|
Іезекі́иля
|
Книга пророка Єзекиїля
|
|
Глава 1
|
Глава 1
|
|
1
|
|
|
И бы́сть въ тридеся́тоє лѣ́то, въ четве́ртый ме́сяцъ, въ пя́тый де́нь ме́сяца, и а́зъ бы́хъ посредѣ́ плѣне́нія при рѣцѣ́ Хова́ръ: и отверзо́шася небеса́, и ви́дѣхъ видѣ́нія Бо́жія.
|
|
|
2
|
|
|
Въ пя́тый де́нь ме́сяца, сіє́ лѣ́то пя́тоє плѣне́нія царя́ Іоакі́ма,
|
|
|
3
|
|
|
и бы́сть сло́во Госпо́дне ко Ієзекі́илю сы́ну вузі́єву, свяще́ннику, въ земли́ Халде́йстѣй при рѣцѣ́ Хова́ръ. И бы́сть на мнѣ́ рука́ Госпо́дня,
|
|
|
4
|
|
|
и ви́дѣхъ, и се́, ду́хъ воздвиза́яйся грядя́ше от сѣ́вера, и о́блакъ вели́кій въ не́мъ, и свѣ́тъ о́крестъ єго́, и о́гнь блиста́яйся:
|
|
|
5
|
|
|
и посредѣ́ єго́ я́ко видѣ́ніє иле́ктра посредѣ́ огня́, и свѣ́тъ въ не́мъ: и посредѣ́ я́ко подо́біє четы́рехъ живо́тныхъ. И сіє́ видѣ́ніє и́хъ, я́ко подо́біє человѣ́ка въ ни́хъ:
|
|
|
6
|
|
|
и четы́ри ли́ца єди́ному, и четы́ри кри́ла єди́ному,
|
|
|
7
|
|
|
и го́лени и́хъ пра́вы, и перна́ты но́ги и́хъ, и и́скры я́ко блиста́ющаяся мѣ́дь, и ле́гка кри́ла и́хъ,
|
|
|
8
|
|
|
и рука́ человѣ́ча подъ кри́лами и́хъ на четы́рехъ страна́хъ и́хъ:
|
|
|
9
|
|
|
и ли́ца и́хъ, и кри́ла и́хъ четы́рехъ держа́щаяся дру́гъ дру́га, ли́ца же и́хъ четы́рехъ не обраща́хуся внегда́ ходи́ти и́мъ: ко́єждо пря́мо лица́ своєго́ хожда́ху.
|
|
|
10
|
|
|
И подо́біє ли́цъ и́хъ, лице́ человѣ́чеє и лице́ льво́во одесну́ю четы́ремъ, и лице́ те́лчеє ошу́юю четы́ремъ, и лице́ о́рлеє четы́ремъ:
|
|
|
11
|
|
|
[и ли́ца и́хъ] и кри́ла и́хъ просте́рта свы́ше четы́ремъ, коєму́ждо два́ сопряже́на дру́гъ ко дру́гу, и два́ покрыва́ху верху́ тѣлесе́ и́хъ, и ко́єждо пря́мо лицу́ своєму́ идя́ше:
|
|
|
12
|
|
|
идѣ́же а́ще бя́ше ду́хъ ше́ствуяй, идя́ху и не обраща́хуся.
|
|
|
13
|
|
|
И посредѣ́ живо́тныхъ видѣ́ніє, я́ко у́глія огня́ горя́щаго, я́ко видѣ́ніє свѣ́щъ сообраща́ющихся посредѣ́ живо́тныхъ, и свѣ́тъ огня́, и от огня́ исхожда́ше я́ко мо́лнія:
|
|
|
14
|
|
|
и живо́тная теча́ху и обраща́хуся, я́ко видѣ́ніє везе́ково {блиста́нія}.
|
|
|
15
|
|
|
И ви́дѣхъ, и се́, ко́ло єди́но земли́ держа́щеєся живо́тныхъ четы́рехъ:
|
|
|
16
|
|
|
и видѣ́ніє коле́съ и сотворе́ніє и́хъ, я́ко видѣ́ніє Ѳарсі́са, и подо́біє єди́но четы́ремъ: и дѣ́ло и́хъ бя́ше, я́коже а́ще бы бы́ло ко́ло въ колеси́:
|
|
|
17
|
|
|
на четы́ри страны́ и́хъ ше́ствоваху: не обраща́хуся, внегда́ ше́ствовати и́мъ,
|
|
|
18
|
|
|
ниже́ хребты́ и́хъ, и высота́ бя́ше и́мъ. И ви́дѣхъ та́, и плеща́ и́хъ испо́лнена оче́съ о́крестъ четы́ремъ:
|
|
|
19
|
|
|
и внегда́ ше́ствовати живо́тнымъ, ше́ствоваху и коле́са держа́щеся и́хъ: и внегда́ воздвиза́тися живо́тнымъ от земли́, воздвиза́хуся и коле́са.
|
|
|
20
|
|
|
Идѣ́же а́ще бя́ше о́блакъ, та́мо бя́ше и ду́хъ, є́же ше́ствовати: ше́ствоваху и живо́тная, и коле́са воздвиза́хуся съ ни́ми, зане́ ду́хъ жи́зни бя́ше въ колесѣ́хъ.
|
|
|
21
|
|
|
Внегда́ идя́ху сія́, идя́ху [и коле́са], и внегда́ стоя́ти и́мъ, стоя́ху [и коле́са съ ни́ми], и єгда́ воздвиза́хуся от земли́, воздвиза́хуся съ ни́ми [и коле́са], я́ко ду́хъ жи́зни бя́ше въ колесѣ́хъ.
|
|
|
22
|
|
|
И подо́біє надъ главо́ю живо́тныхъ я́ко тве́рдь, я́ко видѣ́ніє криста́лла, просте́ртоє надъ кри́лами и́хъ свы́ше:
|
|
|
23
|
|
|
и подъ тве́рдію кри́ла и́хъ просте́рта, паря́ще дру́гъ ко дру́гу, кому́ждо два́ спряже́на, прикрыва́юще тѣлеса́ и́хъ.
|
|
|
24
|
|
|
И слы́шахъ гла́съ кри́лъ и́хъ, внегда́ паря́ху, я́ко гла́съ во́дъ мно́гихъ, я́ко гла́съ Бо́га саддаі́: и внегда́ ходи́ти и́мъ, гла́съ сло́ва я́ко гла́съ полка́: и внегда́ стоя́ти и́мъ, почива́ху кри́ла и́хъ.
|
|
|
25
|
|
|
И се́, гла́съ превы́ше тве́рди су́щія надъ главо́ю и́хъ: внегда́ стоя́ти и́мъ, низпуска́хуся кри́ла и́хъ.
|
|
|
26
|
|
|
И надъ тве́рдію, я́же надъ главо́ю и́хъ, я́ко видѣ́ніє ка́мене сапфі́ра, подо́біє престо́ла на не́мъ, и на подо́біи престо́ла подо́біє я́коже ви́дъ человѣ́чь сверху́.
|
|
|
27
|
|
|
И ви́дѣхъ я́ко видѣ́ніє иле́ктра, я́ко видѣ́ніє огня́ вну́трь єго́ о́крестъ: от видѣ́нія чре́слъ и вы́ше и от видѣ́нія чре́слъ да́же до до́лу ви́дѣхъ видѣ́ніє огня́, и свѣ́тъ єго́ о́крестъ:
|
|
|
28
|
|
|
я́ко видѣ́ніє дуги́, єгда́ є́сть на о́блацѣхъ въ де́нь дождя́, та́ко стоя́ніє свѣ́та о́крестъ.
|
|
|
Глава 2
|
|
|
1
|
|
|
Сіє́ видѣ́ніє подо́біє сла́вы Госпо́дни. И ви́дѣхъ, и падо́хъ ни́цъ, и слы́шахъ гла́съ глаго́лющаго, и рече́ ко мнѣ́: сы́не человѣ́чь, ста́ни на но́ги твоя́, и возглаго́лю тебѣ́.
|
|
|
2
|
|
|
И пріи́де на мя́ ду́хъ, и взя́ мя́, и воздви́же мя́, и поста́ви мя́ на нога́хъ мои́хъ, и слы́шахъ єго́ глаго́люща ко мнѣ́.
|
|
|
3
|
|
|
И рече́ [Госпо́дь] ко мнѣ́: сы́не человѣ́чь, послю́ тя а́зъ къ до́му Ізра́илеву, огорчева́ющымъ мя́, и́же огорчи́ша мя́: са́ми и отцы́ и́хъ отверго́шася мене́ до дне́шняго дне́:
|
|
|
4
|
|
|
и сы́нове жестоколи́чніи и твердосерде́чніи. А́зъ послю́ тя къ тѣ́мъ, и рече́ши къ ни́мъ: та́ко глаго́летъ Адонаі́ Госпо́дь:
|
|
|
5
|
|
|
а́ще у́бо услы́шатъ, или́ убоя́тся, зане́ до́мъ огорчева́яй є́сть, и позна́ютъ, я́ко проро́къ єси́ ты́ посредѣ́ и́хъ.
|
|
|
6
|
|
|
И ты́, сы́не человѣ́чь, да не убои́шися и́хъ, ни ужаса́йся от лица́ и́хъ: зане́ разсверѣ́пѣютъ и обы́дутъ тя́ о́крестъ, посредѣ́ бо скорпі́євъ ты́ живе́ши: слове́съ и́хъ не убо́йся и от лица́ и́хъ не ужаса́йся, зане́ до́мъ огорчева́яй є́сть:
|
|
|
7
|
|
|
и возглаго́леши словеса́ моя́ къ ни́мъ, а́ще у́бо услы́шатъ, или́ убоя́тся, зане́ до́мъ прогнѣ́ваяй є́сть.
|
|
|
8
|
|
|
И ты́, сы́не человѣ́чь, послу́шай глаго́лющаго къ тебѣ́, не бу́ди огорчева́яй, я́коже до́мъ преогорчева́яй: отве́рзи уста́ твоя́ и снѣ́ждь, я́же а́зъ даю́ тебѣ́.
|
|
|
9
|
|
|
И ви́дѣхъ, и се́, рука́ просте́рта ко мнѣ́, и въ не́й сви́токъ кни́жный:
|
|
|
10
|
|
|
и разви́ єго́ предо мно́ю, и въ то́мъ пи́сана бы́ша пре́дняя и за́дняя: и впи́сано бя́ше въ не́мъ рыда́ніє и жа́лость и го́ре.
|
|
|
Глава 3
|
|
|
1
|
|
|
И рече́ ко мнѣ́: сы́не человѣ́чь, снѣ́ждь сви́токъ се́й, и иди́ и рцы́ сыно́мъ Ізра́илевымъ.
|
|
|
2
|
|
|
И отверзо́хъ уста́ моя́, и напита́ мя сви́ткомъ си́мъ
|
|
|
3
|
|
|
и рече́ ко мнѣ́: сы́не человѣ́чь, уста́ твоя́ снѣдя́тъ, и чре́во твоє́ насы́тится сви́тка сего́ да́ннаго тебѣ́. И снѣдо́хъ єго́, и бы́сть во устѣ́хъ мои́хъ я́ко ме́дъ сла́докъ.
|
|
|
4
|
|
|
И рече́ ко мнѣ́: сы́не человѣ́чь, иди́ и вни́ди въ до́мъ Ізра́илевъ, и глаго́ли словеса́ моя́ къ ни́мъ:
|
|
|
5
|
|
|
я́ко не къ лю́демъ глубокорѣ́чивымъ и косноязы́чнымъ посыла́ємь єси́, къ до́му Ізра́илеву,
|
|
|
6
|
|
|
ниже́ къ лю́демъ мно́гимъ иноязы́чнымъ, инорѣ́чивымъ, ни тя́жкимъ язы́комъ су́щымъ, и́хже не разумѣ́лъ бы єси́ слове́съ: а́ще же и къ тацѣ́мъ посла́лъ бы́хъ тя́, то́ и ті́и послу́шали бы́ша тебе́:
|
|
|
7
|
|
|
а до́мъ Ізра́илевъ не восхо́щетъ послу́шати тебе́, поне́же не хотя́тъ слу́шати мене́, я́ко ве́сь до́мъ Ізра́илевъ непокори́ви су́ть и жестокосе́рди:
|
|
|
8
|
|
|
и се́, да́хъ лице́ твоє́ си́льно проти́ву лица́ и́хъ, и прю́ {Євр.: чело́.} твою́ укрѣплю́ проти́ву при́ и́хъ:
|
|
|
9
|
|
|
и бу́детъ, всегда́ крѣпча́є ка́мене да́хъ прю́ твою́: не убо́йся и́хъ, ни ужаса́йся лица́ и́хъ, зане́ до́мъ разгнѣ́ваяй є́сть.
|
|
|
10
|
|
|
И рече́ ко мнѣ́: сы́не человѣ́чь, вся́ словеса́, я́же глаго́лахъ съ тобо́ю, возми́ въ се́рдце твоє́ и уши́ма твои́ма послу́шай:
|
|
|
11
|
|
|
и ше́дъ вни́ди въ плѣ́нъ къ сыно́мъ люді́й твои́хъ, и рече́ши къ ни́мъ и возглаго́леши къ ни́мъ: та́ко глаго́летъ Адонаі́ Госпо́дь: а́ще у́бо послу́шаютъ и а́ще у́бо повину́тся.
|
|
|
12
|
|
|
И взя́ мя ду́хъ, и слы́шахъ гла́съ за собо́ю тру́са вели́ка, глаго́лющихъ: благослове́на сла́ва Госпо́дня от мѣ́ста єго́.
|
|
|
13
|
|
|
И ви́дѣхъ гла́съ кри́лъ живо́тныхъ скриля́ющихся дру́гъ ко дру́гу, и гла́съ коле́съ держа́щься и́хъ, и гла́съ тру́са вели́ка.
|
|
|
14
|
|
|
И ду́хъ воздви́же мя́ и взя́ мя, и поидо́хъ вознесе́нъ во устремле́ніи ду́ха моєго́, и рука́ Госпо́дня бы́сть на мнѣ́ крѣ́пкая.
|
|
|
15
|
|
|
И внидо́хъ въ плѣ́нники вознесе́нъ, и обыдо́хъ живу́щыя на рѣцѣ́ Хова́ръ, и сѣдо́хъ ту́ се́дмь дні́й, ходя́ посредѣ́ и́хъ.
|
|
|
16
|
|
|
И бы́сть по седми́хъ дне́хъ сло́во Госпо́дне ко мнѣ́ глаго́ля:
|
|
|
17
|
|
|
сы́не человѣ́чь, стра́жа да́хъ тя́ до́му Ізра́илеву, да слы́шиши сло́во от у́стъ мои́хъ и воспрети́ши и́мъ от мене́.
|
|
|
18
|
|
|
Внегда́ глаго́лати ми́ беззако́ннику: сме́ртію у́мреши: и не возвѣсти́ши єму́, ни соглаго́леши, є́же оста́тися беззако́ннику и обрати́тися от пути́ своєго́, є́же жи́ву бы́ти єму́: беззако́нникъ то́й въ беззако́ніи своє́мъ у́мретъ, кро́ве же єго́ от руки́ твоєя́ взыщу́.
|
|
|
19
|
|
|
И ты́ а́ще возвѣсти́ши беззако́ннику, и не обрати́тся от беззако́нія своєго́ и от пути́ своєго́ [беззако́нна]: то́й беззако́нникъ во беззако́ніи своє́мъ у́мретъ, а ты́ ду́шу твою́ изба́виши.
|
|
|
20
|
|
|
И єгда́ соврати́тся пра́ведникъ от пра́вдъ свои́хъ и сотвори́тъ согрѣше́ніє: и да́мъ му́ку предъ ни́мъ, то́й у́мретъ, я́ко ты́ не воспрети́лъ єси́ єму́, и во грѣсѣ́хъ свои́хъ у́мретъ, зане́ не помяну́тся пра́вды єго́, я́же сотвори́: кро́ве же єго́ от руки́ твоєя́ взыщу́.
|
|
|
21
|
|
|
Ты́ же а́ще возвѣсти́ши пра́ведному, є́же не согрѣши́ти, и то́й не согрѣши́тъ: пра́ведный жи́знію поживе́тъ, я́ко воспрети́лъ єси́ єму́, и ты́ твою́ ду́шу изба́виши.
|
|
|
22
|
|
|
И бы́сть на мнѣ́ рука́ Госпо́дня, и рече́ ко мнѣ́: воста́ни и изы́ди на по́ле, и та́мо возглаго́лется къ тебѣ́.
|
|
|
23
|
|
|
И воста́хъ и изыдо́хъ на по́ле: и се́, та́мо сла́ва Госпо́дня стоя́ше, я́коже видѣ́ніє и я́коже сла́ва Госпо́дня, ю́же ви́дѣхъ на рѣцѣ́ Хова́ръ, и падо́хъ на лицы́ моє́мъ.
|
|
|
24
|
|
|
И пріи́де на мя́ ду́хъ и поста́ви мя́ на ногу́ моє́ю: и глаго́ла ко мнѣ́ и рече́ ми́: вни́ди и затвори́ся средѣ́ до́му твоєго́.
|
|
|
25
|
|
|
И ты́, сы́не человѣ́чь, се́, да́шася на тя́ у́зы, и свя́жутъ тя́ и́ми, и не изы́деши от среды́ и́хъ:
|
|
|
26
|
|
|
и язы́къ тво́й привяжу́ къ горта́ни твоєму́, и онѣмѣ́єши и не бу́деши и́мъ въ му́жа обличе́нія, поне́же до́мъ разгнѣ́ваяй є́сть:
|
|
|
27
|
|
|
и внегда́ глаго́лати ми́ къ тебѣ́, отве́рзу уста́ твоя́, и рече́ши къ ни́мъ: сія́ глаго́летъ Адонаі́ Госпо́дь: слы́шай да слы́шитъ, и не покаря́яйся да не покаря́єтся, зане́ до́мъ преогорчева́яй є́сть.
|
|
|
Глава 4
|
|
|
1
|
|
|
И ты́, сы́не человѣ́чь, возми́ себѣ́ плі́нѳу и положи́ ю́ предъ лице́мъ твои́мъ, и да напи́шеши на не́й гра́дъ Ієрусали́мъ,
|
|
|
2
|
|
|
и да да́си о́крестъ єго́ огражде́ніє, и да согради́ши надъ ни́мъ забра́ла и обложи́ши єго́ остро́гомъ, и да поста́виши о́крестъ єго́ полки́ и да учини́ши поставле́нія стрѣ́льницъ о́крестъ:
|
|
|
3
|
|
|
ты́ же возми́ себѣ́ сковра́ду желѣ́зну, и да положи́ши ю́ въ стѣ́ну желѣ́зну между́ тобо́ю и между́ гра́домъ, и да угото́виши лице́ твоє́ на́нь, и бу́детъ въ затво́рѣ, и затвори́ши и́: зна́меніє сіє́ є́сть сыно́мъ Ізра́илевымъ.
|
|
|
4
|
|
|
Ты́ же да спи́ши на лѣ́вѣмъ боку́ твоє́мъ, и да положи́ши непра́вды до́му Ізра́илева на не́мъ, по числу́ дні́й пятьдеся́тъ и сто́, въ ня́же поспи́ши на не́мъ, и во́змеши непра́вды и́хъ.
|
|
|
5
|
|
|
И а́зъ да́хъ тебѣ́ двѣ́ непра́вды и́хъ въ число́ дні́й, въ де́вятьдесятъ и сто́ дні́й, и во́змеши непра́вды до́му Ізра́илева.
|
|
|
6
|
|
|
И соверши́ши сія́, и поспи́ши на десны́хъ ре́брѣхъ твои́хъ второ́є, и во́змеши непра́вды до́му Іу́дина четы́редесять дні́й, де́нь за єди́но лѣ́то положи́хъ тебѣ́.
|
|
|
7
|
|
|
И на заключе́ніє Ієрусали́ма да угото́ваєши лице́ твоє́, и мы́шцу твою́ утверди́ши, и проро́чествовати бу́деши на него́.
|
|
|
8
|
|
|
И се́, а́зъ да́хъ на тя́ у́зы, и не преврати́шися от ре́бръ твои́хъ на ре́бра твоя́, до́ндеже сконча́ются дні́є заключе́нія твоєго́.
|
|
|
9
|
|
|
Ты́ же [сы́не человѣ́чь] возми́ себѣ́ пшени́цу и ячме́нь, и бо́бъ и ля́щу, и про́со и пы́ро, и вложи́ши я́ въ сосу́дъ єди́нъ гли́нянъ: и сотвори́ши я́ себѣ́ въ хлѣ́бы, и по числу́ дні́й, въ ня́же спи́ши на ре́брѣхъ твои́хъ, де́вятьдесятъ и сто́ дні́й я́сти бу́деши о́ныя.
|
|
|
10
|
|
|
Я́дь же твоя́, ю́же я́сти бу́деши, вѣ́сомъ два́десять Сі́кль на де́нь, от вре́мене до вре́мене снѣ́си сія́.
|
|
|
11
|
|
|
И во́ду мѣ́рою пи́ти бу́деши, и шесту́ю ча́сть і́на от вре́мене до вре́мене испіє́ши.
|
|
|
12
|
|
|
И опрѣсно́къ ячме́нный снѣ́си я́, въ ла́йнѣ моты́лъ человѣ́чихъ сокры́єши я́ предъ очи́ма и́хъ
|
|
|
13
|
|
|
и рече́ши: сія́ глаго́летъ Госпо́дь Бо́гъ Ізра́илевъ: та́ко снѣдя́тъ сы́нове Ізра́илевы хлѣ́бъ сво́й нечи́стъ во язы́цѣхъ, а́може разсы́плю я́.
|
|
|
14
|
|
|
И рѣ́хъ: ника́коже, Го́споди Бо́же Ізра́илевъ! се́, душа́ моя́ не оскверни́лася въ нечистотѣ́, и мертвечи́ны и звѣроя́дины не ядо́хъ от рожде́нія моєго́ да́же доны́нѣ, ниже́ вни́де во уста́ моя́ вся́коє мя́со ме́рзко и скверна́во.
|
|
|
15
|
|
|
И рече́ ко мнѣ́: се́, да́хъ тебѣ́ моты́ла говя́жая вмѣ́сто моты́лъ человѣ́чихъ, и сотвори́ши хлѣ́бы себѣ́ въ ни́хъ.
|
|
|
16
|
|
|
И рече́ ко мнѣ́: сы́не человѣ́чь, се́, а́зъ сотру́ утвержде́ніє хлѣ́бноє во Ієрусали́мѣ, и снѣдя́тъ хлѣ́бъ вѣ́сомъ и во оскудѣ́ніи, и во́ду мѣ́рою и въ па́губѣ испію́тъ,
|
|
|
17
|
|
|
я́ко да ску́дни бу́дутъ хлѣ́бомъ и водо́ю: и поги́бнетъ человѣ́къ и бра́тъ єго́, и иста́ютъ въ непра́вдахъ свои́хъ.
|
|
|
Глава 5
|
|
|
1
|
|
|
Ты́ же, сы́не человѣ́чь, возми́ себѣ́ ме́чь о́стръ па́че бри́твы стригу́щаго, притяжи́ єго́ себѣ́ и возложи́ єго́ на главу́ твою́ и на браду́ твою́: и возми́ превѣ́съ вѣсо́въ, и размѣ́риши я́.
|
|
|
2
|
|
|
Четве́ртую ча́сть да сожже́ши на огни́ средѣ́ гра́да по исполне́нію дні́й затворе́нія:
|
|
|
3
|
|
|
и да во́змеши четве́ртую ча́сть и сожже́ши ю́ средѣ́ гра́да, четве́ртую же ча́сть содроби́ши мече́мъ о́крестъ єго́, и четве́ртую ча́сть разсы́плеши вѣ́тромъ: и ме́чь извлеку́ вслѣ́дъ и́хъ.
|
|
|
4
|
|
|
И во́змеши отту́ду ма́ло и́хъ число́мъ и ввя́жеши я́ во оде́жду твою́: и от тѣ́хже во́змеши єще́ и вве́ржеши я́ средѣ́ огня́ и сожже́ши я́ на огни́: и от того́ изы́детъ о́гнь на ве́сь до́мъ Ізра́илевъ. И рече́ши всему́ до́му Ізра́илеву:
|
|
|
5
|
|
|
сія́ глаго́летъ Адонаі́ Госпо́дь: се́й Ієрусали́мъ, посредѣ́ язы́ковъ положи́хъ єго́, и страны́, я́же о́крестъ єго́.
|
|
|
6
|
|
|
И рече́ши: измѣни́ оправда́нія моя́ во беззако́ніє па́че язы́ковъ, и зако́ны моя́ па́че стра́нъ, я́же о́крестъ єго́: поне́же оправда́нія моя́ отри́нуша и по зако́номъ мои́мъ не ходи́ша въ ни́хъ.
|
|
|
7
|
|
|
Сего́ ра́ди та́ко глаго́летъ Адонаі́ Госпо́дь: поне́же вина́ ва́ша па́че язы́къ, и́же о́крестъ ва́съ, и не ходи́сте въ зако́нѣхъ мои́хъ и оправда́ній мои́хъ не сотвори́сте, но и по судо́мъ язы́ческимъ, я́же о́крестъ ва́съ, не сотвори́сте:
|
|
|
8
|
|
|
сего́ ра́ди сія́ глаго́летъ Адонаі́ Госпо́дь: се́, а́зъ на тя́, и сотворю́ средѣ́ тебе́ су́дъ предъ язы́ки,
|
|
|
9
|
|
|
и сотворю́ средѣ́ тебе́, и́хже не сотвори́хъ и и́хже не сотворю́ подо́бныхъ и́мъ ктому́, по всѣ́мъ ме́рзостемъ твои́мъ.
|
|
|
10
|
|
|
Сего́ ра́ди отцы́ снѣдя́тъ ча́дъ средѣ́ тебе́, и ча́да снѣдя́тъ отце́въ: и сотворю́ въ тебѣ́ суды́, и разсѣ́ю вся́ оста́вшая от тебе́ по всему́ вѣ́тру.
|
|
|
11
|
|
|
Сего́ ра́ди живу́ а́зъ, глаго́летъ Адонаі́ Госпо́дь, вои́стинну поне́же свята́я моя́ оскверни́лъ єси́ всѣ́ми ме́рзостьми твои́ми, и а́зъ отри́ну тя́, и не пощади́тъ о́ко моє́, и а́зъ не поми́лую тя́.
|
|
|
12
|
|
|
Че́тверть тебе́ сме́ртію потреби́тся, и че́тверть тебе́ гла́домъ сконча́єтся средѣ́ тебе́, че́тверть же тебе́ паде́тъ мече́мъ о́крестъ тебе́, че́тверть же тебе́ разсы́плю по всему́ вѣ́тру, и ме́чь извлеку́ вслѣ́дъ и́хъ.
|
|
|
13
|
|
|
И сконча́єтся я́рость моя́ и гнѣ́въ мо́й на ни́хъ, и утѣ́шуся, и увѣ́дятъ, я́ко а́зъ Госпо́дь глаго́лахъ во рве́ніи моє́мъ, внегда́ сконча́ти ми́ гнѣ́въ мо́й на ни́хъ.
|
|
|
14
|
|
|
И положу́ тя въ пусты́ню и во укори́зну язы́комъ су́щымъ о́крестъ тебе́ и предъ вся́кимъ проходя́щимъ.
|
|
|
15
|
|
|
И бу́деши во стена́ніє и у́жасъ, наказа́ніємъ и па́губою во язы́цѣхъ, и́же о́крестъ тебе́, єгда́ сотворю́ въ тебѣ́ суды́ во гнѣ́въ и въ я́рость и во отмще́ніє я́рости моєя́: а́зъ Госпо́дь глаго́лахъ:
|
|
|
16
|
|
|
и єгда́ послю́ стрѣ́лы гла́да на ня́, и бу́дутъ во сконча́ніє, и послю́ растли́ти вы́, и гла́дъ соберу́ на вы́, и сотру́ утвержде́ніє хлѣ́ба твоєго́,
|
|
|
17
|
|
|
и испущу́ на тя́ гла́дъ и звѣ́ри лю́ты, и уму́чу тя́, сме́рть же и кро́вь про́йдутъ сквозѣ́ тя́, и ме́чь наведу́ на тя́ о́крестъ: а́зъ Госпо́дь глаго́лахъ.
|
|
|
Глава 6
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, утверди́ лице́ твоє́ къ гора́мъ Ізра́илевымъ и прорцы́ къ ни́мъ,
|
|
|
3
|
|
|
и рече́ши: го́ры Ізра́илевы, слы́шите сло́во Госпо́дне, сія́ глаго́летъ Адонаі́ Госпо́дь гора́мъ и холмо́мъ, и ка́менемъ и де́бремъ: се́, а́зъ наведу́ на вы́ ме́чь, и потребя́тся высоты́ ва́шя:
|
|
|
4
|
|
|
и сокруша́тся тре́бища ва́ша и кумі́рницы ва́шя, и пове́ргу я́звеныхъ ва́шихъ предъ кумі́ры ва́шими:
|
|
|
5
|
|
|
и да́мъ тру́пы сыно́въ Ізра́илевыхъ предъ кумі́ры и́хъ и расточу́ ко́сти ва́шя о́крестъ тре́бищъ ва́шихъ.
|
|
|
6
|
|
|
И во все́мъ селе́ніи ва́шемъ опустѣ́ютъ гра́ды, и высо́кая ва́ша поги́бнутъ, я́ко да потребя́тся тре́бницы ва́ши и сокруша́тся, и преста́нутъ кумі́ры ва́ши, и отве́ргутся кумі́рницы ва́шя, и потребя́тся дѣла́ ва́ша:
|
|
|
7
|
|
|
и паду́тъ я́звеніи посредѣ́ ва́съ, и позна́єте, я́ко а́зъ Госпо́дь.
|
|
|
8
|
|
|
И оста́влю є́же бы́ти от ва́съ избѣ́гшымъ от меча́ во язы́цѣхъ, и въ разсы́паніи ва́шемъ во страна́хъ,
|
|
|
9
|
|
|
и помяну́тъ мя́ уцѣлѣ́вшіи от ва́съ во язы́цѣхъ, а́може бы́ша плѣне́ни: кля́хся бо се́рдцу и́хъ блуди́вшему и отста́вшему от мене́ и очесе́мъ и́хъ блуди́вшымъ вслѣ́дъ начина́ній и́хъ: и би́ти и́мутъ ли́ца своя́ о зло́бахъ, я́же твори́ша во всѣ́хъ ме́рзостехъ свои́хъ,
|
|
|
10
|
|
|
и позна́ютъ, я́ко а́зъ Госпо́дь не ту́не глаго́лахъ сотвори́ти и́мъ вся́ зла́я сія́.
|
|
|
11
|
|
|
Та́ко глаго́летъ Адонаі́ Госпо́дь: восплещи́ руко́ю и вострепли́ ного́ю и рцы́: бла́гоже, бла́гоже о всѣ́хъ ме́рзостехъ зло́бы до́му Ізра́илева: я́ко мече́мъ и гла́домъ и сме́ртію паду́тъ.
|
|
|
12
|
|
|
Да́льніи сме́ртію сконча́ются, а бли́жніи мече́мъ паду́тъ: оста́вшіи же и обдержи́міи гла́домъ сконча́ются: и сконча́ю гнѣ́въ мо́й на ни́хъ,
|
|
|
13
|
|
|
и увѣ́сте, я́ко а́зъ Госпо́дь, єгда́ бу́дутъ я́звеніи ва́ши средѣ́ кумі́ръ ва́шихъ о́крестъ тре́бищъ ва́шихъ, на вся́цѣмъ хо́лмѣ высо́цѣмъ и на всѣ́хъ версѣ́хъ го́рнихъ, и подъ ду́бомъ сѣ́ннымъ и подъ вся́кимъ дре́вомъ ча́щнымъ, идѣ́же дая́ху воню́ благоуха́нія всѣ́мъ кумі́ромъ свои́мъ.
|
|
|
14
|
|
|
И простру́ ру́ку мою́ на ня́, положу́ зе́млю въ па́губу и въ потребле́ніє от пусты́ни Девлаѳа́, от всего́ селе́нія и́хъ: и позна́єте, я́ко а́зъ Госпо́дь.
|
|
|
Глава 7
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
и ты́, сы́не человѣ́чь, рцы́: сія́ глаго́летъ Госпо́дь: земли́ Ізра́илевѣ коне́цъ пріи́де, коне́цъ пріи́де на четы́ри краи́ земли́.
|
|
|
3
|
|
|
Прише́лъ є́сть коне́цъ, ны́нѣ коне́цъ тебѣ́, и испущу́ я́рость мою́ на тя́, и отмщу́ тебѣ́ по путе́мъ твои́мъ, да́мъ на тя́ вся́ ме́рзости твоя́.
|
|
|
4
|
|
|
Не пощади́тъ о́ко моє́ на тя́, и не поми́лую, зане́ пу́ть тво́й на тя́ да́мъ, и ме́рзости твоя́ средѣ́ тебе́ бу́дутъ, и увѣ́си, я́ко а́зъ Госпо́дь.
|
|
|
5
|
|
|
Тѣ́мже сія́ глаго́летъ Адонаі́ Госпо́дь: зло́ єди́но зло́, се́, и́детъ.
|
|
|
6
|
|
|
Коне́цъ прише́лъ є́сть, пріи́де коне́цъ, воста́ на тя́, се́, пріи́де.
|
|
|
7
|
|
|
Пріи́де плете́ніє на тя́ живу́щаго на земли́: пріи́де вре́мя, прибли́жися де́нь, не съ молво́ю, ниже́ съ болѣ́зньми.
|
|
|
8
|
|
|
Ны́нѣ избли́зу излію́ гнѣ́въ мо́й на тя́ и сконча́ю я́рость мою́ на тебѣ́, и осужду́ тя́ по путе́мъ твои́мъ и да́мъ на тя́ вся́ ме́рзости твоя́.
|
|
|
9
|
|
|
Не пощади́тъ о́ко моє́, и не поми́лую, зане́ пути́ твоя́ на тя́ да́мъ, и ме́рзости твоя́ посредѣ́ тебе́ бу́дутъ, и позна́єши, я́ко а́зъ Госпо́дь бія́й.
|
|
|
10
|
|
|
Се́, де́нь Госпо́день прихо́дитъ, се́, коне́цъ прише́лъ є́сть, изы́де плете́ніє, и процвѣте́ же́злъ,
|
|
|
11
|
|
|
прозябе́ укори́зна, и сокруши́тъ утвержде́ніє беззако́нника: и не съ пли́щемъ, ни съ потща́ніємъ: и не от ни́хъ су́ть, и нѣ́сть красы́ въ ни́хъ.
|
|
|
12
|
|
|
Пріи́де вре́мя, прибли́жися де́нь: купу́яй да не ра́дуєтся, и продая́й да не пла́чется, я́ко гнѣ́въ на все́ мно́жество и́хъ.
|
|
|
13
|
|
|
Зане́же притяжава́яй ко продаю́щему ктому́ не возврати́тся, и єще́ въ жи́зни живу́щему, я́ко видѣ́ніє на все́ мно́жество и́хъ не возврати́тся, и человѣ́къ во очесѣ́хъ жи́зни своєя́ не укрѣпи́тся.
|
|
|
14
|
|
|
Воструби́те трубо́ю и разсуди́те вся́, и не бу́детъ гряду́щаго на ра́ть, я́ко гнѣ́въ мо́й на все́ мно́жество и́хъ.
|
|
|
15
|
|
|
Ра́ть отвнѣ́ съ мече́мъ, гла́дъ же и сме́рть извну́трь: и́же на по́ли мече́мъ сконча́єтся, су́щихъ же во гра́дѣ гла́дъ и сме́рть сконча́єтъ.
|
|
|
16
|
|
|
И уцѣлѣ́ютъ спасе́нніи от ни́хъ и бу́дутъ на гора́хъ я́ко голуби́цы скорбя́ще: и всѣ́хъ избію́, коєго́ждо въ непра́вдахъ єго́.
|
|
|
17
|
|
|
Вся́ ру́ки разслабѣ́ютъ, и вся́ сте́гна окаля́ются мо́кростію.
|
|
|
18
|
|
|
И препоя́шутся во вре́тища, и покры́єтъ я́ у́жасъ: и на вся́цѣмъ лицы́ сра́мъ на ни́хъ, и на вся́цѣй главѣ́ плѣ́шь.
|
|
|
19
|
|
|
Сребро́ и́хъ на сто́гнахъ пове́ржется, и зла́то и́хъ презрѣ́но бу́детъ: сребро́ и́хъ и зла́то не возмо́жетъ изба́вити и́хъ въ де́нь гнѣ́ва Госпо́дня, ду́ши и́хъ не насы́тятся, и чрева́ и́хъ не напо́лнятся, зане́ ка́знь непра́востей и́хъ бы́сть.
|
|
|
20
|
|
|
Избра́нныя у́твари въ горды́ню положи́ша я́, и о́бразы ме́рзостей свои́хъ и гну́сности сотвори́ша от ни́хъ: сего́ ра́ди да́хъ о́ная и́мъ въ нечистоту́.
|
|
|
21
|
|
|
И преда́мъ я́ въ чужді́я ру́цѣ, є́же разгра́бити я́, и губи́телемъ земли́ въ коры́сти, и оскверня́тъ я́.
|
|
|
22
|
|
|
И отвращу́ лице́ моє́ от ни́хъ, и оскверня́тъ стражбу́ мою́, и вни́дутъ въ ня́ неопа́сно, и оскверня́тъ я́:
|
|
|
23
|
|
|
и сотворя́тъ мяте́жъ, поне́же земля́ полна́ суда́ кро́ве, и гра́дъ по́лнъ беззако́нія.
|
|
|
24
|
|
|
И приведу́ злы́я язы́ки, и наслѣ́дятъ до́мы и́хъ: и отвращу́ велича́ніє крѣ́пости и́хъ, и оскверня́тся свята́я и́хъ.
|
|
|
25
|
|
|
И моле́ніє пріи́детъ, и взы́щетъ ми́ра, и не бу́детъ.
|
|
|
26
|
|
|
Го́ре на го́ре бу́детъ, и вѣ́сть на вѣ́сть бу́детъ, и не бу́детъ видѣ́ніє от проро́ка, и зако́нъ поги́бнетъ от жерца́ и совѣ́тъ от ста́рецъ.
|
|
|
27
|
|
|
Ца́рь воспла́чется, и кня́зь облече́тся въ па́губу, и ру́ки люді́й земли́ разслабѣ́ютъ: по путе́мъ и́хъ сотворю́ и́мъ и по судо́мъ и́хъ отмщу́ и́мъ, и уразумѣ́ютъ, я́ко а́зъ Госпо́дь.
|
|
|
Глава 8
|
|
|
1
|
|
|
И бы́сть въ лѣ́то шесто́є въ шесты́й ме́сяцъ, въ пя́тый де́нь ме́сяца, а́зъ сѣдѣ́хъ въ дому́ моє́мъ, и старѣ́йшины Іу́дины сѣдя́ху предо мно́ю, и бы́сть на мнѣ́ рука́ Адонаі́ Го́спода.
|
|
|
2
|
|
|
И ви́дѣхъ, и се́, подо́біє му́жа, от чре́слъ єго́ и да́же до ни́зу о́гнь, от чре́слъ же єго́ въ ве́рхъ єго́ я́коже видѣ́ніє зари́ и я́ко взо́ръ иле́ктра.
|
|
|
3
|
|
|
И простре́ подо́біє руки́ и взя́ мя́ за ве́рхъ главы́ моєя́, и взя́ мя́ ду́хъ средѣ́ земли́ и средѣ́ небесе́ и веде́ мя во Ієрусали́мъ въ видѣ́ніи Бо́жіи на преддве́ріє вра́тъ вну́треннѣйшихъ зря́щихъ на сѣ́веръ, идѣ́же бѣ́ сто́лпъ и о́бразъ ре́вности притяжава́ющаго.
|
|
|
4
|
|
|
И се́, ту́ бя́ше сла́ва Го́спода Бо́га Ізра́илева по видѣ́нію, є́же ви́дѣхъ на по́ли.
|
|
|
5
|
|
|
И рече́ ко мнѣ́: сы́не человѣ́чь, воззри́ очи́ма твои́ма на сѣ́веръ. И воззрѣ́хъ очи́ма мои́ма на сѣ́веръ, и се́, от сѣ́вера ко врато́мъ зря́щымъ на восто́къ тре́бника, идѣ́же о́бразъ рве́нія сего́ во вхо́дѣ.
|
|
|
6
|
|
|
И рече́ ко мнѣ́: сы́не человѣ́чь, ви́дѣлъ ли єси́, что́ сі́и творя́тъ? беззако́нія вели́ка до́мъ Ізра́илевъ твори́тъ здѣ́, є́же удаля́тися от святы́нь мои́хъ: є́же обрати́вся у́зриши бо́лшая беззако́нія.
|
|
|
7
|
|
|
И введе́ мя ко предвра́тію двора́, и ви́дѣхъ, и се́, сква́жня єди́на въ стѣнѣ́.
|
|
|
8
|
|
|
И рече́ ко мнѣ́: сы́не человѣ́чь, раскопа́й стѣ́ну. И раскопа́хъ, и се́, две́рь єди́на.
|
|
|
9
|
|
|
И рече́ ко мнѣ́: вни́ди и ви́ждь беззако́нія зла́я, я́же творя́тъ сі́и здѣ́.
|
|
|
10
|
|
|
И внидо́хъ и ви́дѣхъ, и се́, вся́коє подо́біє га́да и скота́, су́єтная гнуше́нія и вся́цыи кумі́ры до́му Ізра́илева напи́сани бы́ша на стѣнѣ́ всю́ду о́коло.
|
|
|
11
|
|
|
И се́дмьдесятъ муже́й от старѣ́йшинъ до́му Ізра́илева, и Ієзо́ніа сы́нъ Сафа́новъ посредѣ́ и́хъ стоя́ше предъ лице́мъ и́хъ, и кі́йждо кади́лницу свою́ имѣ́яше въ руцѣ́ своє́й, и ды́мъ кади́ла восхожда́ше.
|
|
|
12
|
|
|
И рече́ ко мнѣ́: ви́дѣлъ ли єси́, сы́не человѣ́чь, я́же ста́рцы до́му Ізра́илева творя́тъ здѣ́, кі́йждо и́хъ на ло́жи та́йнѣмъ своє́мъ, зане́ рѣ́ша: не ви́дитъ Госпо́дь, оста́вилъ Госпо́дь зе́млю.
|
|
|
13
|
|
|
И рече́ ко мнѣ́: єще́ обрати́ся, и у́зриши беззако́нія бо́лшая, я́же сі́и творя́тъ.
|
|
|
14
|
|
|
И введе́ мя въ преддве́ріє вра́тъ до́му Госпо́дня зря́щихъ на сѣ́веръ: и се́, та́мо жены́ сѣдя́щыя пла́чущяся о Ѳамму́зѣ.
|
|
|
15
|
|
|
И рече́ ко мнѣ́: сы́не человѣ́чь, ви́дѣлъ єси́, и єще́ у́зриши ме́рзости и́хъ бо́лшыя си́хъ.
|
|
|
16
|
|
|
И введе́ мя во дво́ръ до́му Госпо́дня вну́тренній, и въ преддве́ріє хра́ма Госпо́дня, между́ Єла́момъ и между́ же́ртвенникомъ, я́ко два́десять и пя́ть муже́й, за́дняя своя́ да́вшихъ ко хра́му Госпо́дню, и ли́ца и́хъ пря́мо къ восто́ку: и сі́и покланя́ются на восто́къ со́лнцу.
|
|
|
17
|
|
|
И рече́ ко мнѣ́: ви́дѣлъ єси́, сы́не человѣ́чь, єда́ ма́ло до́му Іу́дину, є́же твори́ти беззако́нія, я́же сотвори́ша здѣ́? поне́же напо́лниша зе́млю беззако́нія, и обрати́шася разгнѣ́вати мя́: и се́, сі́и простира́ютъ ло́зу а́ки руга́ющеся мнѣ́:
|
|
|
18
|
|
|
и а́зъ сотворю́ и́мъ съ я́ростію: не пощади́тъ о́ко моє́, и не поми́лую: и воззову́тъ во у́шы мои́ гла́сомъ вели́кимъ, и не услы́шу и́хъ.
