тву свою́; і Ваго́ю глаго́ла по словесе́м сим.

И отидо́ша вси́ от лица́ єя́, и ни єди́нъ оста́ся въ ло́жницѣ от ма́ла да́же до вели́ка. И ста́вши Іуді́ѳъ при одрѣ́ єго́, рече́ въ се́рдцы своє́мъ: Го́споди, Бо́же всея́ си́лы, при́зри въ ча́съ се́й на дѣла́ ру́къ мои́хъ ко возвыше́нію Ієрусали́ма,

І отидо́ша всі от лиця́ єя́, і ні єди́н оста́ся в ло́жниці от ма́ла да́же до вели́ка. І ста́вши Іуди́ф при одрі́ єго́, рече́ в се́рдці своє́м: Го́споди, Бо́же всея́ си́ли, при́зри в час сей на діла́ рук мої́х ко возвише́нію Ієрусали́ма,

я́ко ны́нѣ́ вре́мя помоществова́ти наслѣ́дію Твоєму́ и соверши́ти начина́ніє моє́ ко сокруше́нію враго́въ, и́же воста́ша на на́съ.

я́ко ни́ні вре́м'я помоществова́ти наслі́дію Твоєму́ і соверши́ти начина́ніє моє́ ко сокруше́нію враго́в, і́же воста́ша на нас.

И приступи́вши къ сто́лпнику одра́, и́же бя́ше у главы́ Олофе́рновы, сня́тъ ме́чь єго́ съ него́,

І приступи́вши к сто́лпнику одра́, і́же бя́ше у глави́ Олофе́рнови, снят меч єго́ с него́,

и прибли́жившися ко одру́, взя́ въ го́рсть власы́ главы́ єго́ и рече́: укрѣпи́ мя, Го́споди Бо́же Ізра́илевъ, въ де́нь се́й.

і прибли́жившися ко одру́, взя в горсть власи́ глави́ єго́ і рече́: укріпи́ м'я, Го́споди Бо́же Ізра́їлев, в день сей.

И уда́ри въ вы́ю єго́ два́жды си́лою сво́єю, и отъя́ главу́ єго́ от него́,

І уда́ри в ви́ю єго́ два́жди си́лою сво́єю, і от'я́ главу́ єго́ от него́,

и отвали́ тѣ́ло єго́ от посте́ли, и отъя́ завѣ́су от столпо́въ: и по ма́лѣ изы́де и предаде́ рабы́ни своє́й главу́ Олофе́рнову:

і отвали́ ті́ло єго́ от посте́лі, і от'я́ заві́су от столпо́в; і по ма́лі ізи́де і предаде́ раби́ні своє́й главу́ Олофе́рнову;

и вложи́ ю́ въ мѣше́цъ снѣ́дей свои́хъ. И изыдо́стѣ о́бѣ ку́пно по обы́чаю своєму́ на моли́тву: и прошедшѣ по́лкъ, обыдо́стѣ де́брь о́ную, и взыдо́стѣ на го́ру Ветилу́и, и пріидостѣ ко врато́мъ єя́.

і вложи́ ю в міше́ць сні́дей свої́х. І ізидо́сті о́бі ку́пно по оби́чаю своєму́ на моли́тву; і проше́дші полк, обидо́сті дебр о́ную, і взидо́сті на го́ру Ветилу́ї, і прийдо́сті ко врато́м єя́.

И рече́ Іуді́ѳъ издале́ча стрегу́щымъ на вратѣ́хъ: отве́рзите ны́нѣ, отве́рзите врата́, съ на́ми Бо́гъ, Бо́гъ на́шъ, сотвори́ти єще́ крѣ́пость во Ізра́или и си́лу на враги́, я́коже и дне́сь сотвори́.

І рече́ Іуди́ф іздале́ча стрегу́щим на враті́х: отве́рзіте ни́ні, отве́рзіте врата́, с на́ми Бог, Бог наш, сотвори́ти єще́ крі́пость во Ізра́їлі і си́лу на враги́, я́коже і днесь сотвори́.

