|
Глава 29
|
Глава́ к҃ѳ
|
|
1
|
1
|
|
И воста́въ Іа́ковъ на но́зѣ, и́де въ зе́млю восто́чную къ Лава́ну сы́ну Ваѳуи́ла Си́ріна, бра́ту же Реве́кки ма́тере Іа́ковли и Иса́вли.
|
И҆ воста́въ і҆а́кѡвъ на но́зѣ, и҆́де въ зе́млю восто́чнꙋю къ лава́нꙋ сы́нꙋ ваѳꙋи́ла сѵ́рїна, бра́тꙋ же реве́кки ма́тере і҆а́кѡвли и҆ и҆са́ѵли.
|
|
2
|
2
|
|
Узрѣ́ же, и се́, кла́дязь на по́ли: и бя́ху та́мо три́ ста́да ове́цъ, почива́юще при не́мъ: от того́ бо кла́дязя напая́хуся стада́. Ка́мень же ве́лій бя́ше надъ у́стіємъ кла́дязя.
|
Оу҆зрѣ́ же, и҆ сѐ, кла́дѧзь на по́ли: и҆ бѧ́хꙋ та́мѡ трѝ ста̑да ѻ҆ве́цъ, почива́юще при не́мъ: ѿ тогѡ́ бо кла́дѧзѧ напаѧ́хꙋсѧ стада̀. Ка́мень же ве́лїй бѧ́ше над̾ оу҆́стїемъ кла́дѧзѧ.
|
|
3
|
3
|
|
И собира́хуся та́мо вся́ стада́: и отваля́ху ка́мень от у́стія кла́дязя и напая́ху о́вцы: и па́ки полага́ху ка́мень на у́стіи кла́дязя на мѣ́стѣ своє́мъ.
|
И҆ собира́хꙋсѧ та́мѡ всѧ̑ стада̀: и҆ ѿвалѧ́хꙋ ка́мень ѿ оу҆́стїѧ кла́дѧзѧ и҆ напаѧ́хꙋ ѻ҆́вцы: и҆ па́ки полага́хꙋ ка́мень на оу҆́стїи кла́дѧзѧ на мѣ́стѣ свое́мъ.
|
|
4
|
4
|
|
Рече́ же и́мъ Іа́ковъ: бра́тія, отку́ду єсте́ вы́? Они́ же рѣ́ша: от Харра́на єсмы́.
|
Рече́ же и҆̀мъ і҆а́кѡвъ: бра́тїѧ, ѿкꙋ́дꙋ є҆стѐ вы̀; Ѻ҆ни́ же рѣ́ша: ѿ харра́на є҆смы̀.
|
|
5
|
5
|
|
Рече́ же и́мъ: зна́єте ли Лава́на сы́на Нахо́рова? Они́ же рѣ́ша: зна́ємъ.
|
Рече́ же и҆̀мъ: зна́ете ли лава́на сы́на нахѡ́рова; Ѻ҆ни́ же рѣ́ша: зна́емъ.
|
|
6
|
6
|
|
Рече́ же и́мъ: здра́вствуєтъ ли? Они́ же рѣ́ша: здра́вствуєтъ. И се́, Рахи́ль дщи́ єго́ идя́ше со овца́ми.
|
Рече́ же и҆̀мъ: здра́вствꙋетъ ли; Ѻ҆ни́ же рѣ́ша: здра́вствꙋетъ. И҆ сѐ, рахи́ль дщѝ є҆гѡ̀ и҆дѧ́ше со ѻ҆вца́ми.
|
|
7
|
7
|
|
И рече́ Іа́ковъ: єще́ є́сть дне́ мно́го, не у́ ча́съ собира́ти скота́: напои́вше о́вцы, ше́дше паси́те.
|
И҆ речѐ і҆а́кѡвъ: є҆щѐ є҆́сть днѐ мно́гѡ, не оу҆̀ ча́съ собира́ти скота̀: напои́вше ѻ҆́вцы, ше́дше паси́те.
