Видѣ́ніє, є́же ви́дѣ Иса́іа сы́нъ Амо́совъ, є́же ви́дѣ на Іуде́ю и на Ієрусали́мъ, въ ца́рство Озі́и и Іоаѳа́ма, и Аха́за и Єзекі́и, и́же ца́рствоваша во Іуде́и.

Слы́ши, небо, и внуши́, земле́, я́ко Госпо́дь возглаго́ла: сы́ны роди́хъ и возвы́сихъ, ті́и же отверго́шася мене́.

Позна́ во́лъ стяжа́вшаго и́, и осе́лъ я́сли господи́на своєго́: Ізра́иль же Мене́ не позна́, и лю́діє Мои́ не разумѣ́ша.

Увы́, язы́къ грѣ́шный, лю́діє испо́лнени грѣхо́въ, сѣ́мя лука́воє, сы́нове беззако́нніи, оста́висте Го́спода и разгнѣ́васте свята́го Ізра́илева, отврати́теся вспя́ть.

Что́ єще́ уязвля́єтеся, прилага́юще беззако́ніє? Вся́кая глава́ въ болѣ́знь, и вся́коє се́рдце въ печа́ль.

От но́гъ да́же до главы́ нѣ́сть въ не́мъ цѣ́лости: ни стру́пъ, ни я́зва, ни ра́на паля́щаяся: нѣ́сть пла́стыря приложи́ти, ниже́ єле́а, ниже́ обяза́нія.

Земля́ ва́ша пуста́, гра́ди ва́ши огне́мъ пожже́ни, страну́ ва́шу предъ ва́ми чужді́и пояда́ютъ, и опустѣ́ низвраще́на от люді́й чужди́хъ.

Оста́вится дще́рь Сіо́ня, я́ко ку́ща въ віногра́дѣ и я́ко ово́щноє храни́лище въ вертогра́дѣ, я́ко гра́дъ вою́ємый.

И а́ще не бы́ Госпо́дь Савао́ѳъ оста́вилъ на́мъ сѣ́мене, я́ко Содо́ма у́бо бы́ли бы́хомъ, и я́ко Гомо́рру уподо́билися бы́хомъ.

Услы́шите сло́во Госпо́дне, кня́зи Содо́мстіи: внемли́те зако́ну Бо́жію, лю́діє Гомо́ррстіи.

Что́ ми мно́жество же́ртвъ ва́шихъ, глаго́летъ Госпо́дь? Испо́лненъ є́смь всесожже́ній о́внихъ и ту́ка а́гнцевъ, и кро́ве юнце́въ и козло́въ не хощу́.

Ниже́ приходи́те яви́тися ми́: кто́ бо изыска́ сія́ изъ ру́къ ва́шихъ? Ходи́ти по двору́ моєму́ не приложите́.

И а́ще принесе́те ми́ семіда́лъ, всу́є: кади́ло ме́рзость ми́ є́сть.

Новоме́сячій ва́шихъ и суббо́тъ и дне́ вели́каго не потерплю́: поста́ и пра́здности, и новоме́сячій ва́шихъ и пра́здниковъ ва́шихъ ненави́дитъ душа́ моя́: бы́сте ми́ въ сы́тость, ктому́ не стерплю́ грѣхо́въ ва́шихъ.

Єгда́ простре́те ру́ки [ва́шя] ко мнѣ́, отвращу́ о́чи мои́ от ва́съ: и а́ще умно́жите моле́ніє, не услы́шу ва́съ: ру́ки бо ва́шя испо́лнены кро́ве.

Измы́йтеся, [и] чи́сти бу́дите, отими́те лука́вства от ду́шъ ва́шихъ предъ очи́ма мои́ма, преста́ните от лука́вствъ ва́шихъ.

Научи́теся добро́ твори́ти, взыщи́те суда́, изба́вите оби́димаго, суди́те си́ру и оправди́те вдови́цу,

и пріиди́те, и истя́жимся, глаго́летъ Госпо́дь. И а́ще бу́дутъ грѣси́ ва́ши я́ко багря́ноє, я́ко снѣ́гъ убѣлю́: а́ще же бу́дутъ я́ко червле́ноє, я́ко во́лну убѣлю́.

И а́ще хо́щете и послу́шаєте мене́, блага́я земли́ снѣ́сте:

а́ще же не хо́щете, ниже́ послу́шаєте мене́, ме́чь вы́ поя́стъ: уста́ бо Госпо́дня глаго́лаша сія́.

Ка́ко бы́сть блудни́ца гра́дъ вѣ́рный Сіо́нъ по́лнъ суда́? въ не́мже пра́вда почива́ше, ны́нѣ же [въ не́мъ] убі́йцы.

Сребро́ ва́ше неискуше́но, корче́мницы твои́ мѣша́ютъ віно́ съ водо́ю.

Кня́зи твои́ не покаря́ются, о́бщницы тате́мъ, лю́бяще да́ры, гоня́ще воздая́ніє, си́рымъ не судя́щіи и суду́ вдови́цъ не внима́ющіи.

Сего́ ра́ди та́ко глаго́летъ Влады́ка Госпо́дь Савао́ѳъ: го́ре крѣ́пкимъ во Ізра́или: не преста́нетъ бо я́рость моя́ на проти́вныя, и су́дъ враго́мъ мои́мъ сотворю́:

и наведу́ ру́ку мою́ на тя́, и разжегу́ въ чистоту́, непокаря́ющихся же погублю́, и отиму́ всѣ́хъ беззако́нныхъ от тебе́, и всѣ́хъ го́рдыхъ смирю́.

И приста́влю судіи́ твоя́ я́коже пре́жде, и совѣ́тники твоя́ я́ко от нача́ла: и по си́хъ нарѣче́шися гра́дъ пра́вды, ма́ти градово́мъ, вѣ́рный Сіо́нъ.

Съ судо́мъ бо спасе́тся плѣне́ніє єго́ и съ ми́лостынею.

И сокруша́тся беззако́нніи и грѣ́шницы вку́пѣ, и оста́вившіи Го́спода сконча́ются:

зане́же постыдя́тся о і́долѣхъ свои́хъ, и́хже са́ми восхотѣ́ша, и посра́мятся о садѣ́хъ свои́хъ, и́хже возжелѣ́ша.

Бу́дутъ бо я́ко тереві́нѳъ отме́тнувый ли́ствія [своя́], и я́ко вертогра́дъ не имы́й воды́.

И бу́детъ крѣ́пость и́хъ я́ко сте́бль изгре́бія, и дѣ́ланія и́хъ я́ко и́скры о́гненныя, и сожгу́тся беззако́нницы и грѣ́шницы вку́пѣ, и не бу́детъ угаша́яй.

Сло́во бы́вшеє от Го́спода ко Иса́іи сы́ну Амо́сову о Іуде́и и о Ієрусали́мѣ.

Я́ко бу́детъ въ послѣ́днія дни́ явле́на гора́ Госпо́дня, и до́мъ Бо́жій на версѣ́ го́ръ, и возвы́сится превы́ше холмо́въ: и пріи́дутъ къ не́й вси́ язы́цы.

И по́йдутъ язы́цы мно́зи и реку́тъ: пріиди́те, и взы́демъ на го́ру Госпо́дню и въ до́мъ Бо́га Іа́ковля, и возвѣсти́тъ на́мъ пу́ть сво́й, и по́йдемъ по нему́. От Сіо́на бо изы́детъ зако́нъ, и сло́во Госпо́дне изъ Ієрусали́ма:

и суди́ти бу́детъ посредѣ́ язы́къ и изобличи́тъ лю́ди мно́ги: и раскую́тъ мечы́ своя́ на ора́ла и ко́пія своя́ на серпы́, и не во́зметъ язы́къ на язы́къ меча́, и не навы́кнутъ ктому́ ра́товатися.

И ны́нѣ, до́ме Іа́ковль, пріиди́те, по́йдемъ свѣ́томъ Госпо́днимъ.

Оста́ви бо лю́ди своя́, до́мъ Іа́ковль: зане́ я́коже изъ нача́ла напо́лнися страна́ и́хъ волхвова́ній, я́коже иноплеме́нниковъ, и ча́да мно́га иноплеме́ннича роди́шася и́мъ.

Напо́лнися бо страна́ и́хъ сребра́ и зла́та, и не бя́ше числа́ сокро́вищъ и́хъ: и напо́лнися земля́ и́хъ ко́ней, и не бя́ше числа́ колесни́цъ и́хъ:

и напо́лнися земля́ ме́рзостей дѣ́лъ ру́къ и́хъ, и поклони́шася тѣ́мъ, я́же сотвори́ша пе́рсты и́хъ:

и преклони́ся человѣ́къ, и смири́ся му́жъ, и не претерплю́ и́мъ.

И ны́нѣ вни́дите въ ка́меніє и скры́йтеся въ зе́млю от лица́ стра́ха Госпо́дня и от сла́вы крѣ́пости єго́, єгда́ воста́нетъ сокруши́ти зе́млю.

О́чи бо Госпо́дни высо́цы, человѣ́къ же смире́нъ: и смири́тся высота́ человѣ́ческая, и вознесе́тся Госпо́дь єди́нъ въ де́нь о́ный.

Де́нь бо Го́спода Савао́ѳа на вся́каго досади́теля и гордели́ваго, и на вся́каго высо́каго и велича́ваго, и смиря́тся:

и на вся́къ ке́дръ Ліва́нскій высо́кихъ и превознесе́нныхъ и на вся́ко дре́во же́лудя Васа́нска,

и на вся́кую го́ру высо́кую и на вся́кій хо́лмъ высо́кій,

и на вся́кій сто́лпъ высо́къ и на вся́кую стѣ́ну высо́кую,

и на вся́кій кора́бль морскі́й и на вся́ко видѣ́ніє добро́ты корабле́й.

И смири́тся вся́кій человѣ́къ, и паде́тся высота́ человѣ́ча, и вознесе́тся Госпо́дь єди́нъ въ де́нь о́ный.

И рукотворе́ная вся́ скры́ютъ,

вне́сше въ пеще́ры и въ разсѣ́лины ка́меній и въ верте́пы земны́я, от лица́ стра́ха Госпо́дня и от сла́вы крѣ́пости єго́, єгда́ воста́нетъ сокруши́ти зе́млю.

Въ де́нь бо о́ный изри́нетъ человѣ́къ ме́рзости своя́ златы́я и сре́бряныя, я́же сотвори́ша, да покланя́ются су́єтнымъ и нетопыре́мъ,

є́же вни́ти въ верте́пы тве́рдаго ка́мене и въ разсѣ́лины ка́меній, от лица́ стра́ха Госпо́дня и от сла́вы крѣ́пости єго́, єгда́ воста́нетъ сокруши́ти зе́млю.

Оста́вите [у́бо] ва́мъ человѣ́ка, єму́же є́сть дыха́ніє въ ноздре́хъ єго́: я́ко въ че́мъ вмѣни́ся се́й?

Се́, Влады́ка Госпо́дь Савао́ѳъ отъи́метъ от Ієрусали́ма и от Іуде́и крѣ́пкаго и крѣ́пкую, крѣ́пость хлѣ́ба и крѣ́пость воды́,

исполи́на и крѣ́пкаго, и человѣ́ка ра́тника и судію́, и проро́ка и смотрели́ваго, и ста́рца

и пятьдесятонача́лника, и ди́внаго совѣ́тника и прему́драго архіте́ктона и разу́мнаго послу́шателя.

И поста́влю ю́ношы кня́зи и́хъ, и руга́теліє госпо́дствовати бу́дутъ и́ми.

И напа́дати и́мутъ лю́діє, человѣ́къ на человѣ́ка, и человѣ́къ на бли́жняго своєго́: прирази́тся отроча́ къ ста́рцу, и безче́стный къ честно́му.

Я́ко и́мется человѣ́къ бра́та своєго́, или́ дома́шняго отца́ своєго́, глаго́ля: ри́зу и́маши, началово́ждь на́мъ бу́ди, и бра́шно моє́ подъ тобо́ю да бу́детъ.

И отвѣща́въ въ де́нь о́ный рече́тъ: не бу́ду тво́й началово́ждь, нѣ́сть бо въ дому́ моє́мъ ни хлѣ́ба, ни ри́зы: не бу́ду началово́ждь лю́демъ си́мъ.

Я́ко оста́вленъ бы́сть Ієрусали́мъ, и Іуде́а паде́, и язы́къ и́хъ со беззако́ніємъ, не покаря́ющься Го́сподеви.

Сего́ ра́ди ны́нѣ смири́ся сла́ва и́хъ, и сту́дъ лица́ и́хъ проти́ву ста́ и́мъ: грѣ́хъ же сво́й я́ко Содо́мскій возвѣсти́ша и яви́ша. Го́ре души́ и́хъ, зане́ умы́слиша совѣ́тъ лука́вый на себе́ сами́хъ,

ре́кше: свя́жемъ пра́веднаго, я́ко непотре́бенъ на́мъ є́сть. У́бо плоды́ дѣ́лъ свои́хъ снѣдя́тъ.

Го́ре беззако́нному: лука́вая бо приключа́тся єму́ по дѣло́мъ руку́ єго́.

Лю́діє мои́, приста́вницы ва́ши пожина́ютъ ва́съ, и истяза́ющіи облада́ютъ ва́ми: лю́діє мои́, блажа́щіи ва́съ льстя́тъ вы́ и стези́ но́гъ ва́шихъ возмуща́ютъ.

Но ны́нѣ устро́ится Госпо́дь на су́дъ и поста́витъ на су́дъ лю́ди своя́:

са́мъ Госпо́дь на су́дъ пріи́детъ со старѣ́йшины люді́й и со кня́зи и́хъ. Вы́ же почто́ запали́сте віногра́дъ мо́й, и разграбле́ніє убо́гаго въ домѣ́хъ ва́шихъ?

почто́ вы́ оби́дите люді́й мои́хъ и лице́ убо́гихъ посрамля́єте? глаго́летъ Госпо́дь Савао́ѳъ.

Сія́ глаго́летъ Госпо́дь: поне́же вознесо́шася дще́ри Сіо́ни и ходи́ша высо́кою вы́єю и помиза́ніємъ оче́съ и ступа́ніємъ но́гъ, ку́пно ри́зы влеку́шыя [по до́лу] и нога́ма ку́пно игра́ющыя:

и смири́тъ Госпо́дь нача́лныя дще́ри Сіо́ни, и Госпо́дь откры́єтъ срамоту́ и́хъ.

Въ де́нь о́нъ, и отъи́метъ Госпо́дь сла́ву ри́зъ и́хъ и красоты́ и́хъ, и вплете́нія злата́я [на главѣ́] и тре́сны ри́зныя, и лу́ницы гри́венныя

и срачи́цы то́нкія, и красоту́ лица́ и́хъ и состроє́ніє красы́ сла́вныя, и о́бручи и пе́рстни, и мони́ста и запя́стія и худо́жныя усеря́зи,

и багряни́цы и пребагря́ная, и у́тварь хра́мную

и свѣ́тлая лако́нская, и виссо́ны и синеты́, и червлени́цы

и виссо́нъ со зла́томъ и синето́ю преты́каны, и тончи́цы преи́маны зла́томъ:

и бу́детъ вмѣ́сто вони́ до́брыя смра́дъ, и вмѣ́сто по́яса у́жемъ препоя́шешися, и вмѣ́сто украше́нія злата́го, є́же на главѣ́, плѣ́шь имѣ́ти бу́деши дѣ́лъ твои́хъ ра́ди, и вмѣ́сто ри́зы багря́ныя препоя́шешися вре́тищемъ:

и сы́нъ тво́й добрѣ́йшій, єго́же лю́биши, мече́мъ паде́тъ, и крѣ́пцыи ва́ши мече́мъ паду́тъ и смиря́тся:

и воспла́чутся храни́лища у́тварей ва́шихъ, и оста́нешися єди́на и о зе́млю уда́рена бу́деши.

И и́мутся се́дмь же́нъ за му́жа єди́наго, глаго́лющя: хлѣ́бъ на́шъ я́сти бу́демъ и въ ри́зы на́шя одѣва́тися, то́чію и́мя твоє́ да нарече́тся на на́съ, отими́ укори́зну на́шу.

Въ де́нь о́ный возсія́єтъ Бо́гъ въ совѣ́тѣ со сла́вою на земли́, є́же вознести́ и просла́вити оста́нокъ Ізра́иля.

И бу́детъ оста́нокъ въ Сіо́нѣ и оста́нокъ во Ієрусали́мѣ, святи нареку́тся вси́ напи́санніи въ жи́знь во Ієрусали́мѣ:

я́ко отмы́єтъ Госпо́дь скве́рну сыно́въ и дще́рей Сіо́нскихъ и кро́вь Ієрусали́мску очи́ститъ от среды́ и́хъ ду́хомъ суда́ и ду́хомъ зно́я.

И пріи́детъ Госпо́дь, и бу́детъ все́ мѣ́сто горы́ Сіо́ни, и вся́ я́же о́крестъ єя́ осѣни́тъ о́блакъ во дни́, и я́ко ды́ма и свѣ́та о́гненна горя́ща въ нощи́, все́ю сла́вою покры́єтся:

и бу́детъ въ сѣ́нь от зно́я и въ покро́въ и въ сокрове́ніє от же́стости и дождя́.

Воспою́ ны́нѣ возлю́бленному пѣ́снь возлю́бленнаго моєго́ віногра́ду моєму́: віногра́дъ бы́сть возлю́бленному въ ро́зѣ, на мѣ́стѣ ту́чнѣ:

и огражде́ніємъ огради́хъ и окопа́хъ, и насади́хъ ло́зу избра́нну, и созда́хъ сто́лпъ посредѣ́ єго́, и предточи́ліє ископа́хъ въ не́мъ, и жда́хъ, да сотвори́тъ гро́здіє, и сотвори́ те́рніє.

И ны́нѣ, живу́щіи во Ієрусали́мѣ и человѣ́че Іу́динъ, суди́те между́ мно́ю и віногра́домъ мои́мъ.

Что́ сотворю́ єще́ віногра́ду моєму́, и не сотвори́хъ єму́? зане́же жда́хъ, да сотвори́тъ гро́здіє, сотвори́ же те́рніє.

Ны́нѣ у́бо возвѣщу́ ва́мъ, что́ а́зъ сотворю́ віногра́ду моєму́: отиму́ огражде́ніє єго́, и бу́детъ въ разграбле́ніє: и разорю́ стѣ́ну єго́, и бу́детъ въ попра́ніє.

И оста́влю віногра́дъ мо́й, и ктому́ не обрѣ́жется, ниже́ покопа́єтся, и взы́детъ на не́мъ, я́коже на ляди́нѣ, те́рніє: и облако́мъ заповѣ́мъ, є́же не одожди́ти на него́ дождя́.

Віногра́дъ бо Го́спода Савао́ѳа, до́мъ Ізра́илевъ є́сть, и человѣ́къ Іу́динъ но́вый са́дъ возлю́бленный: жда́хъ, да сотвори́тъ су́дъ, сотвори́ же беззако́ніє, и не пра́вду, но во́пль.

Го́ре совокупля́ющымъ до́мъ къ до́му и село́ къ селу́ приближа́ющымъ, да бли́жнему оти́мутъ что́: єда́ вселите́ся єди́ни на земли́?

Услы́шашася бо во ушесѣ́хъ Го́спода Савао́ѳа сія́: а́ще бо бу́дутъ до́мове мно́зи, въ запустѣ́ніє бу́дутъ вели́цыи и до́бріи, и не бу́дутъ живу́щіи въ ни́хъ:

идѣ́же бо возорю́тъ де́сять супру́гъ воло́въ, сотвори́тъ корча́гъ єди́нъ, и сѣ́яй Артава́съ ше́сть сотвори́тъ мѣ́ры три́.

Го́ре востаю́щымъ зау́тра и Сіке́ръ гоня́щымъ, жду́щымъ ве́чера: віно́ бо сожже́тъ я́:

со гу́сльми бо и пѣвни́цами, и тимпа́ны и свирѣ́льми віно́ пію́тъ, на дѣла́ же Госпо́дня не взира́ютъ и дѣ́лъ руку́ єго́ не помышля́ютъ.

У́бо плѣне́ни бы́ша лю́діє мои́, за є́же не вѣ́дѣти и́мъ Го́спода, и мно́жество бы́сть ме́ртвыхъ гла́да ра́ди и жа́жди водны́я.

И разшири́ а́дъ ду́шу свою́ и разве́рзе уста́ своя́, є́же не преста́ти: и сни́дутъ сла́вніи и вели́цыи и бога́тіи и губи́теліє и́хъ и веселя́йся въ не́мъ:

и смири́тся человѣ́къ, и обезче́стится му́жъ, и о́чи высокогля́дающіи смиря́тся.

И вознесе́тся Госпо́дь Савао́ѳъ въ судѣ́, и Бо́гъ святы́й просла́вится въ пра́вдѣ:

и упасу́тся расхище́нніи я́ко юнцы́, и пусты́ни плѣне́нныхъ а́гнцы поядя́тъ.

Го́ре привлача́ющымъ грѣхи́ я́ко у́жемъ до́лгимъ, и я́ко и́га ю́нична реме́немъ беззако́нія своя́,

глаго́лющымъ: ско́ро да прибли́жатся, я́же сотвори́тъ, да ви́димъ, и да пріи́детъ совѣ́тъ свята́го Ізра́илева, да разумѣ́ємъ.

Го́ре глаго́лющымъ лука́воє до́броє, и до́броє лука́воє, полага́ющымъ тму́ свѣ́тъ, и свѣ́тъ тму́, полага́ющымъ го́рькоє сла́дкоє, и сла́дкоє го́рькоє.

Го́ре, и́же му́дри въ себѣ́ сами́хъ и предъ собо́ю разу́мни.

Го́ре крѣ́пкимъ ва́шымъ, віно́ пію́щымъ, и вельмо́жамъ растворя́ющымъ Сіке́ръ,

оправда́ющымъ нечести́ва даро́въ ра́ди, и є́же є́сть пра́ведноє пра́веднаго взе́млющымъ от него́.

Сего́ ра́ди я́коже сгори́тъ тро́сть от у́глія о́гненнаго и сожже́тся от пла́мене разгорѣ́вшагося, ко́рень и́хъ я́ко пе́рсть бу́детъ, и цвѣ́тъ и́хъ я́ко пра́хъ взы́детъ: не восхотѣ́ша бо зако́на Го́спода Савао́ѳа, но сло́во свята́го Ізра́илева раздражи́ша.

И возъяри́ся гнѣ́вомъ Госпо́дь Савао́ѳъ на лю́ди своя́, и наложи́ ру́ку свою́ на ни́хъ, и порази́ и́хъ: и раздражи́шася го́ры, и бы́ша тру́пи и́хъ я́ко гно́й посредѣ́ пути́. И во всѣ́хъ си́хъ не отврати́ся я́рость єго́, но єще́ рука́ єго́ высока́.

