Полуношниця суботня

Початок з Богом полунощниці суботньої, звершує священник: Благослове́н Бог наш:

І ми: Сла́ва Тебі́, Бо́же наш, сла́ва Тебі́.

Царю́ Небе́сний, Уті́шителю, Ду́ше і́стини, І́же везді́ сий і вся ісполня́яй, Сокро́вище благи́х і жи́зні Пода́телю, прийди́ і всели́ся в ни, і очи́сти ни от вся́кия скве́рни, і спаси́, Бла́же, ду́ші на́ша.

Святи́й Бо́же, Святи́й Крі́пкий, Святи́й Безсме́ртний, поми́луй нас. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Пресвята́я Тро́йце, поми́луй нас: Го́споди, очи́сти гріхи́ на́ша; Влади́ко, прости́ беззако́нія на́ша; Святи́й, посіти́ і ісціли́ не́мощі на́ша і́мене Твоєго́ ра́ди.

Го́споди, поми́луй. [Тричі]. Слава, і нині:

О́тче наш, І́же єси́ на Небесі́х, да святи́ться і́м'я Твоє́, да при́йдеть Ца́рствіє Твоє́, да бу́деть во́ля Твоя́, я́ко на Небесі́, і на землі́. Хліб наш насу́щний даждь нам днесь, і оста́ви нам до́лги на́ша, я́коже і ми оставля́єм должнико́м на́шим; і не введи́ нас во іскуше́ніє, но ізба́ви нас от лука́ваго.

Священник: Я́ко Твоє́ єсть Ца́рство:

І ми: Амі́нь. По́тім, Го́споди, поми́луй. [12 разів]

Прийді́те, поклоні́мся Царе́ві на́шему Бо́гу.

Прийді́те, поклоні́мся і припаде́м Христу́, Царе́ві на́шему Бо́гу.

Прийді́те, поклоні́мся і припаде́м Самому́ Христу́, Царе́ві і Бо́гу на́шему.

Поми́луй м'я, Бо́же, по вели́цій ми́лості Твоє́й і по мно́жеству щедро́т Твої́х очи́сти беззако́ніє моє́. Найпа́че оми́й м'я от беззако́нія моєго́ і от гріха́ моєго́ очи́сти м'я. Я́ко беззако́ніє моє́ аз зна́ю, і гріх мой пре́до мно́ю єсть ви́ну. Тебі́ єди́ному согріши́х і лука́воє пред Тобо́ю сотвори́х; я́ко да оправди́шися во словесі́х Твої́х і побіди́ши, внегда́ суди́ти Ті. Се бо в беззако́ніїх зача́т єсьм, і во грісі́х роди́ м'я ма́ти моя́. Се бо і́стину возлюби́л єси́, безві́стная і та́йная прему́дрости Твоєя́ яви́л мі єси́. Окропи́ши м'я іссо́пом, і очи́щуся; оми́єши м'я, і па́че сні́га убілю́ся. Слу́ху моєму́ да́си ра́дость і весе́ліє; возра́дуються ко́сті смире́нния. Отврати́ лице́ Твоє́ от гріх мої́х і вся беззако́нія моя́ очи́сти. Се́рдце чи́сто сози́жди во мні, Бо́же, і дух прав обнови́ во утро́бі моє́й. Не отве́ржи мене́ от лиця́ Твоєго́ і Ду́ха Твоєго́ Свята́го не отими́ от мене́. Возда́ждь мі ра́дость спасе́нія Твоєго́ і Ду́хом влади́чним утверди́ м'я. Научу́ беззако́нния путе́м Твої́м, і нечести́вії к Тебі́ обратя́ться. Ізба́ви м'я от крове́й, Бо́же, Бо́же спасе́нія моєго́; возра́дується язи́к мой пра́вді Твоє́й. Го́споди, устні́ мої́ отве́рзеши, і уста́ моя́ возвістя́ть хвалу́ Твою́. Я́ко а́ще би восхоті́л єси́ же́ртви, дал бих у́бо: всесожже́нія не благоволи́ши. Же́ртва Бо́гу дух сокруше́н; се́рдце сокруше́нно і смире́нно Бог не унічижи́ть. Ублажи́, Го́споди, благоволе́нієм Твої́м Сіо́на, і да сози́ждуться сті́ни Ієрусали́мськія. Тогда́ благоволи́ши же́ртву пра́вди, возноше́ніє і всесожега́ємая; тогда́ возложа́ть на олта́р Твой тельці́.

