|
Глава́ ѕ҃і
|
Глава 16
|
|
1
|
1
|
|
И҆ бы́сть сло́во гдⷭ҇не ко мнѣ̀ гл҃ѧ:
|
И бы́сть сло́во Госпо́дне ко мнѣ́ глаго́ля:
|
|
2
|
2
|
|
сы́не человѣ́чь, засвидѣ́телствꙋй і҆ерⷭ҇ли́мꙋ беззакѡ́нїѧ є҆гѡ̀
|
сы́не человѣ́чь, засвидѣ́телствуй Ієрусали́му беззако́нія єго́
|
|
3
|
3
|
|
и҆ рече́ши: сїѧ̑ гл҃етъ а҆дѡнаі̀ гдⷭ҇ь дще́ри і҆ерⷭ҇ли́мстѣй: ко́рень тво́й и҆ бытїѐ твоѐ ѿ землѝ ханане́йски: ѻ҆те́цъ тво́й а҆морре́анинъ и҆ ма́ти твоѧ̀ хетте́анынѧ:
|
и рече́ши: сія́ глаго́летъ Адонаі́ Госпо́дь дще́ри Ієрусали́мстѣй: ко́рень тво́й и бытіє́ твоє́ от земли́ Ханане́йски: оте́цъ тво́й Аморре́анинъ и ма́ти твоя́ Хетте́аныня:
|
|
4
|
4
|
|
и҆ рожде́нїе твоѐ, въ ѻ҆́ньже де́нь роди́ласѧ є҆сѝ, не ѡ҆бѧза́ша сосє́цъ твои́хъ [Є҆вр.: не ѿрѣ́заша тѝ пꙋ́па.], и҆ водо́ю не ѡ҆мы́ша тѧ̀ на спасе́нїе, ни со́лїю ѡ҆соли́ша, нижѐ пелена́ми пови́ша:
|
и рожде́ніє твоє́, въ о́ньже де́нь роди́лася єси́, не обяза́ша сосе́цъ твои́хъ {Євр.: не отрѣ́заша ти́ пу́па.}, и водо́ю не омы́ша тя́ на спасе́ніє, ни со́лію осоли́ша, ниже́ пелена́ми пови́ша:
|
|
5
|
5
|
|
и҆ не пощадѣ̀ тебѐ ѻ҆́ко моѐ, є҆́же сотвори́ти тебѣ̀ є҆ди́но ѿ всѣ́хъ си́хъ, пострада́ти что̀ ѡ҆ тебѣ̀, и҆ ѿве́ржена была̀ є҆сѝ на лицѐ по́лѧ стро́потствомъ дꙋшѝ твоеѧ̀, въ де́нь въ ѻ҆́ньже роди́ласѧ є҆сѝ.
|
и не пощадѣ́ тебе́ о́ко моє́, є́же сотвори́ти тебѣ́ єди́но от всѣ́хъ си́хъ, пострада́ти что́ о тебѣ́, и отве́ржена была́ єси́ на лице́ по́ля стро́потствомъ души́ твоєя́, въ де́нь въ о́ньже роди́лася єси́.
|
|
6
|
6
|
|
И҆ проидо́хъ сквозѣ́ тѧ и҆ ви́дѣхъ тѧ̀ смѣ́шенꙋ во кро́ви твое́й и҆ реко́хъ тѝ: ѿ кро́ве твоеѧ̀ жива̀ бꙋ́ди: и҆ реко́хъ тебѣ̀: во кро́ви твое́й живо́тъ тво́й:
|
И проидо́хъ сквозѣ́ тя и ви́дѣхъ тя́ смѣ́шену во кро́ви твоє́й и реко́хъ ти́: от кро́ве твоєя́ жива́ бу́ди: и реко́хъ тебѣ́: во кро́ви твоє́й живо́тъ тво́й:
|
|
7
|
7
|
|
оу҆множа́йсѧ, ꙗ҆́коже прозѧбе́нїе се́лное да́хъ тѧ̀, и҆ оу҆мно́жиласѧ є҆сѝ и҆ возвели́чиласѧ и҆ вошла̀ є҆сѝ во гра́ды градѡ́въ: сосцы̀ твоѝ возрасто́ша, и҆ вла́си твоѝ просвѣтлѣ́ша, ты́ же была̀ є҆сѝ нага̀ и҆ без̾ красы̀.
|
умножа́йся, я́коже прозябе́ніє се́лноє да́хъ тя́, и умно́жилася єси́ и возвели́чилася и вошла́ єси́ во гра́ды градо́въ: сосцы́ твои́ возрасто́ша, и вла́си твои́ просвѣтлѣ́ша, ты́ же была́ єси́ нага́ и безъ красы́.