|
|
|
Глава 9
|
|
|
1
|
|
|
И возопи́ во у́шы мои́ гла́сомъ вели́кимъ, глаго́ля: прибли́жися отмще́ніє гра́да: и кі́йждо имѣ́яше сосу́ды истребле́нія въ руцѣ́ своє́й.
|
|
|
2
|
|
|
И се́, ше́сть муже́й идо́ша от пути́ вра́тъ высо́кихъ зря́щихъ на сѣ́веръ, и коєму́ждо сѣки́ра [погубле́нія] въ руцѣ́ єго́: и му́жъ єди́нъ посредѣ́ и́хъ облече́нъ въ поди́ръ, и по́ясъ от сапфі́ра о чре́слѣхъ єго́: и внидо́ша и ста́ша бли́зъ же́ртвенника мѣ́дянаго.
|
|
|
3
|
|
|
И сла́ва Бо́га Ізра́илева взы́де от херуві́мовъ су́щая на ни́хъ въ непокрове́нноє до́му: и призва́ му́жа оболче́на въ поди́ръ, и́же имѣ́яше на чре́слѣхъ свои́хъ по́ясъ.
|
|
|
4
|
|
|
И рече́ Госпо́дь къ нему́: пройди́ средѣ́ гра́да Ієрусали́ма и да́ждь зна́менія на ли́ца муже́й стеня́щихъ и болѣ́знующихъ о всѣ́хъ беззако́ніихъ быва́ющихъ средѣ́ и́хъ.
|
|
|
5
|
|
|
И си́мъ рече́, слы́шащу мнѣ́: иди́те во гра́дъ вслѣ́дъ єго́, изсѣцы́те и не пощади́те очи́ма ва́шима и не поми́луйте:
|
|
|
6
|
|
|
ста́рца и ю́ношу и дѣ́ву, и младе́нцы и жены́ избі́йте въ потребле́ніє: а ко всѣ́мъ, на ни́хже є́сть зна́меніє, не прикаса́йтеся: от освяще́нныхъ мои́хъ начни́те. И нача́ша от муже́й ста́рыхъ, и́же бѣ́ша вну́трь въ дому́.
|
|
|
7
|
|
|
И рече́ къ ни́мъ: оскверни́те до́мъ, и напо́лните пути́ мертвеце́въ исходя́ще, и изсѣцы́те [су́щихъ во гра́дѣ].
|
|
|
8
|
|
|
И бы́сть внегда́ сѣча́ху и́хъ, оста́хъ а́зъ и падо́хъ ни́цъ, и возопи́хъ и рѣ́хъ: го́ре, [го́ре,] о, лю́тѣ мнѣ́, Адонаю́ Го́споди! єда́ потребля́єши ты́ оста́нки Ізра́илевы, єгда́ разлива́єши я́рость твою́ на Ієрусали́мъ?
|
|
|
9
|
|
|
И рече́ ко мнѣ́: непра́вда до́му Ізра́илева и Іу́дина возвели́чися зѣло́ зѣло́, я́ко напо́лнися земля́ люді́й мно́гихъ, и гра́дъ напо́лнися непра́вдъ и нечисто́тъ, я́ко рѣ́ша: оста́вилъ є́сть Госпо́дь зе́млю и не ви́дитъ Госпо́дь.
|
|
|
10
|
|
|
И а́зъ є́смь, и не пощади́тъ о́ко моє́, ни поми́лую, пути́ и́хъ на главы́ и́хъ да́хъ.
|
|
|
11
|
|
|
И се́, му́жъ, оболче́ный въ поди́ръ и препоя́санъ по́ясомъ о чре́слѣхъ свои́хъ, отвѣщава́ше, глаго́ля: сотвори́хъ, я́коже заповѣ́далъ ми́ єси́.
|
|
|
Глава 10
|
|
|
1
|
|
|
И ви́дѣхъ, и се́, верху́ тве́рди су́щія надъ главо́ю херуві́мовъ, я́ко ка́мень сапфі́ровый, подо́біє престо́ла на ни́хъ.
|
|
|
2
|
|
|
И рече́ къ му́жу облече́ному во у́тварь: вни́ди средѣ́ коле́съ, я́же подъ херуві́мами, и напо́лни го́рсти твоя́ у́глія о́гненнаго от среды́ херуві́мовъ и разсы́пли на гра́дъ. И вни́де предо мно́ю:
|
|
|
3
|
|
|
херуві́ми же стоя́ху одесну́ю до́му, внегда́ вхожда́ше му́жъ, и о́блакъ напо́лни дво́ръ вну́тренній.
|
|
|
4
|
|
|
И воздви́жеся сла́ва Госпо́дня от херуві́мовъ въ непокрове́ніє до́му, и напо́лни до́мъ о́блакъ, и дво́ръ напо́лнися сія́нія сла́вы Госпо́дни:
|
|
|
5
|
|
|
и гла́съ кри́лъ херуві́мскихъ слы́шашеся да́же до внѣ́шняго двора́, я́коже гла́съ Бо́га саддаі́ глаго́лющаго.
|
|
|
6
|
|
|
И бы́сть внегда́ заповѣ́даше му́жу облече́ному во у́тварь святу́ю, глаго́ля: возми́ о́гнь от среды́ коле́съ, и́же средѣ́ херуві́мовъ. И вни́де и ста́ бли́зъ коле́съ.
|
|
|
7
|
|
|
И простре́ херуві́мъ ру́ку свою́ въ среди́ну огня́ су́щаго средѣ́ херуві́мовъ, и взя́ и вдаде́ въ ру́цѣ оболче́ному во у́тварь святу́ю, и взя́ и изы́де.
|
|
|
8
|
|
|
И ви́дѣхъ херуві́мы, и се́, подо́біє ру́къ человѣ́чихъ подъ кри́лы и́хъ.
|
|
|
9
|
|
|
И ви́дѣхъ, и се́, четы́ри коле́са стоя́ху держа́щеся херуві́мовъ: ко́ло єди́но держа́шеся єди́наго херуві́ма, и ко́ло єди́но держа́шеся друга́го херуві́ма: взо́ръ же коле́съ я́коже взо́ръ ка́менія Анѳра́кса:
|
|
|
10
|
|
|
и взо́ръ и́хъ подо́біє єди́но четы́ремъ, а́кибы бы́ло ко́ло въ колеси́:
|
|
|
11
|
|
|
внегда́ идя́ху, на четы́ри ча́сти и́хъ идя́ху, и не обраща́хуся внегда́ идя́ху: я́ко, на не́же мѣ́сто а́ще зря́ше нача́ло єди́но, идя́ху [вслѣ́дъ єго́], и не обраща́хуся, внегда́ ити́ и́мъ.
|
|
|
12
|
|
|
Вся́ же тѣлеса́ и́хъ и хребты́ и́хъ, и ру́цѣ и́хъ и кри́ла и́хъ и коле́са по́лна оче́съ о́крестъ четы́рехъ коле́съ.
|
|
|
13
|
|
|
Коле́самъ же си́мъ воззва́ся ге́лгель, слы́шащу мнѣ́.
|
|
|
14
|
|
|
Четы́ри же ли́ца коєму́ждо и́хъ: єди́ному лице́ херуві́мле, лице́ же друго́му лице́ человѣ́чо, тре́тіє же лице́ льво́во и четве́ртоє лице́ о́рлеє.
|
|
|
15
|
|
|
И взя́шася херуві́ми: сіє́ є́сть живо́тноє, є́же ви́дѣхъ на рѣцѣ́ Хова́ръ.
|
|
|
16
|
|
|
И єгда́ идя́ху херуві́ми, идя́ху и коле́са и́хъ, и сі́и держа́хуся и́хъ: и внегда́ воздвиза́ху херуві́ми кри́ла своя́, є́же возвы́ситися от земли́, не обраща́хуся коле́са и́хъ, и та́ держа́хуся и́хъ:
|
|
|
17
|
|
|
єгда́ стоя́ху ті́и, стоя́ху и они́, и внегда́ возвыша́хуся ті́и, возвыша́хуся и они́ съ ни́ми: зане́ ду́хъ жи́зни бѣ́ въ ни́хъ.
|
|
|
18
|
|
|
И изы́де сла́ва Госпо́дня от непокрове́нія до́му и взы́де на херуві́мы.
|
|
|
19
|
|
|
И воздвиго́ша херуві́ми кри́ла своя́ и возвы́сишася от земли́ предо мно́ю: єгда́ изыдо́ша ті́и, и коле́са держа́хуся и́хъ: и ста́ша надъ преддве́ріємъ вра́тъ до́му Госпо́дня, я́же проти́ву восто́ку, и сла́ва Го́спода Бо́га Ізра́илева бѣ́ надъ ни́ми свы́ше.
|
|
|
20
|
|
|
Сіє́ живо́тноє є́сть, є́же ви́дѣхъ подъ Бо́гомъ Ізра́илевымъ на рѣцѣ́ Хова́ръ, и позна́хъ, я́ко херуві́ми су́ть.
|
|
|
21
|
|
|
Четы́ри ли́ца єди́ному, и четы́ри кри́ла єди́ному, и подо́біє ру́къ человѣ́чихъ подъ кри́лы и́хъ.
|
|
|
22
|
|
|
И подо́біє ли́цъ и́хъ: сія́ ли́ца су́ть, я́же ви́дѣхъ подъ сла́вою Бо́га Ізра́илева при рѣцѣ́ Хова́ръ воззрѣ́ніє и́хъ: и сія́ ко́ждо пря́мо лицу́ своєму́ идя́ху.
|
|
|
Глава 11
|
|
|
1
|
|
|
И воздви́же мя́ ду́хъ и возведе́ мя́ ко врато́мъ до́му Госпо́дня, я́же пря́мо зря́тъ на восто́къ: и се́, предъ преддве́ріємъ вра́тъ я́ко два́десять и пя́ть муже́й: и ви́дѣхъ средѣ́ и́хъ Ієхоні́ю сы́на Іазе́рова и Фалті́ю ване́ова, старѣ́йшины людскі́я.
|
|
|
2
|
|
|
И рече́ Госпо́дь ко мнѣ́: сы́не человѣ́чь, сі́и му́жіє помышля́ющіи су́єтная и совѣ́тъ творя́щіи лука́въ во гра́дѣ се́мъ,
|
|
|
3
|
|
|
глаго́лющіи: не въ но́вѣ ли согради́шася до́мове? се́й є́сть коно́бъ, мы́ же мяса́.
|
|
|
4
|
|
|
Сего́ ра́ди прорцы́ на ня́, прорцы́, сы́не человѣ́чь.
|
|
|
5
|
|
|
И нападе́ на мя́ Ду́хъ Госпо́день и рече́ ко мнѣ́: глаго́ли, сія́ глаго́летъ Госпо́дь: та́ко реко́сте, до́ме Ізра́илевъ, и умышле́нія ду́ха ва́шего а́зъ вѣ́мъ:
|
|
|
6
|
|
|
умно́жисте мертвецы́ ва́шя во гра́дѣ се́мъ и напо́лнисте пути́ єго́ я́звенныхъ.
|
|
|
7
|
|
|
Того́ ра́ди та́ко глаго́летъ Адонаі́ Госпо́дь: мертвецы́ ва́ши, я́же изби́сте средѣ́ єго́, ті́и су́ть мяса́, а се́й коно́бъ є́сть, и ва́съ изведу́ от среды́ єго́.
|
|
|
8
|
|
|
Меча́ боите́ся, и ме́чь наведу́ на ва́съ, глаго́летъ Адонаі́ Госпо́дь:
|
|
|
9
|
|
|
и изведу́ ва́съ от среды́ єго́ и преда́мъ ва́съ въ ру́цѣ чужди́хъ и сотворю́ въ ва́съ су́дъ:
|
|
|
10
|
|
|
мече́мъ паде́те, на гора́хъ Ізра́илевыхъ сужду́ ва́мъ, и увѣ́сте, я́ко а́зъ Госпо́дь:
|
|
|
11
|
|
|
то́й не бу́детъ ва́мъ въ коно́бъ, и вы́ не бу́дете посредѣ́ єго́ въ мяса́: на гора́хъ Ізра́илевыхъ сужду́ ва́мъ,
|
|
|
12
|
|
|
и увѣ́сте, я́ко а́зъ Госпо́дь, я́ко по за́повѣдемъ мои́мъ не ходи́сте и судо́въ мои́хъ не сотвори́сте, но по обы́чаємъ язы́ковъ су́щихъ о́крестъ ва́съ сотвори́сте.
|
|
|
13
|
|
|
И бы́сть внегда́ прорица́ти ми́, и Фалті́а сы́нъ ване́овъ у́мре: и падо́хъ ни́цъ и возопи́хъ гла́сомъ вели́кимъ, глаго́ля: го́ре мнѣ́, лю́тѣ мнѣ́, Адонаю́ Го́споди! на сконча́ніє ли твори́ши ты́ оста́нки Ізра́илевы?
|
|
|
14
|
|
|
И бы́сть сло́во Госпо́дне ко мнѣ́ глаго́ля:
|
|
|
15
|
|
|
сы́не человѣ́чь, бра́тія твоя́ и му́жіє плѣ́на твоєго́ и ве́сь до́мъ Ізра́илевъ сконча́ся, и́мже реко́ша живу́щіи во Ієрусали́мѣ: дале́че удали́теся от Го́спода, на́мъ дана́ є́сть земля́ въ наслѣ́діє.
|
|
|
16
|
|
|
Сего́ ра́ди реко́хъ: сія́ глаго́летъ Адонаі́ Госпо́дь: я́ко отри́ну я́ во язы́ки и разсѣ́ю я́ по все́й земли́, и бу́ду и́мъ во освяще́ніє ма́ло во страна́хъ, а́може вни́дутъ та́мо.
|
|
|
17
|
|
|
Сего́ ра́ди рцы́: сія́ глаго́летъ Адонаі́ Госпо́дь: и пріиму́ я́ от язы́къ и соберу́ я́ от стра́нъ, идѣ́же разсѣ́яхъ я́ въ ни́хъ, и да́мъ и́мъ зе́млю Ізра́илеву:
|
|
|
18
|
|
|
и вни́дутъ та́мо и отве́ргутъ вся́ ме́рзости єя́ и вся́ беззако́нія єя́ от нея́:
|
|
|
19
|
|
|
и да́мъ и́мъ се́рдце и́но и ду́хъ но́въ да́мъ и́мъ, и исто́ргну ка́менноє се́рдце от пло́ти и́хъ и да́мъ и́мъ се́рдце пло́тяно,
|
|
|
20
|
|
|
я́ко да въ за́повѣдехъ мои́хъ хо́дятъ и оправда́нія моя́ сохраня́тъ и сотворя́тъ я́: и бу́дутъ ми́ въ лю́ди, и а́зъ и́мъ бу́ду въ Бо́га.
|
|
|
21
|
|
|
А и́хже се́рдце по гну́сностемъ и́хъ и по беззако́ніємъ и́хъ хо́дитъ, пути́ тѣ́хъ на главы́ и́хъ положу́, глаго́летъ Адонаі́ Госпо́дь.
|
|
|
22
|
|
|
И воздвиго́ша херуві́ми кри́ла своя́, и коле́са держа́щаяся и́хъ: сла́ва же Бо́га Ізра́илева бѣ́ на ни́хъ свы́ше и́хъ.
|
|
|
23
|
|
|
И взы́де сла́ва Госпо́дня от среды́ гра́да и ста́ на горѣ́, я́же бя́ше пря́мо гра́да на восто́къ.
|
|
|
24
|
|
|
И ду́хъ взя́ мя́ и принесе́ мя́ на зе́млю Халде́йску въ плѣ́нники, въ видѣ́ніи, Ду́хомъ Бо́жіимъ.
|
|
|
25
|
|
|
И взыдо́хъ от видѣ́нія, є́же ви́дѣхъ, и глаго́лахъ ко плѣ́нникомъ вся́ словеса́ Госпо́дня, я́же показа́ мнѣ́.
|
|
|
Глава 12
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, посредѣ́ непра́вдъ и́хъ ты́ живе́ши, и́же о́чи и́мутъ ви́дѣти, и не ви́дятъ, и у́шы и́мутъ є́же слы́шати, и не слы́шатъ, зане́ до́мъ преогорчева́яй є́сть.
|
|
|
3
|
|
|
И ты́, сы́не человѣ́чь, сотвори́ себѣ́ сосу́ды плѣ́ннически, и плѣне́нъ бу́ди дне́мъ предъ ни́ми, и преселе́нъ бу́ди от мѣ́ста твоєго́ на мѣ́сто друго́є предъ ни́ми, я́ко да ви́дятъ, зане́ до́мъ прогнѣвля́яй є́сть.
|
|
|
4
|
|
|
И да изнесе́ши сосу́ды твоя́, я́ко сосу́дъ плѣ́нническій, дне́мъ предъ очи́ма и́хъ: ты́ же изы́деши въ ве́черъ предъ ни́ми, я́коже исхо́дитъ плѣ́нникъ.
|
|
|
5
|
|
|
Прокопа́й себѣ́ стѣ́ну, и да изы́деши сквозѣ́ ю́ предъ ни́ми.
|
|
|
6
|
|
|
На ра́менѣхъ взя́тъ бу́деши и покрове́нъ изы́деши, лице́ твоє́ покры́єши, и да не ви́диши земли́, поне́же чу́до тя́ да́хъ до́му Ізра́илеву.
|
|
|
7
|
|
|
И сотвори́хъ та́ко все́, єли́ко ми́ заповѣ́да Госпо́дь: и сосу́ды изнесо́хъ я́ко сосу́ды плѣ́нничы дне́мъ, и въ ве́черъ прокопа́хъ себѣ́ стѣ́ну руко́ю, и о́тай изыдо́хъ, и на ра́мена взя́тъ бы́хъ предъ ни́ми.
|
|
|
8
|
|
|
И бы́сть сло́во Госпо́дне зау́тра ко мнѣ́ глаго́ля:
|
|
|
9
|
|
|
сы́не человѣ́чь, не рѣ́ша ли къ тебѣ́ до́мъ Ізра́илевъ, до́мъ прогнѣвля́яй: что́ ты твори́ши?
|
|
|
10
|
|
|
Рцы́ къ ни́мъ: та́ко глаго́летъ Госпо́дь Бо́гъ: ко кня́зю и старѣ́йшинамъ Ієрусали́млимъ, и всему́ до́му Ізра́илеву, и́же су́ть средѣ́ и́хъ,
|
|
|
11
|
|
|
рцы́, я́ко а́зъ чудеса́ творю́, я́коже сотвори́хъ, си́це и́мъ бу́детъ: во преселе́ніи и во плѣне́ніи изы́дутъ.
|
|
|
12
|
|
|
И кня́зь средѣ́ и́хъ на ра́мена взя́тъ бу́детъ, и о́тай изы́детъ сквозѣ́ стѣ́ну, и прокопа́єтъ, є́же єму́ изы́ти сквозѣ́ ю́, лице́ своє́ покры́єтъ, да не ви́димь бу́детъ очесы́, и са́мъ земли́ не у́зритъ.
|
|
|
13
|
|
|
И простру́ мре́жу мою́ на́нь, и я́тъ бу́детъ во одержа́ніи моє́мъ, и введу́ єго́ въ Вавило́нъ въ зе́млю Халде́йску, и не у́зритъ єя́, и та́мо сконча́єтся.
|
|
|
14
|
|
|
И вся́, и́же о́крестъ єго́, помо́щники єго́, и вся́ заступа́ющыя єго́ разсѣ́ю по всѣ́мъ вѣ́тромъ, и ме́чь излію́ вслѣ́дъ и́хъ:
|
|
|
15
|
|
|
и увѣ́дятъ, я́ко а́зъ Госпо́дь, и єгда́ разсы́плю я́ во язы́ки и разсѣ́ю я́ по страна́мъ:
|
|
|
16
|
|
|
и оста́влю от ни́хъ му́жы въ число́ от меча́ и от гла́да и от сме́рти, я́ко да повѣ́дятъ вся́ беззако́нія и́хъ во язы́цѣхъ, а́може вни́дутъ: и увѣ́дятъ, я́ко а́зъ Госпо́дь.
|
|
|
17
|
|
|
И бы́сть сло́во Госпо́дне ко мнѣ́ глаго́ля:
|
|
|
18
|
|
|
сы́не человѣ́чь, хлѣ́бъ тво́й съ болѣ́знію снѣ́си и во́ду твою́ со страда́ніємъ и ско́рбію испіє́ши.
|
|
|
19
|
|
|
И рече́ши къ лю́демъ земли́: сія́ глаго́летъ Адонаі́ Госпо́дь живу́щымъ во Ієрусали́мѣ на земли́ Ізра́илевѣ: хлѣ́бы своя́ съ недоста́ткомъ снѣдя́тъ и во́ду свою́ съ па́губою испію́тъ: я́ко да поги́бнетъ земля́ со исполне́ніємъ свои́мъ, въ нече́стіи бо вси́ живу́щіи въ не́й.
|
|
|
20
|
|
|
И гра́ди и́хъ населе́нніи опустѣ́ютъ, и земля́ и́хъ въ поги́бель бу́детъ, и увѣ́сте, я́ко а́зъ Госпо́дь.
|
|
|
21
|
|
|
И бы́сть сло́во Госпо́дне ко мнѣ́ глаго́ля:
|
|
|
22
|
|
|
сы́не человѣ́чь, ка́я при́тча сія́ ва́мъ на земли́ Ізра́илевѣ, глаго́лющымъ: до́лги дни́, поги́бе вся́коє видѣ́ніє?
|
|
|
23
|
|
|
Сего́ ра́ди рцы́ къ ни́мъ: та́ко глаго́летъ Адонаі́ Госпо́дь: отвращу́ при́тчу сію́, и пото́мъ не реку́тъ при́тчи тоя́ до́мъ Ізра́илевъ, я́ко рече́ши къ ни́мъ: прибли́жишася дні́є и сло́во вся́каго видѣ́нія.
|
|
|
24
|
|
|
Зане́ не бу́детъ ктому́ вся́коє видѣ́ніє ло́жноє, и волхву́яй уго́дная средѣ́ сыно́въ Ізра́илевыхъ.
|
|
|
25
|
|
|
Я́ко а́зъ Госпо́дь возглаго́лю словеса́ моя́, возглаго́лю и сотворю́ и не продолжу́ ктому́: во дни́ ва́шя, до́ме прогнѣ́ваяй, реку́ сло́во и сотворю́, глаго́летъ Адонаі́ Госпо́дь.
|
|
|
26
|
|
|
И бы́сть сло́во Госпо́дне ко мнѣ́ глаго́ля:
|
|
|
27
|
|
|
сы́не человѣ́чь, се́, до́мъ Ізра́илевъ преогорчева́яй глаго́люще глаго́лютъ: видѣ́ніє, є́же се́й ви́дитъ, на дни́ мно́ги, и на времена́ до́лга се́й прорица́єтъ.
|
|
|
28
|
|
|
Сего́ ра́ди рцы́ къ ни́мъ: сія́ глаго́летъ Госпо́дь Бо́гъ: не продолжа́тся ктому́ вся́ словеса́ моя́, я́же возглаго́лю: я́ко возглаго́лю сло́во и сотворю́, глаго́летъ Адонаі́ Госпо́дь.
|
|
|
Глава 13
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, прорцы́ на проро́ки Ізра́илевы прорица́ющыя и рече́ши проро́комъ прорица́ющымъ от се́рдца своєго́, и прорцы́ и рече́ши къ ни́мъ: слы́шите сло́во Госпо́дне,
|
|
|
3
|
|
|
сія́ глаго́летъ Адонаі́ Госпо́дь: лю́тѣ прорица́ющымъ от се́рдца своєго́, ходя́щымъ вслѣ́дъ ду́ха своєго́, а отню́дъ не ви́дящымъ.
|
|
|
4
|
|
|
Я́коже лиси́цы въ пусты́ни, [та́ко] проро́цы твои́ [бы́ша], Ізра́илю!
|
|
|
5
|
|
|
Не ста́ша на тве́рди и собра́ша стада́ къ до́му Ізра́илеву: не воста́ша глаго́лющіи въ де́нь Госпо́день,
|
|
|
6
|
|
|
ви́дящіи ло́жная и волхву́ющіи су́єтная, глаго́люще, та́ко глаго́летъ Госпо́дь, Госпо́дь же не посла́ и́хъ, и нача́ша возставля́ти сло́во.
|
|
|
7
|
|
|
Не ло́жноє ли у́бо видѣ́ніє ви́дѣсте и волхвова́нія су́єтная реко́сте? глаго́лете, рече́ Госпо́дь: а́зъ же не глаго́лахъ.
|
|
|
8
|
|
|
Сего́ ра́ди рцы́: сія́ глаго́летъ Адонаі́ Госпо́дь: поне́же словеса́ ва́ша лжи́ва и волхвова́нія ва́ша су́єтна, того́ ра́ди, се́, а́зъ на вы́, глаго́летъ Адонаі́ Госпо́дь,
|
|
|
9
|
|
|
и простру́ ру́ку мою́ на проро́ки ви́дящыя лжу́ и провѣщава́ющыя су́єтная: въ наказа́ніи люді́й мои́хъ не бу́дутъ, и въ писа́ніи до́му Ізра́илева не впи́шутся, и въ зе́млю Ізра́илеву не вни́дутъ, и увѣ́дятъ, я́ко а́зъ Адонаі́ Госпо́дь.
|
|
|
10
|
|
|
Поне́же прельсти́ша люді́й мои́хъ, глаго́люще: ми́ръ, ми́ръ: и не бя́ше ми́ра: и се́й согражда́єтъ стѣ́ну, а они́ помазу́ютъ ю́, паде́тся.
|
|
|
11
|
|
|
Глаго́ли къ помазу́ющымъ ю́: паде́тся, и бу́детъ ту́ча потопля́ющая, и да́мъ ка́меніє стрѣ́льноє въ сву́зы и́хъ, и паду́тся, и вѣ́тръ воздви́жущь разме́щетъ, и разся́дется.
|
|
|
12
|
|
|
И се́, паде́ся стѣна́, и не реку́тъ ли къ ва́мъ: гдѣ́ є́сть пома́заніє ва́ше, и́мже пома́засте?
|
|
|
13
|
|
|
Того́ ра́ди сія́ глаго́летъ Адонаі́ Госпо́дь: и наве́ргу бу́рю разоря́ющую со я́ростію, и ту́ча потопля́ющи гнѣ́вомъ мои́мъ бу́детъ, и ка́меніє стрѣ́льноє наведу́ я́ростію во сконча́ніє:
|
|
|
14
|
|
|
и раскопа́ю стѣ́ну, ю́же пома́засте, и паде́тся, и положу́ ю́ на земли́, и откры́ются основа́нія єя́, и паде́тся, и сконча́єтеся со обличе́ніємъ и позна́єте, я́ко а́зъ Госпо́дь:
|
|
|
15
|
|
|
и сконча́ю я́рость мою́ на стѣнѣ́ и на помазу́ющихъ ю́, и паде́тъ. И реко́хъ къ ва́мъ: нѣ́сть стѣны́, ни помазу́ющихъ єя́,
|
|
|
16
|
|
|
проро́цы Ізра́илевы, прорица́ющіи на Ієрусали́мъ и ви́дящіи єму́ ми́ръ, и нѣ́сть ми́ра, глаго́летъ Адонаі́ Госпо́дь.
|
|
|
17
|
|
|
И ты́, сы́не человѣ́чь, утверди́ лице́ твоє́ на дще́ри люді́й твои́хъ, на прорица́ющыя от се́рдца своєго́, и прорцы́ на ни́хъ,
|
|
|
18
|
|
|
и рече́ши: сія́ глаго́летъ Адонаі́ Госпо́дь: го́ре сшива́ющымъ возгла́війцы подъ вся́кій ла́коть руки́ и сотворя́ющымъ покрыва́ла надъ вся́кую главу́ вся́каго во́зраста, є́же разврати́ти ду́шы: ду́ши разврати́шася люді́й мои́хъ, и ду́шъ снабдѣва́ху:
|
|
|
19
|
|
|
и осквернавля́ху мя́ у люді́й мои́хъ, го́рсти ра́ди ячме́не и ра́ди укру́ха хлѣ́ба, є́же изби́ти ду́шы, и́мже не подоба́ше умре́ти, и оживи́ти ду́шы, и́мже не подоба́ше жи́ти, провѣща́юще лю́демъ мои́мъ, послу́шающымъ лжи́выхъ провѣща́ній.
|
|
|
20
|
|
|
Сего́ ра́ди сія́ глаго́летъ Госпо́дь: се́, а́зъ на возгла́вія ва́ша, и́миже вы́ развраща́єте ду́шы та́мо: и отто́ргну я́ от мы́шцей ва́шихъ, и послю́ ду́шы, я́же вы́ развраща́сте ду́шы и́хъ на разсы́паніє,
|
|
|
21
|
|
|
и растерза́ю покрыва́ла ва́ша, и отиму́ лю́ди моя́ от руки́ ва́шея, и ктому́ не бу́дутъ въ рука́хъ ва́шихъ на развраще́ніє, и позна́єте, я́ко а́зъ Госпо́дь:
|
|
|
22
|
|
|
поне́же развраща́сте се́рдце пра́веднаго непра́ведно, а́зъ же не развраща́хъ єго́, и укрѣпля́сте ру́цѣ беззако́ннику, є́же отню́дъ не обрати́тися єму́ от пути́ єго́ зла́го и жи́ву бы́ти єму́,
|
|
|
23
|
|
|
сего́ ра́ди не у́зрите лжи́, и волхвова́нія ктому́ не и́мате волхвова́ти: и изба́влю лю́ди моя́ от ру́къ ва́шихъ, и увѣ́сте, я́ко а́зъ Госпо́дь.
|
|
|
Глава 14
|
|
|
1
|
|
|
И пріидо́ша ко мнѣ́ му́жіє от ста́рецъ Ізра́илевыхъ и сѣдо́ша предо мно́ю.
|
|
|
2
|
|
|
И бы́сть сло́во Госпо́дне ко мнѣ́ глаго́ля:
|
|
|
3
|
|
|
сы́не человѣ́чь, му́жіє сі́и положи́ша помышле́нія своя́ на сердца́хъ свои́хъ и муче́ніє непра́вдъ свои́хъ поста́виша предъ лице́мъ свои́мъ: а́ще отвѣща́яй отвѣща́ю и́мъ?
|
|
|
4
|
|
|
Сего́ ра́ди глаго́ли къ ни́мъ и рече́ши и́мъ: сія́ глаго́летъ Адонаі́ Госпо́дь: человѣ́къ человѣ́къ от до́му Ізра́илева, и́же а́ще положи́тъ мы́сли своя́ въ се́рдцы своє́мъ и муче́ніє непра́вды своєя́ учини́тъ предъ лице́мъ свои́мъ и пріи́детъ ко проро́ку, а́зъ Госпо́дь отвѣща́ю єму́ о си́хъ, и́миже держи́тся мы́сль єго́:
|
|
|
5
|
|
|
я́ко да уклоня́тъ до́мъ Ізра́илевъ сердца́мъ и́хъ удале́нымъ от мене́ помышле́ньми и́хъ.
|
|
|
6
|
|
|
Сего́ ра́ди рцы́ до́му Ізра́илеву: сія́ глаго́летъ Госпо́дь Бо́гъ: обрати́теся и отврати́теся от начина́ній ва́шихъ и от всѣ́хъ нече́стій ва́шихъ, и обрати́те ли́ца ва́ша ко мнѣ́:
|
|
|
7
|
|
|
зане́ человѣ́къ человѣ́къ от до́му Ізра́илева и от прише́лцевъ прише́дшихъ ко Ізра́илеви, и́же а́ще удали́тся от мене́ и положи́тъ мы́сли своя́ на се́рдцы своє́мъ и муче́ніє непра́вды своєя́ учини́тъ предъ лице́мъ свои́мъ и пріи́детъ ко проро́ку є́же вопроси́ти єму́ мене́, а́зъ Госпо́дь отвѣща́ю єму́, въ не́мже держи́тся о́нъ,
|
|
|
8
|
|
|
и утвержу́ лице́ моє́ на человѣ́ка того́ и положу́ єго́ въ поги́бель и въ потребле́ніє и изве́ргу єго́ от среды́ люді́й мои́хъ, и увѣ́сте, я́ко а́зъ Госпо́дь.
|
|
|
9
|
|
|
И проро́къ а́ще прельсти́тся и рече́тъ сло́во, а́зъ Госпо́дь прельсти́хъ проро́ка того́, и простру́ ру́ку мою́ на́нь и потреблю́ єго́ от среды́ люді́й Ізра́илевыхъ.
|
|
|
10
|
|
|
И пріи́мутъ непра́вду свою́ по непра́вдѣ вопроша́ющаго, и по непра́вдѣ та́кожде проро́ку бу́детъ,
|
|
|
11
|
|
|
я́ко да не прельща́єтся ктому́ до́мъ Ізра́илевъ от мене́, и да не оскверня́ются ктому́ во всѣ́хъ грѣсѣ́хъ свои́хъ, и бу́дутъ ми́ въ лю́ди, а́зъ же бу́ду и́мъ въ Бо́га, глаго́летъ Адонаі́ Госпо́дь.
|
|
|
12
|
|
|
И бы́сть сло́во Госпо́дне ко мнѣ́ глаго́ля:
|
|
|
13
|
|
|
сы́не человѣ́чь, земля́ а́ще согрѣши́тъ ми́, є́же па́стися грѣхо́мъ, простру́ ру́ку мою́ на ню́ и сотру́ утвержде́ніє хлѣ́бноє и пущу́ на ню́ гла́дъ и возму́ съ нея́ человѣ́ки и скоты́,
|
|
|
14
|
|
|
и а́ще бу́дутъ сі́и тріє́ му́жіє средѣ́ єя́, Но́є и даніи́лъ и і́овъ, ті́и во пра́вдѣ своє́й спасу́тся, глаго́летъ Адонаі́ Госпо́дь:
|
|
|
15
|
|
|
а́ще и звѣ́ри злы́я напущу́ на зе́млю и уму́чу ю́, и бу́детъ въ па́губу, и не бу́детъ проходя́щаго сквозѣ́ ю́ от лица́ звѣре́й,
|
|
|
16
|
|
|
и а́ще бу́дутъ тріє́ сі́и му́жіє средѣ́ єя́, живу́ а́зъ, глаго́летъ Адонаі́ Госпо́дь, ни сы́нове, ни дще́ри и́хъ спасу́тся, но то́кмо сі́и єди́ни спасу́тся, а земля́ въ потребле́ніє бу́детъ:
|
|
|
17
|
|
|
а́ще же наведу́ на ту́ зе́млю ме́чь и реку́: ме́чь да про́йдетъ зе́млю, и возму́ от нея́ человѣ́ка и скота́,
|
|
|
18
|
|
|
и тріє́ му́жіє сі́и бу́дутъ средѣ́ єя́, живу́ а́зъ, глаго́летъ Адонаі́ Госпо́дь, не изба́вятъ ни сыно́въ, ни дще́рей свои́хъ, но ті́и єди́ни спасу́тся:
|
|
|
19
|
|
|
а́ще же и сме́рть пущу́ на зе́млю о́ну и излію́ я́рость мою́ на ню́ въ кро́ви, є́же потреби́ти от нея́ человѣ́ки и скоты́,
|
|
|
20
|
|
|
Но́є же и даніи́лъ и і́овъ бу́дутъ посредѣ́ єя́, живу́ а́зъ, глаго́летъ Адонаі́ Госпо́дь, ни сы́нове, ни дще́ри не оста́нутъ и́мъ, ті́и же во пра́вдѣ своє́й спасу́тся и изба́вятъ ду́шы своя́.
|
|
|
21
|
|
|
Сія́ глаго́летъ Адонаі́ Госпо́дь: а́ще же и четы́ри ме́сти моя́ лю́тыя пущу́ на Ієрусали́ма, ме́чь и гла́дъ, и звѣ́ри лю́ты и сме́рть, є́же потреби́ти от него́ человѣ́ки и скоты́,
|
|
|
22
|
|
|
и се́, оста́влени въ не́мъ спасе́нніи от него́, сі́и изведу́тъ сы́ны и дще́ри: се́, ті́и изы́дутъ къ ва́мъ, и у́зрите пути́ и́хъ и помышле́нія и́хъ, и раска́єтеся от злы́хъ, я́же наведо́хъ на Ієрусали́мъ, вся́ зла́я, я́же наведо́хъ на́нь,
|
|
|
23
|
|
|
и утѣ́шатъ ва́съ: поне́же у́зрите пути́ и́хъ и умышле́нія и́хъ, и уразумѣ́єте, я́ко не всу́є сотвори́лъ є́смь вся́, єли́ка сотвори́хъ въ не́мъ, глаго́летъ Адонаі́ Госпо́дь.
|
|
|
Глава 15
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, что́ бы́ло бы дре́во ло́зноє от всѣ́хъ древе́съ гро́здныхъ, су́щихъ во древесѣ́хъ дубра́вныхъ?
|
|
|
3
|
|
|
А́ще во́змутъ от него́ дре́во, є́же сотвори́ти дѣ́ло? и а́ще во́змутъ ко́лъ от него́, є́же обѣ́сити на не́мъ кі́й либо сосу́дъ?
|
|
|
4
|
|
|
Ра́звѣ є́же огне́ви преда́стся на потребле́ніє, лѣ́тнеє очище́ніє єго́ потребля́єтъ о́гнь, и исчеза́єтъ до конца́: єда́ потре́бно бу́детъ на дѣ́ло?
|
|
|
5
|
|
|
И єще́ цѣ́лу єму́ су́щу не бу́детъ на дѣ́ло, кольми́ па́че а́ще о́гнь є́ попали́тъ до конца́, бу́детъ ли на дѣ́ло пото́мъ?
|
|
|
6
|
|
|
Сего́ ра́ди рцы́: си́це глаго́летъ Госпо́дь Бо́гъ: я́коже лоза́ віногра́дная во дре́вѣхъ дубра́вныхъ, ю́же да́хъ на потребле́ніє огне́ви, та́ко да́мъ живу́щыя во Ієрусали́мѣ:
|
|
|
7
|
|
|
и да́мъ лице́ моє́ на ня́, от огня́ изы́дутъ, и о́гнь поя́стъ я́: и увѣ́дятъ, я́ко а́зъ Госпо́дь, єгда́ утвержду́ лице́ моє́ на ни́хъ:
|
|
|
8
|
|
|
и да́мъ зе́млю въ па́губу, зане́ впадо́ша въ грѣ́хъ, глаго́летъ Адонаі́ Госпо́дь.
|
|
|
Глава 16
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, засвидѣ́телствуй Ієрусали́му беззако́нія єго́
|
|
|
3
|
|
|
и рече́ши: сія́ глаго́летъ Адонаі́ Госпо́дь дще́ри Ієрусали́мстѣй: ко́рень тво́й и бытіє́ твоє́ от земли́ Ханане́йски: оте́цъ тво́й Аморре́анинъ и ма́ти твоя́ Хетте́аныня:
|
|
|
4
|
|
|
и рожде́ніє твоє́, въ о́ньже де́нь роди́лася єси́, не обяза́ша сосе́цъ твои́хъ {Євр.: не отрѣ́заша ти́ пу́па.}, и водо́ю не омы́ша тя́ на спасе́ніє, ни со́лію осоли́ша, ниже́ пелена́ми пови́ша:
|
|
|
5
|
|
|
и не пощадѣ́ тебе́ о́ко моє́, є́же сотвори́ти тебѣ́ єди́но от всѣ́хъ си́хъ, пострада́ти что́ о тебѣ́, и отве́ржена была́ єси́ на лице́ по́ля стро́потствомъ души́ твоєя́, въ де́нь въ о́ньже роди́лася єси́.
|
|
|
6
|
|
|
И проидо́хъ сквозѣ́ тя и ви́дѣхъ тя́ смѣ́шену во кро́ви твоє́й и реко́хъ ти́: от кро́ве твоєя́ жива́ бу́ди: и реко́хъ тебѣ́: во кро́ви твоє́й живо́тъ тво́й:
|
|
|
7
|
|
|
умножа́йся, я́коже прозябе́ніє се́лноє да́хъ тя́, и умно́жилася єси́ и возвели́чилася и вошла́ єси́ во гра́ды градо́въ: сосцы́ твои́ возрасто́ша, и вла́си твои́ просвѣтлѣ́ша, ты́ же была́ єси́ нага́ и безъ красы́.
|
|
|
8
|
|
|
И проидо́хъ сквозѣ́ тя и ви́дѣхъ тя́: и се́, вре́мя твоє́, я́ко вре́мя вита́ющихъ: и простро́хъ крилѣ́ мои́ на тя́ и прикры́хъ сту́дъ тво́й, и кля́хся тебѣ́ и внидо́хъ въ завѣ́тъ съ тобо́ю, глаго́летъ Адонаі́ Госпо́дь, и была́ єси́ мнѣ́:
|
|
|
9
|
|
|
и омы́хъ тя́ водо́ю и ополоска́хъ кро́вь твою́ от тебе́ и пома́захъ тя́ єле́ємъ,
|
|
|
10
|
|
|
и облеко́хъ тя́ въ пестроты́ и обу́хъ тя́ въ червле́ны, и препоя́сахъ тя́ виссо́номъ и возложи́хъ на тя́ тріха́птонъ,
|
|
|
11
|
|
|
и украси́хъ тя́ у́тварію и возложи́хъ запя́стіє на ру́цѣ твои́ и гри́вну на вы́ю твою́,
|
|
|
12
|
|
|
и да́хъ усеря́зи на но́здри твоя́ и ко́лца во у́шы твои́ и вѣне́цъ хвалы́ на главу́ твою́:
|
|
|
13
|
|
|
и украше́нна была́ єси́ зла́томъ и сребро́мъ, и оде́жды твоя́ виссо́нны и тріха́пты и испещре́нія, семіда́лъ и ме́дъ и ма́сло я́ла єси́, и была́ єси́ добра́ зѣло́ зѣло́, и упра́вилася єси́ на ца́рство:
|
|
|
14
|
|
|
и изы́де и́мя твоє́ во язы́ки въ добро́тѣ твоє́й, зане́ соверше́нно бѣ́ лѣ́потою въ красотѣ́, ю́же учини́хъ на тебѣ́, глаго́летъ Адонаі́ Госпо́дь.
|
|
|
15
|
|
|
Ты́ же упова́ла єси́ на добро́ту твою́ и соблуди́ла єси́ во и́мени твоє́мъ и излія́ла єси́ блуже́ніє твоє́ на вся́каго мимоходя́щаго, тому́ была́ єси́, єму́же не подоба́ше:
|
|
|
16
|
|
|
и взяла́ єси́ от ри́зъ твои́хъ и сотвори́ла себѣ́ кумі́ры сошве́ныя и соблуди́ла єси́ съ ни́ми, и не вни́деши, и не бу́детъ.
|
|
|
17
|
|
|
И взяла́ єси́ сосу́ды хвалы́ твоєя́ от сребра́ моєго́ и зла́та моєго́, от ни́хже да́хъ тебѣ́, и сотвори́ла себѣ́ о́бразы му́жески, и соблуди́ла єси́ въ ни́хъ.
|
|
|
18
|
|
|
И взяла́ єси́ ри́зы своя́ испещре́нныя и одѣ́ялася єси́ въ ня́, и ма́сло моє́ и ѳиміа́мъ мо́й положи́ла єси́ предъ лице́мъ и́хъ,
|
|
|
19
|
|
|
и хлѣ́бы моя́, я́же да́хъ тебѣ́, семіда́ломъ и ма́сломъ и ме́домъ напита́хъ тя́, и положи́ла єси́ та́ предъ лице́мъ и́хъ въ воню́ благоуха́нія. И бы́сть по си́хъ, глаго́летъ Адонаі́ Госпо́дь,
|
|
|
20
|
|
|
и взяла́ єси́ сы́ны твоя́ и дще́ри твоя́, я́же родила́ єси́, и закла́ла єси́ и́мъ въ потребле́ніє. Єда́ ма́ло соблуди́ла єси́?
|
|
|
21
|
|
|
И закла́ла єси́ ча́да твоя́ и дала́ єси́ я́, внегда́ принесла́ єси́ и́хъ на же́ртву и́мъ.
|
|
|
22
|
|
|
Сіє́ па́че вся́каго блуда́ твоєго́ и гну́сностей твои́хъ: и не помяну́ла єси́ дні́й младе́нства твоєго́, єгда́ была́ єси́ нага́ и безобра́зна, и смѣ́шена во кро́ви твоє́й жила́ єси́.