И бы́сть я́ко услы́шаша му́жіє гра́да того́ гла́съ єя́, потща́шася сни́ти ко врато́мъ гра́да своєго́ и созва́ша ста́рцевъ гра́да.

І бисть я́ко усли́шаша му́жіє гра́да того́ глас єя́, потща́шася сни́ти ко врато́м гра́да своєго́ і созва́ша ста́рцев гра́да.

И стеко́шася вси́ от ма́ла да́же до вели́ка, я́ко па́че ча́янія бѣ́ имъ, є́же пріити́ є́й, и отверзо́ша врата́ и воспрія́ша и́хъ: и вже́гше о́гнь во свѣще́ніє, окружи́ша и́хъ.

І стеко́шася всі от ма́ла да́же до вели́ка, я́ко па́че ча́янія бі їм, є́же прийти́ єй, і отверзо́ша врата́ і восприя́ша їх; і вже́гше огнь во свіще́ніє, окружи́ша їх.

Она́ же рече́ къ ни́мъ гла́сомъ вели́кимъ: хвали́те Бо́га, хвали́те: хвали́те Бо́га, И́же не отста́ви ми́лости Своєя́ от до́му Ізра́илева, но сокруши́ враги́ на́шя руко́ю моє́ю въ но́щь сію́.

Она́ же рече́ к ним гла́сом вели́ким: хвалі́те Бо́га, хвалі́те, хвалі́те Бо́га, І́же не отста́ви ми́лости Своєя́ от до́му Ізра́їлева, но сокруши́ враги́ на́ша руко́ю моє́ю в нощ сію́.

И изе́мши главу́ изъ мѣшца́ показа́ и рече́ и́мъ: се́, глава́ Олофе́рна вождонача́лника си́лы Ассу́рскія, и се́, завѣ́са, за не́юже лежа́ше во пія́нствахъ свои́хъ, и порази́ єго́ Госпо́дь руко́ю же́нскою:

І ізе́мши главу́ із мішця́ показа́ і рече́ їм: се глава́ Олофе́рна вождонача́льника си́ли Ассу́рськия, і се, заві́са, за не́юже лежа́ше во пія́нствах свої́х, і порази́ єго́ Госпо́дь руко́ю же́нською;

и жи́въ є́сть Госпо́дь, И́же сохрани́ мя въ пути́ моє́мъ, и́мже ходи́хъ, я́ко прельсти́ єго́ лице́ моє́ въ па́губу єго́, и не сотвори́ грѣха́ со мно́ю во оскверне́ніє и срамоту́.

і жив єсть Госпо́дь, І́же сохрани́ м'я в путі́ моє́м, і́мже ходи́х, я́ко прельсти́ єго́ лице́ моє́ в па́губу єго́, і не сотвори́ гріха́ со мно́ю во оскверне́ніє і срамоту́.

И ужасо́шася вси́ лю́діє зѣло́, и па́дше поклони́шася Бо́гу, и рѣ́ша єдиноду́шно: благослове́нъ єси́, Бо́же на́шъ, уничто́живый въ день се́й враги́ люді́й Твои́хъ.

І ужасо́шася всі лю́діє зіло́, і па́дше поклони́шася Бо́гу, і рі́ша єдиноду́шно: благослове́н єси́, Бо́же наш, унічто́живий в день сей враги́ люді́й Твої́х.

И рече́ є́й Озі́а: благослове́на ты́ єси́, дщи́, Бо́гомъ вы́шнимъ па́че всѣ́хъ же́нъ я́же на земли́, и благослове́нъ Госпо́дь Бо́гъ, И́же созда́ небеса́ и зе́млю, И́же упра́ви тя́ на сокруше́ніє главы́ кня́зя враго́въ на́шихъ:

І рече́ єй Озі́я: благослове́нна ти єси́, дщи, Бо́гом Ви́шнім па́че всіх жен, я́же на землі́, і благослове́н Госпо́дь Бог, І́же созда́ небеса́ і зе́млю, І́же упра́ви тя на сокруше́ніє глави́ кня́зя враго́в на́ших;

я́ко не отста́нетъ наде́жда твоя́ от се́рдца человѣ́къ, помина́ющихъ крѣ́пость Бо́жію, да́же до вѣ́ка:

я́ко не отста́неть наде́жда твоя́ от се́рдця челові́к, помина́ющих крі́пость Бо́жию, да́же до ві́ка;

и да сотвори́тъ тебѣ́ сія́ Бо́гъ въ возноше́ніє вѣ́чноє, є́же посѣща́ти тя́ во благи́хъ, за є́же не пощадѣ́ла єси́ души́ твоєя́ смире́нія ра́ди ро́да на́шего, но посо́бствовала єси́ паде́нію на́шему, въ правотѣ́ ходи́вши предъ Бо́гомъ на́шимъ. И рѣ́ша вси́ лю́діє: бу́ди, бу́ди.

і да сотвори́ть тебі́ сія́ Бог в возноше́ніє ві́чноє, є́же посіща́ти тя во благи́х, за є́же не пощаді́ла єси́ душі́ твоєя́ смире́нія ра́ди ро́да на́шего, но посо́бствовала єси́ паде́нію на́шему, в правоті́ ходи́вши пред Бо́гом на́шим. І рі́ша всі лю́діє: бу́ди, бу́ди.

И рече́ къ ни́мъ Іуді́ѳъ: послу́шайте у́бо мене́, бра́тія, и взе́мше главу́ сію́ повѣ́сите ю́ на забра́лѣ стѣны́ ва́шея:

и бу́детъ єгда́ возсія́єтъ утро, и взы́детъ со́лнце на зе́млю, пріимете ко́ждо ору́дія бра́нная ва́ша, и изы́дете вся́къ му́жъ си́льный внѣ́ гра́да, и дади́те воєво́ду надъ ними, а́ки сходя́ще на по́ле ко пе́рвѣй стра́жи сыно́въ Ассу́ровыхъ, и не сни́дете:

и взе́мше сі́и всеору́жія своя́, по́йдутъ ко ополче́нію своєму́, и возбу́дятъ воєво́ды си́лы Ассу́ровы, и стеку́тся ко шатру́ Олофе́рнову, и не обря́щутъ єго́, и нападе́тъ на ни́хъ стра́хъ, и побѣ́гнутъ от лица́ ва́шего:

и возслѣ́довавшіи ва́мъ, и вси́ живу́щіи во все́мъ предѣ́лѣ Ізра́илстѣмъ, постила́йте я́ по путе́мъ и́хъ:

пре́жде же є́же сотвори́ти сія́, призови́те мнѣ́ Ахіо́ра Аммані́тина, да ви́дѣвъ позна́єтъ уничтожа́ющаго до́мъ Ізра́илевъ, и сего́ я́ко на сме́рть по́сланнаго къ на́мъ.

И призва́ша Ахіо́ра изъ до́му Озі́ина. Єгда́ же пріи́де и ви́дѣ главу́ Олофе́рнову въ руцѣ́ му́жа єди́наго въ собра́ніи люді́й, паде́ на лице́, и разсла́бися ду́хъ єго́.

Єгда́ же подъя́ша єго́, припаде́ къ нога́ма Іуді́ѳы, и поклони́ся лицу́ єя́, и рече́: благослове́на ты́ во вся́цѣмъ селе́ніи Іу́динѣ и во вся́цѣмъ язы́цѣ, и́же услы́шавше и́мя твоє́ смяту́тся:

и ны́нѣ́ возвѣсти́ ми, єли́ка сотвори́ла єси́ во дне́хъ си́хъ. И возвѣсти́ єму́ Іуді́ѳъ посредѣ́ люді́и вся́, єли́ка сотвори́, от него́же дне́ изы́де, до́ндеже глаго́лаше и́мъ.

Єгда́ же преста́ глаго́лющи, воскли́кнуша лю́діє гла́сомъ вели́кимъ и дадо́ша гла́съ весе́лый во гра́дѣ своє́мъ.

Ви́дѣвъ же Ахіо́ръ вся́, єли́ка сотвори́ Бо́гъ Ізра́илевъ, вѣ́рова Бо́гу зѣло́, и обрѣ́за пло́ть кра́йнюю свою́, и приложи́ся къ до́му Ізра́илеву да́же до дне́ сего́.