|
|
8
|
8
|
|
И҆ проидо́хъ сквозѣ́ тѧ и҆ ви́дѣхъ тѧ̀: и҆ сѐ, вре́мѧ твоѐ, ꙗ҆́кѡ вре́мѧ вита́ющихъ: и҆ простро́хъ крилѣ̑ моѝ на тѧ̀ и҆ прикры́хъ стꙋ́дъ тво́й, и҆ клѧ́хсѧ тебѣ̀ и҆ внидо́хъ въ завѣ́тъ съ тобо́ю, гл҃етъ а҆дѡнаі̀ гдⷭ҇ь, и҆ была̀ є҆сѝ мнѣ̀:
|
И проидо́хъ сквозѣ́ тя и ви́дѣхъ тя́: и се́, вре́мя твоє́, я́ко вре́мя вита́ющихъ: и простро́хъ крилѣ́ мои́ на тя́ и прикры́хъ сту́дъ тво́й, и кля́хся тебѣ́ и внидо́хъ въ завѣ́тъ съ тобо́ю, глаго́летъ Адонаі́ Госпо́дь, и была́ єси́ мнѣ́:
|
|
9
|
9
|
|
и҆ ѡ҆мы́хъ тѧ̀ водо́ю и҆ ѡ҆полоска́хъ кро́вь твою̀ ѿ тебє̀ и҆ пома́захъ тѧ̀ є҆ле́емъ,
|
и омы́хъ тя́ водо́ю и ополоска́хъ кро́вь твою́ от тебе́ и пома́захъ тя́ єле́ємъ,
|
|
10
|
10
|
|
и҆ ѡ҆блеко́хъ тѧ̀ въ пестрѡты̀ и҆ ѡ҆бꙋ́хъ тѧ̀ въ червлє́ны, и҆ препоѧ́сахъ тѧ̀ вѷссо́номъ и҆ возложи́хъ на тѧ̀ трїха́птонъ,
|
и облеко́хъ тя́ въ пестроты́ и обу́хъ тя́ въ червле́ны, и препоя́сахъ тя́ виссо́номъ и возложи́хъ на тя́ тріха́птонъ,
|
|
11
|
11
|
|
и҆ оу҆краси́хъ тѧ̀ оу҆́тварїю и҆ возложи́хъ запѧ́стїе на рꙋ́цѣ твоѝ и҆ гри́внꙋ на вы́ю твою̀,
|
и украси́хъ тя́ у́тварію и возложи́хъ запя́стіє на ру́цѣ твои́ и гри́вну на вы́ю твою́,
|
|
12
|
12
|
|
и҆ да́хъ оу҆серѧ̑зи на нѡ́здри твоѧ̑ и҆ ко́лца во оу҆́шы твоѝ и҆ вѣне́цъ хвалы̀ на главꙋ̀ твою̀:
|
и да́хъ усеря́зи на но́здри твоя́ и ко́лца во у́шы твои́ и вѣне́цъ хвалы́ на главу́ твою́:
|
|
13
|
13
|
|
и҆ оу҆краше́нна была̀ є҆сѝ зла́томъ и҆ сребро́мъ, и҆ ѻ҆дє́жды твоѧ̑ вѷссѡ́нны и҆ трїха́пты и҆ и҆спещрє́нїѧ, семїда́лъ и҆ ме́дъ и҆ ма́сло ꙗ҆́ла є҆сѝ, и҆ была̀ є҆сѝ добра̀ ѕѣлѡ̀ ѕѣлѡ̀, и҆ оу҆пра́виласѧ є҆сѝ на ца́рство:
|
и украше́нна была́ єси́ зла́томъ и сребро́мъ, и оде́жды твоя́ виссо́нны и тріха́пты и испещре́нія, семіда́лъ и ме́дъ и ма́сло я́ла єси́, и была́ єси́ добра́ зѣло́ зѣло́, и упра́вилася єси́ на ца́рство:
|
|
14
|
14
|
|
и҆ и҆зы́де и҆́мѧ твоѐ во ꙗ҆зы́ки въ добро́тѣ твое́й, занѐ соверше́нно бѣ̀ лѣ́потою въ красотѣ̀, ю҆́же оу҆чини́хъ на тебѣ̀, гл҃етъ а҆дѡнаі̀ гдⷭ҇ь.
|
и изы́де и́мя твоє́ во язы́ки въ добро́тѣ твоє́й, зане́ соверше́нно бѣ́ лѣ́потою въ красотѣ́, ю́же учини́хъ на тебѣ́, глаго́летъ Адонаі́ Госпо́дь.
|
|
15
|
15
|
|
Ты́ же оу҆пова́ла є҆сѝ на добро́тꙋ твою̀ и҆ соблꙋди́ла є҆сѝ во и҆́мени твое́мъ и҆ и҆злїѧ́ла є҆сѝ блꙋже́нїе твоѐ на всѧ́каго мимоходѧ́щаго, томꙋ̀ была̀ є҆сѝ, є҆мꙋ́же не подоба́ше:
|
Ты́ же упова́ла єси́ на добро́ту твою́ и соблуди́ла єси́ во и́мени твоє́мъ и излія́ла єси́ блуже́ніє твоє́ на вся́каго мимоходя́щаго, тому́ была́ єси́, єму́же не подоба́ше:
|
|
16
|
16
|
|
и҆ взѧла̀ є҆сѝ ѿ ри́зъ твои́хъ и҆ сотвори́ла себѣ̀ кꙋмі́ры сошвє́ныѧ и҆ соблꙋди́ла є҆сѝ съ ни́ми, и҆ не вни́деши, и҆ не бꙋ́детъ.
|
и взяла́ єси́ от ри́зъ твои́хъ и сотвори́ла себѣ́ кумі́ры сошве́ныя и соблуди́ла єси́ съ ни́ми, и не вни́деши, и не бу́детъ.
|
|
17
|
17
|
|
И҆ взѧла̀ є҆сѝ сосꙋ́ды хвалы̀ твоеѧ̀ ѿ сребра̀ моегѡ̀ и҆ зла́та моегѡ̀, ѿ ни́хже да́хъ тебѣ̀, и҆ сотвори́ла себѣ̀ ѡ҆́бразы мꙋ́жєски, и҆ соблꙋди́ла є҆сѝ въ ни́хъ.
