|
Глава 37
|
Глава́ л҃з
|
|
1
|
1
|
|
Всели́ся же Іа́ковъ въ земли́, идѣ́же обита́ Ісаа́къ, оте́цъ єго́, въ земли́ Ханаа́ни.
|
Всели́сѧ же і҆а́кѡвъ въ землѝ, и҆дѣ́же ѡ҆бита̀ і҆саа́къ, ѻ҆те́цъ є҆гѡ̀, въ землѝ ханаа́ни.
|
|
2
|
2
|
|
Сі́и же ро́ди Іа́ковли. Іо́сифъ же бя́ше седмина́десяти лѣ́тъ, пасы́й о́вцы отца́ своєго́ съ бра́тією своє́ю, ю́нъ сы́й, съ сынми́ Ва́ллы и съ сынми́ Зе́лфы, же́нъ отца́ своєго́: нанесо́ша же на Іо́сифа злу́ клевету́ ко Ізра́илю отцу́ своєму́.
|
Сі́и же ро́ди і҆а̑кѡвли. І҆ѡ́сифъ же бѧ́ше седмина́десѧти лѣ́тъ, пасы́й ѻ҆́вцы ѻ҆тца̀ своегѡ̀ съ бра́тїею свое́ю, ю҆́нъ сы́й, съ сынмѝ ва́ллы и҆ съ сынмѝ зе́лфы, же́нъ ѻ҆тца̀ своегѡ̀: нанесо́ша же на і҆ѡ́сифа ѕлꙋ̀ клеветꙋ̀ ко і҆и҃лю ѻ҆тцꙋ̀ своемꙋ̀.
|
|
3
|
3
|
|
Іа́ковъ же любля́ше Іо́сифа па́че всѣ́хъ сыно́въ свои́хъ, я́ко сы́нъ въ ста́рости єму́ бы́сть: и сотвори́ єму́ ри́зу пе́стру.
|
І҆а́кѡвъ же люблѧ́ше і҆ѡ́сифа па́че всѣ́хъ сынѡ́въ свои́хъ, ꙗ҆́кѡ сы́нъ въ ста́рости є҆мꙋ̀ бы́сть: и҆ сотворѝ є҆мꙋ̀ ри́зꙋ пе́стрꙋ.
|
|
4
|
4
|
|
Ви́дѣвше же бра́тія єго́, я́ко лю́битъ єго́ оте́цъ па́че всѣ́хъ сыно́въ свои́хъ, возненави́дѣша єго́ и не можа́ху глаго́лати къ нему́ ничто́же ми́рно.
|
Ви́дѣвше же бра́тїѧ є҆гѡ̀, ꙗ҆́кѡ лю́битъ є҆го̀ ѻ҆те́цъ па́че всѣ́хъ сынѡ́въ свои́хъ, возненави́дѣша є҆го̀ и҆ не можа́хꙋ глаго́лати къ немꙋ̀ ничто́же ми́рно.
|
|
5
|
5
|
|
Ви́дѣвъ же Іо́сифъ со́нъ, повѣ́да и́ бра́тіи своє́й
|
Ви́дѣвъ же і҆ѡ́сифъ со́нъ, повѣ́да и҆̀ бра́тїи свое́й
|
|
6
|
6
|
|
и рече́ и́мъ: послу́шайте сна́ сего́, єго́же ви́дѣхъ:
|
и҆ речѐ и҆̀мъ: послꙋ́шайте сна̀ сегѡ̀, є҆го́же ви́дѣхъ:
|
|
7
|
7
|
|
мнѣ́хъ ва́съ вя́жущихъ снопы́ средѣ́ по́ля: и воста́ мо́й сно́пъ и ста́ пря́мо, ва́ши же снопы́ обрати́вшеся поклони́шася моєму́ снопу́.
|
мнѣ́хъ ва́съ вѧ́жꙋщихъ снопы̀ средѣ̀ по́лѧ: и҆ воста̀ мо́й сно́пъ и҆ ста̀ прѧ́мѡ, ва́ши же снопы̀ ѡ҆брати́вшесѧ поклони́шасѧ моемꙋ̀ снопꙋ̀.
