|
Глава 31
|
Глава́ л҃а
|
|
1
|
1
|
|
И иноплеме́нницы воєва́ху на Ізра́иля, и бѣжа́ша му́жіє Ізра́илевы от лица́ иноплеме́ннича, и па́даху я́звенніи на горѣ́ гелвує́.
|
И҆ и҆ноплемє́нницы воева́хꙋ на і҆и҃лѧ, и҆ бѣжа́ша мꙋ́жїе і҆и҃лєвы ѿ лица̀ и҆ноплеме́ннича, и҆ па́дахꙋ ꙗ҆́звеннїи на горѣ̀ гелвꙋѐ.
|
|
2
|
2
|
|
И снидо́шася иноплеме́нницы съ Сау́ломъ и съ сынми́ єго́, и уби́ша иноплеме́нницы Іонаѳа́на и Амінада́ва и Мелхісу́а, сы́ны Сау́ловы.
|
И҆ снидо́шасѧ и҆ноплемє́нницы съ саꙋ́ломъ и҆ съ сынмѝ є҆гѡ̀, и҆ оу҆би́ша и҆ноплемє́нницы і҆ѡнаѳа́на и҆ а҆мїнада́ва и҆ мелхїсꙋ́а, сы́ны саꙋ́лѡвы.
|
|
3
|
3
|
|
И отяготѣ́ бра́нь на Сау́ла, и обрѣто́ша єго́ копе́йницы му́жіє стрѣлцы́, и уя́звенъ бы́сть [сау́лъ] во утро́бу.
|
И҆ ѡ҆тѧготѣ̀ бра́нь на саꙋ́ла, и҆ ѡ҆брѣто́ша є҆го̀ копе́йницы мꙋ́жїе стрѣлцы̀, и҆ оу҆ѧ́звенъ бы́сть (саꙋ́лъ) во оу҆тро́бꙋ.
|
|
4
|
4
|
|
И рече́ Сау́лъ къ нося́щему ору́жіє єго́: изсу́ни ме́чь тво́й и прободи́ мя и́мъ, да не пріи́дутъ необрѣ́занніи сі́и и избоду́тъ мя́, и поруга́ются мнѣ́. И не хотя́ше нося́й ору́жіє єго́, я́ко убоя́ся зѣло́. И взя́ Сау́лъ ме́чь сво́й и паде́ на него́.
|
И҆ речѐ саꙋ́лъ къ носѧ́щемꙋ ѻ҆рꙋ́жїе є҆гѡ̀: и҆зсꙋ́ни ме́чь тво́й и҆ прободи́ мѧ и҆́мъ, да не прїи́дꙋтъ неѡбрѣ́заннїи сі́и и҆ и҆збодꙋ́тъ мѧ̀, и҆ порꙋга́ютсѧ мнѣ̀. И҆ не хотѧ́ше носѧ́й ѻ҆рꙋ́жїе є҆гѡ̀, ꙗ҆́кѡ оу҆боѧ́сѧ ѕѣлѡ̀. И҆ взѧ̀ саꙋ́лъ ме́чь сво́й и҆ падѐ на него̀.
|
|
5
|
5
|
|
И ви́дѣ нося́й ору́жіє єго́, я́ко у́мре Сау́лъ, и паде́ и то́й на ме́чь сво́й и у́мре съ ни́мъ.
|
И҆ ви́дѣ носѧ́й ѻ҆рꙋ́жїе є҆гѡ̀, ꙗ҆́кѡ оу҆́мре саꙋ́лъ, и҆ падѐ и҆ то́й на ме́чь сво́й и҆ оу҆́мре съ ни́мъ.
|
|
6
|
6
|
|
И у́мре Сау́лъ и тріє́ сы́нове єго́, и нося́й ору́жіє єго́, и вси́ му́жіє єго́ въ де́нь то́й ку́пно.
|
И҆ оу҆́мре саꙋ́лъ и҆ трїѐ сы́нове є҆гѡ̀, и҆ носѧ́й ѻ҆рꙋ́жїе є҆гѡ̀, и҆ всѝ мꙋ́жїе є҆гѡ̀ въ де́нь то́й кꙋ́пнѡ.
|
|
7
|
7
|
|
И ви́дѣша му́жіє Ізра́илстіи, и́же объ о́нъ по́лъ юдо́ли и и́же объ о́нъ по́лъ Іорда́на, я́ко бѣжа́ша му́жіє Ізра́илстіи, и я́ко у́мре Сау́лъ и сы́нове єго́, и оста́виша гра́ды своя́ и бѣжа́ша: и пріидо́ша иноплеме́нницы и всели́шася въ ни́хъ.