Тебі́ подоба́єть піснь, Бо́же, в Сіо́ні, і Тебі́ возда́сться моли́тва во Ієрусали́мі. Усли́ши моли́тву мою́; к Тебі́ вся́ка плоть при́йдеть. Словеса́ беззако́нник премого́ша нас; і нече́стія на́ша Ти очи́стиши. Блаже́н, єго́же ізбра́л єси́ і прия́л, всели́ться во дво́ріх Твої́х. Іспо́лнимся во благи́х до́му Твоєго́; свят храм Твой. Ди́вен в пра́вді, усли́ши ни, Бо́же, Спаси́телю наш, упова́ніє всіх конце́й землі́ і су́щих в мо́рі дале́че; уготовля́яй го́ри крі́постію Своє́ю, препоя́сан си́лою; смуща́яй глубину́ морську́ю, шу́му волн Єго́ кто постої́ть? См'яту́ться язи́ци, і убоя́ться живу́щії в конця́х от зна́меній Твої́х; ісхо́ди у́тра і ве́чера украси́ши. Посіти́л єси́ зе́млю і упої́л єси́ ю, умно́жил єси́ обогати́ти ю; ріка́ Бо́жия напо́лнися вод; угото́вал єси́ пи́щу їм, я́ко та́ко (єсть) угото́ваніє. Бразди́ єя́ упо́й, умно́жи жи́та єя́; в ка́плях єя́ возвесели́ться возсія́ющи. Благослови́ши віне́ць лі́та бла́гости Твоєя́, і поля́ Твоя́ іспо́лняться ту́ка; разботі́ють кра́сная пусти́ні, і ра́достію хо́лми препоя́шуться. Оді́яшася о́вні о́вчії, і удо́лія умно́жать пшени́цю; воззову́ть, і́бо воспою́ть.

Воскли́кніте Го́сподеві вся земля́, по́йте же і́мені Єго́, даді́те сла́ву хвалі́ Єго́. Рці́те Бо́гу: коль стра́шна діла́ Твоя́? Во мно́жестві си́ли Твоєя́ со́лжуть Тебі́ вразі́ Твої́. Вся земля́ да покло́ниться Тебі́ і поє́ть Тебі́, да поє́ть же і́мені Твоєму́, Ви́шній. Прийді́те і ви́діте діла́ Бо́жія, коль стра́шен в сові́тіх па́че сино́в челові́чеських. Обраща́яй мо́ре в су́шу, в ріці́ про́йдуть нога́ми; та́мо возвеселі́мся о Нем, влади́чествующем си́лою Своє́ю ві́ком; о́чі Єго́ на язи́ки призира́єті; преогорчева́ющії да не возно́сяться в себі́. Благослові́те, язи́ци, Бо́га на́шего, і усли́шан сотворі́те глас хвали́ Єго́, поло́жшаго ду́шу мою́ в живо́т, і не да́вшаго во см'яте́ніє ног мої́х. Я́ко іскуси́л ни єси́, Бо́же, разже́гл ни єси́, я́коже разжиза́ється сребро́. Ввел ни єси́ в сіть, положи́л єси́ ско́рбі на хребті́ на́шем. Возве́л єси́ челові́ки на глави́ на́ша; пройдо́хом сквозі́ огнь і во́ду, і ізве́л єси́ ни в поко́й. Вни́ду в дом Твой со всесожже́нієм, возда́м Тебі́ моли́тви моя́, я́же ізреко́сті устні́ мої́, і глаго́лаша уста́ моя́ в ско́рбі моє́й. Всесожже́нія ту́чна вознесу́ Тебі́ с кади́лом, і овни́, вознесу́ Тебі́ воли́ с козли́. Прийді́те, усли́шіте, і пові́м вам, всі боя́щіїся Бо́га, єли́ка сотвори́ душі́ моє́й. К Нему́ усти́ мої́ми воззва́х, і вознесо́х под язи́ком мої́м. Непра́вду а́ще узрі́х в се́рдці моє́м, да не усли́шить мене́ Госпо́дь. Сего́ ра́ди усли́ша м'я Бог, внят гла́су моле́нія моєго́. Благослове́н Бог, І́же не отста́ви моли́тву мою́ і ми́лость Свою́ от мене́.

