У вибраній версії цього розділу немає
Глава 17
1
И бы́сть му́жъ от горы́ Єфре́мли, и и́мя єму́ мі́ха:
2
и рече́ ма́тери своє́й: ты́сяща и сто́ сре́брениковъ и́же укра́дены у тебе́, и заклина́ла мя́ єси́ и глаго́лала єси́ во у́шы мои́: се́, сребро́ у мене́, а́зъ взя́хъ є́. И рече́ ма́ти єго́: благослове́нъ сы́нъ мо́й Го́сподеви.
3
И отдаде́ ты́сящу и сто́ сре́брениковъ ма́тери своє́й. И рече́ ма́ти єго́: освяща́ющи освяти́хъ сребро́ Го́сподеви от руки́ моєя́, тебѣ́ сы́нови моєму́ сотвори́ти [кумі́ръ] изва́янъ и слія́нъ, и ны́нѣ отда́мъ є́ тебѣ́.
4
И отдаде́ сребро́ ма́тери своє́й. И взя́ ма́ти єго́ двѣ́сти сре́брениковъ и даде́ и́хъ сребродѣ́лю, и сотвори́ то́є [кумі́ръ] изва́янъ и слія́нъ: и бы́сть въ дому́ мі́хи.
5
И до́мъ мі́хинъ єму́ до́мъ Бо́жій. И сотвори́ Єфу́дъ {Гре́ч.: єпомі́съ, славе́н.: нара́мникъ.} и ѳерафі́нъ {і́доли}: и напо́лни ру́ку єди́ному от сыно́въ свои́хъ, и бы́сть єму́ жре́цъ.
6
Въ ты́я же дни́ не бя́ше царя́ во Ізра́или: кі́йждо му́жъ, є́же пра́во ви́дяшеся предъ очи́ма єго́, творя́ше.
7
И бы́сть ю́ноша от Виѳлеє́ма Іу́дина и от ро́да пле́мене Іу́дина, и се́й Леві́тинъ, и обита́ше та́мо:
8
и по́йде се́й му́жъ от гра́да Виѳлеє́ма Іу́дина обита́ти, идѣ́же обря́щетъ мѣ́сто: и пріи́де до горы́ Єфре́мли и да́же до до́му мі́хина, є́же сотвори́ти пу́ть сво́й.
9
И рече́ єму́ мі́ха: отку́ду и́деши? И рече́ єму́ Леві́тинъ: а́зъ є́смь от Виѳлеє́ма Іу́дина, и иду́ обита́ти, идѣ́же обря́щу мѣ́сто.
10
И рече́ єму́ мі́ха: сѣди́ со мно́ю и бу́ди ми́ оте́цъ и жре́цъ, и а́зъ да́мъ тебѣ́ сре́брениковъ де́сять въ го́дъ и дво́и ри́зы, и я́же на житіє́ тебѣ́.
11
И по́йде леві́тъ, и нача́ обита́ти у му́жа. И бы́сть ю́ноша єму́ я́ко єди́нъ от сыно́въ єго́.
12
И напо́лни мі́ха ру́ку Леві́тину, и бы́сть єму́ ю́ноша жре́цъ, и бя́ше въ дому́ мі́хи.
13
И рече́ мі́ха: ны́нѣ увѣ́дѣхъ, я́ко благосотвори́тъ мнѣ́ Госпо́дь, я́ко бы́сть мнѣ́ Леві́тинъ жре́цъ.