|
И҆ ви́дѣша мꙋ́жїе і҆и҃лстїи, и҆̀же ѡ҆б̾ ѡ҆́нъ по́лъ ю҆до́ли и҆ и҆̀же ѡ҆б̾ ѡ҆́нъ по́лъ і҆ѻрда́на, ꙗ҆́кѡ бѣжа́ша мꙋ́жїе і҆и҃лстїи, и҆ ꙗ҆́кѡ оу҆́мре саꙋ́лъ и҆ сы́нове є҆гѡ̀, и҆ ѡ҆ста́виша гра́ды своѧ̑ и҆ бѣжа́ша: и҆ прїидо́ша и҆ноплемє́нницы и҆ всели́шасѧ въ ни́хъ.
|
|
8
|
8
|
|
И бы́сть на у́тріє, и пріидо́ша иноплеме́нницы обнажи́ти ме́ртвыхъ, и обрѣто́ша Сау́ла и три́ сы́ны єго́ па́дшыя на горѣ́ гелвує́,
|
И҆ бы́сть на оу҆́трїе, и҆ прїидо́ша и҆ноплемє́нницы ѡ҆бнажи́ти ме́ртвыхъ, и҆ ѡ҆брѣто́ша саꙋ́ла и҆ трѝ сы́ны є҆гѡ̀ па́дшыѧ на горѣ̀ гелвꙋѐ,
|
|
9
|
9
|
|
и обрати́ша єго́, и сня́ша ору́жіє єго́, и отсѣко́ша главу́ єго́, и посла́ша въ зе́млю иноплеме́нничу о́крестъ возвѣща́юще і́доломъ и́хъ и лю́демъ и́хъ:
|
и҆ ѡ҆брати́ша є҆го̀, и҆ снѧ́ша ѻ҆рꙋ́жїе є҆гѡ̀, и҆ ѿсѣко́ша главꙋ̀ є҆гѡ̀, и҆ посла́ша въ зе́млю и҆ноплеме́нничꙋ ѡ҆́крестъ возвѣща́юще і҆́дѡлѡмъ и҆́хъ и҆ лю́демъ и҆́хъ:
|
|
10
|
10
|
|
и положи́ша ору́жіє єго́ у Аста́рта, тѣ́ло же єго́ воткну́ша на стѣнѣ́ веѳса́мли.
|
и҆ положи́ша ѻ҆рꙋ́жїе є҆гѡ̀ оу҆ а҆ста́рта, тѣ́ло же є҆гѡ̀ воткнꙋ́ша на стѣнѣ̀ веѳса́мли.
|
|
11
|
11
|
|
И услы́шаша живу́щіи во Іаві́сѣ Галаадіті́йстѣмъ, я́же сотвори́ша иноплеме́нницы Сау́лу,
|
И҆ оу҆слы́шаша живꙋ́щїи во і҆аві́сѣ галаадїті́йстѣмъ, ꙗ҆̀же сотвори́ша и҆ноплемє́нницы саꙋ́лꙋ,
|
|
12
|
12
|
|
и воста́ша вси́ му́жіє си́льніи, и идо́ша всю́ но́щь, и взя́ша тѣ́ло Сау́лово и тѣ́ло Іонаѳа́на сы́на єго́ съ стѣны́ веѳса́мски, и принесо́ша я́ во Іаві́съ, и сожго́ша я́ та́мо:
|
и҆ воста́ша всѝ мꙋ́жїе си́льнїи, и҆ и҆до́ша всю̀ но́щь, и҆ взѧ́ша тѣ́ло саꙋ́лово и҆ тѣ́ло і҆ѡнаѳа́на сы́на є҆гѡ̀ съ стѣны̀ веѳса́мски, и҆ принесо́ша ѧ҆̀ во і҆аві́съ, и҆ сожго́ша ѧ҆̀ та́мѡ:
|
|
13
|
13
|
|
и взя́ша ко́сти и́хъ, и погребо́ша я́ въ дубра́вѣ я́же во Іаві́сѣ, и пости́шася се́дмь дні́й.
|
и҆ взѧ́ша кѡ́сти и҆́хъ, и҆ погребо́ша ѧ҆̀ въ дꙋбра́вѣ ꙗ҆̀же во і҆аві́сѣ, и҆ пости́шасѧ се́дмь дні́й.
|