Бо́же, уще́дри ни і благослови́ ни, просвіти́ лице́ Твоє́ на ни і поми́луй ни; позна́ти на землі́ путь Твой, во всіх язи́ціх спасе́ніє Твоє́. Да іспові́дяться Тебі́ лю́діє, Бо́же, да іспові́дяться Тебі́ лю́діє всі. Да возвеселя́ться і да возра́дуються язи́ци; я́ко су́диши лю́дем правото́ю і язи́ки на землі́ наста́виши. Да іспові́дяться Тебі́ лю́діє, Бо́же, да іспові́дяться Тебі́ лю́діє всі. Земля́ даде́ плод Свой; благослови́ ни, Бо́же, Бо́же наш, благослови́ ни, Бо́же; і да убоя́ться Єго́ всі конці́ землі́.

Слава, і нині:

Аллилу́я, аллилу́я, аллилу́я, сла́ва Тебі́, Бо́же. [Тричі] Го́споди, поми́луй. [Тричі]

Слава, і нині:

Да воскре́снеть Бог і расточа́ться вразі́ Єго́, і да біжа́ть от лиця́ Єго́ ненави́дящії Єго́. Я́ко ізчеза́єть дим, да ізче́знуть; я́ко та́єть воск от лиця́ огня́, та́ко да поги́бнуть грі́шници от лиця́ Бо́жия; а пра́ведници да возвеселя́ться, да возра́дуються пред Бо́гом, да насладя́ться в весе́лії. Воспо́йте Бо́гу, по́йте і́мені Єго́; путесотворі́те возше́дшему на за́пади, Госпо́дь — і́м'я Єму́; і ра́дуйтеся пред Ним. Да см'яту́ться от лиця́ Єго́, Отця́ си́рих і Судії́ вдови́ць; Бог в мі́сті святі́м Своє́м. Бог вселя́єть єдиноми́сленния в дом, ізводя́ окова́нния му́жеством, тако́жде преогорчева́ющия живу́щия во гробі́х. Бо́же, внегда́ ісходи́ти Тебі́ пред людьми́ Твої́ми, внегда́ мимоходи́ти Тебі́ в пусти́ні, земля́ потрясе́ся, і́бо небеса́ ка́нуша от лиця́ Бо́га Сина́їна, от лиця́ Бо́га Ізра́їлева. Дождь во́лен отлучи́ши, Бо́же, достоя́нію Твоєму́, і ізнемо́же, Ти же соверши́л єси́ є. Живо́тная Твоя́ живу́ть на ней; угото́вал єси́ бла́гостію Твоє́ю ни́щему, Бо́же. Госпо́дь дасть глаго́л благовіству́ющим си́лою мно́гою; Цар сил возлю́бленнаго, красото́ю до́му разділи́ти кори́сти. А́ще поспите́ посреді́ преді́л, крилі́ голуби́ні посре́брені, і междора́мія єя́ в блеща́нії зла́та; внегда́ ра́знствить Небе́сний царі́ на ней, осніжа́ться в Селмо́ні. Гора́ Бо́жия, гора́ ту́чная, гора́ усире́нная, гора́ ту́чная. Вску́ю непщу́єте, го́ри усире́нния? Гора́, ю́же благоволи́ Бог жи́ти в ней; і́бо Госпо́дь всели́ться до конця́. Колесни́ця Бо́жия тьма́ми тем, ти́сяща гобзу́ющих; Госпо́дь в них в Сина́ї во святі́м. Возше́л єси́ на висоту́, пліни́л єси́ плін; прия́л єси́ дая́нія в челові́ціх, і́бо не покаря́ющияся, є́же всели́тися. Госпо́дь Бог благослове́н, благослове́н Госпо́дь день дне; поспіши́ть нам Бог спаcе́ній на́ших. Бог наш — Бог, є́же спаса́ти; і Госпо́дня, Госпо́дня ісхо́дища сме́ртная. Оба́че Бог сокруши́ть глави́ враго́в Свої́х, верх влас преходя́щих в прегріше́ніїх свої́х. Рече́ Госпо́дь: от Васа́на обращу́, обращу́ во глубина́х морськи́х; я́ко да омо́читься нога́ твоя́ в кро́ві, язи́к пес твої́х от враг от него́. Ви́діна би́ша ше́ствія Твоя́, Бо́же, ше́ствія Бо́га моєго́ Царя́, І́же во святі́м. Предвари́ша кня́зі близ пою́щих, посреді́ дів тимпа́нниць. В це́рквах благослові́те Бо́га — Го́спода от істо́чник Ізра́їлевих. Та́мо Веніамі́н юні́йшій во у́жасі, кня́зі Іу́дови влади́ки їх, кня́зі Завуло́ні, кня́зі Неффали́млі. Запові́ждь, Бо́же, си́лою Твоє́ю; укріпи́, Бо́же, сіє́, є́же соді́лал єси́ в нас. От хра́ма Твоєго́ во Ієрусали́м Тебі́ принесу́ть ца́ріє да́ри. Запрети́ звіре́м тро́стним; сонм юне́ць в ю́ницях людськи́х, є́же затвори́ти іскуше́нния сребро́м; расточи́ язи́ки, хотя́щия бра́нем. При́йдут моли́твенници от Єги́пта; Ефіо́пія предвари́ть ру́ку свою́ к Бо́гу. Ца́рства земна́я, по́йте Бо́гу, воспо́йте Го́сподеві, возше́дшему на не́бо небесе́ на восто́ки; се, дасть гла́су Своєму́ глас си́ли. Даді́те сла́ву Бо́гові; на Ізра́їлі велелі́пота Єго́, і си́ла Єго́ на о́блаціх. Ди́вен Бог во святи́х свої́х; Бог Ізра́їлев, той дасть си́лу і держа́ву лю́дем Свої́м. Благослове́н Бог.

