Моли́твами святи́х оте́ць на́ших, Го́споди Ісу́се Христе́, Бо́же наш, поми́луй нас. Амі́нь.

Сла́ва Тебі́, Бо́же наш, сла́ва Тебі́.

Царю́ Небе́сний, Уті́шителю, Ду́ше і́стини, І́же везді́ сий і вся ісполня́яй, Сокро́вище благи́х і жи́зні Пода́телю, прийди́ і всели́ся в ни, і очи́сти ни от вся́кия скве́рни, і спаси́, Бла́же, ду́ші на́ша.

Святи́й Бо́же, Святи́й Крі́пкий, Святи́й Безсме́ртний, поми́луй нас. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Пресвята́я Тро́йце, поми́луй нас: Го́споди, очи́сти гріхи́ на́ша; Влади́ко, прости́ беззако́нія на́ша; Святи́й, посіти́ і ісціли́ не́мощі на́ша і́мене Твоєго́ ра́ди.

Го́споди, поми́луй. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

О́тче наш, І́же єси́ на Небесі́х, да святи́ться і́м'я Твоє́, да при́йдеть Ца́рствіє Твоє́, да бу́деть во́ля Твоя́, я́ко на Небесі́ і на землі́. Хліб наш насу́щний даждь нам днесь; і оста́ви нам до́лги на́ша, я́коже і ми оставля́єм должнико́м на́шим; і не введи́ нас во іскуше́ніє, но ізба́ви нас от лука́ваго.

Го́споди, поми́луй. [12 разів]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Прийді́те, поклоні́мся Царе́ві на́шему Бо́гу. [Поклон]

Прийді́те, поклоні́мся і припаде́м Христу́, Царе́ві на́шему Бо́гу. [Поклон]

Прийді́те, поклоні́мся і припаде́м Само́му Христу́, Царе́ві і Бо́гу на́шему. [Поклон]

Госпо́дь пасе́ть м'я, і нічто́же м'я лиши́ть. На мі́сті зла́чні, та́мо всели́ м'я, на воді́ поко́йні воспита́ м'я. Ду́шу мою́ обрати́, наста́ви м'я на стезі́ пра́вди, і́мене ра́ди Своєго́. А́ще бо і пойду́ посреді́ сі́ні сме́ртния, не убою́ся зла, я́ко Ти со мно́ю єси́; жезл Твой і па́лиця Твоя́, та м'я уті́шиста. Угото́вал єси́ пре́до мно́ю трапе́зу сопроти́в стужа́ющим мні; ума́стил єси́ єле́йом главу́ мою́, і ча́ша Твоя́ упоява́ющи м'я, я́ко держа́вна. І ми́лость Твоя́ пожене́ть м'я вся дні живота́ моєго́; і є́же всели́ти мі ся в дом Госпо́день в долготу́ дній.

Госпо́дня земля́ і ісполне́ніє єя́, вселе́нная і всі живу́щії на ней. Той на моря́х основа́л ю єсть і на ріка́х угото́вал ю єсть. Кто взи́деть на го́ру Госпо́дню? Іли́ кто ста́неть на мі́сті святі́м Єго́? Непови́нен рука́ма і чист се́рдцем, і́же не прия́т всу́є ду́шу свою́ і не кля́тся ле́стію і́скреннему своєму́. Сей при́йметь благослове́ніє от Го́спода і ми́лостиню от Бо́га Спа́са своєго́. Сей род і́щущих Го́спода, і́щущих лице́ Бо́га Іа́ковля. Возьмі́те, врата́, кня́зі ва́ша, і возьмі́теся, врата́ ві́чная: і вни́деть Цар сла́ви. Кто єсть сей Цар сла́ви? Госпо́дь крі́пок і си́лен, Госпо́дь си́лен в бра́ні. Возьмі́те, врата́, кня́зі ва́ша, і возьмі́теся, врата́ ві́чная: і вни́деть Цар сла́ви. Кто єсть сей Цар сла́ви? Госпо́дь сил, Той єсть Цар сла́ви.