Єгда́ же денни́ца взы́де, свѣ́сиша главу́ Олофе́рнову со стѣны́: и воспрія́тъ вся́къ му́жъ Ізра́илевъ ору́жія своя́, и изыдо́ша полка́ми на восхо́ды горы́.

Сы́нове же Ассу́ровы, я́ко уви́дѣша и́хъ, разосла́ша къ вожде́мъ свои́мъ: они́ же пріидо́ша къ воєво́дамъ и ты́сящникомъ и ко вся́кому кня́зю своєму́,

и пріидо́ша къ шатру́ Олофе́рнову, и рѣ́ша су́щему надъ всѣми єго́: возбуди́ у́бо господи́на на́шего, зане́ дерзну́ша раби́ сходи́ти къ на́мъ на бра́нь, да истребя́тся въ коне́цъ.

И вни́де ваго́а и толкну́ во дворъ шатра́, мня́ше бо спа́ти єго́ со Іуді́ѳою.

Єгда́ же никто́же послу́шаше, раствори́въ вни́де въ ло́жницу и обрѣ́те єго́ при пра́зѣ пове́ржена ме́ртва, и глава́ єго́ отъя́та бы́сть от него́:

и возопи́ гла́сомъ вели́кимъ съ пла́чемъ и стена́ніємъ и во́племъ крѣ́пкимъ, и раздра́ ри́зы своя́:

и вни́де въ шате́ръ, идѣ́же бѣ́ Іуді́ѳъ обита́ющи, и не обрѣ́те єя́, и изскочи́ къ лю́демъ и возопи́:

отверго́шася раби́, сотвори́ сту́дъ єди́на жена́ Євре́йская на до́мъ царя́ Навуходоно́сора: зане́ се́, Олофе́рнъ до́лу, и главы́ нѣ́сть на не́мъ.

Єгда́ же услы́шаша сія́ глаго́лы кня́зіє си́лы Ассу́ровы, раздра́ша ри́зы своя́, и смяте́ся душа́ и́хъ зѣло́, и бы́сть и́хъ кри́къ и во́пль зѣло́ посредѣ́ полка́.

И єгда́ услы́шаша въ шатрѣ́хъ су́щіи, ужасо́шася о бы́вшемъ,

и нападе́ на ня́ стра́хъ и тре́петъ, и не бѣ́ человѣ́ка пребыва́юща предъ лице́мъ бли́жняго ктому́, но исте́кше єдиноду́шно бѣжа́ху по вся́кому пути́ по́ля и наго́рныя:

и и́же ополчи́вшіися въ го́рней о́крестъ ветилу́и обрати́шася въ бѣ́гство: и тогда́ сы́нове Ізра́илевы вся́къ му́жъ ра́тникъ от ни́хъ устреми́шася на ни́хъ.

И посла́ Озі́а въ ветомасѳе́мъ и виваю́, и ховаю́ и холу́, и во вся́къ предѣ́лъ Ізра́илевъ, вѣ́стники о соверши́вшихся, и да вси́ потеку́тъ вслѣ́дъ враго́въ на погубленіє и́хъ.

Єгда́ же услы́шаша сы́нове Ізра́илевы, вси́ єдиноду́шно нападо́ша на ни́хъ и сѣко́ша и́хъ да́же до ховы́. Та́кожде же и и́же изъ Ієрусали́ма пріидо́ша и изъ всея́ наго́рныя: возвѣсти́ша бо и́мъ бы́вшая ополче́нію враго́въ и́хъ: и и́же въ Галаа́дѣ и въ Галіле́и бодо́ша и́хъ я́звою вели́кою, до́ндеже мину́ша Дама́скъ и предѣ́лы єго́.

Про́чіи же живу́щіи во ветилу́и, нападо́ша на по́лкъ Ассу́ровъ и плѣни́ша и́хъ и обогати́шася зѣло́.

Сы́нове же Ізра́илевы возврати́вшеся от сѣ́чи, возоблада́ша про́чими, и ве́си и се́ла, я́же въ го́рней и напо́льнѣй, возоблада́ша мно́гими коры́стьми: бѣ́ бо мно́жество мно́го зѣло́.