Слава, і нині:

Аллилу́я, аллилу́я, аллилу́я, сла́ва Тебі́, Бо́же. [Тричі] Го́споди, поми́луй. [Тричі]

Слава, і нині:

Спаси́ м'я, Бо́же, я́ко внидо́ша во́ди до душі́ моєя́. Углібо́х в тимі́нії глубини́, і ність постоя́нія; прийдо́х во глубини́ морські́я, і бу́ря потопи́ м'я. Утруди́хся зови́й, ізмолче́ горта́нь мой; ісчезо́сті о́чі мої́, от є́же упова́ти мі на Бо́га моєго́. Умно́жишася па́че влас глави́ моєя́ ненави́дящії м'я ту́не; укріпи́шася вразі́ мої́, ізгоня́щії м'я непра́ведно; я́же не восхища́х, тогда́ воздая́х. Бо́же, Ти уві́діл єси́ безу́міє моє́, і прегріше́нія моя́ от Тебе́ не утаї́шася. Да не постидя́ться о мні терп'я́щії Тебе́, Го́споди, Го́споди Сил; ніже́ да посра́м'яться о мні і́щущії Тебе́, Бо́же Ізра́їлев. Я́ко Тебе́ ра́ди претерпі́х поноше́ніє, покри́ срамота́ лице́ моє́. Чуждь бих бра́тії моє́й і стра́нен синово́м ма́тере моєя́; я́ко ре́вность до́му Твоєго́ сніде́ м'я, і поноше́нія понося́щих Ті нападо́ша на м'я. І покри́х посто́м ду́шу мою́, і бисть в поноше́ніє мні; і положи́х одія́ніє моє́ вре́тище, і бих їм в при́тчу. О мні глумля́хуся сідя́щії во враті́х, і о мні поя́ху пію́щії вино́. Аз же моли́твою моє́ю к Тебі́, Бо́же; вре́м'я благоволе́нія, Бо́же; во мно́жестві ми́лости Твоєя́ усли́ши м'я, во і́стині спаcе́нія Твоєго́. Спаси́ м'я от бре́нія, да не углі́бну; да ізба́влюся от ненави́дящих м'я і от глубо́ких вод. Да не потопи́ть мене́ бу́ря водна́я, ніже́ да пожре́ть мене́ глубина́, ніже́ сведе́ть о мні рове́нник уст свої́х. Усли́ши м'я, Го́споди, я́ко бла́га ми́лость Твоя́; по мно́жеству щедро́т Твої́х при́зри на м'я. Не отврати́ лиця́ Твоєго́ от о́трока Твоєго́, я́ко скорблю́; ско́ро усли́ши м'я. Воньми́ душі́ моє́й і ізба́ви ю; враг мої́х ра́ди ізба́ви м'я. Ти бо ві́си поноше́ніє моє́, і студ мой, і срамоту́ мою́; пред Тобо́ю всі оскорбля́ющії м'я. Поноше́ніє ча́яше душа́ моя́ і страсть; і ждах соскорб'я́щаго, і не бі, і утіша́ющих, і не обріто́х. І да́ша в снідь мою́ желчь, і в жа́жду мою́ напої́ша м'я о́цта. Да бу́деть трапе́за їх пред ни́ми в сіть, і в воздая́ніє, і в собла́зн. Да помрача́ться о́чі їх, є́же не ви́діти, і хребе́т їх ви́ну сляци́. Проли́й на ня гнів Твой, і я́рость гні́ва Твоєго́ да пости́гнеть їх. Да бу́деть двор їх пуст, і в жили́щих їх да не бу́деть живи́й. Зане́ єго́же Ти порази́л єси́, ті́ї погна́ша, і к болі́зні язв мої́х приложи́ша. Приложи́ беззако́ніє к беззако́нію їх, і да не вни́дуть в пра́вду Твою́. Да потреб'я́ться от кни́ги живи́х, і с пра́ведними да не напи́шуться. Нищ і боля́й єсьм аз; спасе́ніє Твоє́, Бо́же, да при́йметь м'я. Восхвалю́ і́м'я Бо́га моєго́ с пі́снію, возвели́чу Єго́ во хвале́нії; і уго́дно бу́деть Бо́гу па́че тельця́ ю́на, ро́ги ізнося́ща і па́знокти. Да у́зрять ни́щії і возвеселя́ться; взищі́те Бо́га, і жива́ бу́деть душа́ ва́ша. Я́ко усли́ша убо́гія Госпо́дь, і окова́нния Своя́ не унічижи́. Да восхва́лять Єго́ небеса́ і земля́, мо́ре і вся живу́щая в нем. Я́ко Бог спасе́ть Сіо́на, і сози́ждуться гра́ди Іуде́йстії, і вселя́ться та́мо і наслі́дять ї; і сі́м'я рабо́в Твої́х удержи́ть ї, і лю́б'ящії і́м'я Твоє́ вселя́ться в нем.