|
И взяла́ єси́ сосу́ды хвалы́ твоєя́ от сребра́ моєго́ и зла́та моєго́, от ни́хже да́хъ тебѣ́, и сотвори́ла себѣ́ о́бразы му́жески, и соблуди́ла єси́ въ ни́хъ.
|
|
18
|
18
|
|
И҆ взѧла̀ є҆сѝ ри̑зы своѧ̑ и҆спещрє́нныѧ и҆ ѡ҆дѣ́ѧласѧ є҆сѝ въ нѧ̀, и҆ ма́сло моѐ и҆ ѳѷмїа́мъ мо́й положи́ла є҆сѝ пред̾ лице́мъ и҆́хъ,
|
И взяла́ єси́ ри́зы своя́ испещре́нныя и одѣ́ялася єси́ въ ня́, и ма́сло моє́ и ѳиміа́мъ мо́й положи́ла єси́ предъ лице́мъ и́хъ,
|
|
19
|
19
|
|
и҆ хлѣ́бы моѧ̑, ꙗ҆̀же да́хъ тебѣ̀, семїда́ломъ и҆ ма́сломъ и҆ ме́домъ напита́хъ тѧ̀, и҆ положи́ла є҆сѝ та̑ пред̾ лице́мъ и҆́хъ въ воню̀ благоꙋха́нїѧ. И҆ бы́сть по си́хъ, гл҃етъ а҆дѡнаі̀ гдⷭ҇ь,
|
и хлѣ́бы моя́, я́же да́хъ тебѣ́, семіда́ломъ и ма́сломъ и ме́домъ напита́хъ тя́, и положи́ла єси́ та́ предъ лице́мъ и́хъ въ воню́ благоуха́нія. И бы́сть по си́хъ, глаго́летъ Адонаі́ Госпо́дь,
|
|
20
|
20
|
|
и҆ взѧла̀ є҆сѝ сы́ны твоѧ̑ и҆ дщє́ри твоѧ̑, ꙗ҆̀же родила̀ є҆сѝ, и҆ закла́ла є҆сѝ и҆̀мъ въ потребле́нїе. Є҆да̀ ма́лѡ соблꙋди́ла є҆сѝ;
|
и взяла́ єси́ сы́ны твоя́ и дще́ри твоя́, я́же родила́ єси́, и закла́ла єси́ и́мъ въ потребле́ніє. Єда́ ма́ло соблуди́ла єси́?
|
|
21
|
21
|
|
И҆ закла́ла є҆сѝ ча̑да твоѧ̑ и҆ дала̀ є҆сѝ ѧ҆̀, внегда̀ принесла̀ є҆сѝ и҆̀хъ на же́ртвꙋ и҆̀мъ.
|
И закла́ла єси́ ча́да твоя́ и дала́ єси́ я́, внегда́ принесла́ єси́ и́хъ на же́ртву и́мъ.
|
|
22
|
22
|
|
Сїѐ па́че всѧ́кагѡ блꙋда̀ твоегѡ̀ и҆ гнꙋ́сностей твои́хъ: и҆ не помѧнꙋ́ла є҆сѝ дні́й младе́нства твоегѡ̀, є҆гда̀ была̀ є҆сѝ нага̀ и҆ без̾ѡбра́зна, и҆ смѣ́шена во кро́ви твое́й жила̀ є҆сѝ.
|
Сіє́ па́че вся́каго блуда́ твоєго́ и гну́сностей твои́хъ: и не помяну́ла єси́ дні́й младе́нства твоєго́, єгда́ была́ єси́ нага́ и безобра́зна, и смѣ́шена во кро́ви твоє́й жила́ єси́.
|
|
23
|
23
|
|
И҆ бы́сть по всѣ́хъ ѕло́бахъ твои́хъ, го́ре го́ре тебѣ̀, гл҃етъ а҆дѡнаі̀ гдⷭ҇ь,
|
И бы́сть по всѣ́хъ зло́бахъ твои́хъ, го́ре го́ре тебѣ́, глаго́летъ Адонаі́ Госпо́дь,
|
|
24
|
24
|
|
и҆ создала̀ є҆сѝ себѣ̀ хра́мъ блꙋдни́ческїй и҆ сотвори́ла себѣ̀ полага̑нїѧ на всѣ́хъ сто́гнахъ:
|
и создала́ єси́ себѣ́ хра́мъ блудни́ческій и сотвори́ла себѣ́ полага́нія на всѣ́хъ сто́гнахъ:
|
|
25
|
25
|
|
и҆ въ нача́лѣ всѧ́кагѡ пꙋтѝ создала̀ є҆сѝ блꙋди̑лища своѧ̑ и҆ растли́ла добро́тꙋ твою̀, и҆ разложи́ла го́лєни твоѧ̑ всѧ́комꙋ мимоходѧ́щемꙋ и҆ оу҆мно́жила є҆сѝ блꙋ́дъ тво́й:
|
и въ нача́лѣ вся́каго пути́ создала́ єси́ блуди́лища своя́ и растли́ла добро́ту твою́, и разложи́ла го́лени твоя́ вся́кому мимоходя́щему и умно́жила єси́ блу́дъ тво́й:
|
|
26
|
26
|
|
и҆ соблꙋди́ла съ сынмѝ є҆гѵ́петскими сосѣ̑ды твои́ми дебелопло́тными, и҆ мно́гажды блꙋди́ла є҆сѝ, є҆́же разгнѣ́вати мѧ̀.