|
|
8
|
8
|
|
Они́ же рѣ́ша: не мо́жемъ, до́ндеже соберу́тся вси́ пастуси́ и отваля́тъ ка́мень от у́стія кла́дязя, и напои́мъ о́вцы.
|
Ѻ҆ни́ же рѣ́ша: не мо́жемъ, до́ндеже соберꙋ́тсѧ всѝ пастꙋсѝ и҆ ѿвалѧ́тъ ка́мень ѿ оу҆́стїѧ кла́дѧзѧ, и҆ напои́мъ ѻ҆́вцы.
|
|
9
|
9
|
|
Єще́ єму́ глаго́лющу къ ни́мъ, и се́, Рахи́ль дщи́ Лава́ня грядя́ше со овца́ми отца́ своєго́: она́ бо пася́ше о́вцы отца́ своєго́.
|
Є҆щѐ є҆мꙋ̀ глаго́лющꙋ къ ни̑мъ, и҆ сѐ, рахи́ль дщѝ лава́нѧ грѧдѧ́ше со ѻ҆вца́ми ѻ҆тца̀ своегѡ̀: ѻ҆на́ бо пасѧ́ше ѻ҆́вцы ѻ҆тца̀ своегѡ̀.
|
|
10
|
10
|
|
Бы́сть же я́ко узрѣ́ Іа́ковъ Рахи́ль дще́рь Лава́на бра́та ма́тере своєя́ и о́вцы Лава́на бра́та ма́тере своєя́, и приступи́въ Іа́ковъ отвали́ ка́мень от у́стія кла́дязя:
|
Бы́сть же ꙗ҆́кѡ оу҆зрѣ̀ і҆а́кѡвъ рахи́ль дще́рь лава́на бра́та ма́тере своеѧ̀ и҆ ѻ҆́вцы лава́на бра́та ма́тере своеѧ̀, и҆ пристꙋпи́въ і҆а́кѡвъ ѿвалѝ ка́мень ѿ оу҆́стїѧ кла́дѧзѧ:
|
|
11
|
11
|
|
и напои́ о́вцы Лава́на бра́та ма́тере своєя́, и цѣлова́ Іа́ковъ Рахи́ль, и возопи́въ гла́сомъ свои́мъ, воспла́кася:
|
и҆ напоѝ ѻ҆́вцы лава́на бра́та ма́тере своеѧ̀, и҆ цѣлова̀ і҆а́кѡвъ рахи́ль, и҆ возопи́въ гла́сомъ свои́мъ, воспла́касѧ:
|
|
12
|
12
|
|
и повѣ́да Рахи́ли, я́ко бра́тъ отца́ єя́ є́сть и я́ко сы́нъ Реве́ккинъ є́сть. И те́кши повѣ́да отцу́ своєму́ по словесе́мъ си́мъ.
|
и҆ повѣ́да рахи́ли, ꙗ҆́кѡ бра́тъ ѻ҆тца̀ є҆ѧ̀ є҆́сть и҆ ꙗ҆́кѡ сы́нъ реве́ккинъ є҆́сть. И҆ те́кши повѣ́да ѻ҆тцꙋ̀ своемꙋ̀ по словесє́мъ си̑мъ.
|
|
13
|
13
|
|
Бы́сть же я́ко услы́ша Лава́нъ и́мя Іа́кова сы́на сестры́ своєя́, тече́ во срѣ́теніє єму́ и объе́мь єго́ лобза́, и введе́ єго́ въ до́мъ сво́й. И повѣ́да Лава́ну вся́ словеса́ сія́.
|
Бы́сть же ꙗ҆́кѡ оу҆слы́ша лава́нъ и҆́мѧ і҆а́кѡва сы́на сестры̀ своеѧ̀, течѐ во срѣ́тенїе є҆мꙋ̀ и҆ ѡ҆б̾е́мь є҆го̀ лобза̀, и҆ введѐ є҆го̀ въ до́мъ сво́й. И҆ повѣ́да лава́нꙋ всѧ̑ словеса̀ сїѧ̑.
