Глава 28
1
Призва́въ же Ісаа́къ Іа́кова, благослови́ єго́ и заповѣ́да єму́, глаго́ля: да не по́ймеши жены́ от дще́рей Ханане́йскихъ:
2
воста́въ отбѣжи́ въ Месопота́мію въ до́мъ Ваѳуи́ла отца́ ма́тере твоєя́, и поими́ себѣ́ отту́ду жену́ от дще́рей Лава́на бра́та ма́тере твоєя́:
3
Бо́гъ же мо́й да благослови́тъ тя́ и возрасти́тъ тя́ и умно́житъ тя́, и бу́деши въ собра́нія язы́ковъ:
4
и да да́стъ тебѣ́ благослове́ніє Авраа́ма отца́ моєго́, тебѣ́ и сѣ́мени твоєму́ по тебѣ́ наслѣ́дити зе́млю обита́нія твоєго́, ю́же даде́ Бо́гъ Авраа́му.
5
Посла́ же Ісаа́къ Іа́кова: и отъи́де въ Месопота́мію къ Лава́ну сы́ну Ваѳуи́ла Си́ріна, къ бра́ту же Реве́кки ма́тере Іа́ковли и Иса́вли.
6
Ви́дѣ же Иса́въ, я́ко благослови́ Ісаа́къ Іа́кова и посла́ въ Месопота́мію Си́рскую поя́ти отту́ду себѣ́ жену́, єгда́ благослови́ єго́ и заповѣ́да єму́, глаго́ля: да не по́ймеши жены́ от дще́рей Ханане́йскихъ.
7
И послу́ша Іа́ковъ отца́ и ма́тере своєя́, и отъи́де въ Месопота́мію Си́рскую.
8
Ви́дѣвъ же Иса́въ, я́ко злы́ су́ть дще́ри Ханане́йскія предъ Ісаа́комъ отце́мъ єго́,
9
отъи́де Иса́въ ко Ісма́илу и взя́ Маєле́ѳу дще́рь Ісма́ила сы́на Авраа́мля, сестру́ Навео́ѳову, жену́ къ жена́мъ свои́мъ.
10
И отъи́де Іа́ковъ от кла́дязя Кля́твеннаго и и́де въ Харра́нъ,
11
и обрѣ́те мѣ́сто и у́спе та́мо, за́йде бо со́лнце: и взя́ от ка́менія мѣ́ста [того́] и положи́ въ возгла́віє себѣ́, и спа́ на мѣ́стѣ о́нѣмъ.
12
И со́нъ ви́дѣ: и се́, лѣ́ствица утвержде́на на земли́, єя́же глава́ досяза́ше до небесе́, и А́нгели Бо́жіи восхожда́ху и низхожда́ху по не́й:
13
Госпо́дь же утвержда́шеся на не́й и рече́: А́зъ є́смь Бо́гъ Авраа́ма отца́ твоєго́ и Бо́гъ Ісаа́ка, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоєму́:
14
и бу́детъ сѣ́мя твоє́ я́ко песо́къ земны́й, и распространи́тся на мо́ре, и Лі́ву, и сѣ́веръ, и на восто́ки: и благословя́тся о тебѣ́ вся́ колѣ́на земна́я и о сѣ́мени твоє́мъ:
15
и се́, А́зъ є́смь съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя въ зе́млю сію́: я́ко не и́мамъ тебе́ оста́вити, до́ндеже сотвори́ти ми́ вся́, єли́ка глаго́лахъ тебѣ́.
16
И воста́ Іа́ковъ от сна́ своєго́ и рече́: я́ко є́сть Госпо́дь на мѣ́стѣ се́мъ, а́зъ же не вѣ́дѣхъ.
17
И убоя́ся и рече́: я́ко стра́шно мѣ́сто сіє́: нѣ́сть сіє́, но до́мъ Бо́жій, и сія́ врата́ небе́сная.
18
И воста́ Іа́ковъ зау́тра, и взя́ ка́мень, єго́же положи́ та́мо въ возгла́віє себѣ́: и поста́ви єго́ въ сто́лпъ, и возлія́ єле́й верху́ єго́.
19
И прозва́ Іа́ковъ и́мя мѣ́сту тому́ До́мъ Бо́жій: Уламлу́зъ же бѣ́ и́мя гра́ду пе́рвѣє.
20
И положи́ Іа́ковъ обѣ́тъ, глаго́ля: а́ще бу́детъ Госпо́дь Бо́гъ со мно́ю и сохрани́тъ мя́ на пути́ се́мъ, въ о́ньже а́зъ иду́, и да́стъ ми́ хлѣ́бъ я́сти, и ри́зы облещи́ся,
21
и возврати́тъ мя́ здра́ва въ до́мъ отца́ моєго́, и бу́детъ Госпо́дь мнѣ́ въ Бо́га:
22
и ка́мень се́й, єго́же поста́вихъ въ сто́лпъ, бу́детъ ми́ до́мъ Бо́жій, и от всѣ́хъ, я́же ми́ да́си, десяти́ну одеся́тствую та́ Тебѣ́.
