Полуношниця недільна

Священник: Благослове́н Бог наш:

І ми промовляємо: Амі́нь. Сла́ва Тебі́, Бо́же наш, сла́ва Тебі́.

Царю́ Небе́сний, Уті́шителю, Ду́ше і́стини, І́же везді́ сий і вся ісполня́яй, Сокро́вище благи́х і жи́зні Пода́телю, прийди́ і всели́ся в ни, і очи́сти ни от вся́кия скве́рни, і спаси́, Бла́же, ду́ші на́ша.

Святи́й Бо́же, Святи́й Крі́пкий, Святи́й Безсме́ртний, поми́луй нас. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Пресвята́я Тро́йце, поми́луй нас: Го́споди, очи́сти гріхи́ на́ша; Влади́ко, прости́ беззако́нія на́ша; Святи́й, посіти́ і ісціли́ не́мощі на́ша і́мене Твоєго́ ра́ди.

Го́споди, поми́луй. [Тричі] Слава, і нині:

О́тче наш, І́же єси́ на Небесі́х, да святи́ться і́м'я Твоє́, да при́йдеть Ца́рствіє Твоє́, да бу́деть во́ля Твоя́, я́ко на Небесі́, і на землі́. Хліб наш насу́щний даждь нам днесь, і оста́ви нам до́лги на́ша, я́коже і ми оставля́єм должнико́м на́шим; і не введи́ нас во іскуше́ніє, но ізба́ви нас от лука́ваго.

Священник: Я́ко Твоє́ єсть Ца́рство:

І ми: Амі́нь. Го́споди, поми́луй. [12 разів]. Слава, і нині:

Прийді́те, поклоні́мся Царе́ві на́шему Бо́гу.

Прийді́те, поклоні́мся і припаде́м Христу́, Царе́ві на́шему Бо́гу.

Прийді́те, поклоні́мся і припаде́м Самому́ Христу́, Царе́ві і Бо́гу на́шему.

Поми́луй м'я, Бо́же, по вели́цій ми́лості Твоє́й і по мно́жеству щедро́т Твої́х очи́сти беззако́ніє моє́. Найпа́че оми́й м'я от беззако́нія моєго́ і от гріха́ моєго́ очи́сти м'я. Я́ко беззако́ніє моє́ аз зна́ю, і гріх мой пре́до мно́ю єсть ви́ну. Тебі́ єди́ному согріши́х і лука́воє пред Тобо́ю сотвори́х; я́ко да оправди́шися во словесі́х Твої́х і побіди́ши, внегда́ суди́ти Ті. Се бо в беззако́ніїх зача́т єсьм, і во грісі́х роди́ м'я ма́ти моя́. Се бо і́стину возлюби́л єси́, безві́стная і та́йная прему́дрости Твоєя́ яви́л мі єси́. Окропи́ши м'я іссо́пом, і очи́щуся; оми́єши м'я, і па́че сні́га убілю́ся. Слу́ху моєму́ да́си ра́дость і весе́ліє; возра́дуються ко́сті смире́нния. Отврати́ лице́ Твоє́ от гріх мої́х і вся беззако́нія моя́ очи́сти. Се́рдце чи́сто сози́жди во мні, Бо́же, і дух прав обнови́ во утро́бі моє́й. Не отве́ржи мене́ от лиця́ Твоєго́ і Ду́ха Твоєго́ Свята́го не отими́ от мене́. Возда́ждь мі ра́дость спасе́нія Твоєго́ і Ду́хом влади́чним утверди́ м'я. Научу́ беззако́нния путе́м Твої́м, і нечести́вії к Тебі́ обратя́ться. Ізба́ви м'я от крове́й, Бо́же, Бо́же спасе́нія моєго́; возра́дується язи́к мой пра́вді Твоє́й. Го́споди, устні́ мої́ отве́рзеши, і уста́ моя́ возвістя́ть хвалу́ Твою́. Я́ко а́ще би восхоті́л єси́ же́ртви, дал бих у́бо: всесожже́нія не благоволи́ши. Же́ртва Бо́гу дух сокруше́н; се́рдце сокруше́нно і смире́нно Бог не унічижи́ть. Ублажи́, Го́споди, благоволе́нієм Твої́м Сіо́на, і да сози́ждуться сті́ни Ієрусали́мськія. Тогда́ благоволи́ши же́ртву пра́вди, возноше́ніє і всесожега́ємая; тогда́ возложа́ть на олта́р Твой тельці́.

Досто́йно єсть я́ко воі́стину / сла́вити Тя, Бо́га Сло́ва, / Єго́же трепе́щуть і трясу́ться Херуви́ми, / і славосло́в'ять Си́ли Небе́сния, / воскре́сшаго тридне́вно із гро́ба, / Христа́ Жизнода́вця стра́хом просла́вим.