|
|
14
|
14
|
|
И рече́ єму́ Лава́нъ: от косте́й мои́хъ и от пло́ти моєя́ єси́ ты́. И бѣ́ съ ни́мъ мѣ́сяцъ дні́й.
|
И҆ речѐ є҆мꙋ̀ лава́нъ: ѿ косте́й мои́хъ и҆ ѿ пло́ти моеѧ̀ є҆сѝ ты̀. И҆ бѣ̀ съ ни́мъ мѣ́сѧцъ дні́й.
|
|
15
|
15
|
|
Рече́ же Лава́нъ Іа́кову: поне́же бра́тъ мо́й єси́ ты́, да не порабо́таєши мнѣ́ ту́не: повѣ́ждь ми́, что́ мзда́ твоя́ є́сть?
|
Рече́ же лава́нъ і҆а́кѡвꙋ: поне́же бра́тъ мо́й є҆сѝ ты̀, да не порабо́таеши мнѣ̀ тꙋ́не: повѣ́ждь мѝ, что̀ мзда̀ твоѧ̀ є҆́сть;
|
|
16
|
16
|
|
У Лава́на же бѣ́стѣ двѣ́ дще́ри: и́мя старѣ́йшей Лі́а, и́мя же юнѣ́йшей Рахи́ль.
|
Оу҆ лава́на же бѣ́стѣ двѣ̀ дщє́ри: и҆́мѧ старѣ́йшей лі́а, и҆́мѧ же ю҆нѣ́йшей рахи́ль.
|
|
17
|
17
|
|
О́чи же Лі́ины болѣ́зненны: Рахи́ль же бѣ́ добра́ ви́домъ и красна́ взо́ромъ зѣло́.
|
Ѻ҆́чи же лі̑ины болѣ́знєнны: рахи́ль же бѣ̀ добра̀ ви́домъ и҆ красна̀ взо́ромъ ѕѣлѡ̀.
|
|
18
|
18
|
|
Возлюби́ же Іа́ковъ Рахи́ль. И рече́: порабо́таю тебѣ́ се́дмь лѣ́тъ за Рахи́ль дще́рь твою́ ме́ншую.
|
Возлюби́ же і҆а́кѡвъ рахи́ль. И҆ речѐ: порабо́таю тебѣ̀ се́дмь лѣ́тъ за рахи́ль дще́рь твою̀ ме́ншꙋю.
|
|
19
|
19
|
|
Рече́ же єму́ Лава́нъ: лу́чше ми́ тебѣ́ да́ти ю́, не́жели ино́му отда́ти му́жеви: со мно́ю живи́.
|
Рече́ же є҆мꙋ̀ лава́нъ: лꙋ́чше мѝ тебѣ̀ да́ти ю҆̀, не́жели и҆но́мꙋ ѿда́ти мꙋ́жеви: со мно́ю живѝ.
|
|
20
|
20
|
|
И рабо́та Іа́ковъ за Рахи́ль се́дмь лѣ́тъ: и бы́ша предъ ни́мъ я́ко ма́лы дни́, зане́же любя́ше ю́.
|
И҆ рабо́та і҆а́кѡвъ за рахи́ль се́дмь лѣ́тъ: и҆ бы́ша пред̾ ни́мъ ꙗ҆́кѡ ма̑лы дни̑, зане́же любѧ́ше ю҆̀.
|
|
21
|
21
|
|
Рече́ же Іа́ковъ Лава́ну: да́ждь ми́ жену́ мою́, поне́же соверши́шася дні́є, да вни́ду къ не́й.
|
Рече́ же і҆а́кѡвъ лава́нꙋ: да́ждь мѝ женꙋ̀ мою̀, поне́же соверши́шасѧ дні́е, да вни́дꙋ къ не́й.