Бо́же, в по́мощ мою́ воньми́; Го́споди, помощи́ мі потщи́ся. Да постидя́ться і посра́м'яться і́щущії ду́шу мою́, да возвратя́ться всп'ять і постидя́ться хотя́щії мі зла́я; да возратя́ться а́біє стидя́щеся глаго́лющії мі: бла́гоже, бла́гоже! Да возра́дуються і возвеселя́ться о Тебі́ всі і́щущії Тебе́, Бо́же; і да глаго́лють ви́ну: «Да возвели́читься Госпо́дь!», лю́б'ящії спасе́ніє Твоє́. Аз же нищ єсьм і убо́г, Бо́же, помози́ мі; Помо́щник мой і Ізба́витель мой єси́ Ти, Го́споди, не закосни́.

Сла́ва, і ни́ні: Аллилу́я, аллилу́я, аллилу́я, сла́ва Тебі́, Бо́же. [Тричі]

Ві́рую во Єди́наго Бо́га Отця́, Вседержи́теля, Творця́ не́бу і землі́, ви́димим же всім і неви́димим. І во Єди́наго Го́спода Ісу́са Христа́, Си́на Бо́жия, Єдиноро́днаго, І́же от Отця́ рожде́ннаго пре́жде всіх вік; Сві́та от Сві́та, Бо́га і́стинна от Бо́га і́стинна, рожде́нна, не сотворе́нна, єдиносу́щна Отцю́, І́мже вся би́ша. Нас ра́ди челові́к і на́шего ра́ди спасе́нія сше́дшаго с Небе́с, і воплоти́вшагося от Ду́ха Свя́та і Марі́ї Ді́ви, і вочелові́чшася. Расп'я́таго же за ни при Понті́йстім Пила́ті, і страда́вша, і погребе́нна, і воскре́сшаго в тре́тій день по Писа́нієм. І возше́дшаго на Небеса́, і сідя́ща одесну́ю Отця́. І па́ки гряду́щаго со сла́вою суди́ти живи́м і ме́ртвим, Єго́же Ца́рствію не бу́деть конця́. І в Ду́ха Свята́го, Го́спода, Животворя́щаго, І́же от Отця́ ісходя́щаго, І́же со Отце́м і Си́ном спокланя́єма і ссла́вима, глаго́лавшаго проро́ки. Во Єди́ну Святу́ю, Собо́рную і Апо́стольськую Це́рков. Іспові́дую єди́но креще́ніє во оставле́ніє гріхо́в. Ча́ю воскресе́нія ме́ртвих, І жи́зні бу́дущаго ві́ка. Амі́нь.

Святи́й Бо́же, Святи́й Крі́пкий, Святи́й Безсме́ртний, поми́луй нас. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Пресвята́я Тро́йце, поми́луй нас: Го́споди, очи́сти гріхи́ на́ша; Влади́ко, прости́ беззако́нія на́ша; Святи́й, посіти́ і ісціли́ не́мощі на́ша і́мене Твоєго́ ра́ди.