Воспої́м всі боголі́пно пі́сньми Боже́ственними, / Отця́, і Си́на, і Ду́ха Боже́ственнаго, / Триіпоста́сную Держа́ву, Єди́но Ца́рство і Госпо́дство.

Ю́же пою́ть всі земноро́днії, / і славосло́в'ять Си́ли Небе́сния, / от всіх ві́рно покланя́ємую, / Єди́ницю по существу́, Триіпоста́сную.

Господонача́льную Херуви́м, / і Богонача́льную без сравне́нія Серафи́м, / Неразді́льную Тро́йцю во Єди́ниці, / су́щеє Богонача́ліє, Тя велича́єм.

Отцу́ Безнача́льному і Бо́гу, / Собезнача́льному Сло́ву, со Ду́хом покланя́юся; / неразлу́чноє єди́но соєдиня́ємоє Существо́, / тричи́сленную Єди́ницю пі́сньми почті́м.

Лучеза́рния Твоя́ мо́лнія возсія́й мі, / Бо́же мой, Триіпоста́сне Вседі́телю, / і дом м'я покажи́ Твоєя́ непристу́пния сла́ви, / сві́тел, і світоно́сен, і неізмі́нен.

Єго́же трепе́щуть і трясу́ться Херуви́ми, / і славосло́в'ять А́нгельская Во́їнства, / от Ді́ви неізрече́нно вопло́щшагося / Христа́ Жизнода́вця, стра́хом просла́вим.

Потім: Святи́й Бо́же, Святи́й Крі́пкий, Святи́й Безсме́ртний, поми́луй нас. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Пресвята́я Тро́йце, поми́луй нас: Го́споди, очи́сти гріхи́ на́ша; Влади́ко, прости́ беззако́нія на́ша; Святи́й, посіти́ і ісціли́ не́мощі на́ша і́мене Твоєго́ ра́ди.

Го́споди, поми́луй. [Тричі] Слава, і нині:

О́тче наш, І́же єси́ на Небесі́х, да святи́ться і́м'я Твоє́, да при́йдеть Ца́рствіє Твоє́, да бу́деть во́ля Твоя́, я́ко на Небесі́, і на землі́. Хліб наш насу́щний даждь нам днесь, і оста́ви нам до́лги на́ша, я́коже і ми оставля́єм должнико́м на́шим; і не введи́ нас во іскуше́ніє, но ізба́ви нас от лука́ваго.

Священник: Я́ко Твоє́ єсть Ца́рство: І ми: Амі́нь.

Глас 1: Разбо́йничо покая́ніє рай окра́де, / плач же мироно́сиць ра́дость возвісти́, / я́ко воскре́сл єси́, Христе́ Бо́же, / подая́й ми́рові ве́лію ми́лость.

Глас 2: По стра́сті ше́дша во гроб жени́, / во є́же пома́зати ті́ло Твоє́, Христе́ Бо́же, / ви́діша А́нгели во гро́бі, і ужасо́шася; / глас бо сли́шаху от них, я́ко воскре́се Госпо́дь, / да́руя ми́рові ве́лію ми́лость.

Глас 3: Удивля́я виді́нієм, / ороша́я глаго́ланії, / блиста́яйся А́нгел мироно́сицям глаго́лаше: / что жива́го і́щете во гро́бі? / Воста́ істощи́вий гро́би. / Тлі Преміни́теля разумі́йте Непремі́ннаго. / Рці́те Бо́гові: коль стра́шна діла́ Твоя́, / я́ко род спасл єси́ челові́чеський!

Глас 4: Я́же Твоєго́ пресла́внаго воста́нія, предте́кша мироно́сиці, / апо́столом пропові́даху, Христе́, / я́ко воскре́сл єси́ я́ко Бог, / подая́ ми́рові ве́лію ми́лость.

Глас 5: А́нгельским зра́ком ум смуща́ющя, / і Бо́же́ственним воста́нієм душе́ю просвіща́єми, / мироно́сиці апо́столом благовіствова́ху: / возвісті́те во язи́ціх воскресе́ніє, / Го́споду соді́йствующу чудеси́, / подаю́щему нам ве́лію ми́лость.

Глас 6: Во́льною і животворя́щею Твоє́ю сме́ртію, Христе́, / врата́ а́дова сокруши́в я́ко Бог, / отве́рзл єси́ нам дре́вній рай і воскре́с із ме́ртвих, / ізба́вил єси́ от тлі́нія живо́т наш.

Глас 7: І́же наш зрак восприє́мий, / і претерпі́вий Крест пло́тськи, / спаси́ м'я воскресе́нієм Твої́м, Христе́ Бо́же, / я́ко Человіколю́бець.

