Глава 21
1
И сы́нове Ізра́илевы кля́шася въ Массифѣ́, глаго́люще: му́жъ от на́съ да не да́стъ Веніамі́ну дще́ре своєя́ въ жену́.
2
И пріидо́ша лю́діє въ Веѳи́ль и сѣдѣ́ша та́мо до ве́чера предъ Бо́гомъ: и воздвиго́ша гла́съ сво́й, и пла́кашася пла́чемъ ве́ліимъ, и реко́ша:
3
вску́ю, Го́споди Бо́же Ізра́илевъ, бы́сть си́це дне́сь во Ізра́или, є́же оскудѣ́ти от Ізра́иля пле́мени єди́ному?
4
И бы́сть на у́трія, и обу́трѣша лю́діє, и согради́ша та́мо олта́рь, и вознесо́ша всесожже́ніє спасе́нія, и реко́ша сы́нове Ізра́илевы:
5
кто́ не взы́де въ со́нмъ от всѣ́хъ племе́нъ Ізра́илевыхъ ко Го́споду? Я́ко вели́ка кля́тва бя́ше не вше́дшымъ ко Го́споду въ Массифу́, глаго́люще: сме́ртію да у́мретъ.
6
И умили́шася сы́нове Ізра́илевы о Веніамі́нѣ бра́тѣ своє́мъ, и реко́ша: изсѣ́чено дне́сь єди́но пле́мя от Ізра́иля:
7
что́ сотвори́мъ оста́вшымся о жена́хъ? и мы́ кля́хомся Го́сподемъ не да́ти и́мъ от дще́рей на́шихъ въ жены́.
8
И реко́ша: кто́ єди́нъ от племе́нъ Ізра́илевыхъ, и́же не взы́де ко Го́споду въ Массифу́? И се́, ни єди́нъ пріи́де въ по́лкъ от Іаві́са Галаа́дова въ со́нмъ.
9
И согля́даша люді́й, и се́, не бя́ше та́мо му́жа от живу́щихъ во Іаві́сѣ Галаа́довѣ.
10
И посла́ша та́мо со́нмъ двана́десять ты́сящъ муже́й от сыно́въ си́лы и заповѣ́даша и́мъ, глаго́люще: иди́те и избі́йте живу́щыя во Іаві́сѣ Галаа́довѣ ору́жіємъ жены́ и наро́ды:
11
и сіє́ сотвори́те: вся́къ му́жескій по́лъ и вся́ку жену́, позна́вшую ло́же му́жеско, побіє́те: дѣви́цы же снабди́те. И сотвори́ша та́ко.
12
И обрѣто́ша от живу́щихъ во Іаві́сѣ Галаа́довѣ четы́ре ста́ отрокови́цъ дѣ́въ, я́же не позна́ша ло́жа му́жеска: и приведо́ша я́ въ по́лкъ въ Сило́мъ, и́же є́сть въ земли́ Ханаа́ни.
13
И посла́ша ве́сь со́нмъ и глаго́лаша къ сыно́мъ Веніамі́новымъ, и́же въ ка́мени реммо́ни, и призва́ша и́хъ съ ми́ромъ.
14
И возврати́ся Веніамі́нъ къ сыно́мъ Ізра́илевымъ въ то́ вре́мя, и да́ша и́мъ сы́нове Ізра́илевы жены́, я́же жи́во сохрани́ша от дще́рей Іаві́са Галаа́дова: и уго́дно бы́сть и́мъ та́ко.
15
И лю́діє умили́шася о Веніамі́нѣ, я́ко сотвори́ Госпо́дь истребле́ніє въ племенѣ́хъ Ізра́илевыхъ.
16
И реко́ша старѣ́йшины со́нма: что́ сотвори́мъ оста́вшымъ о жена́хъ? я́ко поги́бе от Веніамі́на жена́:
17
и ка́ко бу́детъ наслѣ́діє уцѣлѣ́вшихъ от Веніамі́на, да не поги́бнетъ пле́мя от Ізра́иля?
18
и мы́ не возмо́жемъ да́ти и́мъ же́нъ от дще́рей на́шихъ, я́ко кля́шася сы́нове Ізра́илевы, глаго́люще: про́клятъ дая́й жену́ Веніамі́ну.
19
И реко́ша: се́, пра́здникъ Госпо́день въ Сило́мѣ от дні́й во дни́, и́же є́сть от сѣ́вера Веѳи́ля, на восто́къ со́лнца на пути́ восходя́щемъ от Веѳи́ля въ Сихе́мъ, и от ю́га лево́ны.
20
И заповѣ́даша сыно́мъ Веніамі́нимъ, глаго́люще: иди́те и зася́дите въ віногра́дѣхъ,
21
и у́зрите, и се́, єгда́ изы́дутъ дще́ри живу́щихъ въ Сило́мѣ пляса́ти въ ли́ки, да изы́дете изъ віногра́довъ и восхи́тите му́жъ жену́ себѣ́ от дще́рей Сило́млихъ, и иди́те на зе́млю Веніамі́ню:
22
и бу́детъ єгда́ пріи́дутъ отцы́ и́хъ или́ бра́тія и́хъ суди́тися къ на́мъ, и рече́мъ и́мъ: поми́луйте на́съ и́ми, я́ко не взя́ му́жъ жены́ своєя́ въ полцѣ́: поне́же вы́ не да́ли єсте́ и́мъ я́ко жре́бій, согрѣши́сте.
23
И сотвори́ша та́ко сы́нове Веніамі́ни, и поя́ша жены́ по числу́ своєму́ от пля́шущихъ, я́же восхи́тиша: и отидо́ша и возврати́шася въ наслѣ́діє своє́, и созда́ша гра́ды и всели́шася въ ни́хъ.
24
И отидо́ша отту́ду сы́нове Ізра́илевы въ то́ вре́мя, му́жъ во пле́мя своє́ и въ ро́дъ сво́й: и изы́де отту́ду му́жъ въ наслѣ́діє своє́.
25
И въ ты́я дни́ не бя́ше царя́ во Ізра́или: му́жъ є́же уго́дно предъ очи́ма єго́, творя́ше. Коне́цъ кни́зѣ суді́й Исра́илевыхъ: и́мать въ себѣ́ гла́въ 22.