|
|
8
|
8
|
|
Рѣ́ша же єму́ бра́тія єго́: єда́ ца́рствуя ца́рствовати бу́деши надъ на́ми, или́ госпо́дствуя госпо́дствовати бу́деши надъ на́ми? И приложи́ша єще́ ненави́дѣти єго́ сно́въ ра́ди єго́ и ра́ди слове́съ єго́.
|
Рѣ́ша же є҆мꙋ̀ бра́тїѧ є҆гѡ̀: є҆да̀ ца́рствꙋѧ ца́рствовати бꙋ́деши над̾ на́ми, и҆лѝ госпо́дствꙋѧ госпо́дствовати бꙋ́деши над̾ на́ми; И҆ приложи́ша є҆щѐ ненави́дѣти є҆го̀ снѡ́въ ра́ди є҆гѡ̀ и҆ ра́ди слове́съ є҆гѡ̀.
|
|
9
|
9
|
|
Ви́дѣ же со́нъ другі́й и повѣ́да єго́ отцу́ своєму́ и бра́тіи своє́й, и рече́: се́, ви́дѣхъ другі́й со́нъ: а́ки бы со́лнце и луна́ и єдинона́десять звѣ́здъ покланя́хуся мнѣ́.
|
Ви́дѣ же со́нъ дрꙋгі́й и҆ повѣ́да є҆го̀ ѻ҆тцꙋ̀ своемꙋ̀ и҆ бра́тїи свое́й, и҆ речѐ: сѐ, ви́дѣхъ дрꙋгі́й со́нъ: а҆́ки бы со́лнце и҆ лꙋна̀ и҆ є҆динона́десѧть ѕвѣ́здъ покланѧ́хꙋсѧ мнѣ̀.
|
|
10
|
10
|
|
И запрети́ єму́ оте́цъ єго́ и рече́ єму́: что́ со́нъ се́й, єго́же єси́ ви́дѣлъ? Єда́ прише́дше пріи́демъ а́зъ и ма́ти твоя́ и бра́тія твоя́ поклони́тися тебѣ́ до земли́?
|
И҆ запретѝ є҆мꙋ̀ ѻ҆те́цъ є҆гѡ̀ и҆ речѐ є҆мꙋ̀: что̀ со́нъ се́й, є҆го́же є҆сѝ ви́дѣлъ; є҆да̀ прише́дше прїи́демъ а҆́зъ и҆ ма́ти твоѧ̀ и҆ бра́тїѧ твоѧ̑ поклони́тисѧ тебѣ̀ до землѝ;
|
|
11
|
11
|
|
Позави́дѣша же єму́ бра́тія єго́: оте́цъ же єго́ соблюде́ сло́во сіє́.
|
Позави́дѣша же є҆мꙋ̀ бра́тїѧ є҆гѡ̀: ѻ҆те́цъ же є҆гѡ̀ соблюдѐ сло́во сїѐ.
|
|
12
|
12
|
|
Отидо́ша же бра́тія єго́ пасти́ о́вцы отца́ своєго́ въ Сихе́мъ.
|
Ѿидо́ша же бра́тїѧ є҆гѡ̀ пастѝ ѻ҆́вцы ѻ҆тца̀ своегѡ̀ въ сѷхе́мъ.
|
|
13
|
13
|
|
И рече́ Ізра́иль ко Іо́сифу: єда́ бра́тія твоя́ не пасу́тъ въ Сихе́мѣ? Гряди́, да послю́ тя къ ни́мъ. Рече́ же єму́: се́, а́зъ.
|
И҆ речѐ і҆и҃ль ко і҆ѡ́сифꙋ: є҆да̀ бра́тїѧ твоѧ̑ не пасꙋ́тъ въ сѷхе́мѣ; грѧдѝ, да послю́ тѧ къ ни̑мъ. Рече́ же є҆мꙋ̀: сѐ, а҆́зъ.
|
|
14
|
14
|
|
Рече́ же єму́ Ізра́иль: ше́дъ, ви́ждь, а́ще здра́вствуютъ бра́тія твоя́ и о́вцы, и повѣ́ждь ми́. И посла́ єго́ от юдо́ли Хевро́ни. И пріи́де въ Сихе́мъ:
|
Рече́ же є҆мꙋ̀ і҆и҃ль: ше́дъ, ви́ждь, а҆́ще здра́вствꙋютъ бра́тїѧ твоѧ̑ и҆ ѻ҆́вцы, и҆ повѣ́ждь мѝ. И҆ посла̀ є҆го̀ ѿ ю҆до́ли хеврѡ́ни. И҆ прїи́де въ сѷхе́мъ:
|
|
15
|
15
|
|
и обрѣ́те єго́ человѣ́къ заблужда́юща на по́ли: вопроси́ же єго́ человѣ́къ глаго́ля: чесого́ и́щеши?