|
|
|
23
|
|
|
И бы́сть по всѣ́хъ зло́бахъ твои́хъ, го́ре го́ре тебѣ́, глаго́летъ Адонаі́ Госпо́дь,
|
|
|
24
|
|
|
и создала́ єси́ себѣ́ хра́мъ блудни́ческій и сотвори́ла себѣ́ полага́нія на всѣ́хъ сто́гнахъ:
|
|
|
25
|
|
|
и въ нача́лѣ вся́каго пути́ создала́ єси́ блуди́лища своя́ и растли́ла добро́ту твою́, и разложи́ла го́лени твоя́ вся́кому мимоходя́щему и умно́жила єси́ блу́дъ тво́й:
|
|
|
26
|
|
|
и соблуди́ла съ сынми́ Єги́петскими сосѣ́ды твои́ми дебелопло́тными, и мно́гажды блуди́ла єси́, є́же разгнѣ́вати мя́.
|
|
|
27
|
|
|
И се́, простру́ ру́ку мою́ на тя́ и отве́ргу зако́ны твоя́ и преда́мъ тя́ душа́мъ ненави́дящымъ тебе́, дще́ремъ иноплеме́нниковъ, совраща́ющымъ тя́ съ пути́ твоєго́, и́мже нече́ствовала єси́.
|
|
|
28
|
|
|
И соблуди́ла єси́ съ сынми́ Асси́ровыми и ниже́ та́ко насы́тилася єси́: и соблуди́ла и не насы́тилася,
|
|
|
29
|
|
|
и умно́жила завѣ́ты твоя́ ко земли́ Ханане́йстѣй, Халде́йстѣй, и ниже́ въ си́хъ насы́тилася єси́.
|
|
|
30
|
|
|
Что́ сотворю́ се́рдцу твоєму́, глаго́летъ Адонаі́ Госпо́дь, внегда́ твори́ши вся́ сія́ дѣла́ жены́ блудни́цы проде́рзыя? И соблуди́ла єси́ трегу́бо во дще́рехъ твои́хъ.
|
|
|
31
|
|
|
Єгда́ согради́ла єси́ блуди́лище твоє́ въ нача́лѣ вся́каго пути́ и высо́кая твоя́ сотвори́ла єси́ на всѣ́хъ сто́гнахъ, и не была́ я́ко блудни́ца собира́ющая нає́мъ.
|
|
|
32
|
|
|
Жена́ любодѣ́йница подо́бна тебѣ́, от му́жа своєго́ взе́млющи нає́мъ,
|
|
|
33
|
|
|
всѣ́мъ блуди́вшымъ съ не́ю дая́ше нає́мъ: и ты́ дала́ єси́ нає́мъ всѣ́мъ рачи́телемъ твои́мъ и обременя́ла и́хъ, є́же приходи́ти и́мъ къ тебѣ́ отвсю́ду во блуже́нія твоя́.
|
|
|
34
|
|
|
И бы́сть въ тебѣ́ сопроти́вно обы́чаю же́нску во блуже́ніи твоє́мъ, и съ тобо́ю соблуди́вшымъ, вмѣ́сто є́же бы да́ти тебѣ́ нає́мъ, и нає́мъ не даде́ся тебѣ́, и бы́сть въ тебѣ́ сопроти́вно.
|
|
|
35
|
|
|
Сего́ ра́ди слы́ши, блудни́це, сло́во Госпо́дне.
|
|
|
36
|
|
|
Сія́ глаго́летъ Адонаі́ Госпо́дь: зане́ излія́ла єси́ мѣ́дь твою́, и откры́єтся сра́мъ тво́й во блуже́ніи твоє́мъ ко рачи́телемъ твои́мъ, и во вся́ помышле́нія беззако́ній твои́хъ, и во кро́ви ча́дъ твои́хъ, я́же дала́ єси́ и́мъ:
|
|
|
37
|
|
|
сего́ ра́ди, се́, а́зъ на тя́ соберу́ вся́ похотники́ твоя́, съ ни́миже смѣси́лася єси́, и всѣ́хъ, и́хже люби́ла єси́, со всѣ́ми, и́хже ненави́дѣла єси́: и соберу́ я́ на тя́ отвсю́ду и откры́ю зло́бы твоя́ къ ни́мъ, и у́зрятъ ве́сь сра́мъ тво́й.
|
|
|
38
|
|
|
И отмщу́ ти отмще́ніємъ любодѣ́йцы и пролива́ющія кро́вь, и положу́ тя во кро́ви я́рости и рве́нія,
|
|
|
39
|
|
|
и преда́мъ тя́ въ ру́цѣ и́хъ, и раскопа́ютъ блуди́лище твоє́ и разоря́тъ высо́кая твоя́, и совлеку́тъ съ тебе́ ри́зы твоя́ и во́змутъ сосу́ды хвалы́ твоєя́, и оста́вятъ тя́ на́гу и безсту́дну:
|
|
|
40
|
|
|
и приведу́тъ на тя́ наро́ды, и побію́тъ тебе́ ка́меніємъ и изсѣку́тъ тя́ мечьми́ свои́ми,
|
|
|
41
|
|
|
и запаля́тъ до́мы твоя́ огне́мъ и сотворя́тъ въ тебѣ́ отмще́ніє предъ жена́ми мно́гими: и обращу́ тя от блуже́нія, и найма́ ктому́ не да́си.
|
|
|
42
|
|
|
И послю́ я́рость мою́ на тя́, и отъи́мется рве́ніє моє́ от тебе́: и почі́ю и ктому́ не попеку́ся.
|
|
|
43
|
|
|
Поне́же не помяну́ла єси́ дні́й младе́нства твоєго́ и опеча́лила мя́ во всѣ́хъ си́хъ: и се́, а́зъ пути́ твоя́ на главу́ твою́ да́хъ, глаго́летъ Адонаі́ Госпо́дь: и та́ко сотвори́ла єси́ нече́стіє по всѣ́мъ беззако́ніємъ твои́мъ.
|
|
|
44
|
|
|
Сія́ су́ть вся́, єли́ка реко́ша на тя́ въ при́тчи, глаго́люще: я́коже ма́ти, та́ко и дще́рь.
|
|
|
45
|
|
|
Дще́рь ма́тере твоєя́ ты́ єси́, отри́нувшая му́жа своєго́ и ча́да своя́: и сестры́ се́стръ твои́хъ, отри́нувшыя муже́й свои́хъ и ча́дъ свои́хъ: ма́ти ва́ша Хетте́аныня, а оте́цъ ва́шъ Аморре́й:
|
|
|
46
|
|
|
сестра́ ва́ша старѣ́йшая самарі́а, та́ и дще́ри єя́ живу́щыя ошу́юю тебе́: и сестра́ твоя́ ме́ншая, живу́щая одесну́ю тебе́, Содо́ма и дще́ри єя́.
|
|
|
47
|
|
|
Но ниже́ по путе́мъ и́хъ ходи́ла єси́, ниже́ сотвори́ла по беззако́ніємъ и́хъ поне́ ма́ло, и превозшла́ єси́ и́хъ во всѣ́хъ путе́хъ твои́хъ.
|
|
|
48
|
|
|
Живу́ а́зъ, глаго́летъ Адонаі́ Госпо́дь, не сотвори́ла Содо́ма сія́ сестра́ твоя́ и дще́ри єя́, я́коже ты́ сотвори́ла и дще́ри твоя́.
|
|
|
49
|
|
|
Оба́че сіє́ беззако́ніє Содо́мы сестры́ твоєя́, го́рдость въ сы́тости хлѣ́ба и во изоби́ліи віна́, и сластолю́бствоваша та́ и дще́ри єя́: сіє́ бя́ше є́й и дще́ремъ єя́: и руки́ убо́гому и ни́щему не подая́ху,
|
|
|
50
|
|
|
и велича́хуся, и сотвори́ша беззако́нія предо мно́ю: и отверго́хъ я́ я́коже ви́дѣхъ.
|
|
|
51
|
|
|
Самарі́а же по́лъ грѣхо́въ твои́хъ не согрѣши́: и умно́жила єси́ беззако́нія твоя́ па́че о́нѣхъ, и оправда́ла єси́ сестры́ твоя́ во всѣ́хъ беззако́ніихъ твои́хъ, я́же сотвори́ла єси́.
|
|
|
52
|
|
|
И ты́ пріими́ муче́ніє твоє́, въ не́мже растли́ла єси́ сестры́ твоя́ во грѣсѣ́хъ твои́хъ, и́миже беззако́нновала па́че тѣ́хъ, и оправда́ла и́хъ па́че тебе́: и ты́ посрами́ся и пріими́ безче́стіє твоє́, внегда́ оправда́ти тебѣ́ сестры́ твоя́.
|
|
|
53
|
|
|
И обращу́ обраще́нія и́хъ, обраще́ніє Содо́мы и дще́рей єя́, и обраще́ніє самарі́и и дщере́й єя́, и обращу́ обраще́ніє твоє́ средѣ́ и́хъ,
|
|
|
54
|
|
|
я́ко да пріи́меши муче́ніє твоє́ и безче́стна бу́деши от всѣ́хъ, я́же сотвори́ла єси́ во разгнѣ́ваніи моє́мъ.
|
|
|
55
|
|
|
И сестра́ твоя́ Содо́ма и дще́ри єя́ возста́вятся, я́коже бѣ́ша испе́рва: и самарі́а и дще́ри єя́ возста́вятся, я́коже бѣ́ша испе́рва: и ты́ и дще́ри твоя́ возста́витеся, я́коже бѣ́сте пре́жде.
|
|
|
56
|
|
|
И не была́ Содо́ма сестра́ твоя́ во слы́шаніє во устѣ́хъ твои́хъ во дне́хъ горды́ни твоєя́,
|
|
|
57
|
|
|
пре́жде открове́нія зло́бъ твои́хъ, я́коже ны́нѣ укори́зна єси́ дще́рей Си́рскихъ и всѣ́хъ су́щихъ о́крестъ єя́ дще́рей иноплеме́нничихъ одержа́щихъ тя́ о́крестъ:
|
|
|
58
|
|
|
нече́стія твоя́ и беззако́нія твоя́ ты́ понесла́ єси́ я́, глаго́летъ Госпо́дь.
|
|
|
59
|
|
|
Сія́ глаго́летъ Адонаі́ Госпо́дь: и сотворю́ въ тебѣ́, я́коже сотвори́ла єси́, я́коже презрѣ́ла єси́ є́же преступи́ти завѣ́тъ мо́й:
|
|
|
60
|
|
|
и воспомяну́ а́зъ завѣ́тъ мо́й, и́же съ тобо́ю во дне́хъ младе́нства твоєго́, и возста́влю тебѣ́ завѣ́тъ вѣ́чный:
|
|
|
61
|
|
|
и помяне́ши пути́ твоя́ и безче́стна бу́деши, внегда́ по́ймеши сестры́ твоя́ старѣ́йшыя со юнѣ́йшими твои́ми, и да́мъ я́ тебѣ́ на созида́ніє, но не от завѣ́та твоєго́:
|
|
|
62
|
|
|
и возста́влю а́зъ завѣ́тъ мо́й съ тобо́ю, и увѣ́си, я́ко а́зъ Госпо́дь:
|
|
|
63
|
|
|
я́ко да помяне́ши и усрами́шися, и не бу́детъ тебѣ́ ктому́ отве́рсти у́стъ твои́хъ от лица́ безче́стія твоєго́, єгда́ ми́лостивъ бу́ду тебѣ́ по всѣ́мъ, єли́ка сотвори́ла єси́, глаго́летъ Адонаі́ Госпо́дь.
|
|
|
Глава 17
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, повѣ́ждь по́вѣсть и рцы́ при́тчу на до́мъ Ізра́илевъ,
|
|
|
3
|
|
|
и рече́ши: сія́ глаго́летъ Адонаі́ Госпо́дь: оре́лъ вели́кій, великокри́лый, до́лгій протяже́ніємъ, испо́лнь ногте́й, и́же и́мать повелѣ́ніє вни́ти въ Ліва́нъ, и взя́ избра́нныя ке́дра,
|
|
|
4
|
|
|
и верхи́ мя́гкости острога́, и принесе́ я́ въ зе́млю Ханане́йску, во гра́дѣ огражде́ннѣмъ положи́ я́:
|
|
|
5
|
|
|
и взя́ от сѣ́мене земна́го и даде́ є́ на по́ли пло́днѣ, [да утверди́тъ коре́ніє] надъ вода́ми мно́гими, ви́дѣно учини́ є́:
|
|
|
6
|
|
|
и прозябе́ и бы́сть въ віногра́дъ не́мощенъ и ма́лъ вели́чествомъ, є́же явля́тися ло́зію єго́ на не́мъ, и коре́ніє єго́ подъ ни́мъ бя́ше: и бы́сть въ віногра́дъ, и сотвори́ ро́зги, и простре́ отра́сли своя́.
|
|
|
7
|
|
|
И бы́сть оре́лъ другі́й вели́къ, великокри́лный, мно́гъ ногтьми́, и се́, віногра́дъ се́й оплета́яся объ не́мъ: и коре́ніє єго́ къ нему́, и ло́зіє своє́ испусти́ єму́, є́же напая́ти себе́ со гру́діємъ са́да своєго́.
|
|
|
8
|
|
|
На по́ли до́брѣ, на водѣ́ мно́зѣ пита́єтся то́й, є́же сотвори́ти прозябе́нія и приноси́ти пло́дъ, є́же бы́ти въ віногра́дъ вели́къ.
|
|
|
9
|
|
|
Сего́ ра́ди рцы́: сія́ глаго́летъ Адонаі́ Госпо́дь: єда́ испра́вится? не коре́ніє ли мягкоты́ єго́ и пло́дъ изгніє́тъ? и и́зсхнутъ вся́ лѣ́торасли єго́, и не мы́шцею ли вели́кою, ни людьми́ мно́гими є́же исто́ргнути єго́ изъ коре́нія єго́?
|
|
|
10
|
|
|
И се́, ты́єтъ: єда́ успѣ́єтъ? не а́біє ли, єгда́ ко́снется єму́ вѣ́тръ зно́йный, посхне́тъ сухото́ю? со гру́діємъ прозябе́нія своєго́ и́зсхнетъ.
|
|
|
11
|
|
|
И бы́сть сло́во Госпо́дне ко мнѣ́ глаго́ля:
|
|
|
12
|
|
|
сы́не человѣ́чь, рцы́ ко до́му прогнѣвля́ющему мя́: не вѣ́сте ли, что́ су́ть сія́? рцы́ и́мъ: се́, гряде́тъ ца́рь Вавило́нскъ на Ієрусали́мъ, и во́зметъ царя́ єго́ и кня́зя єго́, и отведе́тъ я́ къ себѣ́ въ Вавило́нъ:
|
|
|
13
|
|
|
и по́йметъ от пле́мене ца́рска, и завѣща́єтъ съ ни́мъ завѣ́тъ, и введе́тъ єго́ въ кля́твѣ, и старѣ́йшины земли́ во́зметъ,
|
|
|
14
|
|
|
є́же бы́ти въ ца́рство немощно́, є́же весьма́ не возноси́тися, [но] храни́ти завѣ́тъ єго́ и стоя́ти въ не́мъ:
|
|
|
15
|
|
|
и отве́ржется от него́ посыла́я послы́ своя́ во Єги́петъ да́ти єму́ ко́ни и лю́ди мно́ги: єда́ испра́витъ? спасе́тся ли творя́й сопроти́вная? и преступа́яй завѣ́тъ спасе́тся ли?
|
|
|
16
|
|
|
Живу́ а́зъ, глаго́летъ Адонаі́ Госпо́дь, а́ще не на мѣ́стѣ, идѣ́же ца́рь воцари́вый єго́, и́же поху́ли кля́тву мою́ и и́же преступи́ завѣ́тъ мо́й, съ ни́мъ средѣ́ Вавило́на сконча́єтся.
|
|
|
17
|
|
|
И не въ си́лѣ вели́цѣй, ниже́ въ наро́дѣ мно́зѣ сотвори́тъ съ ни́мъ фарао́нъ бра́нь во остро́зѣ и въ согражде́ніи стрѣ́льницъ, є́же изъя́ти ду́шы мно́ги.
|
|
|
18
|
|
|
И поху́ли кля́тву, є́же преступи́ти завѣ́тъ, и се́, даде́ ру́ку свою́ и вся́ сія́ сотвори́ єму́: не спасе́тся.
|
|
|
19
|
|
|
Сего́ ра́ди рцы́: сія́ глаго́летъ Адонаі́ Госпо́дь: живу́ а́зъ, а́ще не кля́тву мою́, ю́же поху́ли, и завѣ́тъ мо́й, єго́же преступи́, да́мъ на главу́ єго́:
|
|
|
20
|
|
|
и простру́ мре́жу мою́ на́нь, и я́тъ бу́детъ во одержа́ніи єя́: и приведу́ єго́ въ Вавило́нъ и разсужду́ся съ ни́мъ та́мо о непра́вдѣ єго́, є́юже непра́вдова ко мнѣ́:
|
|
|
21
|
|
|
и вси́ избѣ́гшіи єго́ и вси́ избра́нніи со всѣ́ми ополче́ніи єго́ мече́мъ паду́тъ, и вся́ оста́вшая и́хъ разсѣ́ю по всему́ вѣ́тру, и увѣ́сте, я́ко а́зъ Госпо́дь глаго́лахъ.
|
|
|
22
|
|
|
Сего́ ра́ди сія́ глаго́летъ Адонаі́ Госпо́дь: и возму́ а́зъ от избра́нныхъ ке́дра высо́каго от верха́ и да́мъ от главы́ отра́слей єго́, сердца́ и́хъ остружу́ и насажду́ а́зъ на горѣ́ высо́цѣ:
|
|
|
23
|
|
|
и повѣ́шу и́ въ горѣ́ высо́цѣ Ізра́илевѣ и насажду́ и́, и прорасти́тъ отра́сль и сотвори́тъ пло́дъ и бу́детъ въ ке́дръ вели́къ: и почі́єтъ подъ ни́мъ вся́къ звѣ́рь, и подъ сѣ́нію єго́ почі́єтъ вся́ка пти́ца, и ло́зіє єго́ па́ки устро́ятся:
|
|
|
24
|
|
|
и увѣ́сть вся́ко дре́во полево́є, я́ко а́зъ Госпо́дь смиря́яй дре́во высо́коє и вознося́й дре́во смире́нноє, и изсуша́яй дре́во зеле́ноє и прораща́яй дре́во сухо́є: а́зъ Госпо́дь глаго́лахъ и сотворю́.
|
|
|
Глава 18
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, что́ ва́мъ при́тча сія́ на земли́ Ізра́илевѣ, глаго́лющымъ: отцы́ ядо́ша те́рпкоє, а зубо́мъ ча́дъ и́хъ оско́мины бы́ша?
|
|
|
3
|
|
|
Живу́ а́зъ, глаго́летъ Адонаі́ Госпо́дь, а́ще бу́детъ єще́ глаго́лема при́тча сія́ во Ізра́или.
|
|
|
4
|
|
|
Я́ко вся́ ду́шы моя́ су́ть, я́коже душа́ о́тча, та́ко и душа́ сыно́вня, моя́ су́ть: душа́, я́же согрѣши́тъ, та́ у́мретъ, и зоба́вшаго па́родки зу́бы оско́минны бу́дутъ.
|
|
|
5
|
|
|
Человѣ́къ же, и́же є́сть пра́веденъ, творя́й су́дъ и пра́вду,
|
|
|
6
|
|
|
на гора́хъ не снѣ́сть и оче́съ свои́хъ не воздви́гнетъ на кумі́ры до́му Ізра́илева, и жены́ бли́жняго своєго́ не оскверна́витъ и къ женѣ́ въ мѣ́сячныхъ су́щей не прибли́жится,
|
|
|
7
|
|
|
и человѣ́ку не наси́льствуєтъ, зало́гъ должнику́ отда́стъ и хище́ніємъ не восхи́титъ, хлѣ́бъ сво́й а́лчному да́стъ и нага́го облече́тъ въ ри́зу,
|
|
|
8
|
|
|
и сребра́ своєго́ въ ли́хву не да́стъ и прибы́тка не во́зметъ, и от непра́вды отврати́тъ ру́ку свою́ и су́дъ сотвори́тъ между́ му́жемъ и бли́жнимъ свои́мъ,
|
|
|
9
|
|
|
и въ за́повѣдехъ мои́хъ ходи́лъ и оправда́нія моя́ снабдѣ́лъ, є́же твори́ти та́: пра́веденъ се́й є́сть, жи́знію жи́ти и́мать, глаго́летъ Адонаі́ Госпо́дь.
|
|
|
10
|
|
|
И а́ще роди́тъ сы́на губи́теля, пролива́ющаго кро́вь и творя́ща грѣхи́,
|
|
|
11
|
|
|
въ пу́ть отца́ своєго́ пра́веднаго не ходи́лъ, но и на гора́хъ пожре́, и жену́ бли́жняго своєго́ оскверна́вилъ,
|
|
|
12
|
|
|
и убо́гаго и ни́щаго преоби́дѣ, и хище́ніємъ восхи́тилъ и зало́га не отда́лъ, и къ кумі́ромъ положи́ о́чи свои́, беззако́нія сотвори́,
|
|
|
13
|
|
|
съ ли́хвою даде́ и съ примноже́ніємъ прія́лъ, се́й жи́знію не поживе́тъ: вся́ сія́ беззако́нія сотвори́, сме́ртію у́мретъ, кро́вь єго́ на не́мъ бу́детъ.
|
|
|
14
|
|
|
А́ще же роди́тъ сы́на, о́нъ же уви́дитъ вся́ грѣхи́ отца́ своєго́, я́же сотвори́лъ є́сть, и убои́тся и не сотвори́тъ по ни́мъ,
|
|
|
15
|
|
|
на гора́хъ не снѣ́сть и оче́съ свои́хъ не положи́тъ къ кумі́ромъ до́му Ізра́илева, и жены́ по́друга своєго́ не оскверна́витъ
|
|
|
16
|
|
|
и человѣ́ка не наси́льствуєтъ, и зало́га не удержи́тъ и хище́ніємъ не восхи́титъ, хлѣ́бъ сво́й а́лчному да́стъ и на́га одѣ́єтъ ри́зою,
|
|
|
17
|
|
|
и от непра́вды отврати́тъ ру́ку свою́, ли́хвы и примноже́нія не во́зметъ, пра́вду сотвори́тъ и въ за́повѣдехъ мои́хъ ходи́ти бу́детъ: не сконча́єтся въ непра́вдахъ отца́ своєго́, [но] жи́знь поживе́тъ.
|
|
|
18
|
|
|
Оте́цъ же єго́ а́ще ско́рбію оскорби́тъ и хище́ніємъ восхи́титъ, сопроти́вная сотвори́тъ посредѣ́ люді́й мои́хъ, и у́мретъ въ непра́вдахъ свои́хъ.
|
|
|
19
|
|
|
И рече́те: что́ я́ко не взя́ сы́нъ непра́вды отца́ своєго́? Поне́же сы́нъ пра́вду и ми́лость сотвори́, вся́ зако́ны моя́ соблюде́ и сотвори́ я́, жи́знію поживе́тъ.
|
|
|
20
|
|
|
Душа́ же согрѣша́ющая, та́ у́мретъ: сы́нъ не во́зметъ непра́вды отца́ своєго́, и оте́цъ не во́зметъ непра́вды сы́на своєго́: пра́вда пра́веднаго на не́мъ бу́детъ, и беззако́ніє беззако́нника на не́мъ бу́детъ.
|
|
|
21
|
|
|
И беззако́нникъ а́ще обрати́тся от всѣ́хъ беззако́ній свои́хъ, я́же сотвори́лъ, и сохрани́тъ вся́ за́повѣди моя́ и сотвори́тъ су́дъ и пра́вду и ми́лость, жи́знію поживе́тъ и не у́мретъ:
|
|
|
22
|
|
|
вся́ согрѣше́нія єго́, єли́ка сотвори́лъ, не помяну́тся єму́: но въ пра́вдѣ своє́й, ю́же сотвори́лъ, жи́въ бу́детъ.
|
|
|
23
|
|
|
Єда́ хотѣ́ніємъ восхощу́ сме́рти грѣ́шника, глаго́летъ Адонаі́ Госпо́дь, а не є́же обрати́тися єму́ от пути́ зла́ и жи́ву бы́ти єму́?
|
|
|
24
|
|
|
И а́ще соврати́тся пра́ведникъ от пра́вды своєя́ и сотвори́тъ непра́вду по всѣ́мъ беззако́ніємъ, я́же сотвори́лъ беззако́нникъ, вся́ пра́вды єго́, я́же сотвори́лъ є́сть, не помяну́тся: въ преступле́ніи своє́мъ, и́мже преступи́, и во грѣсѣ́хъ свои́хъ, и́миже согрѣши́, въ ни́хъ у́мретъ.
|
|
|
25
|
|
|
И реко́сте: не упра́вится пу́ть Госпо́день. Слы́шите у́бо, ве́сь до́мъ Ізра́илевъ, єда́ пу́ть мо́й не упра́вится? ва́шъ ли пу́ть у́бо упра́вится?
|
|
|
26
|
|
|
Єгда́ соврати́тся пра́ведникъ от пра́вды своєя́ и сотвори́тъ грѣ́хъ, и у́мретъ въ преступле́ніи, є́же сотвори́лъ, въ то́мъ у́мретъ.
|
|
|
27
|
|
|
И єгда́ обрати́тся беззако́нникъ от беззако́нія своєго́, є́же сотвори́лъ, и сотвори́тъ су́дъ и пра́вду, то́й ду́шу свою́ снабдѣ́лъ є́сть:
|
|
|
28
|
|
|
и ви́дѣ и обрати́ся от всѣ́хъ беззако́ній свои́хъ, я́же сотвори́, жи́знію поживе́тъ и не у́мретъ.
|
|
|
29
|
|
|
И глаго́летъ до́мъ Ізра́илевъ: упра́вится пу́ть Госпо́день. Єда́ пу́ть мо́й не управля́єтся? о, до́ме Ізра́илевъ, у́бо ва́шъ ли пу́ть управля́єтся?
|
|
|
30
|
|
|
[Сего́ ра́ди] кому́ждо по пути́ єго́ сужду́ ва́мъ, до́ме Ізра́илевъ, глаго́летъ Адонаі́ Госпо́дь: обрати́теся и отве́ржитеся от всѣ́хъ нече́стій ва́шихъ, и не бу́дутъ ва́мъ непра́вды въ муче́ніє:
|
|
|
31
|
|
|
отве́ржите от себе́ вся́ нече́стія ва́ша, и́миже нече́ствовасте ко мнѣ́, и сотвори́те себѣ́ се́рдце но́во и ду́хъ но́въ, и сотвори́те вся́ за́повѣди моя́: и вску́ю умира́єте, до́ме Ізра́илевъ? глаго́летъ Госпо́дь.
|
|
|
32
|
|
|
Поне́же не хощу́ сме́рти грѣ́шника умира́ющаго, глаго́летъ Адонаі́ Госпо́дь, но є́же обрати́тися єму́ от пути́ своєго́ и жи́ти души́ єго́, глаго́летъ Адонаі́ Госпо́дь: обрати́теся у́бо, и жи́ви бу́дете.
|
|
|
Глава 19
|
|
|
1
|
|
|
Ты́ же, сы́не человѣ́чь, возми́ пла́чь на кня́зи Ізра́илевы,
|
|
|
2
|
|
|
и рече́ши: почто́ ма́ти твоя́ льви́ца средѣ́ льво́въ почи́, посредѣ́ льво́въ умно́жи льви́чища своя́?
|
|
|
3
|
|
|
И отскочи́ єди́нъ от льви́чищъ єя́ и бы́сть ле́въ, и научи́ся восхища́ти восхище́нія и человѣ́ки снѣде́.
|
|
|
4
|
|
|
И слы́шаша о не́мъ язы́цы, и я́тъ бы́сть въ растлѣ́ніи и́хъ, приведо́ша єго́ во уздѣ́ во Єги́петъ.
|
|
|
5
|
|
|
И ви́дѣ, я́ко отведе́нъ бы́сть от нея́, и поги́бе ча́яніє єя́: и взя́ ина́го от льви́чищъ свои́хъ и льво́мъ учини́ єго́,
|
|
|
6
|
|
|
и живя́ше посредѣ́ льво́въ, бы́сть ле́въ и научи́ся восхища́ти восхище́нія: человѣ́ки изъяде́,
|
|
|
7
|
|
|
и пася́шеся въ лю́тости своє́й, и гра́ды и́хъ пу́сты поста́ви, и погуби́ зе́млю и исполне́ніє єя́ гла́сомъ рыка́нія своєго́.
|
|
|
8
|
|
|
И да́ша на́нь язы́цы о́крестъ от стра́нъ и простро́ша на́нь мре́жи своя́, и въ погубле́ніи и́хъ я́тъ бы́сть.
|
|
|
9
|
|
|
И положи́ша єго́ во уздѣ́ и въ клѣ́ти, приведо́ша єго́ ко царю́ Вавило́нску и вверго́ша єго́ въ темни́цу, я́ко да не слы́шится гла́съ єго́ ктому́ на гора́хъ Ізра́илевыхъ.
|
|
|
10
|
|
|
Ма́ти твоя́ я́ко віногра́дъ и я́ко цвѣ́тъ ши́пчанъ на водѣ́ насажде́нъ, пло́дъ єго́ и отра́сль єго́ бы́сть от воды́ мно́ги.
|
|
|
11
|
|
|
И бы́сть єму́ же́злъ крѣ́пости надъ пле́менемъ старѣ́йшинъ, и вознесе́ся въ вели́чіи своє́мъ средѣ́ ло́зія: и ви́дѣ вели́чество своє́ во мно́жествѣ ло́зія своєго́,
|
|
|
12
|
|
|
и обломи́ся въ я́рости, и на зе́млю пове́рженъ бы́сть, и вѣ́тръ зно́йный изсуши́ плоды́ єго́: увядо́ша, и и́зсше же́злъ крѣ́пости єго́: о́гнь потреби́ єго́.
|
|
|
13
|
|
|
И ны́нѣ насади́ша єго́ въ пусты́ни, на земли́ безво́днѣ.
|
|
|
14
|
|
|
И изы́де о́гнь от жезла́ избра́нныхъ єго́ и пояде́ и́, и не бѣ́ въ не́мъ жезла́ крѣ́пости єго́: пле́мя въ при́тчу пла́ча є́сть, и бу́детъ пла́чь.
|
|
|
Глава 20
|
|
|
1
|
|
|
И бы́сть въ лѣ́то седмо́є, въ пя́тый ме́сяцъ, въ деся́тый де́нь ме́сяца, пріидо́ша му́жіє от старѣ́йшинъ до́му Ізра́илева вопроси́ти Го́спода и сѣдо́ша предъ лице́мъ мои́мъ.
|
|
|
2
|
|
|
И бы́сть сло́во Госпо́дне ко мнѣ́ глаго́ля:
|
|
|
3
|
|
|
сы́не человѣ́чь, глаго́ли ко старѣ́йшинамъ до́му Ізра́илева и рече́ши къ ни́мъ: та́ко глаго́летъ Адонаі́ Госпо́дь: єда́ вопроси́ти мене́ вы́ прихо́дите? живу́ а́зъ, а́ще отвѣща́ю ва́мъ, глаго́летъ Адонаі́ Госпо́дь.
|
|
|
4
|
|
|
А́ще отмще́ніємъ отмщу́ и́мъ: сы́не человѣ́чь, беззако́нія оте́цъ и́хъ засвидѣ́телствуй и́мъ,
|
|
|
5
|
|
|
и рече́ши къ ни́мъ: сія́ глаго́летъ Адонаі́ Госпо́дь: от него́же дне́ избра́хъ до́мъ Ізра́илевъ, и увѣ́дѣнъ бы́хъ пле́мени до́му Іа́ковля и позна́нъ бы́хъ и́мъ во земли́ Єги́петстѣй, и прія́хъ я́ руко́ю моє́ю глаго́ля: а́зъ Госпо́дь Бо́гъ ва́шъ:
|
|
|
6
|
|
|
въ то́й де́нь подъя́хъ я́ руко́ю моє́ю, є́же извести́ я́ изъ земли́ Єги́петскія въ зе́млю, ю́же угото́вахъ и́мъ, зе́млю кипя́щую млеко́мъ и ме́домъ, со́тъ є́сть па́че всѣ́хъ земе́ль,
|
|
|
7
|
|
|
и реко́хъ къ ни́мъ: кі́йждо ме́рзости от оче́съ свои́хъ отве́ржите и во творе́ніихъ Єги́петскихъ не оскверня́йтеся, а́зъ Госпо́дь Бо́гъ ва́шъ.
|
|
|
8
|
|
|
И отверго́шася мене́ и не хотѣ́ша послу́шати мя́: кі́йждо ме́рзостей от оче́съ свои́хъ не отверго́ша и творе́ній Єги́петскихъ не оста́виша. И реко́хъ, є́же излія́ти я́рость мою́ на ня́ и сконча́ти гнѣ́въ мо́й на ни́хъ средѣ́ земли́ Єги́петскія.
|
|
|
9
|
|
|
И сотвори́хъ, я́ко да и́мя моє́ весьма́ не оскверни́тся предъ язы́ки, въ ни́хже су́ть ті́и средѣ́ и́хъ, въ ни́хже позна́нъ бы́хъ и́мъ предъ лице́мъ и́хъ, є́же извести́ я́ изъ земли́ Єги́петскія.
|
|
|
10
|
|
|
И изведо́хъ я́ изъ земли́ Єги́петскія и введо́хъ я́ въ пусты́ню,
|
|
|
11
|
|
|
и да́хъ и́мъ за́повѣди моя́, и оправда́нія моя́ яви́хъ и́мъ, я́же а́ще сотвори́тъ человѣ́къ, жи́въ бу́детъ въ ни́хъ:
|
|
|
12
|
|
|
и суббо́ты моя́ да́хъ и́мъ, є́же бы́ти въ зна́меніє между́ мно́ю и между́ и́ми, є́же разумѣ́ти и́мъ, я́ко а́зъ Госпо́дь освяща́яй и́хъ.
|
|
|
13
|
|
|
И глаго́лахъ ко до́му Ізра́илеву въ пусты́ни: въ за́повѣдехъ мои́хъ ходи́те и оправда́нія моя́ сохрани́те, є́же твори́ти я́, я́же сотвори́тъ человѣ́къ и жи́въ бу́детъ въ ни́хъ. И разгнѣ́ва мя́ до́мъ Ізра́илевъ въ пусты́ни: въ за́повѣдехъ бо мои́хъ не ходи́ша и оправда́нія моя́ отверго́ша, я́же сотвори́тъ человѣ́къ и жи́въ бу́детъ въ ни́хъ: и суббо́ты моя́ оскверни́ша зѣло́. И реко́хъ, є́же излія́ти я́рость мою́ на ня́ въ пусты́ни, є́же потреби́ти и́хъ.
|
|
|
14
|
|
|
И сотвори́хъ, я́ко да весьма́ и́мя моє́ не оскверни́тся предъ язы́ки, изъ ни́хже изведо́хъ я́ предъ очи́ма и́хъ.
|
|
|
15
|
|
|
И а́зъ воздвиго́хъ ру́ку мою́ на ня́ въ пусты́ни весьма́, є́же не ввести́ и́хъ въ зе́млю, ю́же да́хъ и́мъ, въ зе́млю теку́щую млеко́мъ и ме́домъ, со́тъ є́сть па́че всея́ земли́:
|
|
|
16
|
|
|
поне́же судьбы́ моя́ отверго́ша и въ за́повѣдехъ мои́хъ не ходи́ша, и суббо́ты моя́ оскверни́ша и вслѣ́дъ помышле́ній се́рдца своєго́ хожда́ху.
|
|
|
17
|
|
|
И пощадѣ́ я́ о́ко моє́, є́же потреби́ти и́хъ, и не сотвори́хъ и́мъ сконча́нія въ пусты́ни.
|
|
|
18
|
|
|
И реко́хъ ко ча́домъ и́хъ въ пусты́ни: въ зако́нѣхъ оте́цъ ва́шихъ не ходи́те и оправда́ній и́хъ не храни́те, и ко творе́ніємъ Єги́петскимъ не примѣша́йтеся и не оскверня́йтеся:
|
|
|
19
|
|
|
а́зъ Госпо́дь Бо́гъ ва́шъ: въ за́повѣдехъ мои́хъ ходи́те, и оправда́нія моя́ снабди́те и твори́те я́,
|
|
|
20
|
|
|
и суббо́ты моя́ освяща́йте: и бу́детъ въ зна́меніє между́ мно́ю и между́ ва́ми, є́же вѣ́дѣти ва́мъ, я́ко а́зъ Госпо́дь Бо́гъ ва́шъ.
|
|
|
21
|
|
|
И разгнѣ́ваша мя́, и ча́да и́хъ въ за́повѣдехъ мои́хъ не ходи́ша и оправда́ній мои́хъ не снабдѣ́ша, є́же твори́ти я́: сія́ бо сотвори́въ человѣ́къ жи́въ бу́детъ въ ни́хъ: и суббо́ты моя́ оскверни́ша зѣло́. И реко́хъ: излію́ я́рость мою́ на ня́, є́же сконча́ти гнѣ́въ мо́й на ни́хъ въ пусты́ни.
|
|
|
22
|
|
|
И сотвори́хъ, я́ко да и́мя моє́ весьма́ не оскверна́вится предъ язы́ки, от ни́хже изведо́хъ я́ предъ очи́ма и́хъ.
|
|
|
23
|
|
|
И а́зъ воздвиго́хъ ру́ку мою́ на ня́ въ пусты́ни, є́же расточи́ти я́ во язы́цѣхъ и разсѣ́яти я́ во страна́хъ,
|
|
|
24
|
|
|
поне́же оправда́ній мои́хъ не сотвори́ша и за́повѣди моя́ отри́нуша и суббо́ты моя́ оскверни́ша, и вслѣ́дъ кумі́ровъ оте́цъ и́хъ бы́ша очеса́ и́хъ.
|
|
|
25
|
|
|
И да́хъ и́мъ за́повѣди не добры́ и оправда́нія, въ ни́хже не бу́дутъ жи́ви:
|
|
|
26
|
|
|
и оскверню́ я́ въ дая́ніихъ и́хъ, внегда́ проводи́ти [и́мъ] вся́коє разверза́ющеє ложесна́, да погублю́ и́хъ, да уразумѣ́ютъ, я́ко а́зъ Госпо́дь.
|
|
|
27
|
|
|
Сего́ ра́ди глаго́ли къ до́му Ізра́илеву, сы́не человѣ́чь, и рече́ши къ ни́мъ: сія́ глаго́летъ Адонаі́ Госпо́дь: да́же до сего́ разгнѣ́ваша мя́ отцы́ ва́ши во грѣсѣ́хъ свои́хъ, и́миже согрѣши́ша ко мнѣ́:
|
|
|
28
|
|
|
и введо́хъ я́ въ зе́млю, въ ню́же воздвиго́хъ ру́ку мою́, є́же да́ти ю́ и́мъ: и ви́дѣша вся́къ хо́лмъ высо́къ и вся́ко дре́во присѣ́нноє, и пожро́ша та́мо бого́мъ свои́мъ и учини́ша та́мо я́рость даро́въ свои́хъ, и положи́ша та́мо воню́ благово́нія своєго́ и возлія́ша та́мо возлія́нія своя́.
|
|
|
29
|
|
|
И реко́хъ къ ни́мъ: что́ су́ть аввама́ {высо́коє}, я́ко вы́ вхо́дите та́мо? и прозва́ша и́мя єму́ аввама́ да́же до дне́шняго дне́.
|
|
|
30
|
|
|
Сего́ ра́ди рцы́ къ до́му Ізра́илеву: сія́ глаго́летъ Адонаі́ Госпо́дь: а́ще во беззако́ніихъ оте́цъ ва́шихъ вы́ оскверня́єтеся и вслѣ́дъ ме́рзостей и́хъ вы́ соблужда́єте,
|
|
|
31
|
|
|
и въ приноше́ніи даро́въ ва́шихъ и въ наро́цѣхъ ва́шихъ, єгда́ прохо́дятъ ча́да ва́ша сквозѣ́ о́гнь: вы́ оскверня́єтеся во всѣ́хъ кумі́рѣхъ ва́шихъ да́же до дне́шняго дне́, и а́зъ отвѣща́ю ли ва́мъ, до́ме Ізра́илевъ? Живу́ а́зъ, глаго́летъ Адонаі́ Госпо́дь, а́ще отвѣща́ю ва́мъ и а́ще взы́детъ на ду́хъ ва́шъ сіє́.
|
|
|
32
|
|
|
И не бу́детъ, я́коже вы́ глаго́лете: бу́демъ, я́коже язы́цы и я́коже племена́ земна́я, служи́ти дре́ву и ка́менію.
|
|
|
33
|
|
|
Сего́ ра́ди живу́ а́зъ, глаго́летъ Адонаі́ Госпо́дь, а́ще не руко́ю крѣ́пкою и мы́шцею высо́кою и въ я́рости излія́ннѣй ца́рствовати бу́ду надъ ва́ми:
|
|
|
34
|
|
|
и изведу́ вы́ от люді́й и пріиму́ вы от стра́нъ, въ ни́хже бѣ́сте разсѣ́яни, руко́ю крѣ́пкою и мы́шцею высо́кою и я́ростію излія́нною,
|
|
|
35
|
|
|
и приведу́ ва́съ въ пусты́ню лю́дскую и разсужду́ся съ ва́ми та́мо лице́мъ къ лицу́:
|
|
|
36
|
|
|
я́коже суди́хся со отцы́ ва́шими въ пусты́ни земли́ Єги́петскія, та́ко сужду́ и ва́мъ, глаго́летъ Адонаі́ Госпо́дь:
|
|
|
37
|
|
|
и проведу́ вы́ подъ жезло́мъ мои́мъ и введу́ вы́ въ числѣ́ завѣ́та,
|
|
|
38
|
|
|
и изберу́ от ва́съ нечести́выя и отве́ргшыяся: изъ земли́ бо обита́нія и́хъ изведу́ я́, и въ зе́млю Ізра́илеву не вни́дутъ, и позна́єте, я́ко а́зъ Госпо́дь Бо́гъ.
|
|
|
39
|
|
|
Вы́ же, до́ме Ізра́илевъ, си́це глаго́летъ Адонаі́ Госпо́дь: кі́йждо кумі́ры своя́ отими́те, и пото́мъ а́ще послу́шаєте мене́, и и́мене моєго́ свята́го не оскверна́вите ксему́ въ дарѣ́хъ ва́шихъ и рукотворе́ніихъ ва́шихъ:
|
|
|
40
|
|
|
поне́же на горѣ́ моє́й святѣ́й, на горѣ́ высо́цѣ Ізра́илевѣ, глаго́летъ Адонаі́ Госпо́дь, та́мо послу́жатъ ми́ ве́сь до́мъ Ізра́илевъ до конца́ на земли́, и та́мо пріиму́ я́ и та́мо присѣщу́ на приноше́нія ва́ша и нача́тки обѣ́товъ ва́шихъ во всѣ́хъ освяще́нныхъ ва́шихъ.
|
|
|
41
|
|
|
Въ воню́ благово́нія пріиму́ вы́, єгда́ изведу́ вы́ изъ люді́й и пріиму́ вы́ от стра́нъ, въ ня́же расточе́ни бы́сте, и освящу́ся въ ва́съ предъ очи́ма людски́ма:
|
|
|
42
|
|
|
и увѣ́сте, я́ко а́зъ Госпо́дь, єгда́ введу́ вы́ въ зе́млю Ізра́илеву, въ зе́млю, на ню́же воздвиго́хъ ру́ку мою́ да́ти ю́ отце́мъ ва́шымъ:
|
|
|
43
|
|
|
и помяне́те та́мо пути́ ва́шя и вся́ ме́рзкія грѣхи́ ва́шя, въ ни́хже оскверни́стеся, и посрамите́ ли́ца ва́ша во всѣ́хъ зло́бахъ ва́шихъ, я́же сотвори́сте:
|
|
|
44
|
|
|
и позна́єте, я́ко а́зъ Госпо́дь, єгда́ сотворю́ ва́мъ та́ко, я́ко да и́мя моє́ не оскверни́тся по путе́мъ ва́шымъ злы́мъ и по рукотворе́ніємъ ва́шымъ растлѣ́ннымъ, до́ме Ізра́илевъ, глаго́летъ Адонаі́ Госпо́дь.
