А́нгеле Бо́жий, храни́телю мой святи́й, живо́т мой соблюди́ во стра́сі Христа́ Бо́га, ум мой утверди́ во і́стиннім путі́ і к любві́ го́рній уязви́^* ду́шу мою́, да тобо́ю направля́єм получу́ от Христа́ Бо́га ве́лію ми́лость.

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Свята́я Влади́чице, Христа́ Бо́га на́шего Ма́ти, я́ко всіх Творця́ недоумі́нно ро́ждшая, моли́ бла́гость Єго́ всегда́ со храни́телем мої́м А́нгелом спасти́ ду́шу мою́, страстьми́ одержи́мую, і оставле́ніє гріхо́в дарова́ти мі.

Ірмо́с: Пої́м Го́сподеві, прове́дшему лю́ди Своя́ сквозі́ Чермно́є мо́ре, я́ко єди́н сла́вно просла́вися.

Ісусу: Го́споди Ісу́се Христе́, Бо́же мой, поми́луй м'я.

Піснь воспі́ти і восхвали́ти, Спа́се, Твоєго́ раба́ досто́йно сподо́би безпло́тному А́нгелу, наста́внику і храни́телю моєму́.

Приспів: Святи́й А́нгеле Бо́жий, храни́телю мой, моли́ Бо́га о мні.

Єди́н аз в неразу́мії і в лі́ності ни́ні лежу́, наста́вниче мой і храни́телю, не оста́ви мене́, погиба́юща.

Сла́ва: Ум мой твоє́ю моли́твою напра́ви твори́ти мі Бо́жія повелі́нія, да получу́ от Бо́га отда́ніє гріхо́в, і ненави́діти мі злих наста́ви м'я, молю́ся ті.

І ни́ні: Моли́ся, Діви́це, о мні, рабі́ Твоє́м, ко Благода́телю со храни́телем мої́м А́нгелом, і наста́ви м'я твори́ти за́повіді Си́на Твоєго́ і Творця́ моєго́.

Ірмос: Ти єси́ утвержде́ніє притека́ющих к Тебі́, Го́споди, Ти єси́ світ омраче́нних, і поє́ть Тя дух мой.

Святи́й А́нгеле Бо́жий, храни́телю мой, моли́ Бо́га о мні.

Все помишле́ніє моє́ і ду́шу мою́ к тебі́ возложи́х, храни́телю мой; ти от вся́кия м'я напа́сти вра́жия ізба́ви.

Святи́й А́нгеле Бо́жий, храни́телю мой, моли́ Бо́га о мні.

Враг попира́єть м'я, і озлобля́єть, і поуча́єть всегда́ твори́ти своя́ хоті́нія; но ти, наста́вниче мой, не оста́ви мене́ погиба́юща.

Сла́ва: Пі́ти піснь со благодаре́нієм і усе́рдієм Творцю́ і Бо́гу даждь мі, і тебі́, благо́му А́нгелу храни́телю моєму́; ізба́вителю мой, ізми́ м'я от враг озлобля́ющих м'я.

І ни́ні: Ісціли́, Пречи́стая, моя́ многонеду́жния стру́пи, я́же в душі́, прожени́ враги́, і́же при́сно бо́рються со мно́ю.

Го́споди, поми́луй. [Тричі]

От любве́ душе́вния вопію́ ті, храни́телю моєя́ душі́, всесвяти́й мой А́нгеле: покри́й м'я і соблюди́ от лука́ваго ловле́нія всегда́ і к жи́зні наста́ви небе́сній, вразумля́я, і просвіща́я, і укріпля́я м'я.

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Богоро́дице безневі́стная, Пречи́стая, Я́же без сі́мені ро́ждши всіх Влади́ку, Того́ со А́нгелом храни́телем мої́м моли́ ізба́вити мі ся вся́каго недоумі́нія і да́ти умиле́ніє і світ душі́ моє́й і согріше́нієм очище́ніє, Я́же єди́на вско́рі заступа́ющи.

Ірмос: Усли́шах, Го́споди, смотре́нія Твоєго́ та́їнство, разумі́х діла́ Твоя́ і просла́вих Твоє́ Божество́.

Святи́й А́нгеле Бо́жий, храни́телю мой, моли́ Бо́га о мні.

Моли́ Человіколю́бця Бо́га ти, храни́телю мой, і не оста́ви мене́, но при́сно в ми́рі житіє́ моє́ соблюди́ і пода́ждь мі спасе́ніє необори́моє.

Святи́й А́нгеле Бо́жий, храни́телю мой, моли́ Бо́га о мні.

Я́ко засту́пника і храни́теля животу́ моєму́ приє́м тя от Бо́га, А́нгеле, молю́ тя, святи́й, от вся́ких м'я бід свободи́.