Воздви́гнетъ у́бо зна́меніє во язы́цѣхъ су́щихъ дале́че и позви́ждетъ и́мъ от коне́цъ земли́, и се́, ско́ро ле́гцѣ гряду́тъ:

не вза́лчутъ, ни утрудя́тся, ни воздре́млютъ, ни поспя́тъ, ни распоя́шутъ по́ясовъ свои́хъ от чре́слъ свои́хъ, ниже́ расто́ргнутся реме́ни сапого́въ и́хъ:

и́хже стрѣ́лы остры́ су́ть, и лу́цы и́хъ напряже́ни: копы́та ко́ней и́хъ я́ко тве́рдъ ка́мень вмѣни́шася, коле́са колесни́цъ и́хъ я́ко бу́ря.

Яря́тся я́ко льво́ве, и предста́ша я́ко льви́чища: и и́метъ, и возопіє́тъ я́ко звѣ́рь, и изве́ржетъ, и не бу́детъ отъе́млющаго и́хъ.

И возопіє́тъ и́хъ ра́ди въ то́й де́нь, я́ко шу́мъ мо́ря волну́ющася: и воззря́тъ на зе́млю, и се́, тма́ же́стока въ недоумѣ́ніи и́хъ.

И бы́сть въ лѣ́то, въ не́же у́мре Озі́а ца́рь, ви́дѣхъ Го́спода сѣдя́ща на престо́лѣ высо́цѣ и превознесе́ннѣ, и испо́лнь до́мъ сла́вы єго́.

И серафі́ми стоя́ху о́крестъ єго́, ше́сть кри́лъ єди́ному и ше́сть кри́лъ друго́му: и двѣма́ у́бо покрыва́ху ли́ца своя́, двѣма́ же покрыва́ху но́ги своя́ и двѣма́ лета́ху.

И взыва́ху дру́гъ ко дру́гу и глаго́лаху: свя́тъ, свя́тъ, свя́тъ Госпо́дь Савао́ѳъ: испо́лнь вся́ земля́ сла́вы єго́.

И взя́ся наддве́ріє от гла́са, и́мже вопія́ху, и до́мъ напо́лнися ды́ма.

И реко́хъ: о, окая́нный а́зъ, я́ко умили́хся, я́ко человѣ́къ сы́й и нечи́сты устнѣ́ имы́й, посредѣ́ люді́й нечи́стыя устнѣ́ иму́щихъ а́зъ живу́: и Царя́ Го́спода Савао́ѳа ви́дѣхъ очи́ма мои́ма.

И по́сланъ бы́сть ко мнѣ́ єди́нъ от серафі́мовъ, и въ руцѣ́ своє́й имя́ше у́гль горя́щь, єго́же клеща́ми взя́тъ от олтаря́,

и прикосну́ся устна́мъ мои́мъ и рече́: се́, прикосну́ся сіє́ устна́мъ твои́мъ, и отъи́метъ беззако́нія твоя́ и грѣхи́ твоя́ очи́ститъ.

И слы́шахъ гла́съ Го́спода глаго́люща: кого́ послю́, и кто́ по́йдетъ къ лю́демъ си́мъ? И реко́хъ: се́, а́зъ є́смь, посли́ мя́.

И рече́: иди́ и рцы́ лю́демъ си́мъ: слу́хомъ услы́шите, и не уразумѣ́єте: и ви́дяще у́зрите, и не уви́дите:

одебелѣ́ бо се́рдце люді́й си́хъ, и уши́ма свои́ма тя́жко слы́шаша, и о́чи свои́ смежи́ша, да не когда́ у́зрятъ очи́ма и уши́ма услы́шатъ, и се́рдцемъ уразумѣ́ютъ и обратя́тся, и исцѣлю́ я́.

И реко́хъ: доко́лѣ, Го́споди? И рече́: до́ндеже опустѣ́ютъ гра́ди, от є́же ненаселе́нымъ бы́ти, и до́мы, от є́же не бы́ти человѣ́комъ, и земля́ оста́нется пуста́.

И посе́мъ продолжи́тъ Бо́гъ человѣ́ки, и умно́жатся оста́вльшіися на земли́.

И єще́ на не́й є́сть десяти́на, и па́ки бу́детъ въ расхище́ніє я́коже тереві́нѳъ и я́ко же́лудь, єгда́ испаде́тъ изъ плю́ски своєя́: сѣ́мя свято стоя́ніє єго́.

И бы́сть во дни́ Аха́за сы́на Іоаѳа́мля, сы́на Озі́и, царя́ Іу́дина, взы́де расі́нъ ца́рь Ара́мль, и факе́й сы́нъ ромелі́євъ, ца́рь Ізра́илевъ, на Ієрусали́мъ, воєва́ти на него́, и не возмого́ша разори́ти єго́.

И возвѣсти́ся въ дому́ даві́довѣ, глаго́ля: совѣща́ся Ара́мъ со Єфре́момъ, и ужасе́ся душа́ єго́ и душа́ люді́й єго́, я́коже въ дубра́вѣ дре́во вѣ́тромъ восколе́блется.

И рече́ Госпо́дь ко Иса́іи: изы́ди во срѣ́теніє Аха́зу ты́ и оста́выйся Іасу́въ сы́нъ тво́й, къ купѣ́ли го́рняго пути́ села́ бѣли́лнича,

и рече́ши єму́: блюди́, є́же молча́ти, и не бо́йся, ниже́ душа́ твоя́ да изнемо́жетъ от двою́ дре́ву главе́нь дымя́щихся си́хъ: єгда́ бо гнѣ́въ я́рости моєя́ бу́детъ, па́ки исцѣлю́.

Сы́нъ же Ара́мль и сы́нъ ромелі́євъ я́ко совѣща́ста совѣ́тъ лука́вый на тя́, глаго́люще:

взы́демъ во Іуде́ю, и собесѣ́довавше съ ни́ми отврати́мъ я́ къ на́мъ и воцари́мъ въ не́й сы́на тавеи́лева:

сія́ же глаго́летъ Госпо́дь Савао́ѳъ: не пребу́детъ совѣ́тъ се́й, ниже́ сбу́дется,

но глава́ Ара́му Дама́скъ, и глава́ Дама́ску расі́нъ: но єще́ шестьдеся́тъ и пя́ть лѣ́тъ, оскудѣ́єтъ ца́рство Єфре́мово от люді́й,

глава́ же Єфре́мови соморо́нъ, и глава́ соморо́ну сы́нъ ромелі́євъ: и а́ще не увѣ́рите, ниже́ и́мате разумѣ́ти.

И приложи́ Госпо́дь глаго́лати ко Аха́зу, рекі́й:

проси́ себѣ́ зна́менія от Го́спода Бо́га твоєго́ во глубину́, или́ въ высоту́.

И рече́ Аха́зъ: не и́мамъ проси́ти, ниже́ искушу́ Го́спода.

И рече́ [Иса́іа]: слы́шите у́бо, до́ме даві́довъ: єда́ ма́ло ва́мъ є́сть тру́дъ дая́ти человѣ́комъ, и ка́ко даєте́ Го́сподеви тру́дъ?

Сего́ ра́ди да́стъ Госпо́дь са́мъ ва́мъ зна́меніє: се́, Дѣ́ва во чре́вѣ зачне́тъ и роди́тъ Сы́на, и нарече́ши и́мя єму́ Ємману́илъ:

ма́сло и ме́дъ снѣ́сть, пре́жде не́же разумѣ́ти єму́ изво́лити зла́я, или́ избра́ти благо́є:

зане́ пре́жде не́же разумѣ́ти отроча́ти благо́є или́ зло́є, отри́нетъ лука́воє, є́же избра́ти благо́є, и оста́вится земля́, єя́же ты́ бои́шися, от лица́ дву́хъ царе́й.

Но наведе́тъ Госпо́дь на тя́ и на лю́ди твоя́ и на до́мъ отца́ твоєго́ дни́, и́же єще́ не пришли́, от дне́ въ о́ньже отъя́ Єфре́ма от Іу́ды, царя́ Ассирі́йска.

И бу́детъ въ то́й де́нь, позви́ждетъ Госпо́дь му́хамъ, я́же владѣ́ютъ ча́стію рѣки́ Єги́петскія, и пчелѣ́, я́же є́сть во странѣ́ Ассирі́йстѣй:

и пріи́дутъ вси́ и почі́ютъ въ де́брехъ страны́ и въ пеще́рахъ ка́менныхъ, и во верте́пѣхъ и во вся́цѣй разсѣ́линѣ и во вся́цѣмъ дре́вѣ.

Въ де́нь о́ный обрі́єтъ Госпо́дь бри́твою ная́тою объ ону́ страну́ рѣки́ царя́ Ассирі́йска, главу́ и власы́ но́гъ, и браду́ отъи́метъ.

И бу́детъ въ то́й де́нь, корми́ти бу́детъ человѣ́къ ю́ницу от воло́въ и двѣ́ о́вцѣ:

и бу́детъ от мно́жества творе́нія мле́чнаго, ма́сло и ме́дъ снѣ́сть вся́къ оста́выйся на земли́.

И бу́детъ въ то́й де́нь, вся́ко мѣ́сто, идѣ́же а́ще бу́детъ ты́сяща ло́зъ віногра́да, по ты́сящи Сі́кль, въ ляди́ну бу́детъ и въ те́рніє:

со стрѣло́ю и лу́комъ вни́дутъ та́мо, я́ко ляди́ною и те́рніємъ бу́детъ вся́ земля́:

и вся́ка гора́ оре́мая возоре́тся, не на́йдетъ та́мо стра́хъ: бу́детъ от ляди́ны и от те́рнія па́ству овца́мъ и въ попра́ніє волу́.

И рече́ Госпо́дь ко мнѣ́: пріими́ себѣ́ сви́токъ но́въ вели́къ и напиши́ въ не́мъ писа́ломъ человѣ́чимъ, є́же ско́ро плѣне́ніє сотвори́ти коры́стей, приспѣ́ бо:

и свидѣ́тели мнѣ́ сотвори́ вѣ́рны человѣ́ки, урі́ю ієре́а и Заха́рію сы́на Варахі́ина.

И приступи́хъ ко проро́чицѣ, и во чре́вѣ зача́тъ и роди́ сы́на. И рече́ Госпо́дь мнѣ́: нарцы́ и́мя єму́: ско́ро плѣни́, на́гло расхи́ти,

зане́ пре́жде не́же разумѣ́ти отроча́ти назва́ти отца́ или́ ма́терь, пріи́метъ си́лу Дама́скову, и коры́сти самарі́йскія предъ царе́мъ Ассирі́йскимъ.

И приложи́ Госпо́дь глаго́лати ко мнѣ́ єще́, глаго́ля:

поне́же не восхотѣ́ша лю́діє сі́и воды́ Сілоа́мли теку́щія ти́сѣ, но восхотѣ́ша имѣ́ти рассо́на и сы́на ромелі́єва царя́ надъ ва́ми,

сего́ ра́ди се́, возво́дитъ Госпо́дь на вы́ во́ду рѣки́ си́льну и мно́гу, царя́ Ассирі́йска и сла́ву єго́: и взы́детъ на вся́ку де́брь ва́шу, и обы́детъ вся́ку стѣ́ну ва́шу,

и отъи́метъ от Іуде́и человѣ́ка, и́же возмо́жетъ главу́ воздви́гнути, или́ могу́щаго что́ соверши́ти: и бу́детъ по́лкъ єго́, во є́же напо́лнити ширину́ страны́ твоєя́, съ на́ми Бо́гъ!

Разумѣ́йте, язы́цы, и покаря́йтеся, услы́шите да́же до послѣ́днихъ земли́: могу́щіи, покаря́йтеся: а́ще бо па́ки возмо́жете, па́ки побѣ́ждени бу́дете,

и и́же а́ще совѣ́тъ совѣща́єте, разори́тъ Госпо́дь, и сло́во, є́же а́ще возглаго́лете, не пребу́детъ въ ва́съ, я́ко съ на́ми Бо́гъ.

Та́ко глаго́летъ Госпо́дь: крѣ́пкою руко́ю не покаря́ются хожде́нію пути́ люді́й си́хъ, глаго́люще:

да не когда́ реку́тъ: же́стоко: все́ бо, є́же а́ще реку́тъ лю́діє сі́и, же́стоко є́сть: стра́ха же и́хъ не убо́йтеся, ниже́ возмяти́теся.

Го́спода си́лъ, того́ освяти́те, и то́й бу́детъ тебѣ́ въ стра́хъ.

И а́ще бу́деши упова́я на него́, бу́детъ тебѣ́ во освяще́ніє, а не я́коже о ка́мень претыка́нія преткне́шися, ниже́ я́ко о ка́мень паде́нія: до́мове же Іа́ковли въ пру́глѣ, и въ раздо́ліи сѣдя́щіи во Ієрусали́мѣ.

Сего́ ра́ди изнемо́гутъ въ ни́хъ мно́зи, и паду́тъ, и сокруша́тся, и прибли́жатся, и я́ти бу́дутъ человѣ́цы въ тверды́ни су́ще.

Тогда́ явле́ни бу́дутъ печатлѣ́ющіи зако́нъ, є́же не учи́тися.

И рече́тъ: пожду́ Бо́га отвра́щшаго лице́ своє́ от до́му Іа́ковля и упова́я бу́ду на́нь.

Се́, а́зъ и дѣ́ти, я́же ми́ даде́ Бо́гъ: и бу́дутъ зна́менія и чудеса́ въ дому́ Ізра́илевѣ от Го́спода Савао́ѳа, и́же обита́єтъ на горѣ́ Сіо́нъ.

И а́ще реку́тъ къ ва́мъ: изыщи́те чревоволше́бниковъ и от земли́ возглаша́ющихъ, тщесло́вующихъ, и́же от чре́ва глаша́ютъ, не язы́къ ли къ Бо́гу своєму́ взы́щетъ? что́ испыту́ютъ ме́ртвыя о живы́хъ?

Зако́нъ бо въ по́мощь даде́, да реку́тъ не я́коже сло́во сіє́, за́ньже не лѣ́ть да́ры дая́ти.

И пріи́детъ на вы́ же́стокъ гла́дъ, и бу́детъ, єгда́ вза́лчете, ско́рбни бу́дете и зло́ рече́те кня́зю и оте́честву:

и воззря́тъ на не́бо горѣ́, и на зе́млю ни́зу при́зрятъ, и се́, ску́дость тѣ́сна и тма́, ско́рбь и тѣснота́ и тма́, я́коже не ви́дѣти: и не оскудѣ́єтъ въ тѣ́снотѣ сы́й да́же до вре́мене.

Сіє́ пре́жде испі́й, ско́ро твори́, страно́ Завуло́ня и земле́ Нефѳалі́мля, и про́чіи при мо́ри живу́щіи, и объ ону́ страну́ Іорда́на, Галіле́а язы́ковъ.

Лю́діє ходя́щіи во тмѣ́ ви́дѣша свѣ́тъ ве́лій: живу́щіи во странѣ́ и сѣ́ни сме́ртнѣй, свѣ́тъ возсія́єтъ на вы́.

Мно́жайшіи лю́діє, я́же изве́лъ єси́, въ весе́ліи твоє́мъ: и возвеселя́тся предъ тобо́ю, я́коже веселя́щіися въ жа́тву, и я́коже веселя́тся дѣля́щіи коры́сти.

Зане́ отъя́тся яре́мъ лежа́й на ни́хъ, и же́злъ, и́же на вы́и и́хъ: же́злъ бо истязу́ющихъ разсы́па Госпо́дь, я́коже въ де́нь, и́же на Мадіа́ма.

Я́ко вся́кую оде́жду со́бранну ле́стію и ри́зу съ примире́ніємъ отдаду́тъ, и восхотя́тъ, да бы́ша огне́мъ сожже́ны бы́ли.

Я́ко отроча́ роди́ся на́мъ, Сы́нъ, и даде́ся на́мъ, єго́же нача́лство бы́сть на ра́мѣ єго́: и нарица́єтся и́мя єго́: вели́ка совѣ́та а́нгелъ, чу́денъ, совѣ́тникъ, Бо́гъ крѣ́пкій, властели́нъ, кня́зь ми́ра, Оте́цъ бу́дущаго вѣ́ка: приведу́ бо ми́ръ на кня́зи, ми́ръ и здра́віє єму́.

И ве́ліє нача́лство єго́, и ми́ра єго́ нѣ́сть предѣ́ла на престо́лѣ Дави́довѣ и на ца́рствѣ єго́, испра́вити є́ и заступи́ти єго́ въ судѣ́ и пра́вдѣ, отны́нѣ и до вѣ́ка: ре́вность Го́спода Савао́ѳа сотвори́тъ сія́.

Сме́рть {Євр.: сло́во.} посла́ Госпо́дь на Іа́кова, и пріи́де на Ізра́иля:

и уразумѣ́ютъ вси́ лю́діє Єфре́мовы и живу́щіи въ самарі́и, въ досажде́ніи и высо́цѣмъ се́рдцы глаго́люще:

плі́нѳы падо́ша, но пріиди́те, изсѣче́мъ ка́меніє и посѣче́мъ черни́чіє и ке́дры, и сози́ждемъ себѣ́ сто́лпъ.

И разруши́тъ Бо́гъ востаю́щыя на го́ру Сіо́ню, и враги́ єго́ разсы́плетъ:

сирі́ю от восто́къ со́лнца и є́ллины от за́пада со́лнца, пояда́ющыя Ізра́иля всѣ́ми усты́. Во всѣ́хъ си́хъ не отврати́ся я́рость єго́, но єще́ рука́ єго́ высока́.

И лю́діє не обрати́шася, до́ндеже я́звени бы́ша, и Го́спода не взыска́ша.

И отъя́тъ Госпо́дь от Ізра́иля главу́ и о́шибъ, вели́ка и ма́ла, во єди́нъ де́нь:

ста́рца и чудя́щихся ли́цамъ, сіє́ нача́ло: и проро́ка уча́ща беззако́нная, се́й о́шибъ.

И бу́дутъ блажа́щіи люді́й си́хъ льстя́ше, и льстя́тъ, я́ко да поглотя́тъ я́.

Сего́ ра́ди о ю́ношахъ и́хъ не возвесели́тся Госпо́дь, и сиро́тъ и́хъ и вдови́цъ и́хъ не поми́луєтъ: я́ко вси́ беззако́нніи и лука́віи, и вся́кая уста́ глаго́лютъ непра́вду. Во всѣ́хъ си́хъ не отврати́ся я́рость єго́, но єще́ рука́ єго́ высока́.

И разгори́тся я́ко о́гнь беззако́ніє, и я́ко тро́скотъ сухі́й пояде́нъ бу́детъ огне́мъ, и разгори́тся въ ча́щахъ дубра́вныхъ и поя́стъ, я́же о́крестъ холмо́въ вся́.

За я́рость гнѣ́ва Госпо́дня сгорѣ́ вся́ земля́, и бу́дутъ лю́діє я́ко огне́мъ пожже́ни: человѣ́къ бра́та своєго́ не поми́луєтъ,

но уклони́тся на де́сно, я́ко вза́лчетъ, и снѣ́сть от шу́іихъ, и не насы́тится человѣ́къ яды́й пло́ти мы́шцы своєя́:

снѣ́сть бо Манассі́й Єфре́мово, и Єфре́мъ Манассі́ино, я́ко вку́пѣ повою́ютъ Іу́ду. Во всѣ́хъ си́хъ не отврати́ся я́рость [єго́], но єще́ рука́ єго́ высока́.

Го́ре пи́шущымъ лука́вство: пи́шущіи бо лука́вство пи́шутъ,

укланя́юще су́дъ убо́гихъ, восхища́юще су́дъ ни́щихъ люді́й мои́хъ, я́ко бы́ти и́мъ вдови́цѣ въ расхище́ніє и сиротѣ́ въ разграбле́ніє.

И что́ сотворя́тъ въ де́нь посѣще́нія? ско́рбь бо ва́мъ отдале́че пріи́детъ. И къ кому́ прибѣ́гнете, да помо́жетъ ва́мъ? И гдѣ́ оста́вите сла́ву ва́шу,

є́же не впа́сти въ плѣне́ніє? И подъ убіє́ными паду́тъ. И во всѣ́хъ си́хъ не отврати́ся гнѣ́въ єго́, но єще́ рука́ єго́ высока́.

Го́ре Ассирі́ємъ, же́злъ я́рости моєя́ и гнѣ́въ є́сть въ руку́ и́хъ.

Гнѣ́въ мо́й послю́ на язы́къ беззако́ненъ, и свои́хъ люді́й повелю́ сотвори́ти коры́сти и плѣне́ніє, и попра́ти гра́ды и положи́ти я́ въ пра́хъ.

Се́й же не та́ко помы́сли и душе́ю не та́ко возмнѣ́: но отсту́питъ у́мъ єго́, и є́же потреби́ти язы́ки не ма́лы.

И а́ще реку́тъ єму́: ты́ ли єси́ єди́нъ кня́зь?

И рече́тъ: не взя́хъ ли страны́, я́же вы́ше Вавило́на и хала́ни, идѣ́же сто́лпъ созда́нъ, и взя́хъ Араві́ю и Дама́скъ и самарі́ю?

Я́коже сія́ взя́хъ, и вся́ княже́нія возму́. Возрыда́йте, изва́янная во Ієрусали́мѣ и въ самарі́и:

я́коже бо сотвори́хъ самарі́и и рукотворе́ннымъ єя́, та́ко сотворю́ и Ієрусали́му и кумі́ромъ єго́.

И бу́детъ, єгда́ сконча́єтъ Госпо́дь вся́ творя́ въ горѣ́ Сіо́ни и во Ієрусали́мѣ, наведе́тъ на у́мъ вели́кій, на кня́зя Ассирі́йска и на высоту́ сла́вы о́чію єго́.

Рече́ бо: крѣ́постію руки́ моєя́ сотворю́, и прему́дростію ра́зума [моєго́] отиму́ предѣ́лы язы́ковъ, и си́лу и́хъ плѣню́,

и сотрясу́ гра́ды населе́ныя, и вселе́нную всю́ объиму́ руко́ю моє́ю я́ко гнѣздо́, и я́ко оста́вленая я́ица возму́: и нѣ́сть, и́же убѣжи́тъ мене́, или́ проти́ву мнѣ́ рече́тъ, и отве́рзетъ уста́ и глуми́тъ.

Єда́ просла́вится сѣки́ра безъ сѣку́щаго є́ю? или́ вознесе́тся пила́ безъ влеку́щаго ю́? Та́кожде а́ще кто́ во́зметъ же́злъ, или́ дре́во: и не та́ко.

Но по́слетъ Госпо́дь Савао́ѳъ на твою́ че́сть безче́стіє, и на твою́ сла́ву о́гнь горя́ возгори́тся.