Го́споди, поми́луй. [Тричі]. Слава, і нині:

О́тче наш, І́же єси́ на Небесі́х, да святи́ться і́м'я Твоє́, да при́йдеть Ца́рствіє Твоє́, да бу́деть во́ля Твоя́, я́ко на Небесі́, і на землі́. Хліб наш насу́щний даждь нам днесь, і оста́ви нам до́лги на́ша, я́коже і ми оставля́єм должнико́м на́шим; і не введи́ нас во іскуше́ніє, но ізба́ви нас от лука́ваго.

Священник: Я́ко Твоє́ єсть Ца́рство: І ми: Амі́нь.

Несозда́нноє Єстество́, всіх Зижди́телю, / устні́ на́ша отве́рзи, / я́ко да возвісти́м хвалу́ Твою́, вопію́ще: / Свят, Свят, Свят єси́, Бо́же, Богоро́дицею поми́луй нас.

Сла́ва: Ви́шнія си́ли подража́юще на землі́, / побі́дную піснь прино́сим Ті, Бла́же: / Свят, Свят, Свят єси́, Бо́же, Богоро́дицею поми́луй нас.

І ни́ні: От одра́ і сна воздви́гл м'я єси́, Го́споди, / ум мой просвіти́ і се́рдце, / і устні́ мої́ отве́рзи, / во є́же пі́ти Тя, Свята́я Тро́йце: / Свят, Свят, Свят єси́, Бо́же, Богоро́дицею поми́луй нас.

Го́споди, поми́луй. [40 разів]

І́же на вся́коє вре́м'я, і на вся́кий час, на Небесі́ і на землі́, покланя́ємий і сла́вимий, Христе́ Бо́же, долготерпіли́ве, многоми́лостиве, многоблагоутро́бне, І́же пра́ведния люб'я́й і грі́шния ми́луяй, І́же вся зови́й ко спасе́нію обіща́нія ра́ди бу́дущих благ; Сам, Го́споди, прийми́ і на́ша в час сей моли́тви, і іспра́ви живо́т наш к за́повідем Твої́м, ду́ші на́ша освяти́, тілеса́ очи́сти, помишле́нія іспра́ви, ми́слі очи́сти, і ізба́ви нас от вся́кия ско́рби, зол і болі́зней. Огради́ нас святи́ми Твої́ми а́нгели, да ополче́нієм їх соблюда́ємі і наставля́ємі, дости́гнем в соєдине́ніє ві́ри, і в ра́зум непристу́пния Твоєя́ сла́ви; я́ко Благослове́н єси́ во ві́ки віко́в, амі́нь.

Го́споди, поми́луй. [Тричі]. Слава, і нині:

Честні́йшую Херуви́м, / і сла́внійшую без сравне́нія Серафи́м, / без істлі́нія Бо́га Сло́ва ро́ждшую, / су́щую Богоро́дицю Тя велича́єм.

Іменем Госпо́днім благослови́, о́тче.

Священник: Бо́же, уще́дри ни, і благослови́ ни;

І ми промовляємо: Амі́нь.

Влади́ко Бо́же О́тче Вседержи́телю, Го́споди Си́не Єдиноро́дний Ісу́се Христе́, і Святи́й Ду́ше, Єди́но Бо́жество́, Єди́на си́ла, поми́луй м'я, грі́шнаго, і ї́миже ві́си судьба́ми, спаси́ м'я, недосто́йнаго раба́ Твоєго́; я́ко Благослове́н єси́ во ві́ки віко́в, амі́нь.

Велича́я велича́ю Тя, Го́споди, я́ко призрі́л єси́ на смире́ніє моє́ і ні́си мене́ затвори́л в рука́х вра́жіїх; но спасл єси́ от нужд ду́шу мою́. І ни́ні, Влади́ко, да покри́єть м'я рука́ Твоя́, і да при́йдеть на м'я ми́лость Твоя́, я́ко см'яте́ся душа́ моя́, і болі́зненна єсть во ісхожде́нії своє́м, от окая́ннаго моєго́ і скве́рнаго тілесе́ сего́; да не когда́ лука́вий сопоста́та сові́т сря́щеть і препне́ть ю во тьмі, за неві́домия і ві́домия в житії́ сем би́вшия мі гріхи́, ми́лостив бу́ди мі, Влади́ко, і да не у́зрить душа́ моя́ мра́чнаго взо́ра лука́вих де́монов; но да при́ймуть ю а́нгели Твої́ сві́тлії і пресві́тлії. Даждь сла́ву і́мені Твоєму́ свято́му і Твоє́ю си́лою возведи́ м'я на Боже́ственноє Твоє́ суди́ще. Внегда́ суди́тися мі, да не при́йметь м'я рука́ кня́зя ми́ра сего́, є́же істо́ргнути м'я грі́шника во глубину́ а́дову, но предста́ни мі і бу́ди мі Спас і Засту́пник; тіле́сная бо і сія́ муче́нія весе́лія суть рабо́м Твої́м. Поми́луй, Го́споди, оскверни́вшуюся страстьми́ житія́ сего́ ду́шу мою́ і чи́сту ю покая́нієм і іспові́данієм прийми́, я́ко Благослове́н єси́ во ві́ки віко́в, амі́нь.