Сла́ва: Мою́ скве́рность твоє́ю святи́нею очи́сти, храни́телю мой, і от ча́сти шу́їя^* да отлуче́н бу́ду моли́твами твої́ми і прича́стник сла́ви явлю́ся.

І ни́ні: Недоумі́ніє предлежи́ть мі от обише́дших м'я зол, Пречи́стая, но ізба́ви м'я от них ско́ро: к Тебі́ бо єди́ній прибіго́х.

Ірмос: У́тренююще вопіє́м Ті: Го́споди, спаси́ ни; Ти бо єси́ Бог наш, ра́зві Тебе́ іно́го не ві́ми.

Святи́й А́нгеле Бо́жий, храни́телю мой, моли́ Бо́га о мні.

Я́ко імі́я дерзнове́ніє к Бо́гу, храни́телю мой святи́й, Сего́ умоли́ от оскорбля́ющих м'я зол ізба́вити.

Святи́й А́нгеле Бо́жий, храни́телю мой, моли́ Бо́га о мні.

Сві́те сві́тлий, сві́тло просвіти́ ду́шу мою́, наста́вниче мой і храни́телю, от Бо́га да́нний мі А́нгеле.

Сла́ва: Сп'я́ща м'я злі тягото́ю гріхо́вною, я́ко бдя́ща сохрани́, А́нгеле Бо́жий, і возста́ви м'я на славосло́віє моле́нієм твої́м.

І ни́ні: Марі́є, Госпоже́ Богоро́дице безневі́стная, наде́ждо ві́рних, вра́жія возноше́нія низложи́, пою́щия же Тя возвесели́.

Ірмос: Ри́зу мні пода́ждь сві́тлу, одія́йся сві́том я́ко ри́зою, многоми́лостиве Христе́ Бо́же наш.

Святи́й А́нгеле Бо́жий, храни́телю мой, моли́ Бо́га о мні.

Вся́ких м'я напа́стей свободи́ і от печа́лей спаси́, молю́ся ті, святи́й А́нгеле, да́нний мі от Бо́га, храни́телю мой до́брий.

Святи́й А́нгеле Бо́жий, храни́телю мой, моли́ Бо́га о мні.

Освіти́ ум мой, бла́же, і просвіти́ м'я, молю́ся ті, святи́й А́нгеле, і ми́слити мі поле́зная всегда́ наста́ви м'я.

Сла́ва: Уста́ви се́рдце моє́ от настоя́щаго м'яте́жа і бді́ти укріпи́ м'я во благи́х, храни́телю мой, і наста́ви м'я чу́дно к тишині́ живо́тній.

І ни́ні: Сло́во Бо́жиє в Тя всели́ся, Богоро́дице, і челові́ком Тя показа́ небе́сную лі́ствицю; Тобо́ю бо к нам Ви́шній соше́л єсть.

Го́споди, поми́луй. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Яви́ся мні милосе́рд, святи́й А́нгеле Госпо́день, храни́телю мой, і не отлуча́йся от мене́, скве́рнаго, но просвіти́ м'я сві́том неприкоснове́нним і сотвори́ м'я досто́йна Ца́рствія Небе́снаго.

Ікос: Уничиже́нную ду́шу мою́ мно́гими собла́зни ти, святи́й предста́телю, неізрече́нния сла́ви небе́сния сподо́би, і піве́ць с ли́ки безпло́тних сил Бо́жиїх, поми́луй м'я і сохрани́, і по́мисли до́брими ду́шу мою́ просвіти́, да твоє́ю сла́вою, А́нгеле мой, обогащу́ся, і низложи́ зломи́слящия мні враги́, і сотвори́ м'я досто́йна Ца́рствія Небе́снаго.

Ірмос: От Іуде́ї доше́дше о́троци в Вавило́ні іногда́, ві́рою Тро́їчеською пла́мень пе́щний попра́ша, пою́ще: отце́в Бо́же, благослове́н єси́.

Святи́й А́нгеле Бо́жий, храни́телю мой, моли́ Бо́га о мні.

Ми́лостив бу́ди мі і умоли́ Бо́га, Госпо́день А́нгеле, імі́ю бо тя засту́пника во всем животі́ моє́м, наста́вника же і храни́теля, от Бо́га дарова́ннаго мі во ві́ки.

Святи́й А́нгеле Бо́жий, храни́телю мой, моли́ Бо́га о мні.

Не оста́ви в путь ше́ствующия душі́ моєя́ окая́нния уби́ти разбо́йником, святи́й А́нгеле, я́же ті от Бо́га предана́ бисть непоро́чні, но наста́ви ю на путь покая́нія.