|
|
|
45
|
|
|
И бы́сть сло́во Госпо́дне ко мнѣ́ глаго́ля:
|
|
|
46
|
|
|
сы́не человѣ́чь, утверди́ лице́ твоє́ на ю́гъ и воззри́ на даро́ма, и прорцы́ на дубра́ву старѣ́йшину наге́ва
|
|
|
47
|
|
|
и рече́ши дубра́вѣ наге́вовѣ: слы́ши сло́во Госпо́дне, сія́ глаго́летъ Адонаі́ Госпо́дь: се́, а́зъ возгнѣщу́ въ тебѣ́ о́гнь, и пожже́тъ въ тебѣ́ вся́ко дре́во зеле́ноє и вся́ко дре́во сухо́є, не уга́снетъ пла́мень разжже́ный, и изгори́тъ въ не́мъ вся́ко лице́ от полу́дне до сѣ́вера,
|
|
|
48
|
|
|
и увѣ́сть вся́ка пло́ть, я́ко а́зъ Госпо́дь разжего́хъ єго́, и не уга́снетъ.
|
|
|
49
|
|
|
И реко́хъ: ника́коже, Го́споди, Го́споди! сі́и глаго́лютъ ко мнѣ́: не при́тча ли є́сть сія́ глаго́лема?
|
|
|
Глава 21
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сего́ ра́ди прорцы́, сы́не человѣ́чь, и утверди́ лице́ твоє́ на Ієрусали́мъ и воззри́ на святы́ни и́хъ, и прорцы́ на зе́млю Ізра́илеву,
|
|
|
3
|
|
|
и рече́ши ко земли́ Ізра́илевѣ: сія́ глаго́летъ Адонаі́ Госпо́дь: се́, а́зъ на тя́, и извлеку́ ме́чь мо́й изъ ноже́нъ єго́, и потреблю́ от тебе́ непра́веднаго и беззако́ннаго.
|
|
|
4
|
|
|
Поне́же потреблю́ от тебе́ непра́веднаго и беззако́нника, та́ко изы́детъ ме́чь мо́й изъ ноже́нъ свои́хъ на вся́ку пло́ть от ю́га да́же до сѣ́вера,
|
|
|
5
|
|
|
и увѣ́сть вся́ка пло́ть, я́ко а́зъ Госпо́дь извлеко́хъ ме́чь мо́й изъ ноже́нъ єго́, и ктому́ не возврати́тся.
|
|
|
6
|
|
|
И ты́, сы́не человѣ́чь, воздохни́ въ сокруше́ніи чре́слъ твои́хъ и въ болѣ́знехъ возстени́ предъ очи́ма и́хъ.
|
|
|
7
|
|
|
И бу́детъ, а́ще реку́тъ къ тебѣ́: чесо́ ра́ди ты́ стене́ши? и рече́ши: о возвѣще́ніи, я́ко гряде́тъ: и сокруши́тся вся́ко се́рдце, и ослабѣ́ютъ вся́ ру́ки, и и́здшетъ вся́ка пло́ть и вся́къ ду́хъ, и вся́ сте́гна оскверна́вятся мокрото́ю: се́, гряде́тъ и бу́детъ, глаго́летъ Адонаі́ Госпо́дь.
|
|
|
8
|
|
|
И бы́сть сло́во Госпо́дне ко мнѣ́ глаго́ля:
|
|
|
9
|
|
|
сы́не человѣ́чь, прорцы́ и рече́ши: сія́ глаго́летъ Адонаі́ Госпо́дь: рцы́: мечу́, мечу́! изостри́ся и разъяри́ся,
|
|
|
10
|
|
|
я́ко да изсѣче́ши сѣче́нія: изостри́ся, я́ко да бу́деши въ блеща́ніє и гото́въ на разсы́паніє: сѣцы́, изничтожа́й, отри́ни вся́коє дре́во.
|
|
|
11
|
|
|
И даде́ єго́ угото́ванна, є́же держа́ти въ рука́хъ єго́: наостри́лся ме́чь, гото́въ є́сть, є́же да́нъ бы́ти въ ру́цѣ сѣку́щаго.
|
|
|
12
|
|
|
Возопі́й и воспла́чися, сы́не человѣ́чь, я́ко се́й бы́сть въ лю́дехъ мои́хъ, се́й во всѣ́хъ старѣ́йшинахъ Ізра́илевыхъ: обита́ющіи бли́зъ подъ ме́чь бы́ша съ людьми́ мои́ми: сего́ ра́ди восплещи́ рука́ма твои́ма,
|
|
|
13
|
|
|
я́ко оправда́ся. И что́, а́ще и пле́мя отри́нется? Не бу́детъ, глаго́летъ Адонаі́ Госпо́дь.
|
|
|
14
|
|
|
И ты́, сы́не человѣ́чь, прорцы́ и восплещи́ рука́ма и усугу́би ме́чь: тре́тій ме́чь я́звенымъ є́сть, ме́чь я́звенымъ вели́къ, и ужаси́ши я́,
|
|
|
15
|
|
|
я́ко да сокруши́тся се́рдце и́хъ, и умно́жатся немощні́и во всѣ́хъ вратѣ́хъ и́хъ, предаю́тся на усѣче́ніє ме́чноє: бла́го о́стръ бы́сть на сѣче́ніє, бла́го бы́сть на блиста́ніє.
|
|
|
16
|
|
|
Проходи́ я́ко мо́лнія, остри́ся одесну́ю и ошу́юю, а́може а́ще лице́ твоє́ воста́нетъ:
|
|
|
17
|
|
|
и а́зъ восплещу́ руко́ю моє́ю къ руцѣ́ моє́й и напущу́ я́рость мою́, а́зъ Госпо́дь глаго́лахъ.
|
|
|
18
|
|
|
И бы́сть сло́во Госпо́дне ко мнѣ́ глаго́ля:
|
|
|
19
|
|
|
и ты́, сы́не человѣ́чь, учини́ себѣ́ пути́ два́, є́же вни́ти мечу́ царя́ Вавило́нска, от страны́ єди́ныя изы́дутъ нача́ла два́, и ру́ку угото́ваютъ въ нача́лѣ пути́ гра́да, от нача́ла пути́ учини́ши,
|
|
|
20
|
|
|
я́ко вни́ти мечу́ на равва́ѳъ сыно́въ Аммо́нихъ и на Іуде́ю и Ієрусали́мъ средѣ́ єго́.
|
|
|
21
|
|
|
Поне́же ста́нетъ ца́рь Вавило́нскъ на ста́рѣмъ пути́, на нача́лѣ обои́хъ путі́й, є́же волхвова́ти волхвова́ніємъ, я́коже вскипѣ́ти жезлу́, и вопроша́ти ва́яныхъ и вражи́ти во утро́бахъ.
|
|
|
22
|
|
|
И бы́сть одесну́ю єго́ волше́бство на Ієрусали́мъ, є́же обста́вити остро́гъ и є́же отве́рсти уста́ съ во́племъ и возвы́сити гла́съ со глаше́ніємъ тру́бнымъ, и я́ко поста́вити остро́гъ предъ враты́ єго́ и насы́пати пе́рсти и поста́вити стрѣ́лницы.
|
|
|
23
|
|
|
И то́й а́ки волхву́я и́мъ волхвова́ніє предъ ни́ми, уседмеря́я седмери́цы, и то́й воспомина́яй непра́вды єго́ помяну́ти.
|
|
|
24
|
|
|
Того́ ра́ди сія́ глаго́летъ Адонаі́ Госпо́дь: поне́же воспомяну́сте непра́вды ва́шя, внегда́ откры́шася нече́стія ва́ша, я́ко яви́тися грѣхо́мъ ва́шымъ во всѣ́хъ беззако́ніихъ ва́шихъ и во всѣ́хъ начина́ніихъ ва́шихъ, поне́же воспомяну́сте, въ тѣ́хъ я́ти бу́дете.
|
|
|
25
|
|
|
И ты́, скверна́ве, беззако́нниче, старѣ́йшино Ізра́илевъ, єго́же гряде́тъ де́нь во вре́мя непра́вды, коне́цъ:
|
|
|
26
|
|
|
сія́ глаго́летъ Госпо́дь: сними́ кіда́ръ и отложи́ вѣне́цъ, се́й не тако́въ бу́детъ, смири́лъ єси́ высо́коє и возне́слъ смире́нноє:
|
|
|
27
|
|
|
непра́вду, непра́вду, непра́вду положу́ єго́, и то́й не тако́въ бу́детъ, до́ндеже пріи́детъ, єму́же досто́итъ, и преда́мъ єму́.
|
|
|
28
|
|
|
И ты́, сы́не человѣ́чь, прорцы́ и рече́ши: се́ глаго́летъ Адонаі́ Госпо́дь къ сыно́мъ Аммо́нимъ и ко укори́знѣ и́хъ, и рече́ши: мечу́, мечу́ извлече́ный на сѣче́ніє, извлече́ный на сконча́ніє, дви́гнися, я́ко да блиста́єши:
|
|
|
29
|
|
|
въ видѣ́ніи твоє́мъ су́єтнѣмъ, и внегда́ вражби́ти тебѣ́ ло́жная, єгда́ предає́шися ты́ на вы́и я́звеныхъ беззако́нниковъ, и́хже де́нь приспѣ́ во вре́мя непра́вды, коне́цъ:
|
|
|
30
|
|
|
возврати́ся въ ножны́ твоя́ и не ста́ни на мѣ́стѣ се́мъ, въ не́мже роди́лся єси́, на земли́ твоє́й и́мамъ тя́ суди́ти:
|
|
|
31
|
|
|
и излію́ на тя́ гнѣ́въ мо́й, во огни́ гнѣ́ва моєго́ ду́ну на тя́ и преда́мъ тя́ въ ру́цѣ муже́й ва́рваръ, творя́щихъ па́губу:
|
|
|
32
|
|
|
огню́ бу́деши я́дь, кро́вь твоя́ бу́детъ посредѣ́ земли́ твоєя́: не бу́детъ твоєя́ па́мяти, зане́же а́зъ Госпо́дь глаго́лахъ.
|
|
|
Глава 22
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
и ты́, сы́не человѣ́чь, а́ще суди́ти бу́деши гра́ду крове́й, и яви́ єму́ вся́ беззако́нія єго́,
|
|
|
3
|
|
|
и рече́ши: сія́ глаго́летъ Адонаі́ Госпо́дь: о, гра́де пролива́яй кро́вь средѣ́ себе́, є́же пріити́ вре́мени єго́, и творя́й кумі́ры на себе́, є́же оскверни́тися самому́:
|
|
|
4
|
|
|
въ кро́ви и́хъ, ю́же излія́лъ єси́, согрѣши́лъ єси́, и въ кумі́рѣхъ твои́хъ, я́же твори́лъ, оскверни́лся єси́, и сократи́лъ єси́ дни́ твоя́, и приве́дъ вре́мя лѣ́тъ твои́хъ: сего́ ра́ди да́хъ тя́ на укори́зну язы́комъ и на поруга́ніє всѣ́мъ страна́мъ,
|
|
|
5
|
|
|
бли́зъ тебе́ и дале́че от тебе́ су́щымъ, и поруга́ются тебѣ́ и возопію́тъ на тя́: о, нечи́стый, преслову́тый и мно́гъ во беззако́ніихъ!
|
|
|
6
|
|
|
се́, старѣ́йшины до́му Ізра́илева, кі́йждо ко свои́мъ у́жикамъ смѣси́шася въ тебѣ́, я́ко да пролію́тъ кро́вь:
|
|
|
7
|
|
|
отцу́ и ма́тери злосло́вяху въ тебѣ́ и ко прише́лцу обраща́хуся непра́вдами въ тебѣ́: сироту́ и вдови́цу преоби́дяху въ тебѣ́:
|
|
|
8
|
|
|
и свята́я моя́ уничижа́ху и суббо́ты моя́ оскверня́ху въ тебѣ́:
|
|
|
9
|
|
|
му́жіє разбо́йницы бѣ́ша въ тебѣ́, я́ко да пролію́тъ въ тебѣ́ кро́вь, и на гора́хъ ядя́ху въ тебѣ́ и скве́рны творя́ху въ тебѣ́:
|
|
|
10
|
|
|
сты́дъ о́тчій откры́ша въ тебѣ́, и въ нечистотѣ́ сѣдя́щую обруга́ша въ тебѣ́:
|
|
|
11
|
|
|
кі́йждо на жену́ по́друга своєго́ беззако́нноваша, и кі́йждо невѣ́стку свою́ оскверня́ше въ нече́стіи, и кі́йждо сестру́ свою́, дще́рь отца́ своєго́, обругава́ше въ тебѣ́:
|
|
|
12
|
|
|
мзды́ взима́ху въ тебѣ́, я́ко да пролію́тъ кро́вь, ли́хву и избы́токъ взима́ху въ тебѣ́: и сконча́лъ єси́ сконча́ніє зло́бы твоєя́ я́же въ наси́ліи, мене́ же забы́лъ єси́, глаго́летъ Адонаі́ Госпо́дь.
|
|
|
13
|
|
|
Се́ у́бо, уда́рю руко́ю моє́ю о ру́ку мою́ на та́, я́же соверши́лъ єси́ и я́же сотвори́лъ єси́, и на кро́ви твоя́ бы́вшыя посредѣ́ тебе́:
|
|
|
14
|
|
|
а́ще устои́тъ се́рдце твоє́, и а́ще преодолѣ́ютъ ру́цѣ твои́ во дне́хъ, въ ня́же а́зъ творю́ въ тебѣ́? А́зъ Госпо́дь глаго́лахъ, и сотворю́.
|
|
|
15
|
|
|
И разсы́плю тя́ во язы́цѣхъ и разсѣ́ю тя́ въ страна́хъ, и оскудѣ́єтъ нечистота́ твоя́ изъ тебе́,
|
|
|
16
|
|
|
и владѣ́ти бу́ду тобо́ю предъ очи́ма язы́ковъ, и позна́єши, я́ко а́зъ Госпо́дь.
|
|
|
17
|
|
|
И бы́сть сло́во Госпо́дне ко мнѣ́ глаго́ля:
|
|
|
18
|
|
|
сы́не человѣ́чь, се́, бы́ша мнѣ́ до́мъ Ізра́илевъ смѣ́шани вси́ съ мѣ́дію и желѣ́зомъ, и со о́ловомъ чи́стымъ и со свинце́мъ, средѣ́ пе́щи сребро́ смѣ́шено су́ть.
|
|
|
19
|
|
|
Сего́ ра́ди рцы́: сія́ глаго́летъ Адонаі́ Госпо́дь: поне́же бы́сте вси́ во смѣше́ніє єди́но, сего́ ра́ди, се́, а́зъ пріиму́ ва́съ во среди́ну Ієрусали́ма:
|
|
|
20
|
|
|
я́коже пріє́млется сребро́ и мѣ́дь, и желѣ́зо и свине́цъ и о́лово чи́стоє во среди́ну пе́щи, є́же ду́нути на ня́ огню́, да слію́тся, та́ко пріиму́ ва́съ во гнѣ́вѣ моє́мъ и въ я́рости моє́й, и соберу́ и слію́ ва́съ,
|
|
|
21
|
|
|
и ду́ну на вы́ во огни́ гнѣ́ва моєго́, и слія́ни бу́дете средѣ́ єго́:
|
|
|
22
|
|
|
я́коже слива́єтся сребро́ средѣ́ пе́щи, та́ко сліє́теся посредѣ́ єго́ и позна́єте, я́ко а́зъ Госпо́дь излія́хъ я́рость мою́ на ва́съ.
|
|
|
23
|
|
|
И бы́сть сло́во Госпо́дне ко мнѣ́ глаго́ля:
|
|
|
24
|
|
|
сы́не человѣ́чь, рцы́ єму́: ты́ єси́ земля́ неодожди́мая, ниже́ до́ждь бы́сть на тя́ въ де́нь я́рости.
|
|
|
25
|
|
|
Єго́же старѣ́йшины средѣ́ єго́, я́ко львы́ рыка́юще, восхища́юще восхище́нія, ду́шы изъяда́юще наси́ліємъ, бога́тство и че́сть пріє́млюще, и вдови́цы твоя́ умно́жишася посредѣ́ тебе́:
|
|
|
26
|
|
|
и жерцы́ єго́ отверго́шася зако́на моєго́ и оскверни́ша свята́я моя́: между́ святы́мъ и скверна́вымъ не разлуча́ху, и между́ нечи́стымъ и чи́стымъ не раздѣля́ху, и от суббо́тъ мои́хъ покрыва́ху о́чи свои́, и оскверня́ху мя́ посредѣ́ себе́:
|
|
|
27
|
|
|
кня́зи єго́ средѣ́ єго́ я́ко во́лцы восхища́юще похище́нія, є́же пролія́ти кро́вь и погуби́ти ду́шы, я́ко да лихои́мствомъ лихои́мствуютъ:
|
|
|
28
|
|
|
и проро́цы єго́ помазу́ющіи и́хъ паду́тъ, ви́дящіи су́єтная, волхву́ющіи ло́жная, глаго́люще: сія́ глаго́летъ Адонаі́ Госпо́дь: а Госпо́дь не глаго́ла.
|
|
|
29
|
|
|
Люді́й земли́ утѣсня́юще непра́вдою и восхища́юще восхище́нія, ни́ща и убо́га наси́льствующе и со прише́лцемъ не живу́ще судо́мъ.
|
|
|
30
|
|
|
И иска́хъ от ни́хъ му́жа живу́ща пра́во и стоя́ща цѣ́ло предъ лице́мъ мои́мъ во вре́мя гнѣ́ва моєго́, є́же бы не до конца́ погуби́ти єго́ {гра́дъ Ієрусали́мъ}, и не обрѣто́хъ.
|
|
|
31
|
|
|
И излія́хъ на́нь я́рость мою́ во огни́ гнѣ́ва моєго́, є́же сконча́ти я́: пути́ и́хъ на главы́ и́хъ да́хъ, глаго́летъ Адонаі́ Госпо́дь.
|
|
|
Глава 23
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, двѣ́ женѣ́ бѣ́стѣ дще́ри ма́тере єди́ныя
|
|
|
3
|
|
|
и соблуди́стѣ во Єги́птѣ, въ ю́ности своє́й соблуди́стѣ: та́мо спадо́ша сосцы́ и́хъ, и та́мо растли́стѣ дѣ́вство.
|
|
|
4
|
|
|
Имена́ же и́ма: оола́ старѣ́йшая, ооліва́ же ме́ншая сестра́ єя́: и бы́стѣ мнѣ́ и роди́стѣ сы́ны и дще́ри: имена́ же и́ма: самарі́а оола́, и Ієрусали́мъ ооліва́.
|
|
|
5
|
|
|
И соблуди́ оола́ от мене́ и возложи́ся на похотники́ своя́, на Ассирі́аны приближа́ющыяся є́й,
|
|
|
6
|
|
|
облече́нныя въ червлени́цы, старѣ́йшины и воєво́ды: ю́ноши избра́нніи, вси́ ко́нницы яздя́щіи на ко́нехъ:
|
|
|
7
|
|
|
и даде́ блуже́ніє своє́ къ ни́мъ: избра́ннымъ сыно́мъ Ассирі́йскимъ всѣ́мъ, и ко всѣ́мъ, на ня́же возлага́шеся, во всѣ́хъ нечистота́хъ и́хъ оскверня́шеся:
|
|
|
8
|
|
|
и блуже́нія своєго́, є́же изъ Єги́пта, не оста́ви, я́ко съ не́ю спа́ху въ ю́ности єя́, и ті́и растли́ша дѣ́вство єя́ и излія́ша блуже́ніє своє́ на ню́.
|
|
|
9
|
|
|
Того́ ра́ди преда́хъ ю́ въ ру́цѣ похотнико́мъ єя́, въ ру́цѣ сыно́мъ Ассирі́йскимъ, на ни́хже возлага́шеся.
|
|
|
10
|
|
|
Ті́и откры́ша сты́дъ єя́, сы́ны и дще́ри єя́ поя́ша и саму́ю мече́мъ усѣ́кнуша: и бы́сть поноше́ніє въ жена́хъ, и отмще́ніє сотвори́ша въ не́й во дщере́хъ єя́.
|
|
|
11
|
|
|
И ви́дѣ сестра́ єя́ ооліва́, и растли́ возложе́ніє своє́ па́че єя́, и блу́дъ сво́й па́че блуда́ сестры́ своєя́ умно́жи:
|
|
|
12
|
|
|
на сыно́въ Ассирі́йскихъ возложи́ся, на старѣ́йшины и воєво́ды, и́же бли́зъ єя́, облече́нны во благоистка́нны, на ко́нники яздя́щыя на ко́нехъ, ю́ноши избра́нни вси́.
|
|
|
13
|
|
|
И ви́дѣхъ, я́ко оскверни́ся пу́ть єди́нъ обою́.
|
|
|
14
|
|
|
И приложи́ ко блуже́нію своєму́, и ви́дѣ му́жы напи́саны на стѣнѣ́, о́бразы халде́йски напи́саны ша́рами,
|
|
|
15
|
|
|
препоя́саны пестрота́ми о чре́слѣхъ свои́хъ, и прево́и краше́нніи на глава́хъ и́хъ, ви́дъ троя́кій всѣ́хъ, подо́біє сыно́въ Вавило́нскихъ, Халде́йскихъ, земли́ оте́чества и́хъ:
|
|
|
16
|
|
|
и возложи́ся на ня́ зрѣ́ніємъ оче́й свои́хъ, и посла́ послы́ къ ни́мъ въ зе́млю Халде́йску.
|
|
|
17
|
|
|
И пріидо́ша къ не́й сы́нове Вавило́нстіи на ло́же вита́ющихъ и оскверни́ша ю́ въ блуже́ніи єя́, и оскверни́ся въ ни́хъ, и отступи́ душа́ єя́ от ни́хъ:
|
|
|
18
|
|
|
и откры́ блуже́ніє своє́ и откры́ срамоту́ свою́. И отступи́ душа́ моя́ от нея́, я́коже отступи́ душа́ моя́ от сестры́ єя́.
|
|
|
19
|
|
|
И умно́жила єси́ блуже́ніє твоє́, є́же помяну́ти дни́ ю́ности твоєя́, въ ня́же блуди́ла єси́ во Єги́птѣ,
|
|
|
20
|
|
|
и возлегла́ єси́ на халде́и, и́хже пло́ти бы́ша а́ки пло́ти о́сли, и я́ко ло́на ко́нская ло́на и́хъ,
|
|
|
21
|
|
|
и посѣти́ла єси́ беззако́ніє ю́ности твоєя́, я́же твори́ла єси́ во Єги́птѣ во вита́лищи твоє́мъ, идѣ́же сосцы́ ю́ности твоєя́ спадо́ста.
|
|
|
22
|
|
|
Того́ ра́ди, ооліво́, сія́ глаго́летъ Адонаі́ Госпо́дь: се́, а́зъ воздви́гну похотники́ твоя́ на тя́, от ни́хже отступи́ душа́ твоя́, и наведу́ и́хъ на тя́ о́крестъ,
|
|
|
23
|
|
|
сыно́въ Вавило́нскихъ и всѣ́хъ халде́євъ, факу́да и су́да и ку́да, и вся́ сы́ны Ассирі́йски съ ни́ми, ю́ношы избра́нны, старѣ́йшины и воєво́ды, вся́ тріста́ты и наро́читыя, ко́нники на ко́нехъ вси́.
|
|
|
24
|
|
|
И пріи́дутъ на тя́ вси́ от сѣ́вера, колесни́цы и коле́са со мно́гимъ наро́домъ, щиты́ и су́лицы и шле́мы, и поста́вятъ стражбу́ о́крестъ тебе́, и да́мъ предъ лице́мъ и́хъ су́дъ, и отмстя́тъ ти́ въ судѣ́хъ свои́хъ:
|
|
|
25
|
|
|
и да́мъ рве́ніє моє́ въ тебѣ́, и сотворя́тъ съ тобо́ю гнѣ́въ я́рости моєя́, но́здри твоя́ и у́шы твои́ обрѣ́жутъ, и оста́вшихъ твои́хъ мече́мъ изсѣку́тъ: ті́и сыно́въ твои́хъ и дще́рей твои́хъ во́змутъ, и оста́вшихъ твои́хъ потреби́тъ о́гнь:
|
|
|
26
|
|
|
и совлеку́тъ съ тебе́ ри́зы твоя́ и во́змутъ сосу́ды хвалы́ твоєя́.
|
|
|
27
|
|
|
И отвращу́ нече́стія твоя́ от тебе́ и блу́дъ тво́й от земли́ Єги́петскія: и не воздви́гнеши оче́съ твои́хъ на ни́хъ и Єги́пта не помяне́ши ктому́.
|
|
|
28
|
|
|
Поне́же сія́ глаго́летъ Адонаі́ Госпо́дь: се́, а́зъ предаю́ тя въ ру́цѣ, и́хже ненави́диши, от ни́хже отступи́ душа́ твоя́:
|
|
|
29
|
|
|
и сотворя́тъ въ тебѣ́ въ не́нависти, и во́змутъ вся́ труды́ твоя́ и дѣла́ твоя́, и бу́деши нага́ и посра́млена, и откры́єтся сту́дъ блуда́ твоєго́ и нече́стіє твоє́.
|
|
|
30
|
|
|
И блуже́ніє твоє́ сотвори́ сія́ тебѣ́, єгда́ блуди́ла єси́ вслѣ́дъ язы́ковъ и оскверня́лася въ кумі́рѣхъ и́хъ:
|
|
|
31
|
|
|
въ пути́ сестры́ твоєя́ ходи́ла єси́, и да́мъ ча́шу єя́ въ ру́цѣ твои́.
|
|
|
32
|
|
|
Сія́ глаго́летъ Адонаі́ Госпо́дь: ча́шу сестры́ твоєя́ испіє́ши глубо́кую и широ́кую, и бу́детъ на смѣ́хъ и подражне́ніє, изоби́лную ко соверше́нію пія́нства,
|
|
|
33
|
|
|
и разслабле́нія напо́лнишися: ча́ша же потребле́нія и погубле́нія ча́ша сестры́ твоєя́ самарі́и:
|
|
|
34
|
|
|
и испіє́ши ю́ и истощи́ши, и чре́пъ єя́ яду́щи потреби́ши, и сосца́ твоя́ отто́ргнеши: и пра́здники и новоме́сячія твоя́ отвращу́: поне́же а́зъ глаго́лахъ, рече́ Адонаі́ Госпо́дь.
|
|
|
35
|
|
|
Сего́ ра́ди сія́ глаго́летъ Адонаі́ Госпо́дь: поне́же забы́ла мя́ єси́ и отве́ргла мене́ наза́дъ тѣ́ла твоєго́, и ты́ возми́ нече́стіє твоє́ и блу́дъ тво́й.
|
|
|
36
|
|
|
И рече́ Госпо́дь ко мнѣ́: сы́не человѣ́чь, не бу́деши ли суди́ти оолѣ́ и оолівѣ́, и возвѣсти́ши ли и́ма беззако́нія єю́?
|
|
|
37
|
|
|
я́ко любодѣ́йствовастѣ, и кро́вь въ рука́хъ єю́, и въ кумі́рѣхъ єю́ прелюбодѣ́йствовастѣ, и ча́да своя́, я́же роди́стѣ мнѣ́, провожда́стѣ и́мъ сквозѣ́ о́гнь.
|
|
|
38
|
|
|
Да́же и сія́ сотвори́стѣ ми́, оскверня́стѣ свята́я моя́ въ то́й де́нь, и суббо́ты моя́ оскверня́стѣ:
|
|
|
39
|
|
|
и внегда́ закала́стѣ ча́да своя́ кумі́ромъ свои́мъ, и вхожда́стѣ во свята́я моя́ въ то́й де́нь, є́же скверни́ти я́: и се́, та́ко творя́стѣ средѣ́ до́му моєго́:
|
|
|
40
|
|
|
и посыла́стѣ ко муже́мъ гряду́щымъ издале́ча, къ ни́мже посло́въ посыла́стѣ. И єгда́ приходи́ти и́мъ, а́біє умыва́лася єси́ и утваря́ла єси́ о́чи твои́ и украша́лася у́тварію,
|
|
|
41
|
|
|
и сѣдѣ́ла єси́ на одрѣ́ по́стланѣ, и трапе́за укра́шенна предъ лице́мъ єя́, и ѳиміа́мъ мо́й и єле́й мо́й предлага́ла предъ ни́ми, и веселя́хуся въ ни́хъ:
|
|
|
42
|
|
|
и гла́сомъ сли́чнымъ возглаша́ху, и ко муже́мъ от мно́жества человѣ́ча приходя́щымъ от пусты́ни, и дая́ху пе́рстни на ру́ки и́хъ и вѣне́цъ хвалы́ на главы́ и́хъ.
|
|
|
43
|
|
|
И реко́хъ: не въ си́хъ ли прелюбодѣ́йствуютъ? и дѣла́ блудни́цы, и сама́ соблуди́.
|
|
|
44
|
|
|
И вхожда́ху къ не́й: я́коже вла́зятъ къ женѣ́ блудни́цѣ, та́ко вла́зяху ко оолѣ́ и ко оолівѣ́, жена́мъ беззако́нницамъ, є́же сотвори́ти беззако́ніє.
|
|
|
45
|
|
|
Му́жіє же пра́ведніи, ті́и и отмстя́тъ и́ма отмще́ніємъ любодѣ́йницъ и отмще́ніємъ пролива́ющихъ кро́вь, я́ко любодѣ́йцы су́ть, и кро́вь въ рука́хъ и́хъ.
|
|
|
46
|
|
|
Сія́ глаго́летъ Адонаі́ Госпо́дь: приведи́ на ни́хъ наро́ды и да́ждь на ни́хъ мяте́жъ и разграбле́ніє,
|
|
|
47
|
|
|
и ве́ржи ка́меніє на ни́хъ, ка́меніє наро́довъ, и да избоду́тъ и́хъ мечьми́ свои́ми: сы́ны и́хъ и дще́ри и́хъ избію́тъ и до́мы и́хъ огне́мъ сожгу́тъ:
|
|
|
48
|
|
|
и отвращу́ нече́стіє от земли́, и нака́жутся вся́ жены́ и не сотворя́тъ по нече́стіємъ и́хъ:
|
|
|
49
|
|
|
и да́стся нече́стіє ва́ше на вы́: и [вся́] грѣхи́ кумі́ръ ва́шихъ пріи́мете и уразумѣ́єте, я́ко а́зъ Адонаі́ Госпо́дь.
|
|
|
Глава 24
|
|
|
1
|
|
|
И бы́сть сло́во Госпо́дне ко мнѣ́, въ девя́тоє лѣ́то, въ ме́сяцъ деся́тый, въ деся́тый де́нь ме́сяца, глаго́ля:
|
|
|
2
|
|
|
сы́не человѣ́чь, напиши́ себѣ́ и́мя дне́ сего́, от него́же укрѣпи́ся ца́рь Вавило́нскій на Ієрусали́мъ, от сего́ дне́, и́же дне́сь,
|
|
|
3
|
|
|
и рцы́ при́тчу къ до́му прогнѣвля́ющему, и рече́ши къ ни́мъ: сія́ глаго́летъ Адонаі́ Госпо́дь: наста́ви коно́бъ, наста́ви и влі́й въ о́нь во́ду,
|
|
|
4
|
|
|
и ве́рзи въ о́нь на дво́є разсѣче́ная, вся́коє разсѣче́ніє до́броє, го́лень и ра́мо, обрѣ́зана от косте́й,
|
|
|
5
|
|
|
о избра́нныхъ ското́въ взя́тая, и подгнѣща́й костьми́ подъ ними́: возврѣ́ и воскипѣ́, и свари́шася ко́сти єго́ посредѣ́ єго́.
|
|
|
6
|
|
|
Того́ ра́ди сія́ глаго́летъ Адонаі́ Госпо́дь: о, граде́ крове́й! коно́бе, въ не́мже є́сть я́дъ, и я́дъ не изы́де изъ него́: по у́домъ єго́ изнесе́, не паде́ на не́мъ жре́бій.
|
|
|
7
|
|
|
Я́ко кро́вь єго́ средѣ́ єго́ є́сть, на гла́дцѣмъ ка́мени вчини́хъ ю́: не пролія́хъ єя́ на зе́млю, є́же покры́ти ю́ земле́ю,
|
|
|
8
|
|
|
є́же навести́ я́рость мою́ [на ню́], во отмще́ніє є́же отмсти́ти: да́хъ кро́вь єго́ на гла́дцѣмъ ка́мени, є́же не покры́ти єя́.
|
|
|
9
|
|
|
Того́ ра́ди сія́ глаго́летъ Адонаі́ Госпо́дь: о, лю́тѣ, граде́ крове́й! а́зъ же возвели́чу главню́
|
|
|
10
|
|
|
и умно́жу дрова́ и возгнѣщу́ о́гнь, я́ко да иста́ютъ мяса́, и оскудѣ́єтъ юха́, и ко́сти иста́ютъ,
|
|
|
11
|
|
|
и ста́нетъ на главня́хъ єго́, [то́щь] разгорѣ́ся, я́ко да изгори́тъ, и распали́тся и сгори́тъ мѣ́дь єго́, и иста́єтъ средѣ́ єго́ нечистота́ єго́, и оскудѣ́єтъ я́дъ єго́:
|
|
|
12
|
|
|
да смири́тся я́дъ єго́, и не изы́детъ изъ него́ мно́гій я́дъ єго́, и посрами́тся я́дъ єго́:
|
|
|
13
|
|
|
въ нечистотѣ́ твоє́й укро́пъ, поне́же оскверня́лся єси́ ты́ и не очи́стился от нечистоты́ твоєя́: и что́ бу́детъ а́ще не очи́стишися по се́мъ, до́ндеже испо́лню я́рость мою́ въ тебѣ́?
|
|
|
14
|
|
|
А́зъ Госпо́дь глаго́лахъ, и пріи́детъ, и сотворю́, и не укосню́, и не пощажу́, и не бу́ду умоле́нъ: по путе́мъ твои́мъ и по помысло́мъ твои́мъ сужду́ тебѣ́, глаго́летъ Адонаі́ Госпо́дь: сего́ ра́ди, се́, а́зъ сужду́ тебѣ́ по кро́вемъ твои́мъ и по помысло́мъ твои́мъ сужду́ тебѣ́, нечи́сте, преслову́те и вели́кій на разгнѣ́ваніє.
|
|
|
15
|
|
|
И бы́сть сло́во Госпо́дне ко мнѣ́ глаго́ля:
|
|
|
16
|
|
|
сы́не человѣ́чь, се́, а́зъ взе́млю от тебе́ жела́нія оче́съ твои́хъ въ пораже́ніи, не воспла́чи, ниже́ возрыда́й, ниже́ да пріи́дутъ тебѣ́ сле́зы,
|
|
|
17
|
|
|
возстени́ молчя́: стена́ніє кро́ве, чре́слъ пла́чь є́сть: да бу́дутъ вла́си твои́ сплете́ни на тебѣ́, и сапо́зи твои́ на нога́хъ твои́хъ, и да не утѣ́шишися устна́ми и́хъ, и хлѣ́ба муже́й да не снѣ́си.
|
|
|
18
|
|
|
И глаго́лахъ къ лю́демъ зау́тра, я́коже заповѣ́да ми́, и у́мре жена́ моя́ въ ве́черъ, и сотвори́хъ зау́тра, я́коже повелѣ́ся ми́.
|
|
|
19
|
|
|
И реко́ша ко мнѣ́ лю́діє: не возвѣсти́ши ли на́мъ, что́ су́ть сія́, я́же ты́ твори́ши?
|
|
|
20
|
|
|
И реко́хъ къ ни́мъ: сло́во Госпо́дне бы́сть ко мнѣ́ глаго́ля:
|
|
|
21
|
|
|
рцы́ къ до́му Ізра́илеву, сія́ глаго́летъ Адонаі́ Госпо́дь: се́, а́зъ оскверню́ свята́я моя́, велича́нія крѣ́пости ва́шея, жела́нія оче́съ ва́шихъ, и и́хже щадя́тъ ду́ши ва́шя: и сы́нове ва́ши и дще́ри ва́шя, я́же оста́висте, мече́мъ паду́тъ:
|
|
|
22
|
|
|
и сотворите́, я́коже а́зъ сотвори́хъ: от у́стъ и́хъ не утѣ́шитеся и хлѣ́ба муже́й не снѣ́сте,
|
|
|
23
|
|
|
и вла́си ва́ши на глава́хъ ва́шихъ, и сапо́зи ва́ши на нога́хъ ва́шихъ: не бу́дете терза́тися, ниже́ пла́кати, и иста́єте въ непра́вдахъ ва́шихъ, и не утѣ́шите кі́йждо бра́та своєго́.
|
|
|
24
|
|
|
И бу́детъ ва́мъ Ієзекі́иль въ чу́до: по всему́ єли́ка сотвори́хъ, сотворите́: єгда́ пріи́дутъ сія́, и уразумѣ́єте, я́ко а́зъ Адонаі́ Госпо́дь.
|
|
|
25
|
|
|
И ты́, сы́не человѣ́чь, не въ де́нь ли то́й, єгда́ возму́ от ни́хъ крѣ́пость и́хъ, вознесе́ніє хвальбы́ и́хъ, жела́нія о́чію и́хъ и возноше́ніє души́ и́хъ, сы́ны и́хъ и дще́ри и́хъ:
|
|
|
26
|
|
|
въ то́й де́нь пріи́детъ уцѣлѣ́вый къ тебѣ́ возвѣсти́ти тебѣ́ во у́шы,
|
|
|
27
|
|
|
въ то́й де́нь отве́рзутся уста́ твоя́ ко уцѣлѣ́вшему, и возглаго́леши и не премолчи́ши ктому́, и бу́деши и́мъ въ чу́до: и увѣ́дятъ, я́ко а́зъ Адонаі́ Госпо́дь.
|
|
|
Глава 25
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, утверди́ лице́ твоє́ на сы́ны Аммо́ни и прорцы́ на ня́,
|
|
|
3
|
|
|
и рече́ши сыно́мъ Аммо́нимъ [глаго́ля]: слы́шите сло́во Го́спода Адоная́, сія́ глаго́летъ Адонаі́ Госпо́дь: поне́же пора́довастеся от святы́хъ мои́хъ, я́ко оскверне́на бы́ша, и о земли́ Ізра́илевѣ, я́ко поги́бе, и о дому́ Іу́динѣ, я́ко отъи́де въ плѣне́ніє:
|
|
|
4
|
|
|
того́ ра́ди, се́, а́зъ предаю́ ва́съ сыно́мъ Кеде́млимъ въ наслѣ́діє, и вселя́тся со имѣ́ніємъ свои́мъ въ тебѣ́ и поста́вятъ въ тебѣ́ селе́нія своя́: ті́и поядя́тъ плоды́ твоя́, и ті́и испію́тъ ту́къ тво́й:
|
|
|
5
|
|
|
и да́мъ гра́дъ Аммо́нь па́ствы велблю́довъ и сы́ны Аммо́ни на па́ству ове́цъ, и уразумѣ́єте, я́ко а́зъ Адонаі́ Госпо́дь.
|
|
|
6
|
|
|
Сего́ ра́ди та́ко глаго́летъ Госпо́дь Бо́гъ: поне́же восплеска́лъ єси́ руко́ю твоє́ю и потопта́лъ ного́ю твоє́ю и пора́довался єси́ душе́ю твоє́ю о земли́ Ізра́илевѣ,
|
|
|
7
|
|
|
того́ ра́ди, се́, а́зъ простру́ ру́ку мою́ на тя́ и да́мъ тя́ въ разграбле́ніє язы́комъ, и потреблю́ тя от люді́й и погублю́ тя от стра́нъ па́губою, и увѣ́си, я́ко а́зъ Адонаі́ Госпо́дь.
|
|
|
8
|
|
|
Сія́ глаго́летъ Адонаі́ Госпо́дь: поне́же рече́ Моа́въ и Сиі́ръ: се́, я́коже вси́ язы́цы, до́мъ Ізра́илевъ и Іу́да,
|
|
|
9
|
|
|
сего́ ра́ди, се́, а́зъ разсла́блю мы́шцу Моа́влю от градо́въ кра́йнихъ єго́, избра́нную зе́млю, до́мъ Іасіму́ѳовъ надъ исто́чникомъ гра́да примо́рскаго [ваєлмо́на и каріаѳаі́ма]:
|
|
|
10
|
|
|
сы́ны Кеде́мли на сы́ны Аммо́ни да́хъ я́ въ наслѣ́діє, я́ко да не бу́детъ па́мяти сыно́въ Аммо́нихъ во язы́цѣхъ:
|
|
|
11
|
|
|
и въ Моа́вѣ сотворю́ отмще́ніє, и увѣ́дятъ, я́ко а́зъ Госпо́дь.
|
|
|
12
|
|
|
Сія́ глаго́летъ Адонаі́ Госпо́дь: поне́же сотвори́ Ідуме́а, єгда́ отмсти́ша ті́и отмще́ніємъ [во гнѣ́вѣ] до́му Іу́дову, и памятозло́бствоваша и отмсти́ша прю́ от ни́хъ:
|
|
|
13
|
|
|
того́ ра́ди сія́ глаго́летъ Адонаі́ Госпо́дь: простру́ ру́ку мою́ на Ідуме́ю и потреблю́ от нея́ человѣ́ки и ско́тъ и поста́влю ю́ пу́сту, и от Ѳема́нъ гони́ми мече́мъ паду́тъ:
|
|
|
14
|
|
|
и да́мъ отмще́ніє моє́ на Ідуме́ю руко́ю люді́й мои́хъ Ізра́иля, и сотворя́тъ во Ідуме́и по гнѣ́ву моєму́ и по я́рости моє́й, и увѣ́дятъ отмще́ніє моє́, глаго́летъ Адонаі́ Госпо́дь.
|
|
|
15
|
|
|
Сего́ ра́ди сія́ глаго́летъ Адонаі́ Госпо́дь: поне́же сотвори́ша иноплеме́нницы во отмще́ніи и возста́виша ме́сть ра́дующеся все́ю душе́ю є́же потреби́ти да́же до вѣ́ка,
|
|
|
16
|
|
|
того́ ра́ди сія́ глаго́летъ Адонаі́ Госпо́дь: се́, а́зъ простру́ ру́ку мою́ на иноплеме́нники, и потреблю́ кри́тянъ, и погублю́ оста́вшыя живу́щыя на примо́ріи,
|
|
|
17
|
|
|
и сотворю́ въ ни́хъ отмще́ніє вели́ко, во обличе́ніихъ я́рости моєя́, и уразумѣ́ютъ, я́ко а́зъ Адонаі́ Госпо́дь, єгда́ да́мъ отмще́ніє моє́ на ня́.
|
|
|
Глава 26
|
|
|
1
|
|
|
И бы́сть во єдинонадеся́тоє лѣ́то, въ пе́рвый де́нь ме́сяца, бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, поне́же рече́ со́ръ на Ієрусали́ма: бла́гоже, сокруши́ся, погибо́ша язы́цы, обрати́ся ко мнѣ́, и́же бѣ́ испо́лненый, опустѣ́:
|
|
|
3
|
|
|
того́ ра́ди сія́ глаго́летъ Адонаі́ Госпо́дь: се́, а́зъ на тя́, со́ръ, и приведу́ на тя́ язы́ки мно́ги, я́коже восхо́дитъ мо́ре волна́ми свои́ми.
|
|
|
4
|
|
|
И обваля́тъ стѣ́ны со́ра и разоря́тъ столпы́ твоя́, и развѣ́ю пра́хъ єго́ изъ него́ и да́мъ єго́ во гла́докъ ка́мень.
|
|
|
5
|
|
|
Суше́ніє мре́жей бу́детъ средѣ́ мо́ря, я́ко а́зъ глаго́лахъ, глаго́летъ Адонаі́ Госпо́дь: и бу́детъ на плѣне́ніє язы́комъ,
|
|
|
6
|
|
|
и дще́ри єго́, я́же на по́ли, мече́мъ убіє́ны бу́дутъ, и увѣ́дятъ, я́ко а́зъ Госпо́дь.