Ві́ровах, ті́мже возглаго́лах: аз же смири́хся зіло́. Аз же ріх во ізступле́нії моє́м: всяк челові́к лож. Что возда́м Го́сподеві о всіх, я́же воздаде́ мі? Ча́шу спасе́нія прийму́ і і́м'я Госпо́днє призову́; моли́тви моя́ Го́сподеві возда́м пред всі́ми людьми́ Єго́. Честна́ пред Го́сподем смерть преподо́бних Єго́. О Го́споди, аз раб Твой, аз раб Твой і син раби́ні Твоєя́. Растерза́л єси́ у́зи моя́. Тебі́ пожру́ же́ртву хвали́ і во і́м'я Госпо́днє призову́. Моли́тви моя́ Го́сподеві возда́м пред всі́ми людьми́ Єго́, во дво́ріх до́му Госпо́дня, посреді́ тебе́, Ієрусали́ме.

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Аллилу́я, аллилу́я, аллилу́я, сла́ва Тебі́, Бо́же. [Тричі і поклони три]

Беззако́нія моя́ пре́зри, Го́споди, от Ді́ви рожде́йся, і се́рдце моє́ очи́сти, храм то творя́ Пречи́стому Твоєму́ Ті́лу і Кро́ві; ніже́ отри́ни мене́ от Твоєго́ лиця́, без числа́ імі́яй ве́лію ми́лость.

Сла́ва Отцю́, і Си́ну, і Свято́му Ду́ху.

Во прича́стіє святи́нь Твої́х ка́ко дерзну́ недосто́йний? А́ще бо дерзну́ к Тебі́ приступи́ти с досто́йними, хіто́н м'я облича́єть, я́ко ність вече́рній, і осужде́ніє ісхода́тайствую многогрі́шній душі́ моє́й. Очи́сти, Го́споди, скве́рну душі́ моєя́, і спаси́ м'я, я́ко Человіколю́бець.

І ни́ні, і при́сно, і во ві́ки віко́в. Амі́нь.

Мно́гая мно́жества мої́х, Богоро́дице, прегріше́ній, к Тебі́ прибіго́х, Чи́стая, спасе́нія тре́буя: посіти́ немощству́ющую мою́ ду́шу, і моли́ Си́на Твоєго́ і Бо́га на́шего да́ти мі оставле́ніє, я́же соді́ях лю́тих, єди́на Благослове́нная.

Поми́луй м'я, Бо́же, по вели́цій ми́лості Твоє́й і по мно́жеству щедро́т Твої́х очи́сти беззако́ніє моє́. Найпа́че оми́й м'я от беззако́нія моєго́ і от гріха́ моєго́ очи́сти м'я. Я́ко беззако́ніє моє́ аз зна́ю, і гріх мой пре́до мно́ю єсть ви́ну. Тебі́ єди́ному согріши́х і лука́воє пред Тобо́ю сотвори́х; я́ко да оправди́шися во словесі́х Твої́х і побіди́ши, внегда́ суди́ти Ті. Се бо в беззако́ніїх зача́т єсьм, і во грісі́х роди́ м'я ма́ти моя́. Се бо і́стину возлюби́л єси́, безві́стная і та́йная прему́дрости Твоєя́ яви́л мі єси́. Окропи́ши м'я іссо́пом, і очи́щуся; оми́єши м'я, і па́че сні́га убілю́ся. Слу́ху моєму́ даси́ ра́дость і весе́ліє; возра́дуються ко́сті смире́нния. Отврати́ лице́ Твоє́ от гріх мої́х і вся беззако́нія моя́ очи́сти. Се́рдце чи́сто сози́жди во мні, Бо́же, і дух прав обнови́ во утро́бі моє́й. Не отве́ржи мене́ от лиця́ Твоєго́ і Ду́ха Твоєго́ Свята́го не отими́ от мене́. Возда́ждь мі ра́дость спасе́нія Твоєго́ і Ду́хом влади́чним утверди́ м'я. Научу́ беззако́нния путе́м Твої́м, і нечести́вії к Тебі́ обратя́ться. Ізба́ви м'я от крове́й, Бо́же, Бо́же спасе́нія моєго́; возра́дується язи́к мой пра́вді Твоє́й. Го́споди, устні́ мої́ отве́рзеши, і уста́ моя́ возвістя́ть хвалу́ Твою́. Я́ко а́ще би восхоті́л єси́ же́ртви, дал бих у́бо: всесожже́нія не благоволи́ши. Же́ртва Бо́гу дух сокруше́н; се́рдце сокруше́нно і смире́нно Бог не унічижи́ть. Ублажи́, Го́споди, благоволе́нієм Твої́м Сіо́на, і да сози́ждуться сті́ни Ієрусали́мськія. Тогда́ благоволи́ши же́ртву пра́вди, возноше́ніє і всесожега́ємая; тогда́ возложа́ть на олта́р Твой тельці́.