Сла́ва: Всю посра́млену ду́шу мою́ привожду́ от лука́вих мі по́мисл і діл, но предвари́, наста́вниче мой, і ісціле́ніє мі пода́ждь благи́ми по́мисли, уклоня́ти мі ся всегда́ на пра́вия стезі́.

І ни́ні: Прему́дрости іспо́лни всіх і крі́пости Боже́ственния, Іпоста́сная Прему́дросте Ви́шняго, Богоро́диці ра́ди, ві́рою вопію́щих: оте́ць на́ших Бо́же, благослове́н єси́.

Ірмос: Царя́ Небе́снаго, Єго́же пою́ть во́ї а́нгельстії, хвалі́те і превозносі́те во вся ві́ки.

Святи́й А́нгеле Бо́жий, храни́телю мой, моли́ Бо́га о мні.

От Бо́га по́сланний, утверди́ живо́т мой, раба́ твоєго́, преблаги́й А́нгеле, і не оста́ви мене́ во ві́ки.

Святи́й А́нгеле Бо́жий, храни́телю мой, моли́ Бо́га о мні.

А́нгела тя су́ща бла́га, душі́ моєя́ наста́вника і храни́теля, преблаже́нне, воспіва́ю во ві́ки.

Сла́ва: Бу́ди мі покро́в і забра́ло в день іспита́нія всіх челові́к, во́ньже огне́м іскуша́ються діла́ блага́я же і зла́я.

І ни́ні: Бу́ди мі помо́щниця і тишина́, Богоро́дице Присноді́во, рабу́ Твоєму́, і не оста́ви мене́ лише́на би́ти Твоєго́ влади́чества.

Ірмос: Воі́стину Богоро́дицю Тя іспові́дуєм, спасе́ннії Тобо́ю, Ді́во чи́стая, с безпло́тними ли́ки Тя велича́юще.

Ісусу: Го́споди Ісу́се Христе́, Бо́же мой, поми́луй м'я.

Поми́луй м'я, єди́не Спа́се мой, я́ко ми́лостив єси́ і милосе́рд, і пра́ведних лико́в сотвори́ м'я прича́стника.

Святи́й А́нгеле Бо́жий, храни́телю мой, моли́ Бо́га о мні.

Ми́слити мі при́сно і твори́ти, Госпо́день А́нгеле, блага́я і поле́зная да́руй, я́ко си́льна яви́ в не́мощі і непоро́чна.

Сла́ва: Я́ко імі́я дерзнове́ніє к Царю́ Небе́сному, Того́ моли́ с про́чими безпло́тними поми́ловати м'я, окая́ннаго.

І ни́ні: Мно́го дерзнове́ніє іму́щи, Ді́во, к Вопло́щшемуся із Тебе́, преложи́ м'я от уз і разріше́ніє мі пода́ждь і спасе́ніє моли́твами Твої́ми.

А́нгеле Христо́в святи́й, к тебі́ припа́дая, молю́ся, храни́телю мой святи́й, прида́нний мні на соблюде́ніє душі́ і ті́лу моєму́ грі́шному от свята́го креще́нія, аз же своє́ю лі́ностію і свої́м злим оби́чаєм прогні́вах твою́ пречи́стую сві́тлость і отгна́х тя от себе́ всі́ми сту́дними ді́ли: лжа́ми, клевета́ми, за́вистію, осужде́нієм, презо́рством^*, непоко́рством, братоненавиді́нієм і злопомні́нієм, сребролю́бієм, прелюбодія́нієм, я́ростію, ску́постію, об'яде́нієм без си́тости і опи́вством, многоглаго́ланієм, зли́ми по́мисли і лука́вими, го́рдим оби́чаєм і блу́дним возбіше́нієм, іми́й самохоті́ніє на вся́коє плотсько́є вожделі́ніє. О зло́є моє́ проізволе́ніє, єго́же і ско́ти безслове́снії не творя́ть! Да ка́ко возмо́жеши воззрі́ти на м'я іли́ приступи́ти ко мні, а́ки псу смердя́щему? Кото́рима очи́ма, А́нгеле Христо́в, воззри́ши на м'я, опле́тшася злі во гну́сних ді́ліх? Да ка́ко уже́ возмогу́ отпуще́нія проси́ти го́рким і злим мої́м і лука́вим дія́нієм, в ня́же впа́даю по вся дні і но́щі, і на всяк час? Но молю́ся ті припа́дая, храни́телю мой святи́й, умилосе́рдися на м'я, грі́шнаго і недосто́йнаго раба́ твоєго́ [ім'я], бу́ди мі помо́щник і засту́пник на зла́го моєго́ сопроти́вника святи́ми твої́ми моли́твами, і Ца́рствія Бо́жия прича́стника м'я сотвори́ со всі́ми святи́ми всегда́, і ни́ні, і при́сно, і во ві́ки віко́в. Амі́нь.