Глава 25
1
Приложи́въ же Авраа́мъ, поя́ жену́, є́йже и́мя Хетту́ра:
2
роди́ же єму́ Зомвра́на и Ієза́на, и Мада́ла и Мадіа́ма, и Ієсво́ка и Соіє́на.
3
Ієза́нъ же роди́ Сава́на и Ѳама́на и Деда́на. Сы́нове же Деда́ни бы́ша: Рагуи́лъ и Навдеи́лъ, и Асуріи́мъ и Латусіи́мъ и Лаомі́мъ.
4
Сы́нове же Мадіа́мли: Єфа́ръ и Афи́ръ, и Єно́хъ и Авіда́ и Єлдага́. Вси́ сі́и бы́ша сы́нове Хетту́рины.
5
Даде́ же Авраа́мъ вся́ своя́ имѣ́нія Ісаа́ку сы́ну своєму́:
6
сыно́мъ же нало́жницъ свои́хъ даде́ Авраа́мъ да́ры и отпусти́ я́ от Ісаа́ка сы́на своєго́, єще́ жи́въ сы́й, къ восто́ку на зе́млю восто́чную.
7
Сія́ же лѣ́та дні́й житія́ Авраа́мля, єли́ка поживе́, лѣ́тъ сто́ се́дмьдесятъ пя́ть:
8
и ослабѣ́въ у́мре Авраа́мъ въ ста́рости до́брѣй, ста́рецъ испо́лненъ дні́й, и приложи́ся къ лю́демъ свои́мъ.
9
И погребо́ша єго́ Ісаа́къ и Ісма́илъ два́ сы́нове єго́ въ пеще́рѣ Сугу́бѣй, на селѣ́ Єфро́новѣ сы́на Саа́рова Хетте́анина, є́же є́сть пря́мо Мамврі́и,
10
на селѣ́ и въ пеще́рѣ, ю́же притяжа́ Авраа́мъ от сыно́въ Хетте́овыхъ: та́мо погребо́ша Авраа́ма и Са́рру жену́ єго́.
11
Бы́сть же по уме́ртвіи Авраа́мли, благослови́ Бо́гъ Ісаа́ка сы́на єго́: и всели́ся Ісаа́къ у кла́дязя Видѣ́нія.
12
Сія́ же бытія́ Ісма́ила сы́на Авраа́мля, єго́же роди́ А́гарь Єги́птяныня, раба́ Са́ррина, Авраа́му:
13
и сія́ имена́ сыно́въ Ісма́илихъ, по имено́мъ родо́въ єго́: пе́рвенецъ Ісма́иловъ Наваіо́ѳъ, и Кида́ръ и Навдеи́лъ, и Масса́мъ
14
и Масма́, и Дума́ и Масси́,
15
и Ходда́нъ и Ѳема́нъ, и Ієту́ръ и Нафе́съ и Кедма́.
16
Сі́и су́ть сы́нове Ісма́или: и сія́ имена́ и́хъ въ ски́ніяхъ и́хъ и въ се́лѣхъ и́хъ: двана́десять кня́зи въ язы́цѣхъ и́хъ.
17
И сія́ лѣ́та житія́ Ісма́илова, сто́ три́десять се́дмь лѣ́тъ: и ослабѣ́въ у́мре, и приложи́ся къ ро́ду своєму́.
18
Всели́ся же от Євіла́та да́же до Су́ра, и́же є́сть въ лице́ Єги́пту, да́же доити́ ко Ассирі́омъ: предъ лице́мъ всѣ́хъ бра́тій свои́хъ всели́ся.
19
И сія́ бытія́ Ісаа́ка сы́на Авраа́мля: Авраа́мъ роди́ Ісаа́ка.
20
Бя́ше же Ісаа́къ лѣ́тъ четы́редесяти, єгда́ поя́ Реве́кку дще́рь Ваѳуи́ла Си́ріна от Месопота́міи Си́рскія, сестру́ Лава́на Си́ріна, себѣ́ въ жену́.
21
Моля́шеся же Ісаа́къ Го́сподеви о Реве́кцѣ женѣ́ своє́й, я́ко непло́ды бя́ше: послу́ша же єго́ Бо́гъ, и зача́тъ во утро́бѣ Реве́кка жена́ єго́.
22
Игра́ста же младе́нца въ не́й, и рече́: а́ще та́ко ми́ хо́щетъ бы́ти, почто́ ми сіє́? И и́де вопроша́ти Го́спода.
23
И рече́ є́й Госпо́дь: два́ язы́ка во утро́бѣ твоє́й су́ть, и дво́и лю́діє от утро́бы твоєя́ разлуча́тся: и лю́діє люді́й превзы́дутъ, и бо́лшій порабо́таєтъ ме́ншему.
24
И испо́лнишася дні́є роди́ти є́й, и бя́ху се́й близня́та во утро́бѣ єя́:
25
изы́де же сы́нъ пе́рвенецъ че́рменъ, ве́сь, я́ко ко́жа, косма́тъ: и нарече́ и́мя єму́ Иса́въ:
26
и посе́мъ изы́де бра́тъ єго́, рука́ же єго́ придержа́ся пятѣ́ Иса́вовѣ: и нарече́ и́мя єму́ Іа́ковъ. Ісаа́ку же бѣ́ шестьдеся́тъ лѣ́тъ, єгда́ роди́ и́хъ Реве́кка.
27
Возрасто́ша же ю́ноши: и бы́сть Иса́въ человѣ́къ вѣ́дый лови́ти, се́лный: Іа́ковъ же бы́сть человѣ́къ нелука́въ, живы́й въ дому́.
28
И возлюби́ Ісаа́къ Иса́ва, я́ко лови́тва єго́ бя́ше бра́шно єму́: Реве́кка же любля́ше Іа́кова.
29
Свари́ же Іа́ковъ варе́ніє: и пріи́де Иса́въ съ по́ля изнемо́гъ,
30
и рече́ Иса́въ Іа́кову: напита́й мя́ варе́ніємъ со́чива сего́, я́ко изнемога́ю. Сего́ ра́ди прозва́ся и́мя єму́ Єдо́мъ.
31
И рече́ Іа́ковъ Иса́ву: отда́ждь ми́ дне́сь пе́рвенство своє́.
32
Рече́ же Иса́въ: се́, а́зъ иду́ умре́ти, и вску́ю ми́ пе́рвенство сіє́?
33
И рече́ Іа́ковъ єму́: клени́ся ми́ дне́сь. И кля́ся єму́, и отдаде́ Иса́въ Іа́кову пе́рвенство своє́.
34
Іа́ковъ же даде́ Иса́ву хлѣ́бъ и варе́ніє со́чевно: яде́ же и пи́, и воста́въ отъи́де: и нивочто́же вмѣни́ себѣ́ Иса́въ пе́рвенство.