И бу́детъ свѣ́тъ Ізра́илевъ во о́гнь, и освяти́тъ єго́ огне́мъ горя́щимъ, и поя́стъ я́ко сѣ́но вещество́.

Въ то́й де́нь уга́снутъ го́ры и хо́лми и дубра́вы, и поя́стъ от души́ да́же до пло́тей: и бу́детъ бѣжа́й, я́ко бѣжа́й от пла́мене горя́ща:

и оста́вльшіися от ни́хъ бу́дутъ въ число́, и отроча́ ма́лоє напи́шетъ я́.

И бу́детъ въ то́й де́нь, не приложи́тся ктому́ оста́нокъ Ізра́илевъ, и спасе́нніи Іа́ковли не бу́дутъ ктому́ упова́юще на оби́дѣвшыя и́хъ, но бу́дутъ упова́юще на Бо́га свята́го Ізра́илева и́стиною.

И обрати́тся оста́нокъ Іа́ковль къ Бо́гу крѣ́пкому.

И а́ще бу́дутъ лю́діє Ізра́илевы я́ко песо́къ морскі́й, оста́нокъ и́хъ спасе́тся:

сло́во бо соверша́я и сокраща́я пра́вдою, я́ко сло́во сокраще́но сотвори́тъ Госпо́дь во все́й вселе́ннѣй.

Сего́ ра́ди сія́ глаго́летъ Госпо́дь Савао́ѳъ: не бо́йтеся, лю́діє мои́, от Ассирі́анъ, живу́щіи въ Сіо́нѣ, я́ко жезло́мъ порази́тъ тя́: я́зву бо наво́дитъ на тя́, є́же ви́дѣти пу́ть Єги́пта.

Єще́ бо ма́ло, и преста́нетъ гнѣ́въ, я́рость же моя́ на совѣ́тъ и́хъ:

и воздви́гнетъ Бо́гъ си́лъ на ня́ я́зву, я́ко я́зву Мадіа́млю на мѣ́стѣ ско́рби, и я́рость єго́ на пу́ть и́же къ мо́рю, на пу́ть и́же во Єги́петъ:

и бу́детъ въ то́й де́нь, отъи́мется и́го єго́ от ра́мене твоєго́ и стра́хъ єго́ от тебе́, и согніє́тъ и́го от ра́менъ ва́шихъ.

Пріи́детъ бо во гра́дъ Агга́й, и пре́йдетъ въ Магеддо́, и въ Махма́сѣ положи́тъ сосу́ды своя́.

И мине́тъ де́брь, и пріи́детъ во Агга́й: стра́хъ пріи́метъ раму́ гра́дъ Сау́ловъ,

побѣ́гнетъ дще́рь Галі́мля, услы́шится въ лаісѣ́, услы́шится во Анаѳо́ѳѣ.

И ужасе́ся Мадеми́на и живу́щіи во гіви́мѣ.

Утѣша́йте дне́сь є́же на пути́ пребы́ти: утѣша́йте руко́ю го́ру дще́рь Сіо́ню, и хо́лми, и́же во Ієрусали́мѣ:

се́, Влады́ка Госпо́дь Савао́ѳъ смяте́тъ сла́вныя со крѣ́постію, и высо́ціи укори́зною сокруша́тся, и высо́цыи смиря́тся,

и паду́тъ высо́цыи мече́мъ, Ліва́нъ же съ высо́кими паде́тся.

И изы́детъ же́злъ изъ ко́рене Ієссе́ова, и цвѣ́тъ от ко́рене єго́ взы́детъ:

и почі́єтъ на не́мъ Ду́хъ Бо́жій, Ду́хъ прему́дрости и ра́зума, Ду́хъ совѣ́та и крѣ́пости, Ду́хъ вѣ́дѣнія и благоче́стія:

испо́лнитъ єго́ Ду́хъ стра́ха Бо́жія: не по сла́вѣ суди́ти и́мать, ниже́ по глаго́ланію обличи́тъ,

но су́дитъ пра́вдою смире́нному су́дъ и обличи́тъ пра́востію смире́нныя земли́, и порази́тъ зе́млю сло́вомъ у́стъ свои́хъ и Ду́хомъ усте́нъ убіє́тъ нечести́ваго:

и бу́детъ препоя́санъ пра́вдою о чре́слѣхъ свои́хъ и и́стиною обви́тъ по ре́брамъ свои́мъ:

и пасти́ся бу́дутъ вку́пѣ во́лкъ со а́гнцемъ, и ры́сь почі́єтъ со ко́злищемъ, и теле́цъ и юне́цъ и ле́въ вку́пѣ пасти́ся бу́дутъ, и отроча́ ма́ло поведе́тъ я́:

и во́лъ и медвѣ́дь вку́пѣ пасти́ся бу́дутъ, и вку́пѣ дѣ́ти и́хъ бу́дутъ, и ле́въ а́ки во́лъ я́сти бу́детъ пле́вы:

и отроча́ мла́до на пеще́ры а́спідовъ и на ло́же исча́дій а́спідскихъ ру́ку возложи́тъ:

и не сотворя́тъ зла́, ни возмо́гутъ погуби́ти ни кого́же на горѣ́ святѣ́й моє́й: я́ко напо́лнися вся́ земля́ вѣ́дѣнія Госпо́дня, а́ки вода́ мно́га покры́ мо́ре.

И бу́детъ въ де́нь о́ный ко́рень Ієссе́овъ, и востая́й владѣ́ти язы́ки, на того́ язы́цы упова́ти бу́дутъ: и бу́детъ поко́й єго́ че́сть.

И бу́детъ въ де́нь о́ный, приложи́тъ Госпо́дь показа́ти ру́ку свою́, є́же возревнова́ти по оста́нку про́чему люді́й, и́же а́ще оста́нетъ от Ассирі́овъ и от Єги́пта, и Вавило́на и от єѳіо́піи, и от Єламі́товъ и от восто́ковъ со́лнца, и от Араві́и и от острово́въ морски́хъ.

И воздви́гнетъ зна́меніє въ язы́ки, и собере́тъ поги́бшыя Ізра́илевы, и расточе́нныя Іу́дины собере́тъ от четы́рехъ кри́лъ земли́.

И отъи́мется ре́вность Єфре́мова, и врази́ Іу́дины поги́бнутъ: Єфре́мъ не возревну́єтъ Іу́дѣ, и Іу́да не оскорби́тъ Єфре́ма.

И полетя́тъ въ корабле́хъ иноплеме́нничихъ, мо́ре ку́пно плѣня́тъ, и су́щихъ от восто́къ со́лнца, и Ідуме́ю: и на Моа́ва пе́рвѣє ру́ки возложа́тъ, сы́нове же Аммо́ни пе́рвіи покоря́тся.

И опустоши́тъ Госпо́дь мо́ре Єги́петскоє и возложи́тъ ру́ку свою́ на рѣку́ ду́хомъ преси́льнымъ: и порази́тъ на се́дмь де́брій, я́коже преходи́ти ю́ во обуве́ніи:

и бу́детъ проше́ствіє лю́демъ мои́мъ оста́вшымъ во Єги́птѣ, и бу́детъ Ізра́илю, я́коже въ де́нь, єгда́ изы́де от земли́ Єги́петскія.

И рече́ши въ де́нь о́ный: благословлю́ тя́, Го́споди, я́ко разгнѣ́вался єси́ на мя́, и отврати́лъ єси́ я́рость твою́ [от мене́], и поми́ловалъ мя́ єси́.

Се́, Бо́гъ мо́й Спа́съ мо́й, упова́я бу́ду на него́ и не убою́ся: зане́ сла́ва моя́ и похвала́ моя́ Госпо́дь, и бы́сть ми́ во спасе́ніє.

И почерпи́те во́ду со весе́ліємъ от исто́чникъ спасе́нія.

И рече́ши въ де́нь о́ный: хвали́те Го́спода, воспо́йте и́мя єго́, возвѣсти́те во язы́цѣхъ сла́вная єго́, помина́йте, я́ко вознесе́ся и́мя єго́.

Хвали́те и́мя Госпо́дне, я́ко высо́кая сотвори́: возвѣсти́те сія́ по все́й земли́.

Весели́теся и ра́дуйтеся, живу́щіи въ Сіо́нѣ, я́ко вознесе́ся святы́й Ізра́илевъ посредѣ́ тебе́.

Видѣ́ніє на Вавило́на, є́же ви́дѣ Иса́іа сы́нъ Амо́совъ.

На горѣ́ по́льнѣй воздви́гните зна́меніє, вознеси́те гла́съ и́мъ, не бо́йтеся, поуща́йте руко́ю, отве́рзите, кня́зи.

А́зъ повелѣва́ю, освяще́нни су́ть: и а́зъ веду́ и́хъ, исполи́ни и́дутъ испо́лнити я́рость мою́ ра́дующеся, вку́пѣ и укаря́юще.

Гла́съ язы́ковъ мно́гихъ на гора́хъ, подо́бенъ язы́ковъ мно́гихъ, гла́съ царе́й и язы́ковъ собра́вшихся: Госпо́дь Савао́ѳъ заповѣ́да язы́ку оружебо́рцу

пріити́ от земли́ издале́ча, от кра́я основа́нія небесе́, Госпо́дь и оружебо́рцы єго́, растли́ти всю́ вселе́нную.

Рыда́йте: бли́зъ бо де́нь Госпо́день, и сокруше́ніє от Бо́га пріи́детъ:

сего́ ра́ди вся́ка рука́ разслабѣ́єтъ, и вся́ка душа́ человѣ́ча убои́тся,

и смяту́тся послы́, и болѣ́зни пріи́мутъ я́ я́ко жены́ ражда́ющія: и поскорбя́тъ дру́гъ ко дру́гу, и ужа́снутся, и лице́ своє́ я́ко пла́мень измѣня́тъ.

Се́ бо, де́нь Госпо́день гряде́тъ неисцѣ́льный, я́рости и гнѣ́ва, положи́ти вселе́нную [всю́] пу́сту и грѣ́шники погуби́ти от нея́.

Звѣ́зды бо небе́сныя и орі́онъ и все́ украше́ніє небе́сноє свѣ́та своєго́ не дадя́тъ, и помрачи́тся со́лнце возсіява́ющеє, и луна́ не да́стъ свѣ́та своєго́.

И заповѣ́мъ все́й вселе́ннѣй зла́я и нечести́вымъ грѣхи́ и́хъ, и погублю́ укори́зну беззако́нныхъ и укори́зну го́рдыхъ смирю́:

и бу́дутъ оста́вшіи честні́и па́че, не́жели зла́то нежже́ноє, и человѣ́къ че́стенъ бу́детъ па́че, не́жели ка́мень, и́же от суфі́ра.

Разъяри́тся бо не́бо, и земля́ потрясе́тся от основа́ній свои́хъ, за я́рость гнѣ́ва Го́спода Савао́ѳа въ де́нь, въ о́ньже пріи́детъ я́рость єго́.

И бу́дутъ оста́вшіи я́ко се́рна бѣжа́щая и я́ко овца́ заблуди́вшая, и не бу́детъ собира́яй, я́ко человѣ́ку въ лю́ди своя́ возврати́тися, и человѣ́къ во страну́ свою́ побѣ́гнетъ.

И́же бо а́ще плѣни́тся, порази́тся, и и́же со́брани су́ть, мече́мъ паду́тъ.

И ча́да и́хъ предъ ни́ми разбію́тъ, и до́мы и́хъ плѣня́тъ, и жены́ и́хъ по́ймутъ.

Се́, а́зъ возбужда́ю на вы́ ми́довъ, и́же сребра́ не вмѣня́ютъ, ниже́ зла́та тре́буютъ:

стрѣля́нія ю́ношеская сокруша́тъ, и ча́дъ ва́шихъ не поми́луютъ, ниже́ пощадя́тъ ча́дъ твои́хъ о́чи и́хъ.

И бу́детъ Вавило́нъ, и́же нарица́єтся сла́вный от царя́ Халде́йска, я́коже разсы́па Бо́гъ Содо́му и Гомо́рру,

не насели́тся въ вѣ́чноє вре́мя, и не вни́дутъ въ о́нь чрезъ мно́гія ро́ды, ниже́ про́йдутъ єго́ Ара́вляне, ниже́ пастуси́ почі́ютъ въ не́мъ.

И почі́ютъ та́мо звѣ́ріє, и напо́лнятся до́мове шу́ма, и почі́ютъ ту́ Сі́рини, и бѣ́си та́мо воспля́шутъ,

и онокента́вры та́мо вселя́тся, и вогнѣздя́тся єже́ве въ домѣ́хъ и́хъ.

Ско́ро и́детъ и не уме́длитъ: и поми́луєтъ Госпо́дь Іа́кова и избере́тъ па́ки Ізра́иля, и почі́ютъ на земли́ своє́й, и пришле́цъ приложи́тся къ ни́мъ и приложи́тся къ до́му Іа́ковлю,

и по́ймутъ и́хъ язы́цы и введу́тъ на мѣ́сто и́хъ, и наслѣ́дятъ и умно́жатся на земли́ Бо́жіи въ рабы́ и рабы́ни: и бу́дутъ плѣне́ни плѣни́вшіи я́, и облада́ни бу́дутъ облада́вшіи и́ми.

И бу́детъ въ то́й де́нь, упоко́итъ тя́ Госпо́дь от болѣ́зни и я́рости твоєя́ и от рабо́ты жесто́кія, є́юже рабо́талъ єси́ и́мъ.

И пріи́меши пла́чь се́й {Євр.: при́тчу сію́.} на царя́ Вавило́нска и рече́ши въ то́й де́нь: ка́ко преста́ истязу́яй и преста́ понужда́яй?

Сокруши́ Бо́гъ яре́мъ грѣ́шниковъ, яре́мъ князе́й,

порази́въ язы́къ я́ростію, я́звою неисцѣ́льною, поража́яй язы́къ я́звою я́рости, є́юже не пощадѣ́, почи́ упова́ющи.

Вся́ земля́ вопіє́тъ со весе́ліємъ,

и древа́ Ліва́нова возвесели́шася о тебѣ́ и ке́дръ Ліва́нскій: оне́лѣже ты́ усну́лъ єси́, не взы́де посѣка́яй на́съ.

А́дъ до́лѣ огорчи́ся, срѣ́тъ тя́: воста́ша съ тобо́ю вси́ исполи́ни облада́вшіи земле́ю, подвиза́вшіи от престо́ловъ свои́хъ всѣ́хъ царе́й язы́ческихъ.

Вси́ отвѣща́ютъ и реку́тъ тебѣ́: и ты́ плѣне́нъ єси́, я́коже и мы́: и въ на́съ вмѣне́нъ єси́.

Сни́де сла́ва твоя́ во а́дъ, мно́гоє весе́ліє твоє́: подъ тобо́ю посте́лютъ гни́лость, и покро́въ тво́й че́рвь.

Ка́ко спаде́ съ небесе́ денни́ца восходя́щая зау́тра? сокруши́ся на земли́ посыла́яй ко всѣ́мъ язы́комъ.

Ты́ же ре́клъ єси́ во умѣ́ твоє́мъ: на не́бо взы́ду, вы́ше звѣ́здъ небе́сныхъ поста́влю престо́лъ мо́й, ся́ду на горѣ́ высо́цѣ, на гора́хъ высо́кихъ, я́же къ сѣ́веру:

взы́ду вы́ше о́блакъ, бу́ду подо́бенъ вы́шнему.

Ны́нѣ же во а́дъ сни́деши и во основа́нія земли́.

Ви́дѣвшіи тя́ удивя́тся о тебѣ́ и реку́тъ: се́й человѣ́къ раздража́яй зе́млю, потряса́яй цари́,

положи́вый вселе́нную всю́ пу́сту и гра́ды єя́ разсы́па, плѣне́ныхъ не разрѣши́.

Вси́ ца́ріє язы́ковъ успо́ша въ че́сти, кі́йждо въ дому́ своє́мъ.

Ты́ же пове́рженъ бу́деши въ гора́хъ, я́ко мертве́цъ ме́рзкій со мно́гими мертвецы́ изсѣ́чеными мече́мъ, сходя́щими во а́дъ.

Я́коже ри́за въ кро́ви намоче́на не бу́детъ чиста́, та́кожде и ты́ не бу́деши чи́стъ, зане́ зе́млю мою́ погуби́лъ єси́ и лю́ди моя́ изби́лъ єси́: не пребу́деши въ вѣ́чноє вре́мя, сѣ́мя зло́є.

Угото́ви ча́да твоя́ на убіє́ніє грѣха́ми отца́ твоєго́, да воста́нутъ и наслѣ́дятъ зе́млю и напо́лнятъ зе́млю ра́тьми.

И воста́ну на ня́, глаго́летъ Госпо́дь Савао́ѳъ, и погублю́ и́мя и́хъ, и оста́нокъ, и сѣ́мя: сія́ глаго́летъ Госпо́дь.

И положу́ Вавило́на пу́ста, я́ко вогнѣзди́тися єже́мъ, и бу́детъ ни во что́же: и положу́ и́ бре́нія про́пасть въ па́губу.

Сія́ глаго́летъ Госпо́дь Савао́ѳъ: я́коже глаго́лахъ, та́ко бу́детъ, и я́коже совѣща́хъ, та́ко пребу́детъ,

є́же погуби́ти Ассирі́анъ на земли́ моє́й и на гора́хъ мои́хъ: и бу́дутъ въ попра́ніє, и отъи́мется от ни́хъ яре́мъ и́хъ, и сла́ва {Євр.: бре́мя.} и́хъ от ра́менъ и́хъ отъи́мется.

Се́й совѣ́тъ, єго́же совѣща́ Госпо́дь на всю́ вселе́нную, и сія́ рука́ на вся́ язы́ки вселе́нныя:

я́же бо Бо́гъ святы́й совѣща́, кто́ разори́тъ? и ру́ку єго́ высо́кую кто́ отврати́тъ?

Въ лѣ́то, въ не́же у́мре Аха́зъ ца́рь, бы́сть глаго́лъ се́й:

не ра́дуйтеся, вси́ иноплеме́нницы, сокруши́ся бо яре́мъ бію́щаго вы́: от сѣ́мене бо зміи́на изы́дутъ исча́дія а́спідовъ, и исча́дія и́хъ изы́дутъ зміи́ паря́щіи:

и упасу́тся убо́зіи и́мъ, ни́щіи же человѣ́цы въ ми́рѣ почі́ютъ: и потреби́тъ гла́домъ сѣ́мя твоє́, и оста́нокъ тво́й избіє́тъ.

Воспла́читеся, врата́ градо́въ, да возопію́тъ гра́ды смяте́нніи, иноплеме́нницы вси́, зане́ ды́мъ от сѣ́вера и́детъ, и нѣ́сть, и́же пребу́детъ.

И что́ отвѣща́ютъ ца́ріє язы́ковъ? я́ко Госпо́дь основа́ Сіо́на, и тѣ́мъ спасу́тся смире́нніи люді́й єго́. И что́ отвѣща́ютъ ца́ріє язы́ковъ? я́ко Госпо́дь основа́ Сіо́на, и тѣ́мъ спасу́тся смире́нніи люді́й єго́. Сло́во на Моави́тскую зе́млю.

Но́щію поги́бнетъ Моаві́тска земля́, но́щію бо поги́бнетъ стѣна́ Моаві́тская.

Пла́читеся о себѣ́, поги́бнетъ бо и диво́нъ, идѣ́же тре́бище ва́ше: та́мо взы́дете пла́катися надъ Нава́вомъ Моаві́тскимъ. Пла́читеся, на вся́цѣй главѣ́ плѣ́шь, вся́ мы́шцы обсѣ́чены,

на сто́гнахъ єго́ препоя́шитеся во вре́тища, и воспла́читеся на хра́минахъ єго́ и на у́лицахъ єго́ и на сто́гнахъ єго́, вси́ возрыда́йте съ пла́чемъ.

Я́ко возопи́ єсево́нъ и Єлеала́, да́же до Іассы́ услы́шася гла́съ и́хъ: сего́ ра́ди чре́сла Моаві́тіды вопію́тъ, душа́ єя́ увѣ́сть.

Се́рдце Моаві́тіды вопіє́тъ въ не́й да́же до Сиго́ра: ю́ница бо є́сть трилѣ́тна. Въ возше́ствіи же луі́ѳа къ тебѣ́ пла́чущеся взы́дутъ путе́мъ Ароніи́млимъ: вопіє́тъ сотре́ніє и тру́съ.

Вода́ немрі́мля пуста́ бу́детъ, и трава́ єя́ оскудѣ́єтъ: травы́ бо зеле́ны не бу́детъ.

Єда́ и си́це спасе́тся? наведу́ бо на де́брь Ара́влянъ, и во́змутъ ю́:

пре́йде бо во́пль предѣ́лъ земли́ Моаві́тскія до агаллі́ма, и пла́чь єя́ да́же до кла́дязя Єлі́мля.

Вода́ бо дімо́ня напо́лнится кро́ве: наведу́ бо на дімо́на Ара́вляны, и возму́ сѣ́мя Моа́вле и Аріи́лево и оста́нокъ Адами́нь.

Послю́ а́ки га́ды на зе́млю: єда́ ка́мень пу́стъ є́сть гора́ дще́ре Сіо́ни {посли́те а́гнцы владу́щему земле́ю от ка́мене пусты́ни къ горѣ́ дще́ре Сіо́ни}?

Бу́деши бо а́ки пти́цы паря́щія птене́цъ отъя́тый, дщи́ Моа́вля, пото́мъ же Арно́нъ {Євр.: въ прохожде́ніи Арно́на.} мно́жайше совѣщава́й.

Сотвори́те покро́въ пла́ча єя́ при́сно: въ полу́деннѣй тмѣ́ бѣгу́тъ, ужасну́шася: да не отведе́шися,

обита́ти бу́дутъ въ тебѣ́ бѣглецы́ Моа́вли: бу́дутъ въ покрове́ніє ва́мъ от лица́ гоня́щаго, я́ко отъя́ся по́мощь твоя́, и кня́зь поги́бе попира́яй от земли́.

И испра́вится съ ми́лостію престо́лъ, и ся́детъ на не́мъ со и́стиною во ски́ніи даві́довѣ, судя́ и взыска́я су́дъ и ускоря́я пра́вду.

Слы́шахомъ укори́зну Моа́влю, укори́тель [бы́сть] зѣло́, горды́ню отъя́хъ: не та́ко волхвова́ніє твоє́, не та́ко.

Воспла́чется Моа́въ, въ Моаві́тідѣ бо вси́ воспла́чутся: живу́щымъ же въ се́ѳѣ помышле́нія, и не усрами́шися.