|
|
|
7
|
|
|
Я́ко сія́ глаго́летъ Адонаі́ Госпо́дь: се́, а́зъ наведу́ на тя́, со́ръ, Навуходоно́сора царя́ Вавило́нска от сѣ́вера, ца́рь царе́мъ є́сть, съ ко́ньми и колесни́цами и съ ко́нниками и собра́ніємъ мно́гихъ язы́ковъ зѣло́:
|
|
|
8
|
|
|
се́й дще́ри твоя́ на по́ли мече́мъ избіє́тъ, и приста́витъ на тя́ стражбу́ и огради́тъ тя́, и окопа́єтъ тя́ ро́вомъ и сотвори́тъ о́крестъ тебе́ остро́гъ, и обста́витъ ору́жіємъ и ко́пія своя́ пря́мо тебѣ́ поста́витъ,
|
|
|
9
|
|
|
стѣ́ны твоя́ и пи́рги твоя́ разори́тъ ору́жіємъ свои́мъ:
|
|
|
10
|
|
|
от мно́жества ко́ней єго́ покры́єтъ тя́ пра́хъ и́хъ, и от ржа́нія ко́ней єго́ и от коле́съ колесни́цъ єго́ потрясу́тся стѣ́ны твоя́, входя́щу єму́ во врата́ твоя́, а́ки входя́щу во гра́дъ съ по́ля:
|
|
|
11
|
|
|
копы́тами ко́ней свои́хъ поперу́тъ вся́ сто́гны твоя́: лю́ди твоя́ мече́мъ изсѣче́тъ, и соста́въ крѣ́пости твоєя́ на земли́ пове́ржетъ,
|
|
|
12
|
|
|
и плѣни́тъ си́лу твою́, и во́зметъ имѣ́нія твоя́, и разсы́плетъ стѣ́ны твоя́, и до́мы твоя́ вожделѣ́нныя разори́тъ, и древа́ твоя́ и ка́меніє твоє́ и пе́рсть твою́ средѣ́ мо́ря вве́ржетъ,
|
|
|
13
|
|
|
и упраздни́тъ мно́жество мусікі́й твои́хъ, и гла́съ пѣвни́цъ твои́хъ не услы́шится въ тебѣ́ ктому́.
|
|
|
14
|
|
|
И да́мъ тя́ во ка́мень гла́докъ, суше́ніє мре́жноє бу́деши, не согради́шися ктому́, я́ко а́зъ глаго́лахъ, глаго́летъ Адонаі́ Госпо́дь.
|
|
|
15
|
|
|
Я́ко сія́ глаго́летъ Адонаі́ Госпо́дь со́ру: не от гла́са ли паде́нія твоєго́, єгда́ возстену́тъ я́звеніи твои́, єгда́ извлече́тся ме́чь посредѣ́ тебе́, потрясу́тся о́строви?
|
|
|
16
|
|
|
И сни́дутъ со престо́лъ свои́хъ вси́ кня́зи язы́къ морски́хъ, и све́ргутъ вѣнцы́ со гла́въ свои́хъ, и ри́зы своя́ испещре́нныя совлеку́тъ съ себе́, у́жасомъ ужа́снутся: на земли́ ся́дутъ, и убоя́тся поги́бели своєя́, и возстену́тъ о тебѣ́,
|
|
|
17
|
|
|
и пріи́мутъ о тебѣ́ пла́чь, глаго́люще: ка́ко поги́блъ и разсы́пался єси́ от мо́ря, гра́де хвали́мый, и́же бы́лъ єси́ крѣ́покъ на мо́ри, ты́ и живу́щіи въ тебѣ́, и́же дая́лъ єси́ стра́хъ тво́й всѣ́мъ живу́щымъ въ тебѣ́?
|
|
|
18
|
|
|
И убоя́тся [вси́] о́строви от дне́ паде́нія твоєго́, и смяту́тся о́строви въ мо́ри от исхо́да твоєго́.
|
|
|
19
|
|
|
Я́ко сія́ глаго́летъ Адонаі́ Госпо́дь: єгда́ да́мъ тя́ гра́дъ опустѣ́вшь, я́коже гра́ды ненаселе́ны никогда́же, внегда́ возведу́ на тя́ бе́здну, и покры́єтъ тя́ вода́ мно́га:
|
|
|
20
|
|
|
и сведу́ тя къ низходя́щымъ въ про́пасть къ лю́демъ вѣ́ка, и вселю́ тя во глубина́хъ земны́хъ, я́ко пусты́ню вѣ́чную съ низходя́щими въ про́пасть, я́ко да не насели́шися, ниже́ воста́неши на земли́ живота́:
|
|
|
21
|
|
|
на па́губу тя́ отда́мъ, и не бу́деши ктому́, и взы́щешися и не обря́щешися во вѣ́къ, глаго́летъ Адонаі́ Госпо́дь.
|
|
|
Глава 27
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
и ты́, сы́не человѣ́чь, возми́ на со́ръ пла́чь,
|
|
|
3
|
|
|
и рече́ши со́ру населе́нному на морстѣ́мъ вхо́дѣ, то́ржищу люді́й от острово́въ мно́гихъ, сія́ глаго́летъ Адонаі́ Госпо́дь со́ру: ты́ ре́клъ єси́: а́зъ са́мъ возложи́хъ на мя́ мою́ добро́ту,
|
|
|
4
|
|
|
въ се́рдцы морстѣ́мъ веєлі́му, и сы́нове твои́ возложи́ша на тя́ добро́ту.
|
|
|
5
|
|
|
Ке́дръ от сані́ра истеса́ся тебѣ́, то́нкія до́ски кипарі́сныя от Ліва́на взяты́ бы́ша, є́же сотвори́ти тебѣ́ ядри́ла Єло́ва:
|
|
|
6
|
|
|
от Васані́тіды сотвори́ша ве́сла твоя́: святи́лища твоя́ состро́иша от слоно́выхъ [косте́й], до́мы древя́ны от острово́въ Хеттіи́мскихъ:
|
|
|
7
|
|
|
виссо́нъ со испещре́ніємъ от Єги́пта бы́сть тебѣ́ посте́ля, є́же обложи́ти тебѣ́ сла́ву и облещи́ тя въ синету́ и во багряни́цу от острово́въ Єліссе́, и бы́сть оде́жда твоя́.
|
|
|
8
|
|
|
И кня́зи твои́ живу́щіи во Сідо́нѣ и Араді́ане бы́ша ве́сленицы твои́: прему́дріи твои́, со́ръ, и́же бы́ша въ тебѣ́, сі́и ко́рмчіи твои́.
|
|
|
9
|
|
|
Старѣ́йшины вівлі́йстіи и прему́дріи и́хъ, и́же бы́ша въ тебѣ́, ті́и укрѣпля́ху совѣ́тъ тво́й: и вси́ корабли́ морсті́и и ве́сленицы и́хъ бы́ша въ тебѣ́ ко за́падомъ за́падовъ.
|
|
|
10
|
|
|
Пе́рсяне и ли́дяне и Ліви́ане бѣ́ша въ си́лѣ твоє́й, му́жіє до́бліи твои́ щиты́ и шле́мы повѣ́сиша въ тебѣ́, сі́и да́ша сла́ву твою́.
|
|
|
11
|
|
|
Сы́нове Араді́йстіи и си́ла твоя́ на забра́лѣхъ твои́хъ о́крестъ: но и ми́дяне во пи́ргахъ твои́хъ бы́ша стра́жіє, ту́лы своя́ обѣ́сиша на забра́лѣхъ твои́хъ о́крестъ: сі́и соверши́ша твою́ добро́ту.
|
|
|
12
|
|
|
Кархидо́няне купцы́ твои́, от мно́жества си́лы твоєя́, сребро́ и зла́то, и мѣ́дь и желѣ́зо, и чи́стоє о́лово и свине́цъ да́ша ку́плю твою́.
|
|
|
13
|
|
|
Єлла́да вся́ и бли́жніи твои́ продая́ху въ тебѣ́ ду́шы человѣ́чы, и сосу́ды мѣ́дяны да́ша ку́плю твою́.
|
|
|
14
|
|
|
От до́му Ѳорга́мова ко́ни и ко́нники и мщя́та да́ша ку́плю твою́.
|
|
|
15
|
|
|
Сы́нове роді́йстіи купцы́ твои́ от острово́въ умно́жиша ку́плю твою́, зу́бы слоно́вы, и вводи́мымъ воздава́лъ єси́ мзды́ твоя́.
|
|
|
16
|
|
|
Человѣ́ки ку́плю твою́ от мно́жества примѣ́шенца твоєго́, ста́кти и пестроты́ и синету́ от Ѳарсі́са, и рамо́ѳъ и хорхо́ръ да́ша ку́плю твою́.
|
|
|
17
|
|
|
Іу́да и сы́нове Ізра́илевы, сі́и купцы́ твои́: продая́ніємъ пшени́цы и ми́ровъ и касі́и, и пе́рвый ме́дъ и єле́й и риті́ну да́ша примѣ́шенцу твоєму́.
|
|
|
18
|
|
|
Дама́скъ купцы́ твои́ от мно́жества всея́ си́лы твоєя́, віно́ от хелво́на, и во́лну блеща́щуся от Міли́та, и віно́ Деда́ново и Іона́ново и меозе́лево въ ку́плю твою́ да́ша.
|
|
|
19
|
|
|
От Ассіи́ла желѣ́зо дѣ́ланоє и коле́са въ примѣ́сницѣхъ твои́хъ су́ть.
|
|
|
20
|
|
|
Деда́нъ купцы́ твои́ со скоты́ избра́нными въ колесни́цы.
|
|
|
21
|
|
|
Араві́а и вси́ кня́зи Кида́рстіи, сі́и купцы́ руко́ю твоє́ю, велблю́ды и овны́ и а́гнцы въ тебѣ́ продадя́тъ, и́миже ку́плю творя́тъ.
|
|
|
22
|
|
|
Купцы́ са́вы и раммы́, ті́и купцы́ твои́ съ пе́рвыми сла́достьми и со ка́меніємъ драги́мъ, и зла́то да́ша ку́плю тебѣ́.
|
|
|
23
|
|
|
Харра́нъ, ханаа́ и Деда́нъ, сі́и купцы́ твои́: Сава́, Ассу́ръ и Харма́нъ купцы́ твои́,
|
|
|
24
|
|
|
принося́ще ку́плю синету́ и червлени́цу, и испещре́нная и сокро́вища избра́нная свя́зана у́жами, кипарі́сная.
|
|
|
25
|
|
|
Корабли́, въ тѣ́хъ ку́пля твоя́, [корабли́] кархидо́нстіи купцы́ твои́, во мно́жествѣ смѣ́сникъ твои́хъ, и насы́тился єси́, и отягча́лъ зѣло́ въ сердца́хъ морски́хъ.
|
|
|
26
|
|
|
Въ водѣ́ мно́зѣ привожда́ху тя́ ве́сленицы твои́: вѣ́тръ ю́жный сокруши́ тя въ се́рдцы морстѣ́мъ.
|
|
|
27
|
|
|
Бы́ша си́лы твоя́ и мзда́ твоя́ от смѣ́сникъ твои́хъ, и ве́сленицы твои́ и ко́рмчіи твои́, и совѣ́тницы твои́ и смѣ́сницы от смѣ́сниковъ твои́хъ, и вси́ му́жіє твои́ до́бліи въ тебѣ́ и ве́сь со́нмъ тво́й паду́тъ средѣ́ тебе́ въ се́рдцы морстѣ́мъ, въ де́нь паде́нія твоєго́.
|
|
|
28
|
|
|
От гла́са во́пля твоєго́ ко́рмчіи твои́ стра́хомъ убоя́тся.
|
|
|
29
|
|
|
И сни́дутъ съ корабле́й свои́хъ вси́ ве́сленицы твои́, и вса́дницы и ловцы́ морсті́и на земли́ ста́нутъ:
|
|
|
30
|
|
|
и воскли́кнутъ на тя́ гла́сомъ свои́мъ, и воскрича́тъ го́рцѣ, и возложа́тъ зе́млю на главы́ своя́, и пра́хъ посте́лютъ:
|
|
|
31
|
|
|
и оплѣши́вѣютъ надъ тобо́ю плѣшьми́, и облеку́тся во вре́тище, и воспла́чутся о тебѣ́ въ го́рести души́, и пла́чемъ го́рькимъ ужа́снутся:
|
|
|
32
|
|
|
и во́змутъ о тебѣ́ сы́нове и́хъ пла́чь, возрыда́ютъ пла́каніємъ о тебѣ́: кто́ я́коже ти́ръ умо́лкнувый средѣ́ мо́ря? коли́ку обрѣ́лъ єси́ мзду́ от мо́ря?
|
|
|
33
|
|
|
Напо́лнилъ єси́ страны́ от мно́жества твоєго́ и от смѣ́сникъ твои́хъ обогати́лъ єси́ вся́ цари́ земны́я.
|
|
|
34
|
|
|
Ны́нѣ же сокруши́лся єси́ въ мо́ри, во глубина́хъ во́дныхъ смѣ́сницы твои́, и ве́сь со́нмъ тво́й средѣ́ тебе́ падо́ша, и вси́ ве́сленицы твои́.
|
|
|
35
|
|
|
Вси́ же живу́щіи во о́стровѣхъ уны́ли по тебѣ́, и ца́ріє и́хъ у́жасомъ ужасо́шася, и прослези́ся лице́ и́хъ.
|
|
|
36
|
|
|
Купцы́ от язы́къ позви́ждутъ о тебѣ́, въ поги́бель бы́лъ єси́, и ктому́ не бу́деши въ вѣ́къ, глаго́летъ Госпо́дь Бо́гъ.
|
|
|
Глава 28
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
и ты́, сы́не человѣ́чь, рцы́ кня́зю ти́рску: сія́ глаго́летъ Адонаі́ Госпо́дь: поне́же вознесе́ся се́рдце твоє́, и ре́клъ єси́: а́зъ є́смь Бо́гъ, въ селе́ніє Бо́жіє всели́хся въ се́рдцы морстѣ́мъ: ты́ же человѣ́къ єси́, а не Бо́гъ, и положи́лъ єси́ се́рдце твоє́ я́ко се́рдце Бо́жіє.
|
|
|
3
|
|
|
Єда́ прему́дрѣє ты́ єси́ даніи́ла? прему́дріи не наказа́ша тебе́ хи́тростію своє́ю.
|
|
|
4
|
|
|
Єда́ хи́тростію твоє́ю или́ смы́сломъ твои́мъ сотвори́лъ єси́ себѣ́ си́лу и притяжа́лъ єси́ сребро́ и зла́то въ сокро́вищихъ твои́хъ?
|
|
|
5
|
|
|
или́ во мно́зѣй хи́трости твоє́й и въ ку́пли твоє́й умно́жилъ єси́ си́лу твою́? вознесе́ся се́рдце твоє́ въ си́лѣ твоє́й.
|
|
|
6
|
|
|
Того́ ра́ди сія́ глаго́летъ Адонаі́ Госпо́дь: поне́же да́лъ єси́ се́рдце своє́ я́ко се́рдце Бо́жіє,
|
|
|
7
|
|
|
вмѣ́сто сего́, се́, а́зъ наведу́ на тя́ чужды́я губи́тели от язы́къ, и извлеку́тъ мечы́ своя́ на тя́ и на добро́ту хи́трости твоєя́, и посте́лютъ добро́ту твою́ въ погубле́ніє,
|
|
|
8
|
|
|
и сведу́тъ тя́, и у́мреши сме́ртію я́звеныхъ въ се́рдцы морстѣ́мъ.
|
|
|
9
|
|
|
Єда́ рече́ши глаго́ля предъ убива́ющими тя́: Бо́гъ є́смь а́зъ? ты́ же человѣ́къ єси́, а не Бо́гъ, въ руцѣ́ убива́ющихъ тя́.
|
|
|
10
|
|
|
Смертьми́ необрѣ́заныхъ у́мреши въ рука́хъ чужди́хъ: я́ко а́зъ реко́хъ, глаго́летъ Адонаі́ Госпо́дь.
|
|
|
11
|
|
|
И бы́сть сло́во Госпо́дне ко мнѣ́ глаго́ля:
|
|
|
12
|
|
|
сы́не человѣ́чь, возми́ пла́чь на кня́зя ти́рска и рцы́ єму́: сія́ глаго́летъ Адонаі́ Госпо́дь: ты́ єси́ печа́ть уподобле́нія, испо́лненъ прему́дрости и вѣне́цъ добро́ты,
|
|
|
13
|
|
|
въ сла́дости рая́ Бо́жія бы́лъ єси́, вся́кимъ ка́меніємъ драги́мъ украси́лся єси́, Са́рдіємъ и топа́зіємъ, и смара́гдомъ и иакі́нѳомъ, и Анѳра́ксомъ и сапфі́ромъ, и Іа́спісомъ и сребро́мъ и зла́томъ, и Ліги́ріємъ и Аха́томъ, и амеѳи́стомъ и хрисолі́ѳомъ, и вири́лліємъ и о́нихомъ и злато́мъ напо́лнилъ єси́ сокро́вища твоя́ и жи́тницы твоя́, от него́же дне́ со́зданъ єси́.
|
|
|
14
|
|
|
Ты́, съ херуві́момъ вчини́хъ тя́ въ горѣ́ святѣ́й Бо́жіи, бы́лъ єси́ средѣ́ ка́меней о́гненныхъ.
|
|
|
15
|
|
|
Бы́лъ єси́ ты́ непоро́ченъ во дне́хъ твои́хъ, от него́же дне́ со́зданъ єси́, до́ндеже обрѣто́шася непра́вды въ тебѣ́.
|
|
|
16
|
|
|
От мно́жества ку́пли твоєя́ напо́лнилъ єси́ сокро́вища твоя́ беззако́нія, и согрѣши́лъ єси́, и уя́звленъ єси́ от горы́ Бо́жія: и сведе́ тя херуві́мъ осѣняя́й от среды́ камы́ковъ о́гненныхъ.
|
|
|
17
|
|
|
Вознесе́ся се́рдце твоє́ въ добро́тѣ твоє́й, истлѣ́ хи́трость твоя́ съ добро́тою твоє́ю: мно́жества ра́ди грѣхо́въ твои́хъ на зе́млю поверго́хъ тя́, предъ цари́ да́хъ тя́ во обличе́ніє.
|
|
|
18
|
|
|
Мно́жества ра́ди грѣхо́въ твои́хъ и непра́вдъ ку́пли твоєя́, оскверни́лъ єси́ свята́я твоя́, и изведу́ о́гнь от среды́ твоєя́, се́й снѣ́сть тя́: и да́мъ тя́ во пра́хъ на земли́ предъ всѣ́ми ви́дящими тя́.
|
|
|
19
|
|
|
И вси́ вѣ́дящіи тебе́ во язы́цѣхъ возстену́тъ по тебѣ́: па́губа учине́нъ єси́, и не бу́деши ктому́ во вѣ́къ.
|
|
|
20
|
|
|
И бы́сть сло́во Госпо́дне ко мнѣ́ глаго́ля:
|
|
|
21
|
|
|
сы́не человѣ́чь, утверди́ лице́ твоє́ на Сідо́на и прорцы́ о не́мъ и рцы́:
|
|
|
22
|
|
|
сія́ глаго́летъ Адонаі́ Госпо́дь: се́, а́зъ на тя́, Сідо́не, и просла́влюся въ тебѣ́, и уразумѣ́єши, я́ко а́зъ є́смь Госпо́дь, єгда́ сотворю́ въ тебѣ́ су́дъ и освящу́ся въ тебѣ́:
|
|
|
23
|
|
|
и послю́ на тя́ сме́рть, и кро́вь въ сто́гнахъ твои́хъ бу́детъ, и паду́тъ я́звеніи средѣ́ тебе́ мече́мъ, въ тебѣ́ и о́крестъ тебе́, и увѣ́дятъ, я́ко а́зъ Госпо́дь:
|
|
|
24
|
|
|
и не бу́детъ ктому́ до́му Ізра́илеву осте́нъ го́рести и те́рнъ болѣ́зни от всѣ́хъ окре́стныхъ єго́ обезче́стившихъ и́хъ, и уразумѣ́ютъ, я́ко а́зъ є́смь Адонаі́ Госпо́дь.
|
|
|
25
|
|
|
Та́ко глаго́летъ Адонаі́ Госпо́дь: и соберу́ до́мъ Ізра́илевъ от язы́къ, идѣ́же разсы́пашася та́мо, и освящу́ся въ ни́хъ предъ людьми́ и язы́ки: и вселя́тся на земли́ своє́й, ю́же да́хъ рабу́ моєму́ Іа́кову,
|
|
|
26
|
|
|
и населя́тся на не́й съ наде́ждею, и сози́ждутъ до́мы, и насадя́тъ віногра́ды, и вселя́тся на не́й съ наде́ждею, єгда́ сотворю́ су́дъ во всѣ́хъ, и́же укори́ша я́ во окре́стныхъ и́хъ: и уразумѣ́ютъ, я́ко а́зъ Госпо́дь Бо́гъ и́хъ и Бо́гъ отце́въ и́хъ.
|
|
|
Глава 29
|
|
|
1
|
|
|
Въ деся́тоє лѣ́то, въ деся́тый ме́сяцъ, [въ пе́рвый де́нь] ме́сяца, бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, утверди́ лице́ твоє́ на фарао́на царя́ Єги́петска и прорцы́ на́нь и на Єги́петъ ве́сь:
|
|
|
3
|
|
|
глаго́ли и рцы́: си́це глаго́летъ Адонаі́ Госпо́дь: се́, а́зъ наведу́ на тя́, фарао́не, царю́ Єги́петскій, змі́а вели́каго, сѣдя́щаго средѣ́ рѣ́къ свои́хъ, глаго́лющаго: моя́ су́ть рѣ́ки, и а́зъ сотвори́хъ я́.
|
|
|
4
|
|
|
А́зъ же да́мъ узду́ въ че́люсти твоя́, и прилѣплю́ ры́бы рѣки́ твоєя́ ко крило́ма твои́ма, и возведу́ тя от среды́ рѣки́ твоєя́, и къ чешуя́мъ твои́мъ прильпну́тъ:
|
|
|
5
|
|
|
и низве́ргу тя́ вско́рѣ и вся́ ры́бы рѣки́ твоєя́: на лицы́ по́ля паде́ши, и не собере́шися, и не огради́шися, звѣре́мъ земны́мъ и пти́цамъ небе́снымъ да́хъ тя́ во снѣ́дь.
|
|
|
6
|
|
|
И увѣ́дятъ вси́ живу́щіи во Єги́птѣ, я́ко а́зъ є́смь Госпо́дь: зане́ бы́лъ єси́ же́злъ тро́стянъ до́му Ізра́илеву:
|
|
|
7
|
|
|
єгда́ я́ся тебе́ руко́ю своє́ю, сокруши́лся єси́, и єгда́ восплеска́ на ни́хъ вся́ка рука́, и єгда́ почи́ша на тебѣ́, сте́рлся єси́ и сломи́лъ єси́ и́хъ вся́ чре́сла.
|
|
|
8
|
|
|
Сего́ ра́ди та́ко глаго́летъ Адонаі́ Госпо́дь: се́, а́зъ наведу́ на тя́ ме́чь и погублю́ от тебе́ человѣ́ки и скоты́,
|
|
|
9
|
|
|
и бу́детъ земля́ Єги́петска въ поги́бель и во опустѣ́ніє, и уразумѣ́ютъ, я́ко а́зъ є́смь Госпо́дь. Поне́же глаго́лалъ єси́, я́ко рѣ́ки моя́ су́ть, и а́зъ сотвори́хъ я́:
|
|
|
10
|
|
|
того́ ра́ди, се́, а́зъ на тя́ и на вся́ рѣ́ки твоя́, и да́мъ зе́млю Єги́петску во опустѣ́ніє и въ ме́чь и въ поги́бель, от Магдо́ла и Сіи́ны и да́же до предѣ́лъ єѳіо́пскихъ:
|
|
|
11
|
|
|
не про́йдетъ сквозѣ́ єя́ нога́ человѣ́ча, ни нога́ ско́тія не поступи́тъ по не́й, и не насели́тся четы́редесять лѣ́тъ:
|
|
|
12
|
|
|
и да́мъ зе́млю єго́ въ па́губу средѣ́ земли́ опустѣ́лыя, и гра́ди єго́ средѣ́ градо́въ опустѣ́вшихъ бу́дутъ, въ разоре́ніи бу́дутъ четы́редесять лѣ́тъ: и разсѣ́ю Єги́пта во язы́цѣхъ, и развѣ́ю я́ по страна́мъ.
|
|
|
13
|
|
|
Сія́ глаго́летъ Адонаі́ Госпо́дь: по четы́редесятихъ лѣ́тѣхъ соберу́ Єги́птяны от язы́къ, а́може разсы́пашася,
|
|
|
14
|
|
|
и возвращу́ плѣ́нники Єги́петскія и вселю́ я́ въ зе́млю фаѳо́рскую, въ зе́млю, отону́дуже взя́ти бы́ша, и бу́детъ вла́сть смире́нна:
|
|
|
15
|
|
|
па́че всѣ́хъ власте́й бу́детъ смире́нна, и не вознесе́тся ктому́ надъ язы́ки, и ума́лены сотворю́ я́, є́же не бы́ти и́мъ мно́гимъ во язы́цѣхъ.
|
|
|
16
|
|
|
И не бу́дутъ ктому́ до́му Ізра́илеву въ наде́жду воспомина́ющую беззако́ніє, внегда́ послѣ́довати и́мъ по ни́хъ: и уразумѣ́ютъ, я́ко а́зъ є́смь Госпо́дь.
|
|
|
17
|
|
|
И бы́сть въ два́десять седмо́є лѣ́то, во єди́нъ де́нь ме́сяца пе́рваго, бы́сть сло́во Госпо́дне ко мнѣ́ глаго́ля:
|
|
|
18
|
|
|
сы́не человѣ́чь, Навуходоно́соръ ца́рь Вавило́нскъ порабо́ти си́лу свою́ рабо́тою вели́кою на ти́ра, вся́ка глава́ плѣши́ва и вся́ко ра́мо на́го: и мзда́ не бы́сть єму́ ни си́лѣ єго́ на ти́ра, за рабо́ту, є́юже рабо́таша на́нь.
|
|
|
19
|
|
|
Того́ ра́ди си́це глаго́летъ Адонаі́ Госпо́дь: се́, а́зъ даю́ Навуходоно́сору царю́ Вавило́нску зе́млю Єги́петску, и во́зметъ мно́жество єя́, и плѣни́тъ плѣ́нъ єя́, и расхи́титъ коры́сти єя́, и бу́детъ мзда́ си́лѣ єго́:
|
|
|
20
|
|
|
за слу́жбу єго́, є́юже послужи́ на ти́ра, да́хъ єму́ зе́млю Єги́петску, зане́ послужи́ мнѣ́, сія́ глаго́летъ Адонаі́ Госпо́дь.
|
|
|
21
|
|
|
Въ то́й де́нь взы́детъ ро́гъ всему́ до́му Ізра́илеву, и тебѣ́ да́мъ уста́ отве́рста средѣ́ и́хъ, и увѣ́дятъ, я́ко а́зъ є́смь Госпо́дь.
|
|
|
Глава 30
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, прорцы́ и рцы́: сія́ глаго́летъ Адонаі́ Госпо́дь:
|
|
|
3
|
|
|
возрыда́йте: оле, оле де́нь! я́ко бли́зъ де́нь Госпо́день, и приближа́єтся де́нь о́блака, и коне́цъ язы́ковъ бу́детъ:
|
|
|
4
|
|
|
и пріи́детъ ме́чь на Єги́птяны, и бу́детъ мяте́жъ во єѳіо́піи, и паду́тъ я́звеніи во Єги́птѣ, и взя́то бу́детъ мно́жество и́хъ, и паду́тся основа́нія єго́:
|
|
|
5
|
|
|
пе́рсяне и кри́тяне, и ли́дяне и Ліви́ане, и му́рини [и вся́ Ара́віа] и вси́ примѣ́сницы, и сы́нове, и́же от завѣ́та моєго́, въ не́мъ мече́мъ паду́тъ съ ни́мъ.
|
|
|
6
|
|
|
Сія́ глаго́летъ Госпо́дь: и паду́тъ подпо́ры Єги́пта, и сни́детъ укори́зна крѣ́пости єго́ от Магдо́ла да́же до Сіи́ны, мече́мъ паду́тъ въ не́мъ, глаго́летъ Адонаі́ Госпо́дь.
|
|
|
7
|
|
|
И опустѣ́ютъ средѣ́ стра́нъ поги́бшихъ, и гра́ди и́хъ средѣ́ градо́въ опустѣ́вшихъ бу́дутъ:
|
|
|
8
|
|
|
и уразумѣ́ютъ, я́ко а́зъ є́смь Госпо́дь, єгда́ да́мъ о́гнь на Єги́петъ, и сокруша́тся вси́ помага́ющіи єму́.
|
|
|
9
|
|
|
Въ то́й де́нь пріи́дутъ вѣ́стницы от лица́ моєго́ въ сієі́мъ тща́щеся погуби́ти наде́жду му́ринскія земли́, и бу́детъ и́мъ мяте́жъ въ де́нь Єги́петскъ, я́ко се́, приспѣ́.
|
|
|
10
|
|
|
Сія́ глаго́летъ Адонаі́ Госпо́дь: и погублю́ мно́жество Єги́птянъ руко́ю Навуходоно́сора царя́ Вавило́нска,
|
|
|
11
|
|
|
самаго́ и люді́й єго́ съ ни́мъ, губи́теліє от язы́къ по́слани погуби́ти зе́млю: и извлеку́тъ вси́ мечы́ своя́ на Єги́пта, и напо́лнится земля́ я́звеными.
|
|
|
12
|
|
|
И да́мъ рѣ́ки и́хъ во опустѣ́ніє и отда́мъ зе́млю въ ру́цѣ злы́хъ, и погублю́ зе́млю и исполне́ніє єя́ рука́ми чужди́хъ, а́зъ Госпо́дь глаго́лахъ.
|
|
|
13
|
|
|
Я́ко сія́ глаго́летъ Адонаі́ Госпо́дь: погублю́ кумі́ры и испражню́ вельмо́жы от мемфі́са и старѣ́йшины от земли́ Єги́петскія, и не бу́дутъ ктому́: и да́мъ стра́хъ во земли́ Єги́петстѣй.
|
|
|
14
|
|
|
И погублю́ зе́млю фаѳо́рскую, и да́мъ о́гнь на та́ніса, и сотворю́ отмще́ніє въ Діоспо́ли,
|
|
|
15
|
|
|
и излію́ я́рость мою́ на саі́нъ крѣ́пость Єги́петску, и погублю́ мно́жество ме́мфы.
|
|
|
16
|
|
|
И да́мъ о́гнь на Єги́пта, и мяте́жемъ возмяте́тся саи́съ, и въ Діоспо́ли бу́детъ разсѣ́лина, и разлію́тся во́ды.
|
|
|
17
|
|
|
Ю́ноши иліупо́ля и вува́ста мече́мъ паду́тъ, и жены́ въ плѣ́нъ по́йдутъ:
|
|
|
18
|
|
|
и въ тафне́сѣ помрачи́тся де́нь, єгда́ сокрушу́ та́мо ски́петры Єги́петски, и поги́бнетъ та́мо укори́зна крѣ́пости єго́, и того́ покры́єтъ о́блакъ, и дще́ри єго́ во плѣне́ніє отведу́тся.
|
|
|
19
|
|
|
И сотворю́ су́дъ во Єги́птѣ, и уразумѣ́ютъ, я́ко а́зъ є́смь Госпо́дь.
|
|
|
20
|
|
|
И бы́сть во єдинонадеся́тоє лѣ́то, въ пе́рвый ме́сяцъ, въ седмы́й де́нь ме́сяца, бы́сть сло́во Госпо́дне ко мнѣ́ глаго́ля:
|
|
|
21
|
|
|
сы́не человѣ́чь, мы́шцы фарао́на царя́ Єги́петска сотро́хъ, и се́, не помоли́ся, є́же да́ти єму́ цѣльбу́, приложи́ти єму́ пла́стырь, [обяза́ти,] да́ти си́лу, да во́зметъ ме́чь.
|
|
|
22
|
|
|
Того́ ра́ди сія́ глаго́летъ Адонаі́ Госпо́дь: се́, а́зъ на фарао́на царя́ Єги́петска, и сокрушу́ мы́шцы єго́ крѣ́пкія и протяже́ныя и сотре́ныя, и изри́ну ме́чь єго́ изъ руки́ єго́:
|
|
|
23
|
|
|
и разсѣ́ю Єги́пта во язы́ки и развѣ́ю и́хъ во страны́:
|
|
|
24
|
|
|
и укрѣплю́ мы́шцы царя́ Вавило́нска и да́мъ ме́чь мо́й въ ру́ку єго́, и наведе́тъ єго́ на Єги́пта, и плѣни́тъ плѣне́ніє єго́, и во́зметъ коры́сти єго́:
|
|
|
25
|
|
|
и укрѣплю́ мы́шцы царя́ Вавило́нска, мы́шцы же фарао́ни паду́тъ: и увѣ́дятъ, я́ко а́зъ є́смь Госпо́дь, єгда́ да́мъ ме́чь мо́й въ ру́цѣ царя́ Вавило́нска, и простре́тъ єго́ на зе́млю Єги́петску,
|
|
|
26
|
|
|
и разсѣ́ю Єги́пта во язы́ки и развѣ́ю и́хъ во страны́: и увѣ́дятъ вси́, я́ко а́зъ є́смь Госпо́дь.
|
|
|
Глава 31
|
|
|
1
|
|
|
И бы́сть во єдинонадеся́тоє лѣ́то, въ тре́тій ме́сяцъ, во єди́нъ де́нь ме́сяца, бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, рцы́ фарао́ну царю́ Єги́петску и мно́жеству єго́: кому́ уподо́билъ єси́ себе́ въ высотѣ́ твоє́й?
|
|
|
3
|
|
|
Се́, Ассу́ръ кипарі́съ въ Ліва́нѣ, до́бръ отра́сльми и высо́къ вели́чествомъ и ча́стъ покро́вомъ, и средѣ́ о́блакъ бы́сть вла́сть єго́:
|
|
|
4
|
|
|
вода́ воспита́ єго́, бе́здна вознесе́ єго́, рѣ́ки своя́ приведе́ о́крестъ садо́въ свои́хъ, и соста́вы своя́ испусти́ во вся́ древеса́ полева́я.
|
|
|
5
|
|
|
Сего́ ра́ди вознесе́ся вели́чество єго́ па́че всѣ́хъ древе́съ по́льныхъ, разшири́шася вѣ́твіє єго́, и вознесо́шася отра́сли єго́ от воды́ мно́ги, єгда́ протяже́ся.
|
|
|
6
|
|
|
Во отра́слехъ єго́ возгнѣзди́шася вся́ пти́цы небе́сныя, и подъ вѣ́твьми єго́ ражда́хуся вси́ звѣ́ріє по́льніи, подъ сѣ́нію єго́ всели́ся все́ мно́жество язы́ковъ.
|
|
|
7
|
|
|
И бы́сть до́бръ въ высотѣ́ своє́й мно́жества ра́ди вѣ́твій свои́хъ, я́ко бѣ́ша коре́ніє єго́ въ водѣ́ мно́зѣ.
|
|
|
8
|
|
|
И кипарі́си не таковы́ въ раи́ Бо́жіи, и со́сны неподо́бны отра́слемъ єго́, и є́ліє не бы́сть подо́бно вѣ́твіямъ єго́: вся́коє дре́во, є́же въ раи́ Бо́жіи, не бы́сть подо́бно єму́ въ добро́тѣ єго́, мно́жества ра́ди вѣ́твій єго́.
|
|
|
9
|
|
|
Добра́ сотвори́хъ єго́ во мно́жествѣ вѣ́твій єго́, и возревнова́ша єму́ древеса́ ра́йская сла́дости Бо́жія.
|
|
|
10
|
|
|
Того́ ра́ди сія́ глаго́летъ Адонаі́ Госпо́дь: поне́же бы́лъ єси́ вели́къ вели́чествомъ и да́лъ єси́ вла́сть свою́ во среди́ну о́блакъ, и вознесе́ся се́рдце єго́ въ высотѣ́ єго́, и ви́дѣхъ, єгда́ вознесе́ся:
|
|
|
11
|
|
|
и преда́хъ єго́ въ ру́цѣ кня́зя язы́ческа, и сотвори́ па́губу єго́, по нече́стію єго́.
|
|
|
12
|
|
|
И изгна́хъ єго́ а́зъ, и потреби́ша єго́ чужді́и губи́теліє от язы́къ, и поверго́ша єго́ на гора́хъ: и во всѣ́хъ де́брехъ падо́ша вѣ́тви єго́, и сотро́шася отра́сли єго́ на вся́цѣмъ по́ли земнѣ́мъ, и снидо́ша от покро́ва єго́ вси́ лю́діє язы́ковъ и разори́ша єго́.
|
|
|
13
|
|
|
Во паде́ніи єго́ почи́ша вся́ пти́цы небе́сныя, и на сте́блієхъ єго́ бы́ша вси́ звѣ́ріє се́лніи,
|
|
|
14
|
|
|
я́ко да не возно́сятся вели́чествомъ свои́мъ вся́ древеса́, я́же въ водѣ́, и не дадя́тъ вла́сти своєя́ средѣ́ о́блакъ, и не ста́нутъ въ высотѣ́ и́хъ къ нему́ вси́ пію́щіи во́ду, вси́ отда́ни бы́ша во сме́рть во глубину́ земли́, средѣ́ сыно́въ человѣ́ческихъ къ низходя́щымъ въ про́пасть.
|
|
|
15
|
|
|
Сія́ глаго́летъ Адонаі́ Госпо́дь: въ о́ньже де́нь сведе́ся во а́дъ, пла́кася о не́мъ бе́здна: и удержа́хъ рѣ́ки єя́ и возбрани́хъ мно́жеству во́дъ, и поме́рче о не́мъ Ліва́нъ, и вся́ древеса́ полева́я о не́мъ разсла́бишася:
|
|
|
16
|
|
|
от гла́са паде́нія єго́ потрясо́шася язы́цы, єгда́ свожда́хъ єго́ во а́дъ со снизходя́щими въ ро́въ, и утѣша́ху єго́ въ земли́ до́лнѣйшей вся́ древеса́ сла́дости, и избра́нная и до́брая Ліва́нова, вся́ пію́щая во́ду:
|
|
|
17
|
|
|
и та́ бо сведо́шася съ ни́мъ во а́дъ со я́звеными от меча́, и сѣ́мя єго́, и живу́щіи подъ покро́вомъ єго́ средѣ́ жи́зни своєя́ погибо́ша.
|
|
|
18
|
|
|
Кому́ уподо́бился єси́ си́лою и сла́вою и вели́чествомъ во древесѣ́хъ сла́дости? Слѣ́зи и сни́ди со древеса́ми сла́дости во глубину́ земну́ю: средѣ́ необрѣ́заныхъ у́спнеши со я́звеными мече́мъ: та́ко фарао́нъ и все́ мно́жество крѣ́пости єго́, глаго́летъ Адонаі́ Госпо́дь.
|
|
|
Глава 32
|
|
|
1
|
|
|
И бы́сть во второєна́десять лѣ́то, во вторыйна́десять ме́сяцъ, во єди́нъ де́нь ме́сяца,
|
|
|
2
|
|
|
бы́сть сло́во Госпо́дне ко мнѣ́ глаго́ля: сы́не человѣ́чь, возми́ пла́чь на фарао́на царя́ Єги́петска и рече́ши єму́: льву́ язы́ковъ уподо́бился єси́ ты́, и я́ко змі́й вели́кій, и́же въ мо́ри, и би́лъ єси́ рога́ми въ рѣка́хъ твои́хъ, и возмуща́лъ єси́ во́ду нога́ма твои́ма, и попира́лъ єси́ рѣ́ки твоя́.
|
|
|
3
|
|
|
Сія́ глаго́летъ Адонаі́ Госпо́дь: и возложу́ на тя́ сѣ́ти моя́ въ собра́ніи люді́й мно́гихъ,
|
|
|
4
|
|
|
и изведу́ тя у́дою моє́ю, и простру́ тя на земли́: поля́ напо́лнятся тебе́, и посажду́ на тебѣ́ вся́ пти́цы небе́сныя, и насы́щу тобо́ю вся́ звѣ́ри всея́ земли́:
|
|
|
5
|
|
|
и пове́ргу пло́ти твоя́ на гора́хъ, и напо́лню кро́вію твоє́ю всю́ зе́млю,
|
|
|
6
|
|
|
и напіє́тся земля́ от гно́я твоєго́, от мно́жества твоєго́ на гора́хъ: и де́бри напо́лню от тебе́,
|
|
|
7
|
|
|
и покры́ю не́бо, єгда́ уга́снеши, и помрачу́ звѣ́зды єго́, со́лнце во о́блацѣ сокры́ю, и луна́ не яви́тъ свѣ́та своєго́:
|
|
|
8
|
|
|
вся́ свѣти́ла небе́сная помрачу́ на тя́ и да́мъ тму́ на зе́млю твою́, глаго́летъ Адонаі́ Госпо́дь.
|
|
|
9
|
|
|
И разгнѣ́ваю сердца́ люді́й мно́гихъ, єгда́ изведу́ плѣ́нники твоя́ во язы́ки, въ зе́млю, єя́же не зна́лъ єси́.
|
|
|
10
|
|
|
И уны́ютъ о тебѣ́ язы́цы мно́зи, и ца́ріє и́хъ у́жасомъ ужа́снутся о тебѣ́, єгда́ налети́тъ ме́чь мо́й на ли́ца и́хъ, ча́юще паде́нія своєго́ от дне́ паде́нія твоєго́.
|
|
|
11
|
|
|
Я́ко сія́ глаго́летъ Адонаі́ Госпо́дь: ме́чь царя́ Вавило́нска пріи́детъ тебѣ́, мечьми́ исполи́новъ, и поражу́ крѣ́пость твою́:
|
|
|
12
|
|
|
губи́теліє от язы́къ вси́, и погубя́тъ укори́зну Єги́петску, и сокруши́тся вся́ крѣ́пость єго́.
|
|
|
13
|
|
|
И погублю́ вся́ скоты́ єго́ от воды́ мно́ги, и не возмути́тъ єя́ нога́ человѣ́ческа ктому́, и стопа́ ско́тія не сту́питъ на ню́.
|
|
|
14
|
|
|
Та́ко тогда́ умо́лкнутъ во́ды и́хъ, и рѣ́ки и́хъ я́ко єле́й потеку́тъ, глаго́летъ Адонаі́ Госпо́дь,
|
|
|
15
|
|
|
єгда́ да́мъ Єги́пта въ па́губу, и опустѣ́єтъ земля́ съ полното́ю своє́ю, єгда́ разсѣ́ю вся́ живу́щыя на не́й, и увѣ́дятъ, я́ко а́зъ є́смь Госпо́дь.
|
|
|
16
|
|
|
Пла́чь є́сть, и воспла́чешися о не́мъ, и дще́ри язы́ческія воспла́чутся о не́мъ, надъ Єги́птомъ и надъ все́ю си́лою єго́ воспла́чутся, глаго́летъ Адонаі́ Госпо́дь.
|
|
|
17
|
|
|
И бы́сть во второєна́десять лѣ́то, пе́рваго ме́сяца въ пятыйна́десять де́нь, бы́сть сло́во Госпо́дне ко мнѣ́ глаго́ля:
|
|
|
18
|
|
|
сы́не человѣ́чь, воспла́чися о крѣ́пости Єги́петстѣй [прекланя́я преведи́ єго́]: и сведу́тъ дще́рей єго́ ме́ртвыхъ язы́цы во глубину́ земну́ю ко низходя́щымъ въ про́пасть.
|
|
|
19
|
|
|
От во́дъ благолѣ́пно сни́ди и поспи́ съ необрѣ́заными.
|
|
|
20
|
|
|
Средѣ́ я́звеныхъ мече́мъ паду́тъ съ ни́мъ, и у́спнетъ вся́ крѣ́пость єго́.
|
|
|
21
|
|
|
И реку́тъ ти́ исполи́ни: во глубинѣ́ про́пасти бу́ди, кого́ лу́чши єси́ ты́? сни́ди и ля́зи съ необрѣ́заными средѣ́ я́звеныхъ мече́мъ.