|
и соблуди́ла съ сынми́ Єги́петскими сосѣ́ды твои́ми дебелопло́тными, и мно́гажды блуди́ла єси́, є́же разгнѣ́вати мя́.
|
|
27
|
27
|
|
И҆ сѐ, прострꙋ̀ рꙋ́кꙋ мою̀ на тѧ̀ и҆ ѿве́ргꙋ зако́ны твоѧ̑ и҆ преда́мъ тѧ̀ дꙋша́мъ ненави́дѧщымъ тебѐ, дще́ремъ и҆ноплеме́нникѡвъ, совраща́ющымъ тѧ̀ съ пꙋтѝ твоегѡ̀, и҆́мже нече́ствовала є҆сѝ.
|
И се́, простру́ ру́ку мою́ на тя́ и отве́ргу зако́ны твоя́ и преда́мъ тя́ душа́мъ ненави́дящымъ тебе́, дще́ремъ иноплеме́нниковъ, совраща́ющымъ тя́ съ пути́ твоєго́, и́мже нече́ствовала єси́.
|
|
28
|
28
|
|
И҆ соблꙋди́ла є҆сѝ съ сынмѝ а҆ссѵ́ровыми и҆ нижѐ та́кѡ насы́тиласѧ є҆сѝ: и҆ соблꙋди́ла и҆ не насы́тиласѧ,
|
И соблуди́ла єси́ съ сынми́ Асси́ровыми и ниже́ та́ко насы́тилася єси́: и соблуди́ла и не насы́тилася,
|
|
29
|
29
|
|
и҆ оу҆мно́жила завѣ́ты твоѧ̑ ко землѝ ханане́йстѣй, халде́йстѣй, и҆ нижѐ въ си́хъ насы́тиласѧ є҆сѝ.
|
и умно́жила завѣ́ты твоя́ ко земли́ Ханане́йстѣй, Халде́йстѣй, и ниже́ въ си́хъ насы́тилася єси́.
|
|
30
|
30
|
|
Что̀ сотворю̀ се́рдцꙋ твоемꙋ̀, гл҃етъ а҆дѡнаі̀ гдⷭ҇ь, внегда̀ твори́ши всѧ̑ сїѧ̑ дѣла̀ жены̀ блꙋдни́цы проде́рзыѧ; И҆ соблꙋди́ла є҆сѝ трегꙋ́бѡ во дще́рехъ твои́хъ.
|
Что́ сотворю́ се́рдцу твоєму́, глаго́летъ Адонаі́ Госпо́дь, внегда́ твори́ши вся́ сія́ дѣла́ жены́ блудни́цы проде́рзыя? И соблуди́ла єси́ трегу́бо во дще́рехъ твои́хъ.
|
|
31
|
31
|
|
Є҆гда̀ согради́ла є҆сѝ блꙋди́лище твоѐ въ нача́лѣ всѧ́кагѡ пꙋтѝ и҆ высѡ́каѧ твоѧ̑ сотвори́ла є҆сѝ на всѣ́хъ сто́гнахъ, и҆ не была̀ ꙗ҆́кѡ блꙋдни́ца собира́ющаѧ нае́мъ.
|
Єгда́ согради́ла єси́ блуди́лище твоє́ въ нача́лѣ вся́каго пути́ и высо́кая твоя́ сотвори́ла єси́ на всѣ́хъ сто́гнахъ, и не была́ я́ко блудни́ца собира́ющая нає́мъ.
|
|
32
|
32
|
|
Жена̀ любодѣ́йница подо́бна тебѣ̀, ѿ мꙋ́жа своегѡ̀ взе́млющи нае́мъ,
|
Жена́ любодѣ́йница подо́бна тебѣ́, от му́жа своєго́ взе́млющи нає́мъ,
|
|
33
|
33
|
|
всѣ̑мъ блꙋди́вшымъ съ не́ю даѧ́ше нае́мъ: и҆ ты̀ дала̀ є҆сѝ нае́мъ всѣ̑мъ рачи́телємъ твои̑мъ и҆ ѡ҆бременѧ́ла и҆̀хъ, є҆́же приходи́ти и҆̀мъ къ тебѣ̀ ѿвсю́дꙋ во блꙋжє́нїѧ твоѧ̑.
|
всѣ́мъ блуди́вшымъ съ не́ю дая́ше нає́мъ: и ты́ дала́ єси́ нає́мъ всѣ́мъ рачи́телемъ твои́мъ и обременя́ла и́хъ, є́же приходи́ти и́мъ къ тебѣ́ отвсю́ду во блуже́нія твоя́.
|
|
34
|
34
|
|
И҆ бы́сть въ тебѣ̀ сопроти́вно ѡ҆бы́чаю же́нскꙋ во блꙋже́нїи твое́мъ, и҆ съ тобо́ю соблꙋди́вшымъ, вмѣ́стѡ є҆́же бы да́ти тебѣ̀ нае́мъ, и҆ нае́мъ не даде́сѧ тебѣ̀, и҆ бы́сть въ тебѣ̀ сопроти́вно.