|
|
22
|
22
|
|
Собра́ же Лава́нъ вся́ му́жы мѣ́ста того́, и сотвори́ бра́къ.
|
Собра́ же лава́нъ всѧ̑ мꙋ́жы мѣ́ста тогѡ̀, и҆ сотворѝ бра́къ.
|
|
23
|
23
|
|
И бы́сть ве́черъ, и поє́мь Лава́нъ Лі́ю дще́рь свою́, введе́ ко Іа́кову: и вни́де къ не́й Іа́ковъ.
|
И҆ бы́сть ве́черъ, и҆ пое́мь лава́нъ лі́ю дще́рь свою̀, введѐ ко і҆а́кѡвꙋ: и҆ вни́де къ не́й і҆а́кѡвъ.
|
|
24
|
24
|
|
Даде́ же Лава́нъ Лі́и дще́ри своє́й Зе́лфу рабы́ню свою́, є́й въ рабу́.
|
Даде́ же лава́нъ лі́и дще́ри свое́й зе́лфꙋ рабы́ню свою̀, є҆́й въ рабꙋ̀.
|
|
25
|
25
|
|
Бы́сть же зау́тра, и се́, бя́ше Лі́а, и рече́ Іа́ковъ Лава́ну: что́ сіє́ сотвори́лъ ми́ єси́? Не Рахи́ли ли ра́ди рабо́тахъ у тебе́? Вску́ю же оби́дѣлъ мя́ єси́?
|
Бы́сть же заꙋ́тра, и҆ сѐ, бѧ́ше лі́а, и҆ речѐ і҆а́кѡвъ лава́нꙋ: что̀ сїѐ сотвори́лъ мѝ є҆сѝ; не рахи́ли ли ра́ди рабо́тахъ оу҆ тебє̀; вскꙋ́ю же ѡ҆би́дѣлъ мѧ̀ є҆сѝ;
|
|
26
|
26
|
|
Отвѣща́ же Лава́нъ: нѣ́сть та́ко въ на́шемъ мѣ́стѣ вда́ти ме́ншую пре́жде старѣ́йшія.
|
Ѿвѣща́ же лава́нъ: нѣ́сть та́кѡ въ на́шемъ мѣ́стѣ вда́ти ме́ншꙋю пре́жде старѣ́йшїѧ.
|
|
27
|
27
|
|
Сконча́й у́бо седми́ны сея́, и да́мъ ти́ и сію́ за дѣ́ло, є́же дѣ́лаєши у мене́ єще́ се́дмь лѣ́тъ другі́я.
|
Сконча́й оу҆̀бо седми̑ны сеѧ̀, и҆ да́мъ тѝ и҆ сїю̀ за дѣ́ло, є҆́же дѣ́лаеши оу҆ менє̀ є҆щѐ се́дмь лѣ́тъ дрꙋгі̑ѧ.
|
|
28
|
28
|
|
Сотвори́ же Іа́ковъ та́ко: и испо́лни седми́ны сея́: и даде́ єму́ Лава́нъ Рахи́ль дще́рь свою́ єму́ въ жену́.
|
Сотвори́ же і҆а́кѡвъ та́кѡ: и҆ и҆спо́лни седми̑ны сеѧ̀: и҆ дадѐ є҆мꙋ̀ лава́нъ рахи́ль дще́рь свою̀ є҆мꙋ̀ въ женꙋ̀.
|
|
29
|
29
|
|
Даде́ же Лава́нъ Рахи́ли дще́ри своє́й Ва́ллу рабу́ свою́, є́й въ рабу́.
|
Даде́ же лава́нъ рахи́ли дще́ри свое́й ва́ллꙋ рабꙋ̀ свою̀, є҆́й въ рабꙋ̀.