|
|
|
22
|
|
|
Та́мо Ассу́ръ и ве́сь со́нмъ єго́, и вси́ я́звеніи та́мо да́шася, и гро́бъ и́хъ во глубинѣ́ про́пасти, и бы́сть со́нмъ єго́ о́крестъ гро́ба єго́, вси́ я́звеніи па́дшіи мече́мъ,
|
|
|
23
|
|
|
и́же да́ша гро́бы єго́ во сте́гнѣхъ рва́, и бы́сть со́нмъ єго́ о́крестъ гро́ба єго́, вси́ ті́и я́звеніи па́дающіи мече́мъ, и́же да́ша стра́хъ сво́й на земли́ живы́хъ.
|
|
|
24
|
|
|
Та́мо Єла́мъ и вся́ си́ла єго́ о́крестъ гро́ба єго́, вси́ я́звеніи па́дшіи мече́мъ и низходя́щіи необрѣ́зани во глубину́ земну́ю, да́вшіи стра́хъ сво́й на земли́ живы́хъ:
|
|
|
25
|
|
|
и прія́ша муче́ніє своє́ съ низходя́щими въ про́пасть, средѣ́ я́звеныхъ.
|
|
|
26
|
|
|
Та́мо да́шася Мосо́хъ, и Ѳове́ль, и вся́ си́ла єго́, о́крестъ гро́ба єго́, вси́ необрѣ́занніи я́звеніи от меча́, да́вшіи стра́хъ сво́й на земли́ жи́зни.
|
|
|
27
|
|
|
И успо́ша со исполи́ны па́дшими от вѣ́ка, и́же снидо́ша во а́дъ во ору́жіи во́инстѣмъ и положи́ша мечы́ своя́ подъ главы́ своя́, и бы́ша беззако́нія и́хъ на косте́хъ и́хъ, я́ко устраши́ша всѣ́хъ во житіи́ своє́мъ, и стра́хъ си́льнымъ бы́ша на земли́ живу́щымъ.
|
|
|
28
|
|
|
И ты́ посредѣ́ необрѣ́занныхъ сокруши́шися и поспи́ши со я́звеными мече́мъ.
|
|
|
29
|
|
|
Та́мо Єдо́мъ и ца́ріє єго́ и вси́ кня́зи Ассу́ровы, да́вшіи крѣ́пость свою́ на я́зву ме́чную: сі́и со я́звеными успо́ша, съ низходя́щими въ ро́въ.
|
|
|
30
|
|
|
Та́мо кня́зи сѣ́верстіи вси́, та́мо вси́ воєво́ды Ассу́ровы, и́же сведе́ни бы́ша со я́звеными со стра́хомъ свои́мъ и со крѣ́постію своє́ю стыдя́щеся, успо́ша необрѣ́занніи со я́звеными мече́мъ, и прія́ша муче́ніє своє́ съ низходя́щими въ про́пасть.
|
|
|
31
|
|
|
Тѣ́хъ у́зритъ ца́рь фарао́нъ и утѣ́шится о все́й крѣ́пости и́хъ: фарао́нъ и я́звеніи мече́мъ и вся́ си́ла єго́, глаго́летъ Адонаі́ Госпо́дь.
|
|
|
32
|
|
|
Я́ко да́хъ стра́хъ мо́й на земли́ жи́зни, и у́спнетъ средѣ́ необрѣ́занныхъ со я́звеными мече́мъ фарао́нъ, и все́ мно́жество єго́ съ ни́мъ, глаго́летъ Адонаі́ Госпо́дь.
|
|
|
Глава 33
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, глаго́ли ко сыно́мъ люді́й твои́хъ и рече́ши къ ни́мъ: земля́, на ню́же а́зъ а́ще наведу́ ме́чь, и по́ймутъ лю́діє земли́ человѣ́ка єди́наго от себе́ и поста́вятъ єго́ себѣ́ во стра́жа,
|
|
|
3
|
|
|
и у́зритъ ме́чь гряду́щь на зе́млю, и востру́битъ трубо́ю, и проповѣ́сть лю́демъ,
|
|
|
4
|
|
|
и услы́шитъ услы́шавый гла́съ трубы́, а не сохрани́тся, и на́йдетъ ме́чь и пости́гнетъ єго́, кро́вь єго́ на главѣ́ єго́ бу́детъ:
|
|
|
5
|
|
|
я́ко слы́ша гла́съ трубы́ и не сохрани́ся, кро́вь єго́ на не́мъ бу́детъ: а се́й, поне́же сохрани́ся, ду́шу свою́ изба́вилъ.
|
|
|
6
|
|
|
И стра́жъ, а́ще уви́дитъ ме́чь гряду́щь, и не востру́битъ трубо́ю, [и не проповѣ́сть лю́демъ,] и лю́діє не охраня́тъ себе́, и наше́дъ ме́чь во́зметъ от ни́хъ ду́шу, та́ у́бо беззако́нія ра́ди своєго́ взя́ся, а кро́ве єя́ от руки́ стра́жа взыщу́.
|
|
|
7
|
|
|
И ты́, сы́не человѣ́чь, во стра́жа да́хъ тя́ до́му Ізра́илеву, и услы́шиши от у́стъ мои́хъ сло́во, и проповѣ́си и́мъ от мене́.
|
|
|
8
|
|
|
Єгда́ реку́ грѣ́шнику: грѣ́шниче, сме́ртію у́мреши: и не бу́деши глаго́лати [грѣ́шнику], є́же сохрани́тися нечести́вому, [є́же обрати́тся єму́] от пути́ своєго́ [и жи́ву бы́ти єму́], то́й беззако́нникъ во беззако́ніи своє́мъ у́мретъ, а кро́ве єго́ от руки́ твоєя́ взыщу́.
|
|
|
9
|
|
|
А́ще же ты́ проповѣ́си нечести́вому пу́ть єго́, є́же обрати́тися от него́, и не обрати́тся съ пути́ своєго́, то́й въ нече́стіи своє́мъ у́мретъ, а ты́ ду́шу твою́ изба́вилъ єси́.
|
|
|
10
|
|
|
И ты́, сы́не человѣ́чь, рцы́ до́му Ізра́илеву: си́це рѣ́сте глаго́люще: пре́лести на́шя и беззако́нія на́ша въ на́съ су́ть, и мы́ въ ни́хъ та́ємъ, и ка́ко на́мъ живы́мъ бы́ти?
|
|
|
11
|
|
|
Рцы́ и́мъ: живу́ а́зъ, глаго́летъ Адонаі́ Госпо́дь, не хощу́ сме́рти грѣ́шника, но є́же обрати́тися нечести́вому от пути́ своєго́ и жи́ву бы́ти єму́: обраще́ніємъ обрати́теся от пути́ ва́шего зла́го: и вску́ю умира́єте, до́ме Ізра́илевъ?
|
|
|
12
|
|
|
И ты́, сы́не человѣ́чь, рцы́ ко сыно́мъ люді́й твои́хъ: пра́вда пра́ведника не изба́витъ єго́, въ о́ньже де́нь прельсти́тся: и беззако́ніє беззако́нника не убіє́тъ, въ о́ньже де́нь обрати́тся от беззако́нія своєго́: и пра́ведникъ не мо́жетъ спасти́ся въ де́нь грѣха́ своєго́.
|
|
|
13
|
|
|
Єгда́ реку́ пра́веднику: жи́знію жи́въ бу́деши: се́й же упова́я на пра́вду свою́ и сотвори́тъ беззако́ніє, вся́ пра́вды єго́ не воспомяну́тся, въ непра́вдѣ своє́й, ю́же сотвори́, въ то́й у́мретъ.
|
|
|
14
|
|
|
И єгда́ реку́ нечести́вому: сме́ртію у́мреши: и обрати́тся от грѣха́ своєго́ и сотвори́тъ су́дъ и пра́вду,
|
|
|
15
|
|
|
и зало́гъ отда́стъ и восхище́ноє возврати́тъ, беззако́нникъ въ за́повѣдехъ жи́зни ходи́ти бу́детъ, є́же не сотвори́ти непра́вды, жи́знію жи́въ бу́детъ и не у́мретъ:
|
|
|
16
|
|
|
вси́ грѣси́ єго́, я́же согрѣши́, не помяну́тся: поне́же су́дъ и пра́вду сотвори́, жи́въ бу́детъ въ ни́хъ.
|
|
|
17
|
|
|
И реку́тъ сы́нове люді́й твои́хъ: непра́въ пу́ть Госпо́день. И се́, пу́ть и́хъ непра́въ.
|
|
|
18
|
|
|
Єгда́ соврати́тся пра́ведникъ от пра́вды своєя́ и сотвори́тъ беззако́ніє, и у́мретъ въ не́мъ.
|
|
|
19
|
|
|
И єгда́ грѣ́шникъ возврати́тся от беззако́нія своєго́ и сотвори́тъ су́дъ и пра́вду, то́й жи́въ бу́детъ въ ни́хъ.
|
|
|
20
|
|
|
И се́ є́сть, є́же реко́сте: непра́въ пу́ть Госпо́день. Кому́ждо по путе́мъ єго́ сужду́ ва́мъ, до́ме Ізра́илевъ.
|
|
|
21
|
|
|
И бы́сть во второєна́десять лѣ́то, ме́сяца вторагона́десять, въ пя́тый де́нь ме́сяца плѣне́нія на́шего, пріи́де ко мнѣ́ от Ієрусали́ма уцѣлѣ́вый глаго́ля: плѣне́нъ бы́сть гра́дъ.
|
|
|
22
|
|
|
И рука́ Госпо́дня бы́сть на мнѣ́ въ ве́черъ, пре́жде прише́ствія єго́, и отве́рзе уста́ моя́, до́ндеже пріи́де ко мнѣ́ зау́тра: и отве́рзшаяся уста́ моя́ не затвори́шася ктому́.
|
|
|
23
|
|
|
И бы́сть сло́во Госпо́дне ко мнѣ́ глаго́ля:
|
|
|
24
|
|
|
сы́не человѣ́чь, живу́щіи на опустѣ́вшихъ мѣ́стѣхъ во земли́ Ізра́илевѣ глаго́лютъ: єди́нъ бя́ше Авраа́мъ и одержа́ше зе́млю, а мы́ мно́жайшіи єсмы́, на́мъ дана́ є́сть земля́ во одержа́ніє.
|
|
|
25
|
|
|
Того́ ра́ди рцы́ и́мъ: си́це глаго́летъ Адонаі́ Госпо́дь: поне́же съ кро́вію я́сте и о́чи ва́ши воздвиго́сте ко кумі́ромъ и кро́вь пролива́єте, и зе́млю ли наслѣ́дите?
|
|
|
26
|
|
|
ста́сте съ мече́мъ ва́шимъ, сотвори́сте ме́рзости, и кі́йждо жену́ бли́жняго своєго́ оскверни́сте, и та́ко ли зе́млю и́мате наслѣ́дити?
|
|
|
27
|
|
|
Того́ ра́ди рцы́ и́мъ: сія́ глаго́летъ Адонаі́ Госпо́дь: живу́ а́зъ, я́ко паду́тъ мече́мъ су́щіи во опустѣ́вшихъ, и и́же на лицы́ по́ля, звѣре́мъ по́льнымъ предаду́тся на изъяде́ніє, и су́щыя во градѣ́хъ и и́же въ пеще́рахъ сме́ртію поражу́,
|
|
|
28
|
|
|
и да́мъ зе́млю на опустѣ́ніє, и поги́бнетъ го́рдость крѣ́пости єя́, и опустѣ́ютъ го́ры Ізра́илевы, зане́же не бу́детъ проходя́щаго:
|
|
|
29
|
|
|
и увѣ́дятъ, я́ко а́зъ Госпо́дь: и сотворю́ зе́млю и́хъ пу́сту, и опустѣ́єтъ всѣ́хъ ра́ди ме́рзостей и́хъ, я́же сотвори́ша.
|
|
|
30
|
|
|
И ты́, сы́не человѣ́чь, сы́нове люді́й твои́хъ глаго́лющіи о тебѣ́ у забра́лъ и во вратѣ́хъ дворо́въ, и глаго́лютъ кі́йждо ко бли́жнему своєму́ и кі́йждо ко бра́ту своєму́, глаго́люще: собери́мся и услы́шимъ исходя́щая от у́стъ Госпо́днихъ.
|
|
|
31
|
|
|
И прихо́дятъ къ тебѣ́, я́коже схо́дятся лю́діє, и сѣдя́тъ лю́діє мои́ предъ тобо́ю, и послу́шаютъ глаго́ловъ твои́хъ, и не сотворя́тъ и́хъ: поне́же лжа́ во устѣ́хъ и́хъ, и вслѣ́дъ скве́рнъ и́хъ се́рдце и́хъ хо́дитъ.
|
|
|
32
|
|
|
И бу́деши и́мъ я́ко гла́съ пѣ́снивца сладкогла́снаго благосли́чнаго, и услы́шатъ глаго́лы твоя́, и не сотворя́тъ и́хъ.
|
|
|
33
|
|
|
И єгда́ пріи́деши, реку́тъ: се́, пріи́де. И увѣ́дятъ, я́ко проро́къ бѣ́ средѣ́ и́хъ.
|
|
|
Глава 34
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, прорцы́ на па́стыри Ізра́илевы, прорцы́ и рцы́ па́стыремъ: сія́ глаго́летъ Адонаі́ Госпо́дь:
|
|
|
3
|
|
|
оле, па́стыріє Ізра́илевы! єда́ пасу́тъ па́стыріє сами́хъ себе́? не ове́цъ ли пасу́тъ па́стыріє? се́, млеко́ ядите́ и во́лною одѣва́єтеся и ту́чноє закала́єте, а ове́цъ мои́хъ не пасе́те:
|
|
|
4
|
|
|
изнемо́гшаго не подъя́сте и боля́щаго не уврачева́сте, и сокруше́ннаго не обяза́сте и заблужда́ющаго не обрати́сте, и поги́бшаго не взыска́сте и крѣ́пкоє оскорби́сте трудо́мъ и вла́стію наказа́сте я́ и наруга́ніємъ.
|
|
|
5
|
|
|
И разсы́пашася о́вцы моя́, поне́же не имѣ́яху па́стырей, и бы́ша на изъяде́ніє всѣ́мъ звѣре́мъ се́лнымъ.
|
|
|
6
|
|
|
И расточи́шася о́вцы моя́ по всѣ́мъ гора́мъ и [заблуди́ша] по всѣ́мъ холмо́мъ высо́кимъ, и на лицы́ всея́ земли́ разсы́пашася о́вцы моя́, и не бѣ́ взыска́ющаго, ни обраща́ющаго.
|
|
|
7
|
|
|
Того́ ра́ди, о, па́стыріє, слы́шите сло́во Госпо́дне:
|
|
|
8
|
|
|
живу́ а́зъ, глаго́летъ Адонаі́ Госпо́дь, поне́же учине́на су́ть стада́ моя́ въ расхище́ніє, и о́вцы моя́ бы́ша во снѣде́ніє всѣ́мъ звѣре́мъ се́лнымъ, зане́же нѣ́сть па́стырей, и не поиска́ша па́стыріє ове́цъ мои́хъ, но пасо́ша па́стыріє сами́хъ себе́, а ове́цъ мои́хъ не пасо́ша:
|
|
|
9
|
|
|
сего́ ра́ди, па́стыріє, слы́шите сло́во Госпо́дне,
|
|
|
10
|
|
|
сія́ глаго́летъ Адонаі́ Госпо́дь: се́, а́зъ на па́стыри, и взыщу́ ове́цъ мои́хъ от ру́къ и́хъ, и отста́влю я́ от па́ствы ове́цъ мои́хъ, и не бу́дутъ пасти́ и́хъ па́стыріє: ниже́ сами́хъ себе́ и́мутъ пасти́, и отиму́ о́вцы моя́ изъ у́стъ и́хъ, и ктому́ не бу́дутъ и́мъ на изъяде́ніє.
|
|
|
11
|
|
|
Сего́ ра́ди сія́ глаго́летъ Адонаі́ Госпо́дь: се́, а́зъ взыщу́ ове́цъ мои́хъ и присѣщу́ и́хъ:
|
|
|
12
|
|
|
я́коже присѣща́єтъ пасту́хъ па́ству свою́ въ де́нь, єгда́ є́сть о́блаченъ и мгля́нъ, средѣ́ ове́цъ свои́хъ разлуче́ныхъ, та́ко взыщу́ ове́цъ мои́хъ и изба́влю я́ от вся́каго мѣ́ста, а́може су́ть разсы́паны въ де́нь о́блаченъ и примра́ченъ.
|
|
|
13
|
|
|
И изведу́ я́ от язы́къ и соберу́ я́ от стра́нъ, и введу́ я́ въ зе́млю и́хъ и упасу́ я́ на гора́хъ Ізра́илевыхъ и въ де́брехъ и во все́мъ селе́ніи земли́,
|
|
|
14
|
|
|
на па́жити бла́зѣ упасу́ я́, на горѣ́ высо́цѣ Ізра́илевѣ: и бу́дутъ огра́ды и́хъ та́мо, и у́спнутъ и почі́ютъ та́мо въ пи́щи бла́зѣ, и на па́жити ту́чнѣ упасу́тся на гора́хъ Ізра́илевыхъ.
|
|
|
15
|
|
|
А́зъ упасу́ о́вцы моя́ и а́зъ упоко́ю я́, и уразумѣ́ютъ, я́ко а́зъ є́смь Госпо́дь.
|
|
|
16
|
|
|
Сія́ глаго́летъ Адонаі́ Госпо́дь: поги́бшеє взыщу́ и заблуди́вшеє обращу́, и сокруше́нноє обяжу́ и немощно́є укрѣплю́, и крѣ́пкоє снабдю́ и упасу́ я́ съ судо́мъ.
|
|
|
17
|
|
|
И вы́, о́вцы моя́, сія́ глаго́летъ Адонаі́ Госпо́дь: се́, а́зъ разсужду́ между́ овце́ю и овце́ю, и овно́мъ и козло́мъ.
|
|
|
18
|
|
|
Не дово́лно ли ва́мъ, я́ко на бла́зѣй па́жити пасо́стеся, и оста́нокъ па́жити ва́шея нога́ми ва́шими попира́сте, и устоя́вшуюся во́ду пива́сте, и оста́нокъ нога́ми ва́шими возмуща́сте,
|
|
|
19
|
|
|
и о́вцы моя́ попра́ніємъ но́гъ ва́шихъ живя́ху, и возмуще́нную во́ду нога́ми ва́шими пія́ху?
|
|
|
20
|
|
|
Того́ ра́ди сія́ глаго́летъ Адонаі́ Госпо́дь: се́, а́зъ разсужду́ между́ овча́темъ си́льнымъ и между́ овча́темъ немощны́мъ.
|
|
|
21
|
|
|
Ре́брами и плеща́ми ва́шими рѣ́ясте и рога́ми ва́шими бодо́сте, и вся́коє немощно́є пха́сте, до́ндеже изгна́сте я́ во́нъ:
|
|
|
22
|
|
|
и спасу́ о́вцы моя́, и ктому́ не бу́дутъ на разграбле́ніє, и разсужду́ между́ овча́темъ и овча́темъ, и между́ овно́мъ и овно́мъ:
|
|
|
23
|
|
|
и возста́влю и́мъ па́стыря єди́наго, и упасе́тъ я́, раба́ моєго́ даві́да, то́й упасе́тъ я́, [и то́й упоко́итъ я́,] и бу́детъ и́мъ па́стырь,
|
|
|
24
|
|
|
а́зъ же Госпо́дь бу́ду и́мъ въ Бо́га, и ра́бъ мо́й даві́дъ кня́зь средѣ́ и́хъ: а́зъ Госпо́дь глаго́лахъ.
|
|
|
25
|
|
|
И завѣща́ю даві́дови завѣ́тъ ми́рный, и потреблю́ звѣ́ри злы́ от земли́, и вселя́тся въ пусты́ни, упова́юще у́спнутъ въ дубра́вахъ.
|
|
|
26
|
|
|
И да́мъ и́мъ о́крестъ горы́ моєя́ благослове́ніє, и испущу́ до́ждь ва́мъ во вре́мя своє́, до́ждь благослове́нія.
|
|
|
27
|
|
|
И древеса́ на по́ли дадя́тъ пло́дъ сво́й, и земля́ да́стъ си́лу свою́, и вселя́тся на земли́ своє́й съ наде́ждею ми́ра, и увѣ́дятъ, я́ко а́зъ є́смь Госпо́дь, єгда́ сокрушу́ у́зы и́га и́хъ: и изба́влю я́ изъ руки́ порабо́тившихъ я́,
|
|
|
28
|
|
|
и не бу́дутъ ктому́ во плѣне́ніє язы́комъ, и звѣ́ріє земні́и не поядя́тъ и́хъ ктому́: и вселя́тся съ наде́ждею, и не бу́детъ устраша́яй и́хъ.
|
|
|
29
|
|
|
И возста́влю и́мъ са́дъ ми́ренъ, и не бу́дутъ ктому́ ма́лы число́мъ на земли́, и не бу́дутъ погубле́ни гла́домъ на земли́, и не пріи́мутъ ктому́ укоре́нія от язы́къ:
|
|
|
30
|
|
|
и увѣ́дятъ, я́ко а́зъ є́смь Госпо́дь Бо́гъ и́хъ съ ни́ми, а ті́и лю́діє мои́ до́мъ Ізра́илевъ, глаго́летъ Адонаі́ Госпо́дь:
|
|
|
31
|
|
|
вы́ же о́вцы моя́ и о́вцы па́ствы моєя́ єсте́, и а́зъ Госпо́дь Бо́гъ ва́шъ, глаго́летъ Адонаі́ Госпо́дь.
|
|
|
Глава 35
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, обрати́ лице́ твоє́ къ горѣ́ сеі́ръ и прорцы́ на ню́ и рцы́ є́й:
|
|
|
3
|
|
|
сія́ глаго́летъ Адонаі́ Госпо́дь: се́, а́зъ на тя́, горо́ сеі́ръ, и простру́ ру́ку мою́ на тя́ и поста́влю тя́ пу́сту, и опустѣ́єши,
|
|
|
4
|
|
|
и во градѣ́хъ твои́хъ пусты́ню сотворю́, и ты́ въ пусты́ню бу́деши, и уразумѣ́єши, я́ко а́зъ є́смь Госпо́дь.
|
|
|
5
|
|
|
Поне́же бы́сть въ тебѣ́ вражда́ вѣ́чная, и присѣдѣ́ла єси́ до́му Ізра́илеву лука́вствомъ, руко́ю враго́въ съ мече́мъ во вре́мя печа́ли и́хъ и во вре́мя непра́вды, на послѣ́докъ:
|
|
|
6
|
|
|
сего́ ра́ди живу́ а́зъ, глаго́летъ Адонаі́ Госпо́дь, поне́же въ кро́ви согрѣши́ла єси́, и кро́вь пожене́тъ тя́, кро́вь возненави́дѣла єси́, и кро́вь иждене́тъ тя́.
|
|
|
7
|
|
|
И поста́влю го́ру сеі́ръ пу́сту и опустѣ́вшу, и погублю́ от нея́ человѣ́ки и скоты́, [и приходя́ша и отходя́ща:]
|
|
|
8
|
|
|
и напо́лню я́звеными твои́ми хо́лмы твоя́ и де́бри твоя́, и на всѣ́хъ по́лехъ твои́хъ я́звеніи мече́мъ паду́тъ въ тебѣ́:
|
|
|
9
|
|
|
и пу́сту во вѣ́къ поста́влю тя́, и гра́ди твои́ не населя́тся ктому́, и уразумѣ́єши, я́ко а́зъ є́смь Госпо́дь.
|
|
|
10
|
|
|
Поне́же рекла́ єси́: о́ба язы́ка и о́бѣ странѣ́ мои́ бу́дутъ, и возму́ и́хъ въ наслѣ́діє, а Госпо́дь та́мо є́сть:
|
|
|
11
|
|
|
сего́ ра́ди живу́ а́зъ, глаго́летъ Адонаі́ Госпо́дь, и сотворю́ тебѣ́ по враждѣ́ твоє́й и по ре́вности твоє́й, ю́же сотвори́ла єси́ от ненавидѣ́нія къ ни́мъ, и позна́нъ бу́ду тобо́ю, єгда́ и́мамъ тебе́ суди́ти, и уразумѣ́єши, я́ко а́зъ є́смь Госпо́дь.
|
|
|
12
|
|
|
Слы́шахъ гла́съ всѣ́хъ хуле́ній твои́хъ, я́же глаго́лала єси́: го́ры Ізра́илевы пу́сты даны́ на́мъ во снѣ́дь:
|
|
|
13
|
|
|
и велерѣ́чила єси́ на мя́ усты́ твои́ми и умно́жила на мя́ словеса́, а́зъ же услы́шахъ.
|
|
|
14
|
|
|
Сего́ ра́ди та́ко глаго́летъ Адонаі́ Госпо́дь: во весе́ліи всея́ земли́ пу́сту тя́ сотворю́:
|
|
|
15
|
|
|
я́коже пора́довалася єси́ о наслѣ́дій до́му Ізра́илева, я́ко поги́бе, та́ко сотворю́ тебѣ́: пуста́ бу́деши, горо́ сеі́ръ, и вся́ Ідуме́а потреби́тся, и увѣ́дятъ, я́ко а́зъ є́смь Госпо́дь Бо́гъ и́хъ.
|
|
|
Глава 36
|
|
|
1
|
|
|
И ты́, сы́не человѣ́чь, прорцы́ на го́ры Ізра́илевы и рцы́:
|
|
|
2
|
|
|
го́ры Ізра́илевы, слы́шите сло́во Госпо́дне, сія́ глаго́летъ Адонаі́ Госпо́дь: поне́же рече́ вра́гъ на вы́: бла́гоже, пусты́ня вѣ́чная во одержа́ніє на́мъ бы́сть:
|
|
|
3
|
|
|
того́ ра́ди прорцы́ и рцы́: та́ко глаго́летъ Адонаі́ Госпо́дь: зане́ бы́ти ва́мъ погубле́нымъ и безче́стнымъ и возненави́дѣнымъ от язы́къ окре́стныхъ ва́мъ, є́же бы́ти ва́мъ во одержа́ніє про́чымъ язы́комъ, и взыдо́сте и бы́сте въ поноше́ніє усте́нъ и во укори́зну страна́мъ:
|
|
|
4
|
|
|
сего́ ра́ди, го́ры Ізра́илевы, слы́шите сло́во Госпо́дне, сія́ глаго́летъ Адонаі́ Госпо́дь гора́мъ и холмо́мъ, и пото́комъ и де́бремъ, и поля́намъ и опустоше́нымъ, и разоре́нымъ и градо́мъ оста́вленымъ, и́же бы́ша въ плѣне́ніє и въ попра́ніє оста́вшымъ язы́комъ окре́стнымъ.
|
|
|
5
|
|
|
Того́ ра́ди сія́ глаго́летъ Адонаі́ Госпо́дь: а́ще не во огни́ рве́нія моєго́ глаго́лахъ на про́чыя язы́ки и на Ідуме́ю всю́, я́ко да́ша зе́млю мою́ себѣ́ во одержа́ніє со весе́ліємъ [от всего́ се́рдца], обезче́стивше ду́шы, є́же потреби́ти повоєва́ніємъ:
|
|
|
6
|
|
|
того́ ра́ди прорцы́ на зе́млю Ізра́илеву и рцы́ гора́мъ и холмо́мъ, и поля́намъ и де́бремъ: сія́ глаго́летъ Адонаі́ Госпо́дь: се́, а́зъ во рве́ніи моє́мъ и въ я́рости моє́й глаго́лахъ, за укори́зну, ю́же прія́сте от язы́къ.
|
|
|
7
|
|
|
Того́ ра́ди сія́ глаго́летъ Адонаі́ Госпо́дь: се́, а́зъ воздви́гну ру́ку мою́ на язы́ки, и́же о́крестъ ва́съ, ті́и безче́стіє своє́ пріи́мутъ.
|
|
|
8
|
|
|
Ва́ше же гро́здіє и пло́дъ ва́шъ, го́ры Ізра́илевы, поядя́тъ лю́діє мои́, я́ко надѣ́ются пріити́.
|
|
|
9
|
|
|
Я́ко се́, а́зъ къ ва́мъ, и призрю́ на вы́, и воздѣ́лаєте и насѣ́єте:
|
|
|
10
|
|
|
и умно́жу въ ва́съ человѣ́ки, ве́сь до́мъ Ізра́илевъ до конца́, и населя́тся гра́ди, и пусты́ни оградя́тся:
|
|
|
11
|
|
|
и умно́жу ва́съ людьми́ и ското́мъ, и умно́жатся и возрасту́тъ, и вселю́ ва́съ я́коже пре́жде, и бла́го сотворю́ ва́мъ я́коже бы́вшымъ пре́жде ва́съ, и уразумѣ́єте, я́ко а́зъ є́смь Госпо́дь:
|
|
|
12
|
|
|
и нарожду́ въ ва́съ человѣ́ки лю́ди моя́ Ізра́иля, и наслѣ́дятъ ва́съ, и бу́дете и́мъ во одержа́ніє, и не приложите́ ктому́ безча́дни бы́ти от ни́хъ.
|
|
|
13
|
|
|
Сія́ глаго́летъ Адонаі́ Госпо́дь: поне́же глаго́лаша тебѣ́: земля́ пояда́ющая человѣ́ки ты́ єси́, и безча́дная от язы́ка, твоєго́ была́ єси́:
|
|
|
14
|
|
|
того́ ра́ди человѣ́ковъ ктому́ не поя́си и язы́ка твоєго́ не обезча́диши ктому́, глаго́летъ Адонаі́ Госпо́дь.
|
|
|
15
|
|
|
И не услы́шится въ ва́съ ктому́ безче́стіє язы́ковъ, и укори́зны люді́й не пріи́мете ктому́, и язы́къ тво́й не бу́детъ безъ ча́дъ ктому́, глаго́летъ Адонаі́ Госпо́дь.
|
|
|
16
|
|
|
И бы́сть сло́во Госпо́дне ко мнѣ́ глаго́ля:
|
|
|
17
|
|
|
сы́не человѣ́чь, до́мъ Ізра́илевъ всели́ся на земли́ своє́й, и оскверни́ша ю́ путе́мъ свои́мъ и кумі́рми свои́ми и нечистота́ми свои́ми, и по нечистотѣ́ мѣ́сячная иму́щія бы́сть пу́ть и́хъ предъ лице́мъ мои́мъ:
|
|
|
18
|
|
|
и излія́хъ я́рость мою́ на ня́, кро́ви ра́ди, ю́же пролія́ша на зе́млю, и кумі́рми свои́ми оскверни́ша ю́,
|
|
|
19
|
|
|
и разсы́пахъ я́ во язы́ки и развѣ́яхъ я́ во страны́: по пути́ и́хъ по начина́нію и́хъ суди́хъ и́мъ.
|
|
|
20
|
|
|
И внидо́ша во язы́ки, въ ня́же внидо́ша та́мо, и оскверни́ша и́мя моє́ свято́є, внегда́ глаго́латися и́мъ: лю́діє Госпо́дни сі́и и от земли́ своєя́ изыдо́ша.
|
|
|
21
|
|
|
И пощади́хъ я́ и́мене ра́ди моєго́ свята́го є́же оскверни́ша до́мъ Ізра́илевъ во язы́цѣхъ, а́може внидо́ша.
|
|
|
22
|
|
|
Того́ ра́ди рцы́ до́му Ізра́илеву: сія́ глаго́летъ Адонаі́ Госпо́дь: не ва́мъ а́зъ творю́, до́ме Ізра́илевъ, но и́мене моєго́ ра́ди свята́го, є́же оскверни́сте во язы́цѣхъ, та́мо а́може внидо́сте.
|
|
|
23
|
|
|
И освящу́ и́мя моє́ вели́коє, оскверне́нноє во язы́цѣхъ, є́же оскверни́сте средѣ́ и́хъ, и уразумѣ́ютъ язы́цы, я́ко а́зъ є́смь Госпо́дь, глаго́летъ Адонаі́ Госпо́дь, внегда́ освящу́ся въ ва́съ предъ очи́ма и́хъ.
|
|
|
24
|
|
|
И возму́ вы́ от язы́къ и соберу́ вы́ от всѣ́хъ земе́ль, и введу́ вы́ въ зе́млю ва́шу,
|
|
|
25
|
|
|
и воскроплю́ на вы́ во́ду чи́сту, и очи́ститеся от всѣ́хъ нечисто́тъ ва́шихъ и от всѣ́хъ кумі́ровъ ва́шихъ, и очи́щу ва́съ.
|
|
|
26
|
|
|
И да́мъ ва́мъ се́рдце но́во и ду́хъ но́въ да́мъ ва́мъ, и отиму́ се́рдце ка́менноє от пло́ти ва́шея и да́мъ ва́мъ се́рдце пло́тяно, и Ду́хъ мо́й да́мъ въ ва́съ:
|
|
|
27
|
|
|
и сотворю́, да въ за́повѣдехъ мои́хъ хо́дите, и суды́ моя́ сохраните́ и сотворите́ я́.
|
|
|
28
|
|
|
И вселите́ся на земли́, ю́же да́хъ отце́мъ ва́шымъ, и бу́дете ми́ въ лю́ди, а́зъ же бу́ду ва́мъ въ Бо́га.
|
|
|
29
|
|
|
И спасу́ вы́ от всѣ́хъ нечисто́тъ ва́шихъ [и очи́щу вы́ от грѣ́хъ ва́шихъ всѣ́хъ], и призову́ пшени́цу и умно́жу ю́, и не да́мъ на вы́ гла́да:
|
|
|
30
|
|
|
и распложу́ пло́дъ древе́сный и плоды́ се́лныя, я́ко да не пріи́мете ктому́ гла́дныя укори́зны во язы́цѣхъ.
|
|
|
31
|
|
|
И помяне́те пути́ своя́ злы́я и начина́нія ва́ша не блага́я, и вознегоду́єте предъ лице́мъ и́хъ о беззако́ніихъ ва́шихъ и о ме́рзостехъ ва́шихъ.
|
|
|
32
|
|
|
Не ва́съ ра́ди а́зъ творю́, до́ме Ізра́илевъ, глаго́летъ Адонаі́ Госпо́дь, вѣ́стно да бу́детъ ва́мъ, [до́ме Ізра́илевъ:] постыди́теся и усрами́теся от путі́й ва́шихъ, до́ме Ізра́илевъ.
|
|
|
33
|
|
|
Сія́ глаго́летъ Адонаі́ Госпо́дь: во о́ньже де́нь очи́щу вы́ от всѣ́хъ беззако́ній ва́шихъ и населю́ гра́ды, и соградя́тся пусты́ни,
|
|
|
34
|
|
|
и земля́ поги́бшая воздѣ́лаєтся вмѣ́сто того́, я́ко погубле́на бы́сть предъ очи́ма вся́каго мимоходя́щаго:
|
|
|
35
|
|
|
и реку́тъ: земля́ о́ная поги́бшая бы́сть я́ко вертогра́дъ сла́дости, и гра́ди опустѣ́вшіи и разоре́нніи и раско́панніи, забра́лы утвержде́нни ста́ша:
|
|
|
36
|
|
|
и уразумѣ́ютъ язы́цы, єли́цы оста́нутся о́крестъ ва́съ, я́ко а́зъ Госпо́дь возгради́хъ разоре́нныя и насади́хъ погубле́нныя: а́зъ Госпо́дь глаго́лахъ и сотворю́.
|
|
|
37
|
|
|
Сія́ глаго́летъ Адонаі́ Госпо́дь: се́, єще́ обря́щуся до́му Ізра́илеву, є́же сотвори́ти и́мъ: умно́жу и́хъ я́ко о́вцы, человѣ́ки я́ко о́вцы святы́я,
|
|
|
38
|
|
|
я́ко о́вцы Ієрусали́мли во пра́здникахъ єго́, та́ко бу́дутъ гра́ди опустѣ́вшіи по́лни ста́дъ человѣ́ческихъ: и уразумѣ́ютъ, я́ко а́зъ Госпо́дь.
|
|
|
Глава 37
|
|
|
1
|
|
|
И бы́сть на мнѣ́ рука́ Госпо́дня, и изведе́ мя въ Ду́сѣ Госпо́дни и поста́ви мя́ средѣ́ по́ля: се́ же бя́ше по́лно косте́й человѣ́ческихъ:
|
|
|
2
|
|
|
и обведе́ мя о́крестъ и́хъ о́коло, и се́, мно́ги зѣло́ на лицы́ по́ля, и се́, су́хи зѣло́.
|
|
|
3
|
|
|
И рече́ ко мнѣ́: сы́не человѣ́чь, оживу́тъ ли ко́сти сія́? И реко́хъ: Го́споди Бо́же, ты́ вѣ́си сія́.
|
|
|
4
|
|
|
И рече́ ко мнѣ́: сы́не человѣ́чь, прорцы́ на ко́сти сія́ и рече́ши и́мъ: ко́сти сухі́я, слы́шите сло́во Госпо́дне:
|
|
|
5
|
|
|
се́ глаго́летъ Адонаі́ Госпо́дь косте́мъ си́мъ: се́, а́зъ введу́ въ ва́съ ду́хъ живо́тенъ
|
|
|
6
|
|
|
и да́мъ на ва́съ жи́лы, и возведу́ на ва́съ пло́ть и простру́ по ва́мъ ко́жу, и да́мъ Ду́хъ мо́й въ ва́съ, и оживете́ и увѣ́сте, я́ко а́зъ є́смь Госпо́дь.
|
|
|
7
|
|
|
И прореко́хъ, я́коже заповѣ́да ми́ Госпо́дь. И бы́сть гла́съ внегда́ ми́ проро́чествовати, и се́, тру́съ, и совокупля́хуся ко́сти, ко́сть къ ко́сти, ка́яждо ко соста́ву своєму́.
|
|
|
8
|
|
|
И ви́дѣхъ, и се́, бы́ша и́мъ жи́лы, и пло́ть растя́ше, и восхожда́ше [и протяже́ся] и́мъ ко́жа верху́, ду́ха же не бя́ше въ ни́хъ.
|
|
|
9
|
|
|
И рече́ ко мнѣ́: прорцы́ о ду́сѣ, прорцы́, сы́не человѣ́чь, и рцы́ ду́хови: сія́ глаго́летъ Адонаі́ Госпо́дь: от четы́рехъ вѣ́тровъ пріиди́, ду́ше, и вду́ни на ме́ртвыя сія́, и да оживу́тъ.
|
|
|
10
|
|
|
И прореко́хъ, я́коже повелѣ́ ми́, и вни́де въ ня́ ду́хъ жи́зни, и ожи́ша и ста́ша на нога́хъ свои́хъ, собо́ръ мно́гъ зѣло́.
|
|
|
11
|
|
|
И рече́ Госпо́дь ко мнѣ́ глаго́ля: сы́не человѣ́чь, сія́ ко́сти ве́сь до́мъ Ізра́илевъ є́сть, ті́и бо глаго́лютъ: су́хи бы́ша ко́сти на́шя, поги́бе наде́жда на́ша, убіє́ни бы́хомъ.
|
|
|
12
|
|
|
Того́ ра́ди прорцы́ [сы́не человѣ́чь] и рцы́ къ ни́мъ: сія́ глаго́летъ Адонаі́ Госпо́дь: се́, а́зъ отве́рзу гро́бы ва́шя и изведу́ ва́съ от гро́бъ ва́шихъ, лю́діє мои́, и введу́ вы́ въ зе́млю Ізра́илеву:
|
|
|
13
|
|
|
и увѣ́сте, я́ко а́зъ є́смь Госпо́дь, внегда́ отве́рсти ми́ гро́бы ва́шя, є́же возвести́ ми ва́съ от гробо́въ ва́шихъ, лю́діє мои́: и да́мъ Ду́хъ мо́й въ ва́съ, и жи́ви бу́дете,
|
|
|
14
|
|
|
и поста́влю вы́ на земли́ ва́шей, и увѣ́сте, я́ко а́зъ Госпо́дь: глаго́лахъ и сотворю́, глаго́летъ Адонаі́ Госпо́дь.
|
|
|
15
|
|
|
И бы́сть сло́во Госпо́дне ко мнѣ́ глаго́ля:
|
|
|
16
|
|
|
сы́не человѣ́чь, возми́ себѣ́ же́злъ єди́нъ и напиши́ на не́мъ Іу́ду и сы́ны Ізра́илевы прилежа́щыя къ нему́: и же́злъ вторы́й возми́ себѣ́ и напиши́ на не́мъ Іо́сифа, же́злъ Єфре́мовъ, и вся́ сы́ны Ізра́илевы приложи́вшыяся къ нему́:
|
|
|
17
|
|
|
и совокупи́ я́ дру́гъ ко дру́гу себѣ́ въ же́злъ єди́нъ, є́же связа́ти я́, и бу́дутъ [вку́пѣ] въ руцѣ́ твоє́й:
|
|
|
18
|
|
|
и бу́детъ, єгда́ реку́тъ къ тебѣ́ сы́нове люді́й твои́хъ, вопроша́юще: не возвѣсти́ши ли на́мъ ты́, что́ су́ть сія́ тебѣ́?
|
|
|
19
|
|
|
и рече́ши къ ни́мъ: сія́ глаго́летъ Адонаі́ Госпо́дь: се́, а́зъ поиму́ пле́мя Іо́сифово, є́же є́сть въ руцѣ́ Єфре́мовѣ, и племена́ Ізра́илева прилежа́щая къ нему́, и да́мъ я́ въ пле́мя Іу́дино, и бу́дутъ въ же́злъ єди́нъ въ руцѣ́ Іу́динѣ.
|
|
|
20
|
|
|
И бу́дутъ жезли́, на ни́хже писа́ти бу́деши, въ руцѣ́ твоє́й предъ очи́ма и́хъ,
|
|
|
21
|
|
|
и рече́ши къ ни́мъ: сія́ глаго́летъ Адонаі́ Госпо́дь: се́, а́зъ поє́млю ве́сь до́мъ Ізра́илевъ от среды́ язы́ковъ, а́може внидо́ша, и соберу́ я́ от всѣ́хъ су́щихъ о́крестъ и́хъ и введу́ и́хъ въ зе́млю Ізра́илеву,
|
|
|
22
|
|
|
и да́мъ я́ во язы́къ на земли́ моє́й и въ гора́хъ Ізра́илевыхъ: и кня́зь єди́нъ бу́детъ во всѣ́хъ си́хъ царе́мъ, и не бу́дутъ ктому́ въ два́ язы́ка, ни раздѣля́тся ктому́ на два́ ца́рства,
|
|
|
23
|
|
|
да не оскверня́ются ктому́ въ кумі́рѣхъ свои́хъ и въ ме́рзостехъ свои́хъ и во всѣ́хъ нече́стіихъ свои́хъ: и изба́влю я́ от всѣ́хъ беззако́ній и́хъ, и́миже согрѣши́ша, и очи́щу я́, и бу́дутъ ми́ въ лю́ди, и а́зъ бу́ду и́мъ въ Бо́га.
|
|
|
24
|
|
|
И ра́бъ мо́й даві́дъ кня́зь средѣ́ и́хъ и па́стырь єди́нъ бу́детъ всѣ́хъ, я́ко въ за́повѣдехъ мои́хъ ходи́ти бу́дутъ и суды́ моя́ сохраня́тъ и сотворя́тъ я́,
|
|
|
25
|
|
|
и вселя́тся на земли́ своє́й, ю́же да́хъ рабу́ моєму́ Іа́кову, на не́йже жи́ша та́мо отцы́ и́хъ, и вселя́тся на не́й ті́и и сы́нове и́хъ и сы́нове сыно́въ и́хъ да́же до вѣ́ка: и даві́дъ ра́бъ мо́й кня́зь и́хъ бу́детъ во вѣ́къ.
|
|
|
26
|
|
|
И утвержу́ и́мъ завѣ́тъ ми́ренъ, и завѣ́тъ вѣ́ченъ бу́детъ съ ни́ми, и укореню́ я́ и умно́жу,
|
|
|
27
|
|
|
и да́мъ освяще́ніє моє́ посредѣ́ и́хъ во вѣ́къ, и бу́детъ вселе́ніє моє́ въ ни́хъ, и бу́ду и́мъ Бо́гъ, а они́ бу́дутъ ми́ лю́діє:
|
|
|
28
|
|
|
и увѣ́дятъ язы́цы, я́ко а́зъ є́смь Госпо́дь освяща́яй я́, внегда́ бу́дутъ свята́я моя́ средѣ́ и́хъ во вѣ́къ.