Ірмо́с: Гряді́те, лю́діє, пої́м піснь Христу́ Бо́гу, разді́льшему мо́ре і наста́вльшему лю́ди, я́же ізведе́ із рабо́ти єги́петськия, я́ко просла́вися.

Приспів: Се́рдце чи́сто сози́жди во мні, Бо́же, і дух прав обнови́ во утро́бі моє́й.

Хліб живота́ ві́чнующаго да бу́деть мі Ті́ло Твоє́ Свято́є, Благоутро́бне Го́споди, і Честна́я Кров, і неду́г многообра́зних ісціле́ніє.

Приспів: Не отве́ржи мене́ от лиця́ Твоєго́ і Ду́ха Твоєго́ Свята́го не отими́ от мене́.

Оскверне́н ді́ли безмі́стними окая́нний, Твоєго́ Пречи́стаго Ті́ла і Боже́ственния Кро́ве недосто́їн єсьм, Христе́, причаще́нія, єго́же м'я сподо́би.

Приспів: Пресвята́я Богоро́дице, спаси́ нас.

Земле́ блага́я, Благослове́нная Богоневі́сто, Клас^* прозя́бшая неора́нний і спаси́тельний ми́ру, сподо́би м'я Сей яду́ща спасти́ся.

Ірмос: На ка́мені м'я ві́ри утверди́в, разшири́л єси́ уста́ моя́ на враги́ моя́. Возвесели́ бо ся дух мой, внегда́ пі́ти: ність свят я́коже Бог наш, і ність пра́веден па́че Тебе́, Го́споди.

Приспів: Се́рдце чи́сто сози́жди во мні, Бо́же, і дух прав обнови́ во утро́бі моє́й.

Сле́зния мі пода́ждь, Христе́, ка́плі, скве́рну се́рдця моєго́ очища́ющия, я́ко да благо́ю со́вістію очище́н, ві́рою прихожду́ і стра́хом, Влади́ко, ко причаще́нію Боже́ственних Даро́в Твої́х.

Приспів: Не отве́ржи мене́ от лиця́ Твоєго́ і Ду́ха Твоєго́ Свята́го не отими́ от мене́.

Во оставле́ніє да бу́деть мі прегріше́ній Пречи́стоє Ті́ло Твоє́ і Боже́ственная Кров, Ду́ха же Свята́го обще́ніє, і в жизнь ві́чную, Человіколю́бче, і страсте́й і скорбе́й отчужде́ніє.

Приспів: Пресвята́я Богоро́дице, спаси́ нас.

Хлі́ба живо́тнаго трапе́за Пресвята́я, сви́ше ми́лости ра́ди сше́дшаго і ми́рові но́вий живо́т даю́щаго, і мене́ ни́ні сподо́би, недосто́йнаго, со стра́хом вкуси́ти сего́ і жи́ву би́ти.

Ірмос: Прише́л єси́ от Ді́ви не хода́тай, ні а́нгел, но Сам, Го́споди, вопло́щся і спасл єси́ всего́ м'я, челові́ка. Тім зову́ Ті: сла́ва си́лі Твоє́й, Го́споди.

Приспів: Се́рдце чи́сто сози́жди во мні, Бо́же, і дух прав обнови́ во утро́бі моє́й.