|
И бы́сть въ тебѣ́ сопроти́вно обы́чаю же́нску во блуже́ніи твоє́мъ, и съ тобо́ю соблуди́вшымъ, вмѣ́сто є́же бы да́ти тебѣ́ нає́мъ, и нає́мъ не даде́ся тебѣ́, и бы́сть въ тебѣ́ сопроти́вно.
|
|
35
|
35
|
|
Сегѡ̀ ра́ди слы́ши, блꙋдни́це, сло́во гдⷭ҇не.
|
Сего́ ра́ди слы́ши, блудни́це, сло́во Госпо́дне.
|
|
36
|
36
|
|
Сїѧ̑ гл҃етъ а҆дѡнаі̀ гдⷭ҇ь: занѐ и҆злїѧ́ла є҆сѝ мѣ́дь твою̀, и҆ ѿкры́етсѧ сра́мъ тво́й во блꙋже́нїи твое́мъ ко рачи́телємъ твои̑мъ, и҆ во всѧ̑ помышлє́нїѧ беззако́нїй твои́хъ, и҆ во кро́ви ча̑дъ твои́хъ, ꙗ҆̀же дала̀ є҆сѝ и҆̀мъ:
|
Сія́ глаго́летъ Адонаі́ Госпо́дь: зане́ излія́ла єси́ мѣ́дь твою́, и откры́єтся сра́мъ тво́й во блуже́ніи твоє́мъ ко рачи́телемъ твои́мъ, и во вся́ помышле́нія беззако́ній твои́хъ, и во кро́ви ча́дъ твои́хъ, я́же дала́ єси́ и́мъ:
|
|
37
|
37
|
|
сегѡ̀ ра́ди, сѐ, а҆́зъ на тѧ̀ соберꙋ̀ всѧ̑ похотникѝ твоѧ̑, съ ни́миже смѣси́ласѧ є҆сѝ, и҆ всѣ́хъ, и҆̀хже люби́ла є҆сѝ, со всѣ́ми, и҆̀хже ненави́дѣла є҆сѝ: и҆ соберꙋ̀ ѧ҆̀ на тѧ̀ ѿвсю́дꙋ и҆ ѿкры́ю ѕлѡ́бы твоѧ̑ къ ни̑мъ, и҆ оу҆́зрѧтъ ве́сь сра́мъ тво́й.
|
сего́ ра́ди, се́, а́зъ на тя́ соберу́ вся́ похотники́ твоя́, съ ни́миже смѣси́лася єси́, и всѣ́хъ, и́хже люби́ла єси́, со всѣ́ми, и́хже ненави́дѣла єси́: и соберу́ я́ на тя́ отвсю́ду и откры́ю зло́бы твоя́ къ ни́мъ, и у́зрятъ ве́сь сра́мъ тво́й.
|
|
38
|
38
|
|
И҆ ѿмщꙋ́ ти ѿмще́нїемъ любодѣ́йцы и҆ пролива́ющїѧ кро́вь, и҆ положꙋ́ тѧ во кро́ви ꙗ҆́рости и҆ рве́нїѧ,
|
И отмщу́ ти отмще́ніємъ любодѣ́йцы и пролива́ющія кро́вь, и положу́ тя во кро́ви я́рости и рве́нія,
|
|
39
|
39
|
|
и҆ преда́мъ тѧ̀ въ рꙋ́цѣ и҆́хъ, и҆ раскопа́ютъ блꙋди́лище твоѐ и҆ разорѧ́тъ высѡ́каѧ твоѧ̑, и҆ совлекꙋ́тъ съ тебє̀ ри̑зы твоѧ̑ и҆ во́змꙋтъ сосꙋ́ды хвалы̀ твоеѧ̀, и҆ ѡ҆ста́вѧтъ тѧ̀ на́гꙋ и҆ безстꙋ́днꙋ:
|
и преда́мъ тя́ въ ру́цѣ и́хъ, и раскопа́ютъ блуди́лище твоє́ и разоря́тъ высо́кая твоя́, и совлеку́тъ съ тебе́ ри́зы твоя́ и во́змутъ сосу́ды хвалы́ твоєя́, и оста́вятъ тя́ на́гу и безсту́дну:
|
|
40
|
40
|
|
и҆ приведꙋ́тъ на тѧ̀ наро́ды, и҆ побїю́тъ тебѐ ка́менїемъ и҆ и҆зсѣкꙋ́тъ тѧ̀ мечьмѝ свои́ми,
|
и приведу́тъ на тя́ наро́ды, и побію́тъ тебе́ ка́меніємъ и изсѣку́тъ тя́ мечьми́ свои́ми,
|
|
41
|
41
|
|
и҆ запалѧ́тъ до́мы твоѧ̑ ѻ҆гне́мъ и҆ сотворѧ́тъ въ тебѣ̀ ѿмще́нїе пред̾ жена́ми мно́гими: и҆ ѡ҆бращꙋ́ тѧ ѿ блꙋже́нїѧ, и҆ найма̀ ктомꙋ̀ не да́си.
|
и запаля́тъ до́мы твоя́ огне́мъ и сотворя́тъ въ тебѣ́ отмще́ніє предъ жена́ми мно́гими: и обращу́ тя от блуже́нія, и найма́ ктому́ не да́си.
|
|
42
|
42
|
|
И҆ послю̀ ꙗ҆́рость мою̀ на тѧ̀, и҆ ѿи́метсѧ рве́нїе моѐ ѿ тебє̀: и҆ почі́ю и҆ ктомꙋ̀ не попекꙋ́сѧ.