Іоакі́мъ же ієре́й вели́кій и старѣ́йшины сыно́въ Ізра́илевыхъ живу́щіи во Ієрусали́мѣ пріидо́ша є́же зрѣ́ти блага́я, я́же сотвори́ Госпо́дь Ізра́илю, и є́же ви́дѣти Іуді́ѳъ и глаго́лати съ не́ю ми́ръ.

Єгда́ же пріидо́ша къ не́й, благослови́ша ю́ вси́ єдиноду́шно и рѣ́ша къ не́й: ты́ возвыше́ніє Ізра́илево! ты́ ра́дованіє вели́ко Ізра́илево! ты́ сла́ва велія ро́да на́шего!

сотвори́ла єси́ вся́ сія́ руко́ю твоє́ю, сотвори́ла єси́ блага́я со Ізра́илемъ, и да благоволи́тъ о ни́хъ Бо́гъ: благослове́на бу́ди у Вседержи́теля Го́спода въ вѣ́чноє вре́мя. И рѣ́ша вси́ лю́діє: бу́ди.

И плѣня́ху вси́ лю́діє по́лкъ чрезъ дні́й три́десять, и да́ша Іуді́ѳѣ шате́ръ Олофе́рновъ и вся́ сре́бряныя сосу́ды, и одры́ и умыва́лницы, и вся́ устроє́нія єго́. И пріє́мши она́ возложи́ на мска́ своєго́, и впряже́ колесни́цы, и сложи́ я́ на ня́.

И притече́ вся́кая жена́ Ізра́илска є́же ви́дѣти ю́, и благослови́ша ю́ и сотвори́ша є́й ли́къ от себе́. И взя́ ко́пія цвѣта́ми укра́шенная въ ру́цѣ свои́ и даде́ жена́мъ су́щымъ съ не́ю:

и увѣнча́ся ма́слиною сама́ и я́же съ не́ю, и идя́ше предъ всѣ́ми людьми́ въ ли́цѣ, веду́щи всѣ́хъ же́нъ. И послѣ́доваше вся́къ му́жъ Ізра́илевъ вооруже́ни съ вѣнцы́ и пѣ́сньми во уста́хъ свои́хъ.

И нача́ Іуді́ѳъ исповѣ́даніє сіє́ во все́мъ Ізра́или, и возглаша́ху вси́ лю́діє хвале́ніє сіє́.

И рече́ Іуді́ѳъ: начни́те Бо́гу моєму́ въ тимпа́нѣхъ, пойте Го́сподеви моєму́ въ кимва́лѣхъ, кра́сно воспо́йте єму́ пѣ́снь но́ву, возноси́те и призыва́йте и́мя єго́:

я́ко Бо́гъ сокруша́яй бра́ни Госпо́дь, я́ко во ополченіихъ єго́ посредѣ́ люді́й изъя́тъ мя́ изъ руки́ гоня́щихъ мя́:

пріи́де Ассу́ръ изъ го́ръ от сѣ́вера, пріи́де во тма́хъ си́лы своєя́, и́хже мно́жество загради́ исто́чники, и ко́нница и́хъ покры́ хо́лмы:

рече́ пожещи́ предѣ́лы моя́, и ю́ношы моя́ уби́ти мече́мъ, и ссу́щыя моя́ положи́ти въ помо́стъ, и младе́нцы моя́ да́ти въ расхище́ніє, и дѣ́вы моя́ плѣни́ти:

Госпо́дь Вседержи́тель опрове́рже и́хъ руко́ю жены́,

не бо́ паде́ си́льный и́хъ от ю́ношъ, ниже́ сы́нове тіта́новы порази́ша єго́, ниже́ высо́цы исполи́ни нападо́ша на него́, но Іуді́ѳъ дщи́ Мера́ріна доброто́ю лица́ своєго́ разсла́би єго́:

совлече́ся бо одѣя́нія вдовства́ своєго́ на возвыше́ніє бѣ́дствующихъ во Ізра́или, пома́за лице́ своє́ умаще́ніємъ

