Глава 28
1
Бѣ́гаєтъ нечести́вый ни єди́ному же гоня́щу, пра́ведный же я́ко ле́въ упова́я.
2
За грѣхи́ нечести́выхъ су́дове востаю́тъ: му́жъ же хи́трый угаси́тъ я́.
3
Проде́рзый въ нече́стіихъ оклевета́єтъ ни́щыя, я́коже до́ждь си́льный не поле́зенъ:
4
та́ко оста́вившіи зако́нъ хва́лятъ нече́стіє, лю́бящіи же зако́нъ огражда́ютъ себѣ́ стѣ́ну.
5
Му́жіє злі́и не уразумѣ́ютъ суда́, и́щущіи же Го́спода уразумѣ́ютъ о все́мъ.
6
Лу́чше ни́щь ходя́й во и́стинѣ, не́жели бога́тъ ло́жь.
7
Храни́тъ зако́нъ сы́нъ разу́мный: а и́же пасе́тъ несы́тость, безче́ститъ отца́ своєго́.
8
Умножа́яй бога́тство своє́ съ ли́хвами и прибы́тки ми́лующему ни́щыя собира́єтъ є́.
9
Укланя́яй у́хо своє́ не послу́шати зако́на и са́мъ моли́тву свою́ омерзи́лъ.
10
И́же льсти́тъ пра́выя на пути́ злѣ́мъ, во истлѣ́ніє са́мъ впаде́тъ: беззако́нніи же мину́ютъ блага́я и не вни́дутъ въ ня́.
11
Прему́дръ у себе́ му́жъ бога́тый, убо́гій же разуми́въ пре́зритъ єго́.
12
По́мощію пра́ведныхъ мно́га быва́єтъ сла́ва, на мѣ́стѣхъ же нечести́выхъ погиба́ютъ человѣ́цы.
13
Покрыва́яй нече́стіє своє́ не успѣ́єтъ во блага́я, повѣ́дая же обличе́нія возлю́бленъ бу́детъ.
14
Блаже́нъ му́жъ, и́же бои́тся всѣ́хъ за благоговѣ́ніє, а жестосе́рдый впа́даєтъ во зла́я.
15
Ле́въ а́лченъ и во́лкъ жа́жденъ, и́же тира́нствуєтъ {мучи́тельски облада́єтъ}, ни́щь сы́й, надъ язы́комъ убо́гимъ.
16
Ца́рь ску́денъ уро́комъ вели́къ клеветни́къ [быва́єтъ], а ненави́дяй непра́вды до́лго лѣ́тъ поживе́тъ.
17
Му́жа, и́же въ винѣ́ сме́ртнѣ, выруча́яй бѣгле́цъ бу́детъ, а не утвержде́нъ. Наказу́й сы́на, и возлю́битъ тя́ и да́стъ лѣ́поту твоє́й души́, не послу́шаєтъ язы́ка законопресту́пна.
18
Ходя́й пра́ведно по́мощь пріи́метъ, ходя́й же въ стро́потны пути́ увя́знетъ.
19
Дѣ́лаяй свою́ зе́млю насы́тится хлѣ́бовъ, гоня́й же пра́здность насы́тится нищеты́.
20
Му́жъ вѣ́ры досто́йный мно́го благослови́тся, злы́й же не безъ муче́нія бу́детъ.
21
И́же не срамля́єтся лица́ пра́ведныхъ, не бла́гъ: таковы́й за укру́хъ хлѣ́ба прода́стъ му́жа.
22
Тщи́тся обогати́тися му́жъ зави́дливъ, и не вѣ́сть, я́ко ми́лостивый возоблада́єтъ и́мъ.
23
Облича́яй человѣ́чы пути́ благода́ть и́мать па́че язы́комъ ласка́ющаго.
24
И́же отверга́єтъ отца́ или́ ма́терь и мни́тся не согрѣша́ти, се́й соприча́стникъ є́сть му́жу нечести́ву.
25
Невѣ́рный му́жъ су́дитъ ту́не, а и́же надѣ́єтся на Го́спода, въ прилѣжа́ніи бу́детъ.
26
И́же надѣ́єтся на де́рзо се́рдце, таковы́й безу́менъ: а и́же хо́дитъ въ прему́дрости, спасе́тся.
27
И́же дає́тъ убо́гимъ, не оскудѣ́єтъ: а и́же отвраща́єтъ о́ко своє́, въ ску́дости бу́детъ мно́зѣ.
28
На мѣ́стѣхъ нечести́выхъ стеня́тъ пра́ведніи, въ поги́бели же и́хъ умно́жатся пра́ведніи.