|
|
30
|
30
|
|
И вни́де [Іа́ковъ] къ Рахи́ли: возлюби́ же Рахи́ль па́че, не́же Лі́ю: и рабо́та єму́ се́дмь лѣ́тъ другі́я.
|
И҆ вни́де (і҆а́кѡвъ) къ рахи́ли: возлюби́ же рахи́ль па́че, не́же лі́ю: и҆ рабо́та є҆мꙋ̀ се́дмь лѣ́тъ дрꙋгі̑ѧ.
|
|
31
|
31
|
|
Ви́дѣвъ же Госпо́дь Бо́гъ, я́ко ненави́дима бя́ше Лі́а, отве́рзе ложесна́ єя́: Рахи́ль же бя́ше непло́ды.
|
Ви́дѣвъ же гдⷭ҇ь бг҃ъ, ꙗ҆́кѡ ненави́дима бѧ́ше лі́а, ѿве́рзе ложесна̀ є҆ѧ̀: рахи́ль же бѧ́ше непло́ды.
|
|
32
|
32
|
|
И зача́тъ Лі́а и роди́ сы́на Іа́кову: нарече́ же и́мя єму́ Руви́мъ, глаго́ля: я́ко призрѣ́ Госпо́дь на моє́ смире́ніє и даде́ ми сы́на: ны́нѣ у́бо возлю́битъ мя́ му́жъ мо́й.
|
И҆ зача́тъ лі́а и҆ родѝ сы́на і҆а́кѡвꙋ: нарече́ же и҆́мѧ є҆мꙋ̀ рꙋви́мъ, глаго́лѧ: ꙗ҆́кѡ призрѣ̀ гдⷭ҇ь на моѐ смире́нїе и҆ даде́ ми сы́на: нн҃ѣ оу҆̀бо возлю́битъ мѧ̀ мꙋ́жъ мо́й.
|
|
33
|
33
|
|
И зача́тъ па́ки Лі́а и роди́ сы́на втора́го Іа́кову и рече́: зане́ услы́ша Госпо́дь, я́ко ненави́дима є́смь, и придаде́ ми и сего́. И нарече́ и́мя єму́ Симео́нъ.
|
И҆ зача́тъ па́ки лі́а и҆ родѝ сы́на втора́го і҆а́кѡвꙋ и҆ речѐ: занѐ оу҆слы́ша гдⷭ҇ь, ꙗ҆́кѡ ненави́дима є҆́смь, и҆ придаде́ ми и҆ сего̀. И҆ наречѐ и҆́мѧ є҆мꙋ̀ сѷмеѡ́нъ.
|
|
34
|
34
|
|
И зача́тъ єще́ и роди́ сы́на и рече́: въ ны́нѣшнеє вре́мя у мене́ бу́детъ му́жъ мо́й, роди́хъ бо єму́ три́ сы́ны. Сего́ ра́ди нарече́ и́мя єму́ Леві́й.
|
И҆ зача́тъ є҆щѐ и҆ родѝ сы́на и҆ речѐ: въ нн҃ѣшнее вре́мѧ оу҆ менє̀ бꙋ́детъ мꙋ́жъ мо́й, роди́хъ бо є҆мꙋ̀ трѝ сы́ны. Сегѡ̀ ра́ди наречѐ и҆́мѧ є҆мꙋ̀ леѵі́й.
|
|
35
|
35
|
|
И заче́нши єще́ роди́ сы́на и рече́: ны́нѣ єще́ сіє́ исповѣ́мъ Го́споду. Сего́ ра́ди нарече́ и́мя єму́ Іу́да, и преста́ ражда́ти.
|
И҆ заче́нши є҆щѐ родѝ сы́на и҆ речѐ: нн҃ѣ є҆щѐ сїѐ и҆сповѣ́мъ гдⷭ҇ꙋ. Сегѡ̀ ра́ди наречѐ и҆́мѧ є҆мꙋ̀ і҆ꙋ́да, и҆ преста̀ ражда́ти.
|