|
И послю́ я́рость мою́ на тя́, и отъи́мется рве́ніє моє́ от тебе́: и почі́ю и ктому́ не попеку́ся.
|
|
43
|
43
|
|
Поне́же не помѧнꙋ́ла є҆сѝ дні́й младе́нства твоегѡ̀ и҆ ѡ҆печа́лила мѧ̀ во всѣ́хъ си́хъ: и҆ сѐ, а҆́зъ пꙋти̑ твоѧ̑ на главꙋ̀ твою̀ да́хъ, гл҃етъ а҆дѡнаі̀ гдⷭ҇ь: и҆ та́кѡ сотвори́ла є҆сѝ нече́стїе по всѣ̑мъ беззако́нїємъ твои̑мъ.
|
Поне́же не помяну́ла єси́ дні́й младе́нства твоєго́ и опеча́лила мя́ во всѣ́хъ си́хъ: и се́, а́зъ пути́ твоя́ на главу́ твою́ да́хъ, глаго́летъ Адонаі́ Госпо́дь: и та́ко сотвори́ла єси́ нече́стіє по всѣ́мъ беззако́ніємъ твои́мъ.
|
|
44
|
44
|
|
Сїѧ̑ сꙋ́ть всѧ̑, є҆ли̑ка реко́ша на тѧ̀ въ при́тчи, глаго́люще: ꙗ҆́коже ма́ти, та́кѡ и҆ дще́рь.
|
Сія́ су́ть вся́, єли́ка реко́ша на тя́ въ при́тчи, глаго́люще: я́коже ма́ти, та́ко и дще́рь.
|
|
45
|
45
|
|
Дще́рь ма́тере твоеѧ̀ ты̀ є҆сѝ, ѿри́нꙋвшаѧ мꙋ́жа своего̀ и҆ ча̑да своѧ̑: и҆ сєстры̀ се́стръ твои́хъ, ѿри́нꙋвшыѧ мꙋже́й свои́хъ и҆ ча̑дъ свои́хъ: ма́ти ва́ша хетте́анынѧ, а҆ ѻ҆те́цъ ва́шъ а҆морре́й:
|
Дще́рь ма́тере твоєя́ ты́ єси́, отри́нувшая му́жа своєго́ и ча́да своя́: и сестры́ се́стръ твои́хъ, отри́нувшыя муже́й свои́хъ и ча́дъ свои́хъ: ма́ти ва́ша Хетте́аныня, а оте́цъ ва́шъ Аморре́й:
|
|
46
|
46
|
|
сестра̀ ва́ша старѣ́йшаѧ самарі́а, та̀ и҆ дщє́ри є҆ѧ̀ живꙋ́щыѧ ѡ҆шꙋ́юю тебє̀: и҆ сестра̀ твоѧ̀ ме́ншаѧ, живꙋ́щаѧ ѡ҆деснꙋ́ю тебє̀, содо́ма и҆ дщє́ри є҆ѧ̀.
|
сестра́ ва́ша старѣ́йшая самарі́а, та́ и дще́ри єя́ живу́щыя ошу́юю тебе́: и сестра́ твоя́ ме́ншая, живу́щая одесну́ю тебе́, Содо́ма и дще́ри єя́.
|
|
47
|
47
|
|
Но нижѐ по пꙋтє́мъ и҆́хъ ходи́ла є҆сѝ, нижѐ сотвори́ла по беззако́нїємъ и҆́хъ понѐ ма́лѡ, и҆ превозшла̀ є҆сѝ и҆̀хъ во всѣ́хъ пꙋте́хъ твои́хъ.
|
Но ниже́ по путе́мъ и́хъ ходи́ла єси́, ниже́ сотвори́ла по беззако́ніємъ и́хъ поне́ ма́ло, и превозшла́ єси́ и́хъ во всѣ́хъ путе́хъ твои́хъ.
|
|
48
|
48
|
|
Живꙋ̀ а҆́зъ, гл҃етъ а҆дѡнаі̀ гдⷭ҇ь, не сотвори́ла содо́ма сїѧ̀ сестра̀ твоѧ̀ и҆ дщє́ри є҆ѧ̀, ꙗ҆́коже ты̀ сотвори́ла и҆ дщє́ри твоѧ̑.
|
Живу́ а́зъ, глаго́летъ Адонаі́ Госпо́дь, не сотвори́ла Содо́ма сія́ сестра́ твоя́ и дще́ри єя́, я́коже ты́ сотвори́ла и дще́ри твоя́.
|
|
49
|
49
|
|
Ѻ҆ба́че сїѐ беззако́нїе содо́мы сестры̀ твоеѧ̀, го́рдость въ сы́тости хлѣ́ба и҆ во и҆з̾ѻби́лїи вїна̀, и҆ сластолю́бствоваша та̀ и҆ дщє́ри є҆ѧ̀: сїѐ бѧ́ше є҆́й и҆ дще́ремъ є҆ѧ̀: и҆ рꙋкѝ оу҆бо́гомꙋ и҆ ни́щемꙋ не подаѧ́хꙋ,
|
Оба́че сіє́ беззако́ніє Содо́мы сестры́ твоєя́, го́рдость въ сы́тости хлѣ́ба и во изоби́ліи віна́, и сластолю́бствоваша та́ и дще́ри єя́: сіє́ бя́ше є́й и дще́ремъ єя́: и руки́ убо́гому и ни́щему не подая́ху,
|
|
50
|
50
|
|
и҆ велича́хꙋсѧ, и҆ сотвори́ша беззакѡ́нїѧ предо мно́ю: и҆ ѿверго́хъ ѧ҆̀ ꙗ҆́коже ви́дѣхъ.
