Глава 3
1
И рече́ ко мнѣ́: сы́не человѣ́чь, снѣ́ждь сви́токъ се́й, и иди́ и рцы́ сыно́мъ Ізра́илевымъ.
2
И отверзо́хъ уста́ моя́, и напита́ мя сви́ткомъ си́мъ
3
и рече́ ко мнѣ́: сы́не человѣ́чь, уста́ твоя́ снѣдя́тъ, и чре́во твоє́ насы́тится сви́тка сего́ да́ннаго тебѣ́. И снѣдо́хъ єго́, и бы́сть во устѣ́хъ мои́хъ я́ко ме́дъ сла́докъ.
4
И рече́ ко мнѣ́: сы́не человѣ́чь, иди́ и вни́ди въ до́мъ Ізра́илевъ, и глаго́ли словеса́ моя́ къ ни́мъ:
5
я́ко не къ лю́демъ глубокорѣ́чивымъ и косноязы́чнымъ посыла́ємь єси́, къ до́му Ізра́илеву,
6
ниже́ къ лю́демъ мно́гимъ иноязы́чнымъ, инорѣ́чивымъ, ни тя́жкимъ язы́комъ су́щымъ, и́хже не разумѣ́лъ бы єси́ слове́съ: а́ще же и къ тацѣ́мъ посла́лъ бы́хъ тя́, то́ и ті́и послу́шали бы́ша тебе́:
7
а до́мъ Ізра́илевъ не восхо́щетъ послу́шати тебе́, поне́же не хотя́тъ слу́шати мене́, я́ко ве́сь до́мъ Ізра́илевъ непокори́ви су́ть и жестокосе́рди:
8
и се́, да́хъ лице́ твоє́ си́льно проти́ву лица́ и́хъ, и прю́ {Євр.: чело́.} твою́ укрѣплю́ проти́ву при́ и́хъ:
9
и бу́детъ, всегда́ крѣпча́є ка́мене да́хъ прю́ твою́: не убо́йся и́хъ, ни ужаса́йся лица́ и́хъ, зане́ до́мъ разгнѣ́ваяй є́сть.
10
И рече́ ко мнѣ́: сы́не человѣ́чь, вся́ словеса́, я́же глаго́лахъ съ тобо́ю, возми́ въ се́рдце твоє́ и уши́ма твои́ма послу́шай:
11
и ше́дъ вни́ди въ плѣ́нъ къ сыно́мъ люді́й твои́хъ, и рече́ши къ ни́мъ и возглаго́леши къ ни́мъ: та́ко глаго́летъ Адонаі́ Госпо́дь: а́ще у́бо послу́шаютъ и а́ще у́бо повину́тся.
12
И взя́ мя ду́хъ, и слы́шахъ гла́съ за собо́ю тру́са вели́ка, глаго́лющихъ: благослове́на сла́ва Госпо́дня от мѣ́ста єго́.
13
И ви́дѣхъ гла́съ кри́лъ живо́тныхъ скриля́ющихся дру́гъ ко дру́гу, и гла́съ коле́съ держа́щься и́хъ, и гла́съ тру́са вели́ка.
14
И ду́хъ воздви́же мя́ и взя́ мя, и поидо́хъ вознесе́нъ во устремле́ніи ду́ха моєго́, и рука́ Госпо́дня бы́сть на мнѣ́ крѣ́пкая.
15
И внидо́хъ въ плѣ́нники вознесе́нъ, и обыдо́хъ живу́щыя на рѣцѣ́ Хова́ръ, и сѣдо́хъ ту́ се́дмь дні́й, ходя́ посредѣ́ и́хъ.
16
И бы́сть по седми́хъ дне́хъ сло́во Госпо́дне ко мнѣ́ глаго́ля:
17
сы́не человѣ́чь, стра́жа да́хъ тя́ до́му Ізра́илеву, да слы́шиши сло́во от у́стъ мои́хъ и воспрети́ши и́мъ от мене́.
18
Внегда́ глаго́лати ми́ беззако́ннику: сме́ртію у́мреши: и не возвѣсти́ши єму́, ни соглаго́леши, є́же оста́тися беззако́ннику и обрати́тися от пути́ своєго́, є́же жи́ву бы́ти єму́: беззако́нникъ то́й въ беззако́ніи своє́мъ у́мретъ, кро́ве же єго́ от руки́ твоєя́ взыщу́.
19
И ты́ а́ще возвѣсти́ши беззако́ннику, и не обрати́тся от беззако́нія своєго́ и от пути́ своєго́ [беззако́нна]: то́й беззако́нникъ во беззако́ніи своє́мъ у́мретъ, а ты́ ду́шу твою́ изба́виши.
20
И єгда́ соврати́тся пра́ведникъ от пра́вдъ свои́хъ и сотвори́тъ согрѣше́ніє: и да́мъ му́ку предъ ни́мъ, то́й у́мретъ, я́ко ты́ не воспрети́лъ єси́ єму́, и во грѣсѣ́хъ свои́хъ у́мретъ, зане́ не помяну́тся пра́вды єго́, я́же сотвори́: кро́ве же єго́ от руки́ твоєя́ взыщу́.
21
Ты́ же а́ще возвѣсти́ши пра́ведному, є́же не согрѣши́ти, и то́й не согрѣши́тъ: пра́ведный жи́знію поживе́тъ, я́ко воспрети́лъ єси́ єму́, и ты́ твою́ ду́шу изба́виши.
22
И бы́сть на мнѣ́ рука́ Госпо́дня, и рече́ ко мнѣ́: воста́ни и изы́ди на по́ле, и та́мо возглаго́лется къ тебѣ́.
23
И воста́хъ и изыдо́хъ на по́ле: и се́, та́мо сла́ва Госпо́дня стоя́ше, я́коже видѣ́ніє и я́коже сла́ва Госпо́дня, ю́же ви́дѣхъ на рѣцѣ́ Хова́ръ, и падо́хъ на лицы́ моє́мъ.
24
И пріи́де на мя́ ду́хъ и поста́ви мя́ на ногу́ моє́ю: и глаго́ла ко мнѣ́ и рече́ ми́: вни́ди и затвори́ся средѣ́ до́му твоєго́.
25
И ты́, сы́не человѣ́чь, се́, да́шася на тя́ у́зы, и свя́жутъ тя́ и́ми, и не изы́деши от среды́ и́хъ:
26
и язы́къ тво́й привяжу́ къ горта́ни твоєму́, и онѣмѣ́єши и не бу́деши и́мъ въ му́жа обличе́нія, поне́же до́мъ разгнѣ́ваяй є́сть:
27
и внегда́ глаго́лати ми́ къ тебѣ́, отве́рзу уста́ твоя́, и рече́ши къ ни́мъ: сія́ глаго́летъ Адонаі́ Госпо́дь: слы́шай да слы́шитъ, и не покаря́яйся да не покаря́єтся, зане́ до́мъ преогорчева́яй є́сть.