|
и҆ ѡ҆брѣ́те є҆го̀ человѣ́къ заблꙋжда́юща на по́ли: вопроси́ же є҆го̀ человѣ́къ глаго́лѧ: чесогѡ̀ и҆́щеши;
|
|
16
|
16
|
|
О́нъ же рече́: бра́тіи моєя́ ищу́: повѣ́ждь ми́, гдѣ́ пасу́тъ.
|
Ѻ҆́нъ же речѐ: бра́тїи моеѧ̀ и҆щꙋ̀: повѣ́ждь мѝ, гдѣ̀ пасꙋ́тъ.
|
|
17
|
17
|
|
Рече́ же єму́ человѣ́къ: отидо́ша отсю́ду: слы́шахъ бо и́хъ глаго́лющихъ: по́йдемъ въ Доѳаі́мъ. И и́де Іо́сифъ вслѣ́дъ бра́тіи своєя́ и обрѣ́те я́ въ Доѳаі́мѣ.
|
Рече́ же є҆мꙋ̀ человѣ́къ: ѿидо́ша ѿсю́дꙋ: слы́шахъ бо и҆̀хъ глаго́лющихъ: по́йдемъ въ дѡѳаі́мъ. И҆ и҆́де і҆ѡ́сифъ в̾слѣ́дъ бра́тїи своеѧ̀ и҆ ѡ҆брѣ́те ѧ҆̀ въ дѡѳаі́мѣ.
|
|
18
|
18
|
|
Предузрѣ́ша же єго́ издале́че, пре́жде приближе́нія єго́ къ ни́мъ, и злѣ́ умы́слиша уби́ти єго́:
|
Пред̾ꙋзрѣ́ша же є҆го̀ и҆здале́че, пре́жде приближе́нїѧ є҆гѡ̀ къ ни̑мъ, и҆ ѕлѣ̀ оу҆мы́слиша оу҆би́ти є҆го̀:
|
|
19
|
19
|
|
рече́ же кі́йждо къ бра́ту своєму́: се́, снови́децъ о́ный и́детъ:
|
рече́ же кі́йждо къ бра́тꙋ своемꙋ̀: сѐ, снови́децъ ѻ҆́ный и҆́детъ:
|
|
20
|
20
|
|
ны́нѣ у́бо пріиди́те, убіє́мъ єго́ и вве́ржимъ єго́ во єди́нъ от рво́въ, и рече́мъ: звѣ́рь лю́тъ снѣде́ єго́: и у́зримъ, что́ бу́дутъ со́нія єго́.
|
нн҃ѣ оу҆̀бо прїиди́те, оу҆бїе́мъ є҆го̀ и҆ вве́ржимъ є҆го̀ во є҆ди́нъ ѿ рвѡ́въ, и҆ рече́мъ: ѕвѣ́рь лю́тъ снѣдѐ є҆го̀: и҆ оу҆́зримъ, что̀ бꙋ́дꙋтъ сѡ́нїѧ є҆гѡ̀.
|
|
21
|
21
|
|
Слы́шавъ же Руви́мъ, отъя́ єго́ изъ ру́къ и́хъ и рече́: не убіє́мъ єго́ на души́.
|
Слы́шавъ же рꙋви́мъ, ѿѧ̀ є҆го̀ и҆з̾ рꙋ́къ и҆́хъ и҆ речѐ: не оу҆бїе́мъ є҆го̀ на дꙋшѝ.
|
|
22
|
22
|
|
Рече́ же и́мъ Руви́мъ: не пролі́йте кро́ве, вве́рзите єго́ во єди́нъ от рво́въ си́хъ, и́же въ пусты́ни, руки́ же не возложи́те на него́: [тща́шеся бо] я́ко да изы́метъ єго́ от ру́къ и́хъ и отда́стъ єго́ отцу́ своєму́.