Поля́ єсево́ня возрыда́ютъ, віногра́дъ Севама́нь: пожира́ющіи язы́ковъ, попери́те віногра́ды єго́, да́же до Іази́ра: не совокупи́теся, обходи́те пусты́ню, по́сланніи оста́шася, проидо́ша бо мо́ре.

Сего́ ра́ди воспла́чуся я́ко пла́чемъ Іази́ровымъ о віногра́дѣ Севама́ни: древа́ твоя́ посѣче́ єсево́нъ и Єліала́, я́ко на жа́тву твою́ и на объима́ніє віна́ поперу́, и вся́ паду́тся.

И отъи́мется ра́дость и весе́ліє от віногра́довъ, и въ віногра́дѣхъ твои́хъ не возра́дуются, и не изгнету́тъ віна́ въ точи́лѣхъ, преста́ло бо є́сть:

сего́ ра́ди чре́во моє́ на Моа́ва а́ки гу́сли возгласи́тъ, и вну́тренняя моя́ а́ки стѣ́ну обнови́лъ єси́.

И бу́детъ въ посрамле́ніє тебѣ́, я́ко утруди́ся Моа́въ о тре́бищихъ, и вни́детъ въ рукотворе́нная своя́, да помо́лится, и не возмо́гутъ изба́вити єго́.

Сіє́ сло́во є́же глаго́ла Госпо́дь на Моа́ва, єгда́ возглаго́ла.

И ны́нѣ глаго́лю: въ тріє́хъ лѣ́тѣхъ лѣ́тъ нає́мника обезче́стится сла́ва Моа́вля во все́мъ бога́тствѣ мно́зѣ, и оста́вится ума́ленъ и нече́стенъ. И ны́нѣ глаго́лю: въ тріє́хъ лѣ́тѣхъ лѣ́тъ нає́мника обезче́стится сла́ва Моа́вля во все́мъ бога́тствѣ мно́зѣ, и оста́вится ума́ленъ и нече́стенъ. Сло́во, є́же на Дама́скъ.

Се́, Дама́скъ во́змется от градо́въ бу́детъ въ паде́ніє.

Оста́вленъ въ вѣ́къ, въ ло́же стада́мъ и въ поко́й, и не бу́детъ отгоня́яй.

И ксему́ не бу́детъ укрѣпле́нъ, є́же вбѣ́гнути та́мо Єфре́му: и ксему́ не бу́детъ ца́рство въ дама́сцѣ, и оста́нокъ Си́рянъ поги́бнетъ: нѣ́си бо ты́ лу́чшій от сыно́въ Ізра́илевыхъ и сла́вы и́хъ: сія́ глаго́летъ Госпо́дь Савао́ѳъ.

Бу́детъ въ то́й де́нь помраче́ніє сла́вы Іа́ковли, и ту́чная сла́вы єго́ потрясу́тся.

И бу́детъ, я́коже а́ще кто́ собира́єтъ жа́тву стоя́щую, и сѣ́мя кла́совъ пожина́єтъ: и бу́детъ, я́коже а́ще кто́ собира́єтъ кла́сы въ де́бри тве́рдѣ.

И оста́нется въ не́й сте́бліє, или́ а́ки зе́рна ма́слична двѣ́ или́ три́ на версѣ́ высо́цѣ, или́ четы́ре или́ пя́ть на вѣ́твіи єя́ оста́нутъ: сія́ глаго́летъ Госпо́дь Бо́гъ Ізра́илевъ.

Въ то́й де́нь упова́я бу́детъ человѣ́къ на сотво́ршаго и́, и о́чи єго́ ко свято́му Ізра́илеву воззря́тъ,

и не бу́дутъ упова́юще на тре́бища, ниже́ на дѣла́ ру́къ свои́хъ, я́же сотвори́ша пе́рсты и́хъ, и не бу́дутъ смотри́ти на дубра́вы, ниже́ на ме́рзости и́хъ.

Въ то́й де́нь бу́дутъ гра́ди твои́ оста́влени, я́коже оста́виша Аморре́є и Єве́є от лица́ сыно́въ Ізра́илевыхъ: и бу́дутъ пу́сти,

зане́ оста́вилъ єси́ Бо́га Спа́са твоєго́ и Го́спода помо́щника твоєго́ не помяну́лъ єси́: сего́ ра́ди насади́ши са́дъ невѣ́ренъ и сѣ́мя невѣ́рно.

Въ о́ньже бо де́нь а́ще насади́ши, прельсти́шися: а є́же а́ще зау́тра посѣ́єши, то́ процвѣте́тъ на жа́тву, во о́ньже де́нь наслѣ́диши, и а́ки оте́цъ человѣ́чь наслѣ́діє да́си сыно́мъ твои́мъ.

О, лю́тѣ мно́жеству язы́ковъ мно́гихъ! а́ки мо́ре волну́ющеєся, та́ко смяте́теся, и хребе́тъ язы́ковъ мно́гихъ я́ко вода́ возшуми́тъ:

а́ки вода́ мно́га язы́цы мно́зи, а́ки [шу́мъ] воды́ мно́гія ну́ждею носи́мыя: и отве́ржетъ єго́ и дале́че пожене́тъ єго́, а́ки пра́хъ пле́вный вѣ́ющихъ проти́ву вѣ́тра, и я́ко пра́хъ коле́сный бу́ря вознося́щая.

Къ ве́черу, и бу́детъ пла́чь: пре́жде зау́трія, и не бу́детъ: сія́ ча́сть плѣни́вшихъ ны́, и жре́бій наслѣ́дившихъ на́съ.

Го́ре корабе́лнымъ кри́ламъ земли́, я́же объ ону́ страну́ рѣ́къ єѳіо́пскихъ.

Посыла́яй по мо́рю послы́ въ зало́гъ и посла́нія кни́жная верху́ воды́: по́йдутъ бо вѣ́стницы ле́гцы ко язы́ку высо́ку и къ лю́демъ стра́ннымъ и стропти́вымъ. Кто́ да́лѣє и́хъ? язы́къ безнаде́женъ и попра́нъ.

Ны́нѣ рѣ́ки земны́я вся́ а́ки страна́ населе́на насели́тся, страна́ и́хъ а́ки зна́меніє от горы́ воздви́гнется, а́ки гла́съ трубы́ услы́шанъ бу́детъ.

Я́ко та́ко ми́ рече́ Госпо́дь: утвержде́ніє бу́детъ въ моє́мъ гра́дѣ, а́ки свѣ́тъ зно́я полу́деннаго и а́ки о́блакъ ро́сный въ де́нь жа́твы бу́детъ.

Пре́жде жа́твы, єгда́ соверши́тся цвѣ́тъ, и гре́знъ произы́детъ по цвѣ́тѣ недозрѣ́лъ: и отъи́метъ гро́здіє ма́лоє серпа́ми и ло́зіє отъи́метъ и посѣче́тъ,

и оста́витъ вку́пѣ пти́цамъ небе́снымъ и звѣре́мъ земны́мъ: и соберу́тся на ня́ пти́цы небе́сныя, и вси́ звѣ́ріє земли́ на́нь пріи́дутъ.

Въ то́ вре́мя принесу́тся да́ры Го́споду Савао́ѳу от люді́й оскорбле́ныхъ и отто́рженыхъ и от люді́й вели́кихъ, отны́нѣ и въ вѣ́чноє вре́мя: язы́къ надѣ́ющься и попра́нъ, и́же є́сть въ ча́сти рѣ́чнѣй страны́ своєя́, на мѣ́сто, идѣ́же и́мя Го́спода Савао́ѳа, на го́ру Сіо́ню. Въ то́ вре́мя принесу́тся да́ры Го́споду Савао́ѳу от люді́й оскорбле́ныхъ и отто́рженыхъ и от люді́й вели́кихъ, отны́нѣ и въ вѣ́чноє вре́мя: язы́къ надѣ́ющься и попра́нъ, и́же є́сть въ ча́сти рѣ́чнѣй страны́ своєя́, на мѣ́сто, идѣ́же и́мя Го́спода Савао́ѳа, на го́ру Сіо́ню. Видѣ́ніє на Єги́пта.

Се́, Госпо́дь сѣди́тъ на о́блацѣ ле́гцѣ и пріи́детъ во Єги́петъ, и потрясу́тся рукотворе́нная Єги́петская от лица́ єго́, и сердца́ и́хъ разсла́бнутъ въ ни́хъ.

И воста́нутъ Єги́птяне на Єги́птяны, и вооружи́тся человѣ́къ на бра́та своєго́, и вся́къ на бли́жняго своєго́, воста́нетъ гра́дъ на гра́дъ и зако́нъ на зако́нъ.

И возмяте́тся ду́хъ Єги́птянъ въ ни́хъ, и совѣ́тъ и́хъ разсы́плю, и вопро́сятъ бого́въ свои́хъ и кумі́ровъ свои́хъ, и глася́щихъ от земли́ и чревоволше́бниковъ.

И преда́мъ Єги́петъ въ ру́цѣ человѣ́ковъ вла́стелей же́стокихъ, и ца́ріє же́стоцы облада́ти бу́дутъ и́ми: сія́ глаго́летъ Госпо́дь Савао́ѳъ.

И испію́тъ Єги́птяне во́ду, я́же при мо́ри, а рѣка́ оскудѣ́єтъ и и́зсхнетъ.

И оскудѣ́ютъ рѣ́ки и рове́нницы рѣ́чніи: и и́зсхнетъ ве́сь со́нмъ водны́й, и во вся́цѣмъ лу́зѣ тро́стнѣмъ и си́тнѣмъ,

и зла́къ зеле́ный ве́сь и́же о́крестъ рѣки́, и все́ сѣ́ємоє при рѣцѣ́ по́схнетъ вѣ́тромъ растлѣ́нно.

И возстеня́тъ ры́баріє, и возстеня́тъ вси́ ме́щущіи у́дицу въ рѣку́, и ме́щущіи не́воды и ме́щущіи сѣ́ти возрыда́ютъ.

И сту́дъ пріи́метъ дѣ́лающихъ ле́нъ расче́саный и дѣ́лающихъ виссо́нъ, и бу́дутъ дѣ́лающіи я́ въ болѣ́зни,

и вси́ творя́щіи Сіке́ру опеча́лятся и поболя́тъ душа́ми.

И юро́диви бу́дутъ кня́зи тане́совы: му́дріи царе́вы совѣ́тницы, совѣ́тъ и́хъ обюро́дѣєтъ. Ка́ко рече́те царю́: сы́нове смы́сленыхъ мы́, сы́нове царе́й дре́внихъ?

Гдѣ́ су́ть ны́нѣ му́дріи твои́, и да возвѣстя́тъ тебѣ́ и реку́тъ: что́ совѣща́ Госпо́дь Савао́ѳъ на Єги́петъ?

Оскудѣ́ша кня́зи тане́совы, и вознесо́шася кня́зи мемфі́тстіи, и прельстя́тъ Єги́пта по племено́мъ.

Госпо́дь бо раствори́ и́мъ ду́хъ прельще́нія, и прельсти́ша Єги́пта всѣ́ми дѣлесы́ свои́ми, я́коже прельща́єтся пія́ный и ку́пно блю́ющь.

И не бу́детъ Єги́птяномъ дѣ́ла, є́же бы сотвори́ло главу́ и о́шибъ, и нача́ло и коне́цъ.

Въ то́й де́нь бу́дутъ Єги́птяне а́ки жены́ во стра́сѣ и тре́пете от лица́ руки́ Го́спода Савао́ѳа, ю́же то́й возложи́тъ на ня́.

И бу́детъ страна́ Іуде́йска во стра́хъ Єги́птяномъ: вся́къ, и́же а́ще воспомяне́тъ ю́ и́мъ, убоя́тся совѣ́та ра́ди, єго́же совѣща́ Госпо́дь Савао́ѳъ на́нь.

Въ то́й де́нь бу́детъ пя́ть градо́въ во Єги́птѣ, глаго́лющихъ язы́комъ ханаані́тскимъ и клену́щихся и́менемъ Го́спода Савао́ѳа: гра́дъ аседе́къ прозове́тся єди́нъ гра́дъ.

Въ то́й де́нь бу́детъ же́ртвенникъ Го́сподеви въ земли́ Єги́петстѣй и сто́лпъ въ предѣ́лѣхъ єго́ Го́сподеви.

И бу́детъ въ зна́меніє во вѣ́къ Го́сподеви въ земли́ Єги́петстѣй: я́ко возопію́тъ ко Го́споду на оскорбля́ющыя и́хъ, и по́слетъ и́мъ Госпо́дь человѣ́ка, и́же спасе́тъ я́, судя́й спасе́тъ я́.

И позна́нъ бу́детъ Госпо́дь Єги́птяномъ: и увѣ́дятъ Єги́птяне Го́спода въ то́й де́нь и сотворя́тъ же́ртвы и да́ры, и обѣща́ютъ обѣ́ты Го́сподеви и воздадя́тъ.

И порази́тъ Госпо́дь Єги́птянъ я́звою вели́кою и исцѣли́тъ и́хъ цѣльбо́ю, и обратя́тся ко Го́сподеви, и услы́шитъ и́хъ и исцѣли́тъ и́хъ цѣльбо́ю.

Въ то́й де́нь бу́детъ пу́ть от Єги́пта ко Ассирі́аномъ, и вни́дутъ Ассирі́ане во Єги́петъ, и Єги́птяне по́йдутъ ко Ассирі́аномъ, и порабо́таютъ Єги́птяне Ассирі́аномъ.

Въ то́й де́нь бу́детъ Ізра́иль тре́тій во Єги́птянѣхъ и во Ассирі́анѣхъ, благослове́нъ на земли́,

ю́же благослови́ Госпо́дь Савао́ѳъ, глаго́ля: благослове́ни лю́діє мои́, и́же во Єги́птѣ и и́же во Ассирі́ахъ, и наслѣ́діє моє́ Ізра́иль.

Въ лѣ́то, въ не́же вни́де танаѳа́нъ во азо́тъ, єгда́ по́сланъ бы́сть от Арны́, царя́ Ассирі́йскаго, и воєва́ на азо́тъ и взя́ єго́,

тогда́ рече́ Госпо́дь ко Иса́іи сы́ну Амо́сову, глаго́ля: иди́ и све́рзи вре́тище со чре́слъ свои́хъ, и санда́лія твоя́ иззу́й съ но́гъ твои́хъ, и сотвори́ си́це, ходя́ на́гъ и бо́съ.

И рече́ Госпо́дь: я́коже ходи́лъ ра́бъ мо́й Иса́іа на́гъ и бо́съ три́ лѣ́та, три́ лѣ́та бу́дутъ зна́менія и чудеса́ Єги́птяномъ и єѳіо́пляномъ:

я́ко та́кожде отведе́тъ ца́рь Ассирі́йскъ плѣ́нъ Єги́петскъ и єѳіо́пскъ, ю́ношы и ста́рцы, на́ги и бо́сы, открове́ны во стыдѣ́ніє Єги́пту.

И постыдя́тся побѣжде́ни Єги́птяне о єѳіо́плянѣхъ, на ни́хже упова́ху Єги́птяне, бя́ху бо и́мъ сла́ва.

И реку́тъ живу́щіи на о́стровѣ се́мъ въ де́нь о́ный: се́, мы́ бѣ́хомъ упова́юще бѣжа́ти къ ни́мъ на по́мощь, и́же не мого́ша спасти́ся от царя́ Ассирі́йска, и ка́ко мы́ спасе́мся? И реку́тъ живу́щіи на о́стровѣ се́мъ въ де́нь о́ный: се́, мы́ бѣ́хомъ упова́юще бѣжа́ти къ ни́мъ на по́мощь, и́же не мого́ша спасти́ся от царя́ Ассирі́йска, и ка́ко мы́ спасе́мся? Видѣ́ніє пусты́ни.

Я́коже бу́ря сквозѣ́ пусты́ню прохо́дитъ, от пусты́ни исходя́щая изъ земли́,

стра́шно видѣ́ніє и же́стоко повѣ́дася мнѣ́: преступа́яй преступа́єтъ, и беззако́ннуяй беззако́нствуєтъ: на мя́ Єламі́те, и послы́ пе́рсстіи на мя́ и́дутъ: ны́нѣ воздохну́ и утѣ́шу себе́.

Сего́ ра́ди напо́лнишася чре́сла моя́ разслабле́нія, и болѣ́зни прія́ша мя́ а́ки ражда́ющую: непра́вдовахъ є́же не слы́шати, потща́хся є́же не ви́дѣти.

Се́рдце моє́ заблужда́єтъ, и беззако́ніє погружа́єтъ мя́, душа́ моя́ стои́тъ во стра́сѣ.

Угото́вите трапе́зу, яди́те, пі́йте: воста́вше, кня́зи, угото́вите щиты́,

я́ко та́ко рече́ Госпо́дь ко мнѣ́: ше́дъ поста́ви себѣ́ стра́жа, и є́же а́ще у́зриши, возвѣсти́.

И узрѣ́хъ вса́дники ко́нныя два́, вса́дника на осля́ти и вса́дника на велблю́дѣ. Послу́шай слу́шаніємъ мно́гимъ

и призови́ урі́ю на стра́жбу Госпо́дню. И рече́: стоя́хъ вы́ну де́нь, и у по́лчища а́зъ стоя́хъ всю́ но́щь,

и се́, са́мъ гряде́тъ [му́жъ] вса́дникъ двоко́нный, и отвѣща́въ рече́: паде́, паде́ Вавило́нъ, и вси́ кумі́ры єго́ и вся́ рукотворе́нная єго́ сокруши́шася на земли́.

Послу́шайте, оста́вшіися, и болѣ́знующіи, услы́шите: є́же слы́шахъ от Го́спода Савао́ѳа, Бо́гъ Ізра́илевъ возвѣсти́ на́мъ.

Видѣ́ніє на Ідуме́ю. Ко мнѣ́ зови́ от Сиі́ра: стреги́те забра́ла.

Стрегу́ зау́тра и но́щію. А́ще и́щеши, ищи́ и у мене́ обита́й.

Въ дубра́вѣ въ ве́черъ преспи́ши, или́ на пути́ Деда́новѣ.

Во срѣ́теніє жа́ждущему во́ду принеси́те, живу́щіи во странѣ́ Ѳема́новѣ, со хлѣ́бы срѣта́йте бѣжа́щыя мно́жества ра́ди убіє́нныхъ

и мно́жества ра́ди заблужда́ющихъ, и мно́жества ра́ди мече́й и мно́жества ра́ди луко́въ напряже́нныхъ, и мно́жества ра́ди па́дшихъ на сѣ́чи.

Я́ко си́це рече́ Госпо́дь ко мнѣ́: єще́ лѣ́то [єди́но], я́коже лѣ́то нає́мника, оскудѣ́єтъ сла́ва сыно́въ Кида́рскихъ,

и оста́нокъ луко́въ си́льныхъ сыно́въ Кида́рскихъ бу́детъ ма́лъ, я́ко Госпо́дь Бо́гъ Изра́илевъ глаго́ла. и оста́нокъ луко́въ си́льныхъ сыно́въ Кида́рскихъ бу́детъ ма́лъ, я́ко Госпо́дь Бо́гъ Ізра́илевъ глаго́ла. Видѣ́ніє де́бри Сіо́ни.

Что́ бы́сть тебѣ́, я́ко ны́нѣ возлѣзо́сте вси́ на хра́мины тще́тныя?

Напо́лнися гра́дъ вопію́щихъ, уя́звленніи твои́ не мечьми́ уязвле́ни, ниже́ мертвецы́ твои́ умерщвле́ни ра́тію:

вси́ кня́зи твои́ побѣго́ша, и плѣне́нніи же́стоцѣ су́ть свя́зани, и крѣ́пцыи въ тебѣ́ дале́че отбѣжа́ша.

Сего́ ра́ди реко́хъ: оста́вите мене́, да го́рцѣ воспла́чуся: не належи́те утѣша́ти мя́ о сокруше́ніи дще́ре ро́да моєго́:

я́ко де́нь мяте́жа и па́губы и попра́нія, и смяте́ніє от Го́спода Савао́ѳа: въ де́бри Сіо́ни скита́ются, от ма́ла да́же до вели́ка скита́ются по гора́мъ.

Єламі́те же взя́ша ту́лы, и вса́дницы человѣ́цы на ко́нехъ, и собо́ръ ополче́нія.

И бу́дутъ избра́нны де́бри твоя́, напо́лнятся колесни́цъ, ко́нницы же засту́пятъ врата́ твоя́

и откры́ютъ врата́ Іу́дина, и воззря́тъ въ то́й де́нь во избра́нныя до́мы гра́да,

и откры́ютъ сокрове́нная домо́въ краєгра́дія даві́дова, и у́зрятъ, я́ко мно́жайшіи су́ть, и я́ко отврати́ша во́ду дре́внія купѣ́ли во гра́дъ,

и я́ко разори́ша до́мы Ієрусали́мли на утвержде́ніє стѣнѣ́ гра́днѣй.

И сотвори́сте себѣ́ во́ду между́ двѣма́ стѣна́ма, внутрьу́ду купѣ́ли дре́внія, и не воззрѣ́сте на сотвори́вшаго ю́ испе́рва, и согра́ждшаго ю́ не ви́дѣсте.

И призва́ Госпо́дь, Госпо́дь Савао́ѳъ въ то́й де́нь пла́чь и рыда́ніє, и остриже́ніє и препоя́саніє во вре́тища:

ті́и же сотвори́ша ра́дость и весе́ліє, закала́юще телцы́ и жру́ще о́вцы, я́ко я́сти мяса́ и пи́ти віно́, глаго́люще: да я́мы и піє́мъ, у́трѣ бо у́мремъ.

И открове́нна сія́ су́ть во у́шію Го́спода Савао́ѳа, я́ко не оста́вится ва́мъ то́й грѣ́хъ, до́ндеже у́мрете.

Си́це глаго́летъ Госпо́дь Савао́ѳъ: иди́ въ ку́щу ко сомна́ну строи́телю до́му и рцы́ єму́:

что́ ты́ здѣ́, и что́ тебѣ́ здѣ́, я́ко истеса́лъ єси́ себѣ́ здѣ́ гро́бъ и сотвори́лъ єси́ себѣ́ на высо́цѣ гро́бъ, и написа́лъ єси́ себѣ́ на ка́мени ку́щу?

Се́, ны́нѣ Госпо́дь Савао́ѳъ изве́ржетъ и сотре́тъ му́жа, и отъи́метъ у́тварь твою́ и вѣне́цъ тво́й сла́вный,

и пове́ржетъ тя́ во страну́ вели́ку и безмѣ́рну, и та́мо у́мреши: и положи́тъ колесни́цу твою́ до́брую въ безче́стіє и до́мъ кня́зя твоєго́ въ попра́ніє:

и изве́ржешися от строи́телства твоєго́ и от степе́не твоєго́.