|
и велича́хуся, и сотвори́ша беззако́нія предо мно́ю: и отверго́хъ я́ я́коже ви́дѣхъ.
|
|
51
|
51
|
|
Самарі́а же по́лъ грѣхѡ́въ твои́хъ не согрѣшѝ: и҆ оу҆мно́жила є҆сѝ беззакѡ́нїѧ твоѧ̑ па́че ѻ҆́нѣхъ, и҆ ѡ҆правда́ла є҆сѝ сєстры̀ твоѧ̑ во всѣ́хъ беззако́нїихъ твои́хъ, ꙗ҆̀же сотвори́ла є҆сѝ.
|
Самарі́а же по́лъ грѣхо́въ твои́хъ не согрѣши́: и умно́жила єси́ беззако́нія твоя́ па́че о́нѣхъ, и оправда́ла єси́ сестры́ твоя́ во всѣ́хъ беззако́ніихъ твои́хъ, я́же сотвори́ла єси́.
|
|
52
|
52
|
|
И҆ ты̀ прїимѝ мꙋче́нїе твоѐ, въ не́мже растли́ла є҆сѝ сєстры̀ твоѧ̑ во грѣсѣ́хъ твои́хъ, и҆́миже беззако́нновала па́че тѣ́хъ, и҆ ѡ҆правда́ла и҆̀хъ па́че тебє̀: и҆ ты̑ посрами́сѧ и҆ прїимѝ безче́стїе твоѐ, внегда̀ ѡ҆правда́ти тебѣ̀ сєстры̀ твоѧ̑.
|
И ты́ пріими́ муче́ніє твоє́, въ не́мже растли́ла єси́ сестры́ твоя́ во грѣсѣ́хъ твои́хъ, и́миже беззако́нновала па́че тѣ́хъ, и оправда́ла и́хъ па́че тебе́: и ты́ посрами́ся и пріими́ безче́стіє твоє́, внегда́ оправда́ти тебѣ́ сестры́ твоя́.
|
|
53
|
53
|
|
И҆ ѡ҆бращꙋ̀ ѡ҆бращє́нїѧ и҆́хъ, ѡ҆браще́нїе содо́мы и҆ дще́рей є҆ѧ̀, и҆ ѡ҆браще́нїе самарі́и и҆ дщере́й є҆ѧ̀, и҆ ѡ҆бращꙋ̀ ѡ҆браще́нїе твоѐ средѣ̀ и҆́хъ,
|
И обращу́ обраще́нія и́хъ, обраще́ніє Содо́мы и дще́рей єя́, и обраще́ніє самарі́и и дщере́й єя́, и обращу́ обраще́ніє твоє́ средѣ́ и́хъ,
|
|
54
|
54
|
|
ꙗ҆́кѡ да прїи́меши мꙋче́нїе твоѐ и҆ безче́стна бꙋ́деши ѿ всѣ́хъ, ꙗ҆̀же сотвори́ла є҆сѝ во разгнѣ́ванїи мое́мъ.
|
я́ко да пріи́меши муче́ніє твоє́ и безче́стна бу́деши от всѣ́хъ, я́же сотвори́ла єси́ во разгнѣ́ваніи моє́мъ.
|
|
55
|
55
|
|
И҆ сестра̀ твоѧ̀ содо́ма и҆ дщє́ри є҆ѧ̀ возста́вѧтсѧ, ꙗ҆́коже бѣ́ша и҆спе́рва: и҆ самарі́а и҆ дщє́ри є҆ѧ̀ возста́вѧтсѧ, ꙗ҆́коже бѣ́ша и҆спе́рва: и҆ ты̀ и҆ дщє́ри твоѧ̑ возста́витесѧ, ꙗ҆́коже бѣ́сте пре́жде.
|
И сестра́ твоя́ Содо́ма и дще́ри єя́ возста́вятся, я́коже бѣ́ша испе́рва: и самарі́а и дще́ри єя́ возста́вятся, я́коже бѣ́ша испе́рва: и ты́ и дще́ри твоя́ возста́витеся, я́коже бѣ́сте пре́жде.
|
|
56
|
56
|
|
И҆ не была̀ содо́ма сестра̀ твоѧ̀ во слы́шанїе во оу҆стѣ́хъ твои́хъ во дне́хъ горды́ни твоеѧ̀,
|
И не была́ Содо́ма сестра́ твоя́ во слы́шаніє во устѣ́хъ твои́хъ во дне́хъ горды́ни твоєя́,
|
|
57
|
57
|
|
пре́жде ѿкрове́нїѧ ѕло́бъ твои́хъ, ꙗ҆́коже нн҃ѣ оу҆кори́зна є҆сѝ дще́рей сѵ́рскихъ и҆ всѣ́хъ сꙋ́щихъ ѡ҆́крестъ є҆ѧ̀ дще́рей и҆ноплеме́нничихъ ѡ҆держа́щихъ тѧ̀ ѡ҆́крестъ:
|
пре́жде открове́нія зло́бъ твои́хъ, я́коже ны́нѣ укори́зна єси́ дще́рей Си́рскихъ и всѣ́хъ су́щихъ о́крестъ єя́ дще́рей иноплеме́нничихъ одержа́щихъ тя́ о́крестъ:
|
|
58
|
58
|
|
нечє́стїѧ твоѧ̑ и҆ беззакѡ́нїѧ твоѧ̑ ты̀ понесла̀ є҆сѝ ѧ҆̀, гл҃етъ гдⷭ҇ь.