и увѣнча́ власы́ своя́ увя́сломъ и прія́тъ оде́жду льня́ну въ прельще́ніє єго́:

санда́лія єя́ похи́ти о́ко єго́, и добро́та єя́ плѣни́ ду́шу єго́, про́йде ме́чь вы́ю єго́:

устраши́шася пе́рсы держа́вы єя́, и ми́ды дерзнове́ніємъ єя́ разсѣдо́шася:

тогда́ воскли́кнуша смире́нніи мои́ и возопи́ша немощні́и мои́, и устраши́шася: вознесо́ша гла́съ сво́й, и побѣжде́ни бы́ша:

сы́нове отрокови́цъ бодо́ша и́хъ и я́ко рабо́въ бѣглецо́въ уязвля́ху и́хъ, погибо́ша от ополче́нія Го́спода моєго́:

воспою́ Го́сподеви моєму́ пѣ́снь но́ву: Го́споди, ве́лій єси́ и сла́венъ, ди́венъ въ крѣ́пости, непребори́мый,

тебѣ́ да рабо́таєтъ вся́ка тва́рь твоя́: я́ко ре́клъ єси́, и бы́ша: посла́лъ єси́ Ду́ха твоєго́, и созда́: и нѣ́сть, и́же противоста́нетъ гла́су твоєму́:

го́ры бо от основа́ніи съ вода́ми подви́гнутся, ка́меніє же от лица́ твоєго́ я́ко во́скъ раста́єтъ: надъ боя́щимися же тебе́ ты́ уми́лостивля́єшися,

я́ко ма́ло вся́ка же́ртва въ воню́ благоуха́нія, и малѣ́йшій вся́къ ту́къ во всесожже́ніє тебѣ́: боя́йся же Го́спода вели́къ вы́ну:

го́ре язы́комъ востаю́щымъ на ро́дъ мо́й: Госпо́дь Вседержи́тель отмститъ и́мъ въ де́нь су́дный, да́ти о́гнь и че́рвіє на пло́ти и́хъ, и воспла́чутся въ чу́вствѣ да́же до вѣ́ка.

Єгда́ же внидо́ша во Ієрусали́мъ, поклони́шася Бо́гу: и єгда́ очи́стишася лю́діє, принесо́ша всесожега́ємая своя́ и произво́льная своя́ и да́ры своя́.

И возложи́ Іуді́ѳъ вся́ сосу́ды Олофе́рновы, єли́ки дадо́ша лю́діє є́й, и завѣ́су, ю́же взя́ она́ от ло́жницы єго́, въ да́ръ Го́споду даде́.

И бя́ху лю́діє веселя́щеся во Ієрусали́мѣ предъ лице́мъ святы́хъ ме́сяцы три́, и Іуді́ѳъ съ ни́ми пребы́сть.

По дне́хъ же си́хъ возврати́ся кі́йждо во наслѣ́діє своє́: и Іуді́ѳъ отъи́де во ветилу́ю, и пребыва́ше надъ стяжа́ніємъ свои́мъ, и бы́сть во вре́мя своє́ сла́вна во все́й земли́.

И мно́зи жела́ша єя́, и не позна́ му́жъ єя́ вся́ дни́ живота́ єя́, от него́же дне́ у́мре Манассі́а му́жъ єя́ и приложи́ся къ лю́демъ свои́мъ.

И произы́де вели́ка зѣ́ло́, и состарѣ́ся въ дому́ му́жа своєго́ лѣ́тъ ста́ пяти́, и отпусти́ рабы́ню свою́ свобо́дну, и у́мре во ветилу́и, и погребо́ша ю́ въ пеще́рѣ му́жа єя́ Манассі́и.

И пла́кася єя́ до́мъ Ізра́илевъ дні́й се́дмь. И раздѣли́ имѣ́нія своя́ пре́жде сме́рти своєя́ всѣ́мъ бли́жнимъ Манассі́и му́жа своєго́ и бли́жнимъ ро́да своєго́.

И не бя́ше ктому́ устраша́яй сыно́въ Ізра́илевыхъ во дни́ Іуді́ѳы и по сме́рти єя́ дни́ мно́ги.