Восхоті́л єси́ нас ра́ди вопло́щся, Многоми́лостиве, закла́н би́ти, я́ко овча́, гріх ра́ди челові́чеських; ті́мже молю́ Тя: і моя́ очи́сти согріше́нія.

Приспів: Не отве́ржи мене́ от лиця́ Твоєго́ і Ду́ха Твоєго́ Свята́го не отими́ от мене́.

Ісціли́ душі́ моєя́ я́зви, Го́споди, і всего́ освяти́; і сподо́би, Влади́ко, я́ко да причащу́ся та́йния Твоєя́ Боже́ственния ве́чері, окая́нний.

Приспів: Пресвята́я Богоро́дице, спаси́ нас.

Уми́лостиви і мні Су́щаго от утро́би Твоєя́, Влади́чице, і соблюди́ м'я нескве́рна, раба́ Твоєго́, і непоро́чна, я́ко да приє́м у́мнаго бі́сера, освящу́ся.

Ірмос: Сві́та Пода́телю і віко́в Тво́рче, Го́споди, во сві́ті Твої́х повелі́ній наста́ви нас; ра́зві бо Тебе́ іно́го Бо́га не зна́єм.

Приспів: Се́рдце чи́сто сози́жди во мні, Бо́же, і дух прав обнови́ во утро́бі моє́й.

Я́коже предре́кл єси́, Христе́, да бу́деть у́бо худо́му рабу́ Твоєму́, і во мні пребу́ди, я́коже обіща́лся єси́; се бо Ті́ло Твоє́ ям Боже́ственноє і пію́ Кров Твою́.

Приспів: Не отве́ржи мене́ от лиця́ Твоєго́ і Ду́ха Твоєго́ Свята́го не отими́ от мене́.

Сло́ве Бо́жий і Бо́же, угль Ті́ла Твоєго́ да бу́деть мні, помраче́нному, в просвіще́ніє і очище́ніє оскверне́нной душі́ моє́й Кров Твоя́.

Приспів: Пресвята́я Богоро́дице, спаси́ нас.

Марі́є, Ма́ти Бо́жия, благоуха́нія честно́є селе́ніє, Твої́ми моли́твами сосу́д м'я ізбра́нний соді́лай, я́ко да освяще́ній причащу́ся Си́на Твоєго́.

Ірмос: В бе́здні гріхо́вній валя́яся, неізслі́дную милосе́рдія Твоєго́ призива́ю бе́здну: от тлі, Бо́же, м'я возведи́.

Приспів: Се́рдце чи́сто сози́жди во мні, Бо́же, і дух прав обнови́ во утро́бі моє́й.

Ум, ду́шу і се́рдце освяти́, Спа́се, і ті́ло моє́, і сподо́би неосужде́нно, Влади́ко, к Стра́шним Та́йнам приступи́ти.

Приспів: Не отве́ржи мене́ от лиця́ Твоєго́ і Ду́ха Твоєго́ Свята́го не отими́ от мене́.

Да бих устрани́лся от страсте́й і Твоєя́ благода́ті імі́л би приложе́ніє, живота́ же утвержде́ніє причаще́нієм Святи́х, Христе́, Та́їн Твої́х.

Приспів: Пресвята́я Богоро́дице, спаси́ нас.

Бо́жиє, Бо́же, Сло́во Свято́є, всего́ м'я освяти́ ни́ні приходя́щаго к Боже́ственним Твої́м Та́йнам, Святи́я Ма́тере Твоєя́ мольба́ми.

Хліб, Христе́, взя́ти не пре́зри м'я, Ті́ло Твоє́ і Боже́ственную Твою́ ни́ні Кров, Пречи́стих, Влади́ко, і Стра́шних Твої́х Та́їн причасти́тися окая́ннаго; да не бу́деть мі в суд, да бу́деть же мі в живо́т ві́чний і безсме́ртний.

Ірмос: Ті́лу злато́му^* прему́дрия ді́ти не послужи́ша, і в пла́мень са́мі пойдо́ша, і бо́ги їх обруга́ша, среди́ пла́мене возопи́ша, і ороси́ я А́нгел: усли́шася уже́ уст ва́ших моли́тва.