|
нече́стія твоя́ и беззако́нія твоя́ ты́ понесла́ єси́ я́, глаго́летъ Госпо́дь.
|
|
59
|
59
|
|
Сїѧ̑ гл҃етъ а҆дѡнаі̀ гдⷭ҇ь: и҆ сотворю̀ въ тебѣ̀, ꙗ҆́коже сотвори́ла є҆сѝ, ꙗ҆́коже презрѣ́ла є҆сѝ є҆́же престꙋпи́ти завѣ́тъ мо́й:
|
Сія́ глаго́летъ Адонаі́ Госпо́дь: и сотворю́ въ тебѣ́, я́коже сотвори́ла єси́, я́коже презрѣ́ла єси́ є́же преступи́ти завѣ́тъ мо́й:
|
|
60
|
60
|
|
и҆ воспомѧнꙋ̀ а҆́зъ завѣ́тъ мо́й, и҆́же съ тобо́ю во дне́хъ младе́нства твоегѡ̀, и҆ возста́влю тебѣ̀ завѣ́тъ вѣ́чный:
|
и воспомяну́ а́зъ завѣ́тъ мо́й, и́же съ тобо́ю во дне́хъ младе́нства твоєго́, и возста́влю тебѣ́ завѣ́тъ вѣ́чный:
|
|
61
|
61
|
|
и҆ помѧне́ши пꙋти̑ твоѧ̑ и҆ безче́стна бꙋ́деши, внегда̀ по́ймеши сєстры̀ твоѧ̑ старѣ́йшыѧ со ю҆нѣ́йшими твои́ми, и҆ да́мъ ѧ҆̀ тебѣ̀ на созида́нїе, но не ѿ завѣ́та твоегѡ̀:
|
и помяне́ши пути́ твоя́ и безче́стна бу́деши, внегда́ по́ймеши сестры́ твоя́ старѣ́йшыя со юнѣ́йшими твои́ми, и да́мъ я́ тебѣ́ на созида́ніє, но не от завѣ́та твоєго́:
|
|
62
|
62
|
|
и҆ возста́влю а҆́зъ завѣ́тъ мо́й съ тобо́ю, и҆ оу҆вѣ́си, ꙗ҆́кѡ а҆́зъ гдⷭ҇ь:
|
и возста́влю а́зъ завѣ́тъ мо́й съ тобо́ю, и увѣ́си, я́ко а́зъ Госпо́дь:
|
|
63
|
63
|
|
ꙗ҆́кѡ да помѧне́ши и҆ оу҆срами́шисѧ, и҆ не бꙋ́детъ тебѣ̀ ктомꙋ̀ ѿве́рсти оу҆́стъ твои́хъ ѿ лица̀ безче́стїѧ твоегѡ̀, є҆гда̀ млⷭ҇тивъ бꙋ́дꙋ тебѣ̀ по всѣ̑мъ, є҆ли̑ка сотвори́ла є҆сѝ, гл҃етъ а҆дѡнаі̀ гдⷭ҇ь.
|
я́ко да помяне́ши и усрами́шися, и не бу́детъ тебѣ́ ктому́ отве́рсти у́стъ твои́хъ от лица́ безче́стія твоєго́, єгда́ ми́лостивъ бу́ду тебѣ́ по всѣ́мъ, єли́ка сотвори́ла єси́, глаго́летъ Адонаі́ Госпо́дь.
|
Категорії
Паперові видання
Старий Заповіт
• Бут. • Вих. • Лев. • Чис. • Втор.
• Нав. • Суд. • Руф. • 1 Цар. • 2 Цар. • 3 Цар. • 4 Цар. • 1 Пар. • 2 Пар. • 1 Езд. • 2 Езд. • 3 Езд. • Неєм. • Тов. • Юдиф. • Есф. • 1 Мак. • 2 Мак. • 3 Мак.
• Іов. • Пс. • Притч. • Еккл. • Пісн. • Прем. • Сир.
• Іс. • Єр. • Плач. • Посл. Єр. • Вар. • Єз. • Дан.
• Ос. • Іоїл. • Ам. • Авд. • Іона. • Мих. • Наум. • Авв. • Соф. • Агг. • Зах. • Мал.
Паперові видання
Старий Заповіт
• Бут. • Вих. • Лев. • Чис. • Втор.
• Нав. • Суд. • Руф. • 1 Цар. • 2 Цар. • 3 Цар. • 4 Цар. • 1 Пар. • 2 Пар. • 1 Езд. • 2 Езд. • 3 Езд. • Неєм. • Тов. • Юдиф. • Есф. • 1 Мак. • 2 Мак. • 3 Мак.
• Іов. • Пс. • Притч. • Еккл. • Пісн. • Прем. • Сир.
• Іс. • Єр. • Плач. • Посл. Єр. • Вар. • Єз. • Дан.
• Ос. • Іоїл. • Ам. • Авд. • Іона. • Мих. • Наум. • Авв. • Соф. • Агг. • Зах. • Мал.