|
|
|
Глава 38
|
|
|
1
|
|
|
И бы́сть сло́во Госпо́дне ко мнѣ́ глаго́ля:
|
|
|
2
|
|
|
сы́не человѣ́чь, утверди́ лице́ твоє́ на го́га и на зе́млю Маго́га кня́зя ро́съ {Євр.: ро́шъ, славе́н.: глава́ или́ гла́внѣйшій.}, Мосо́ха и Ѳове́ля, и прорцы́ на́нь,
|
|
|
3
|
|
|
и рцы́ єму́: сія́ глаго́летъ Адонаі́ Госпо́дь: се́, а́зъ на тя́, го́гъ, и на кня́зя Ро́съ, Мосо́ха и Ѳове́ля,
|
|
|
4
|
|
|
и обращу́ тя о́крестъ, и вложу́ узду́ въ че́люсти твоя́, и соберу́ тя и всю́ си́лу твою́, ко́ни и ко́нники оболче́ны во броня́ вся́, собо́ръ мно́гъ, шле́мы и мечы́ и щиты́ вси́ ті́и иму́ще:
|
|
|
5
|
|
|
пе́рсяне и му́ряне, и ли́дяне и Ліви́ане, вси́ сі́и щиты́ и шле́мы иму́ще:
|
|
|
6
|
|
|
гоме́ръ и вси́ и́же о́крестъ єго́, до́мъ Ѳоргама́нь от коне́цъ сѣ́вера и вси́ и́же о́крестъ єго́, и язы́цы мно́зи съ тобо́ю.
|
|
|
7
|
|
|
Угото́вися, угото́вися са́мъ ты́ и ве́сь со́нмъ тво́й со́браный съ тобо́ю, и бу́деши ми́ въ пре́днюю стражбу́.
|
|
|
8
|
|
|
От дні́й мно́жайшихъ угото́вишися, и въ послѣ́дняя лѣ́та пріи́деши, и пріи́деши на зе́млю низвраще́нную от меча́, со́браныхъ от язы́къ мно́гихъ на зе́млю Ізра́илеву, я́же бы́сть пуста́ весьма́: и ті́и от язы́къ изыдо́ша, и вселя́тся съ ми́ромъ вси́.
|
|
|
9
|
|
|
И взы́деши а́ки до́ждь и пріи́деши а́ки о́блакъ, покры́ти зе́млю, и паде́ши ты́ и вси́ и́же о́крестъ тебе́, и язы́цы мно́зи съ тобо́ю.
|
|
|
10
|
|
|
Сія́ глаго́летъ Адонаі́ Госпо́дь: и бу́детъ въ то́й де́нь, взы́дутъ глаго́лы на се́рдце твоє́,
|
|
|
11
|
|
|
и помы́слиши помышле́нія зла́я и рече́ши: взы́ду на зе́млю отве́рженую, пріиду́ на молча́щыя въ тишинѣ́ и живу́щыя ми́рно, на вся́ живу́щыя на земли́, на не́йже нѣ́сть огра́ды, ни две́рій, ни вере́й,
|
|
|
12
|
|
|
є́же плѣни́ти плѣ́нъ и взя́ти коры́сти и́хъ, є́же обрати́ти ру́ку мою́ на зе́млю опустоше́ную, я́же насели́ся, и на язы́къ со́браный от язы́ковъ мно́гихъ, сотвори́вшихъ притяжа́нія имѣ́ній и живу́щихъ на пу́пѣ земли́.
|
|
|
13
|
|
|
Сава́ и Деда́нъ и купцы́ кархидо́нстіи и вся́ ве́си и́хъ реку́тъ тебѣ́: єда́ на плѣне́ніє, є́же плѣни́ти, ты́ гряде́ши, и взя́ти коры́сти? и собра́лъ єси́ лю́ди твоя́ взя́ти сребро́ и зла́то, отвести́ притяжа́нія и имѣ́нія, є́же плѣни́ти плѣ́нъ вели́къ.
|
|
|
14
|
|
|
Того́ ра́ди прорцы́, сы́не человѣ́чь, и рцы́ го́гу: сія́ глаго́летъ Адонаі́ Госпо́дь: не въ то́й ли де́нь, єгда́ жи́ти бу́дутъ лю́діє мои́ Ізра́иль съ ми́ромъ, воста́неши?
|
|
|
15
|
|
|
и пріи́деши от мѣ́ста своєго́ от конца́ сѣ́вера, и язы́цы мно́зи съ тобо́ю: ко́нницы на ко́нехъ вси́, собо́ръ вели́къ и си́ла мно́га,
|
|
|
16
|
|
|
и взы́деши на лю́ди моя́ Ізра́иля, я́ко о́блакъ покры́ти зе́млю: въ послѣ́днія дни́ бу́детъ, и возведу́ тя на зе́млю мою́, да мя́ увѣ́дятъ вси́ язы́цы, єгда́ освящу́ся въ тебѣ́ предъ ни́ми, [о, го́гъ!]
|
|
|
17
|
|
|
Сія́ глаго́летъ Адонаі́ Госпо́дь го́гу: ты́ єси́, о не́мже глаго́лахъ во дни́ пе́рвыя руко́ю ра́бъ мои́хъ проро́къ Ізра́илевыхъ, проре́кшихъ въ о́ныя дни́ и лѣ́та, є́же привести́ тя на ня́.
|
|
|
18
|
|
|
И бу́детъ въ то́й де́нь, въ о́ньже пріи́детъ го́гъ на зе́млю Ізра́илеву, глаго́летъ Адонаі́ Госпо́дь, взы́детъ я́рость моя́ во гнѣ́вѣ моє́мъ
|
|
|
19
|
|
|
и рве́нія моя́ во огни́ гнѣ́ва моєго́: глаго́лахъ, а́ще не бу́детъ въ то́й де́нь тру́съ вели́къ на земли́ Ізра́илевѣ:
|
|
|
20
|
|
|
и потрясу́тся от лица́ Госпо́дня ры́бы морскі́я и пти́цы небе́сныя, и звѣ́ріє по́льніи и вси́ га́ди по́лзающіи по земли́, и вси́ человѣ́цы и́же на лицы́ земли́, и расто́ргнутся го́ры и паду́тъ де́бри, и вся́ка стѣна́ на зе́млю паде́тъ.
|
|
|
21
|
|
|
И призову́ на́нь ве́сь стра́хъ ме́чный, глаго́летъ Адонаі́ Госпо́дь: ме́чь человѣ́ка на бра́та єго́ бу́детъ.
|
|
|
22
|
|
|
И отсужду́ єму́ сме́ртію и кро́вію, и дожде́мъ потопля́ющимъ и ка́меніємъ гра́днымъ, о́гнь и ка́мень горя́щь одождю́ на́нь и на вся́ су́щыя съ ни́мъ и на язы́ки мно́гія съ ни́мъ:
|
|
|
23
|
|
|
и возвели́чуся и освящу́ся, и просла́влюся и увѣ́данъ бу́ду предъ язы́ки мно́гими, и увѣ́дятъ, я́ко а́зъ є́смь Госпо́дь.
|
|
|
Глава 39
|
|
|
1
|
|
|
И ты́, сы́не человѣ́чь, прорцы́ на го́га и рцы́: сія́ глаго́летъ Адонаі́ Госпо́дь: се́, а́зъ на тя́, го́гъ, кня́зя Ро́съ, Мосо́ха и Ѳове́ля,
|
|
|
2
|
|
|
и соберу́ тя и наста́влю тя́, и возведу́ тя от конца́ сѣ́вера и возведу́ тя на го́ры Ізра́илевы:
|
|
|
3
|
|
|
и исто́ргну лу́къ тво́й от руки́ твоєя́ лѣ́выя и стрѣ́лы твоя́ от руки́ твоєя́ десны́я,
|
|
|
4
|
|
|
и поражу́ тя на гора́хъ Ізра́илевыхъ, и паде́ши ты́ и вси́ и́же о́крестъ тебе́, и язы́цы и́же съ тобо́ю отдадя́тся во мно́жество пти́цъ вся́кому паря́щему, и всѣ́мъ звѣре́мъ по́льнымъ да́хъ тя́ на изъяде́ніє:
|
|
|
5
|
|
|
на лицы́ по́ля паде́ши, я́ко а́зъ глаго́лахъ, глаго́летъ Адонаі́ Госпо́дь.
|
|
|
6
|
|
|
И пущу́ о́гнь на Маго́га, и населя́тся о́строви съ ми́ромъ,
|
|
|
7
|
|
|
и увѣ́дятъ, я́ко а́зъ є́смь Госпо́дь: и и́мя моє́ свято́є вѣ́стно бу́детъ средѣ́ люді́й мои́хъ Ізра́иля, и не оскверни́тся и́мя моє́ свято́є ктому́, и увѣ́дятъ вси́ язы́цы, я́ко а́зъ є́смь Госпо́дь святы́й средѣ́ Ізра́иля.
|
|
|
8
|
|
|
Се́, приспѣ́, и увѣ́си, я́ко бу́детъ, глаго́летъ Адонаі́ Госпо́дь: се́ є́сть де́нь, о не́мже глаго́лахъ,
|
|
|
9
|
|
|
и изы́дутъ живу́щіи во градѣ́хъ Ізра́илевыхъ, и пожгу́тъ ору́жіє, и щиты́ и ко́пія, и лу́ки и стрѣ́лы, и жезлы́ ручны́я и су́лицы, и раждегу́тъ и́ми о́гнь се́дмь лѣ́тъ:
|
|
|
10
|
|
|
и не во́змутъ древе́съ съ по́ля, ни изсѣку́тъ от дубра́вы, но ору́жіємъ раждегу́тъ о́гнь, и плѣня́тъ плѣни́вшыя и́хъ и расхи́тятъ расхи́тившихъ я́, глаго́летъ Адонаі́ Госпо́дь.
|
|
|
11
|
|
|
И бу́детъ, въ то́й де́нь да́мъ го́гу мѣ́сто наро́чито, гро́бъ во Ізра́или, многопогреба́телно, прише́дшихъ на восто́къ мо́ря, и заградя́тъ у́стіє де́бри и погребу́тъ та́мо го́га и все́ мно́жество єго́, и прозове́тся та́ де́брь: многопогреба́телноє го́га.
|
|
|
12
|
|
|
И закопа́ютъ я́ до́мъ Ізра́илевъ, да очи́стится земля́ въ се́дмь ме́сяцъ,
|
|
|
13
|
|
|
и погребу́тъ я́ вси́ лю́діє земли́, и бу́детъ и́мъ имени́то, въ о́ньже де́нь просла́влюся, глаго́летъ Адонаі́ Госпо́дь.
|
|
|
14
|
|
|
И муже́й всегда́ поста́вятъ обходи́ти всю́ зе́млю, є́же погребсти́ оста́вшихся на лицы́ земли́ и очи́стити ю́ по седми́ ме́сяцѣхъ, и взы́щутъ опа́сно.
|
|
|
15
|
|
|
Вся́къ проходя́й зе́млю и узрѣ́вый ко́сть человѣ́чу сотвори́тъ у нея́ зна́меніє, до́ндеже погребу́тъ ю́ погреба́ющіи въ де́бри, многопогреба́телнѣмъ го́говѣ.
|
|
|
16
|
|
|
И́бо и́мя мѣ́сту [прозове́тся] паде́ніє многопогреба́телноє: и очи́стится земля́.
|
|
|
17
|
|
|
И ты́, сы́не человѣ́чь, рцы́: сія́ глаго́летъ Адонаі́ Госпо́дь: рцы́ вся́цѣй пти́цѣ паря́щей и ко вся́кому звѣ́рю се́лному: собери́теся и пріиди́те от всѣ́хъ окре́стныхъ єго́ на заколе́ніє моє́, є́же закла́хъ ва́мъ, закла́ніє ве́ліє на гора́хъ Ізра́илевыхъ, яди́те мяса́ и пі́йте кро́вь:
|
|
|
18
|
|
|
мяса́ исполи́новъ изъя́сте и кро́вь князе́й земны́хъ испієте́, овны́ и телцы́, и козлы́ и волы́ ту́чніи вси́:
|
|
|
19
|
|
|
и да я́сте ту́къ до сы́тости испієте́ кро́вь до пія́нства от закла́нія моєго́, є́же закла́хъ ва́мъ:
|
|
|
20
|
|
|
и насы́титеся от трапе́зы моєя́, от коня́ и вса́дника, исполи́на и вся́каго му́жа во́инскаго, глаго́летъ Адонаі́ Госпо́дь.
|
|
|
21
|
|
|
И да́мъ сла́ву мою́ въ ва́съ, и у́зрятъ вси́ язы́цы су́дъ мо́й, єго́же сотвори́хъ, и ру́ку мою́, ю́же наведо́хъ на ня́,
|
|
|
22
|
|
|
и увѣ́сть до́мъ Ізра́илевъ, я́ко а́зъ є́смь Госпо́дь Бо́гъ и́хъ от сего́ дне́ и въ про́чыя.
|
|
|
23
|
|
|
И увѣ́дятъ вси́ язы́цы, я́ко грѣхо́въ ра́ди свои́хъ плѣне́ни бы́ша до́мъ Ізра́илевъ, поне́же отверго́шася мене́, и отврати́хъ лице́ моє́ от ни́хъ и преда́хъ я́ въ ру́цѣ враго́въ и́хъ, и падо́ша мече́мъ вси́:
|
|
|
24
|
|
|
по нечистота́мъ и́хъ и по беззако́ніємъ и́хъ сотвори́хъ и́мъ и отврати́хъ лице́ моє́ от ни́хъ.
|
|
|
25
|
|
|
Того́ ра́ди сія́ глаго́летъ Адонаі́ Госпо́дь: ны́нѣ возвращу́ плѣне́ніє Іа́ковле и поми́лую до́мъ Ізра́илевъ, и возревну́ю и́мене ра́ди моєго́ свята́го:
|
|
|
26
|
|
|
и во́змутъ безче́стіє своє́ и вся́кую непра́вду свою́, є́юже непра́вдоваша, єгда́ вселя́тся на земли́ своє́й съ ми́ромъ и не бу́детъ устраша́ющаго,
|
|
|
27
|
|
|
внегда́ возвращу́ я́ от язы́къ и соберу́ я́ от стра́нъ язы́ческихъ и освящу́ся въ ни́хъ предъ язы́ки:
|
|
|
28
|
|
|
и увѣ́дятъ, я́ко а́зъ є́смь Госпо́дь Бо́гъ и́хъ, внегда́ явлю́ся и́мъ во язы́цѣхъ и соберу́ я́ на зе́млю и́хъ и не оста́влю от ни́хъ та́мо ктому́:
|
|
|
29
|
|
|
и не отвращу́ лица́ моєго́ ктому́ от ни́хъ, зане́ излія́хъ я́рость мою́ на до́мъ Ізра́илевъ, глаго́летъ Адонаі́ Госпо́дь. и не отвращу́ лица́ моєго́ ктому́ от ни́хъ, зане́ излія́хъ я́рость мою́ на до́мъ Изра́илевъ, глаго́летъ Адонаи́ Госпо́дь. оста́влены Євре́йскія рѣ́чи въ соста́вѣ, поне́же во всѣ́хъ гре́ческихъ перево́дѣхъ стоя́тъ Євре́йскія жь: а лу́чшаго ра́ди вразумле́нія чита́телемъ, значе́нія и́хъ изображены́ подъ соста́вомъ славе́нски.}.
|
|
|
Глава 40
|
|
|
1
|
|
|
И бы́сть во два́десять пя́тоє лѣ́то плѣне́нія на́шего, пе́рваго ме́сяца, въ деся́тый де́нь ме́сяца, въ четвертоєна́десять лѣ́то по плѣне́ніи гра́да, въ то́й де́нь бы́сть на мнѣ́ рука́ Госпо́дня: и веде́ мя та́мо,
|
|
|
2
|
|
|
въ видѣ́ніи Бо́жіи веде́ мя на зе́млю Ізра́илеву и поста́ви мя́ на горѣ́ высо́цѣ зѣло́, на не́йже я́ко согражде́ніє гра́да пря́мо [полу́дне],
|
|
|
3
|
|
|
и введе́ мя́ та́мо: и се́, му́жъ, и зра́къ єго́ бя́ше, я́ко видѣ́ніє мѣ́ди блеща́щіяся, и въ руцѣ́ єго́ бя́ше ве́рвь зи́ждущихъ и тро́сть мѣ́рителная. То́й же стоя́ше у вра́тъ
|
|
|
4
|
|
|
и рече́ ко мнѣ́: ви́дѣлъ ли єси́, сы́не человѣ́чь? ви́ждь очи́ма твои́ма и уши́ма твои́ма слы́ши, и учини́ въ се́рдцы твоє́мъ вся́, єли́ка а́зъ показу́ю тебѣ́, зане́ того́ ра́ди вше́лъ єси́ сѣ́мо, да покажу́ тебѣ́, и пока́жеши ты́ вся́, єли́ка ви́диши, до́му Ізра́илеву.
|
|
|
5
|
|
|
И се́, огра́да внѣу́ду о́крестъ хра́ма, и въ руцѣ́ му́жа мѣ́ра тро́стяна шести́ лако́тъ въ ла́коть шестодла́нный, и измѣ́ри предстѣ́ніє ширину́ ра́вно тро́сти, и высоту́ єго́ ра́вно тро́сти.
|
|
|
6
|
|
|
И вни́де во врата́ зря́щая на восто́къ седмію́ степе́ньми, и измѣ́ри Ѳеє́, ше́сть о сію́ страну́, ше́сть же объ ону́, и Єла́мъ {притво́ръ} две́рный ра́вно тро́сти.
|
|
|
7
|
|
|
И ѳеє́ {черто́гъ} ра́вно тро́сти въ долготу́ и ра́вно тро́сти въ широту́, и аіла́мъ {подво́и} средѣ́ ѳенла́ѳъ {черто́говъ} шести́ лако́тъ. И Ѳеє́ второ́є {вторы́й} ра́вно тро́сти въ широту́ и ра́вно тро́сти въ долготу́, Єла́мъ {притво́ръ} же пяти́ лако́тъ.
|
|
|
8
|
|
|
И ѳеє́ {черто́гъ} тре́тіє ра́вно тро́сти въ долготу́ и ра́вно тро́сти въ широту́,
|
|
|
9
|
|
|
Єла́мъ же вра́тный, и́же бли́зъ Єла́ма {притво́ра} две́рнаго осми́ лако́тъ, аіле́въ же {подво́и же єго́} двою́ лакте́й: и Єла́мъ {притво́ръ} две́рный внутрьу́ду.
|
|
|
10
|
|
|
И ѳеє́ две́рныя {черто́зи две́рніи} пря́мо ѳеє́ {черто́гомъ}, три́ о сію́ страну́ и три́ объ ону́, мѣ́ра же єди́на тріє́мъ: и мѣ́ра єди́на аіла́мъ {подво́ємъ} сю́ду и сю́ду.
|
|
|
11
|
|
|
И размѣ́ри широту́ вхо́да вра́тнаго десяти́ лакте́й, широту́ же вра́тную трина́десяти лакте́й,
|
|
|
12
|
|
|
и ла́коть єди́нъ своди́мь пря́мо ѳеєі́мъ {черто́гомъ} ла́ктя єди́наго и ла́ктя єди́наго, предѣ́лъ сю́ду и сю́ду, и Ѳеє́ шести́ лакте́й о сію́ страну́ и шести́ лакте́й объ ону́ страну́.
|
|
|
13
|
|
|
И размѣ́ри врата́ от стѣны́ Ѳеє́ до стѣны́ Ѳеє́, широта́ два́десяти и пяти́ лакте́й: сія́ врата́ ко врато́мъ,
|
|
|
14
|
|
|
и непокрове́нноє Єла́ма {притво́ра} вра́тъ шести́десятъ лакте́й, [два́десяти пяти́] и ѳеє́ {черто́гъ} двора́ о́крестъ,
|
|
|
15
|
|
|
и непокрове́нноє вра́тъ отвнѣ́ въ непокрове́нноє [вра́тъ] Єла́ма вра́тъ внутрьу́ду пятьдеся́тъ лакте́й.
|
|
|
16
|
|
|
И око́нца сокрове́на ѳеєі́мъ {въ черто́зѣхъ} и въ аіла́мъ {подво́єхъ и́хъ} вну́трь вра́тъ двора́ о́крестъ: та́кожде и Єла́мъ {притво́рамъ} око́нца внутрьу́ду о́крестъ, и на Аіла́мъ {и на подво́єхъ} фі́ніки сю́ду и сю́ду [изва́яны].
|
|
|
17
|
|
|
И введе́ мя во дво́ръ вну́тренній, и се́, прегражде́нія и междусто́лпія о́крестъ двора́, прегражде́ніи же три́десять въ междусто́лпіихъ,
|
|
|
18
|
|
|
и притво́ры проти́ву за́дней странѣ́ вра́тъ, по долготѣ́ вра́тъ междусто́лпіє ни́жнеє.
|
|
|
19
|
|
|
И размѣ́ри широту́ двора́ от непокрове́наго вра́тъ внѣ́шнихъ вну́трь ко непокрове́ному вра́тъ зря́щихъ внѣ́, лакте́й сто́ зря́щихъ на восто́къ: и введе́ мя на сѣ́веръ,
|
|
|
20
|
|
|
и се́, врата́ зря́щая на сѣ́веръ двору́ внѣ́шнему, и размѣ́ри я́, долготу́ и́хъ и широту́.
|
|
|
21
|
|
|
И ѳеє́ {черто́зи и́хъ} три́ о сію́ страну́, три́ же объ ону́, и аіле́въ {подво́и и́хъ}, и Єла́мы {притво́ры и́хъ}, и фі́ніки и́хъ: и бы́сть по мѣ́рѣ вра́тъ зря́щихъ на восто́къ, пяти́десяти лакте́й долгота́ и́хъ, а широта́ и́хъ дву́десяти и пяти́ лакте́й:
|
|
|
22
|
|
|
и око́нца и́хъ, и Єла́мы, и фі́ніки и́хъ, я́коже врата́ зря́щая на восто́къ: и седмію́ восхо́дами восхожда́ху на ня́, и Єла́мы внутрьу́ду.
|
|
|
23
|
|
|
И врата́ двору́ вну́треннему зря́щая ко врато́мъ сѣ́вернымъ, я́коже врата́ зря́щая на восто́къ: и размѣ́ри дво́ръ от вра́тъ до вра́тъ лакте́й сто́.
|
|
|
24
|
|
|
И веде́ мя къ ю́гу, и се́, врата́ зря́щая на ю́гъ, и размѣ́ри я́, и ѳеє́ {черто́ги и́хъ}, и аіле́ва {подво́и и́хъ}, и Єла́мы {притво́ры и́хъ}, по тѣ́мжде мѣ́рамъ.
|
|
|
25
|
|
|
И око́нца и́хъ и Єла́мы о́крестъ я́коже и око́нца Єла́гъ {о́ныя}, пяти́десяти лакте́й долгота́ и́хъ, а широта́ дву́десяти и пяти́ лакте́й,
|
|
|
26
|
|
|
и се́дмь восхо́довъ и́мъ, и Єла́мы внутрьу́ду, и фі́ніки и́хъ, єди́нъ о сію́ страну́, а другі́й объ ону́ надъ аіле́въ {подво́ями и́хъ}.
|
|
|
27
|
|
|
И врата́ пря́мо врато́мъ двора́ вну́тренняго на ю́гъ: и размѣ́ри дво́ръ от вра́тъ до вра́тъ на ю́гъ, сто́ лакте́й въ широту́.
|
|
|
28
|
|
|
И введе́ мя во дво́ръ вну́тренній вра́тъ, я́же на ю́гъ, и размѣ́ри врата́, я́же на ю́гъ, по тѣ́мжде мѣ́рамъ:
|
|
|
29
|
|
|
и ѳеє́ {черто́зи и́хъ}, и аіле́въ {подво́и и́хъ}, и Єла́мы {притво́ры и́хъ} по тѣ́мжде мѣ́рамъ.
|
|
|
30
|
|
|
И око́нца и́хъ и Єла́мы о́крестъ, пяти́десяти лакте́й долгота́ и́хъ, а широта́ дву́десяти и пяти́ лакте́й.
|
|
|
31
|
|
|
Єла́мы же во дво́ръ внѣ́шній, и фі́ніки аіле́въ {подво́ємъ и́хъ}, и о́смь восхо́довъ.
|
|
|
32
|
|
|
И введе́ мя во врата́ зря́щая на восто́къ, и размѣ́ри я́ по тѣ́мжде мѣ́рамъ, и ѳеє́ {черто́ги и́хъ} и аіле́въ {подво́и} и Єла́мы {притво́ры и́хъ} по тѣ́мжде мѣ́рамъ.
|
|
|
33
|
|
|
И око́нца и́мъ, и Єла́мы {и притво́рамъ и́хъ} о́крестъ, пяти́десяти лакте́й долгота́ и́хъ, а широта́ и́хъ дву́десяти и пяти́ лакте́й.
|
|
|
34
|
|
|
И Єла́мы во дво́ръ вну́тренній, и фі́ніки на Аіле́въ {на подво́єхъ и́хъ} сю́ду и сю́ду, и о́смь восхо́довъ и́мъ.
|
|
|
35
|
|
|
И введе́ мя во врата́ я́же на сѣ́веръ, и размѣ́ри по тѣ́мжде мѣ́рамъ,
|
|
|
36
|
|
|
и Ѳеє́ и Аіле́въ и Єла́мы, и око́нца и́мъ о́крестъ, пяти́десяти лакте́й долгота́ и́хъ, а широта́ дву́десяти и пяти́ лакте́й,
|
|
|
37
|
|
|
и Єла́мы во внѣ́шній дво́ръ, и фі́ніки аіле́ву {подво́ємъ и́хъ} сю́ду и сю́ду, и о́смь восхо́довъ и́мъ.
|
|
|
38
|
|
|
И прегра́ды и́хъ, и две́ри и́хъ, и Єла́мы и́хъ предъ враты́ и́хъ вторы́ми сто́къ, та́мо измыва́ютъ всесожже́нія.
|
|
|
39
|
|
|
Во Єла́мѣ {въ притво́рѣ} же вра́тъ, двѣ́ трапе́зы о сію́ страну́, двѣ́ же объ ону́, є́же закала́ти на ни́хъ всесожже́нія, я́же за грѣхи́ и я́же за невѣ́дѣніє.
|
|
|
40
|
|
|
И созади́ сто́ка всесожже́ній две́рій зря́щихъ на сѣ́веръ двѣ́ трапе́зы на восто́къ проти́ву за́дней странѣ́ [две́рій] вторы́хъ, и проти́ву Єла́ма вра́тъ двѣ́ трапе́зы на восто́къ.
|
|
|
41
|
|
|
Четы́ри о сію́ страну́, четы́ри же объ ону́ проти́ву за́дней странѣ́ вра́тъ, на тѣ́хъ закала́ютъ заколе́нія: пря́мо осми́ трапе́зъ заколе́ній:
|
|
|
42
|
|
|
четы́ри же трапе́зы всесожже́ній ка́менны исте́саны, въ широту́ ла́ктя єди́наго и по́лъ, въ долготу́ дву́хъ лакте́й и по́лъ, а въ высоту́ ла́коть єди́нъ: на ты́я возлага́ютъ ору́дія, и́миже закала́ютъ та́мо всесожже́нія и заколе́нія.
|
|
|
43
|
|
|
И имѣ́ютъ огражде́ніє ма́ло исте́сано на дла́нь внутрь у́ду о́крестъ, верху́ же трапе́зы покро́въ, є́же покрыва́тися и́мъ от дождя́ и зно́я.
|
|
|
44
|
|
|
И введе́ мя во дво́ръ вну́треннѣйшій, и се́, двѣ́ прегра́ды во вну́треннѣйшемъ дворѣ́, єди́на проти́ву за́дней странѣ́ вра́тъ зря́щихъ на сѣ́веръ, вводя́щая на ю́гъ, а друга́я проти́ву за́дней странѣ́ вра́тъ су́щихъ на ю́гъ, зря́щихъ же къ сѣ́веру.
|
|
|
45
|
|
|
И рече́ ко мнѣ́: прегра́да сія́, я́же зри́тъ на ю́гъ, жерце́мъ є́сть, и́же стрегу́тъ стражбу́ хра́ма:
|
|
|
46
|
|
|
а прегра́да, я́же зри́тъ къ сѣ́веру, жерце́мъ є́сть стрегу́щымъ стра́жу тре́бника: ті́и су́ть сы́нове саду́ковы, приступа́ющіи от Леві́а ко Го́сподеви, є́же служи́ти єму́.
|
|
|
47
|
|
|
И размѣ́ри дво́ръ ста́ лакте́й въ долготу́ и въ широту́ ста́ лакте́й, на четы́ри страны́ єго́, и тре́бникъ пря́мо хра́му.
|
|
|
48
|
|
|
И введе́ мя во Єла́мъ {притво́ръ} хра́ма: и размѣ́ри аі́лъ {подво́и} Єла́ма пяти́ лакте́й широту́ о сію́ страну́, пяти́ же лакте́й объ ону́, широта́ же две́рная четырехна́десяти лакте́й, и бока́ две́рная Єла́ма три́ ла́кти о сію́ страну́, три́ же объ ону́.
|
|
|
49
|
|
|
Долгота́ же Єла́ма два́десять лакте́й, а широта́ двана́десять лакте́й: и десятію́ степе́ньми восхожда́ху къ нему́, и столпи́ бя́ху у аіла́ма {у подво́євъ}, єди́нъ о сію́ страну́, а другі́й объ ону́.
|
|
|
Глава 41
|
|
|
1
|
|
|
И введе́ мя во хра́мъ, и размѣ́ри аіла́мъ {подво́и}, шести́ лакте́й широта́ о сію́ страну́ и шести́ лакте́й широта́ Аіла́мъ объ о́ну,
|
|
|
2
|
|
|
и широта́ вра́тъ де́сять лакте́й, и бока́ вра́тъ пяти́ лакте́й о сію́ страну́ и пяти́ объ ону́: и измѣ́ри долготу́ и́хъ четы́редесять лакте́й, а широту́ два́десять лакте́й.
|
|
|
3
|
|
|
И вни́де во дво́ръ вну́тренній, и размѣ́ри Аіла́мъ две́рій дву́хъ лакте́й, и две́ри шести́ лакте́й, бока́ же две́рная седми́ лакте́й о сію́ страну́ и седми́ объ ону́.
|
|
|
4
|
|
|
И размѣ́ри долготу́ две́рій четы́редесять лакте́й, а широту́ два́десять лакте́й предъ лице́мъ хра́ма, и рече́ ко мнѣ́: сіє́ свято́є святы́хъ.
|
|
|
5
|
|
|
И размѣ́ри стѣ́ну хра́ма шести́ лакте́й и широту́ страны́ четы́рехъ лакте́й о́крестъ,
|
|
|
6
|
|
|
страны́ же страна́ до страны́ три́десять и три́ два́щи: и разстоя́ніє въ стѣнѣ́ хра́ма во страна́хъ о́крестъ, є́же на прозра́къ бы́ти входя́щымъ, да отню́дъ не прикаса́ются ко стѣна́мъ хра́ма.
|
|
|
7
|
|
|
Широта́ же вы́шнія страны́ по приложе́нію от стѣны́ къ вы́шней о́крестъ хра́ма, я́ко да разширя́єтся свы́ше, и да от до́лнихъ восхо́дятъ на го́рняя, а от сре́днихъ на трекро́вная.
|
|
|
8
|
|
|
И ви́дѣхъ хра́ма высоту́ о́крестъ разстоя́ніє стра́нъ ра́вно тро́сти шести́ лакте́й разстоя́нія,
|
|
|
9
|
|
|
широта́ же стѣны́ страны́ внѣу́ду пяти́ лакте́й, и про́чая между́ страна́ми хра́ма,
|
|
|
10
|
|
|
и между́ прегра́дами широта́ два́десяти лакте́й, окру́жность о́крестъ хра́ма.
|
|
|
11
|
|
|
Две́ри же прегра́дъ ко про́чему две́рій єди́ныхъ я́же къ сѣ́веру: и две́рь єди́на къ ю́гу, широта́ же свѣ́та про́чаго пяти́ лакте́й широта́ о́крестъ.
|
|
|
12
|
|
|
Раздѣ́лъ же проти́ву про́чему а́ки къ мо́рю се́дмьдесятъ лакте́й, широта́ стѣны́ раздѣля́ющія, широта́ о́крестъ пя́ть лакте́й, и долгота́ єя́ де́вятьдесятъ лакте́й
|
|
|
13
|
|
|
и размѣ́ри проти́ву хра́ма долготу́ сто́ лакте́й, и про́чая и раздѣля́ющая, и стѣ́ны и́хъ въ долготу́ сто́ лакте́й.
|
|
|
14
|
|
|
И широта́ проти́ву хра́ма, и про́чая проти́ву ста́ лакте́й.
|
|
|
15
|
|
|
И размѣ́ри долготу́ раздѣ́лу проти́ву лицу́ про́чему созади́ хра́му тому́, и про́чая о сію́ страну́ и объ ону́ ста́ лакте́й долготу́: хра́мъ же и у́глы, и Єла́мъ {притво́ръ} внѣ́шній, до́ски по́стланы.
|
|
|
16
|
|
|
И о́кна реше́тчатая свѣще́нія о́крестъ тріє́мъ [страна́мъ] є́же приница́ти: хра́мъ же и я́же бли́зъ єго́ устла́на дре́вомъ о́крестъ, и помо́стъ, и от помо́ста до о́конъ: о́кна же отворя́єма троя́ко на приница́ніє,
|
|
|
17
|
|
|
и да́же до до́му вну́тренняго и до внѣ́шняго, и на все́й стѣнѣ́ о́крестъ вну́тренней и внѣ́шней мѣ́ры,
|
|
|
18
|
|
|
и изва́янніи херуві́ми и фі́ніки: фі́нікъ посредѣ́ херуві́ма и херуві́ма: два́ лица́ херуві́му:
|
|
|
19
|
|
|
лице́ человѣ́ческо къ фі́ніку сю́ду и сю́ду, и лице́ льво́во къ фі́ніку сю́ду и сю́ду, изва́янъ ве́сь хра́мъ о́крестъ.
|
|
|
20
|
|
|
От помо́ста да́же до сво́да херуві́ми и фі́ніки изва́яни.
|
|
|
21
|
|
|
Свято́є же и хра́мъ отверза́ємь на четы́ри страны́, предъ лице́мъ святы́хъ видѣ́ніє я́ко зра́къ тре́бника древя́на,
|
|
|
22
|
|
|
три́ ла́кти высота́ єго́, а долгота́ дву́ лакте́й, и широта́ та́кожде: имѣ́яше же ро́ги, и основа́ніє єго́ и стѣ́ны єго́ древя́ны. И рече́ ко мнѣ́: сія́ трапе́за, я́же предъ лице́мъ Госпо́днимъ:
|
|
|
23
|
|
|
дво́и же две́ри хра́му и дво́и две́ри свято́му,
|
|
|
24
|
|
|
двои́мъ две́ремъ враща́ющымся: двѣ́ вереи́ єди́нымъ, и двѣ́ вереи́ вторы́мъ две́ремъ.
|
|
|
25
|
|
|
И вая́нія надъ ни́ми и надъ две́рьми хра́ма херуві́мъ и фі́ніки, по вая́нію святы́хъ, и древеса́ потре́бна предъ лице́мъ Єла́ма {притво́ра} от внѣу́ду,
|
|
|
26
|
|
|
и о́кна сокрове́на. И размѣ́ри сю́ду и сю́ду въ покро́вѣхъ Єла́ма, и страны́ хра́ма древа́ми сопряжены́.
|
|
|
Глава 42
|
|
|
1
|
|
|
И введе́ мя во дво́ръ внѣ́шній на восто́ки, пря́мо вра́тъ я́же къ сѣ́веру, и введе́ мя [вну́трь], и се́, прегра́дъ пя́ть держа́щыяся про́чаго и держа́щыяся предѣ́ла къ сѣ́веру,
|
|
|
2
|
|
|
проти́ву лица́ ста́ лакте́й долгота́ къ сѣ́веру, а широта́ пятьдеся́тъ лакте́й,
|
|
|
3
|
|
|
распи́саны я́коже врата́ двора́ вну́тренняго, и я́коже междусто́лпія внѣ́шняго двора́ чинорасполо́жены, прямоли́чны притво́ры три́.
|
|
|
4
|
|
|
И пря́мо прегра́дамъ прохо́дъ десяти́ лакте́й въ широту́, во вну́тренняя пути́ єди́наго ла́ктя на сто́ лакте́й долгота́, и две́ри и́хъ къ сѣ́веру.
|
|
|
5
|
|
|
И прохо́ди го́рничніи та́кожде, я́ко изница́ше междусто́лпіє изъ него́, от до́лнаго междусто́лпія, и разстоя́ніє: си́це междусто́лпіє и разстоя́ніє,
|
|
|
6
|
|
|
и си́це притво́ры: поне́же трегу́бы бя́ху и столпо́въ не имѣ́ша, я́коже столпи́ прегра́дъ: того́ ра́ди изница́ху изъ ни́жнихъ и сре́днихъ от земли́.
|
|
|
7
|
|
|
И свѣ́тъ внѣу́ду, я́коже прегра́ды двора́ внѣ́шняго, зря́щыя проти́ву прегра́дамъ, я́же къ сѣ́веру, долгота́ пяти́десяти лакте́й.
|
|
|
8
|
|
|
Зане́ долгота́ прегра́дъ зря́щихъ во дво́ръ внѣ́шній бя́ше пяти́десяти лакте́й, и ты́я су́ть прямоли́чны тѣ́мъ: все́ же [бѣ́] ста́ лакте́й.
|
|
|
9
|
|
|
Две́ри же прегра́дъ тѣ́хъ вхо́да, и́же на восто́ки, є́же входи́ти и́ми от двора́ внѣ́шняго,
|
|
|
10
|
|
|
по свѣ́ту су́щаго въ нача́лѣ прохо́да: и къ ю́гу на лице́ ю́га, и пря́мо про́чему, и пря́мо раздѣле́нія, и прегра́ды,
|
|
|
11
|
|
|
и прохо́дъ проти́ву лицу́ и́хъ, по мѣ́рамъ прегра́дъ я́же къ сѣ́веру и по долготѣ́ и́хъ и по широтѣ́ и́хъ, и по всѣ́мъ исхо́домъ и́хъ и по всѣ́мъ враще́ніємъ и́хъ, и по свѣ́томъ и́хъ и по две́ремъ и́хъ,
|
|
|
12
|
|
|
прегра́дъ я́же къ ю́гу, и по две́ремъ от нача́ла прохо́да а́ки къ свѣ́ту разстоя́нія тро́сти, и на восто́къ є́же входи́ти и́ми.
|
|
|
13
|
|
|
И рече́ ко мнѣ́: прегра́ды, я́же къ сѣ́веру, и прегра́ды, я́же къ ю́гу, су́щыя проти́ву лицу́ разстоя́ній, сія́ су́ть прегра́ды свята́го, въ ни́хже ядя́тъ жерцы́ сы́нове саду́ковы, и́же приступа́ютъ ко Го́сподеви, свята́я святы́хъ, и та́мо положа́тъ свята́я святы́хъ и же́ртву, и я́же за грѣхи́ и я́же за невѣ́дѣніє, поне́же мѣ́сто свято є́сть.
|
|
|
14
|
|
|
Да не вхо́дятъ та́мо, кромѣ́ жерце́въ, и да не исхо́дятъ от свята́го во дво́ръ внѣ́шній, я́ко да при́сно святи бу́дутъ принося́щіи, и да не прикаса́ются ри́замъ и́хъ, въ ни́хже слу́жатъ, поне́же свя́та су́ть, но да облеку́тся въ ри́зы и́ны, єгда́ прикаса́ются лю́демъ.
|
|
|
15
|
|
|
И соверши́ся размѣ́реніє хра́ма внутрьу́ду. И изведе́ мя по пути́ вра́тъ зря́щихъ на восто́къ, и размѣ́ри подо́біє хра́ма о́крестъ чинорасположе́ніємъ.
|
|
|
16
|
|
|
И ста́ созади́ вра́тъ зря́щихъ на восто́къ, и размѣ́ри пя́ть со́тъ тро́стію мѣ́рною.
|
|
|
17
|
|
|
И обрати́ся на сѣ́веръ, и размѣ́ри на лице́ сѣ́вера лакте́й пя́ть со́тъ тро́стію мѣ́рною.
|
|
|
18
|
|
|
И обрати́ся къ мо́рю, и размѣ́ри на лице́ мо́ря пя́ть со́тъ лакте́й тро́стію мѣ́рною.
|
|
|
19
|
|
|
И обрати́ся на ю́гъ, и размѣ́ри проти́ву ю́гу пя́ть со́тъ тро́стію мѣ́рною.
|
|
|
20
|
|
|
Четы́ри страны́ то́южде тро́стію: и расположи́ єго́, и огра́ду о́крестъ єму́, пя́ть со́тъ лакте́й [долготу́] на восто́къ, и пя́ть со́тъ лакте́й широту́, є́же разлуча́ти между́ святы́ми и между́ предстѣ́ніємъ су́щимъ въ чиноположе́ніи хра́ма.
|
|
|
Глава 43
|
|
|
1
|
|
|
И веде́ мя ко врато́мъ зря́щымъ на восто́ки и изведе́ мя:
|
|
|
2
|
|
|
и се́, сла́ва Бо́га Ізра́илева грядя́ше по пути́ вра́тъ зря́щихъ на восто́ки, и гла́съ полка́ а́ки гла́съ усугубля́ющихъ мно́гихъ, и земля́ свѣтя́шеся а́ки свѣ́тъ от сла́вы єго́ о́крестъ.
|
|
|
3
|
|
|
И видѣ́ніє, є́же ви́дѣхъ, по видѣ́нію, є́же ви́дѣхъ, єгда́ вхожда́хъ пома́зати гра́дъ: и видѣ́ніє колесни́цы, ю́же ви́дѣхъ, подо́бяшеся видѣ́нію, є́же ви́дѣхъ на рѣцѣ́ Хова́ръ. И падо́хъ на лице́ моє́.
|
|
|
4
|
|
|
Сла́ва же Госпо́дня вни́де во хра́мъ по пути́ вра́тъ зря́щихъ на восто́къ.
|
|
|
5
|
|
|
И взя́ мя ду́хъ и введе́ мя во дво́ръ вну́тренній: и се́, по́лнъ сла́вы до́мъ Госпо́день.
|
|
|
6
|
|
|
И ста́хъ, и се́, гла́съ от хра́ма глаго́лющаго ко мнѣ́, и му́жъ стоя́ше бли́зъ мене́
|
|
|
7
|
|
|
и рече́ ко мнѣ́: сы́не человѣ́чь, ви́дѣлъ ли єси́ мѣ́сто престо́ла моєго́ и мѣ́сто стопы́ но́гъ мои́хъ, идѣ́же всели́тся и́мя моє́ средѣ́ до́му Ізра́илева во вѣ́къ? и не оскверня́тъ ктому́ и́мене моєго́ свята́го до́мъ Ізра́илевъ, ті́и и старѣ́йшины и́хъ во блуже́ніи своє́мъ и во убі́йствахъ старѣ́йшинъ свои́хъ средѣ́ себе́,
|
|
|
8
|
|
|
внегда́ полага́ху преддве́ріє моє́ во преддве́ріихъ свои́хъ и пра́ги моя́ бли́зъ пра́говъ свои́хъ: и да́ша стѣ́ну мою́ я́ко держа́щуюся мене́ и о́нѣхъ, и оскверни́ша и́мя моє́ свято́є въ беззако́ніихъ свои́хъ, я́же творя́ху: и сконча́хъ я́ въ я́рости моє́й и во избіє́ніи:
|
|
|
9
|
|
|
и ны́нѣ да отри́нутъ блуже́ніє своє́ и убі́йства старѣ́йшинъ свои́хъ от мене́, и вселю́ся средѣ́ и́хъ во вѣ́къ.