|
Рече́ же и҆̀мъ рꙋви́мъ: не пролі́йте кро́ве, вве́рзите є҆го̀ во є҆ди́нъ ѿ рвѡ́въ си́хъ, и҆̀же въ пꙋсты́ни, рꙋки́ же не возложи́те на него̀: (тща́шесѧ бо) ꙗ҆́кѡ да и҆зы́метъ є҆го̀ ѿ рꙋ́къ и҆́хъ и҆ ѿда́стъ є҆го̀ ѻ҆тцꙋ̀ своемꙋ̀.
|
|
23
|
23
|
|
Бы́сть же єгда́ пріи́де Іо́сифъ къ бра́тіи своє́й, совлеко́ша со Іо́сифа ри́зу пе́струю, я́же на не́мъ,
|
Бы́сть же є҆гда̀ прїи́де і҆ѡ́сифъ къ бра́тїи свое́й, совлеко́ша со і҆ѡ́сифа ри́зꙋ пе́стрꙋю, ꙗ҆́же на не́мъ,
|
|
24
|
24
|
|
и поє́мше єго́ вверго́ша въ ро́въ: ро́въ же то́щь, воды́ не имя́ше.
|
и҆ пое́мше є҆го̀ вверго́ша въ ро́въ: ро́въ же то́щь, воды̀ не и҆мѧ́ше.
|
|
25
|
25
|
|
И сѣдо́ша я́сти хлѣ́бъ, и воззрѣ́вше очи́ма ви́дѣша, и се́, пу́тницы Ісма́илтяне идя́ху от Галаа́да, и велблю́ды и́хъ по́лны ѳиміа́ма и риті́ны {ту́къ масти́тый изъ дрѣ́ва теку́щій} и ста́кти: идя́ху же везу́ще во Єги́петъ.
|
И҆ сѣдо́ша ꙗ҆́сти хлѣ́бъ, и҆ воззрѣ́вше ѻ҆чи́ма ви́дѣша, и҆ сѐ, пꙋ̑тницы і҆сма́илтѧне и҆дѧ́хꙋ ѿ галаа́да, и҆ велблю́ды и҆́хъ пѡ́лны ѳѷмїа́ма и҆ риті́ны [тꙋ́къ масти́тый и҆з̾ дрѣ́ва текꙋ́щїй] и҆ ста́кти: и҆дѧ́хꙋ же везꙋ́ще во є҆гѵ́петъ.
|
|
26
|
26
|
|
Рече́ же Іу́да ко бра́тіи своє́й: ка́я по́льза, а́ще убіє́мъ бра́та на́шего и скры́ємъ кро́вь єго́?
|
Рече́ же і҆ꙋ́да ко бра́тїи свое́й: ка́ѧ по́льза, а҆́ще оу҆бїе́мъ бра́та на́шего и҆ скры́емъ кро́вь є҆гѡ̀;
|
|
27
|
27
|
|
Гряди́те продади́мъ єго́ Ісма́илтяномъ си́мъ: ру́цѣ же на́ши да не бу́дутъ на не́мъ, я́ко бра́тъ на́шъ и пло́ть на́ша є́сть. Послу́шаша же бра́тія єго́.
|
грѧди́те продади́мъ є҆го̀ і҆сма́илтѧнѡмъ си̑мъ: рꙋ́цѣ же на́ши да не бꙋ́дꙋтъ на не́мъ, ꙗ҆́кѡ бра́тъ на́шъ и҆ пло́ть на́ша є҆́сть. Послꙋ́шаша же бра́тїѧ є҆гѡ̀.
|
|
28
|
28
|
|
И мимоидо́ша человѣ́цы Мадіа́мстіи купцы́: и извлеко́ша и возведо́ша Іо́сифа изъ ро́ва, и прода́ша Іо́сифа Ісма́илтяномъ на два́десять златни́цъ. И поведо́ша Іо́сифа во Єги́петъ.
|
И҆ мимоидо́ша человѣ́цы мадїа́мстїи кꙋпцы̀: и҆ и҆звлеко́ша и҆ возведо́ша і҆ѡ́сифа и҆з̾ ро́ва, и҆ прода́ша і҆ѡ́сифа і҆сма́илтѧнѡмъ на два́десѧть златни́цъ. И҆ поведо́ша і҆ѡ́сифа во є҆гѵ́петъ.