Приспів: Се́рдце чи́сто сози́жди во мні, Бо́же, і дух прав обнови́ во утро́бі моє́й.

Істо́чник благи́х, причаще́ніє, Христе́, безсме́ртних Твої́х ни́ні Та́їнств да бу́деть мі світ, і живо́т, і безстра́стіє, і к преспі́янію же і умноже́нію доброді́телі боже́ственнійшия хода́тайственно, єди́не Бла́же, я́ко да сла́влю Тя.

Приспів: Не отве́ржи мене́ от лиця́ Твоєго́ і Ду́ха Твоєго́ Свята́го не отими́ от мене́.

Да ізба́влюся от страсте́й, і враго́в, і ну́жди, і вся́кия ско́рби, тре́петом і любо́вію, со благогові́нієм, Человіколю́бче, приступа́яй ни́ні к Твої́м безсме́ртним і Боже́ственним Та́йнам, і пі́ти Тебі́ сподо́би: благослове́н єси́, Го́споди, Бо́же оте́ць на́ших.

Приспів: Пресвята́я Богоро́дице, спаси́ нас.

Спа́са Христа́ ро́ждшая па́че ума́, Богоблагода́тная, молю́ Тя ни́ні, раб Твой, Чи́стую нечи́стий: хотя́щаго м'я ни́ні к Пречи́стим Та́йнам приступи́ти, очи́сти всего́ от скве́рни пло́ті і ду́ха.

Ірмос: В пещ о́гненную ко отроко́м євре́йським снизше́дшаго і пла́мень в ро́су прело́жшаго Бо́га по́йте, діла́ я́ко Го́спода, і превозносі́те во вся ві́ки.

Приспів: Се́рдце чи́сто сози́жди во мні, Бо́же, і дух прав обнови́ во утро́бі моє́й.

Небе́сних і Стра́шних і Святи́х Твої́х, Христе́, ни́ні Та́їн, і Боже́ственния Твоєя́ і та́йния ве́чері о́бщника би́ти і мене́ сподо́би отча́яннаго, Бо́же, Спа́се мой.

Приспів: Не отве́ржи мене́ от лиця́ Твоєго́ і Ду́ха Твоєго́ Свята́го не отими́ от мене́

Под Твоє́ прибі́г благоутро́біє, Бла́же, со стра́хом зову́ Ті: во мні пребу́ди, Спа́се, і аз, я́коже рекл єси́, в Тебі́; се бо дерза́я на ми́лость Твою́, ям Ті́ло Твоє́ і пію́ Кров Твою́.

Приспів: Пресвята́я Тро́йце, Бо́же наш, сла́ва Тебі́.

Трепе́щу, приє́мля огнь, да не опалю́ся, я́ко воск і я́ко трава́. О́ле стра́шнаго Та́їнства! О́ле благоутро́бія Бо́жия! Ка́ко Боже́ственнаго Ті́ла і Кро́ве бре́ніє причаща́юся і нетлі́нен сотворя́юся?

Ірмос: Безнача́льна Роди́теля Син, Бог і Госпо́дь, вопло́щся от Ді́ви, нам яви́ся омраче́нная просвіти́ти, собра́ти расточе́нная; тім всепі́тую Богоро́дицю велича́єм.

Приспів: Се́рдце чи́сто сози́жди во мні, Бо́же, і дух прав обнови́ во утро́бі моє́й.

Христо́с єсть, вкусі́те і ви́діте: Госпо́дь нас ра́ди, по нам бо дре́вле би́вий, єди́ною Себе́ прине́с, я́ко приноше́ніє Отцю́ своєму́, при́сно закала́ється, освяща́яй причаща́ющияся.

Приспів: Не отве́ржи мене́ от лиця́ Твоєго́ і Ду́ха Твоєго́ Свята́го не отими́ от мене́.