|
|
|
10
|
|
|
Ты́ же, сы́не человѣ́чь, покажи́ до́му Ізра́илеву хра́мъ, и да преста́нутъ от грѣхо́въ свои́хъ: и видѣ́ніє єго́, и чиноположе́ніє єго́,
|
|
|
11
|
|
|
и ті́и пріиму́тъ ка́знь свою́ о всѣ́хъ, я́же сотвори́ша: и распи́шеши хра́мъ и угото́ваніє єго́, и исхо́ды єго́ и вхо́ды єго́, и бытіє́ єго́ и вся́ повелѣ́нія єго́ и вся́ зако́ны єго́ возвѣсти́ши и́мъ и да впи́шеши предъ ни́ми, и снабдя́тъ вся́ оправда́нія моя́ и вся́ повелѣ́нія моя́ и сотворя́тъ я́.
|
|
|
12
|
|
|
И расписа́ніє хра́ма на верху́ горы́: вси́ предѣ́лы єго́ о́крестъ свята́я святы́хъ су́ть.
|
|
|
13
|
|
|
Се́й зако́нъ хра́ма, и сія́ мѣ́ра тре́бника, въ ла́коть ла́ктя и дла́ни, нѣ́дро глубины́ ла́коть на ла́коть и ла́коть въ широту́, и огражде́ніє у́стія єму́ о́крестъ, пя́ди.
|
|
|
14
|
|
|
И сія́ высота́ тре́бника, и от глубины́ нача́ла вдоле́нія єго́ ко очисти́лищу вели́кому, є́же внизу́, дву́хъ лакте́й, широта́ же ла́коть: а от очисти́лища ма́лаго ко очисти́лищу вели́кому ла́кти четы́ри, и широта́ ла́коть.
|
|
|
15
|
|
|
И Аріи́лъ четы́рехъ лакте́й, а от Аріи́ла и вы́ше рого́въ ла́коть:
|
|
|
16
|
|
|
Аріи́лъ же двана́десять лакте́й въ долготу́ и двана́десять лакте́й въ широту́, четвероуго́ленъ на четы́ри ча́сти своя́.
|
|
|
17
|
|
|
И очисти́лище четырена́десять лакте́й въ долготу́ и четырена́десять лакте́й въ широту́, четвероуго́лно на четы́ри ча́сти своя́: и огражде́ніє єму́ о́крестъ окружа́ющеє єго́ по́лъ ла́ктя, и обдержа́ніє єго́ ла́коть о́крестъ, и степе́ни єго́ зря́щыя на восто́къ.
|
|
|
18
|
|
|
И рече́ ко мнѣ́: сы́не человѣ́чь, сія́ глаго́летъ Госпо́дь Бо́гъ Ізра́илевъ: сія́ за́повѣди тре́бника въ де́нь сотворе́нія єго́, є́же возноси́ти на не́мъ всесожже́нія и возлива́ти на́нь кро́вь.
|
|
|
19
|
|
|
И да́си жерце́мъ и леві́томъ, и́же су́ть от сѣ́мене саду́кова, приступа́ющымъ ко мнѣ́, глаго́летъ Госпо́дь Бо́гъ, є́же служи́ти мнѣ́, телца́ от говя́дъ за грѣ́хъ:
|
|
|
20
|
|
|
и да во́змутъ от кро́ве єго́ и да возложа́тъ на четы́ри ро́ги тре́бника и на четы́ри ча́сти очисти́лища и на основа́ніє о́крестъ, и окропи́ши є́, и очи́стятъ є́:
|
|
|
21
|
|
|
и да во́змутъ телца́, и́же за грѣ́хъ, и да сожже́тся во отлуче́ннѣмъ хра́мѣ внѣ́ святы́хъ.
|
|
|
22
|
|
|
А во вторы́й де́нь да во́змутъ два́ ко́злища от ко́зъ непоро́чныхъ за грѣ́хъ и да очи́стятъ тре́бникъ, я́коже очи́стиша телце́мъ.
|
|
|
23
|
|
|
И єгда́ сконча́ютъ очище́ніє, да принесу́тъ телца́ от говя́дъ непоро́чна и овна́ от ове́цъ непоро́чна,
|
|
|
24
|
|
|
и да принесете́ предъ Го́спода: и да возве́ргутъ на ня́ жерцы́ со́ль и да вознесу́тъ я́ Го́сподеви всесожже́нія.
|
|
|
25
|
|
|
Се́дмь дні́й да сотвори́ши ко́злище за грѣ́хъ по вся́ дни́, и телца́ от говя́дъ и овна́ от ове́цъ непоро́чна, да сотворя́тъ се́дмь дні́й:
|
|
|
26
|
|
|
и да очи́стятъ тре́бникъ и освятя́тъ єго́, и напо́лнятъ ру́ки своя́.
|
|
|
27
|
|
|
И сконча́ютъ се́дмь дні́й, и бу́детъ от осма́го дне́ и пото́мъ, сотворя́тъ жерцы́ на же́ртвенницѣ всесожже́нія ва́ша и я́же спасе́нія ва́шего: и пріиму́ вы, глаго́летъ Госпо́дь.
|
|
|
Глава 44
|
|
|
1
|
|
|
И обрати́ мя на пу́ть вра́тъ святы́хъ внѣ́шнихъ, зря́щихъ на восто́ки: и сія́ бя́ху затворе́нна.
|
|
|
2
|
|
|
И рече́ Госпо́дь ко мнѣ́: сія́ врата́ заключе́нна бу́дутъ и не отве́рзутся, и никто́же про́йдетъ и́ми: я́ко Госпо́дь Бо́гъ Ізра́илевъ вни́детъ и́ми, и бу́дутъ заключе́нна.
|
|
|
3
|
|
|
Зане́ старѣ́йшина се́й ся́детъ въ ни́хъ я́сти хлѣ́бъ предъ Го́сподемъ: по пути́ Єла́ма {притво́ра} вра́тъ вни́детъ и по пути́ єго́ изы́детъ.
|
|
|
4
|
|
|
И введе́ мя по пути́ вра́тъ я́же къ сѣ́веру, пря́мо хра́му: и ви́дѣхъ, и се́, по́лнъ сла́вы до́мъ Госпо́день. И падо́хъ ни́цъ на лицы́ моє́мъ.
|
|
|
5
|
|
|
И рече́ Госпо́дь ко мнѣ́: сы́не человѣ́чь, сложи́ въ се́рдцы твоє́мъ, и ви́ждь очи́ма твои́ма и уши́ма твои́ма слы́ши вся́, єли́ка а́зъ глаго́лю съ тобо́ю, по всѣ́мъ повелѣ́ніємъ хра́ма Госпо́дня и по всѣ́мъ узаконе́ніємъ єго́: и устро́иши се́рдце твоє́ на вхо́дъ хра́ма по всѣ́мъ исхо́дамъ єго́ во всѣ́хъ святы́хъ.
|
|
|
6
|
|
|
И рече́ши къ до́му прогнѣвля́ющему мя́, къ до́му Ізра́илеву: сія́ глаго́летъ Госпо́дь Бо́гъ: да довлѣ́єтъ ва́мъ от всѣ́хъ беззако́ній ва́шихъ, до́ме Ізра́илевъ,
|
|
|
7
|
|
|
є́же вводи́ти ва́мъ сы́ны иноплеме́нничы необрѣ́заны се́рдцемъ и необрѣ́заны пло́тію, є́же быва́ти и́мъ во святы́хъ мои́хъ, и оскверня́ху я́, єгда́ прино́сите вы́ хлѣ́бы, ту́къ и мяса́ и кро́вь: и преступа́сте завѣ́тъ мо́й во всѣ́хъ беззако́ніихъ ва́шихъ,
|
|
|
8
|
|
|
и не снабдѣ́сте храни́ти стражбы́ во святы́хъ мои́хъ, и поста́висте страже́й стрещи́ стражбы́ святы́хъ мои́хъ себѣ́.
|
|
|
9
|
|
|
Того́ ра́ди си́це глаго́летъ Адонаі́ Госпо́дь: вся́къ сы́нъ иноплеме́нничь необрѣ́занъ се́рдцемъ и необрѣ́занъ пло́тію да не вни́детъ во свята́я моя́ во всѣ́хъ сынѣ́хъ иноплеме́нничихъ, и́же су́ть средѣ́ до́му Ізра́илева:
|
|
|
10
|
|
|
но и леві́ти, и́же отверго́шася мене́, єгда́ заблужда́ше Ізра́иль, и́же заблуди́ша от мене́ вслѣ́дъ по́мысловъ свои́хъ, и во́змутъ непра́вду свою́
|
|
|
11
|
|
|
и бу́дутъ служа́ще во святы́хъ мои́хъ, вратари́ у две́рій хра́ма и служа́щіи хра́му: ті́и да закала́ютъ же́ртвы и всесожже́нія лю́демъ и ті́и да ста́нутъ предъ людьми́, є́же служи́ти и́мъ.
|
|
|
12
|
|
|
Поне́же служи́ша и́мъ предъ лице́мъ кумі́ровъ свои́хъ, и бы́сть до́му Ізра́илеву въ муче́ніє непра́вды: того́ ра́ди воздвиго́хъ на ня́ ру́ку мою́, глаго́летъ Госпо́дь Бо́гъ [Ізра́илевъ], и во́змутъ беззако́ніє своє́,
|
|
|
13
|
|
|
и не присту́пятъ ко мнѣ́ служи́ти мнѣ́, ни приноси́ти ко святы́мъ сыно́въ Ізра́илевыхъ, ниже́ ко святы́мъ святы́нь мои́хъ, и во́змутъ безче́стіє своє́ въ заблужде́ніи, въ не́мже прельсти́шася:
|
|
|
14
|
|
|
и учиня́тъ я́ стрещи́ стражбы́ хра́ма на вся́ дѣла́ єго́
|
|
|
15
|
|
|
и на вся́, єли́ка сотворя́тъ жерцы́ и леві́ти, сы́нове саду́ковы, и́же сохрани́ша стражбы́ святы́нь мои́хъ [и пути́ моя́], єгда́ заблужда́ше до́мъ Ізра́илевъ от мене́: сі́и присту́пятъ ко мнѣ́, є́же служи́ти мнѣ́, и ста́нутъ предъ лице́мъ мои́мъ, є́же приноси́ти мнѣ́ же́ртву, ту́къ и кро́вь, глаго́летъ Адонаі́ Госпо́дь.
|
|
|
16
|
|
|
Сі́и вни́дутъ во свята́я моя́ и сі́и присту́пятъ ко трапе́зѣ моє́й, є́же служи́ти мнѣ́, и сохраня́тъ стражбы́ моя́.
|
|
|
17
|
|
|
И бу́детъ внегда́ входи́ти и́мъ во врата́ двора́ вну́тренняго, въ ри́зы льня́ны да облеку́тся, а да не облеку́тся въ волня́ны, внегда́ служи́ти и́мъ от вра́тъ двора́ вну́тренняго.
|
|
|
18
|
|
|
И клобуки́ {Гре́ч.: кіда́ры.} льня́ны да и́мутъ на глава́хъ свои́хъ, и опоя́санія льня́на да и́мутъ о чре́слѣхъ свои́хъ, и да не препоясу́ются крѣ́пко:
|
|
|
19
|
|
|
и єгда́ исхо́дятъ къ лю́демъ во внѣ́шній дво́ръ, да совлеку́тся ри́зъ свои́хъ, въ ни́хже ті́и слу́жатъ, и да положа́тъ я́ въ прегра́дахъ святы́хъ, и облеку́тся въ ри́зы и́ны, и да не освятя́тъ люді́й въ ри́захъ свои́хъ:
|
|
|
20
|
|
|
и гла́въ свои́хъ да не обрі́ютъ, и вла́съ свои́хъ да не растя́тъ, покрыва́юще покры́ютъ главы́ своя́.
|
|
|
21
|
|
|
И віна́ да не піє́тъ вся́къ жре́цъ, єгда́ вхо́дитъ во вну́тренній дво́ръ.
|
|
|
22
|
|
|
И вдови́цы и пущени́цы да не поє́млютъ себѣ́ въ жену́, но то́кмо дѣви́цу от пле́мене до́му Ізра́илева: и а́ще бу́детъ вдова́ же́рча, да о́ную по́ймутъ.
|
|
|
23
|
|
|
И лю́ди моя́ да науча́тъ разлуча́ти между́ святы́мъ и скверна́вымъ, и между́ чи́стымъ и нечи́стымъ возвѣстя́тъ и́мъ.
|
|
|
24
|
|
|
И на судѣ́ кро́ве ті́и да стоя́тъ, є́же разсужда́ти: оправда́нія моя́ да оправдя́тъ и суды́ моя́ да су́дятъ, и зако́ны моя́ и повелѣ́нія моя́ во всѣ́хъ пра́здницѣхъ мои́хъ сохраня́тъ, и суббо́ты моя́ освятя́тъ.
|
|
|
25
|
|
|
И надъ ду́шу человѣ́ка не пріи́дутъ оскверни́тися {къ ме́ртвому да не прико́снутся}, но то́чію надъ отце́мъ и ма́терію, и сы́номъ и дще́рію, и бра́томъ и сестро́ю своє́ю, я́же не посягла́ за му́жа, оскверни́тся.
|
|
|
26
|
|
|
И по очище́ніи своє́мъ се́дмь дні́й да сочте́тъ себѣ́.
|
|
|
27
|
|
|
И во о́ньже де́нь вхо́дятъ во дво́ръ вну́тренній, є́же служи́ти во святи́лищи, да принесу́тъ очище́ніє, глаго́летъ Госпо́дь Бо́гъ.
|
|
|
28
|
|
|
И бу́детъ и́мъ въ наслѣ́діє: а́зъ и́мъ наслѣ́діє, и одержа́ніє и́мъ не да́стся въ сынѣ́хъ Ізра́илевыхъ, я́ко а́зъ одержа́ніє и́хъ.
|
|
|
29
|
|
|
Же́ртвы же и я́же за грѣхи́ и за невѣ́дѣніє сі́и да ядя́тъ: и вся́коє отлуче́нноє во Ізра́или тѣ́мъ да бу́детъ:
|
|
|
30
|
|
|
нача́тки всѣ́хъ и пе́рвенцы всѣ́хъ и уча́стія вся́, от всѣ́хъ нача́тковъ ва́шихъ жерце́мъ да бу́дутъ: и нача́тки жи́тъ ва́шихъ да да́сте жерцу́, є́же положи́ти благослове́нія въ домѣ́хъ ва́шихъ.
|
|
|
31
|
|
|
И вся́кія мертвечи́ны и звѣроя́дины, от пти́цъ и от ско́тъ да не ядя́тъ жерцы́.
|
|
|
Глава 45
|
|
|
1
|
|
|
И єгда́ раздѣля́ти ва́мъ зе́млю въ наслѣ́діє, отлучи́те нача́токъ Го́сподеви, свято от земли́, въ долготу́ дву́десяти и пяти́ ты́сящъ, а въ широту́ десяти́ ты́сящъ, свято да бу́детъ во всѣ́хъ предѣ́лѣхъ и́хъ о́крестъ.
|
|
|
2
|
|
|
И да бу́дутъ от того́ на свято́є пя́ть со́тъ, по пяти́ со́тъ четвероуго́лно о́крестъ, разстоя́ніє же и́хъ пятьдеся́тъ лакте́й о́крестъ.
|
|
|
3
|
|
|
И от сего́ размѣре́нія да размѣ́риши въ долготу́ два́десять пя́ть ты́сящъ, а въ широту́ де́сять ты́сящъ: и въ то́мъ да бу́детъ освяще́ніє, свята́я святы́хъ.
|
|
|
4
|
|
|
Свято от земли́ да бу́детъ жерце́мъ служа́щымъ во святѣ́мъ и да бу́детъ приступа́ющымъ служи́ти Го́сподеви, и бу́детъ и́мъ мѣ́сто на до́мы отлуче́нны освяще́нію и́хъ,
|
|
|
5
|
|
|
два́десять пя́ть ты́сящъ въ долготу́ и два́десять {Євр.: де́сять.} ты́сящъ въ широту́ да бу́детъ, леві́томъ служа́щымъ хра́му, тѣ́мъ во одержа́ніє гра́ды ко обита́нію.
|
|
|
6
|
|
|
И одержа́ніє гра́да да да́си въ широту́ пя́ть ты́сящъ, а въ долготу́ два́десять пя́ть ты́сящъ, я́коже нача́токъ святы́хъ всему́ до́му Ізра́илеву да бу́детъ
|
|
|
7
|
|
|
и старѣ́йшинѣ от того́: и от сего́ въ нача́тки святы́хъ, во одержа́ніє гра́да по лицу́ нача́тковъ святы́нь и по лицу́ одержа́нія гра́да, я́же къ мо́рю, и от су́щихъ къ мо́рю, я́же на восто́къ: долгота́ же я́ко єди́на ча́сть от предѣ́лъ и́же къ мо́рю, и долгота́ ко предѣ́ломъ и́же на восто́къ земли́.
|
|
|
8
|
|
|
И бу́детъ єму́ во одержа́ніє во Ізра́или, и да не наси́луютъ ктому́ старѣ́йшины Ізра́илевы лю́демъ мои́мъ, и зе́млю да наслѣ́дятъ до́мъ Ізра́илевъ по племено́мъ свои́мъ.
|
|
|
9
|
|
|
Сія́ глаго́летъ Госпо́дь Бо́гъ: да довлѣ́ютъ ва́мъ, старѣ́йшины Ізра́илевы, непра́вду и озлобле́ніє отве́ржите, су́дъ же и пра́вду сотвори́те: изыми́те наси́ліє от люді́й мои́хъ, глаго́летъ Госпо́дь Бо́гъ.
|
|
|
10
|
|
|
Вѣ́съ пра́ведный и мѣ́ра пра́ведна и хі́ніксъ пра́веденъ да бу́дутъ ва́мъ въ мѣ́ры:
|
|
|
11
|
|
|
и хі́ніксъ та́кожде єди́нъ да бу́детъ ва́мъ, є́же пріима́ти, деся́тая ча́сть гомо́ра хі́ніксъ, и деся́тая ча́сть гомо́ра є́фі, мѣ́ра къ гомо́ру да бу́детъ ра́вна.
|
|
|
12
|
|
|
И вѣ́съ, два́десять о́воли сі́кль, и два́десять пя́ть сі́клей, и два́десять сі́клей, и пятьна́десять сі́клей мна́съ бу́детъ ва́мъ.
|
|
|
13
|
|
|
И се́й нача́токъ, єго́же отлучите́, шесту́ю ча́сть мѣ́ры от гомо́ра пшени́цы и шесту́ю ча́сть є́фі от ко́ра ячме́ня.
|
|
|
14
|
|
|
За́повѣдь же о єле́и, мѣ́ру єле́а от десяти́ мѣ́ръ, поне́же де́сять мѣ́ръ су́ть гомо́ръ.
|
|
|
15
|
|
|
И овча́ єди́но от десяти́ ове́цъ уча́стіє от всѣ́хъ оте́чествъ Ізра́илевыхъ, на же́ртвы и на всесожже́нія и на спасе́ніє, є́же умоли́ти о ва́съ, глаго́летъ Госпо́дь Бо́гъ.
|
|
|
16
|
|
|
Вси́ же лю́діє земли́ да дадя́тъ се́й нача́токъ старѣ́йшинѣ Ізра́илеву,
|
|
|
17
|
|
|
и старѣ́йшиною да быва́ютъ всесожже́нія: и же́ртвы и возлія́нія бу́дутъ въ пра́здники и въ новоме́сячія, и въ суббо́ты и во вся́ пра́здники до́му Ізра́илева: то́й сотвори́тъ я́же за грѣхи́ и же́ртву, и всесожже́нія и я́же спасе́нія, є́же умоля́ти о до́мѣ Ізра́илевѣ.
|
|
|
18
|
|
|
Та́ко глаго́летъ Госпо́дь Бо́гъ: въ пе́рвый ме́сяцъ, во єди́нъ де́нь ме́сяца, да во́змете телца́ от говя́дъ непоро́чна, є́же очи́стити свято́є:
|
|
|
19
|
|
|
и да во́зметъ жре́цъ от кро́ве очище́нія и да возліє́тъ на пра́ги хра́ма и на четы́ри у́глы святи́лища, и на же́ртвенникъ и на пра́ги вра́тъ двора́ вну́тренняго.
|
|
|
20
|
|
|
И си́це да сотвори́ши въ седмы́й ме́сяцъ: во єди́нъ [де́нь] ме́сяца во́змеши от коєго́ждо невѣ́дущаго и от младе́нца, и очи́стите хра́мъ.
|
|
|
21
|
|
|
Въ пе́рвый ме́сяцъ, четвертагона́десять дне́ ме́сяца, да бу́детъ ва́мъ па́сха пра́здникъ: се́дмь дні́й да я́сте опрѣсно́ки.
|
|
|
22
|
|
|
И сотвори́тъ старѣ́йшина въ то́й де́нь за ся́ и за до́мъ и за вся́ лю́ди земли́, телца́ за грѣ́хъ:
|
|
|
23
|
|
|
въ се́дмь же дні́й пра́здника да сотвори́тъ всесожже́нія Го́сподеви се́дмь телце́въ и се́дмь овно́въ непоро́чныхъ по вся́къ де́нь седми́ дні́й: и за грѣ́хъ ко́злище от ко́зъ на вся́къ де́нь, и же́ртву,
|
|
|
24
|
|
|
и опрѣсно́ки телцу́ и опрѣсно́ки овну́ да сотвори́ши, и єле́а і́нъ опрѣсно́ку.
|
|
|
25
|
|
|
Въ седмы́й же ме́сяцъ, въ пятыйна́десять де́нь ме́сяца, въ пра́здницѣ сотвори́ши по тому́жде, се́дмь дні́й, я́коже и за грѣ́хъ, и я́коже всесожже́нія, и я́коже да́ръ, и я́коже ма́сло древя́ноє.
|
|
|
Глава 46
|
|
|
1
|
|
|
Сія́ глаго́летъ Госпо́дь Бо́гъ: врата́, я́же во дворѣ́ вну́треннемъ зря́щая на восто́къ, да бу́дутъ затворе́на на ше́сть дні́й дѣ́лныхъ: въ де́нь же суббо́тный да отверза́ются, и въ де́нь новоме́сячія да отве́рзутся.
|
|
|
2
|
|
|
И вни́детъ старѣ́йшина по пути́ Єла́ма {притво́ра} вра́тъ внѣ́шнихъ и да ста́нетъ у преддве́рія вра́тъ, и да сотворя́тъ жерцы́ всесожже́нія єго́ и я́же спасе́нія єго́:
|
|
|
3
|
|
|
и да покло́нится у преддве́рія вра́тъ и изы́детъ, врата́ же да не заключа́тся до ве́чера, и да покланя́ются лю́діє земли́ у преддве́рія вра́тъ тѣ́хъ въ суббо́ты и въ новоме́сячія предъ Го́сподемъ.
|
|
|
4
|
|
|
И всесожже́нія да принесе́тъ старѣ́йшина въ де́нь суббо́тный Го́сподеви, ше́сть а́гнцевъ непоро́чныхъ и овна́ непоро́чна,
|
|
|
5
|
|
|
и манау́ {да́ръ}, опрѣсно́къ овну́, и а́гнцемъ же́ртву, да́ръ руки́ своєя́, и єле́а і́нъ опрѣсно́ку.
|
|
|
6
|
|
|
И въ де́нь новоме́сячія теле́цъ от ста́да непоро́ченъ и ше́сть а́гнцевъ и ове́нъ непоро́ченъ да бу́детъ,
|
|
|
7
|
|
|
и опрѣсно́къ телцу́ и опрѣсно́къ овну́ да бу́детъ Манаа́, и а́гнцемъ, я́коже пости́гнетъ рука́ єго́, и ма́сла і́нъ опрѣсно́ку.
|
|
|
8
|
|
|
И єгда́ вхо́дитъ старѣ́йшина, по пути́ Єла́ма вра́тъ да вни́детъ и по пути́ вра́тъ да изы́детъ.
|
|
|
9
|
|
|
И єгда́ вхо́дятъ лю́діє земли́ предъ Го́спода въ пра́здники, входя́щіи по пути́ вра́тъ зря́щихъ на сѣ́веръ поклони́тися, да исхо́дятъ по пути́ вра́тъ я́же на ю́гъ: и и́же вхо́дятъ по пути́ вра́тъ я́же на ю́гъ, да исхо́дятъ по пути́ вра́тъ я́же на сѣ́веръ, да не возвраща́ются во врата́, и́миже внидо́ша, но пря́мо и́мъ да изы́дутъ.
|
|
|
10
|
|
|
И старѣ́йшина посредѣ́ и́хъ, єгда́ ті́и вхо́дятъ, да вни́детъ съ ни́ми, и єгда́ исхо́дятъ, да изы́детъ.
|
|
|
11
|
|
|
И въ пра́здники и въ торжества́ да бу́детъ Манаа́ опрѣсно́къ телцу́ и опрѣсно́къ овну́, и а́гнцемъ, я́коже пости́гнетъ рука́ єго́, и єле́а і́нъ опрѣсно́ку.
|
|
|
12
|
|
|
А́ще же сотвори́тъ старѣ́йшина исповѣ́даніє, всесожже́ніє спасе́нія Го́сподеви, и отвори́тъ себѣ́ врата́ зря́щая на восто́къ и сотвори́тъ всесожже́ніє своє́ и я́же спасе́нія своєго́, я́коже є́сть обы́чай твори́ти въ де́нь суббо́тный: и да изы́детъ и затвори́тъ две́ри по исхожде́ніи своє́мъ:
|
|
|
13
|
|
|
а́гнца же єдинолѣ́тнаго непоро́чна да сотвори́тъ во всесожже́ніє на вся́къ де́нь Го́сподеви, зау́тра да сотвори́тъ єго́.
|
|
|
14
|
|
|
И манаа́ {приноше́ніє} да сотвори́тъ надъ ни́мъ зау́тра зау́тра, шесту́ю ча́сть мѣ́ры, и єле́а тре́тію ча́сть і́на, є́же смѣси́ти семіда́лъ манаа́ Го́сподеви, за́повѣдь вѣ́чная при́сно.
|
|
|
15
|
|
|
Да сотворите́ а́гнца, и Манаа́, и ма́сло древя́но да сотворите́ зау́тра всесожже́ніє при́сно.
|
|
|
16
|
|
|
Сія́ глаго́летъ Госпо́дь Бо́гъ: а́ще да́стъ старѣ́йшина дая́ніє єди́ному от сыно́въ свои́хъ от наслѣ́дія своєго́, сіє́ сыно́мъ єго́ да бу́детъ: одержа́ніє и́хъ сіє́ въ наслѣ́діє.
|
|
|
17
|
|
|
А́ще же да́стъ дая́ніє єди́ному от ра́бъ свои́хъ, да бу́детъ єму́ до лѣ́та отпуще́нія, и да возда́стъ старѣ́йшинѣ: оба́че наслѣ́діє сыно́въ єго́ и́мъ да бу́детъ.
|
|
|
18
|
|
|
И да не взе́млетъ старѣ́йшина от наслѣ́дія люді́й є́же наси́лити и́мъ, от одержа́нія своєго́ да́стъ наслѣ́діє сыно́мъ свои́мъ: я́ко да не расточа́тся лю́діє мои́ кі́йждо от одержа́нія своєго́.
|
|
|
19
|
|
|
И введе́ мя во вхо́дъ вра́тъ, я́же къ ю́гу, въ прегра́ду святы́хъ жерце́въ, зря́щую на сѣ́веръ: и се́, та́мо мѣ́сто отлуче́но.
|
|
|
20
|
|
|
И рече́ ко мнѣ́: сіє́ мѣ́сто є́сть, идѣ́же варя́тъ жерцы́, я́же за невѣ́дѣніє и я́же за грѣхи́, и та́мо да пеку́тъ Манау́ весьма́, є́же не износи́ти во дво́ръ внѣ́шній освяща́ти лю́ди.
|
|
|
21
|
|
|
И изведе́ мя во дво́ръ внѣ́шній и обведе́ мя на четы́ри ча́сти двора́: и се́, дво́ръ по у́гламъ двора́.
|
|
|
22
|
|
|
По у́глу дво́ръ, на четы́рехъ у́глѣхъ двора́, дво́ръ ма́лый въ долготу́ лакте́й четы́редесять, а въ широту́ лакте́й три́десять, мѣ́ра єди́на четы́ремъ.
|
|
|
23
|
|
|
И прегра́ды о́крестъ въ ни́хъ, о́крестъ четы́ремъ: и пова́рни устро́єныя подъ прегра́дами о́крестъ.
|
|
|
24
|
|
|
И рече́ ко мнѣ́: сі́и до́мове поваро́въ, идѣ́же варя́тъ служа́щіи хра́му заколе́нія людска́я.
|
|
|
Глава 47
|
|
|
1
|
|
|
И введе́ мя ко преддве́рію хра́ма, и се́, вода́ исхожда́ше изъ подъ непокрове́ннаго хра́ма на восто́къ, я́ко лице́ хра́ма зря́ше на восто́къ, и исхожда́ше вода́ от страны́ десны́я, от ю́га къ же́ртвеннику.
|
|
|
2
|
|
|
И изведе́ мя по пути́ вра́тъ я́же на сѣ́веръ и обведе́ мя путе́мъ вра́тнымъ внѣу́ду ко врато́мъ двора́, зря́щаго на восто́къ, и се́, вода́ исхожда́ше от страны́ десны́я,
|
|
|
3
|
|
|
я́коже исхо́дъ му́жа проти́ву: и мѣ́ра въ руцѣ́ єго́: и измѣ́ри ты́сящу мѣ́рою, и пре́йде водо́ю во́ду оставле́нія {Євр.: и преведе́ мя чрезъ во́ду да́же до гле́знъ.}.
|
|
|
4
|
|
|
И [па́ки] измѣ́ри ты́сящу, и преведе́ мя чрезъ во́ду, и взы́де вода́ до колѣ́нъ: и размѣ́ри ты́сящу, и взы́де вода́ да́же до чре́слъ.
|
|
|
5
|
|
|
И размѣ́ри ты́сящу, пото́къ, и не возмо́же прейти́ {Євр.: и не мого́хъ прейти́.}, я́ко кипя́ше вода́, а́ки шу́мъ пото́чный, єго́же не пре́йдутъ.
|
|
|
6
|
|
|
И рече́ ко мнѣ́: ви́дѣлъ ли єси́, сы́не человѣ́чь? И веде́ мя и обрати́ мя на бре́гъ рѣ́чный, во обраще́ніи моє́мъ:
|
|
|
7
|
|
|
и се́, на бре́зѣ рѣ́чнѣмъ древеса́ мно́га зѣло́ сю́ду и сю́ду.
|
|
|
8
|
|
|
И рече́ ко мнѣ́: вода́ сія́ теку́щая въ Галіле́ю, я́же на восто́къ, и низхожда́ше ко Араві́и, и грядя́ше до мо́ря къ водѣ́ исхо́да, и исцѣли́тъ во́ды:
|
|
|
9
|
|
|
и бу́детъ вся́ка душа́ живо́тныхъ врѣ́ющихъ, на вся́, на ня́же на́йдетъ та́мо рѣка́, жи́ва бу́дутъ: и бу́дутъ та́мо ры́бы мно́ги зѣло́, я́ко пріи́детъ та́мо вода́ сія́ и исцѣли́тъ, и жи́во бу́детъ вся́коє, на не́же а́ще пріи́детъ рѣка́, та́мо жи́во бу́детъ.
|
|
|
10
|
|
|
И ста́нутъ та́мо ры́баріє от інгадда́ до ингалі́ма: суши́ло мре́жамъ бу́детъ, о себѣ́ бу́детъ: и ры́бы єя́ я́ко ры́бы мо́ря вели́каго, мно́жество мно́го зѣло́.
|
|
|
11
|
|
|
И во исхо́дѣ єя́ и во обраще́ніи єя́ и въ возвыше́ніи єя́ мѣлины́ єя́ не исцѣля́тся, въ со́ль вдаду́тся:
|
|
|
12
|
|
|
и надъ рѣку́ взы́детъ, и на бре́зѣ єя́ о́ба по́лы, вся́коє дре́во ядо́моє не обетша́єтъ у нея́, ни оскудѣ́єтъ пло́дъ єго́, но́вости своєя́ пе́рвый пло́дъ принесе́тъ, и́бо во́ды и́хъ сія́ от святы́хъ исхо́дятъ, и бу́детъ пло́дъ и́хъ въ снѣ́дь и прозябе́ніє и́хъ во здра́віє.
|
|
|
13
|
|
|
Си́це глаго́летъ Госпо́дь Бо́гъ: сія́ предѣ́лы наслѣ́дите земли́, двуна́десяти племено́мъ сыно́въ Ізра́илевыхъ приложе́ніє у́жа.
|
|
|
14
|
|
|
И наслѣ́дите ю́ кі́йждо, я́коже бра́тъ єго́, на ню́же воздвиго́хъ ру́ку мою́, є́же да́ти ю́ отце́мъ и́хъ, и паде́тъ земля́ сія́ ва́мъ въ наслѣ́діє.
|
|
|
15
|
|
|
И сі́и предѣ́лы земли́ на сѣ́веръ, от мо́ря вели́каго сходя́щаго и отдѣля́ющаго вхо́дъ имаселда́мъ,
|
|
|
16
|
|
|
маавѳира́съ, єврамиліа́мъ средѣ́ предѣ́лъ Дама́сковыхъ и средѣ́ предѣ́лъ има́ѳовыхъ, дворы́ Савна́ни, и́же су́ть вы́ше предѣ́лъ авраніті́дскихъ.
|
|
|
17
|
|
|
Сі́и предѣ́лы от мо́ря: от двора́ Єна́нова, предѣ́лы Дама́сковы, и я́же къ сѣ́веру, и предѣ́лъ Єма́ѳовъ, и предѣ́лъ сѣ́верскъ.
|
|
|
18
|
|
|
И я́же на восто́ки: между́ авраніті́дою и между́ Дама́скомъ, и между́ Галааді́тідою и между́ земле́ю Ізра́илевою, Іорда́нъ дѣли́тъ къ мо́рю, є́же на восто́ки фі́ніковъ: сія́ на восто́ки.
|
|
|
19
|
|
|
И я́же къ ю́гу и Лі́ву: от Ѳема́на и фі́ніковъ да́же до воды́ Марімо́ѳъ-кади́мъ, продолжа́ющеєся къ мо́рю вели́кому.
|
|
|
20
|
|
|
Сія́ страна́ ю́га и Лі́ва, сія́ страна́ мо́ря вели́каго раздѣля́єтъ да́же пря́мо вхо́ду има́ѳъ, да́же до вхо́да єго́: сія́ су́ть я́же къ мо́рю има́ѳъ.
|
|
|
21
|
|
|
И раздѣли́те зе́млю ва́мъ, племено́мъ Ізра́илевымъ.
|
|
|
22
|
|
|
Расположи́те ю́ жре́біємъ ва́мъ и прише́лцемъ обита́ющымъ средѣ́ ва́съ, и́же роди́ша сы́ны посредѣ́ ва́съ, и бу́дутъ ва́мъ я́ко тузе́мцы въ сынѣ́хъ Ізра́илевыхъ: съ ва́ми да ядя́тъ во уча́стіи средѣ́ племе́нъ Ізра́илевыхъ,
|
|
|
23
|
|
|
и бу́дутъ въ пле́мени прише́лцевъ, въ прише́лцѣхъ и́же съ ни́ми: та́мо дади́те уча́стіє и́мъ, глаго́летъ Госпо́дь Бо́гъ.
|
|
|
Глава 48
|
|
|
1
|
|
|
Сія́ же имена́ племе́нъ от нача́ла є́же къ сѣ́веру, по странѣ́ схожде́нія раздѣля́ющаго ко вхо́ду има́ѳову двора́ Єна́ня, предѣ́лъ Дама́сковъ къ сѣ́веру по странѣ́ има́ѳова двора́: и бу́дутъ и́мъ я́же на восто́ки, да́же до мо́ря, да́ново єди́но.
|
|
|
2
|
|
|
И от предѣ́лъ да́новыхъ къ восто́комъ да́же до мо́ря, Аси́рово єди́но.
|
|
|
3
|
|
|
И от предѣ́лъ Аси́ровыхъ, от су́щихъ къ восто́комъ, да́же до моря́, Нефѳалі́мле єди́но.
|
|
|
4
|
|
|
От предѣ́лъ же Нефѳалі́млихъ от страны́ восто́чныя да́же до страны́ мо́ря, Манассі́ино єди́но.
|
|
|
5
|
|
|
От предѣ́лъ же Манассі́иныхъ, су́щихъ на восто́ки, да́же до су́щихъ къ мо́рю, Єфре́мле єди́но.
|
|
|
6
|
|
|
От предѣ́лъ же Єфре́млихъ, и́же на восто́къ, да́же до моря́, Руви́мле єди́но.
|
|
|
7
|
|
|
От предѣ́лъ же Руви́млихъ, и́же на восто́ки, да́же до мо́ря, Іу́дино єди́но.
|
|
|
8
|
|
|
А от предѣ́лъ Іу́диныхъ, и́же къ восто́комъ, да́же до мо́ря, бу́детъ нача́токъ удѣле́нія два́десяти и пяти́ ты́сящъ широта́, и долгота́ я́коже єди́на от часте́й су́щихъ къ восто́комъ, и да́же до тѣ́хъ я́же къ мо́рю: и бу́детъ свято́є посредѣ́ и́хъ.
|
|
|
9
|
|
|
Нача́токъ, єго́же отдѣля́тъ Го́сподеви, въ долготу́ два́десять и пя́ть ты́сящъ и въ широту́ два́десять и пя́ть ты́сящъ.
|
|
|
10
|
|
|
От си́хъ бу́детъ нача́токъ святы́хъ жерце́мъ, къ сѣ́веру [въ долготу́] два́десять и пя́ть ты́сящъ, и къ мо́рю въ широту́ де́сять ты́сящъ, и къ восто́ку де́сять ты́сящъ, и на ю́гъ въ долготу́ два́десять и пя́ть ты́сящъ: и гора́ святы́хъ бу́детъ посредѣ́ єго́
|
|
|
11
|
|
|
жерце́мъ, освяще́ннымъ сыно́мъ саду́ковымъ, стрегу́щымъ стражбы́ хра́ма, и́же не прельсти́шася во прельще́ніє сыно́въ Ізра́илевыхъ, я́коже прельсти́шася леві́ти.
|
|
|
12
|
|
|
И бу́детъ и́мъ нача́токъ дає́мый от нача́тковъ земли́, свято́є святы́хъ от предѣ́лъ леві́тскихъ.
|
|
|
13
|
|
|
Леві́томъ же бли́жняя предѣ́ловъ жре́ческихъ, два́десяти и пяти́ ты́сящъ въ долготу́, а въ широту́ десяти́ ты́сящъ: вся́ долгота́ два́десяти и пяти́ ты́сящъ, а широта́ десяти́ ты́сящъ.
|
|
|
14
|
|
|
Да не прода́стся от него́, ни замѣни́тся, ниже́ оти́мутся пе́рвая жи́та земли́, я́ко свято є́сть Го́сподеви.
|
|
|
15
|
|
|
Пя́ть же ты́сящъ избыто́чныхъ въ широтѣ́ два́десяти и пяти́ ты́сящей, предгра́діє да бу́детъ гра́ду на вселе́ніє и въ разстоя́ніє єго́: и да бу́детъ гра́дъ средѣ́ єго́.
|
|
|
16
|
|
|
И сія́ мѣ́ры єго́: от сѣ́вера четы́ре ты́сящы и пя́ть со́тъ, и от ю́га четы́ре ты́сящы и пя́ть со́тъ, и от восто́къ четы́ре ты́сящы и пя́ть со́тъ, и от мо́ря четы́ре ты́сящы и пя́ть со́тъ.
|
|
|
17
|
|
|
И да бу́детъ разстоя́ніє гра́ду къ сѣ́веру дву́сту и пяти́десяти, и къ ю́гу дву́сту и пяти́десяти, и на восто́къ дву́сту и пяти́десяти, и къ мо́рю дву́сту и пяти́десяти.
|
|
|
18
|
|
|
Избыто́къ же долготы́ держа́щься нача́тковъ святы́хъ де́сять ты́сящъ къ восто́комъ и де́сять ты́сящъ къ мо́рю: и бу́дутъ нача́тки свята́го, и бу́дутъ жи́та єя́ во хлѣ́бы дѣ́лающымъ гра́дъ.
|
|
|
19
|
|
|
Дѣ́лающіи же гра́дъ да дѣ́лаютъ єго́ от всѣ́хъ племе́нъ Ізра́илевыхъ.
|
|
|
20
|
|
|
Ве́сь нача́токъ два́десяти и пяти́ ты́сящъ на два́десять и пя́ть ты́сящъ: четвероуго́лно отдѣли́те от него́ нача́токъ свята́го, от одержа́нія гра́дскаго,
|
|
|
21
|
|
|
а избы́токъ старѣ́йшинѣ от сего́: и от о́наго, от нача́тковъ свята́го и во уча́стіє гра́да, спреди́ на два́десять и пя́ть ты́сящъ долгота́, до предѣ́лъ, и́же къ мо́рю и къ восто́комъ, спреди́ на два́десять и пя́ть ты́сящъ, до предѣ́лъ, и́же къ мо́рю, бли́зъ часте́й старѣ́йшины: и да бу́детъ нача́токъ святы́хъ и освяще́ніє хра́ма средѣ́ єго́.
|
|
|
22
|
|
|
От уча́стія же леві́тска и от уча́стія гра́да, средѣ́ старѣ́йшинъ, бу́детъ средѣ́ предѣ́лъ Іу́диныхъ и средѣ́ предѣ́лъ Веніамі́нихъ, и старѣ́йшинъ да бу́детъ.
|
|
|
23
|
|
|
А избы́точноє племе́нъ от су́щихъ къ восто́комъ да́же до су́щихъ къ мо́рю, Веніамі́ново єди́но.
|
|
|
24
|
|
|
От предѣ́лъ же Веніамі́нихъ къ восто́комъ да́же до страны́ я́же къ мо́рю, Симео́не єди́но.
|
|
|
25
|
|
|
От предѣ́лъ же Симео́нихъ, от страны́ я́же на восто́къ да́же до страны́ я́же къ мо́рю, Іссаха́рово єди́но.
|
|
|
26
|
|
|
А от предѣ́лъ Іссаха́ровыхъ, от восто́ковъ да́же до мо́ря, Завуло́не єди́но.
|
|
|
27
|
|
|
От предѣ́лъ же Завуло́нихъ, от восто́ка да́же до страны́ мо́ря, га́дово єди́но.
|
|
|
28
|
|
|
От предѣ́лъ же га́довыхъ, от восто́ка да́же до Лі́вы: и бу́дутъ предѣ́лы єго́ от ю́га, и воды́ Варімо́ѳъ-ка́диса, наслѣ́дія да́же до мо́ря вели́каго.
|
|
|
29
|
|
|
Сія́ земля́, ю́же расположи́те жре́біємъ племено́мъ Ізра́илевымъ: и сі́и раздѣ́лы и́хъ, глаго́летъ Госпо́дь Бо́гъ.
|
|
|
30
|
|
|
И сі́и исхо́ды гра́да, и́же къ сѣ́веру, четы́ре ты́сящы и пя́ть со́тъ мѣ́рою:
|
|
|
31
|
|
|
врата́ же гра́да по имено́мъ племе́нъ Ізра́илевыхъ: врата́ тро́я на сѣ́веръ: врата́ Руви́мля єди́на, врата́ же Іу́дина єди́на и врата́ Леві́ина єди́на:
|
|
|
32
|
|
|
и на восто́къ четы́ре ты́сящы и пя́ть со́тъ, и врата́ тро́я: врата́ єди́на Іо́сифова, врата́ же єди́на Веніамі́ня и врата́ Да́нова єди́на:
|
|
|
33
|
|
|
и я́же къ ю́гу четы́ре ты́сящы и пя́ть со́тъ мѣ́рою, и врата́ тро́я: врата́ єди́на Симео́ну, врата́ же єди́на Іссаха́ру и врата́ єди́на Завуло́ну:
|
|
|
34
|
|
|
и я́же къ мо́рю четы́ре ты́сящы и пя́ть со́тъ мѣ́рою: врата́ тро́я: врата́ єди́на га́дова, и врата́ Аси́рова єди́на и врата́ Нефѳалі́мова єди́на.
|
|
|
35
|
|
|
Окру́глость же осмина́десяти ты́сящъ: и́мя же гра́ду, от него́же дне́ бу́детъ, Госпо́дь та́мо бу́детъ и́мя єму́. Коне́цъ кни́зѣ проро́ка Иєзекі́иля: и́мать въ себѣ́ гла́въ 48.
|