Потім: Прийді́те, поклоні́мся Царе́ві на́шему Бо́гу.

Прийді́те, поклоні́мся і припаде́м Христу́, Царе́ві на́шему Бо́гу.

Прийді́те, поклоні́мся і припаде́м Самому́ Христу́, Царе́ві і Бо́гу на́шему.

Возведо́х о́чі мої́ в го́ри, отню́дуже при́йдеть по́мощ моя́. По́мощ моя́ от Го́спода, сотво́ршаго не́бо і зе́млю. Не даждь во см'яте́ніє ноги́ твоєя́, ніже́ воздре́млеть храня́й тя; се, не воздре́млеть, ніже́ у́снеть храня́й Ізра́їля. Госпо́дь сохрани́ть тя, Госпо́дь — покро́в твой на ру́ку десну́ю твою́. Во дні со́лнце не ожже́ть тебе́, ніже́ луна́ но́щію. Госпо́дь сохрани́ть тя от вся́каго зла, сохрани́ть ду́шу твою́ Госпо́дь. Госпо́дь сохрани́ть вхожде́ніє твоє́ і ісхожде́ніє твоє́ от ни́ні і до ві́ка.

Се, ни́ні благослові́те Го́спода, всі раби́ Госпо́дні, стоя́щії в хра́мі Госпо́дні, во дво́ріх до́му Бо́га на́шего. В но́щех воздіжі́те руки́ ва́ша во свята́я і благослові́те Го́спода. Благослови́ть Тя Госпо́дь от Сіо́на, сотвори́вий не́бо і зе́млю.

Слава, і нині:

Святи́й Бо́же, Святи́й Крі́пкий, Святи́й Безсме́ртний, поми́луй нас. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Пресвята́я Тро́йце, поми́луй нас: Го́споди, очи́сти гріхи́ на́ша; Влади́ко, прости́ беззако́нія на́ша; Святи́й, посіти́ і ісціли́ не́мощі на́ша і́мене Твоєго́ ра́ди.

Го́споди, поми́луй. [Тричі]. Слава, і нині:

О́тче наш, І́же єси́ на Небесі́х, да святи́ться і́м'я Твоє́, да при́йдеть Ца́рствіє Твоє́, да бу́деть во́ля Твоя́, я́ко на Небесі́, і на землі́. Хліб наш насу́щний даждь нам днесь, і оста́ви нам до́лги на́ша, я́коже і ми оставля́єм должнико́м на́шим; і не введи́ нас во іскуше́ніє, но ізба́ви нас от лука́ваго.

Священник: Я́ко Твоє́ єсть Ца́рство: І ми: Амі́нь.

Пом'яни́ Го́споди, я́ко Благ, раби́ Твоя́, / і єли́ка в житії́ согріши́ша, прости́; / нікто́же бо безгрі́шен, то́кмо Ти / моги́й і преста́вленним да́ти поко́й.

Глубино́ю му́дрости человіколю́бно вся стро́яй, / і поле́зноє всім подава́яй, / єди́не Соді́телю, упоко́й Го́споди, ду́ші раб Твої́х; / на Тя бо упова́ніє возложи́ша, / Творця́, і Зижди́теля, і Бо́га на́шего.

Сла́ва, кондак: Со святи́ми упоко́й, / Христе́, ду́ші раб Твої́х, / іді́же ність болі́знь, ні печа́ль, / ні воздиха́ніє, / но жизнь безконе́чная.