И бу́детъ въ то́й де́нь, и призову́ раба́ моєго́ Єліакі́ма сы́на хелкі́єва

и облеку́ єго́ во у́тварь твою́, и вѣне́цъ тво́й да́мъ єму́ и держа́ву твою́, и строи́телство твоє́ да́мъ въ ру́цѣ єго́, и бу́детъ я́ко оте́цъ живу́щымъ во Ієрусали́мѣ и живу́щымъ во Іуде́и.

И да́мъ єму́ сла́ву даві́дову, и обвладѣ́єтъ, и не бу́детъ противоглаго́лющаго: и да́мъ єму́ клю́чь до́му даві́дова на ра́мо єго́, и отве́рзетъ, и не бу́детъ затворя́ющаго, и затво́ритъ, и не бу́детъ отверза́ющаго.

И поста́влю єго́ кня́зя на мѣ́стѣ вѣ́рнѣ, и бу́детъ на престо́лѣ сла́вы до́му отца́ своєго́.

И бу́детъ упова́яй на него́ вся́къ сла́вный въ дому́ отца́ єго́, от ма́ла да́же до вели́ка: и бу́дутъ зави́сяще на не́мъ.

Въ то́й де́нь, сія́ глаго́летъ Госпо́дь Савао́ѳъ, подви́гнется человѣ́къ утвержде́нъ на мѣ́стѣ вѣ́рнѣ, и отъи́мется, и паде́тъ, и потреби́тся сла́ва, я́же на не́мъ, я́ко Госпо́дь глаго́ла. Въ то́й де́нь, сія́ глаго́летъ Госпо́дь Савао́ѳъ, подви́гнется человѣ́къ утвержде́нъ на мѣ́стѣ вѣ́рнѣ, и отъи́мется, и паде́тъ, и потреби́тся сла́ва, я́же на не́мъ, я́ко Госпо́дь глаго́ла. Видѣ́ніє на ти́ра.

Пла́читеся, корабли́ кархидо́нстіи, я́ко поги́бе, и ктому́ не и́дутъ от земли́ китіє́йскія, отведе́ся плѣне́нъ.

Кому́ подо́бни бы́ша живу́щіи во о́стровѣ, купцы́ фі́нічестіи, преходя́щіи мо́ре?

Въ водѣ́ мно́зѣ сѣ́мя купе́ческо, а́ки жа́твѣ вноси́мѣй купцы́ язы́честіи.

Усрами́ся, Сідо́не, рече́ мо́ре. Крѣ́пость же морска́я рече́: не болѣ́хъ, ни породи́хъ, ни вскорми́хъ ю́ношъ, ниже́ вознесо́хъ дѣви́цъ.

Єгда́ же слы́шано бу́детъ во Єги́птѣ, пріи́метъ я́ болѣ́знь о ти́рѣ.

Иди́те въ кархидо́нъ, пла́читеся, живу́щіи во о́стровѣ се́мъ.

Не сіє́ ли бѣ́ велича́ніє ва́мъ испе́рва, пре́жде не́же пре́дану бы́ти єму́?

Кто́ сія́ совѣща́ на ти́ра? єда́ ху́ждшій є́сть, или́ не крѣ́пкій є́сть? купцы́ єго́ сла́вніи кня́зи земли́.

Госпо́дь Савао́ѳъ совѣща́ разсы́пати вся́кую горды́ню сла́вныхъ и обезче́стити вся́коє сла́вноє на земли́.

Дѣ́лай зе́млю твою́, и́бо корабли́ ктому́ не пріи́дутъ от кархидо́на.

И рука́ твоя́ ктому́ не укрѣпѣ́єтъ по мо́рю, разгнѣвля́ющая царе́й. Госпо́дь Савао́ѳъ заповѣ́да о Ханаа́нѣ, є́же погуби́ти крѣ́пость єго́.

И реку́тъ: ктому́ не приложи́те укаря́ти и оби́дѣти дще́рь Сідо́ню: и а́ще отъи́деши ко китіи́омъ, ниже́ та́мо бу́детъ тебѣ́ поко́й:

и въ зе́млю Халде́йску, но и та́ опустѣ́ла от Ассирі́анъ, я́ко стѣна́ єя́ паде́ся.

Пла́читеся, корабли́ кархидо́нстіи, я́ко поги́бе тверды́ня ва́ша.

И бу́детъ въ то́й де́нь, оста́вленъ бу́детъ ти́ръ се́дмьдесятъ лѣ́тъ, я́коже вре́мя [єди́наго] царя́, я́ко вре́мя человѣ́ческо: и по седми́десятихъ лѣ́тѣхъ бу́детъ ти́ръ я́ко пѣ́снь блудни́цы.

Возми́ гу́сли, обыди́ гра́дъ, блудни́ца забве́ная, до́брѣ погуди́, мно́го воспо́й, да па́мять твоя́ бу́детъ.

И бу́детъ по седми́десятихъ лѣ́тѣхъ, присѣще́ніє сотвори́тъ Бо́гъ ти́ру, и па́ки возста́вится на пре́жднеє и бу́детъ то́ржище всѣ́мъ ца́рствамъ вселе́нныя на лицы́ земли́.

И бу́детъ єго́ ку́пля и мзда́ свято Го́сподеви, не и́мъ со́брано бу́детъ, но живу́щымъ предъ Го́сподемъ, вся́ ку́пля єго́, я́сти и пи́ти и напо́лнитися, и въ сы́тость, на па́мять предъ Го́сподемъ.

Се́, Госпо́дь разсы́плетъ вселе́нную и опустоши́тъ ю́, и откры́єтъ лице́ єя́ и расточи́тъ живу́щыя на не́й.

И бу́дутъ лю́діє а́ки жре́цъ, и ра́бъ а́ки господи́нъ, и раба́ а́ки госпожа́: бу́детъ купу́яй я́ко продая́й, и взаи́мъ є́мляй а́ки заимода́вецъ, и до́лжный а́ки єму́же є́сть до́лженъ.

Тлѣ́ніємъ истлѣ́єтъ земля́, и расхище́ніємъ расхище́на бу́детъ земля́: уста́ бо Госпо́дня глаго́лаша сія́.

Воспла́кася земля́, и растлѣ́нна бы́сть вселе́нная, воспла́кашася высо́цыи земли́.

Земля́ бо беззако́ніє сотвори́ живу́щихъ ра́ди на не́й, поне́же преступи́ша зако́нъ и измѣни́ша за́повѣди, разруши́ша завѣ́тъ вѣ́чный.

Сего́ ра́ди прокля́тіє поя́стъ зе́млю, я́ко согрѣши́ша живу́щіи на не́й: сего́ ра́ди убо́зи бу́дутъ живу́щіи на земли́, и оста́нется человѣ́ковъ ма́ло.

Воспла́чется віно́, возрыда́єтъ віногра́дъ, возстену́тъ вси́ ра́дующіися душе́ю.

Преста́ло є́сть весе́ліє тимпа́новъ, преста́ высокоде́рзость и бога́тство нечести́выхъ, преста́лъ є́сть гла́съ гу́слей:

усрами́шася, не пи́ша віна́, горька́ бы́сть Сіке́ра пію́щымъ.

Опустѣ́ вся́къ гра́дъ, заключи́тъ хра́мъ, є́же не вни́ти.

Пла́читеся о вінѣ́ всю́ду, преста́ла є́сть ра́дость вся́ земна́я, отъи́де вся́ ра́дость земли́.

И оста́нутъ гра́ди пу́сти, и до́мове оста́влени поги́бнутъ.

Сія́ вся́ бу́дутъ на земли́ среди́ язы́ковъ: я́коже а́ще кто́ отряса́єтъ ма́сличину, та́ко отрясу́тъ и́хъ: и [я́коже] а́ще оста́нетъ от объима́нія віногра́да,

сі́и гла́сомъ возопію́тъ: оста́вшіися же на земли́ возра́дуются со сла́вою Госпо́днею, возмяте́тся вода́ морска́я.

Сего́ ра́ди сла́ва Госпо́дня во о́стровѣхъ бу́детъ морски́хъ, и́мя Госпо́дне просла́влено бу́детъ.

Го́споди Бо́же Ізра́илевъ, от кри́лъ земны́хъ чудеса́ слы́шахомъ, наде́жда благочести́вому: и реку́тъ: [го́ре ху́лящымъ, и́же ху́лятъ зако́нъ,] го́ре престу́пникомъ, и́же преступа́ютъ зако́нъ.

Стра́хъ и про́пасть и сѣ́ть на ва́съ живу́щихъ на земли́.

И бу́детъ, бѣжа́й стра́ха впаде́тъ въ про́пасть, и изла́зяй изъ про́пасти и́мется въ сѣ́ть: я́ко о́кна съ небесе́ отверзо́шася, и потрясу́тся основа́нія земна́я.

Мяте́жемъ возмяте́тся земля́, и ску́достію оскудѣ́єтъ земля́.

Преклони́ся и потрясе́ся земля́ а́ки ово́щноє храни́лище, и а́ки пія́нъ и шу́менъ паде́тъ и не возмо́жетъ воста́ти, преодолѣ́ бо на не́й беззако́ніє.

И бу́детъ въ то́й де́нь, наведе́тъ Госпо́дь на у́тварь небе́сную ру́ку и на цари́ земны́я.

И соберу́тъ собра́ніє єя́ и затворя́тъ въ тве́рди и въ темни́цы: мно́зѣми ро́ды бу́детъ посѣще́ніє и́хъ.

И иста́єтъ плі́нѳа и паде́тъ стѣна́, и устыди́тся луна́ и посрами́тся со́лнце: я́ко воцари́тся Госпо́дь въ Сіо́нѣ и во Ієрусали́мѣ и предъ старѣ́йшины сла́венъ бу́детъ.

Го́споди Бо́же мо́й, просла́влю тя́, воспою́ и́мя твоє́, я́ко сотвори́лъ єси́ чу́дная дѣла́, совѣ́тъ дре́вній и́стинный: да бу́детъ, Го́споди.

Я́ко положи́лъ єси́ гра́ды въ пе́рсть, гра́ды тве́рдыя, є́же па́сти основа́ніємъ и́хъ, нечести́выхъ гра́дъ да не сози́ждется во вѣ́къ.

Сего́ ра́ди благословя́тъ тя́ лю́діє ни́щіи, и гра́ди человѣ́ковъ оби́димыхъ возблагословя́тъ тя́.

Бы́лъ бо єси́ вся́кому гра́ду смире́нному помо́щникъ, и изнемога́ющымъ за оскудѣ́ніє покро́въ, от человѣ́къ злы́хъ изба́виши и́хъ: покро́въ жа́ждущихъ, и ду́хъ человѣ́ковъ оби́димыхъ.

А́ки человѣ́цы малоду́шніи жа́ждущіи въ Сіо́нѣ, я́ко изба́виши и́хъ от человѣ́къ нечести́выхъ, и́мже на́съ пре́далъ єси́.

И сотвори́тъ Госпо́дь Савао́ѳъ всѣ́мъ язы́комъ: на горѣ́ се́й испію́тъ ра́дость, испію́тъ віно́,

пома́жутся ми́ромъ на горѣ́ се́й: преда́ждь сія́ вся́ язы́комъ: то́й бо совѣ́тъ на вся́ язы́ки.

Пожре́ сме́рть {Євр.: поже́рта бу́детъ сме́рть} возмо́гши, и па́ки отъя́тъ Госпо́дь Бо́гъ вся́кую сле́зу от вся́каго лица́: поноше́ніє люді́й отъя́тъ от всея́ земли́, уста́ бо Госпо́дня глаго́лаша [сія́].

И реку́тъ въ де́нь о́ный: се́, Бо́гъ на́шъ, на́ньже упова́хомъ, и спасе́тъ на́съ: се́й Госпо́дь, потерпѣ́хомъ єго́, и возра́довахомся и возвесели́хомся о спасе́ніи на́шемъ.

Поко́й да́стъ Бо́гъ на горѣ́ се́й, и попере́тся Моаві́тіда, я́коже то́пчутъ то́къ колесни́цами.

И воздви́гнетъ ру́цѣ свои́, я́коже и то́й смири́, є́же погуби́ти: и смири́тъ горды́ню єго́, на ня́же ру́цѣ возложи́.

И высоту́ убѣ́жища огра́ды твоєя́ смири́тъ, и обни́зится да́же до земли́.

Въ то́й де́нь воспою́тъ пѣ́снь сію́ въ земли́ Іуде́йстѣй, глаго́люще: се́, гра́дъ крѣ́покъ, и спасе́ніє на́мъ положи́тъ стѣ́ну и огражде́ніє.

Отве́рзите врата́, да вни́дутъ лю́діє храня́щіи пра́вду и храня́щіи и́стину,

пріє́млющіи и́стину и храня́щіи ми́ръ.

Я́ко на тя́ надѣ́яніємъ надѣ́яшася, Го́споди, во вѣ́къ, Бо́же вели́кій, вѣ́чный,

и́же смири́въ низве́лъ єси́ живу́щыя въ высо́кихъ: гра́ды крѣ́пкія разори́ши и обни́зиши я́ да́же до земли́.

И поперу́тъ я́ но́ги кро́ткихъ и смире́нныхъ.

Пу́ть благочести́выхъ пра́въ бы́сть, и приугото́ванъ пу́ть благочести́выхъ.

Пу́ть бо Госпо́день су́дъ: упова́хомъ на и́мя твоє́ и па́мять, єя́же жела́єтъ душа́ на́ша.

От но́щи у́тренюєтъ ду́хъ мо́й къ тебѣ́, Бо́же, зане́ свѣ́тъ повелѣ́нія твоя́ на земли́: пра́вдѣ научи́теся, живу́щіи на земли́.

Преста́ бо нечести́вый: вся́къ, и́же не научи́тся пра́вдѣ на земли́, и́стины не сотвори́тъ: да во́змется нечести́вый, да не ви́дитъ сла́вы Госпо́дни.

Го́споди, высока́ твоя́ мы́шца, и не вѣ́дѣша, разумѣ́вше же постыдя́тся: ре́вность пріи́метъ лю́ди ненака́занныя, и ны́нѣ о́гнь супоста́ты поя́стъ.

Го́споди Бо́же на́шъ, ми́ръ да́ждь на́мъ, вся́ бо возда́лъ єси́ на́мъ.

Го́споди Бо́же на́шъ, стяжи́ ны: Го́споди, ра́звѣ тебе́ ино́го не вѣ́мы: и́мя твоє́ имену́ємъ.

Ме́ртвіи же живота́ не и́мутъ ви́дѣти, ниже́ вра́чеве воскреся́тъ: сего́ ра́ди наве́лъ єси́ и погуби́лъ єси́, и взя́лъ єси́ вся́къ му́жескъ по́лъ и́хъ.

Приложи́ и́мъ зла́, Го́споди, приложи́ зла́ сла́внымъ земли́.

Го́споди, въ ско́рби помяну́хомъ тя́, въ ско́рби ма́лѣ наказа́ніє твоє́ на́мъ.

И я́ко боля́щая приближа́єтся роди́ти и въ болѣ́зни своє́й воскрича́, та́ко бы́хомъ возлю́бленному твоєму́.

Стра́ха ра́ди твоєго́, Го́споди, во чре́вѣ прія́хомъ и поболѣ́хомъ, и роди́хомъ ду́хъ спасе́нія твоєго́, єго́же сотвори́хомъ на земли́: не паде́мся, но паду́тся вси́ живу́щіи на земли́.

Воскре́снутъ ме́ртвіи и воста́нутъ и́же во гробѣ́хъ, и возра́дуются и́же на земли́: роса́ бо, я́же от тебе́, исцѣле́ніє и́мъ є́сть, земля́ же нечести́выхъ паде́тъ.

Иди́те, лю́діє мои́, вни́дите во хра́мину ва́шу, затвори́те две́ри своя́, укры́йтеся ма́ло єли́ко єли́ко, до́ндеже мимои́детъ гнѣ́въ Госпо́день.

Се́ бо, Госпо́дь от свята́го [мѣ́ста] наво́дитъ гнѣ́въ на живу́щыя на земли́: и откры́єтъ земля́ кро́вь свою́ и не покры́єтъ избіє́ныхъ.

Въ то́й де́нь наведе́тъ Госпо́дь ме́чь святы́й и вели́кій и крѣ́пкій на дра́конта змі́а бѣжа́ща, на дра́конта змі́а лука́ваго, и убіє́тъ дра́конта су́щаго въ мо́ри.

Въ то́й де́нь віногра́дъ до́брый, жела́ніє пѣ́ти надъ ни́мъ:

а́зъ гра́дъ крѣ́пкій, гра́дъ вою́ємый, всу́є напою́ єго́: плѣне́нъ бо бу́детъ но́щію, въ де́нь же паде́тся стѣна́ єго́: нѣ́сть того́, и́же не во́зметъ єго́.

Кто́ мя приста́витъ стрещи́ сте́бліє на ни́вѣ? ра́ди вражды́ сея́ отри́нухъ и́. У́бо сего́ ра́ди сотвори́ Госпо́дь Бо́гъ вся́, єли́ка совѣща́.

И сгорѣ́хъ, возопію́тъ живу́щіи въ не́мъ: сотвори́мъ ми́ръ єму́, сотвори́мъ ми́ръ,

приходя́щая ча́да Іа́ковля: прозя́бнетъ и процвѣте́тъ Ізра́иль, и напо́лнится вселе́нная плода́ єго́.

Єда́ я́коже то́й порази́, и са́мъ си́це уязви́тся? и я́коже са́мъ уби́, та́кожде убіє́нъ бу́детъ?

Сваря́ся и укоря́я отпу́ститъ я́: не ты́ ли бы́лъ єси́ помышля́я ду́хомъ же́стокимъ, уби́ти я́ ду́хомъ я́рости?

Сего́ ра́ди отъи́мется беззако́ніє Іа́ковле, и сіє́ є́сть благослове́ніє єго́, єгда́ отиму́ грѣ́хъ єго́, єгда́ положа́тъ все́ ка́меніє тре́бищъ сокруше́но а́ки пра́хъ дро́бный: и не пребу́дутъ древеса́ и́хъ, и кумі́ры и́хъ бу́дутъ посѣ́чени, а́ки дубра́ва дале́че.

Обита́ющеє ста́до отпуще́нно бу́детъ, а́ки ста́до оста́вленоє: и бу́детъ мно́го вре́мя въ па́жить, и та́мо почі́ютъ стада́.

И по вре́мени не бу́детъ въ не́мъ вся́каго зла́ка, зане́же и́зсхнетъ: жены́ гряду́щыя съ позо́рища, пріиди́те: не су́ть бо лю́діє иму́ще смы́сла, сего́ ра́ди не уще́дритъ сотвори́вый я́, ниже́ созда́вый и́хъ поми́луєтъ.

И бу́детъ въ то́й де́нь, загради́тъ Госпо́дь от рове́нника рѣ́чнаго, да́же до рінокору́ры {Євр.: водоте́чи Єги́петскія.} [гра́да]: вы́ же собери́те сы́ны Ізра́илевы по єди́ному.

И бу́детъ въ то́й де́нь, востру́бятъ трубо́ю вели́кою, и пріи́дутъ погубля́єміи во странѣ́ Ассирі́йстѣй и погубля́єміи во Єги́птѣ, и покло́нятся Го́сподеви на горѣ́ святѣ́й во Ієрусали́мѣ.

Го́ре вѣнцу́ горды́ни, наи́мницы Єфре́мовы, цвѣ́тъ отпады́й от сла́вы, на версѣ́ горы́ ту́чныя пія́ніи безъ віна́.

Се́, крѣпка́ и же́стока я́рость Госпо́дня, а́ки гра́дъ низпуща́ємый не имы́й кро́ва, наси́льно низпуща́ємый: я́коже воды́ мно́гоє мно́жество влеку́щеє страну́, земли́ сотвори́тъ поко́й рука́ма,

и нога́ма попере́тся вѣне́цъ горды́ни, наи́мницы Єфре́мовы.

И бу́детъ цвѣ́тъ отпады́й от наде́жды сла́вы на версѣ́ горы́ высо́кія, а́ки ра́нній пло́дъ смо́квинъ: ви́дѣвый єго́, пре́жде взя́тія въ ру́цѣ свои́, восхо́щетъ поглоти́ти єго́.

Въ то́й де́нь бу́детъ Госпо́дь Савао́ѳъ вѣне́цъ наде́жди, сплете́ный сла́вою оста́вшымся лю́демъ.

И оста́вятся ду́хомъ су́днымъ на су́дъ, и крѣ́пость возбраня́ющихъ погубля́ти.

Сі́и бо віно́мъ су́ть прельще́ни: прельсти́шася Сіке́ры ра́ди, жре́цъ и проро́къ изступи́ша ума́ от Сіке́ры, поже́рты бы́ша віно́мъ, потрясо́шася от пія́нства Сіке́ры, прельсти́шася: сіє́ є́сть привидѣ́ніє.

Прокля́тіє поя́стъ се́й совѣ́тъ, се́й бо совѣ́тъ ра́ди лихои́мства.

Кому́ возвѣсти́хомъ зла́я и кому́ повѣ́дахомъ вѣ́сть? и́же отдоє́ніи [су́ть] от млека́, отто́рженніи от сосца́.

Печа́ли на печа́ль ожида́й, наде́жды къ наде́жди, єще́ ма́ло, єще́ ма́ло,

я́ко ху́достію усте́нъ, язы́комъ ины́мъ возглаго́лютъ лю́демъ си́мъ, реку́ще и́мъ:

се́й поко́й а́лчному и сіє́ сокруше́ніє, и не восхотѣ́ша слы́шати.

И бу́детъ и́мъ сло́во Го́спода Бо́га, печа́ль къ печа́ли, наде́жда къ наде́жди, єще́ ма́ло, єще́ ма́ло, да и́дутъ и паду́тся вспя́ть и въ бѣду́ впаду́тъ, и сокруша́тся и плѣне́ни бу́дутъ.

Сего́ ра́ди услы́шите сло́во Госпо́дне, му́жіє озло́бленніи и кня́зи люді́й су́щихъ во Ієрусали́мѣ.

Я́ко реко́сте: сотвори́хомъ завѣ́тъ со а́домъ и со сме́ртію сложе́ніє: бу́ря носи́ма а́ще мимои́детъ, не пріи́детъ на на́съ: положи́хомъ лжу́ наде́жду на́шу и лже́ю покры́ємся.