Душе́ю і ті́лом да освящу́ся, Влади́ко, да просвіщу́ся, да спасу́ся, да бу́ду дом Твой причаще́нієм Свяще́нних Та́їн, живу́щаго Тя імі́я в себі́ со Отце́м і Ду́хом, Благоді́телю Многоми́лостиве.

Приспів: Возда́ждь мі ра́дость спасе́нія Твоєго́ і Ду́хом Влади́чним утверди́ м'я.

Я́коже огнь да бу́деть мі і я́ко світ Ті́ло Твоє́ і Кров, Спа́се мой, Пречестна́я, опаля́я гріхо́вноє вещество́, сжига́я же страсте́й те́рніє і всего́ м'я просвіща́я покланя́тися Божеству́ Твоєму́.

Приспів: Пресвята́я Богоро́дице, спаси́ нас. Бог воплоти́ся от чи́стих крове́й Твої́х, ті́мже вся́кий род поє́ть Тя, Влади́чице, у́мная же мно́жества сла́в'ять, я́ко Тобо́ю я́ві узрі́ша всі́ми Влади́чествующаго, осуществова́вшагося челові́чеством.

Досто́йно єсть я́ко воі́стину блажи́ти Тя, Богоро́дицю, Присноблаже́нную і Пренепоро́чную і Ма́тер Бо́га на́шего. Честні́йшую Херуви́м і сла́внійшую без сравне́нія Серафи́м, без істлі́нія Бо́га Сло́ва ро́ждшую, су́щую Богоро́дицю Тя велича́єм.

Святи́й Бо́же, Святи́й Крі́пкий, Святи́й Безсме́ртний, поми́луй нас. [Тричі з поясним поклоном]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Пресвята́я Тро́йце, поми́луй нас: Го́споди, очи́сти гріхи́ на́ша; Влади́ко, прости́ беззако́нія на́ша; Святи́й, посіти́ і ісціли́ не́мощі на́ша, і́мене Твоєго́ ра́ди.

Го́споди, поми́луй. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

О́тче наш, І́же єси́ на Небесі́х, да святи́ться і́м'я Твоє́, да при́йдеть Ца́рствіє Твоє́, да бу́деть во́ля Твоя́, я́ко на Небесі́ і на землі́. Хліб наш насу́щний даждь нам днесь; і оста́ви нам до́лги на́ша, я́коже і ми оставля́єм должнико́м на́шим; і не введи́ нас во іскуше́ніє, но ізба́ви нас от лука́ваго.

Якщо свята немає — цей тропар, глас 6:

Поми́луй нас, Го́споди, поми́луй нас; вся́каго бо отві́та недоумі́юще, сію́ Ті моли́тву я́ко Влади́ці грі́шнії прино́сим: поми́луй нас.

Сла́ва Отцю́, і Си́ну, і Свято́му Ду́ху.

Го́споди, поми́луй нас, на Тя бо упова́хом; не прогні́вайся на ни зіло́, ніже́ пом'яни́ беззако́ній на́ших, но при́зри і ни́ні я́ко Благоутро́бен, і ізба́ви ни от враг на́ших; Ти бо єси́ Бог наш, і ми, лю́діє Твої́, всі діла́ руку́ Твоє́ю, і і́м'я Твоє́ призива́єм.

І ни́ні, і при́сно, і во ві́ки віко́в. Амі́нь.

Милос́ердія две́рі отве́рзи нам, благослове́нная Богоро́дице, наді́ющіїся на Тя да не поги́бнем, но да ізба́вимся Тобо́ю от бід: Ти бо єси́ спасе́ніє ро́да христия́нськаго.

Го́споди, поми́луй. [40 разів]

І поклони, якщо бажаєш.

Хотя́ я́сти, челові́че, Ті́ло Влади́чне, Стра́хом приступи́, да не опали́шися: огнь бо єсть. Боже́ственную же пія́ Кров ко обще́нію, пе́рвіє примири́ся тя опеча́лившим. Та́же дерза́я, та́їнственноє бра́шно яждь.

Пре́жде прича́стія стра́шния же́ртви, Животворя́щаго Ті́ла Влади́чня, Сим помоли́ся о́бразом со тре́петом.