|
|
29
|
29
|
|
Возврати́ся же Руви́мъ къ ро́ву и не узрѣ́ Іо́сифа въ ро́вѣ: и растерза́ ри́зы своя́,
|
Возврати́сѧ же рꙋви́мъ къ ро́вꙋ и҆ не оу҆зрѣ̀ і҆ѡ́сифа въ ро́вѣ: и҆ растерза̀ ри̑зы своѧ̑,
|
|
30
|
30
|
|
и пріи́де ко бра́тіи своє́й и рече́: о́трочища нѣ́сть, а́зъ же ка́мо иду́ ктому́?
|
и҆ прїи́де ко бра́тїи свое́й и҆ речѐ: ѻ҆́трочища нѣ́сть, а҆́зъ же ка́мѡ и҆дꙋ̀ ктомꙋ̀;
|
|
31
|
31
|
|
Взе́мше же ри́зу Іо́сифову, закла́ша ко́злище от ко́зъ и пома́заша ри́зу кро́вію:
|
Взе́мше же ри́зꙋ і҆ѡ́сифовꙋ, закла́ша ко́злище ѿ ко́зъ и҆ пома́заша ри́зꙋ кро́вїю:
|
|
32
|
32
|
|
и посла́ша ри́зу пе́струю, и принесо́ша ко отцу́ своєму́ и реко́ша: сію́ обрѣто́хомъ: познава́й, а́ще ри́за сы́на твоєго́ є́сть, или́ ни́?
|
и҆ посла́ша ри́зꙋ пе́стрꙋю, и҆ принесо́ша ко ѻ҆тцꙋ̀ своемꙋ̀ и҆ реко́ша: сїю̀ ѡ҆брѣто́хомъ: познава́й, а҆́ще ри́за сы́на твоегѡ̀ є҆́сть, и҆лѝ нѝ;
|
|
33
|
33
|
|
И позна́ ю́ и рече́: ри́за сы́на моєго́ є́сть: звѣ́рь лю́тъ снѣде́ єго́: звѣ́рь восхи́ти Іо́сифа.
|
И҆ позна̀ ю҆̀ и҆ речѐ: ри́за сы́на моегѡ̀ є҆́сть: ѕвѣ́рь лю́тъ снѣдѐ є҆го̀: ѕвѣ́рь восхи́ти і҆ѡ́сифа.
|
|
34
|
34
|
|
И растерза́ Іа́ковъ ри́зы своя́, и возложи́ вре́тище на чре́сла своя́, и пла́кашеся сы́на своєго́ дни́ мно́ги.
|
И҆ растерза̀ і҆а́кѡвъ ри̑зы своѧ̑, и҆ возложѝ вре́тище на чрє́сла своѧ̑, и҆ пла́кашесѧ сы́на своегѡ̀ дни̑ мнѡ́ги.
|
|
35
|
35
|
|
Собра́шася же вси́ сы́нове єго́ и дще́ри и пріидо́ша утѣ́шити єго́: и не хотя́ше утѣ́шитися, глаго́ля: я́ко сни́ду къ сы́ну моєму́ сѣ́туя во а́дъ. И пла́кася о не́мъ оте́цъ єго́.
|
Собра́шасѧ же всѝ сы́нове є҆гѡ̀ и҆ дщє́ри и҆ прїидо́ша оу҆тѣ́шити є҆го̀: и҆ не хотѧ́ше оу҆тѣ́шитисѧ, глаго́лѧ: ꙗ҆́кѡ сни́дꙋ къ сы́нꙋ моемꙋ̀ сѣ́тꙋѧ во а҆́дъ. И҆ пла́касѧ ѡ҆ не́мъ ѻ҆те́цъ є҆гѡ̀.
|
|
36
|
36
|
|
Мадіа́не же прода́ша Іо́сифа во Єги́петъ Пентефрі́ю євну́ху фарао́нову, архімагі́ру.
|
Мадїа́не же прода́ша і҆ѡ́сифа во є҆гѵ́петъ пентефрі́ю є҆ѵнꙋ́хꙋ фараѡ́новꙋ, а҆рхїмагі́рꙋ.
|