Сего́ ра́ди та́ко глаго́летъ Госпо́дь: се́, а́зъ полага́ю во основа́ніє Сіо́ну ка́мень многоцѣ́ненъ, избра́нъ, краєуго́ленъ, че́стенъ, во основа́ніє єму́, и вѣ́руяй въ о́нь не постыди́тся:

и положу́ су́дъ въ наде́жду, ми́лость же моя́ на мѣ́рилѣхъ, и упова́вшіи вотще́ на лжу́, я́ко не мине́тъ ва́съ бу́ря:

и не отъи́метъ от ва́съ завѣ́та сме́ртнаго, и наде́жда ва́ша, я́же ко а́ду, не пребу́детъ. Бу́ря иду́щая а́ще на́йдетъ, бу́дете є́й въ попра́ніє:

єгда́ мимои́детъ, во́зметъ ва́съ: я́ко по вся́ко у́тро преходи́ти бу́детъ въ де́нь, и въ нощи́ бу́детъ наде́жда зла́. Научи́теся слы́шати, утѣсня́єміи:

не мо́жемъ ра́товати, са́ми же изнемога́ємъ, є́же собра́тися на́мъ.

Я́коже гора́ на нечести́выхъ воста́нетъ Госпо́дь, и бу́детъ [я́коже] въ де́бри гавао́нстѣй, съ я́ростію сотвори́тъ дѣла́ своя́, го́рести дѣ́ло: я́рость же єго́ чу́ждо употреби́тся, и погубле́ніє єго́ стра́нно.

И вы́ не ра́дуйтеся, ниже́ да возмо́гутъ ва́ши у́зы: зане́ сконча́ны и сокраще́ны ве́щи слы́шахъ от Го́спода Савао́ѳа, я́же сотвори́тъ надъ все́ю земле́ю.

Внуши́те и слы́шите гла́съ мо́й, внемли́те и слы́шите словеса́ моя́.

Єда́ ве́сь де́нь бу́детъ оря́й ора́ти? или́ сѣ́мя угото́витъ пре́жде воздѣ́ланія земли́?

Не єгда́ ли умягчи́тъ {уравни́тъ} лице́ єя́, тогда́ всѣ́єтъ ма́ло черну́хи и кимі́на, пото́мъ же сѣ́єтъ пшени́цу и ячме́нь и про́со въ предѣ́лѣхъ твои́хъ?

И научи́шися суду́ Бо́га твоєго́ и возра́дуєшися.

И́бо не съ же́стокостію очища́єтся черну́ха, ниже́ ко́ло колесни́чноє обы́детъ кимі́на, но жезло́мъ истряса́єтся черну́ха, кимі́нъ же со хлѣ́бомъ снѣ́стся.

Не во вѣ́къ бо а́зъ разгнѣ́ваюся на вы́, ниже́ гла́съ гнѣ́ва моєго́ попере́тъ ва́съ.

И сія́ от Го́спода Савао́ѳа изыдо́ша чудеса́: совѣ́туйте, вознеси́те тще́тноє утѣше́ніє.

Го́ре гра́ду Аріи́лу, на́ньже даві́дъ воєва́. Собери́те жи́та от го́да до го́да, снѣ́сте бо вку́пѣ съ Моа́вомъ:

озло́блю бо Аріи́ла, и бу́детъ крѣ́пость єго́ и бога́тство мнѣ́:

и обся́ду тя́ а́ки даві́дъ, и поста́влю о́крестъ тебе́ остро́гъ, и согражду́ столпы́.

И смиря́тся словеса́ твоя́ до земли́, и въ зе́млю вни́дутъ словеса́ твоя́: и бу́детъ гла́съ тво́й а́ки глася́щихъ от земли́, и ко земли́ изнемо́жетъ гла́съ тво́й.

И бу́детъ я́ко пе́рсть от колесе́ бога́тство нечести́выхъ, и а́ки пра́хъ летя́й мно́жество утѣсня́ющихъ тя́, и бу́детъ а́ки черта́ внеза́пу от Го́спода Савао́ѳа.

Присѣще́ніє бо бу́детъ со гро́момъ и съ тру́сомъ и гла́сомъ вели́кимъ, бу́ря несо́ма и пла́мень о́гненный пояда́яй.

И бу́детъ а́ки со́ніє ви́дяй во снѣ́ но́щію, бога́тство всѣ́хъ язы́ковъ, єли́цы воєва́ша на Аріи́ла, и вси́, и́же воєва́ша на Ієрусали́ма, и вси́ со́бранніи на́нь и озлобля́ющіи єго́.

И бу́дутъ а́ки во снѣ́ яду́щіи и пію́щіи, и воста́вшымъ, то́щь и́хъ со́нъ: и я́коже во снѣ́ жа́ждай а́ки пія́й, воспряну́въ же єще́ жа́ждетъ, душа́ же єго́ вотще́ надѣ́яся: та́ко бу́детъ бога́тство всѣ́хъ язы́ковъ, єли́цы воєва́ша на го́ру Сіо́ню.

Разслабѣ́йте и ужасни́теся, и упі́йтеся не Сіке́ромъ, ни віно́мъ,

я́ко напои́ ва́съ Госпо́дь ду́хомъ умиле́нія, и смежи́тъ о́чи и́хъ и проро́ковъ и́хъ и князе́й и́хъ, ви́дящихъ сокрове́нная.

И бу́дутъ ва́мъ вся́ сія́ словеса́, а́ки словеса́ кни́ги запечатлѣ́нныя сея́, ю́же а́ще даду́тъ человѣ́ку вѣ́дущему писа́нія, глаго́люще: прочти́ сіє́. И рече́тъ: не могу́ прочести́, запечатлѣ́нна бо.

И да́стся кни́га сія́ въ ру́цѣ человѣ́ку не вѣ́дущему писа́нія, и рече́тся єму́: прочти́ сіє́. И рече́тъ: не вѣ́мъ писа́нія.

И рече́ Госпо́дь: приближа́ются мнѣ́ лю́діє сі́и усты́ свои́ми и устна́ми свои́ми почита́ютъ мя́, се́рдце же и́хъ дале́че отстои́тъ от мене́: всу́є же почита́ютъ мя́, уча́ще за́повѣдемъ человѣ́ческимъ и уче́ніємъ.

Сего́ ра́ди се́, а́зъ приложу́, є́же пресели́ти лю́ди сія́, и преста́влю я́, и погублю́ прему́дрость прему́дрыхъ и ра́зумъ разу́мныхъ сокры́ю.

Го́ре творя́щымъ глубо́ко совѣ́тъ, а не Го́сподемъ: го́ре въ та́йнѣ совѣ́тъ творя́щымъ, и бу́дутъ во тмѣ́ дѣла́ и́хъ, и реку́тъ: кто́ ны ви́дѣ, и кто́ ны уразумѣ́єтъ, я́же мы́ твори́мъ?

Не я́коже ли бре́ніє скуде́льника вмѣните́ся? Єда́ рече́тъ зда́ніє созда́вшему є́: не ты́ мя́ созда́лъ єси́? или́ творе́ніє сотво́ршему: не разу́мно мя́ сотвори́лъ єси́?

Не єще́ ли ма́ло, и приложи́тся Ліва́нъ, а́ки гора́ херме́ль, и херме́ль въ дубра́ву вмѣни́тся?

И услы́шатъ въ де́нь о́ный глусі́и словеса́ кни́ги [сея́], и и́же во тмѣ́ и и́же во мглѣ́ о́чи слѣпы́хъ у́зрятъ.

И возра́дуются ни́щіи ра́ди Го́спода въ весе́ліи, и отча́явшіися человѣ́цы испо́лнятся весе́лія.

Исчезе́ беззако́нникъ, и поги́бе го́рдый, и потреби́шася вси́ беззако́ннующіи во зло́бѣ

и творя́щіи согрѣша́ти человѣ́ки во сло́вѣ: всѣ́мъ же облича́ющымъ во вратѣ́хъ претыка́ніє положа́тъ, поне́же соврати́ша въ непра́вдахъ пра́веднаго.

Сего́ ра́ди та́ко глаго́летъ Госпо́дь на до́мъ Іа́ковль, єго́же опредѣли́ от Авраа́ма: не ны́нѣ постыди́тся Іа́ковъ, ниже́ ны́нѣ лице́ своє́ измѣни́тъ Ізра́иль:

но єгда́ уви́дятъ ча́да и́хъ дѣла́ моя́, мене́ ра́ди освятя́тъ и́мя моє́ и освятя́тъ свята́го Іа́ковля, и Бо́га Ізра́илева убоя́тся.

И уразумѣ́ютъ заблужда́ющіи ду́хомъ смы́слъ, и ро́пщущіи науча́тся послу́шати, и язы́цы нѣмотству́ющіи науча́тся глаго́лати ми́ръ.

Го́ре, ча́да отступи́вшая, сія́ глаго́летъ Госпо́дь: сотвори́сте совѣ́тъ не мно́ю и завѣ́ты не Ду́хомъ мои́мъ, приложи́ти грѣхи́ ко грѣхо́мъ:

иду́щіи сни́ти во Єги́петъ, мене́ же не вопроси́ша, є́же по́мощь имѣ́ти от фарао́на и заступле́ніє от Єги́птянъ.

Бу́детъ бо ва́мъ покро́въ фарао́новъ въ постыдѣ́ніє и упова́ющымъ на Єги́петъ укори́зна:

я́ко су́ть въ та́нѣ старѣ́йшины єго́, и вѣ́стницы єго́ зли́.

Вотще́ потрудя́тся люді́й ра́ди, и́же не упо́льзуютъ и́хъ, ниже́ на по́мощь, ниже́ на по́льзу, но на сту́дъ и на укори́зну.

Видѣ́ніє четвероно́гихъ, и́же въ пусты́ни. Въ печа́ли и въ тѣснотѣ́ ле́въ и льви́чищь: отту́ду а́спіды и пле́мя а́спідовъ паря́щихъ, и́же везя́ху на ослѣ́хъ и на велблю́дѣхъ бога́тство своє́ ко язы́ку, и́же не помо́жетъ и́мъ въ по́мощь, но на сту́дъ и укори́зну.

Єги́птяне вотще́ и всу́є успѣ́ютъ ва́мъ: возвѣсти́ и́мъ, я́ко тще́тно утѣше́ніє ва́ше сіє́.

Ны́нѣ у́бо сѣ́дъ напиши́ сія́ на дскѣ́ и въ кни́гу: я́ко бу́дутъ сія́ во дни́ време́нъ и да́же до вѣ́ка.

Я́ко лю́діє непокори́ви су́ть, сы́нове лжи́віи, и́же не похотѣ́ша слы́шати зако́на Бо́жія,

глаго́люще проро́комъ: не повѣ́дайте на́мъ: и видѣ́нія ви́дящымъ: не глаго́лите на́мъ, но на́мъ глаго́лите и возвѣща́йте на́мъ ино́є прельще́ніє

и соврати́те на́съ съ пути́ сего́: отими́те от на́съ пу́ть се́й и отими́те от на́съ су́дъ Ізра́илевъ {Євр.: свято́є Ізра́илево.}.

Того́ ра́ди си́це глаго́летъ Госпо́дь святы́й Ізра́илевъ: поне́же не покори́стеся словесе́мъ си́мъ и надѣ́ястеся на лжу́, и я́ко поропта́сте и упова́юще бы́сте на сло́во сіє́,

сего́ ра́ди бу́детъ ва́мъ грѣ́хъ се́й, а́ки стѣна́ па́дающая внеза́пу гра́да тве́рда плѣне́на, єго́же а́біє настои́тъ паде́ніє:

и паде́ніє єго́ бу́детъ я́ко сокруше́ніє сосу́да гли́няна, от гли́ны дро́бны, я́ко не мо́жно обрѣсти́ въ ни́хъ чре́па, и́мже о́гнь во́змеши и въ о́ньже вліє́ши воды́ ма́ло.

Та́ко глаго́летъ Госпо́дь, Госпо́дь святы́й Ізра́илевъ: єгда́ возврати́вся воздо́хнеши, тогда́ спасе́шися и уразумѣ́єши, гдѣ́ єси́ бы́лъ: єгда́ упова́лъ єси́ на су́єтная, тще́тна крѣ́пость ва́ша бы́сть, и не хотѣ́сте послу́шати,

но реко́сте: на ко́нехъ побѣ́гнемъ. Того́ ра́ди побѣ́гнете. И реко́сте: на ле́гкихъ вса́дницы бу́демъ. Того́ ра́ди ле́гцы бу́дутъ гоня́щіи ва́съ.

От гла́са єди́наго побѣ́гнутъ ты́сяща, и от гла́са пяти́ побѣ́гнутъ мно́зи, до́ндеже оста́влени бу́дете а́ки що́гла на горѣ́ и я́ко зна́мя нося́й на холмѣ́.

И па́ки пожде́тъ Бо́гъ, є́же уще́дрити ва́съ, и сего́ ра́ди вознесе́тся є́же поми́ловати ва́съ: зане́ судія́ Госпо́дь Бо́гъ ва́шъ є́сть, и гдѣ́ оста́вите сла́ву ва́шу? блаже́ни вси́ пребыва́ющіи въ не́мъ.

Зане́ лю́діє святі́и въ Сіо́нѣ вселя́тся, Ієрусали́мъ же пла́чемъ воспла́кася: поми́луй мя́. Поми́луєтъ тя́, єгда́ узрѣ́ гла́съ во́пля твоєго́, послу́ша тебе́.

И да́стъ Госпо́дь ва́мъ хлѣ́бъ печа́ли и во́ду тѣ́сную, и ктому́ не прибли́жатся къ тебѣ́ льстя́щіи тя́: я́ко о́чи твои́ у́зрятъ прельща́ющихъ тя́,

и ушеса́ твоя́ услы́шатъ словеса́ созади́ тебе́ прельща́ющихъ, и́же глаго́лютъ: се́й пу́ть, поиди́мъ по нему́ или́ на де́сно, или́ на лѣ́во.

И отве́ржеши кумі́ры посре́бренныя, и позлаще́нныя раздроби́ши, и развѣ́єши я́ко во́ду жены́ мѣ́сячныя, и а́ки моты́ла отве́ржеши я́.

Тогда́ бу́детъ до́ждь сѣ́мени земли́ твоєя́, и хлѣ́бъ жи́та земли́ твоєя́ бу́детъ изоби́ленъ и ту́ченъ, и напасу́тся ско́ти твои́ въ то́й де́нь на мѣ́стѣ ту́чнѣ и простра́ннѣ.

Юнцы́ ва́ши и воло́ве дѣ́лающіи зе́млю наядя́тся пле́въ смѣ́шенныхъ со ячме́немъ извѣ́янымъ.

И бу́детъ на вся́цѣй горѣ́ высо́цѣ и на вся́цѣмъ хо́лмѣ вознесе́ннѣ вода́ теку́щая въ де́нь о́ный, єгда́ поги́бнутъ мно́зи, и єгда́ паду́тся столпи́:

и бу́детъ свѣ́тъ луны́ а́ки свѣ́тъ со́лнца, и свѣ́тъ со́лнечный бу́детъ седмери́цею въ то́й де́нь, єгда́ исцѣли́тъ Госпо́дь сокруше́ніє люді́й свои́хъ и болѣ́знь я́звы твоєя́ исцѣли́тъ.

Се́, и́мя Госпо́дне и́детъ вре́менемъ мно́гимъ, горя́щая я́рость єго́: со сла́вою сло́во усте́нъ єго́, сло́во гнѣ́ва по́лно, и гнѣ́въ я́рости я́ко о́гнь поя́стъ:

и ду́хъ єго́ а́ки вода́ въ де́бри влеку́щи пріи́детъ да́же до вы́и и раздѣли́тся, є́же смути́ти язы́ки о прельще́ніи су́єтнѣмъ, и пожене́тъ я́ пре́лесть тща́, и во́зметъ я́ предъ лице́мъ и́хъ.

Єда́ при́сно подоба́єтъ ва́мъ ра́доватися и входи́ти во свята́я моя́ всегда́, а́ки пра́зднующымъ и я́ко веселя́щымся вни́ти со сопѣ́лію въ го́ру Госпо́дню къ Бо́гу Ізра́илеву?

И слы́шану сотвори́тъ Госпо́дь сла́ву гла́са своєго́, и я́рость мы́шцы своєя́ показа́ти, съ я́ростію и гнѣ́вомъ, и со пла́менемъ пояда́ющимъ возгреми́тъ зѣ́лно, и я́ко вода́ и гра́дъ низходя́щь ну́ждею.

Гла́сомъ бо Госпо́днимъ побѣжде́ни бу́дутъ Ассирі́ане я́звою, є́юже а́ще порази́тъ я́.

И бу́детъ єму́ о́крестъ, отону́дуже бѣ́ и́хъ наде́жда по́мощи, на ню́же то́й упова́ше: ті́и со тимпа́ны и гу́сльми ра́товати бу́дутъ на́нь от премѣне́нія.

Ты́ бо пре́жде дні́й истя́занъ бу́деши: єда́ и тебѣ́ угото́вася ца́рствовати? де́брь глубо́кую, древеса́ лежа́ща, о́гнь и древа́ мно́га, я́рость Госпо́дня а́ки де́брь жу́пеломъ горя́щая.

Го́ре сходя́щымъ во Єги́петъ по́мощи ра́ди, упова́ющымъ на ко́ни и на колесни́цы: су́ть бо мно́га, и ко́нническоє мно́жество мно́го зѣло́: и не бѣ́ша упова́юще на свята́го Ізра́илева, и Бо́га не взыска́ша.

То́йже прему́дрѣ наведе́ на ни́хъ зла́я, и сло́во єго́ не отри́нется, и воста́нетъ на до́мы человѣ́ковъ злы́хъ и на наде́жду и́хъ тще́тную,

Єги́птянина человѣ́ка, а не Бо́га, ко́нски пло́ти, и не бу́детъ по́мощи: Госпо́дь же наведе́тъ ру́ку свою́ на ня́, и утрудя́тся помага́ющіи, и вси́ вку́пѣ поги́бнутъ.

Зане́же та́ко рече́ мнѣ́ Госпо́дь: я́коже возреве́тъ ле́въ, или́ льви́чищь о лови́твѣ, ю́же и́метъ, и возопіє́тъ надъ не́ю, до́ндеже напо́лнятся го́ры гла́са єго́, и побѣди́шася и мно́жества я́рости убоя́шася: та́ко Госпо́дь Савао́ѳъ сни́детъ на го́ру Сіо́ню и на го́ры єго́ воєва́ти.

Я́коже пти́цы паря́щыя, си́це защи́титъ Госпо́дь Савао́ѳъ о Ієрусали́мѣ, защи́титъ и изба́витъ, и снабди́тъ и спасе́тъ.

Обрати́теся, совѣщава́ющіи глубо́къ совѣ́тъ и беззако́ненъ, сы́нове Ізра́илевы:

я́ко въ то́й де́нь отве́ргутъ человѣ́цы рукотворе́нная своя́ сре́бряная и рукотворе́нная злата́я, я́же сотвори́ша ру́ки и́хъ.

И паде́тъ Ассу́ръ не мече́мъ человѣ́ческимъ, ни ме́чь му́жескій поя́стъ єго́, и побѣ́гнетъ не от лица́ меча́: ю́ноты же бу́дутъ въ побѣжде́ніє.

Ка́меніємъ бо объи́мутся я́ко остро́гомъ и побѣжде́ни бу́дутъ, а бѣжа́й плѣне́нъ бу́детъ. Сія́ глаго́летъ Госпо́дь: [блаже́нъ,] и́же имѣ́єтъ пле́мя въ Сіо́нѣ и ю́жики во Ієрусали́мѣ.

Се́ бо, Ца́рь пра́ведный воцари́тся, и кня́зи со судо́мъ владѣ́ти начну́тъ.

И бу́детъ человѣ́къ сокрыва́яй словеса́ своя́, и скры́єтся, а́ки от воды́ носи́мыя: и яви́тся въ Сіо́нѣ я́ко рѣка́ теку́щая сла́вная въ земли́ жа́ждущей.

И ксему́ не бу́дутъ упова́юще на человѣ́ки, но у́шы вдадя́тъ на слы́шаніє,

и се́рдце изнемо́гшихъ во́нметъ послу́шати, и язы́цы нѣмотству́ющіи ско́ро науча́тся глаго́лати ми́ръ:

и ксему́ не реку́тъ юро́дивому владѣ́ти, и ксему́ не реку́тъ слуги́ твои́: молчи́.

Юро́дъ бо юро́дивая изрѣче́тъ, и се́рдце єго́ тще́тная уразумѣ́єтъ, є́же соверша́ти беззако́нная и глаго́лати на Го́спода пре́лесть, є́же растли́ти ду́шы а́лчныя и ду́шы жа́ждущыя тщы́ сотвори́ти.

Совѣ́тъ бо злы́хъ беззако́нная совѣщава́єтъ, растли́ти смире́нныя словесы́ непра́ведными и разсы́пати словеса́ смире́нныхъ на судѣ́.

Благочести́віи же смы́сленнѣ совѣща́ша, и то́й совѣ́тъ пребу́детъ.

Жены́ бога́тыя, воста́ните и услы́шите гла́съ мо́й: дще́ри, съ наде́ждею слы́шите словеса́ моя́:

дня́ лѣ́тняго па́мять сотвори́те въ болѣ́зни съ наде́ждею: потреби́ся объима́ніє ві́нноє, преста́ сѣ́яніє, и [собира́ніє] ктому́ не пріи́детъ.

Ужасни́теся, сжа́литеся, упова́вшыя, совлецы́теся, на́ги бу́дите, препоя́шите чре́сла своя́ во вре́тища

и въ пе́рси бі́йтеся о селѣ́ жела́ємѣмъ и о віногра́днѣмъ рожде́ніи.

На земли́ люді́й мои́хъ те́рніє и бы́ліє возни́кнетъ, и от всего́ до́му ра́дость восхи́тится: гра́дъ бога́тъ,

до́мове оста́вленніи, бога́тство гра́да и до́мы вожделѣ́нія оста́вятъ: и бу́дутъ ве́си пеще́ры до вѣ́ка, ра́дость осло́мъ ди́віимъ, па́ствы пастухо́въ:

до́ндеже на́йдетъ на ны́ Ду́хъ от вы́шняго, и бу́детъ пусты́ня въ херме́ль, а херме́ль въ дубра́ву вмѣни́тся.

И почі́єтъ въ пусты́ни су́дъ, и пра́вда въ карми́лѣ всели́тся:

и бу́дутъ дѣла́ пра́вды ми́ръ, и одержи́тъ пра́вда поко́й, и упова́юще бу́дутъ до вѣ́ка:

и вселя́тся лю́діє єго́ во гра́дѣ ми́ра и обита́ти бу́дутъ упова́юще, и почі́ютъ съ бога́тствомъ.

Гра́дъ же, а́ще сни́детъ, то́ не на вы́ пріи́детъ: и бу́дутъ живу́щіи въ дубра́вахъ упова́юще, я́коже су́щіи на поля́хъ.

Блаже́ни сѣ́ющіи при вся́цѣй водѣ́, идѣ́же во́лъ и осе́лъ попира́єтъ.