Глас 8: Мироно́сиці Жизнода́вця предстоя́щя гро́бу, / Влади́ку іска́ху в ме́ртвих, Безсме́ртнаго, і ра́дость благові́щенія от А́нгела приє́мша, апо́столом возвіща́ху: я́ко воскре́се Христо́с Бог, подая́й ми́рові ве́лію ми́лость.

Го́споди, поми́луй. [40 разів]. Сла́ва, і ни́ні:

Честні́йшую Херуви́м, / і сла́внійшую без сравне́нія Серафи́м, / без істлі́нія Бо́га Сло́ва ро́ждшую, / су́щую Богоро́дицю Тя велича́єм.

Іменем Госпо́днім благослови́, о́тче.

Священник: Бо́же, уще́дри ни, і благослови́ ни: І ми: Амі́нь.

Всемогу́щая і Животворя́щая Свята́я Тро́йце, і світонача́льная, я́же ми́рную вся́кую і преми́рную твар, за єди́ну бла́гость от не су́щих приведи́й, і промишля́я, і содержа́щи, і́же по про́чих Твої́х неізрече́нних о земно́м ро́ді благодія́ніїх, і покая́ніє нам, ра́ди плотська́го неможе́нія, до сме́рти дарова́вий; не оста́ви нас, окая́нних, в лука́вих на́ших дія́ніїх умре́ти, ніже́ злонача́льнику і зави́стцю і губи́телю посмі́шство би́ти; зри́ши бо, Благосе́рде, єли́к у́бо о́наго на нас наві́т і вражда́, єли́ко же і на́ше страстова́ніє, і сла́бость, і небреже́ніє. Но неоску́дния Твоя́ благості соді́лай на нас, мо́лим на вся́кий день і час прогні́вающії Тя, честни́х і животво́рних за́повідей преступле́нієм. І вся у́бо всего́ преше́дшаго живота́ на́шего, і до ни́нішняго часа́ согріше́нная на́ми, в дія́ніїх іли́ глаго́ланіїх іли́ в помишле́ніїх, оста́ви і прости́. Сподо́би же нас про́чеє сконча́ти житіє́ в покая́нії, і умиле́нії, і соблюде́нії святи́х Твої́х повелі́ній. А́ще у́бо сла́достію прельсти́вшеся, многообра́зні согріши́хом, іли́ ме́рзькими похотьми́ неполе́зними і вре́дними обольсти́вшеся препроводи́хом; а́ще гні́вом і я́ростію подви́гшеся безслове́сною, кого́ бра́та на́шего оскорби́хом; а́ще язи́ком неізбі́жних і стро́потних, і крі́пких сіте́й об'я́хомся; а́ще ко́їм чувств на́ших, іли́ всі́ми, во́лею, іли́ нево́лею, ві́дуще іли́ не ві́дуще, от восхище́нія іли́ поуче́нія, безу́мно поползо́хомся; а́ще же лука́вими по́мисли і су́єтними со́вість оскверни́хом; а́ще ли ко́їм други́м о́бразом прегріши́хом от предприя́тія і оби́чая томи́ми зла́го, прости́ нам і оста́ви вся, Всеще́дре, Преблаже і Многоми́лостиве. І да́руй нам про́чеє бо́дрость і си́лу, во є́же твори́ти во́лю Твою́ бла́гу, і благоуго́дну, і соверше́нну; да нощна́го і мра́чнаго зла, світови́дним покая́нієм премі́ншеся, і я́ко во дні благообра́зно ходя́ще, і очище́ні об'яви́мся милосе́рдію Твоєму́, недосто́йнії, воспіва́юще Тя і велича́юще во ві́ки, амі́нь.

Священник: Сла́ва Тебі́, Христе́ Бо́же, упова́ніє на́ше, сла́ва Тебі́.

І ми: Слава, і нині: Го́споди, поми́луй. [Тричі]. Благослови́.

Воскреси́й із ме́ртвих, Христо́с, і́стинний Бог наш, моли́твами Пречи́стия Своєя́ Ма́тере, преподо́бних і богоно́сних оте́ць на́ших, і всіх святи́х, поми́луєть і спасе́ть нас, я́ко Благ і Человіколю́бець.

І ми: Амі́нь.

Предстоятель сотворивши земний поклін, промовляє братії:

Благослові́те, отці́ святі́ї, прості́те мі, грі́шному.

І братія: Бог прости́ть ті, о́тче святи́й.

Помо́лимся о вели́ком господи́­ні:

Ми же: Го́споди, поми́луй, кротким і тихим голосом.

І після виконання ектенії, промовляє предстоятель:

Моли́твами святи́х оте́ць на́ших, Го́споди Ісу́се Христе́, Бо́же наш, поми́луй нас.

Ми же: Амі́нь.

Кінець полунощниці.