І ни́ні, Богородичний: Блажи́м Тя всі ро́ди, Богоро́дице Ді́во; / в Тя бо Невмісти́мий Христо́с Бог наш вмісти́тися благоволи́. / Блаже́нні єсьми́ і ми, предста́тельство Тя іму́ще; / день бо і нощ мо́лишися о нас. / Тім воспіва́юще вопіє́м Ті: / ра́дуйся, Благода́тная, Госпо́дь с Тобо́ю!

Го́споди, поми́луй. [12 разів]

Пом'яни́, Го́споди, в наде́жді воскресе́нія жи́зні ві́чния усо́пшия отці́ і бра́тію на́шу, і вся во благоче́стії і ві́рі сконча́вшияся; і прости́ їм вся́коє согріше́ніє, во́льноє же і нево́льноє, сло́вом іли́ ді́лом, іли́ помишле́нієм согріше́нноє ї́ми. І всели́ я в мі́ста сві́тла, в мі́ста прохла́дна, в мі́ста поко́йна, отню́дуже отбіже́ вся́кая болі́знь, печа́ль і воздиха́ніє, іді́же присіща́єть світ лиця́ Твоєго́, весели́ть вся і́же от ві́ка святи́я Твоя́; да́руй їм і нам Ца́рствіє Твоє́ і прича́стіє неізрече́нних і ві́чних Твої́х благ, і Твоєя́ безконе́чния і блаже́нния жи́зні наслажде́ніє. Ти бо єси́ жизнь, і воскресе́ніє, і поко́й усо́пших рабо́в Твої́х, Христе́ Бо́же наш, і Тебі́ сла́ву возсила́єм со Безнача́льним Твої́м Отце́м, і Пресвяти́м, і Благи́м, і Животворя́щим Твої́м Ду́хом, ни́ні, і при́сно, і во ві́ки віко́в, амі́нь.

Пресла́вная Присноді́во, Ма́ти Христа́ Бо́га, принеси́ на́шу моли́тву Си́ну Твоєму́ і Бо́гу на́шему, да спасе́ть Тобо́ю ду́ші на́ша.

Упова́ніє моє́ — Оте́ць, прибі́жище моє́ — Син, покро́в мой — Дух Святи́й; Тро́йце свята́я, сла́ва Тебі́.

Священник: Сла́ва Тебі́, Христе́ Бо́же, упова́ніє на́ше, сла́ва Тебі́.

І ми: Слава, і нині: Го́споди, поми́луй. [Тричі]. Благослови́.

Христо́с, і́стинний Бог наш, моли́твами Пречи́стия Своєя́ Ма́тере, преподо́бних і богоно́сних оте́ць на́ших, і всіх святи́х поми́луєть і спасе́ть нас, я́ко Благ і Человіколю́бець.

І ми: Амі́нь.

Предстоятель, звершивши земний поклін, промовляє братії:

Благослові́те, отці́ святі́ї, прості́те мі, грі́шному.

І братія: Бог прости́ть ті, о́тче святи́й.

Священник промовляє: Помо́лимся о [вели́ком] господи́­ні і отці́ на́шем Блаже́ннійшем Митрополи́ті [або: Святі́йшем Патріа́рсі] Ки́євськом і всея́ [Руси́-] Украї́ни [ім'я], і о господи́­ні на́шем преосвяще́ннійшем єпи́скопі [або: архієпі́скопі, або: митрополи́ті], [ім'я].

І ми: Го́споди, поми́луй. ча́сто.

О богохрани́мій страні́ на́шей [Україні], власті́х і во́їнстві єя́. О отці́ на́шем, [ім'я], і всей во Христі́ бра́тії на́шей. О ненави́дящих і лю́б’ящих нас. О ми́лующих і служа́щих нам. О запові́давших нам недосто́йним моли́тися о них. О ізбавле́нії пліне́нних. О отше́дших отці́х і бра́тіях на́ших. О в мо́рі пла́вающих. О в не́мощех лежа́щих. Помо́лимся і о ізоби́лії плодо́в земни́х. І о вся́кой душі́ христия́н правосла́вних. Ублажи́м правосла́вния архієре́ї, і кти́тори свята́го хра́ма сего́ [або: святи́я оби́телі сея́]. Роди́телі на́ша і вся пре́жде отше́дшия отці́ і бра́тію на́шу, зді лежа́щия і повсю́ду правосла́вния.

Предстоя́тель: Рцем і о себі́ самі́х.

І ми: Го́споди, поми́луй. [Тричі]

І свяще́нник: Моли́твами святи́х оте́ць на́ших, Го́споди Ісу́се Христе́, Бо́же наш, поми́луй нас.

І ми: Амі́нь.