Го́ре оби́дящымъ ва́съ! ва́съ никто́же изоби́дитъ, и отверга́яй ва́съ не отве́ржетъ: плѣне́ни бу́дутъ отмета́ющіи [ва́съ] и предадя́тся, и я́ко мо́ліє въ ри́зѣ, та́ко побѣжде́ни бу́дутъ.

Го́споди, поми́луй ны́, на тя́ бо упова́хомъ: бы́сть пле́мя непокаря́ющихся въ па́губу, спасе́ніє же на́ше во вре́мя печа́ли.

Гла́сомъ стра́ха твоєго́ ужасо́шася лю́діє от стра́ха твоєго́, и разсѣ́яшася язы́цы.

Ны́нѣ же соберу́тся коры́сти ва́шя ма́лаго и вели́каго: я́коже а́ще кто́ собере́тъ пру́ги, та́ко наруга́ются ва́мъ.

Святъ Бо́гъ живы́й въ вы́шнихъ, напо́лнися Сіо́нъ суда́ и пра́вды.

Въ зако́нѣ предадя́тся, въ сокро́вищихъ спасе́ніє на́ше, та́мо прему́дрость и хи́трость и благоче́стіє ко Го́сподеви: сія́ су́ть сокро́вища пра́вды.

Се́, ны́нѣ во стра́сѣ ва́шемъ ті́и убоя́тся: и́хже боя́стеся, возопію́тъ от ва́съ: вѣ́стницы бо по́слани бу́дутъ го́рцѣ пла́чущеся, прося́ще ми́ра.

Опустѣ́ютъ бо си́хъ путіє́: преста́ стра́хъ язы́ковъ, и завѣ́тъ и́же къ ни́мъ взе́млется, и не вмѣните́ и́хъ въ человѣ́ки.

Воспла́кася земля́, посра́мленъ Ліва́нъ, бла́то бы́сть Са́ронь: явле́на бу́детъ Галіле́а и херме́ль.

Ны́нѣ воскре́сну, глаго́летъ Госпо́дь, ны́нѣ просла́влюся, ны́нѣ вознесу́ся.

Ны́нѣ у́зрите, ны́нѣ ощутите́, тще́тна бу́детъ крѣ́пость ду́ха ва́шего: о́гнь вы́ поя́стъ.

И бу́дутъ язы́цы пожже́ни, а́ки те́рніє на ни́вѣ разме́тано и пожже́но.

Услы́шатъ да́льніи, я́же сотвори́хъ, [глаго́летъ Госпо́дь,] увѣ́дятъ приближа́ющіися крѣ́пость мою́.

Отступи́ша, и́же въ Сіо́нѣ, беззако́нницы, пріи́метъ тре́петъ нечести́выя: кто́ возвѣсти́тъ ва́мъ, я́ко о́гнь гори́тъ? кто́ возвѣсти́тъ ва́мъ мѣ́сто вѣ́чноє?

Ходя́й въ пра́вдѣ, глаго́ляй пра́вый пу́ть, ненави́дяй беззако́нія и непра́вды и ру́цѣ оттряса́яй от даро́въ: отягчава́яй у́шы, да не услы́шитъ суда́ кро́ве: смежа́яй о́чи, да не у́зритъ непра́вды,

се́й всели́тся во высо́цѣ пеще́рѣ ка́мене крѣ́пкаго: хлѣ́бъ єму́ да́стся, и вода́ єго́ вѣ́рна.

Царя́ со сла́вою у́зрите, и о́чи ва́ши у́зрятъ зе́млю издале́ча,

душа́ ва́ша поучи́тся стра́ху Госпо́дню: гдѣ́ су́ть книго́чіи? гдѣ́ су́ть совѣщава́ющіи? гдѣ́ є́сть исчита́яй пита́ємыя ма́лы и вели́ки лю́ди?

И́мже не совѣща́ше, ниже́ вѣ́дяше глубо́кій гла́съ иму́щаго, я́ко не слы́шати лю́демъ уничтоже́нымъ, и нѣ́сть слы́шащему смы́сла.

Се́, Сіо́нъ гра́дъ, спасе́ніє на́ше, о́чи твои́ у́зрятъ, Ієрусали́ме, гра́де бога́тый, ку́щы не поколе́блются, ниже́ подви́гнутся ко́ліє хра́мины єго́ въ вѣ́чноє вре́мя, и у́жя єго́ не прето́ргнутся.

Я́ко и́мя Госпо́дне вели́ко ва́мъ є́сть, мѣ́сто ва́мъ бу́детъ, рѣ́ки и рове́нницы широ́цы и простра́нни: не по́йдеши по сему́ пути́, ниже́ по́йдетъ кора́бль плову́щь:

Бо́гъ бо мо́й вели́къ є́сть: не мине́тъ мене́ Госпо́дь судія́ на́шъ, Госпо́дь кня́зь на́шъ, Госпо́дь Ца́рь на́шъ, Госпо́дь то́й на́съ спасе́тъ.

Прерва́шася у́жя твоя́, я́ко не укрѣпи́шася: що́гла твоя́ преклони́ся, не распу́ститъ вѣ́трилъ, не воздви́гнетъ зна́менія, до́ндеже преда́стся на плѣне́ніє: тѣ́мже мно́зи хромі́и плѣ́нъ сотворя́тъ,

и не реку́тъ: тружда́ємся, лю́діє живу́щіи въ ни́хъ, оста́вися бо и́мъ грѣ́хъ.

Приступи́те, язы́цы, и услы́шите, кня́зи: да слы́шитъ земля́ и живу́щіи на не́й, вселе́нная и лю́діє, и́же на не́й.

Зане́ я́рость Госпо́дня на вся́ язы́ки и гнѣ́въ на число́ и́хъ, є́же погуби́ти и́хъ и преда́ти я́ на закла́ніє.

И я́звеніи и́хъ пове́ргнутся и мертвецы́, и взы́детъ и́хъ смра́дъ, и намо́кнутъ го́ры кро́вію и́хъ:

и иста́ютъ вся́ си́лы небе́сныя, и свіє́тся не́бо а́ки сви́токъ, и вся́ звѣ́зды спаду́тъ я́ко ли́ствіє съ лозы́, и я́коже спа́даєтъ ли́ствіє смоко́вницы.

Упи́ся ме́чь мо́й на небеси́: се́, на Ідуме́ю сни́детъ и на лю́ди па́губныя съ судо́мъ.

Ме́чь Госпо́день напо́лнися кро́ве, растолстѣ́ ту́комъ, от кро́ве козло́въ и а́гнцевъ и от ту́ка козло́въ и овно́въ: я́ко же́ртва Го́сподеви въ Восо́рѣ, и закла́ніє ве́ліє во Ідуме́и.

И паду́тъ съ ни́ми си́льніи, и овны́ и юнцы́, и упіє́тся земля́ от кро́ве и от ту́ка и́хъ насы́тится:

де́нь бо суда́ Госпо́дня, и лѣ́то воздая́нія суда́ Сіо́ня.

И обратя́тся де́бри єго́ въ смолу́, и земля́ єго́ въ жу́пелъ,

и бу́детъ земля́ єго́ горя́щи я́ко смола́ дне́мъ и но́щію, и не уга́снетъ въ вѣ́чноє вре́мя, и взы́детъ ды́мъ єя́ высо́цѣ, въ ро́ды своя́ опустѣ́єтъ.

И во вре́мя мно́го пти́цы и є́жеве, совы́ и вра́нове возгнѣздя́тся въ не́мъ: и возложа́тъ на́нь у́же землемѣ́рно пусты́ни, и онокента́ври вселя́тся въ не́мъ.

Кня́зи єго́ не бу́дутъ: ца́ріє бо и вельмо́жи єго́ бу́дутъ въ па́губу.

И возни́кнутъ во градѣ́хъ и́хъ терно́вая древеса́ и во тверды́нехъ єго́, и бу́дутъ селе́нія Сі́риномъ сели́ща струѳіо́номъ:

и сря́щутся бѣ́си со онокента́вры и возопію́тъ дру́гъ ко дру́гу, ту́ почі́ютъ онокента́ври, обрѣ́тше себѣ́ поко́ища:

та́мо возгнѣзди́тся є́жь, и сохрани́тъ земля́ дѣ́ти єго́ со утвержде́ніємъ: та́мо єле́ни срѣто́шася и уви́дѣша ли́ца дру́гъ дру́га.

Число́мъ преидо́ша, и єди́нъ от ни́хъ не поги́бе, дру́гъ дру́га не взыска́, я́ко Госпо́дь заповѣ́да и́мъ, и Ду́хъ єго́ собра́ я́.

И то́й ве́ржетъ и́мъ жре́бія, и рука́ єго́ раздѣли́ пасти́ся: въ вѣ́чноє вре́мя наслѣ́дите, въ ро́ды родо́въ почі́ютъ въ не́мъ.

Ра́дуйся, пусты́ня жа́ждущая, да весели́тся пусты́ня и да цвѣте́тъ я́ко крі́нъ.

И процвѣте́тъ и возвесели́тся пусты́ня Іорда́нова: и сла́ва Ліва́нова даде́ся є́й, и че́сть карми́лова, и у́зрятъ лю́діє мои́ сла́ву Госпо́дню и высоту́ Бо́жію.

Укрѣпи́теся, ру́цѣ осла́бленыя и колѣ́на разсла́бленая:

утѣ́шитеся, малоду́шніи умо́мъ, укрѣпи́теся, не бо́йтеся: се́, Бо́гъ на́шъ су́дъ воздає́тъ и возда́стъ, то́й пріи́детъ и спасе́тъ на́съ.

Тогда́ отве́рзутся о́чи слѣпы́хъ, и у́ши глухи́хъ услы́шатъ.

Тогда́ ско́читъ хромы́й я́ко єле́нь, и я́сенъ бу́детъ язы́къ гугни́выхъ: я́ко прото́ржеся вода́ въ пусты́ни и де́брь въ земли́ жа́ждущей.

И безво́дная бу́детъ во єзе́ра, и на жа́ждущей земли́ исто́чникъ водны́й бу́детъ: та́мо бу́детъ весе́ліє пти́цамъ, и сели́тва тро́сти, и лу́зи.

И та́мо бу́детъ пу́ть чи́стъ, и пу́ть свя́тъ нарѣче́тся: и не пре́йдетъ та́мо нечи́стый, ниже́ бу́детъ та́мо пу́ть нечи́стъ: разсѣ́янніи же по́йдутъ по нему́ и не заблу́дятъ.

И не бу́детъ та́мо льва́, ни от звѣре́й злы́хъ не взы́детъ на́нь, ниже́ обря́щется та́мо, но по́йдутъ по нему́ изба́вленніи:

и со́бранніи Го́сподемъ обратя́тся и пріи́дутъ въ Сіо́нъ съ ра́достію, и ра́дость вѣ́чная надъ главо́ю и́хъ: надъ главо́ю бо и́хъ хвала́ и весе́ліє, и ра́дость пріи́метъ я́, отбѣже́ болѣ́знь и печа́ль и воздыха́ніє.

И бы́сть во четвертоєна́десять лѣ́то ца́рствующу єзекі́и, взы́де сеннахирі́мъ ца́рь Ассирі́йскъ на гра́ды тве́рды іуде́йски и взя́ о́ныя.

И посла́ ца́рь Ассирі́йскъ рапса́ка от лахі́са во Ієрусали́мъ ко царю́ єзекі́и съ си́лою вели́кою, и ста́ у водова́жды купѣ́ли вы́шнія на пути́ села́ кнафе́ова {бѣли́лнича}.

И изы́де къ нему́ Єліакі́мъ сы́нъ хелкі́євъ домострои́тель, и сомна́съ книго́чій, и Іоа́хъ сы́нъ Аса́фовъ памятопи́сецъ.

И рече́ и́мъ рапса́къ: рцы́те єзекі́и: сія́ глаго́летъ ца́рь вели́кій, ца́рь Ассирі́йскъ: на что́ упова́єши?

єда́ совѣ́томъ и словесы́ у́стными би́тва быва́єтъ? и ны́нѣ на кого́ упова́єши, я́ко не покаря́єшися мнѣ́?

се́, упова́єши на же́злъ тро́стянъ сокруше́нный се́й, на Єги́петъ, на него́же а́ще опре́тся му́жъ, вни́детъ въ ру́ку єго́ и прободе́тъ ю́: та́ко є́сть фарао́нъ ца́рь Єги́петскій, и вси́ упова́ющіи на него́:

а́ще же глаго́лете, на Го́спода Бо́га на́шего упова́ємъ: не се́й ли є́сть, єго́же разори́ єзекі́а высо́кая и тре́бища єго́, и заповѣ́да Іу́дѣ и Ієрусали́му: предъ олтаре́мъ си́мъ поклони́теся?

ны́нѣ соєдини́теся господи́ну моєму́ царю́ Ассирі́йску, и да́мъ ва́мъ двѣ́ ты́сящы ко́ней, а́ще мо́жете да́ти всѣда́ющыя на ни́хъ:

и ка́ко мо́жете отврати́ти лице́ воєво́ды єди́наго? раби́ су́ть, и́же упова́ютъ на Єги́птянъ, на ко́ней и вса́дниковъ:

и ны́нѣ єда́ безъ Го́спода пріидо́хомъ на страну́ сію́, воєва́ти на ню́? Госпо́дь рече́ ко мнѣ́: взы́ди на зе́млю сію́ и погуби́ ю́.

И рече́ къ нему́ Єліакі́мъ и сомна́съ книго́чій и Іоа́хъ: глаго́ли къ рабо́мъ твои́мъ Си́рски, разумѣ́ємъ бо мы́, а не глаго́ли къ на́мъ Іуде́йски: и вску́ю глаго́леши во у́шы человѣ́комъ сѣдя́щымъ на стѣнѣ́?

И рече́ къ ни́мъ рапса́къ: єда́ ко господи́ну ва́шему, или́ къ ва́мъ посла́ мя господи́нъ мо́й глаго́лати словеса́ сія́? не къ человѣ́комъ ли сѣдя́щымъ на огра́дѣ, да ядя́тъ моты́ла и пію́тъ мо́чь съ ва́ми вку́пѣ?

И ста́ рапса́къ, и возопи́ гла́сомъ ве́ліимъ Іуде́йски и рече́: слы́шите словеса́ царя́ вели́каго, царя́ Ассирі́йска:

сія́ глаго́летъ ца́рь: да не прельща́єтъ ва́съ єзекі́а словесы́, не мо́жетъ изба́вити ва́съ:

и да не глаго́летъ ва́мъ єзекі́а, я́ко изба́витъ вы́ Бо́гъ, и не преда́стся гра́дъ се́й въ ру́цѣ царя́ Ассирі́йска:

не слу́шайте єзекі́и: сія́ глаго́летъ ца́рь Ассирі́йскій: а́ще хо́щете благослове́ни бы́ти, изыди́те ко мнѣ́ и яди́те кі́йждо віногра́дъ сво́й и смо́кви, и пі́йте от пото́ка ва́шего,

до́ндеже пріиду́ и поиму́ вы́ въ зе́млю, я́же а́ки ва́ша земля́, земля́ пшени́цы и віна́ и хлѣ́бовъ и віногра́довъ:

да не прельща́єтъ ва́съ єзекі́а, глаго́ля: Бо́гъ ва́шъ изба́витъ вы́: єда́ изба́виша бо́зи язы́честіи, кі́йждо страну́ свою́ от руки́ царя́ Ассирі́йска?

гдѣ́ є́сть бо́гъ Єма́ѳовъ и Арфа́ѳовъ? и гдѣ́ бо́гъ гра́да Сепфарі́ма? єда́ возмого́ша изба́вити самарі́ю от руки́ моєя́?

кто́ от бого́въ всѣ́хъ язы́ковъ си́хъ, и́же изба́ви зе́млю свою́ от руки́ моєя́, я́ко изба́витъ Бо́гъ Ієрусали́ма от руки́ моєя́?

И умолко́ша, и никто́же отвѣща́ єму́ словесе́, повелѣ́нія ра́ди царе́ва, да никто́же отвѣща́єтъ.

И вни́де Єліакі́мъ сы́нъ хелкі́євъ домострои́тель, и сомна́съ книго́чій си́лы, и Іоа́хъ сы́нъ Аса́фовъ памятопи́сецъ ко єзекі́и въ расте́рзаныхъ ри́захъ и повѣ́даша єму́ словеса́ рапса́кова.

И бы́сть єгда́ услы́ша ца́рь єзекі́а, растерза́ ри́зы и облече́ся во вре́тище и вни́де во хра́мъ Госпо́день:

и посла́ Єліакі́ма домострои́теля, и со́мну книго́чія, и старѣ́йшины жре́чески оболче́ны во вре́тища ко Иса́іи проро́ку сы́ну Амо́сову.

И реко́ша єму́: сія́ глаго́летъ єзекі́а: де́нь печа́ли и укори́зны и обличе́нія и гнѣ́ва дне́шній де́нь, поне́же пріи́де болѣ́знь ражда́ющей, крѣ́пости же не имѣ́єтъ роди́ти:

да услы́шитъ Госпо́дь Бо́гъ тво́й словеса́ рапса́кова, я́же посла́ ца́рь Ассирі́йскій, господи́нъ єго́, укаря́ти Бо́га жива́го и поноси́ти словесы́, я́же слы́ша Госпо́дь Бо́гъ тво́й, и да помо́лишися ко Го́сподеви Бо́гу твоєму́ о оста́вшихся си́хъ.

И пріидо́ша о́троцы царя́ єзекі́и ко Иса́іи.

И рече́ и́мъ Иса́іа: си́це рцы́те ко господи́ну ва́шему: сія́ глаго́летъ Госпо́дь: не убо́йся от слове́съ, я́же єси́ слы́шалъ, и́миже укори́ша мя́ послы́ царя́ Ассирі́йска:

се́, а́зъ вложу́ въ него́ ду́хъ, и услы́шавъ вѣ́сть возврати́тся во страну́ свою́ и паде́тъ мече́мъ на своє́й земли́.

И возврати́ся рапса́къ и обрѣ́те царя́ Ассирі́йскаго облежа́ща ловну́: и услы́ша ца́рь Ассирі́йскъ, я́ко отъи́де от лахі́са,

и изы́де Ѳарака́ ца́рь єѳіо́пскій воєва́ти на́нь: и услы́шавъ возврати́ся и посла́ послы́ ко єзекі́и, глаго́ля:

си́це рцы́те єзекі́и царю́ Іуде́йску: да не прельща́єтъ Бо́гъ тво́й тебе́, на него́же упова́я єси́, глаго́ля, я́ко не преда́стся Ієрусали́мъ въ ру́цѣ царя́ Ассирі́йска:

или́ не слы́шалъ єси́ ты́, что́ сотвори́ша ца́ріє Ассирі́йстіи, ка́ко всю́ зе́млю погуби́ша, и ты́ ли изба́вишися?

єда́ изба́виша си́хъ бо́зи язы́честіи, и́хже погуби́ша отцы́ мои́, гоза́нъ и Харра́нъ и расе́мъ, и́же су́ть во странѣ́ Ѳеєма́ѳи?

гдѣ́ су́ть ца́ріє Єма́ѳовы, и гдѣ́ Арфа́ѳовы, и гдѣ́ гра́да єпфарує́ма, Анагуга́на?

И взя́ єзекі́а кни́гу от посло́въ и прочте́ ю́, и вни́де во хра́мъ Госпо́день и отве́рзе ю́ предъ Го́сподемъ.

И помоли́ся єзекі́а ко Го́сподеви, глаго́ля:

Го́споди Савао́ѳъ, Бо́же Ізра́илевъ, сѣдя́й на херуві́мѣхъ, ты́ єси́ Бо́гъ єди́нъ Ца́рь вся́каго ца́рства вселе́нныя, ты́ сотвори́лъ єси́ не́бо и зе́млю:

приклони́, Го́споди, у́хо твоє́, услы́ши, Го́споди, отве́рзи, Го́споди, о́чи твои́, при́зри, Го́споди, и ви́ждь и слы́ши вся́ словеса́ сеннахирі́мля, я́же посла́ укаря́ти Бо́га жива́го:

пои́стиннѣ бо, Го́споди, пу́сту сотвори́ша ца́ріє Ассирі́йстіи всю́ зе́млю и страны́ и́хъ,

и вверго́ша кумі́ры и́хъ во о́гнь, не бѣ́ша бо бо́зи, но дѣла́ ру́къ человѣ́ческихъ, древа́ и ка́меніє, и погуби́ша я́:

ны́нѣ же, Го́споди Бо́же на́шъ, спаси́ ны от руки́ и́хъ, да увѣ́дятъ вся́ ца́рствія земна́я, я́ко ты́ єси́ [Госпо́дь] Бо́гъ єди́нъ.

И по́сланъ бы́сть Иса́іа сы́нъ Амо́совъ ко єзекі́и и рече́ єму́: сія́ глаго́летъ Госпо́дь Бо́гъ Ізра́илевъ: слы́шахъ, о ни́хже моли́лся єси́ ко мнѣ́ о сеннахирі́мѣ цари́ Ассирі́йстѣмъ.

Сіє́ сло́во, є́же глаго́ла о не́мъ Бо́гъ: поху́ли тя́ и поруга́ся тебѣ́ дѣви́ца дщи́ Сіо́ня, на тя́ главо́ю покива́ дщи́ Ієрусали́мля:

кого́ укори́лъ и разгнѣ́валъ єси́? или́ къ кому́ возвы́силъ єси́ гла́съ тво́й, и не воздви́глъ єси́ на высоту́ оче́съ твои́хъ? ко свято́му Ізра́илеву!

я́ко посла́ми укори́лъ єси́ Го́спода, ты́ бо ре́клъ єси́: мно́жествомъ колесни́цъ а́зъ взыдо́хъ на высоту́ го́ръ и на послѣ́дняя Ліва́на, и посѣко́хъ высоту́ ке́дра єго́ и добро́ту кипарі́сову, и внидо́хъ въ высоту́ ча́сти дубра́вныя

и положи́хъ мо́стъ, и опустоши́хъ во́ды и все́ собра́ніє водно́є:

не слы́шалъ ли єси́ издре́вле си́хъ, я́же а́зъ сотвори́хъ? от дре́внихъ дні́й совѣща́хъ, ны́нѣ же показа́хъ опустоши́ти язы́ки въ тверды́нехъ и живу́щыя во тве́рдыхъ градѣ́хъ:

опусти́хъ ру́цѣ, и изсхо́ша и бы́ша а́ки су́хо сѣ́но на кро́вѣхъ и а́ки тро́скотъ:

ны́нѣ же поко́й тво́й и исхо́дъ тво́й и вхо́дъ тво́й а́зъ вѣ́мъ,

я́рость же твоя́, є́юже разгнѣ́вался єси́, и огорче́ніє твоє́ взы́де ко мнѣ́, и вложу́ брозду́ въ но́здри твоя́ и узду́ во уста́ твоя́, и возвращу́ тя путе́мъ, и́мже єси́ прише́лъ.

Сіє́ же тебѣ́ зна́меніє: я́ждь сего́ лѣ́та, є́же єси́ всѣ́ялъ, а во второ́є лѣ́то, є́же от себе́ расте́тъ: а въ тре́тіє насѣ́явше по́жнете и насадите́ віногра́ды и снѣ́сте плоды́ и́хъ:

и бу́дутъ оста́вшіи во Іуде́и, прорастя́тъ коре́ніє до́лу и сотворя́тъ въ ве́рхъ пло́дъ,

я́ко от Ієрусали́ма бу́дутъ оста́вшіися и спа́сшіися от горы́ Сіо́ни: ре́вность Го́спода Савао́ѳа сотвори́тъ сія́.

Сего́ ра́ди та́ко глаго́летъ Госпо́дь на царя́ Ассирі́йска: не вни́детъ въ се́й гра́дъ, ниже́ пу́ститъ на́нь стрѣлу́, ниже́ возложи́тъ на́нь щита́, ниже́ огради́тъ о́крестъ єго́ огражде́нія:

но путе́мъ, и́мже пріи́де, тѣ́мже возврати́тся, и во гра́дъ се́й не вни́детъ. Сія́ глаго́летъ Госпо́дь:

защищу́ гра́дъ се́й, є́же спасти́ єго́ мене́ ра́ди и ра́ди даві́да раба́ моєго́.

И изы́де а́нгелъ Госпо́день и изби́ от полка́ Ассирі́йска сто́ о́смьдесятъ пя́ть ты́сящъ. И воста́вше зау́тра, обрѣто́ша вся́ тѣлеса́ ме́ртва.

И отъи́де возвра́щься сеннахирі́мъ ца́рь Ассирі́йскій и всели́ся во Ніневі́і.

И внегда́ покланя́тися єму́ въ дому́ насара́ху отечествонача́лнику своєму́, Адрамеле́хъ и сараса́ръ сы́нове єго́ уби́ста єго́ мечьми́, са́ми же убѣжа́ста во Арме́нію. И воцари́ся Асорда́нъ сы́нъ єго́ вмѣ́сто єго́.

Бы́сть же въ то́ вре́мя, разболѣ́ся єзекі́а до сме́рти. И пріи́де къ нему́ Иса́іа проро́къ сы́нъ Амо́совъ и рече́ къ нему́: сія́ глаго́летъ Госпо́дь: устро́й о до́мѣ твоє́мъ, умира́єши бо ты́ и не бу́деши жи́въ.

И обрати́ єзекі́а лице́ своє́ ко стѣнѣ́ и помоли́ся ко Го́сподеви глаго́ля:

помяни́, Госпо́дь, ка́ко ходи́хъ предъ тобо́ю со и́стиною и се́рдцемъ и́стиннымъ, и уго́дная предъ тобо́ю сотвори́хъ. И пла́кася єзекі́а пла́чемъ вели́кимъ.

И бы́сть сло́во Госпо́дне ко Иса́іи глаго́ля:

иди́ и рцы́ єзекі́и: та́ко глаго́летъ Госпо́дь Бо́гъ даві́да отца́ твоєго́: услы́шахъ моли́тву твою́ и ви́дѣхъ сле́зы твоя́, се́, прилага́ю къ лѣ́томъ твои́мъ лѣ́тъ пятьна́десять,

и от руки́ царя́ Ассирі́йска изба́влю тя́ и гра́дъ се́й, и защищу́ о гра́дѣ се́мъ:

сіє́ же тебѣ́ зна́меніє от Го́спода, я́ко Бо́гъ сотвори́тъ глаго́лъ се́й, я́коже глаго́ла:

се́, а́зъ возвращу́ сѣ́нь степе́ней, и́миже сни́де со́лнце де́сять степе́ней до́му отца́ твоєго́, возвращу́ со́лнце де́сять степе́ней, и́миже сни́де сѣ́нь. И взы́де со́лнце де́сять степе́ней, и́миже сни́де сѣ́нь.

Моли́тва єзекі́и царя́ Іуде́йска, єгда́ болѣ́ и воста́ от неду́га своєго́.

А́зъ реко́хъ въ высотѣ́ дні́й мои́хъ: пойду́ во врата́ а́дова, оста́влю лѣ́та про́чая.

Реко́хъ: ктому́ не узрю́ спасе́нія Бо́жія на земли́ живы́хъ, ктому́ не узрю́ спасе́нія Ізра́илева на земли́, ктому́ не узрю́ человѣ́ка со живу́щими:

оста́хъ от сродства́ моєго́, оста́вихъ про́чеє живота́ моєго́, изы́де и отъи́де от мене́ а́ки разруша́яй ку́щу поткну́вый: а́ки платно́ ду́хъ мо́й во мнѣ́ бы́сть, тка́телницѣ приближа́ющейся отрѣ́зати.

Въ то́й де́нь пре́данъ бы́хъ до зау́тра а́ки льву́, та́ко сокруши́ вся́ ко́сти моя́: от дне́ бо до но́щи пре́данъ бы́хъ.

Я́ко ла́стовица, та́ко возопію́, и я́ко го́лубь, та́ко поучу́ся: исчезо́стѣ бо о́чи мои́, є́же взира́ти на высоту́ небе́сную ко Го́споду, и́же изба́ви мя́ и отъя́ болѣ́знь души́ моєя́:

и то́й сотвори́ путево́дство во вся́ лѣ́та моя́.

Го́споди, о то́й бо возвѣсти́ся тебѣ́, и воздви́глъ єси́ дыха́ніє моє́, и утѣ́шився ожи́хъ.

Изба́вилъ бо єси́ ду́шу мою́, да не поги́бнетъ, и заве́рглъ єси́ за мя́ вся́ грѣхи́ моя́.

Не похва́лятъ бо тебе́, и́же во а́дѣ, ни уме́ршіи возблагословя́тъ тя́, и не надѣ́ются, и́же во а́дѣ, ми́лости твоєя́.

Живі́и же возблагословя́тъ тя́, я́коже и а́зъ: отдне́сь бо дѣ́ти сотворю́, я́же возвѣстя́тъ пра́вду твою́,

Го́споди спасе́нія моєго́: и не преста́ну благословя́ тя съ пѣ́снію вся́ дни́ живота́ моєго́ пря́мо до́му Бо́жію.

И рече́ Иса́іа ко єзекі́и: возми́ от смо́квій и сотри́, и приложи́ пла́стырь на я́зву и здра́въ бу́деши.

И рече́ єзекі́а: сіє́ зна́меніє, я́ко взы́ду въ до́мъ Бо́жій.

Въ то́ вре́мя посла́ мерода́хъ Валада́нъ сы́нъ Валада́новъ, ца́рь Вавило́нскій, писа́нія и послы́ и да́ры єзекі́и: слы́ша бо, я́ко болѣ́лъ є́сть до сме́рти и воста́.

И обра́довася о ни́хъ єзекі́а ра́достію вели́кою, и показа́ и́мъ до́мъ арома́товъ и ми́ра, и ста́кти и ѳиміа́ма, и сребра́ и зла́та, и вся́ до́мы сосу́довъ сокро́вищныхъ, и вся́ єли́ка бя́ху во сокро́вищихъ єго́: и не оста́ ничто́же, єго́же не показа́ и́мъ єзекі́а въ дому́ своє́мъ и во все́й о́бласти своє́й.

И пріи́де Иса́іа проро́къ ко єзекі́и царю́ и рече́ къ нему́: что́ глаго́лютъ сі́и му́жіє, и отку́ду пріидо́ша къ тебѣ́? И рече́ єзекі́а: от земли́ дале́кія пріидо́ша ко мнѣ́, от Вавило́на.

И рече́ Иса́іа: что́ ви́дѣша въ дому́ твоє́мъ? И рече́ єзекі́а: вся́, єли́ка въ дому́ моє́мъ, ви́дѣша, и нѣ́сть въ дому́ моє́мъ, єго́же бы не ви́дѣли, но и я́же въ сокро́вищихъ мои́хъ.

И рече́ єму́ Иса́іа: послу́шай словесе́ Го́спода Савао́ѳа:

се́, дні́є гряду́тъ, глаго́летъ Госпо́дь, и во́змутъ вся́, я́же въ дому́ твоє́мъ, и єли́ка собра́ша отцы́ твои́ да́же до дне́ сего́, въ Вавило́нъ пре́йдутъ, и ничесо́же оста́вятъ:

рече́ Госпо́дь, я́ко и от ча́дъ твои́хъ, и́хже роди́лъ єси́, по́ймутъ и сотворя́тъ ка́женики въ дому́ царя́ Вавило́нска.

И рече́ єзекі́а ко Иса́іи: благо сло́во Госпо́дне, є́же глаго́ла: да бу́детъ ны́нѣ ми́ръ и пра́вда во дни́ моя́.

Утѣша́йте, утѣша́йте лю́ди моя́, глаго́летъ Бо́гъ:

свяще́нницы, глаго́лите въ се́рдце Ієрусали́му, утѣша́йте и́, я́ко напо́лнися смире́ніє єго́, разрѣши́ся грѣ́хъ єго́, я́ко прія́тъ от ру́ки Госпо́дни сугу́бы грѣхи́ своя́.

Гла́съ вопію́щаго въ пусты́ни: угото́вайте пу́ть Госпо́день, пра́вы сотвори́те стези́ Бо́га на́шего:

вся́ка де́брь напо́лнится, и вся́ка гора́ и хо́лмъ смири́тся, и бу́дутъ вся́ стро́потная въ пра́во, и о́страя въ пути́ гла́дки.

И яви́тся сла́ва Госпо́дня, и у́зритъ вся́ка пло́ть спасе́ніє Бо́жіє, я́ко Госпо́дь глаго́ла.

Гла́съ вопію́щаго: возопі́й. И реко́хъ: что́ возопію́? вся́ка пло́ть сѣ́но, и вся́ка сла́ва человѣ́ча я́ко цвѣ́тъ травны́й:

и́зсше трава́, и цвѣ́тъ отпаде́,

глаго́лъ же Бо́га на́шего пребыва́єтъ во вѣ́ки.

На го́ру высо́ку взы́ди, благовѣству́яй Сіо́ну, возвы́си крѣ́постію гла́съ тво́й, благовѣству́яй Ієрусали́му: возвы́сите, не бо́йтеся. Рцы́ градо́мъ Іу́динымъ:

се́, Бо́гъ ва́шъ, се́, Госпо́дь, Госпо́дь со крѣ́постію и́детъ, и мы́шца єго́ со вла́стію: се́, мзда́ єго́ съ ни́мъ, и дѣ́ло єго́ предъ ни́мъ:

а́ки па́стырь упасе́тъ па́ству свою́, и мы́шцею своє́ю собере́тъ а́гнцы, и иму́щыя во утро́бѣ утѣ́шитъ.

Кто́ измѣ́ри го́рстію во́ду и не́бо пя́дію и всю́ зе́млю го́рстію? кто́ поста́ви го́ры въ мѣ́рилѣ и хо́лмы въ вѣ́сѣ?

кто́ уразумѣ́ у́мъ Госпо́день, и кто́ совѣ́тникъ єму́ бы́сть, и́же науча́єтъ єго́?

или́ съ ки́мъ совѣ́това, и наста́ви и́? или́ кто́ показа́ єму́ су́дъ? или́ пу́ть разумѣ́нія кто́ показа́ єму́? или́ кто́ пре́жде даде́ єму́, и возда́стся єму́?

А́ще вси́ язы́цы, а́ки ка́пля от ка́ди, и я́ко претяже́ніє вѣ́са вмѣни́шася, и а́ки плюнове́ніє вмѣня́тся?

Дубра́ва же Ліва́нова не дово́лна на сожже́ніє, и вся́ четвероно́гая не дово́лна на всесожже́ніє.

И вси́ язы́цы я́ко ничто́же су́ть, и въ ничто́же вмѣни́шася.

Кому́ уподо́бисте Го́спода, и ко́єму подо́бію уподо́бисте єго́?

Єда́ о́бразъ сотвори́ древодѣ́латель, или́ зла́тарь слія́въ зла́то позлати́ єго́, или́ подо́біємъ сотвори́ єго́?

Дре́во бо негнію́щеє избира́єтъ древодѣ́латель и му́дрѣ и́щетъ, ка́ко поста́витъ о́бразъ єго́, и да не поколе́блется.

Не разумѣ́сте ли, не слы́шасте ли, не возвѣсти́ся ли ва́мъ испе́рва? не разумѣ́сте ли основа́нія земли́?

Содержа́й кру́гъ земли́, и живу́щіи на не́й а́ки пру́зи: поста́вивый не́бо я́ко кама́ру и просте́ръ є́, я́ко ски́нію обита́ти:

дая́й кня́зи а́ки ничто́же владѣ́ти, и зе́млю а́ки ничто́же сотвори́.

Не насадя́тъ бо, ниже́ насѣ́ютъ, и не вкорени́тся въ земли́ коре́ніє и́хъ: дхну́ на ни́хъ вѣ́тръ, и изсхо́ша, и бу́ря а́ки сте́бліє во́зметъ и́хъ.

Ны́нѣ у́бо кому́ мя уподо́бисте, и вознесу́ся? рече́ святы́й.

Воззри́те на высоту́ очи́ма ва́шима и ви́дите, кто́ сотвори́ сія́ вся́: нося́й по числу́ у́тварь свою́, и вся́ по и́мени прозове́тъ от мно́гія сла́вы и въ держа́вѣ крѣ́пости своєя́: ничто́же утаи́ся от тебе́.

Єда́ бо рече́ши, Іа́кове, и что́ глаго́лалъ єси́, Ізра́илю: утаи́ся пу́ть мо́й от Бо́га, и Бо́гъ мо́й су́дъ отъя́, и отступи́?

И ны́нѣ не уразумѣ́лъ ли єси́? ни ли́ слы́шалъ єси́? Бо́гъ вѣ́чный, Бо́гъ устро́ивый концы́ земли́, не вза́лчетъ, ниже́ утруди́тся, ниже́ є́сть изобрѣ́теніє прему́дрости єго́,

дая́й а́лчущымъ крѣ́пость и неболѣ́зненнымъ печа́ль.

Вза́лчутъ бо юнѣ́йшіи, и утрудя́тся ю́ноты, и избра́нніи не крѣ́пцы бу́дутъ:

терпя́щіи же Го́спода измѣня́тъ крѣ́пость, окрыла́тѣютъ а́ки орли́, потеку́тъ и не утрудя́тся, по́йдутъ и не вза́лчутъ.

Обновля́йтеся ко мнѣ́, о́строви, кня́зи бо измѣня́тъ крѣ́пость: да прибли́жатся и да глаго́лютъ вку́пѣ, тогда́ су́дъ да возвѣща́ютъ.

Кто́ возста́ви от восто́къ пра́вду, призва́ ю́ къ нога́мъ свои́мъ, и по́йдетъ? да́стъ предъ язы́ки, и цари́ ужаси́тъ: и пове́ржетъ на зе́млю мечы́ и́хъ, и а́ки сте́бліє отве́ржени лу́цы и́хъ,

и прожене́тъ я́, и про́йдетъ съ ми́ромъ пу́ть но́гъ єго́.

Кто́ содѣ́ла и сотвори́ сія́? призва́ ю́ призыва́яй ю́ от нача́ла родо́въ. А́зъ Бо́гъ пе́рвый, и въ гряду́щая а́зъ є́смь.

Ви́дѣша язы́цы и убоя́шася, концы́ земні́и прибли́жишася и пріидо́ша вку́пѣ.

Судя́й кі́йждо бли́жнему, и бра́ту помощи́, и рече́тъ:

превозмо́же му́жъ древодѣ́латель, и кова́чь бія́й мла́томъ, вку́пѣ прокова́яй: овогда́ у́бо рече́тъ: спая́ніє добро́ є́сть, утверди́ша я́ гвоздьми́, положа́тъ я́, и не подви́гнутся.

Ты́ же, Ізра́илю, ра́бе мо́й, Іа́кове, єго́же избра́хъ, сѣ́мя Авраа́мле, єго́же возлюби́хъ,

єго́же поя́хъ от коне́цъ земли́, и от стра́жбъ єя́ призва́хъ тя́, и реко́хъ ти́: ра́бъ мо́й єси́, избра́хъ тя́, и не оста́вихъ тебе́:

не бо́йся, съ тобо́ю бо є́смь, не прельща́ю: а́зъ бо є́смь Бо́гъ тво́й, укрѣпи́вый тя́, и помого́хъ ти́, и утверди́хъ тя́ десни́цею моє́ю пра́ведною:

се́, постыдя́тся и посра́мятся вси́ сопротивля́ющіися тебѣ́, бу́дутъ бо я́ко не су́щіи, и поги́бнутъ вси́ сопе́рницы твои́:

взы́щеши и́хъ, и не обря́щеши человѣ́ковъ, и́же поруга́ются тебѣ́: бу́дутъ бо а́ки не бы́вшіи и не бу́дутъ ра́тующіи тебе́.

Я́ко а́зъ Бо́гъ тво́й держа́й десни́цу твою́, глаго́ляй тебѣ́:

не бо́йся, Іа́кове, ма́лый Ізра́илю, а́зъ помого́хъ ти́, глаго́летъ Бо́гъ тво́й, избавля́яй тя́ святы́й Ізра́илевъ:

се́, сотвори́хъ тя́ а́ки коле́са колесни́чная но́вая, стира́ющая а́ки пила́, и сотре́ши го́ры, и истончи́ши хо́лмы, и а́ки пра́хъ положи́ши,

и извѣ́єши, и вѣ́тръ во́зметъ я́, и бу́ря развѣ́єтъ я́: ты́ же возвесели́шися во святы́хъ Ізра́илевыхъ.

И возра́дуются убо́зіи и неиму́щіи: пои́щутъ бо воды́, и не бу́детъ, язы́къ и́хъ от жа́жди и́зсше. А́зъ Госпо́дь Бо́гъ, а́зъ услы́шу и́хъ, Бо́гъ Ізра́илевъ, и не оста́влю и́хъ,

но отве́рзу на гора́хъ рѣ́ки и среди́ по́ля исто́чники, сотворю́ пусты́ню въ лу́ги водны́я и жа́ждущую зе́млю въ водоте́чы,

положу́ въ безво́дную зе́млю ке́дръ и сме́рчіє, и мирсі́ну и кипарі́съ и топо́лю:

да у́зрятъ и уразумѣ́ютъ, и помы́слятъ и увѣ́дятъ вку́пѣ, я́ко рука́ Госпо́дня сотвори́ сія́ вся́, и святы́й Ізра́илевъ показа́.

Приближа́єтся су́дъ ва́шъ, глаго́летъ Госпо́дь Бо́гъ: прибли́жишася совѣ́ти ва́ши, глаго́летъ Ца́рь Іа́ковль.

Да прибли́жатся и возвѣстя́тъ ва́мъ, я́же сбу́дутся, или́ я́же пре́жде бы́ша, рцы́те: и приста́вимъ у́мъ и уразумѣ́ємъ, что́ послѣ́дняя и бу́дущая: рцы́те на́мъ,

возвѣсти́те на́мъ гряду́щая на послѣ́докъ, и увѣ́мы, я́ко бо́зи єсте́: бла́го сотвори́те и зло́ сотвори́те, и почуди́мся и у́зримъ вку́пѣ.

Я́ко отку́ду єсте́ вы́, и отку́ду дѣ́ло ва́ше? от земли́ ме́рзость избра́ша ва́съ.

А́зъ же возста́вихъ, и́же от сѣ́вера и и́же от восто́къ со́лнечныхъ, прозову́тся и́менемъ мои́мъ: да пріи́дутъ кня́зи, и я́ко бре́ніє скуде́льника и я́ко скуде́льникъ то́пчущь бре́ніє, та́ко попра́ни бу́дете.

Кто́ бо возвѣсти́тъ, я́же испе́рва, да увѣ́мы, я́же напреди́, и рече́мъ, я́ко и́стинна су́ть? нѣ́сть предглаго́лющаго, ни слы́шащаго слове́съ ва́шихъ.

Нача́ло Сіо́ну да́мъ и Ієрусали́ма утѣ́шу на пути́.

От язы́къ бо, се́, ни єди́нъ: и от кумі́ръ и́хъ нѣ́сть возвѣща́яй. И а́ще вопрошу́ и́хъ, отку́ду єсте́, не отвѣща́ютъ ми́.

Су́ть бо творя́щіи ва́съ и всу́є прельща́ющіи ва́съ.

Іа́ковъ о́трокъ мо́й, воспріиму́ и́: Ізра́иль избра́нный мо́й, прія́тъ єго́ душа́ моя́, да́хъ Ду́хъ мо́й на́нь, су́дъ язы́комъ возвѣсти́тъ:

не возопіє́тъ, ниже́ осла́битъ, ниже́ услы́шится внѣ́ гла́съ єго́:

тро́сти сокруше́ны не сотре́тъ и льна́ куря́щася не угаси́тъ, но во и́стину изнесе́тъ су́дъ:

возсія́єтъ и не поту́хнетъ, до́ндеже положи́тъ на земли́ су́дъ, и на и́мя єго́ язы́цы упова́ти и́мутъ.

Та́ко глаго́летъ Госпо́дь Бо́гъ, сотвори́вый не́бо и водрузи́вый є́, утвержде́й зе́млю и я́же на не́й, и дая́й дыха́ніє лю́демъ, и́же на не́й, и ду́хъ ходя́щымъ на не́й:

а́зъ Госпо́дь Бо́гъ призва́хъ тя́ въ пра́вдѣ, и удержу́ за ру́ку твою́ и укрѣплю́ тя: и да́хъ тя́ въ завѣ́тъ ро́да Ізра́илева, во свѣ́тъ язы́ковъ,

отве́рсти о́чи слѣпы́хъ, извести́ от у́зъ свя́занныя и изъ до́му темни́цы и сѣдя́щыя во тмѣ́.

А́зъ Госпо́дь Бо́гъ, сіє́ моє́ є́сть и́мя, сла́вы моєя́ ино́му не да́мъ, ниже́ добродѣ́телей мои́хъ истука́ннымъ.

Я́же изъ нача́ла, се́, пріидо́ша, и но́вая, я́же а́зъ возвѣщу́, и пре́жде не́же возвѣсти́ти, яви́шася ва́мъ.

Воспо́йте Го́сподеви пѣ́снь но́ву: нача́лство єго́, просла́вите и́мя єго́ от коне́цъ земли́, сходя́щіи въ мо́ре и пла́вающіи по нему́, о́строви и живу́щіи на ни́хъ.

Возвесели́ся, пусты́не, и ве́си єя́, придво́рія, и живу́щіи въ Кида́рѣ: возвеселя́тся живу́щіи на ка́мени, от кра́я го́ръ возопію́тъ,